رواية أرض الخناجر الفصل الثاني والثمانون بقلم ايلول
بغيابك ذبلنه ورگه ورگه
والله اشعل الروح شموع لو اجيت
تدري انتَ شكثر تكتل الفرگه
احرك عمــري الك لو يوم رديت
واليابس والاخضر هم احرگه...
══━━━━✥◈✥━━━━══
ندى:: صرخت بكل صوتي وانه اشوف جنود مسلحين يخوفون تارسين الهول وجوهم مغطايه وعمي وليد مجتف مكعدينه على اركبه وحاطين السلاح براسه بلا اي صوت فزوا على صريخي طلعلهم وهـــب وعمه طلعت من غرفتها وصرخت مصدومة بيهم اثنين منهم حطوا اديهم بأدين عمي وليد وشالوه طلعوا بيه، عمه تصيح م ما ندري شني الفلم ، وبدور نزلت صيحت بخوف ووهب خزرها رجعت تركض للغرفة، مشيت بسرعة الرضا من سمعته يبجي وقبل لا ادخل للغرفة لمحت صــيهد بالحوش واكف يدخن ووجهه ما يكصه السيف .
وهـــب:: ضنيتها سهله بي نمردت روحـــي ابوي ينجر گدامي وانا واخوي المشتكين عليه انشال من بيناتنا واحنا ساكتين درت وجهي الامي أشرتلها اسكتي وطلعت للحوش صــيهد واجف يسولف وي الضابط وكفت يمهم مد ايده يسلم علي
عمار:: انا عمار ابن حيدر آل محسن .
-أهلاً وسهلاً
درت وجهي الصيهد اشوفنه هم مستصعبها مثلي لو هينه،وجهه ما يتفسر الجكارة ترجف بأيده من الحرگة، مشينا بره يم سياراتهم الجنود يفترون داير ماداير بيوتتنا وولدنا التموا مستغربين محد منهم يدري بالسالفه
وكفنه گبال بيت عمي شامل، اسمع صوت ابوي يصيح
-تعال ليه صــيهد تعال ليه.
كهلان واكف بباب بيتهم يعاين علينه عاگد حاجبه هز راسه يسأل شكو دنگت ساكت وعمار يحجي وي صــيهد
عمار:: انتم لو ما مشتكين عليهم علمود شاكر چا ما شردوا منّ بيوتهم، بس وين يروح يجي يوم ونوصله لا تشيل هم.
هز راسه صــيهد اي بلا صوت مختنگ وكلساع يلتفت للسيارة البيها ابوي، سلموا ومشوا السياراتهم فروهن وطلعوا وحده وره الثانية واحنا نعاين وراهم وندري وين ودينه ابونا صاح سلطان
-شنّي السالفة صــيهد وين اخذوا ابوك؟ شني ما تحجووون؟
مــيثم:: صــيهد شصاير؟
دار منهم يمسح بوجهه عاين الكهلان ميت من القهر
صــيهد:: أرضيك هيج؟ سجنته، سجنت ابوي يتجازه على سوالفه وغدره الابوك ارررضيك هيج كهلان ارضيك؟
يحجي بحرگه وكهلان يعاينله ساكت، مديت ايدي الصيهد اريد احاجيه عافني ومشه وكهلان طب لبيتهم وسدّ الباب عاينولي الولد بحيره
ســليم:: اجوا من بغداد؟
-اي، حتى محد من السلف يعرف السالفة
حط ايده على حلگه يسكتني والتفت البيتهم مايريد امه تسمع أشر مــيثم لبعيد مشينه يمه تونه نحجي والتلفونات دگت وندري بيهم وادم السلف خابروا ينشدون ماردينه على احد
سلطان:: بعدهن السيارات هنا وخابرونه شنگول؟
وهـــب::صــيهد يحلها لحد يرد هسه شرف شيگلهم.
مــيثم:: علي ابن غانم هم كضوه؟
-مالاگينه مو عليهم إلقاء قبض علمود الدعوى مال شاكر شاردين ماضالين ببيوتهم.
سلطان:: روح حاجي صــيهد حتى نتفق على نفس الحجي مو كل واحد بينا يحجيله سالفة شوف شني يريد نحجي.
عفتهم ورديت للبيت طبيت للهول اسمع صوته يحاجي امي مختنك وامي تبجي على حاله طبيت للغرفة اعاينله كاعد گبال امي ميت من القهر ويحجي بغصة
صــيهد:: ما خلالي حل والله ما خلالي حل من دون خلگ الله ولا چنهم اخوه افتروا عليه كتلوه ولحگوا عياله كضوهم كضيااان، خلللاني بأيدي اسجنننه.
جــويريه:: مسحت عيوني گـــلبي ممرود عليه ضرب ايده بوجهه حييل محترك گلبه ركض وهـــب كض اديه وحاله حال صــيهد ميتين من القهر كالتله عمه
ايمان:: انتَ لا طكيته ولا سويت شي الله يعاقبك عليه، وگفت وي الحق وبالقانون ليش تقهر رروحك وولك يمه صــيهد.
جرته الصدرها ضم وجهه بشيلتها شهگ يبجي ووهب التفت علينه يأشر اطلعن بسرعة طلعنه وسد الباب ورانه وكفنه بالهول وحده تباوع بوجهه الثانيه ونسمع صوته انطحن گـــلبي عليه التفتت على باب الهول دخلت مــاسه دموعها يجرن وترجف راحتلها ندى بسرعة تريد تحاجيها مالحكت عليها كعدت بالمطبخ وبچت بصوت عالي تناشغ، كعدت بــدور كدامها تبجي وياها وتگلها
-لا تبجين جا غير سوه جريمه؟
طلعوا الولد بسرعة على صوتها صــيهد عيونه حمر ويمسحهن بردنه بس يردون يشوفون مــاسه كعدوا كدامها اثنينهم يحاجونها وحاطين ايدهم على ظهر بــدور المگابلتها يبجن مقهورات وهمه يحاجونهن وصوتهم مختنك گالها صــيهد بحرگه
صــيهد:: عليمن تبجن؟ يوم سمعجن حجاية زينه؟ يوم نشدجن شبيجن ما بيجن؟ يوم وكف بوجهه جدجن وما رضى يظلمجن؟ عليمنن تبجن؟
جراهن وهـــب من اديهن گومهن يحاجيهن
وهـــب:: ينكتل گدام عيونجن لو يتحاسب بالسجن ياهو احسن؟
حجه والتفتت للباب من طبت رغد عيونها كبار ومتروسات دموع ما تبجي بس تعاينلهم وكف صــيهد متحسر عاين عليها ساكت وهي بس رمشت طاحت دموعها دنگت عيونها تمسحهن صاح بحرگه
صــيهد:: استغفر الله.
طلع من البيت روحه بخشمه ووهب يعاين بيناتهن محتار ورغد دموعها يجرن وتگله
رغد:: ما باچيه عليه ما باچيه عليه بوجوده وبدونه احنا ايتاام.
دارت وجها تمسح بعيونها سكت وهـــب ومشه لحگ صــيهد اعاين عليهن ساكته ما ادري شحجي ولا اگدر الومهن حقهن ينقهرن ويبجن، صاحت عليهن خاله ايمان مشينا يمها كلنا التمن عليها البنات يبجن وهيه وياهن مسحت عيونها ومدت ايدها تمسح دموعهن وحده وحده وتحاچيهن.
ايمان:: ادري عليمن تبچن ودري الغاثتجن مو سجنته چيه مو خوش ابو وما يستاهلچن بس فـــدوه اروحنله ربي عوضجن باخوه يسوون سلف احمدن الله واشكرنه بطلن البچي، يمه تهضمن صــيهد لا يطيح اخيچن وينكسر ظهرنا.
وخرن منها ساكتات كالتلهن عمه
-گومن ردن لبيوتجن، ما تداومن اليوم شني؟
مــاسه هزت راسها لا وبدور عاينت للساعة ماضل وكت محد من عدنا داومت بس رضا راح وي حسين وزهره، رجعت للمشتمل وفكري يم صــيهد
اخذت كرار غسلتله ورجعت للهول كعدته وشغلت التلفزون وهو يباوعلي ويضحك گمت اغطي وجهي بالشال واجر الشال افززه يضحك بكل صوته نساني كلشي والتهيت العب وياه حتى ريوك ما سويت
-كرورري ماما ووولي
وهو يمووت من الضحك درت على فتحة باب الهول طب صــيهد اعصاب وكرار بس لمحه ضحك وصاح
-بببه.
وصيهد يعاينله متحسر مسح وجهه وكعد گدامه شاله خلاه بحضنه يبوسه ويگله
-ها بويه ها يا بعد حيلي.
باسه وشمه من رگبته حيييل ورجع يباوع بوجهه بقهر مدري شبيه مديت ايدي امسح على ايده باوعلي وهز راسه متحسف .
عفتهم وگمت للمطبخ اسوي ريوك واباوعله يوگف كرار يريده يتعلم لان المفروض البعمره عبروا السنة يگدرون اقل شي يمشون خطوات بسيطة.
اخذت صينية الريوك وكعدت يمهم كعدنا كرار بيناتنا اخلي بحلگه بس بيض مثل ما خالتي ايمان علمتني لو يبقى عليًَ مجلبتله بس بالحليب، وهو خابصنه يرطن ببه ما ببه درت عيني الصيهد يشرب بس چاي وصافن.
اخذت الصينية للمطبخ غسلت مواعين انظف واباوعله كرار يلعب وياه وهو لازمه من ايده بس باله مو وياه وكل شوي يجرله حسره تزرف گـــلبي.
خلصت شغلي ورحت يمه اخذت كرار من حضنه وهو ضل يتدلع تعود هيج وكت يروح سم بيبيته وندى عفته على صفحة وتقربت يم صــيهد باوعلي ساكت مديت ايدي الزم ايده
-ما سويت الا الصح ليش تقهر روحك بعد؟
دنك الغصه خانگته هز راسه لا كوه يحجي
-ابني هم يسوي بيه هيج، هم يكبر ويسوي بيه مثل ما انا سويت بأبوي.
-لا غلطان
-ما غلطان الدنيا دين، وجاي نشوف بعيونا مثل ما شاكر كتل ابوه سجاد كتل شاكر، ومثل ما انا سجنت ابوي يجي يوم وكرار يسجني.
باوعت بوجهه ساكته محتاره وياه وهو عبالك مقتنع بكلامه. افتريت كعدت گدامه متربعه حتى احجي عدل لزمت اديه اثنينهن
-باوع انتَ ما سويت شي حرام بالعكس لو باقي ساكت حرام، خلي اقرالك آية قرآنية حتى تفهمني بس لا تگول هاي تتفلسف براسي ها اقرالك؟
جر نفس طويل هز راسه اي
-بسم الله الرحمن الرحيم
قال تعالى:: "يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ وَلَوْ عَلَى أَنفُسِكُمْ أَوِ الْوَالِدَيْنِ وَالْأَقْرَبِينَ"
صــيهد:: ما ردت اوصل وياه هيج شما دارت الدنيا يضل ابوي، والوادم تعيرني بيه، بس ما اگدر اسكت اكثر وما اريدن نهايته مثل شاكر مكتول، سوالف ابوي هواي لو شما سويت ما يعدن وحده اثگل من الثانية، يتفق وي الغربه حتى يكتل اخوه بس لان هو حگ وهم باطل بس لان يوكف بوجهم ومايخليهم يظلمون الوادم كتلوه بدم بارد وبچوا بفاتحته وبدفنته شاگين دشاديشهم ويتثاغبون، ولج والله ما تحطين عليهم همه الكاتلينه، ويسكت يسكت ابوي عبالج؟ بدل ما يحاول يصحح السواه يصيح والله الا اكتلكم واكتل كهلان، اعوفنه وهم يسويله مصيبة ويطيح بيها كهلان ؟؟ واضل انا حاير بينهم لو يكتل كهلان لو كهلان يكتله.
ماضل بوجهي غير هالحل والله ماضل.
حجه بحرگه ايده ترجف وداير وجهه من عندي مفرفح من القهر سكتت وگمت حبتله ماي رجعت يمه. اخذه من ايدي شرب ساكت مديت ايدي على جتفه
-ما غلطت انتَ صــيهد هذا اللازم يصير
-ادري ادري بس والله صعبة وروح عمي شامل داگه بگلبي
سكتت محتاره وهو دننك ميت من القهر حرت شنو احجي وياه شال راسه باوع بعيوني بياض عينه احمر ومضيگهن گوه يرمش همس بصوت مخنوك
- وفوگ كل هذا، كهلان ماضلت بيه روح جاي ينتهي گدام عيني ما ادري شني الاسويه.
دار وجهه من عندي مختنك يباوع للباب والشمس التدخل علينا
-الله يساعده ويصبر گلبه مو هينه يوميه ينفجع بواحد من اخوانه، وكل الصار هاي الفترة مو هين صــيهد انطيه مجال هو انسان مؤمن وصبور تعدي فترة ويتعود.
ضحك مستهزئ ويحجي بحرگه
-جا انا شلي غرض وما يحاجيني ولا يعاينلي؟
-خلي روحك بمكانه هو كاره كلشي هسه وماله خلك حتى روحه.
دار وجهه ضايج ويدخن،گمت من يمه للمطبخ شويه واجت خاله يمه كعدوا بالهول تحاجيه وتلومه لان يقهر روحه اباوع التلفونه كل شوي واحد يخابره مره يرد ومره يعوفه سمعته گالهم تشابهه اسماء وسد السالفة اخذتلهم چاي وكعدت يمهم خاله گالتله خاله
-لو تتثالث الدنيا ما ادنك راسي دامه انا على حگ، ضال تلوم بروحك وتقهرها عليمن؟ يمه انه ما اكلك هاي هيه عوفوه لا يمه ادوا واجبكم وياه روحوله وزوروه وشوفوا شمحتاج بس ما ارضى تنقهرون لأنكم على حگ وما سويتوا غير اليرضي الله.
هز راسه اي ساكت خاله بقت يمنه شويه ومن رادت تروح كرار بجه وراها اخذته وياها گوه شايلته مابيها حيل هو كوه تجر برجلها.
وكف صــيهد يريد يطلع
-وين رايح؟
-للگاع.
-وصلني وياك البيت خالي شامل خلي اروح يم البنات.
هز راسه خوش لبست شالي وعبايتي باوعلي يسأل
-جا وكرار؟
-غير يم بيبي عوفه.
مشينا سوا واول ما طلعنا من الحوش لمحت كهلان يمشي حاني ظهره وهاسكي يركض گدامه هم رايح للگاع عافني صــيهد ببابهم وتبعه دگيت الباب واسمع صوت شمس تصيح وتدلع
-اااي اااي.
فتحتلي الباب شعرها مفتوح اسود وثخين يخبل ووراها بباب الهول واكفه رنـــه،
شمس:: جوووري
حضنتني من رجليَّ دنگت شلتها أبوس بيها
-يا روح جوري يا عمرها
رنـــه:: عداوه عدها وي الخاله.
ضحكت نزلتها ودخلت سلمت على رنـــه والتفتت الريمه كاعده بالمطبخ تعجن صاحت
-بس انه تگلي خاله
وشمس ركضتلها جلبت برگبتها من وره ريـــمه تعجن وهي تبوس بيها
-مو اني ما تحب تكبرني يعني تشوفني بنيه صغيرة ليش تگلي خاله.
ريـــمه:: جا انه عجوز؟ وعلي اگوم ادوفج بالطحين.
ضحگت وشمس بعدها تغور بيه وتبوس ريـــمه حييل كعدنا بالهول يم علاوي بين ما ريـــمه كملت عجن واجت يمنه سلمت عليها وكعدنا نسولف بس كل وحده بيهن بالها بعيد يحاولون يحجن ويسون نفسهن طبيعات وتعودن وكل هذا چذب رنـــه تصفن متحسره وعيونها للساعة وريمه تباوع للباب كل شويه بالها يم سجاد.
كامت من يمنه رنـــه تبدل الشمس باوعت الريمه اسأل
-شلونها رنـــه ما تحسينها احسن؟
ريـــمه:: تحسرت اهز راسي لا، شلونها الخوف ماكل گلبها وتخلص الليل بچي، بقت يمنه جــويريه ساعة وراحت.
گمت للمطبخ كملت الغده ورجعت اباوع الرنه كاعده بغرفتها يم الشباچ حاضنه رجليها الصدرها وتعاين الشمس تلعب گدامها
-رنـــه.
شالت راسها الي فازه
-راح اروحن اشوفن سجاد وهاجر ما ابطي عشر دقايق واجي.
مسحت وجها عيونها ذبلانه هزت راسها خوش حطيت علاوي بالباب واعاينله يمشيلها وبس يريد يوصل الايدها يخاف لا يطيح فتحتله أيدها بساع شمر روحه بحضنها شبگته تبوسه حييل وهو يضحكلها.
عفتهم وطلعت متحسره وحايره بزماني ما مرتاحه وگلبي يم سجاد خايفه عليه حييل، لبست عبايتي وطلعت فتحت باب الحوش مال اهلي وطبيت ســليم كاعد بره يم الحديقة يعاين بتلفونه وفز على صوت الباب وگف من شافني سلمت عليه انشده
-شلونه سجاد؟
-نفس وضعه.
تحسرت ودرت وجهي على صوت امي طلعت من المطبخ ترفع ردنها وتصيح
-هلاااا هلااا بالماعوفت اربيها
تحجي وطكت رجليها بحرگه وكف ســليم بوجها وهي بس تريد تمد ايدها وتجرني
ميلاد:: چلبه ووولج ولا چنچ بت بطنيي.
هزيت ايدي اضــحك وهي انتفضت وهدت بحرگه تمد ايدها وسليم كاضها عفتها بأيده وطبيت للبيت اسمع غلطها ودعاويها ما مهتمه ميت للغرفة سجاد متمدد لام رجليَّه الصدره وعيونه للفراغ وهجوره كاعده يمه ترسم بستها ومشيت يمه كعدت على طرف الچرباية مديت ايدي اوخر شعره من كصته ودنگت ابوسه
-يروح اختك، شلونك سجاد.
وهو ساكت بس يرمش بعيونه درت وجهي الهاجر هزت راسها لا مو زين اشرتلها تعاي يمي، وگفت گدامي مديت ايدي اكض اديها الدافيات واحاجيها بهمس عيني بعينها
-شلونج؟ امي خوما تحاجيج.
أشرت بأيدها زينه ولا ما تحاجيني
-احجي لا تأشرين.
-ابتسمت تهز راسها لا، عصرت اصابعهع بين اصابعي
-هااجر لا تشلعين گـــلبي احجي.
هاجر::عوفيني هيج مرتاحه ما أحب احجي
عاينت بوجها ساكته اشرتلي بحواجبها على سجاد رديت احجي وياه
-سجاد كهلان ينشد عليك والله، تجي يمنا للبيت؟
حرك راسه لا
-جا شلون سجاد تضل هيج؟ والله گـــلبي جاي يتگطع، أمشي وياي غاد ادرين بالي عليك فـــدوه اروحنك.
هز راسه لا ومد ايده الترجف جر ايدي لوجهه يبوس اصابعي وگوه يحجي
سجاد:: عوفيني .
سكتت اعاينله ميته من القهر بسته وطلعت من يمه امي بالمطبخ بعدها تحجي وتغلط وسليم واگف بوجها عبرت اريد اطلع صاحت
-لو رجلج عتبت هالباب النوب الا اكسرها وعايني علي ريـــمه وداعت سجيد يجون اخلي واحد بيكم صاحي من دعاويي ليل نهار ادعي عليكم.
وگفت بباب المطبخ اباوعلها هزيت راسي خوش مبتسمه وسليم يأشر روحـــي
-من الدعاوي لو من السحر؟ اذا من السحر سوي شگد ما تردين الله حافظنا وتعلمنه شلون نبطل سحورتج بعد تعودنه .
كاسه بصفها على الكاونتر جرتها وشمرتها عليَّ بحرگه دنگت احمي روحـــي والكاسه طاحت بالحايط انكسرت وهي تشيل روحها وترگعها بس تريد تجيني وسليم يدفعها يردها ليوره صاح
-امشييي البيتجج.
عفتهم وطلعت لگيت رنـــه كاعده بالحوش وشمس كاضه علاوي من اديه تمشّيه وياها، طبيت للبيت واعاينلهم من شباچ المطبخ ضلت مكابله باب الحوش مناه لمن ردوا حسين وزهره من المدرسة ورضا طب وياهم مايرضى يروح وي ابوه ووهب يگله
-بويه غير تجي غاد تسبح تبدل؟
رضا:: بعد شوي اجي اتغده واجي.
وهـــب:: تعااااال
نتر بوجهه ضايج. ورضا طنگر اخذ جنطته وطلع وي أبوه مقهور گال حسين
حسين:: خطيه من اجينا الهسه مكيف جيه راح يصل يمنه شماله وهـــب؟
سكتنا كلنه غسلوا وصلوا وشمس تفتر وراهم لابّسه صدرية زهره وتمشي بيها تسحل وراها، وكفت بباب المطبخ اعاينلها مبتسمه حسين واكف يصيلي وهي بس تشوفه يريد يسجد تحط راسها گبله جرتها رنـــه دغدغتها تضحك وياها وحسين بس كضه صلاة كالها
-تعاي نلعب.
علمها تحط اديها بالگاع ومن يريد يطكها تجرهن بس ما تلحك كلساع يطكها ويحرك گلبها تسودنت الا تطگه مايخليها يجر اديه بساع ملشت شعرها تصرررخ بعصبية ضحكت وكضينه حسين انه ورنه مدينه اديه بالگاع وكاضينه كل حيلنه عود حتى تطكه بس هي گد ما حقدت عليه وكفت على حيلها وداست على اديه برجليها وتكمز عليهن حييل
حسين:: ااااخ اوكفيلي.
هدينه حسين وهي ضمت روحها بيني وبين رنـــه ضحكنه وياها اثنينا وحسين يفتر عليها يريد يجرها شلت راسي على فتحة باب الحوش طب كهلان وخر الچفيه من راسه يعاين علينه وشمس ركضتله فتح اديه ودنك شالها كالتله
-حسين طكاني بااع.
وتمدله اديها تراويه جر ايدها باسها
طــروادة:: نتغده ونكتله؟
شمس:: لاا هسه خااالو هسه.
-يله تعاي.
وحسين جر المخده يحمي روحه بيها ونزوه بصف التلفزون يصيح
-كتلوني والله كتلوني.
زهره بساع شمرت عليه مخده ثانيه وشمس بس نزلها كهلان ركضت جابلته الخيزرانه تضحك اخذها منها وهيه تكمز وتصفگله بعده ما واصل حسين جرته من ايده كالتله
شمس:: علاوي علاوي جر شعري طكه.
عاينلي كهلان يسأل
ريـــمه:: جذابه ووولج شمس ليمت جار شعرج يخاف منج ومت راشدياتج.
شمس::امس، جر منااه هييج حيل جرااني
وتكض بشعرها تشرح
رنـــه:: امس يعني گبل شهر.
طــروادة:: تعاي هسه خل نكتل حسين النوب علاوي.
هزت راسها خوش صرخ حسين گبل ما يوصل كهلان يمه رغم هو يطك المخده حسين يصرخ وشمس تضحك متشمته بيه ذب الخيزرانه وكعد يضحكلها فتح اديه يريدها تجي الحضنه كالتله
-وعلاوي ما طكيته.
طــروادة:: هالمره سامحيه النوب اكتلنه خوش.
-اي.
ركضت الحضنه تبوسه حييل وتعاركن عليه هي وزهره وعلاوي اخذه الواهس وياهم وكفنه على صفحة انه ورنه نعاينلهم يتعاركون على كهلان ويضحكون، وماكو شي يستمر لبعد الغده كل واحد بينا رد الهمه وحزنه.
بالليل كاعد وحده بالدوانيه يدخن واندك باب البيت طبوا صــيهد وسلطان وميثم سويتلهم چاي وداه حسين الهم وانه كعدت بصف رنـــه نعاين من فتحة الباب وحسين گبالنه يخزر ويحط ايده بالگاع يأشر بأصابعه وخرن ما هتمين، همه يسولفون على سجنة وليد ويدخنون خنگونه خنگ بالجكاير رمن يحجون يحجون بقهر، ياهو يخابرهم ينشد على عمي وليد يكلولهم تشابهه اسماء وطش الخبر بالسلف شوف وليد شمسوي ومايردون يحجون هل يگولون تشابهه اسماء
وشما يحجون كهلان بس يعاينلهم يهز راسه اي لو يعاين يتانون يكضون سالفتهم ابد ما يشاركهم عاينت لوجهه صــيهد مضيك عينه من دخان الجكارة جر اخر نفس منها وجعصها بالنفاضه شال راسه يحاجي كهلان.
صــيهد:: الحد يا وكت تضل هيج انتَ؟
كهلان:: شبيه؟
ضحك صــيهد يهز بأيده متنرفز وميثم يحجي وي مهلان بهدوء
مــيثم:: كهلان احنا اخوتك ويا ما مرت علينا مصايب وضلينه واحد واگف بظهر الثاني، ومصيبتك مصيبتنا وحزن البگلبك نفسه مر على گلوبنا، ومو هينه علينه نشوفك داير وجهك من عدنا وكعدتنا يمك گوه على روحك، احنا ما سوينه شي حتى تنطينه ظهرك، اذا اكو احد غلطان همه اهلنه ومحد من الولد وگف وي أهله ضدك، انتَ تعاقبنه على ذنب مو ذنبنا؟
وكهلان مدنك ساكت بأطراف اصابعه يمسح على وبر الزوليه ويعدله يلهي بروحه، رد سلطان گاله.
سلطان:: كهلان گلتها گبل واركع هسه اگولها اذا تريد تاخذ حگك من احد أنا گدامك، بس لا اضل منطينه ظهرك تموتنا.
شال راسه الهم عيونه تلمع وكوه يحجي
كهلان:: لا داير ظهري الكن ولا زعلان من واحد بيكم انا تعبان افهموني بسنتين دافن اثنين مكسورر ظهري شتحجون انتمم؟
صيح بحرگه مختنك وصيهد بساع گام من مجانه كعد گباله شبگه بكل حيله گـــلبي نمرد من سمعته يبجي
-انكسر ظهري ولك صــيهد انكسر ظهريّ خويه.
درت وجهي دموعي يجرن وگلبي انعصر ورنه كعدت بصف الحايط تبجي بلا صوت التموا الولد على كهلان حايرين شلون يصبرونه وبيا حچايه يواسونه لمن سكت ردوا گالوله
-اخوتك يقوون بيك اذا انتَ تطيح همه شلون يضلون واكفين على حيلهم.
كهلان:: محد منهم زين، ترسوا گلوبهم خوف رنـــه الچان كل همها تتعارك وي واحد منكم، هسه تكض الباب وره حسين وزهره كاتلها الخوف لمن يردون، اهلي ضحكتهم جانت تارسه البيت واكبر همنه عركات رنـــه هسه روح شوفها رنـــه هي والميت سوه.
رنـــه :: مسحت عيوني شفايفي يرجفن فوك ضيمه انه الزايده قهره، اسمع صــيهد يگله
صــيهد:: مابيها شي رنـــه ردها للمدرسة وهيه سباعيه هسه تصير زينه بس انتَ لا تقهر روحك.
گمت من يم ريـــمه سانده ايدي على الحايط طبيت للغرفة تمددت بفراشي دموعي على خدي جرريت نفس اشهك من كل گـــلبي ادعي " اللهي برد گـــلبي وخليني اقتنع بفراگه، اللهي صبرني ولا تخليني حارگه گلب اخوي ومتعبته"
ضميت روحـــي بالغطا دموعي على خدي الحد ما غفيت ... وكعدت بهدوء بدون ما واحد يكعدني وبدون ما اسمع صوت مجرد فتحت عيوني شمس نايمه على ايدي وخرتها ودرت للشباچ اشوفن الشمس توها تطلع، كمت طلعت من الغرفة باب الهول مفتوح الصبح الجو بيه بروده قوية، طلعت للحوش لگيت ريـــمه شاعله التنور تريد تخبز، رديت صليت وطلعت يمها توها تخبز وگفت بصفها امد ايدي على التنور ادفيهن وامسح ايد بأيد ابتسمت گالت
ريـــمه:: من تتزوجين انه اخبزلج.
-لا بريا موجود.
ضحكت حطت الخبزه على المخبازة گالت
-حطيها بالتنور خل اجيبن قوري الچاي.
عافتني ومشت للمطبخ حطيت الخبزة بالتنور وطب كهلان هو وهاسكي بس شال راسه ابتسمت وگتله
-صباح الخير.
عاينلي ساكت شال ايده يأشر تعاي مشيت بساع الحضنه شبگني بكل حيله يبوس راسي وكصتي حيييل ويهمس مختنك
طــروادة:: صباح العافيه يا روحـــي انتِ بنيتي حبيبة گـــلبي.
غمضت عيني شابگته ومخليه راسي على صدره وهو يمسح على ظهري ويرد يبوس راسي وفززتني ريـــمه من اجت تركض وتحجي
-احترركن الخبزااات احتركن.
وخرت من كهلان مبتسمه امسح بعيوني وهي طلعت الخبز من التنور گتلها
-مكسب ما محترك.. مو صح؟
عاينت الطرواده اسأل حط ايده على جتفي ومشينا سوا بصف التنور عاين للخبز گالها
-صوچج ليش تعوفين التنور.
ريـــمه:: رحت اجيبن الچاي.
ابتسم الريمه مد ايده كرص خشمها ومشه للبيت وهي تعاينلي مبتسمه
ريـــمه:: والله العظيم ضحكتج ترد عافيته.
جريت نفس متحسره ما بيدي شي غير ادعي ربي يقويني ويصبرني، كهلان صله ورجع طلع للحوش يمنه فتح الماي على الخضرة وريمه راحت للمطبخ بساع تسوي الريوك فرشت فراش بالحوش گبال الشمس حتى تدفينه عاينت للحديقة ولا ضل شي من حيواناتي لمحني اعاين لمچانهن صاح
-شكد ما تردّين اجيبلج.
ابتسمت اهز راسي لا والتفتنا اثنينا على صوت سلطان من بره الحوش صاح
-ها كهلان .
-هاا
-افتحلي الباب.
-تعال وره الريوك مو هسه.
سلطان::بداعت علاوي خلني اتريك وياكم .
عدلت حجابي على راسي وكهلان غسل ايده بعده يريد يروح يفتحله الباب سلطان چلب بالبلوك وصعد على السياج طفر بحوشنه ما منتبهلي باله وي كهلان
سلطان:: اجيتتك وين تروح وراك تدور ظهرك افتر واصير گدامك تقفل بابك اطفر من السياج عبالك اما صــيهد ابو كرامة وامشي بس تگلي ما اريدننك.
يحجي ويضحك وكهلان مبتسم التفت ولمحني صاح متفشل
-العفو ما ادري بيج هناا خويه.
-هلا بيك.
كهلان:: جاي اغسل ايدي حتى افتحلك الباب.
سلطان:: لا انتَ عبالك انا مثل ابو كرامه من تضل ساد الباب اعوفنك واروحن لو تحط سور الصين اطفرلك وعلي.
ومشه الكهلان يضحك شبگه وباسه وفز على نعال طاير فتحت عيني مصدومة شمالهم تسودنوا هذا العاقل صــيهد هيج يسوي؟
مچلب بالسياج ماد راسه وشمر نعاله على سلطان يصيح
صــيهد:: لا تشبگه لا انعل والديك هددده.
گمت بسرعة من شفتها صارت بالحجار وبالنعل وكفت بباب الهول وريمه اجت تركض كضيتها من ايدها
-اوكفي هناه لا يفشخونج.
نعاين عليهم سلطان يگله
-امشيي امشي ولي ابو كرامه ما فتحلك الباب لو تستحي جا رحت.
وهوه مچلب بالحايط ويدفر الباب برجله حيل يصيح على كهلان
-افتحلللي الباب.
وكهلان يمشي يريد يفتحه سلطان يكضه ما يخليه ويضحك على صــيهد
سلطان:: ما يريدك هيه گوه، اذا تطفر ماعندك كرامه واذا تتنازل وتروح يعني انا الصدك صاحبه مو انتَ.
وصيهد لا خله نعال لا خله طابوگه ما شمرها ولاهم وليه كهلان جر ايده من سلطان
-كاافي يابه شلعت گلبه.
مشه فتحله الباب وسلطان طنگر
-انا تخليني اطفر وصيهد تفتحله الباااب؟؟
بعده يحجي عود زعلان مالحك يكمل زعلته بس طب صــيهد ركض وراه بحديدة هلگدها طكه وحده تنومه بصف شاكر.
وسلطان صعد فوك قفص الطيور وكسره تسودنت طلعت عليه اتعارك وكهلان اجاني يسد بحلكي دفعت ايده
-والله انتَ تخسره .
سلطان:: خاب ولي.
-ولحسين بس اكض سيف أشبعه تكرص
صــيهد:: انجبي سيف ياهي مالته هاج هاي الحديدة وافشخي هوه الكسره مو سيف.
عاينت الصيهد خازرته وسلطان يضم بضحكته جريت ايدي من كهلان رديت للبيت كملنه الريوك انه وريمه وديناه الهم كعدوا بالحوش تريكوا سوا وطلعوا.
حسين من تصادف يوم عطلة ما يعوف كهلان يكضيها وياه بالگيعان، ولان ادري بيه لحگه ضليت طول الوكت عيني للتلفون كلساع اريد اخابره وانشده شلونه حسين واتردد خاف يضوج للساعة بالعشرة اجه حسين طب للبيت ارتاح گـــلبي من رد سبح وطب للدوانيه يقرأ.
للعصر توه طــروادة طلع من البيت يريد يروح يشوف المكاين وگبت الهوسه ركضت للباب بخوف مرتضى من يم بيتهم ويصيح عليه
مرتضى:: خاف عبالك ماضل چبير اكسر ظهرك لو تماديت.
وميثم كاض كهلان وهو يحجي بهدوء
طــروادة:: تعال بس تعال اوكف گبالي وگلي ظهرمن التكسره؟
وهوه يهد من يمه محد كاضه بس يغلط ويحجي بحرگه ورد يصيح
-تغشمون ارواااحكم تاهمين علي ابن غانم بكتلة ابووووي ومشتكين عليه شني تلعبون بكيفك انتممم.
أعاين خايفه على كهلان والولد التموا، عمار ابن حيدر ال محسن كايللهم علي ابن غانم عوفوه على الدعوى مال شاكر ينسجن بيها لان اذا خليناه بسالفة شامل تطلع وكلها تدري وانتم ما تردون احد يدري ولدنا رضوا بحجيه بس مرتضى مدري على شنو شايلته الغيرة ويهدد وصيهد وكهلان اثنينهم بس يردون يكضونه ضل يصيح
مرتضى:: افضحكممم والله افضحكم بالسلف وأخلّي الوادم كلها تعرف انتم السجنتوا وليد.
صيح صــيهد بحرگه وبس يريد يكضه
-تفضحمن ووولك؟ كاتل ررووحك على بيت غانم چيه بعد ما تگدر تاخذ منهم؟ مررررتك وووين عنك ما تدري بيك كاض الدرب البتهم شيماااء.
فتح عينه بصدمة يريد ياكل صــيهد وصيهد يا من يوصله الايده درت عيني الريمه عاگده حاجبي وهي ايدها على حلگها ما مصدگه.
ثواني عدن وطلعت فرح تلعلع. گالها صــيهد
-وروح الحسين مصاحبها ويريد يتسودن عليها وبس يريد ياخذها ما تشوفينه كاتل روحه على بيت غااانم.
تمالخوا هو وفرح بباب بيتهم وسلطان وسليم بيناتهم يحيزون عافه ورد على الولد يصيح ويتعارك ويهدد گاله صــيهد
-روووح رووح احجي وشتسوي سوي بس معتب لو ما سجنتك .
كهلان:: خيوولي عوفه يحجي وحده.
حجاها ووخر يريد يمشي للگيعان ومرتضى يصيح عليه بحرگه
-عووود صرت علينه زززلمه؟ عود حاسب روحك چبيررنا ولك انتَ لو بيك خيير وصدك زلمه چا من جان شعلان عدل حط بأيدك خنجر.
مالحك كهلان يرد ركض صــيهد من بين ادين وهـــب جر مرتضى يتعاركون ممالخ وفرح وميلاد يصرخن، كهلان عافهم يتعاركون ومشه للگاع بهدوء
الولد فكوهم واحد يهدد بالثاني وهوه يصيح
مرتضى:: انااا الچبير خنجر جدي عندي.
وصيهد يتراجف بس يريد يفلت من ادين الولد
صــيهد:: ووولك يا خنجر تررريد تردنه الزمن شعلان لنعل ابوووك لا ابوه خنجر بالقررريو ما يضل واليريد يمشي على ممشه شعلان يندل الدرب منين ما اله مچان بيناتنا.
مرتضى:: تطردنن ووولك تطردمن؟ الگيعان والبساتين كلها بأسم ابوي انا الاطردكم ومحد يضل هناا غير بيت شاكر
دفعوه ســليم وسلطان بنفس اللحظة يعاينلهم بخزر
سلطان:: تريد حصتك تاخذها وتطلع مناه لو تصير ادمي وتمشي على ممشانه لا حلال ابوك ولا حلال امك هذا تعبهم مثل ما هو تعبنه عاااجبك لو لااا؟
تسودن من شاف اخوته ضده تلاوه وياهن محترك گلبه وصيهد مشه البيتهم بساع ريـــمه ماتت من الخوف عبالها صــيهد راح يجيب سلاح بس كل السواه لمّ الخناجر بشماغه وسليم ركض البيتهم طيح الخنجر المعلك. وجاب الخناجر العدهم عاين الصيهد كاض الشماغ مناه ومناه والخناجر بوسطه، ذبهن وياه وميثم مشه البيتهم بساع يجيب خناجرهم. وفرح من حرگت گلبها طبت هيه جابت الخنجر وشمرته ومرتضى متسودن، حطوهن بالشماغ ولفهن حيل شال أيده يهدد
صــيهد:: اليريد يعيد نهج شعلان لا يضل هناااه.
وميلاد تصررخ وتدعي ومرتضى يهد التهى يتعارك وي مرته وصيهد اخذ الخناجر وراح السيارته ما ندري وين راح يوديهن. والولد ضلوا يتعاركون وي مرتضى وفرح متخبله ركضت ريـــمه للبيت تريد تخابر شيماء جريت التلفون منها
-لا مالج غرض ما نتدخل
ريـــمه:: عاينتلها ساكته ايدي على حلكي مصدومو من شيماء، فكت هوستهم من اجه مازن على شمس، ورنه تحير وين تبوسها ما ودها تخليها تروح وشمس تعاينلها بقهر وتمسح بعيونها
شمس:: لا تبچين.
شبگتها رنـــه تشهك وشمس ما تدري شتسوي تريد تروح وي عمها وتنقهر على رنـــه، بدلنالها وحطينالها هدوم بجنطتها لبستها ومشت بأيدي للباب انطيها السليم تمشي وتتلفت الرنه الضلا بباب الهول كاعده وتبجي هيه مناه عيونها يردلهن حجه حتى يبجن.
فتحت الباب شالها ســليم يحاجيها
-هلا بشمسنا
شبگت عليه تبوسه بخده
ســليم:: اروحنلج فـــدوه يا خالي
شمس:: انتَ الفدوه.
ضحك رد باسها ومشوا المازن على الخرثة صاف السيارة وواكف گدامها، ســليم نزل شمس وهيه ركضت العمها فاتحه اديها ضحك وكعد فاتحلها اديه منااه لمن وصلته شبگه وشالها يغمض عيونه من يبوسها ويشمها ضل واكف شويه يم ســليم يله راح
رديت للبيت رنـــه انزوت بالغرفة عود هاليوم رادت ما تبجي وتقوي روحها بس التمّت عليها وردت لنفس المچان صافنه ودموعها يجرن كعدت يمها احاجيها
-باجر ترد رنـــه شبيج؟
هزت راسها لا شفايفها يرجفن والغصه خانگته
رنـــه:: بعد گـــلبي ما يحمل افارگ عزيز تعبـــت ريـــمه والله تعبـــت .
مديت ايديي امسح عيونها والم وجها بين ايديي
-لا تبجين شمسنا ما مفارگتنا باجر ترد وتترس بيتنا بضحكتها بس لا تبجين فـــدوه اروحنلج.
هزت راسها اي تمسح بوجها وزهره بساع جابت كتبها وكعدت يمها تريدها تلتهي وياها، طلعت للحوش شغلت الماطور ماعدنا ماي ما يصب سويته بالبم ردت ولا رضى يصب شلع گلبي لا حسين ولا كهلان هناه ضليت وحدي احاول بيه مناه لمن اجه كهلان عاينلي يسأل
-هاه؟
-گطع گـــلبي ما يسحب ماي.
وگف گدامي ذب چفيته على اجتافي وكعد يسحب بالبم ضليت كاعده يمه ساعة راكضه جايبتله ماي ساعة سبانه ساعة درنفيس، فتح الماطور وكعد يسوي بيه طبيت أكمل العشه واعاينله من الشباچ يشتغل ويدندن بحسره مختنك
كهلان:: صار الفرح نوح ودمع...
ينام الما يلوحة الظيم..وموتور الدهر مينام
يطاوعني سهر عيني..ويخالفني هوى الايام
يعين الله جرح گـــلبي ..شكثر بيه مدحت الالام
اسحنت ضلعي برحه همومي..نثرته يم جسم جسام
محن دهري عليَّ دامت..لچن عرس الولد ما دام
يحايلني امل عرسه..صرّت اتلمس الأوهام.
يا لوعتي حيلي انفگد... عگب الولد.
يا دنيتي شأصبر بعد عگب الولد.
وجرله حسرره من غمج گلبه
-اااخ يا بويه.
مسحت وجهي وطلعت يمه اديه مدهنات عاينلي عيونه متروسه دموع والباب اندك گال
-امسحي وجهي.
تدنيت يمه بطرف شالي مسحت عيونه ووجه
گمت للباب فتحته طب ســليم بأيده سبانه وكعدوا سوا يسوون بالماطور مناه لمن اجه وحسين مشتري اللزاك سووه الماطور وردوا شدوه جان مايسحب ماي النوب اصلاً ما افتر رد كهلان فتحه وشلع گلبهم اعاينله بحيره صار الاذان وهو بعده كملوه وردوا شدوه هم ما اشتغل توه ســليم يريد يحاجيه وكهلان بكل حيله شال الماطور وشمره لبعيد وجر البم رگعه بالحايط بحرگه يكسرث كضه ســليم يحاجيه وهوه بلا صوت شني الگدامه يكسره ضليت واكفه على صفحة اعاينله وكلبي يوجعني
الحد ما تعب كعد بالزاويه يتنفس بسرعة اديه كلهن دهن كعد كدامه ســليم يحاجيه
-شسالفة؟ كهلان شبيك خويه انعل ابو الماطور هسه اروحن القيس للبيت اشتري من يمه جديد.
وهوه مدنك مختنك شال راسه عاينلي وحجه صوته رايح.
كهلان:: جيبي فلوس من المحفظه.
ســليم:: لاا انا اشتري.
-گومي ريـــمه.
رحت اركض جبتله فلوس واجيت وسليم ما داهره يدري بيه ما يرضى اخذهن وراح وكهلان غسل وطب يصلي تعب حيل وابسط شي ينرفزه ويحرك گلبه.
بالليل ســليم ووهب اثنينهم بالحوش شدوا الماطور وراحوا، رنـــه نامت من وكت حتى يكضي البوم بساع وترد شمس يمها، كضيت شغل وطبيت للغرفة شويه واجه تمدد بصفي تدنيت احط راسي على صدره لمني الحضنه متحسر.
ومن الصبح كعدت على صوت رنـــه تطكطك بالمطبخ تسوي ريوك كعدت يمها وهي عيونها على الساعة ما تصدك ليمت الوكت يمشي حتى تجيها شمس وللعصر يله جابوها، واهون من شمس هنا تلتهي بيها ما تبجي وحتى كهلان اذا شمس التحاجيه يضحك.
الولد مابطلوا جياتهم يمه يردون يغيرون نفسيته وهو نره يضحك وياهم ومرات الگاع كاعد بالحوش يبجي على فراگهم .
خابرت مــاسه احجي وياها واسألها على ابوها گالت
-بعده حكمه والولد راحوله البغداد مسوي بيهم فلك گدام الوادم تافل عليهم وغالط احوا ميتين من القهر.
-والله لو انه بمچانهم بعد ولا اروحن.
مــاسه:: دنگت ساكته ومحتاره انقهر على اخواني مدري على حظنا كالت ريـــمه
-اخذي راحتج مــاسه وسلميلي على ماريا
-هلا بيج خيه الله يسلمج.
سديت التلفون منها وگمت للحديقة حور وماريا يلعبن عاينتلها اسأل
-ماريا نروح الاهلي.
-اااي يله خلي نعيش يمهم بعد فد مرره.
غميتها اضــحك جنت من اكلها امشينا الاهلي تتكهرب هسه تكيف لان ماكو احذ يغثها بعد لبست عبايتها وكضت حور من ايدها طلعنه من بيتنا عاينت البيت رغد گالت
-ادك الباب عليها تجي ويانه.
-شوفيها.
هدت حور وحطت اطراف العبايه على ايدها ركضت البيت رغد
-يااا يااا ماريا وولج.
وصلت يم الباب وعانتلي تضحك عضيت ايدي متحلفه
-چم مره گتلج لا تركضين تنجبحين على وجهج ووتعورين.
دكت الباب على رغد ورغد طلعتلها متبهذله جاي تغسل فراشات
ماريا:: تعالي ويانه البيت اهلج.
-جاي اشتغل والله.
-من ترجعين كملي.
-روحن وهسه اجي وراجن.
اجتني ماريا ومشينا سواه بعدنا ما واصلين حوش اهلي وتلاكوا ويانه ســليم ووهب درت عيوني الماريا اريد اتأكد منزله عبايتها حتى لحد يغثنا بحجايه لگيتها مبتسمه السليم درت وجهي اله هم مبتسملها ومن لمح عيوني عليه دنك، ووهب ملتهي بحور گـــلبي دك حييل ســليم بعد ماحط عينه على ماريا بس هي تضحكله درت عليها خازرتها عگدت حاجبها مستغربة وسكتت عفنه حور بأيد وهـــب وطبينه البيت اهلي
سلمنه عليهن وماريا وبدور ركضن سوه فوك للغرفة كعدت يم امي والبنات نسولف ورضا صعد وره البنات طردنه نزل يبجي ويغلط عليهن وندى تسد بحلگه
رضا:: خايسه بــدور خايسه.
ندى:: وين وووهب خلي يجي اذا ما اگله.
وهوه طنگر كعد بحضن امي ما عاجبه شي ويخزر بأمه يتقوى بأمي كلهم هيج حتى حور من نجي الاهلي تستهتر وتختل بحضن امي
جــويريه:: اني كرار اذا كبر وصار يحرك گـــلبي ويشرد البيبيته الزمه هوه وياه واكتلهم.
جرتها امي من شعرها
ايمان:: تكتلينمن ولج؟
-مو عليج مو عليييج اقصد هوه وابووه.
عافتها امي تضحك وطب صــيهد على گولت جــويريه يمه وجهه ما يكصه السيف وي كهلان يضحك للهوه، عاين الامي گالها
بيت سيد عباس باچر يجون احسبي حساب عايلته كلهم ويتغدون هناه.
-كل الهلا بيهم بس شني هيج جيتهم لو على شي.
ووي حجايته نزلن بــدور وماريا من فوگ عاين البدور خازرها ورد گال الامي
-لا هيج انا عزمتهم.
-هلا بيهم روح تسوگ.
هز راسه خوش وطلع وامي چلبت بينا ما نداوم باجر ونجي نعاونها لان ندى ما تگدر، ضلينه للعصر يمهم وردينه للبيت، ما سألت ماريا ليش تضحكين السليم وشكو ترددت اسألها لان ادري بيها مرات تتصرف هي ما ببالها شي بس احنا نفكر بشي مختلف ماردتها تخليها ببالها سكتت. عفتها بغرفتها هي وحور وطلعت
لغرفتي اكوي هدوم مــيثم بين ما اجه فتح الباب وطب مبتسم
-شلونها سمسمه؟
-بشوفت عيونك الحلوه زينه.
ضحك واجه يمي جر وجهي عليه بأيد وحده، هستوه يبوسني وانه ما ادري بيه حاط ايده على الميز مال الكوي ولا دنگت وشفت وين راح اخلي الاوتي بس ردت ابعده عن القميص توني اعوف الاوتي وهو جر روحه مبتعد ويصيح شلون المنتول وينكث بأيده شايطه روحه ركضتله اصيح
-الله الله ما ادررري بيك ما ادرري.
اجت ماريا تركض فازه على صوتنا. انه اجر ايده وهوه يجرها مسحون گلبه وماريا تصيح شكو. شكو شصار وانه من خوفي عليه احجي بلا ما انتبهه اجر بأيده واطك على رجليَّ احجي
-اكوووي وباسني اكوي وباسني حطيت الاوتي على ايده اندررري بيه اندررري.
جرني ساد حلكي وماريا فاتحه عينها على وسعها اثنينا نعاينلها دارت وجها وطلعو شارده وخر ايده من حلكي يحجي
-شسالفة سمسم؟
-زلة لسان.
جبت العصارة واجيته كعدت بصفه على الجرباية دهنت ايده مقهوره عاينت بوجه وحجيت اجر اسمه جر
-ميثممم.
مال براسه يعاين لعيوني
-ميثميي
-هممم.
-سيد عباس ليش راح يجينا هوه واهله شكو شصاير؟
-ماصاير شي صــيهد خابره هوه وشيخ حيدر علمود كهلان ، وسيد عباس گاله اوصل عايلتي البنتي واجيك اخوج كاله لا جيبهم الوالده تريد تشوفهم، لوتي اخوج رافضهم ويعزم بيهم.
-ههههه ما يگدر يفارگ اخواته يگل الامي بعيد.
-بس خوش اوادم مــاسه، والولد شاريها ورايدها امس حاجيناه انه وسلطان.
-اي، شگال؟
-گال الما يسد حلگه اخذ اختي من عنده وخل يروح يگابل سيد جعفر.
-هههههه سوده عليَّ.
ضحك يهز بأيده جريت ايده ابوسها وانفخ عليها بعدها توجعه.
هستوني نمت وفزيت على صوت رسائل جريت تلفوني اباوعله من تلفون ندى، بــدور كاتبه
-انه بــدور اكلج شلبس باجر؟ شو مدري شبيه خايفه ومتوتره عبالك جايين يخطبوني مو عزيمه.
-دشداشه كون خياطها حلو وحجاب جا شتلبسين.
-مــاسه مستحيييه.
-نعلعله
-والله كليلي شسوي يعني اسلم على امه واخت وبعد شحجي وياهن خاف يشوفني مرتبكه ويكولن خفيفه مكيفه لان خطبناها.
-اعتبريهم ناس عاددين وصيهد عازمهم عوفي السيد على صفحة.
-لا كلشي ولا السيد .
ضحكت عاضه ظفتي لا يفز مــيثم كتبتلها
-ووولج بــدور.
-ولج جاي ارجف.
-وجعه كوّنّ انخمدي.
بــدور:: مسحت المحادثه وذبيت التلفون لفيت روحـــي بالغطه حييل بس اريدن اغفى وما افكر بيه ماكو چلب براسي ولا وخر والنوب كلساع اتخيل روحـــي لابسه بدله وكاعده والبنات يفترن عليَّ ويصفگن الحد ما غفيت كعدتنا امي من الصبح گمت وياهن نشتغل وجويريه تضحك وتغمز
جــويريه:: العروسه لا تتعبين.
-جــويريه وعلي بس يجي صــيهد اسويلي سالفة عليك اسكتي احسن.
ضحكت لمن اجن البنات ورغد التهينا بالمطبخ نسوي الغده، طب صــيهد للمطبخ يسأل ويشوف شطابخين دار وجهه الامي صارت عينه بعيني عگد حاجبه خازرني
-شمخليه الوجهج ووولج؟
بلعت ريك گـــلبي يدك حيل وانه ماحاطه شي جلفه بصابونه وحطيت مرطب گالتله
-الله اكبر شمخليه جانت تنكس بالحوش وطكك وجها.
دار وجهه ما عاجبه عافنه وطلع وامي تريد بس تكضني
-شمخليه الوجهج
══━━━━✥◈✥━━━━══
جــويريه:: خاله شسالفة شمخليه اثاري صــيهد ماخذ هاي النتره منج .
وامي تريد تگوملها عفتهم وصعدت فوگ مقهوره مدري من شنو، كعدت ادري ش
ويه وصعدت ماريا وراي مدت راسها للغرفة مبتسمه
ماريا:: اجي لو لا؟
-تعاي
دخلت كعدت كبالي مديت ايدها الايدي
ماريا:: لا تضوجين انتِ خدودج حليانات اليوم جذبتي نظرهم عبالهم مخليه شي بوجهج.
دنگت اهز راسي لا مختنگه
-امي دافعتلي وردت النوب تكلي شمخليه الوجهج وهيه تدري ما مخليه شي، دوم ترزلني گدام البنات حتى لو ما مسويه شي.
ماريا:: ويا محلى رزالتها ما گالت شي والله بــدور لو عندي ام حنونه مثل امج اقبل ترزلني من الصبح لليل، لا تزعلين منها على شي ما يسوى.
رغد:: هاي ياهي الزعلت؟
درت وجهي للباب طبن كلهن يحجن ويضحكن فتحن الكنتور يختارلي ملابس سبحت وبدلت گـــلبي يدك حييل بعدني امشط شعري واجتني ماريا تركض
-وصلوووا.
-جعفر وياهم؟؟؟
ماريا:: ليكون مكتوب على جبينه اسمه وانا مش داريه.
-اهووه احجي عددل.
ضحكت ترفّع اجتافها ماتدري وانه مدري شبيه توترت وارتبكت لفيت شالي ونزلنه سوه للمطبخ البنات كلهن واكفات باوعلي
مــاسه:: ما تطبين تسلمين.
-استحييي.
جــويريه:: بعد چم يوم تطبين للسيد.
حجتها ضامه ضحكتها ورغد تسكت بيهن تخاف لا صــيهد يسمع ويگلب الدنيا علينه كعدت على الدرج وهنه بالغرفه يم امي گـــلبي يدك حييل اجت ندى جايبه الماي گالت
ندى:: ادخلن وياي سلمن انتِ وماريا.
ماريا:: لا اني ما ادخل ما اعرفهم.
-مو بعد شوي نكعد على سفره وحده شلون؟ عيب كومن.
وگفن كلهن على راسي يقنعني ادخل وي ندى وانه من التوتر ما ادري شسوي وزادتها امي من صاحت
-بــدور بــدور ييمه تعاي.
غير بودي الگاع تنشك وتبلعني وكفت رغد گدامي تعدل حجابي وجرت ماريا هم رتبت حجابها خازرتنا
رغد:: طبن سلمن شني السالفة هي العلويه وبناتها اثنين.
وصلنه الباب الغرفه طبت ندى گبلنه واحنا وراها دفعتنا رغد جلبت بيها وطببتها ويانه وكفن البنات اثنينهن سلمت صوتي يرجف وأم السيد فتّحت ايدها
-هلاا يمه هلاا.
باوست البنات ودنگت اسلم عليها بس ابوسها واهمس الحمدلله الحمدلله، جلبت سلمت عليها ماريا وراي وامي اشرتلها تكعد بصفها هي ورغد وانه جرتني العلويه من ايدي كعدتني بينها وبين بتها دكيت راسي بالگاع ايدي ترجف
-شلونج ماما حبيبتي.
-الحمدلله.
-شلونج بالدراسة
-الحمدلله.
درت وجهي لبنتها من گالت
فاطمة:: درجاتج بالامتحانات الشهريه زينه؟
-الحمدلله.
گالت اختها البصفها
نرجس:: مبينه شاطره هههه مو صح؟
-اي الحمدلله.
سكتن ونرجس صارت عينها بعين ماريا
نرجس:: ماشاءالله تبارك الرحمن ماشاءالله
وامي مبتسمه گالت للعلويه
-بنية حماي هاي ماريا.
العلويه:: حبيبتي فـــدوه لوجها.
وانه وماريا اثنينا نريد نشرد ضلن شويه يسولفن اندمجن بالسوالف هيه وامي ماريا طفرت وانه ضليت احجي وي البنات گالت فاطمة
-ان شاءالله العبايه اجت على قياسج؟
-ها ما ادري بقيتها علمود من اشوفج مره الثانية ارجعها لان ما يصير والله.
نرجس:: شنو المايصير هديه منّ العلويه امي عيب ترفضينها.
دنيت راسي يمهن همست
-لو چانت من امج جا قبلتها.
ابتسمن اثنينهن فاهماتني وانه بلحظتها عضيت شفتي متندمه واذا ابقى لحظة يمهن بعد اضل اجفص واجيبها مناه واوديها مناه كالتلهن امي
-اخذن راحتجن يمه الولد بعد ما يطبون للبيت ذبن عبيجن غسلن.
ابتسمت الامي يعدلن بالعبي عليهن،طلعت من يمهن اهفي على وجهي وماريا تضحك عليَّ
ماريا:: حتى لو يگلولها شسمج تگلهم الحمدلله ههههههه.
جــويريه:: بــدور شلونج؟
مــاسه:: الحمدلله.
ويضحكن عليَّ خنگ، بعد ما رحت يمهن الحد وكت الصلاة صاحت عليَّ امي طبيت للغرفة اثنينهن واكفات
ايمان:: اخذي البنيات يغسلن ويصلن.
مديت ايدي الفاطمه
-تعالن.
وامهن تعاين علينه مبتسمه اخذتهن غسلن ووگفن بين الحمام والمطبخ يسولفن وي البنات ويسألن على دراستهن وتحصصهن كالتلها رغد
-انتم بس اربعة؟
نرجس:: لا احنا سبعة اخواتي اثنين متزوجات واخواني سيد قاسم الله يرحمه، وسيد جعفر، وسيد وصادق صغير بعده بصف السادس ابتدائي
رغد:: الله يحفظهم ويبعد عنهم كل شر.
-امين يارب.
اخذتهن فوك للغرفة ولا چني صارلي ساعة ارطن عليهن واكلهن العباية ضامتها ومالابستها بس صعدن لكني معلگتها متت من الفشلة وهن غلسن سون نفسهن ماشافنها، صلن وبس صليت انه جرني من ايدي عاينتلهن مرتبكه
-هاااه.
كعدني بيناتهن
نرجس:: ليش ما تقبلين بسيد جعفر؟ والله ليله ما ينامه
-آسم الله
فاطمة:: كلش حابج والله العظيم اخوي ليل نهار يتحسر.
-گولي غيرها خيه انه حتى ماحاجيه وياه وعلي.
-ندري سولفلنه كلشي بس بعد حبج ويريدج والله ميت عليج وهسه شك انتِ الماقابله لهذا السلب اخوانج رافضين، انتِ اذا ما قابله گولي حتى لا يبقى يلح وي اخوانج عيب منهم، واذا انتِ قابله واخوانج الرافضين سهله.
دنگت اعصر باصابعي وگلبي يدك كل حيله
نرجس:: ها بــدور؟
باوعت بوجهن احجي
-انتم مو ساده؟
-اي!
-جا تدورون حب؟
فاطمة:: اي ندور حب بما يرضي الله قابل خاطفينج هاي شبيج؟
نرجس:: مبين انتِ ما قابله!
-انه بكيف اخواني صــيهد شيگول اگولن اي.
فاطمة:: يعني هسه ذا گال اي موافقين انتِ تقبلين بجعفر؟
باوعت بوجها ساكته مدري شخجي وهنه افترن علي اثنينهن يحجن ويقنعن بيه على اساس هوه بكيفي
-والله مالي غرض انه كلشي بكيف صــيهد.
سكتن يضمن ضحكتهن شويه ونزلنه جوه هنه رجعن يم امهن بالغرفة وانه التهيت وي البنات بالمطبخ نصب الغده اجوا الولد اخذوا الغده للدوانيه شيخ حيدر موجود وكهلان وملتمين كلهم،واحنا الا كعدنا كلنا على السفره يله العلويه قبلت تاكل، كلنه مستحين اكلنه شويه وهنه هم اكلهن قليل شلنه المواعين للمطبخ وحده تگل للثانيه
-نصبه بالعشه.
ندى:: السمچ رغد انطيني خلي اكعد اكل
ضحكت رغد سوتلها صينية وكعدت بالمطبخ هي تاكل والبنات ينظفن ويسون چاي طبوا الولد للمطبخ ينگلون المواعين كالها صــيهد
-جا خويه ليش كاعده هناه غير تتغدين وياهن شنيي رغد؟
عاين الرغد خازرها عباله ندى زعلانه لو شي وهل تاكل وحدها كالتله
ندى::خويه تغديت وياهن وهذا غده بنت اخوك.
-هاه هاه الف عافيه خويه ألف عافيه.
دار وجهه وطلع ووهب كعدلها بباب المطبخ الخارجي يشمرلها بوسات وهي تشمره بوسه وعظم سمچة هز ايده وگام.
خلصنه تنظيف وردينا كعدنا يمهن البنات يردن يطلعن للــبستان كالتلهن امي
-انتم مو هم بستان؟
العلويه:: زراعي بس مو ريف مو هيج.
أيمان:: خل اخابر صــيهد حتى تطلعن براحتجن.
كامت امي من يمهن وانه تابعتها وين ماتروح ووراها طبت للمطبخ وخابرت على صــيهد بس كالتله البنات يردن يطلعن للــبستان ضل يرعد وفنه وشحده اليطلع گالتله
-كضهم وهيد بالدوانيه انه ماخذتهن هنه وبناتنا وطالعه للــبستان وفنك لو فكيت حلگك
سدت التلفون بوجهه ومشت للغرفة كالتلهن يله تعالن نطلع لبسنا عبينه وياهن بس ندى مارضت تجي كالت
-تعبـــت من الاكل اريد ارتاح.
جــويريه:: كرار نايم عينج عليه فـــدوه
-جيبيه بحضني
عافت كرار بحضن ندى ومشت ويانه طلعنه افترينا للــبستان مالتنا المحرومات منه اخضر ومتروس اشجار تين وزيتون وعنب ورمان، وكلهن بعدهن ما ينحاش منهن امي والعلويه يمشن سوه كعدن على جذع نخله طايحه ويعاينن علينا نفتر گدامهن والبنات يصورن
فاطمة:: تطلعن هواي هنا؟
جــويريه:: لا لان دائماً اكو ناس والبستان مكشوف ولدنا مايقبلون.
نرجس::بس حلو والله المفروض الانسان يستمتع بهيج طبيعة ومايحرم نفسه منها.
ابتسمتلها وجويريه هزت راسها اي كعدنه متربعات على الحشيش غطيت وجهي بسرعة من فاطمة رادت تصور كعدتنا وماسه هم ما قبلت گالتلها
-يبقون يحجون
فاطمة:: اعتذر والله.
علفت تلفونها وكعدنا سوا نسولف وامي والعلويه وكفن گالت
ايمان:: راح اخذ العلويه البيت شامل شويه وردن للبيت انتن.
رغد:: روحـــي يمه.
مشن سوه وحده كاضه ايد الثانيه ساندتها واحنا والعلويات نضحك عليهن كالت نرجس
نرجس:: والله امي جان بيها حيل شافت امج تعبانه وصارلها واهس تتعب وياها.
فاطمة:: ههههه با تظلمينها لا تعبـــت من الطريق والله.
بــدور:: ضحكنا نسولف وماريا من دونا كلنا كامت تركض وره الفراشات كالت فاطمة
-هاي البنيه مو من عدكم؟
مــاسه:: بنيتنا شلون مو من عدنا؟
-ما اعرف عبالك تختلف عنكم بكلشي
مــاسه:: جانت عايشه بالخارج
-والله؟ مو اگول لا شكل تشبهكم لا تصرفات، بس كلش حلوه ماشاءالله.
ابتسمت مــاسه تفررح حيل من احد يمدح ماريا وانه اخذني الواهس اتباها بسها وباخوانهل گتلها
-بعد عدها اخوان اثنين مثلها هم حلوين وعيونهم ملونه.
نرجس:: رجاءً اذا متزوجين لا تحجيلنا بيهم.
متنا من الضحك وماسه غطت وجها
رغد:: مــيثم الچبير رجل مــاسه، وبريا الصغير خاطب بت عمي رنـــه وكلهم على حب.
نرجس:: يا عمــري الله يخليهم البعض بنات والله اتشاقه الطف جو.
مــاسه:: عادي والله، عدنا بعد ولد عارضينهم للزواج.
نرجس:: لا يمعوده والله اتشاقة وين اضم وجهي هسه .
ضحكنا كلنه وهي حيل انحرجت فززتنا ماريا ابتعدت عنّا مسافة ضحكتها عاليه بنص الحشيش لگت مجموعة مال فراشات طيرتهن وافترت بنصهن وتضحك بكل صوتها فرررحانه وماسه تصور بيها وفاطمة
- هيه الفراشه مو هنه.
نضحك الضحكتها تفتر والفراشات داير مادايرها ومن يبتعدن عنها تركض وراهن وتصير بنصهن التفتت منها لبيتنا دك گـــلبي حيييل من لمحت ســليم وسيد جعفر رايحين للسيارة ما ادري شيجيبون وسليم عاف السيد وحده يم السيارة. ورد يمشي بأتجاه البستان مخنزر ومستعجل طكيت مــاسه برجلها
-ســليم ماااسه ســليم.
نزلت تلفونها بسرعة وصاحت على ماريا
-ماريا تعاااي.
وگف فاز على صوت مــاسه التفت بس لمحنا كاعدين دار وجهه ومشه بساع راد للبيت وماريا اجت كعدت يم مــاسه هادئه بقت عيوني على البيت وگلبي يدك حييل.
ردوا من السيارات للدوانيه شايل بأيده بشت ويضحك يسولف وي ســليم تمنيت المسافة اصرب واگدر اركز بملامحه دغتني فاطمه بأيدي التفتت عليها منحرجه رفعتلي حاجبها دنگت ساكته .
شويه ورغد گالت يله، ردينا للبيت ورانا بربع ساعة اجن امي والعلويه رجعنا كعدنا بغرفة امي شويه اخذنا ميانه ونسولف رغد اشرتلي تعاي طلعت وراها خايفه
-هاا؟
لطمت على خدها
-ولج جاي يحجون بخطبتج سيد عباس حرج صــيهد گدام شيخ حيدر.
-صخام بوجهي ييمه هسه يرد عليَّ.
عافتني وركضت للباب تتصنت مشيت وراها رجليَّ يرجفن حطيت اذني وياها اسمع واسمع سبد عباس يگله
سيد عباس:: ابو خالد انتَ ترضاها؟ أجيه ويردني والمشكله ما ينطيني سبب مثلاً ما تريد تناسبني گلي يابه ماتشرف أناسبكم حتى واحد يفتهم اشو اجيه ينطيني اسباب والله ما تنحجي.
شيخ حيدر:: لا صــيهد معدل ما يردك.
كهلام:: سيد انتَ هم على كيفك وياه، اخته والكعده وعزيزة ويريدها تكضي دراستها وبعيونها بعدها طفلة لا يم الزواج ولا حذاه.
سيد جعفر:: بس انا گتله بالتأمر بيه تريدها تكمل دراسه انا وياك وأبداً ما اعترض، وشنو اللي تريده احجي.
سيد عباس:: اذا واحد محاجيك عليها ومنحرج بيناتنا هم گللنا حتى لا انحرجك اكثر.
سكتوا مدري شصار وفجأه ســليم گالهم
ســليم:: شو تعاينون عليَّ؟ لا بالحسين اختي، شني السالفة صــيهد ارضى زحمة فشلتنا.
وصيهد حاجاه بنتر
صــيهد:: گوم گوم اطلع بره سجاد يريدك.
سيد عباس:: عوفه عوفه تطرده لان حجه الحگ.
شيخ حيدر:: صــيهد احجي بويه گول ليش ما ترضى.
صــيهد:: البنيه صغيرة ما تريد تتزوج.
سيد عباس:: خل تصير بينهم شوفة شرعية واذا الله هداهم وردد گلوبهم خير على خير صلت البنيه رافضه هاي هيه ماكو شي بالغصب الله يستر عليها.
درت ومهي اعاين بوجهه رغد مصدومة والولد انفعلوا ضلوا يجيبونها منااه ويودونها مناااه والصبد قفل على الشوفة الشرعية
-انتم تحرمون بكيفكم؟ الله اكبر يابه حق هذا صدك جذب؟
صــيهد:: سيد يرحم اهلك اختي مر اريدن ازوجها.
سيد عباس:: والله فلا تستحي انتَ من رخصتكم صيحولنا العايله.
ووي حجايته چلبوا كلهم بيه وهوه يحجي بحرگه ويكلهم
-يشوفها وتشوفه عشر دقايق شوفة شرعية بما يرضي الله خبصت الدنيا ليش؟ شنو البينا وما تقبل؟ جعفر بيه غلط هم كلي؟
صــيهد:: حشاااه.
رغد لطمت على خدها مت صوت صــيهد وجرتني من ايدي ركضنا فوك والبنات ورانا لطمت على خدودي حيييل واحلف
-والله ما اشوووفنه ولا يشوووفني غير اموووت.
انه الطم وماريا تدورلي شال يوالم بشرتي تحط الشالات يم وجهي وتصيح
-هذا لو هذا اختااارن بسرررعة.
جــويريه:: لا لااا غير اسود عوفيها اسود هسه يكولونن علموده لبست اللوان.
انه ورغد بعدنا نلطم وهنه يرشن عطر ومدري شيسون واحت ماريا تركض ولطمت ويانه
-صــيهد يررريدج بــدور .
-يمه يييمه والله ما انزل.
ووي حجايتنا دفع الباب وطب عيونه خازراتني مد ايده يريد يجرني وكضه وهـــب يحجون بصوت ناصي
-ياااهي مالتها هيه شماالك؟
صــيهد:: وخرر عني كله منك، راضيه وولج انتِ راضيه ببيت سيد عباس حالهم حالنه يووميه عركه ويوميه سااالفة عليمن مكيييفه؟
هزيت راسي لا ارجف
-ما مكيفه والله كتلهم بكيفكك.
حط ايده على حلكه يسكتني محترك گلبه حيل جره وهـــب وهو حر عبايتي مايدري بيها هيه هاي العبايه الجابوها الي وانه من الخوف انلصمت ماحجيت حطها على راسي وجرني من ايدي نزلني على الدرج يحجي
-دقيقتين وتطلعين لا تحاجينه خيولي خوش بعدج... بعدج صغيره بعدج ما تزوجين هسه خوش.
هزيت راسي اي امسح بدموعي وهوه وكف گدامي يعدل بحجابي يمد ايده جوه الحجاب يضم شعري ويجر العبايه على راسي عدل اخذني من ايدي الغرفة جده ارجف كلني وگلبي احس صوت دگته كل البالبيت سمعوها مدنگه ماشلت راسي وهو يجر بيه وهمس
-اكعدي.
كعدت. مدنگه حيل گاله
صــيهد:: شوفها يله.
وهـــب:: سيد عباس يصيحلك تعال صــيهد.
عاينت وراه طلع وضل الباب مفتوح بلعت ريك ايديي يرجفن ومدنگه كل حيلي بس سمعته من جر نفس وحجه بصوت هادئ
جعفر:: شلونج؟
يييمه يمه، عضيت شفتي واعصر اصابعي كل حيلي حرف ما نطقت رد گال
-رايدج على سنة الله ورسوله صــيهد شلع گـــلبي ويگول انتِ الرافضه وما تقبلين بس انا ما مصدگه.
شلت ايدي امسح عيوني ولا شلت راسي ولا عاينت عليه اذني احسها شويه بعد وتطلع دخان وگلبي يخفك كل حيله
-باوعيلي هاي شوفة شرعية مو عقوبة وهيج مدنگه، كليلي انتِ ما معترضه؟ حتى ابقى احاول وي صــيهد
وهم ما رفعت راسي حسيت رگبتي راح تنكسر گد ما مدنگه، بلعت ريكي ارجف من حسيته عدل كعدته وهمس بصوت ناصي
جعفر:: بــدور.
شلت راسي على كيف بس اريد المحه صارت عيني بعينه مبتسم بهدوء الغرفة ضواها خافت وعيونه ذبلانه تلاشت ابتسامته من ركّز بعيوني شلت ايدي امسح دموعي
- اعتذر ما عبالي صدك انتِ الما تردين، لو بس گايله الاخواتي ما اريد جان سكتت ومارجعت الح على صــيهد، مالها داعي توصل للبچي.
رديت دنگت صوتي يرجف
-ما باجيه مو هيج.
سكت وانه آكل بروحي ومدري شجاي اسوي وليش ما اسد حلكي ليش ضاله احجي والمن كاعده گال
-بس كليلي انتِ قابله؟
هزيت راسي لا مدنگه
-انه بكيف اخواني.
-عوفي اخوانج انا اريد اعرف قرارج ايا انتِ قابله سهله اخوانج نقنعهم.
يابه لو يموتوني ما اگول اي غير بس اريد اشرد من گدامه من ضليت ساكته گال
- خير ان شاءالله اخذت جوابي ولا تخافين تكنلين دراستج ومثل ما تردين.
هفيت على وجهي بأيدي ودرت اعاين للباب وهـــب بالهول كاعد كبالي يخزر بيه ويأشر يله تعاي ومن الاستهواش البيه بدل ما احجي بگلبي حجيت بصوت وعيني بعين وهـــب
-جا شگله؟
حجيتها واستوعبت درت وجهي الهه فاتحة عيوني على وسعهن ابتسم ودنك شال تلفونه خلاه بجيبه ووگف طلع وي وهي والبنات اجني يركضن تمددت ارجف
-هفن عليَّ هفن عليَّ.
رغد:: عفتها وطلعت اركض اتصنت عليهم سيد عباس غلب صــيهد وكله ينطيه احاديث وايات واحنا هيج واحنا هيج گاله صــيهد
-الله كريم، احنا هسه بحال خطبه ابن عمي مادايرة السنة مالته.
سيد عباس:: اي ميخالف عقد سكته مناه لمن تدور السنة ونجيكم مشيه، لو شتكول كهلان.
-مابيها شي ليش لا.
سكتوا صــيهد يردون يعقدون هسه ولا رضى كالهم بعدين ضلوا شويه ومشوا واحنا گبل ما يرد صــيهد للبيت تطشرنا شاردات وبدور شربت حباية منون وركضت فوك حتى لا يحاجيها كالت جوري
-بس اني وين اشرد؟
-ولج هوه احنا شادين ظهرنا بيج وين تشردين كضيه وسكتيه.
عفته وطلعت وي ماريا وماسه مشيت للبيت رد وكل شوي اخابر امي اسألها على صــيهد گالت زعلان من الولد كلهم لان وكفوا وي سيد عباس ضده.
بالليل الساعة بالعشرة ا واكفه بالحوش اشر هدوم وادري بيه هيج وكت يجي سمعته اجه ومن باب حوشنه ابتعدن خطواته تحسرت موجعني گـــلبي عليه عرفته راح للشط، طبيت للبيت سيوفي نايم غطيته عدل لبست عبايتي وطلعت اتمشى للشط.
الهوا بارد والدنيا گمره لمحته كاعد على الجرف يعاين للماي وهو يجري والگمر عاكس بالشط مثل المراية التفت فاز من سمع خطواتي تقربت كعدت بصفة سند راسه على جتفس اثنينا ساكتين الماي يجري بهدوء وماكو صوت غير صوت سعف النخل اليتحرك بثگل وي نسمات الهوه الخفيفه جريت نفس طويل وديت ايدي امسح على ايده ما احاجيه ولا اگله كافي ولا تجي هناه هو اعتبر الشط گبر غيوثي .
اخذله شويه ومد ايده يكومني للبيت حط ايده على جتفس نمشي سوه وفزينا على ســليم. ماندري بيه رايح جاي.
ســليم:: وين رايحين؟
-انتَ وين رايح؟
ســليم:: اخذت شاحنه من شاحنات بريا وراد للبيت يم سجاد.
سلطان:: لا تعوفه وحده ســليم.
-ان شاءالله.
مشه لبيتهم وانه گـــلبي يدك حييل مدري شبيه حيل خايفه على ماريا وكله من سلطان هو الخوفني من ســليم كال يوميه تلگينه عاشگ حلوه.
بدل وتمدد بفراشه اجيت الحضنه اسولف
-ســليم يحب؟
-لا وينه وين الحب
-ترى حيرتني يوم تگلي يحب البنات ويموت على الحلوات يوم تكلي مايحب.
-يحب الحلوات بس مايحب الحب.
-وين يلكاهن الحلوات شو لا طالع لا ماشي.
شال راسه يعاين بوجهي
-شبيج هذن الممثلات التركيات توبا ومدري ياهي يحبهن .
-صدك تحجي؟
-والله جا شني؟
-صدددك تحجي سلطان وانه شوها سنعة الولد ياهي الاكضها اكلها مصاااحب حلوات
-لا عليج الله؟ والله اخوي فقير محد مصاحبه غيرري انه والولد ناخذ منه رصيد ونحضره.
-كله منك والله العظيم كتلي يموووت على الحلوات.
-والله قصدت الممثلات .
عضيت ايدي ودي اخنگه ماخليت شك ماجبته الراسي من وره حجيه.
""
رنـــه :: شلع گـــلبي هو يحلف ما متأخر وكل مره هيج وانه احلف تأخرت گال
-ردت اسويها مفاجأه والله اليوم بالليل انا يمج.
-شلعت گـــلبي والله العظيم
-اسم على گلبج حبيبتي.
-اسهر لمن تجي؟
-بكيفج بتلاثه اوصل ســليم وهـــب يجي عليَّ.
-خوش.
سديت التلفون منه وما نمت. ضليت كاعده بالحوش ومن اجه كهلان كال
-ها سهرانه؟
-بريا راح يوصل من بوصل انام.
سكت يعاينلي ضل كاعد يمي بس لان تعبان ما گدر مشه للهول. وخله الباب مفتوح تمدد وغفى غطيته وسديت الباب رديت كعدت بالحوش ايدي على خدي ادعي ربي يحفظه إلي ويبعد عنه كل خطر لان اخر قطرة من صبري خلصت وي عبود.
بديت انعس يله سمعت صوت السيارة فتحت باب الحوش اعاينله نزل وضحك فاتحلي ايده ووهب من يمه يصيح عليه
-انچب زحمممه.
-تعاااي رناتي تعاااي يروح بريا بدويتي.
اشرت تعال انتَ انه استحي ضحك واجاني بساع طلعت بالباب شبگني بكل حيله ضام وجهه برگبتي غمضت عيني اجر نفّس بقوة ووهب يصيح
-اصوركم الكهلاااان؟
نزلني بريا يضحك شلت راسي اعاين لعيونه
-شلونك؟
-بخير انتِ شلونج شلون صرتي.
يحجي وشال ايدي يبوس اصابعي صاح وهـــب
-لو ايدي ما بستها يا چلب
بريا:: ما عنده احساس ما يروح.
-نضمها اله من تزعل بطه يمنه نعاقبه.
ضحكوا اثنينهم گال.
-طبي نامي حبيبتي باجر اجيج.
هزيت راسي اي طلع وسديت الباب وراه ركضت للالفون خابرت ماريا ادري بيها كاعده
-ها ماري سويتيله اكل.
ماريا:: طفيت الطباخ وغسلت ايدي احجي
-اي هسه كملت.
-فـــدوه الايدج يله اخذي راحتج.
سديت التلفون منها وانتظرت بريا الحد ما دخل للحوش ركضت اسلم عليه وهو يضحك ويحضني
-هلااا بروحي هلاا.
-شلونك .
-بخير دامج بخير.
دخلنا للبيت هو مشه يسبح واني صبيتله اكل وعيني للتلفون سوه حساب ثالث يله شلت الحضر عنه كتب
-راح اجي.
-وين؟
-اسلم. على بريا.
-تعال لحك عليه تاكل وياه.
قراها ومارد بعدني ارتب بالصينية واندك باب الحوش طلعت اركض واضحك فتحتله الباب شهك بس شافني ودار وجهه يغلط
ســليم:: خااايسه وين حجابج؟
شلت الشال من احتافي خليته على راسي
-لبست يله تعال ادخل.
-اااخ گـــلبي .
-هاااه؟
-ماريا يعدمونج اذا لكوج واكفه يمي امشي صيحيلي بريا كليله. ســليم بالباب.
-بريا جاي يسبح وميثم نايم تعال اكعد بالهول بين ما بريا يطلع.
-دار وجهه الي اعاين بوجهه عادي مبتسم بس هو من يباوعلي يصفن مد ايدي بصف ايدي جر يدة الباب سده وخله فتحه صغيره يعاينلي منها عينه بعيني يحجي همس
-مايصير يضلون يحجون عليج
-لا والله مايحجون .
شال راسه للسما وجع باوع بوجهي
-مايصير ماريا روحـــي.
-بكيفك.
عفته ودخبت صار بوجهي بريا توه طالع من الحمام كتله
-ســليم بره وما قبل يدخل الا انت تطلعله.
مشه بسرعة طلعله ودخلوا سوه للدوانيه اجه بريا اخذ عشاه گال
-نامي حبيبتي تعبتج انا اتعشى وي ســليم واغسل مواعيني.
هزيت راسي خوش ومشيت الغرفتي تمددت بفراشي ما نعسانه. خلصوا عشه وسليم راح غسلت المواعين وسويتله چاي شرب وراح الغرفته رجعت لفراشي لگيت رسالة منه كاتب
-گوه اكلت.
-ليش مو طيب؟
-طيب بس ما ارتاحيت ردت اگل البريا ترى انا اراسل اختك.
-اي
-ماريا ترى محد يرضى اخته تحجي وي بت عمه يمج شي سهل وعادي بس عدنا لااا.
-احضرني اذا هيج.
-هو غير لو اگدر.
-وليش ما تگدر.
اكتب الرساله ضايجه محسسني يحجي وياي بمنيه ردته يحضرني حتى فد مره اغير حسابي كله گال
-ما اگدر وبس.
-ليش؟
-بكيفي.
-احضرك اني.
-بت ابوج وردي سويها والله اطيح حظج وتعرفيني زين شسوي.
-شسوي؟
-ماري
ما رديت عليه رجع كتب
- انتِ الورطتي روحج.
-ما فهمت.
سكت عشر دقايق عدن وهو ما كاتب شب رجعت دزيت علامة استفهان باقي بالمحادثة ماطالع منها وهم عدن عسر دقايق وهم ما كاتب شي دزيت
-ما تحجي؟
دقيقتين ووصلتني رسالة منه دك گـــلبي حيل وإني اقراها
- ما اگدر اعوفنج بعد حتى لو انتِ ردتي تعوفيني ما اخليج غصباً عنج تضلين وياي.
-اكرهه هذا كلامك وأسلوبك ما تگدر تغصبني على سي احجي وياك بأدب لان اني مؤدبه مو لان خايفه منك ترى ما اعترف بيك وين صاير.
اكتب محترك گـــلبي منه كل فترة يتخبل رجع كتب
-انطمي يله.
-دخيل الله شهالاسلوب اترفع عن الرد ما انزل اسلوبي الاسلوبك.
-خجل.
-منو؟
-اسلوبي من اخلاقج.
-تصبح على خير رايحه انام.
-انتِ الخير.
شمرت التلفون ونمت ما فزيت الا على دغة قوية بجتفي. فتحت عيوني اباوعلهم اثنينهم گدامي بريا وميثم واثنينهم اعصاب....
شكرا لزيارتكم عالم روايات سكيرهوم
