رواية علي اليتيم الفصل التاسع بقلم جمانه السعيدي
امل.... طلعت من الغرفه لان مااريده يصير عصبي
هذا الموضوع يريد هدوء اذا عاند اني شسوي بروحي
طلعت وبقيت منتضرته وعيني على باب غرفته
مثل المسجون وينتضر حكم الاعدام
اتاخرت فوك واني منتضرته وهو ماطلع ابد تجاهلني
وكانما ماموجوده
امي خلصت خبز وصاحت عليه تعاي نرجع للبيت نزلت واني لوني مخطوف
امي حست اكو شي
امي...شبيج
امل...مابيه شي شويه تعبانه من الشغل
امي...يله نرجع للبيت
رجعت واني امشي بلا وعي شلون بيه معقوله يتخلى عني شلون راح احل هاي المشكله
هو مو كال احبج مو قسم يزوجني ياربي وين اروح
اني شسويت بنفسي
اني ليش صدكته
ثاني يوم امي ماقبلت تروح عليهم تعبانه
شلون حظ قبل من اكو شي بيني وبينه كل يوم امي تروح
واني وياها حتى تصير علاقة بينا واطلع حامل
وهسه اني محتاجه اروح هناك حتى احل هاي المشكله امي
ماتروح البيتهم
بيومها ماكدرت اكل فقدت الاحساس بلجوع هلكد ما خايفه
اكيد اكيد مصيري الموت
بدون نقاش محد راح يصدك اني مو غلطانه
محد راح يحجي علي هو ابن الناس الاغنياء
هو السلطه والجاه
كلها راح تشمر اللوم عليه اني الفقيره الي خليت عيني علي واريد اورطه
لازم اروح البيتهم لازم احجي ويااا لازم يساعدني نلكه حل
اليوم الي بعدا
امل.. يمه انروح ببت ام محسن
امي...انتي شعدج هليام بيت ام محسن تلحين هواي
وحتى شكلج كله متغير ما عاجبني
امل...قابل شنو عندي اشتغل واخذ فلوس بمكان ماكاعده وساكته هنا
امي....باجر انروح اليوم اذا ام محسن وصت علينا نروح
امل...سكتت مااريد الح عليه خاف تشك بيه اكثر
اليوم الي بعدا كعدت من الصبح
اليوم اريد اروح الكه حل الهاي المصيبه الشهر الثالث راح يخلص شلون بيه
كعدت امي ورحنا على بيتهم
ام محسن ...امل نضفي الحديقه والكراج
امل... ( يا حديقه باكراج اليوم اني جايه اريد حل الهاي المصيبه )حاضر كمت انضف واني اسحل بروحي سحل
وعقلي وفكري كله يم محمد شلون أقنعه يزوجني
نضفت الحديقه وصعدت بسكوت فوك
لكيته توا كاعد بس شافني ضاج
امل....صباح الخير
...مارد عليه
امل... فدوه محمد الله يخليك اسمعني
محمد...امشي اطلعي برا اني مو غشيم جايه اضحكين عليه اصلا انتي مبينه رخيصه
امل...شنو رخيصه انت زوجي انت ازوجتني ورب العالمين شاهد
محمد....انجبي زوجها انتي شنو وتصيرين زوجتي
اني بليوم الي اقرر بي ازوج
اخذ وحده بت ناس بت اصول من مستواي
مو انتي انت مصدكه نفسج لا خاف صدكتي نفسج
شنو زوجتي بابا روحي شوفي واحد من مستواج
وبعد لا ترفعين راسج عالي خاف تنكسر ركبتج
شوفي وياامن نمتي بعد وروحي اعرضي علي هذا العرض
امل....ولله اموت اهلي يموتوني اني وثقت بيك وسلمتك نفسي اذا اني مو مستواك
ليش ضليت تكول احبج ليش كلت انتي زوجتي
اقسم بلله محد قرب عليه غيرك
محمد...ضحكت عليج خوش هسه ارتاحيتي
وبعد مااريد اشوف وجهج مره ثانيه فهمتي لو لا
امل. ...شلون وين اروح خلص الشهر الثالث بطني راح تكبر اذا قتلوني مو بس اني اموت
اني وابنك انت راح تكون مسؤل عنا ثنيين
مسؤل عن روحين راح يموتن بسبك
جمانه السعيدي
محمد....امشي اطلعي برا ولله اكول باكتني واذا كلت
هذا الكلام كله راح تصدكني اطلعي حراميه
واخليهم يشمرونج بلشارع انتي وامج
اطلعي بلوجه الابيض احسلج وشوفيلج صرفه وياا هذا الي بطنج
وابد ابد اسمعي زين ابد لا تكولين عني اي شي
لان اضيعج انتي واهلج
ابسط شي اسوي حتى اضيعكم كلكم
البس ابوج قضيه واكول يحجي على النضام
وراح يروح بعد مايرجع واخليكم تجدون بلشارع
اطلعي وبعد لا ترجعين هنا ابد
عبالج اني زوج تضحكين عليه
امشي ولي اطلعي منا هلمره احجي وياج
وماخذج على كد عقلج مرت الأخ انفذ كبل اطلعي برا
لا اصير عصبي
امل....بس لا تنسى رب العالمين كان شاهد على هذا الزواج
وياويلك من شهادت رب العالمين
لان هذا الشاهد الوحيد الي ما تكدر تسكته
واذا انت تهددني بلفلوس والمنصب والسلطه
اني اهددك برب العالمين الي عينه ما تنام ولا تغفا
روح الله لا يسعدك ولا يهنيك ولا تشوف ضنا كل عمرك
الله يحرمك من هاي النعمه
مثل اخذت شرفي وتخليت عني
نزلت من فوك كبل اخذت عباتي وطلعت امي بقت تصيح عليه
امل.. وين رايحه الكراج ما غسلتي
امشي ودموعي تطفر من عيني منا ومنا
شلون بيه شراح اسوي شلون ضحك عليه وسلمته نفسي
اني شسويت بنفسي
الله لا يوفقه ولا يرزقه ولا يهني
جمانه السعيدي
رجعت للبيت امسح دموعي ويرجعن ينزلن
كلما اذكر كلامه اموت اكثر يهدد بمنصب والفلوس
واني ماعندي بس رب العالمين اهدد بي
اختي حاولت تفهم مني شكووو مااكدر احجي
امي اجت وراي
امي...ولج امل شبيج ليش اصيح عليج وماتردين
ليش تبجين احجي
امل...من كد الخوف والقهر ماكدرت احجي
بس امي ماعافتني بقت تلح عليه
ولله لو تدري حامل هي تذبحني بايدها وما تنتضر ابوي
اتخيل الناس كلها تعرف
ابوي شلون بعد يطلع شلون يروح للشغل شراح يكووول
امي...شبيج احجي
امل...محمد
امي...شبي محمد
امل...يكول انتي خدامه وامج خدامه
امي.. هي هاي تبجين علمودها صدك ماجذب اني خدامه
وانتي خدامه وابوج خدام عدهم
يايمه الشغل موعيب نشتغل وناخذ فلوس
امل...ليش احنا خدامين ليش ماعدنا فلوس وسلطه مثلهم
امي.... الله خالق الناس أشكال بيهم الغني وبيهم الفقير
انتي ليش ضايجه وتبجين
ترا ما جذب احنا خدام عدهم وزين قابلين بينا
جمانه السعيدي
كتله روحي اني اجي وراج
واختي جانت تغسل ملابس بلحمام
لبست عباتي وطلعت
اخذت تكسي للكراج اول سياره لا كتني كوستر وتصيح
نفر واحد بغداد
صعدت بلسياره ومشت غطيت وجهي بعباتي وكمت ابجي
ابجي على حظي على فراك اهلي
على مصيري الي مااعرف شنو
نزلت بلكراج وبقيت امشي لا أعرف أحد ولا اندل اي شي
امشي تعبت جوعانه وخايفه
خلص النهار واني امشي هنا واكعد هنا
وماعرف وين اروح
ماكو على الساني غير اني دخيله على رب العالمين
كلش خفت من صار اليل
احس الناس كلها عينه عليه
بالنهار اهون امشي بلشارع حالي حال الناس
بس بليل شلون بيه وين اروح
امشي شفت مستشفى شفت ناس تدخل وناس تطلع
كلت هاي هي ادخل انام بلمستشفى
هذا أأمن مكان اليه احسن ما انام بلشارع
دخلت لكيت الناس كاعده بلحديقه وناس داخله وناس طالعه
كعدت بلحديقه وعلاكتي بصفي
جوعانه وتعبانه ومنا حامل
احس رجليه من كد المشي صارن خيوط
وبعد مااكدر اوكف على حيلي كعدت شويه الدنيا كامت تفتر بيه تمددت
كلبي يدك على السريع وجسمي كله يرجف
اكو عجوز جانت قريبه عليه
انتبهتلي من دخلت شافتني امشي واسحل بروحي مشتي مخربطه
بس تمددت
...هااا حبوبه شبيج
امل.. تعبانه مااكدر
...وين اهلج
...امل ماعدي اهل
...يمه انتي مريضه وجهج اصفر وشفتج بيضه
امل....حامل وكلشي مااكلت من الصبح
....ليش يمه ماتاكلين وين زلمتج
امل..شمرني بلشارع مايريدني
...وين اهلج
. ماتو اهلي ماتو كوه ارد عليه مابيه حيل احجي
.. تعاي بلمستشفى مبين حالتج تعبانه
امل...مااكدر اكوم حجيه
راسا هاي الحجيه راحت دخلت للمستشفى وجابت بنيه ممرضه اني ممده على الحشيش ومغمض عيوني
اسمعها تكول هاي حامل وماعت روحها تعاي شوفيه
الممرضه دنكت عليه فتحت عيوني
بعدين شافت النبض جان تكول هاي نبضه ضعيف
خل اروح اجيب احد ينقلها وياي جوه
شويه ومااحس غير شالوني ودخلوني جوه
والعجوز وياي ماعافتني
دخلوني بلطوارء وخلولي مغذي اخر شي حسيت
بي الكانونه لان وجعتني من دخلوها بايدي
وبعد ماحسيت بشي
كعدت بليل مااعرف شكد فات وقت احس راسي يوجعني
حيل واحس نفسي جوعانه
بقيت ممده مااكدر اكعد تعبانه وجوعانه
تقريبا نص ساعه واجتني العجوز
...هااا كعدتي
امل...اي
...جوعانه اجيللج شي تاكلين
امل...هاي فلوس بلجنطه اخذي منهن وجابيلي شي اكل
....لا اني عندي اكل اني هنا وياا جنتي سوت عمليه
ولاده وكل شويه اروح وارجع عليج
امل...الله يبارك بيج
...هسه اجيبلج اكل واجي
راحت تقريبا عشر دقايق ورجعت عليه جابتلي خبزه بيها دجاج وخياره كامت توكلني شويه شويه
جابتلي مي شربت حسيت نفسي صرت احسن
عافتني وراحت الجنتها
وبعد اني ماكدرت انام افكر باجر شلون وين اروح
اليله خلصت بلمستشفى
باجر وين اروح بقيت بمكاني للصبح غفيت
وجه الصبح كعدت
على صوت الدكتور الي اجت للطوارء كعدت
جمانه السعيدي
دكتوره سميره مسؤله عن المستشفى
تتفقد الطوارء الصبح
بس شافتني
دكتوره سميره....هااا ماما شخيرج
امل...سكتت مااعرف اجاوبها
الدكتوره ....وين طبلتها شنو حالتها
الممرضه....البارحه لكينها واكعه بلحديقه حامل
مبين عدها فقر دم
الدكتوره...اخذي المعلومات منها وسويلها طبله تعرفين الدخول بدون طبله ممنوع
الممرضه..حاضر
طلعت الدكتوره واني خفت اكثر
رجعت عليه الممرضه وبيدها طبله
الممرضه....اسمج وعمرج وشكد صار حامل
انطيتها اسمي وعمري الحقيقي بس العنوان كذبت
بعدين كالت لازم تحاليل
اخذت مني دم وبدت تسويلي تحاليل
طلع عندي فقر دم وتعب بسبب الحمل
العجوز اجتني كالت احنا اليوم نطلع اجيت اسلم عليج
سلمت عليه وراحت
بقيت يومين بلمستشفى اكل وانام واخذ علاج
اليوم الثالث اجت الدكتوره شافتني
دكتوره سميره...هااا ما ما صرتي احسن
امل...الحمد لله
الدكتوره...حتى انسجلج خروج مادام تحسنت خالتج
هذا السرير بلمستشفى
أولى بي مريض غيرج
امل...اي دكتوره
طلعت واني حرت بزماني وين اروح
هنا مكان امين اكل واشرب برا وين اروح
شلون اعيش شلون راح احمي نفسي
يارب لا تتخلى عني خليك وياي اني مالي احد غيرك
