 |
رواية الشبح العاشق الجزء الثاني الفصل التاسع بقلم رباب حسين
اختبارات الحياة صعبة.... تتطلب تضحيات.... أن تختار ما هو أقل خسارة.... ومع المسئولية تجد أن التضحية بنفسك هو أنسب حل خاصةً وإن كان الإختيار بين نفسك وبين من تحب.... هناك اختبارات تجعل روحك تنقسم إلى نصفين.... يشتت العقل بين الصح والخطأ أما القلب فله اختيارات أخرى.... فالعشق يعطيك قوة خارقة من نوع أخر.... قوة تهدم جبال.... تزلزل الأرض.... تصنع من نفسك حاجز قوي تحمي به من تحب.... فيصبح من السهل أن تموت ولكن من الصعب أن تعيش دون من تحب.... وليست التضحية مرتبطة بالقوة.... لا فهناك أبسط الأشخاص وأضعفهم حتى أنهم لا يستطيعون حماية أنفسهم ولكن يمتلكون قوةً خفية.... الإخلاص في الحب.... فيضعون أجسادهم أمام من يحبون كدرع قوي صلب لا يهابون شئ سوى الخوف من الفقد.... فانتبه أيها الشر القابع في زوايا النفوس الضعيفة فهناك قوة أخرى لن تراها.... ولن تشعر بها.... لأنك لا تؤمن بها.... هي رابط الحب القادر على تكسير كل القيود والقادر أيضًا على ردع هذه الكراهية التي تحاول زرعها داخل النفوس
في ظل السعادة التي كانت تجتاح ليان بعثورها على بنوفيل وقد وجدت أيضًا شظايا النجم كان هناك من يقف في الخفاء.... شبح شادي الذي يظل يتبعها في كل مكان دون أن تشعر ويظهر على وجهه علامات الغضب ثم توجه إلى مالوس على الفور وعندما رآه وقف أمامه في خوف من غضبه وقال : ليان.... لقت بنوفيل
وقف مالوس في غضب وقال : لقيتها إزاي وسط الجبال وكمان أنا خبيتها كويس أوي... لقيتها إزاي؟!
شادي : مش عارف.... ليان ضربت السيف في الأرض بقوتها وفجأة رسملها الطريق وبطل التعويذة اللي كنت عاملها عليها.... وفيه حاجة كمان.... هي قدرت ترجع قوة بنوفيل برده بالسيف وكمان ليان لقت شظايا النجم... يعني هتعمل نصل النور
إشتعلت النيران من حول مالوس من شدة غضبه وكأنه يقف فوق فوهة بركان ثائر وقال : امنعوها.... بكل الأشكال امنعوها
نظر له شادي في خوف وقال : طيب نعمل إيه؟!
صاح مالوس بقوة وقال : مينااااس
ظهر ميناس أمامه ولاحظ غضبه الشديد فقال : خادمك
مالوس : الخطة فشلت.... كنت فاكر إن لما ليان تبقى لوحدها مش هتقدر تعمل حاجة وفعلًا بقت كده.... بعدت عنها كل الناس حتى بنوفيل قدرت أغلبها لما نشرت الشر في كل مكان لكن ليان غلبت توقعاتي.... قدرت تعرف سر السلاح اللي في إيديها مش عارف إزاي ودلوقتي بنوفيل رجعت وهتعمل نصل النور.... يعني خلاص هتقدر تبطل اللعنة
ميناس : أكيد مش هتمشي ورا كل واحد ملعون وتضربه بالنصل
مالوس في غضب : مش هبني حرب على احتمالات.... ليان لو عرفت قدرتها الحقيقية كلنا هنبقى في خطر.... خطر مش هنعرف نعمل فيه حاجة.... هتبقى ند ليا أنا شخصيًا
ميناس : طيب أؤمرني طلبك إيه؟
مالوس : نقدر نستخدم مين حواليها؟
شادي : مفيش حد نقدر نستخدمه غير آسر وده بين الحياة والموت بسبب إن جسمه مستحملش ميناس طول الفترة ديه أما عزيز وروما لابسين سلاسل حماية
ميناس : مفيش غير وئام.... أنا ممكن استغل جسمه زي آسر
مالوس : عشان تبقى قريب منها وتعمل معاها علاقة وإنت في جسم جوزها صح؟.... أنا فاهم إنت عايز إيه كويس أوي.... اللي في دماغك ده تنساه لأنها لو حملت منك هتجيب طفل يقضي على الناس كلها.... نظام الكون هيختل.... انسى.... إنت لا.... أنا عندي فكرة أحلى
ميناس : إيه هي؟
مالوس : هقولك بس أنا عايز أعطل ليان بكل الأشكال وحاليًا هي منعزلة عنهم كلهم.... يعني لحد دلوقتي متعرفش إن وئام معانا.... أنا عايز أشغلها عشان متعملوش.... لازم أهددها
عادت ليان وبنوفيل إلى الكهف ونظرت بنوفيل إلى بلورة الصفح وهي تضئ داخل الكهف فقالت : عملتي البلورة؟!
ليان : اه.... وبصي عملت تعويذة إظهار.... ديه بتبطل تعويذة التخفي وكمان بتبطل وشاح الوهم عشان ميستغلوش شكل ماما أو بابا تاني
بنوفيل : حلو أوي.... شاطرة يا ليان... بس استني إنتي لقيتيني إزاي؟
ليان : السيف أرشدني ليكي.... الغريب إني رحت المكان ده قبل كده ودورت عليكي فيه وملقتكيش بس السيف لم رسم الطريق لقيتك في أخره
بنوفيل : يبقى مالوس خفاني عشان متعرفيش تشوفيني.... بصي بقى التعويذة ديه لازم تبقى معانا في كل حتة عشان تقدري تكشفي الأشباح من حواليكي
ظهر شادي أمامها فجأة فالتفتت إليه بنوفيل ونظرت له ليان في صدمة من ظهوره وقال شادي : مفيش داعي للتعويذة.... أنا جي أقولك إن وئام معانا.... لو عملتي النصل مالوس هيموته
اختفى شادي مرة أخرى ونظرت ليان لآثره في صدمة وقالت : وئام معاهم!.... معاهم إزاي؟!
بنوفيل : يبقى خلع السلسلة
ليان : أنا هروح أشوف المستشفى واتأكد
ذهبت ليان ولحقت بها بنوفيل ووصلا أمام المشفى... دخلت ليان على الفور وسألت عن وئام فقال عامل الإستقبال : دكتور وئام لسة مرجعش من المؤتمر
ليان : فين دكتور آسر وروما؟!
العامل : دكتور آسر محجوز في أوضة هنا ودكتورة روما مانعة عنه الزيارة.... أوضة ٣٠١
ذهبت ليان مسرعة ودخلت الغرفة لتجد روما جالسة بجوار آسر التي انتفضت حينما رأتها وركضت إليها لتضمها فوقع نظر ليان على آسر ولاحظت شحوب وجهه ونحافته فابعدت روما عنها بهدوء ويبدو على وجهها الضيق فهي لازالت تذكر ما قالته روما لها أخر مرة ثم قالت : مال دكتور آسر؟!.... حصله إيه؟!
روما : آسر تعبان أوي.... الشبح الغريب اللي كان جواه ده خلى جسمه هزيل جدًا
عقدت ليان حاجبيها في صدمة وقالت : شبح جواه إزاي؟!... هو مش كان لابس السلسلة؟!
روما : السلسلة كانت مزورة.... مكنتش السلسلة اللي إنتي عملتيها.... ليان فيه حاجات كتير حصلت وإنتي مش موجودة وأولها إنهم خدو وئام من وسطنا ومقدرناش نعمله حاجة
ليان : عرفت إنهم خدوه.... بس ليه آسر ملبسش السلسلة
روما : عشان إنتي لما إديتيله السلسة أصلًا كان لؤي جواه.... واه صح مبقاش لؤي.... اسمه ميناس
بنوفيل : ميناس؟!.... خادم الشر.... مالوس عمل بلاوي وإحنا مش حاسين
ليان : إيه الفرق بينه وبين الشبح يعني؟
بنوفيل : ميناس مش شبح.... مبقاش شبح خلاص... بقى أقوى... والسلاح اللي معاه ممكن يدمر كل حاجة على الأرض.... إحنا كده في خطر يا ليان.... ووئام لو تحت إيده يبقى هيضيع
أغمضت ليان عينيها في حزن ثم قالت : يلا نروح نشوف حل
أمسكت روما يدها وقالت : مالك يا ليان؟!... إنتي زعلانة مني في حاجة
ليان : مش شايفة إن الكلام اللي قولتيه محتاج إعتذار منك ليا
روما : كلام إيه؟!
ليان : إتهامك ليا إني بحاول أخطف آسر منك.... وإني ست خاينة لجوزي وليكي
روما في تعجب : أنا قلت كده؟!
ليان : إيه مش فاكرة؟!
روما : لا.... أنا اتصبت باللعنة يا ليان.... مش فاكرة اللي حصل في أخر يومين قبل ما ووئام يتخطف... وآسر كمان ميناس كان جواه من ساعة ما كنا عندك في البيت.... مش أنا اللي قلت الكلام ده
ليان : بجد مش إنتي؟!.... أنا كنت زعلانة أوي بجد من كلامك.... وكمان اتخانقت مع وئام بسبب الصور وبعدت عنه وخسرتكم إنتو الإتنين في يوم واحد لما عرفت إنه بيخوني.... كنت تعبانة أوي
روما : صور إيه؟!
ليان : صور وئام وسيلين
روما : سيلين بنت دكتور صادق.... ديه زي أخته بالظبط.... أنا شفت تعاملهم مع بعض إزاي
صمتت ليان تفكر ثم قالت : كده أنا فهمت.... ميناس كان جوا آسر وحاول يوقع بيني وبين وئام وشادي هو اللي كان جواكي إنتي ووقع بيني وبينك.... بس ليه كل ده؟!
بنوفيل : وأنا كمان بعدوني عنك.... كانو عايزين يضعفوكي
أغمضت ليان عينيها بقوة وقالت بداخلها : حقك عليا يا وئام سيبتك لوحدك ليهم... أنا بحبك يا وئام
فتحت عينيها لترى الرابط حتى تعرف مكانه ولكن لم تجده.... نظرت إلى بنوفيل في حزن وقالت : الرابط مش موجود.... مش موجود يا بنوفيل.... يعني إيه؟!... مبقاش يحبني
بنوفيل : لا.... أكيد مالوس عامل فيه حاجة.... كده وئام فعلًا في خطر
ليان : طيب أعمل إيه؟!.... أنقذه إزاي؟!
بنوفيل : معندناش حل غير إن إحنا منعملش نصل النور
ليان في بكاء : مش ممكن.... يعني المفروض اختار بين جوزي وبين الناس اللي بتموت برا ديه... لا مش هقدر... كده كتير عليا أوي
روما : حبيبتي إهدي.... خلونا ندور على حل تاني
ليان في بكاء وغضب : حل إيه؟... أنا تعبت كل ما أقول خلاص هتتحل بتتعقد زيادة... مش عارفة أحلها إزاي.... ولما بقى في إيدي الحل وقفت عاجزة... ليه بيحصل معايا كده؟!.... ساعديني يا بنوفيل أعمل إيه؟!
بنوفيل : الأول طلعي التعويذة اللى معاكي
أخرجت ليان التعويذة من معطفها وهي على شكل مصباح صغير ثم أردفت بنوفيل : شغليها بقى
قامت ليان بتشغيلها ثم نظرت حولها فلم تجد أشباح فقالت بنوفيل : كده إحنا في أمان.... بصي بقى إحنا هنعمل نصل النور ونخفيه.... وفي نفس الوقت أنا هحاول أدور على وئام بس أهم حاجة لما نخلص النصل تخفيه خالص عشان محدش منهم يعرف إنك عملتيه.... أخر حاجة بقى عايزين نفكر في طريقة نستخدم بيها النصل ده عشان يقضي على اللعنة نهائي مش منطقي نمشي نضرب الناس كلهم بيه
ليان : حاضر
روما : صحيح.... حضرة الظابط عزيز كان بيدور عليكي وعايزك ضروري
ليان : هقابله.... بس هرجع دلوقتي على الكهف
خرجت ليان من الغرفة لتجد سيلين تقف بالخارج وعندما رأتها اقتربت منها وقالت : حضرتك دكتورة ليان صح؟!
ليان : أيوة أنا.... إنتي سيلين؟
سيلين : اه.... أنا بس كنت عايزة اطمن على وئام.... تليفونه مقفول من ساعة ما سافر.... هو كويس؟
حاولت ليان أن لا تظهر هذا الحزن القابع في صدرها وقالت : اه كويس متقلقيش.... مامتك عاملة إيه؟
سيلين في حزن : لسه تعبانة.... تعبانة أوي
ليان : طيب أنا هروح أشوفها
ذهبت ليان إلى غرفة والدتها وفجأة ظهر شبح بالغرفة يقيدها من الداخل وتعجب الشبح من أنها تراه فقال : إنتي شيفاني؟!
نظرت ليان إلى التعويذة التي بيدها وعلمت أن الشبح هو السبب في مرضها فقالت ليان : سيلين بعد إذنك.... ممكن تندهي أي ممرضة من برا.... محتاجاها في الكشف
أماءت لها سيلين وخرجت من الغرفة لتخرج ليان السيف سريعًا وتقتله وإذا بوالدتها تفتح عينيها ونظرت إلى ليان وقالت في إعياء : دكتورة ليان؟!
ابتسمت لها ليان وقالت : حمد الله على السلامة يا مدام
سهام : معقول إنتي بتعالجيني بنفسك بعد اللى عمله صادق
ليان : وحضرتك ذنبك إيه.... الحمد لله إن اطمنا عليكي
دخلت سيلين الغرفة وتفاجأت بأن والدتها تفتح عينيها فقالت : ماما.... ماما إنتي صحيتي
ارتمت سيلين بين أحضانها لترتب سهام على ظهرها ثم قالت : متخافيش يا حبيبتي أنا كويسة
ليان : أنا محتاجة أقولكم حاجة ضروري
نظرت لها سيلين في قلق وقالت : حاجة إيه؟!... متقلقنيش أرجوكي
ليان : لا متخافيش... هي حالتها مستقرة دلوقتي
ثم شرحت لهم اللعنة التي أصابت كثيرًا كم الناس ثم قالت : عارفة إن كلامي غريب.... بس دلوقتي والدتك هتبدأ تشوف أشباح وهي سنها كبير مش هتستحمل فكان لازم أفهمها الموضوع
سهام : يعني صادق كان معاه حق.... إنتي حاولتي تقتليه بالأشباح؟!
ليان : لا.... الأشباح اللي حاولت تقتله زي ما كان واحد منهم السبب في مرضك.... بصي يا مدام سهام.... أنا عارفة إن صعب تصدقيني بس أنا وجبي هعمله عشان محدش يتأذي وإنتي أولهم... هعملك سلسلة تلبسيها تحجب عنك الأشباح بس للأسف هتشوفيهم مؤقتًا
ذهبت ليان وتركت الغرفة في غضب ولحقت بها بنوفيل وقالت : كل ده كان خطة رسمينها عشان يوقعو بيني وبين وئام.... وأنا بغبائي وقعت فيها وخسرته..... أنا هرجعه بأي شكل يا بنوفيل.... بأي شكل
ذهبت ليان إلى الكهف وعملت سلسال إلى سهام وعادت سريعًا لتعطيه لها ثم تركتها وذهبت دون حديث.... فمن المؤكد أنها لن تصدقها فلم تهتم بالتبرير..... قامت ليان بتنفيذ خطة بنوفيل وعملت نصل النور.... كان يشع ضوءًا كنجم ساطع بالسماء وعندما أمسكت به بيدها شعرت بقوته ثم قامت ليان بوضعه داخل صندوق ووضعت السيف عليه حتى تصنع حوله درع يحميه.... أمسكت السيف بيدها وقالت لبنوفيل : السيف.... زي ما السيف رسم طريق ليكي أكيد هقدر استخدمه عشان يوصلني لوئام
نظرت لها بنوفيل وقالت : أيوة صح.... طيب جربي
رفعت ليان السيف أمام عينيها واغلقتهم بقوة لتستحضر قوتها ويظهر الضوء على جسدها ليمتد إلى السيف ثم وضعته بقوة على الأرض ليرسم خطًا منيرًا يدلها على الطريق فنظرت إلى بنوفيل في سعادة وقالت : تعالي معايا
