رواية بيت جدي كامله جميع الفصول بقلم جمانه السعيدي
بيت جدي بيت بسيط البيت هوسه ٢٤ ساعه
احنا بسنة ٩٥ البيت بي اربع عوائل
مو بيت تكول خان هلكد ماناس طالعه وناس داخله
وحجي صياح كل النهار
مايصير البيت هدوء اله لمن انام
ساعته تنسد الباب ويصير البيت هدوء
تعالو نتعرف على الاربع عوائل الي عايشه بهذا البيت
عمامي ثنيين مزوجين عمي عماد مزوج بت عمه هو الجبير بلبيت عندا اربع اطفال ثنيين بنات وثنيين ولد
عمي اسعد مزوج بت خاله عنده اربع ثنيين بنات وثنيين ولد يجي بعدهم عمتي سهام مزوجه ابن عمها
اخو مرت عمي عماد وبيتهم قر يب على بيتنا
بعدهم يجي عمي صلاح هذا تحديدا اسمه غير رسمه
مثل ما يكولون العرب
اسمه صلاح بس هو أساس الخراب بهذا البيت
وواحد سكير لاضمه ولا ضمير
سكير وعصبي ولا شغل ولا عمل
يخلق المشاكل خلق
بعدهم يجي ابوي فاضل جمانه السعيدي
ابوي انسان طيب وحنيين خريج صناعه عنده سياره حمل يشتغل عليها
امي هي الوحيده بلبيت غريبه
بيبي اختارتها وخطبتها الابوي
بعد الزواج يله بدت قصة حبهم
ابوي يموت على امي وهي تحبه وتحترمه
امي جابت بنات ثنيين بلبدايه وجانت خايفه ماجيب ولد
وخاصه زوجات عمامي كل وحده عدها ثنيين ولد
طول النهار تسمع حجي وتبسمر من نسوان عمامي
انتي خلفتج كلها بنات
انتي مراح اجيبين ولد
لازم انزوج فاضل حتى يصير عنده ولد
هذا الكلام كان يقهر امي حيل وتبقى
تبجي وتزعل
بس ابوي كان يطمنها دائما
مايريدها تزعل
ابوي...انتي صدك خاله عقلج وياهن الاطفال رزق من رب العالمين شمدريج مراح يصير عندج ولد
بعدين حتلو مايصير ولد
اني عندي بناتي بلدنيا كلها
اني احب البنات اني اريد بنات
امي...اي حتى تزوج عليه
ابوي...وداعتج ماازوج عليج انتي حبيبتي شلون ازوج عليج
امي....اخوانك كلهم عدهم ولد وانت تبقى على البنات
ابوي...رزق رب العالمين شبيهن البنات نعمه من الله
امي...هذا حجي اهلك يبقون يحجون بهذا الموصوع لمن تتغير عليه
ابوي....انتي ماعندج ثقه بيه مو اكلج ماازوج واني احب بناتي سدي هذا الموضوع وبعد لا تحجين بي لان صدك راح تخليني اغير معاملتي وياج
العائله الرابعه جدي وبيبي وعمي صلاح
عمتي سهام بوقته كانت مزوجه وعدها اطفال ثنيين
صار عمر اختي الجبيره خمس سنوات
واختي الثانيه عمرها ٣ سنوات طلعت امي حامل
قبل ماكو سونار وهاي السوالف
تبقى الام اليوم الولاده يله تعرف شنو نوع الجنيين
صدكو امي كل يوم تروح تأخذ خيره تريد تعرف هذا الي بطنها ولد لو بنيه
رغم امي كلش متدينه وتصلي وتصوم
بس خايفه اجيب البنيه الثالثه
هلمره صدك تتخبل اذا مااجا ولد
على فكره هاي الاربع عوائل كلها تاكل بجدر واحد
يعني ينجمعون على الغده وياكلون سوا
والعشى نفس الشي جمانه السعيدي
تخيلو شكد يحتاجون مسواك بوقت الحصار الاكل ماكووو
والشي غالي
بس رب العالمين جان ساترها عليهم
زوجت عمي الجبير عليها الخبز تصعد وياها بيبي من تخبز تساعدها
زوجت عمي الثانيه عليها الغده
وامي عليها العشى
المهم نرجع السالفتنا امي بقت عايشه بقلق منا لمن ولدت
اجيت اني للدنيا
واخيرا اجا الولد الي امي منتظرته
اجا ولي العهد من صاحت الجده ولد امي كامت تبجي
ونست كل الوجع
امي سمتني علي كالت اني طلبتك من رب العالمين والامام علي وراح اسميك علي
امي كانت تحبني بشكل مو معقول يعني اي واحد يقرب عليه تتخبل
اذا واحد من جهال عمي ضربني
امي تزعل نهار كامل بلغرفه وما تطلع
اني نفسي كنت احس اني مميز هلكد ماامي تخاف عليه
اخواتي الأكبر مني يمشن وياي عبالك حراس
لازم مااوكع ولا احد يضربني ولا اعطش ولا اجوع
اني مقدس بلنسبه الهم
زوجات عمي اتخبلن شدعوه هلكد تخاف علي
شنو متعجبه جابت ولد
المشاحنات بلبيت ما تخلص ابد
بس مو هنا المشكله
المشكله الجبيره الي جانت بهذا البيت
ولي قررت اكتب قصتي علمودها
الخلاف الازلي بين امي وعمي صلاح
عمي السكير الي حجيتلكم عنه بلبدايه
امي جانت تتخبل من عمي لان يشرب وعصبي وبلا اخلاق
الغلط والفشار ماينزل من حلكه
لا يخاف ولا يستحي
ولا يصلي ولا يصوم
حتى إذا اكل وياهم بماعون امي بعد ماتاكل بهذا الماعون
وتتخبل اذا فتح الجدر لو اكل منه قبل لا يصبون الغده
بعد ماتاكل منه
هو جان يعرف هي تكرها وماتريده
لذالك جان يخبث عليها
وين اكو دولكه يشربون بيها مي جان يشرب كدامها ويرجع يبز الماي داخل الدولكه
امي تتخبل من هذا التصرف
ووين اكو مكان تشر ملابسها جان يروح هناك ويلزم الحبل
وهي تتخبل
تبقى تحجي علي جمانه السعيدي
تلعب نفسها منه تكول اي شي يلزمه صار نكس
اي شي يقرب علي تلعب نفسها منه
قبل ماكو مواعين سفري والمواعين عزيزه
طبعا كل الي بلبيت يتعاملون ويا الموضوع عادي
الا امي تتخبل منه
بحيث اشترت مواعين فافون تغسلهن وتخليهم بغرفتنا
خاف ياكل بيهن عمي صلاح
تكول عمكم الاكل والشرب ويا حرام
حتى اني وخواتي تمنعنا نقرب علي واذا يريد منا شغله تكول لاترحون يما ولا جيبوله اي شي
كل يوم هذا الحقد والكره يكبر بينهم
هو ما يطيقها ودائما يحرض ابوي عليها
حتى يكوله ازوج شنو باقي عليها جابتلك ولد ومتعجبه بي
ازوج هاي ما تستاهلك
هااا وهذا الحجي كدام امي
حتى يقهرها بلزايد
وامي ما تتوصا كل ما تسمعه يحجي هيج تتخبل منه اكثر
قبل ماكو تعزل من البيت إذا مأعجبها الوضع
حصار والناس عايشه بلضيم وكوه مدبره العيشه
تخيلو بيت عمي اربع نفرات بغرفه وحده
وبيت عمي الاخ نفس الشي واحنا صرنا اربعه بغرفه وحده
جمانه السعيدي
والشغله عاديه كلنا ناكل ونشرب سوه
صحيح اكو مشاكل بس مو مشاكل مالها حل
المشاكل الي تصير بكل البيوت
قبل ماكو الزوج يسمع المشكله ويكبرها ويدافع عن زوجته
المره تتحمل الضيم وتصبر حتلو يضربوها
تكعد وتسكت مالها حق تحجي لو ادافع عن نفسها
البيت كله بيد جدي
اي واحد ما يتحرك للباب اله ياخذ رائي جدي
عمامي وابوي يشتغلون ويجيبون الفلوس يخلوها بيد جدي وهو الي يصرف ويتسوك للبيت
بكيفه اذا يجيب هواي لو شويه
محد يحجي ولا يفك حلكه
واذا نريد ملابس جدي يشتريلنا
طبعا يكون ضروري نشتري ملابس يعني نكون محتاجين نشتري ملابس
للعيد لبسه وحده للمدرسه لبسه وحده
للبيت لبستين اكثر شي
ماكو هواي ملابس مثل هسه
البيت كله بقيادة جدي ومحد يتحرك منا لهنا اله يسئل جدي ويقبل يله
