رواية الشك يلاحقني كامله جميع الفصول بقلم جمانه السعيدي
اني همام مواليد ٩٣ من عائله متوسطة الدخل ابوي عندا محل مفروشات وعندا راتب تقاعد والوالده ربت بيت
عندي اخ ازغر مني بسنتين ( عندا متلازمة داون) الناس تسمي بلعاميه منغولي
اسمه حسن وعندي اخت ازغر منه بسنتين اسمها رشا
عائله مستوره والحمد لله
ابوي من احنا ازغار يعلمنا على الصلاه حتى حسن يصلي صحيح صلاته ما مضبوطه لان عقله على كده
بس الله يعلم بحاله يجوز يقبل منا اكثر مايقبل صلاتنه
من اني زغير متعلق بنت خالتي خالتي ازغر من امي عدها بنات اربعه وازغر واحد ولد
اني احب بت خالتي الثانيه
الجبيره اسمها زهراء
والثانيه حبيبتي الي اموت عليها واعشقها عشق اسمها مروه
ما جان حب عادي حبيتها اكثر من روحي
حب اقرب للجنون صحيح هي مو حيل منسجمه وياي
بس اني مستعد اخليها تحبني
ومستعد اصبر العمر كله انتضرها
سنة ٢٠٠٨ توفا الوالد جانت صدمه جبيره بلنسبه النا كلنا واليه بصوره خاصه
لان جنت ما ادري بلدنيا وين ماوين بوجوده
اضافه الحالت الفقدان الي عشناها
اني صارت عندي مسوليه جديده
الصبح اداوم والعصر افتح محل الوالد
صحيح جان عدنا ولد صانع كلش امين والوالد جنه نثق بي جدا
بس الصبح اتركه وحدا بلمحل لان عندي دوام
والعصر اني اروح ويا بلمحل
جمانه السعيدي
رغم هاي الضروف الجديده بعدتني عن مروه بس هي ابد ماتفارك بالي
الحد ماخلصت صف سادس وطلعت معهد طبي
بديت اللح على الوالده تخطبها اليه
همام...ماما اريد ترحين الخالتي وتخطبيلي مروه
ام همام....ماما خلص دراسه ولله كريم
همام شفت امي ضاجت حيل
ماما شكو شو ضجتي
ام همام...ماما خلي مشروع الزواج بعدين هسه مو وكته
واذا تختار وحده غير مروه يكون افضل
همام...انتي تحجين صدك
ام همام...اي ماما مروه ماتفيدنا ابد
همام عود هاي بت اختج وهجي تكولين عليها
ام همام...اي لان بت اختي اعرفها كلش زين ما توالمك ابد
خلي ادورلك وحدا غيرها
همام....باعي ماما خل اكلج حجايه اني غير مروه ما ازوج ابد
تدرين اني احبها من جان عمرها اربع سنيين
ومتعلق بيها حيل ومستحيل اعوفها ابد
ام همام...ماما اتخرج ولله كريم المقسوم مضموم
هسه راح اوصفلكم مروه
مروه مواليد ٩٧ بيضه وناعمه وشعرها اسود سرح دائما تكصه كاري لحد متونها حيل لايك عليها
وكان هاي الكصه ابتكروها علمودها
كلشي بيها حلو عيونها وحلكها وخشمها حتى نعومتها احبها
رغم اني ضخم كلش وصاحب اكتاف وبشرتي حنطيه وطولي ١٨٠ بس شكلي حلو وملامحي كلش حلوه
سكتت وسديت موضوع الزواج واجلته لمن اتخرج
بس كل ليله اروح البيت خالتي حتى اشوف مروه واحجي وياها
مرات تجي تكعد يمي وتحجي وياي ومرات لا ماتطلعلي
واني ابقه كاعد واحوس
ليش ماتطلعلي لعد اني المن جاي
جمانه السعيدي
ومن تطلع تكعد يمي ما اكدر انزل عيوني من عليها
طبعا اني فاضح نفسي الكل يدري اني اجي عليها
بعدين بدت كلما اروح عليهم تطلب مني فلوس
يافرحتي شكبرها
احس نفسي مسول عليها من تطلب مني فلوس
كل مره انطيها اكثر ما تطلب
جنت احسب الايام يمته اتخرج وازوجها ويجمعنا مكان واحد اني وياها
من واحد يحجي عن الحب كدامي
اكول معقوله هذا يحب مثل ما اني احب
لا اني حبي تخطا كل الحدود
وعبر مرحلة العشق والهيام
يمكن اذا ازوجها اكابلها واكعد النهار كله
جمانه السعيدي
احس كل تفاصيلها حلوه مشيتها ضحكتها كعدتها صوتها كلامها يمكن اني مجنون بحبها
هي جانت ازيد الدلال عليه لان تعرف احبها وابد ما اكدر
استغني عنها
وطلباتها بدت ازيد اكثر واكثر
بس ما جنت اضايق منها
بلعكس جنت احس هاي الطلبات من حقها
لان حبه معشش بعقلي
مرات اكول يمكن اني احبه قبل لاتنولد
بس امي ابد ماجانت راضيه على هذا الحب
