رواية لست خائنه كامله جميع الفصول بقلم انين الليل
هاي وين صرتن شنو اليوم نطلع بدون ريوك
اجيت عيني بعدين كله جاهز يكعدون الناس تكول صباح الخير مو تكعد تتعارك
هاء وانتي ماعاجبج بدليني اذا ما اعجبج يالله كعدي صبي لا أعلمج
كعد فواز يتثاوب //هاي شكو شبيك وياها لو ابوي ما يكدر بس على امي
وانت حضرتك محامي
اي من توصل الرضوى انا مو بس محامي وقاضي ولك هاي أخيتي الي يمسها بكلمه اموته
ها وانا مو أخوك
بس رضوى اختي أكثر منك
عطاء //صباح الخير
الكل //صباح النور
عطاء //اشلونك فواز
💛💚💙❤💛💙❤💛💚💛💚💙
--#لست_خائنه--
#انيين الليل
البارت الاول
///////|🌹🌷🌺/////|||
السلام عليكم احب اعرفكم بنفسي انا بطلة القصه او مو البطله بقدر ما انا الي تدور علي الأحداث
القصه الي انطيتها الصديقيتي وعزيزتي ست أنين حتى تنشرها وناخذ العبره والنصيحة منها
هاي السطرين بقلم البطله (رضوى)
هسه خلي نتعرف ع ابطال القصه
انا أسمي رضوى من صرت ابوي راد يسميني على اسم بيبي امه --رضيه--بس امي كلتله شنو
هذا الاسم قديم تمشي والبنات يصنفن عليها ابوي اصر وامي زعلت اجت عمه وسيله وكالت ليش الزعل
سموها --رضوى--وافقو ما ما وبابا وسموني رضوى
أسكن بالبصره بابا موظف حكومي عندي أخت وحده أكبر مني بسنتين اسمها رقيه
انا عايشه أبيت جدي آلامي مع خوالي لان امي تزوجت ورى وفاة والدي
خالي الجبير والحنين والحليم الي يوزن الكلمه والي كلنه نحسبله الف حساب والي احبه هو وزوجته
خالي اسمه صبار وزوجته اسمها وسيله عنده بنات اثنين زينب وغدير أكبر من عندي هنه متزوجات
اخوان ناس من أقاربنا بعيدين عنا يعني من العشيره وعايشات بأحد اقضية البصره وعنده ولد اثنين (فواز )
الچبير ما كمل السادس بطل وظل يشتغل ويه خالي فواز تقريبا مستلم كل الشغل ومبين اموره عال العال
والثاني اسمه (سلام❤ )كمل إدارة اعمال وهم يشتغل ويه ابو واخو لان ماكو وظائف
خالي الثاني طاهرهذا عصبي وما يتفاهم ومتزوج بت عمه يعني هم مثل خالتي بس اويلي شكد تكرهنا
اسمها صبيحه هاي كل سنه تحبل وتجيب بحيث عنده ست اولاد وتلث بنات بنته أكبر مني بسنتين اسمها كوثر
كلية الهندسه وخالي يشتغل موظف بدائرة الكهرباء
خالي الثالث صاحب وهذا حنين بس بي مشكله وحده انو هوائي وحجايه تاخذه وحجايه تجيبه ومتزوج وحده
اسمها سهير طبعا زوجه ثانيه
امي اسمها عليه
خالتي اسمها قسيمه
اختي رقيه اكبر مني متزوجه ابن خالتي
عندي عم واحد اسمه جاسب وابوي اسمه جاسم بيت عمي ساكنين كربلاء
هاي عائلتي انا رضوى وهاي قصتي
بيت جدي ابو امي جبير وجنه كلنه عايشين بي بس بعدين خالي صبار عاد بناءه سووا بي طارمه جبيره تاخذ
سيارتين وانوب ديوان واستقبال وبعدين صاله داخليه كلش جبيره مفتوحه ع المطبخ والغرف الجوه
البيت طابقين الجوه اربع غرف والفوك اربع غرف المطبخ كلش جبير احلى شي من نكعد بالشتا ويمنا الصوبه
وعمه وسيله تخلينه دبس وراشي وتسويلنه شلغم ولاننسى الحب الشمسي
اوصف الكم نفسي طويله رشيقه بياض عادي عيوني لونهم اسود فاحم شعري اسود مو كلش طويل
جنت بصف رابع ابتدائي لمن كعدت من النوم وأسمع امي تكل الخالي صبار
امي /:شوف خويه ابو فواز انا أقبل اتزوج بس بناتي
خالي/؛بناتج عدي عليه أمني لا تخافين عليهن اريدج تتزوجين بعدج زغيره وترملتي وبلكي الله
يرزقج وليد يفيدج ويفيد بناتج
امي/:اي خويه بس انت تعرف صبيحه ما تريد البنات وانت شفت انا قبلت اتزوج كله من جوه رأسها وراس سهير
خالي /:ادري بيهن حيايه بس شسوي طاهر يوميه جايبتله ولد وصاحب انتي تعرفينه خلف الله على عهود حملته
وهسه شفتي طلگها واخذ هاي ولا ارتاح الها من اشوفها اتغر معدتي
امي/: مي خالف خويه شلنه غرض
خالي /:عليه ما تشوفينها زعطوطه وعرمه عاف عهود الي صوتها ما ينسمع وردلي على هاي هسه ما علينه
عليه اتزوجي واستقري والولد خوش انسان وادمي وبناتج عدي بردي گلبج
امي //طال عمرك خويه الله يخليك ذخر الي والبناتي وانا يا بو فواز أتنازل عن حصتي بالبيت الك بس
انت تدير بالك عل بناتي تره ما الهن احد الله وانت
خالي/: شنو تتنازلين حصتج البناتج محد يفوت عليهن هذا حك الله
انا من سمعت هيج رحت الرقيه لكيتها تصفط بالملابس وانا مقهورة الدمعه بعيني
رقيه تدرين امي راح تتزوج وتعوفنا
رقيه/ اي ادري كوثر كلتلي
بس هي شلون تعوفنا احنا مو بناتها
رقيه/:كوثر تكول امج ام الرجولة ما تصبر إلا تتزوج
واهنا إجت عمه وسيله ام فواز
عمه وسيله //عمه ليش تبچن منو وياجن
رقيه //عمه كوثر تكول وتعير بيه تكول امي احسن من امج امج ام الرجوله
عمه /:تولي كوثر هي وامها الجلبات
احنا بقينا نبجي وانا اكلها //عمه عفيه خلي امي ما تزوج احنه نشتغل ونجيب الها فلوس
عمه/:لا يمه شنو هالحجي هي ما تتزوج على مود الفلوس
رقيه وهي تفرك بعينها //لا عمه كوثر تكول امج راح تتزوج على مود تلبس ذهب وبدلات وهذني بفلوس
وسيله هي هيچ كالت
رقيه تناشغ //. اي وتگلي راح تكرهچن لان ما تعرف اله تنام بحضن رجال
من شفت رقيه تبجي اجيت العمتي وسيله //عمه انا عندي بحصالتي هواي فلوس انطيهن الامي ولا تخلينها
تعوفنا الله يخليج
لزمتنا عمه وسيله من ايديناتنا واخذتنا للصاله وصاحت بعلو صوتها بحيث الكل يسمعها
صبيحه صبيحه
جان خالي صبار هو وخالي طاهر كاعدين بالصاله وامي بالمطبخ طلعت صبيحه شايله ابنها
صبيحه/:ها ام فواز خيرج
عمه/:يا خيير عود هاي انتي بت عمهم لو طالعه مني من سهير جا كلنه غرب وما نريدها بس منج
صبيحه/:شنو شبيج هيج تحجين
عمه /:ليش تكلين البتج على عليه راح أتصير ام الرجوله روحي كلي البناتها شوفي صبيحه تره
عليه ما عشكت لو جذبت لو سوت المستحيل على مود تاخذ التحبه بالحيله والجذب
عليه بعدها زغيره واخوانها زوجوها
سمع صبار وكام وامي طلعت من المطبخ وصارت تباوع الصبيحه وتبجي خالي طاهر كلها
- - ولج بت الكلب اذا حاجيه اليوم الا اموتج
وسيله بنتر //اي حاجيه ما جبتها من جيبي وهاي رقيه اسألوها
صبار /:احجي بابا رقيه شنو سمعتي
رقيه وهي تبجي /:خالو كوثر تكلي امج ما تصبر بدون رجل بعد نسميها ام الرجوله وصارت
اتأشر عل...
اهنا خالي طاهر ما خلاها تكمل لزم صبيحه من كصيبتها وسحلها وطيح الجاهل كتلها كطعها ولبسها عباءتها
وداها البيت اهلها ولزم كوثر من اذاناتها وكلها
- - - انتي تخدمين اخوانج يابت الكلب بعدج هالطولج تاخذين حجي وتجيبين حجي (وضربها راشدي )
تره هذا بس كلام صحيح خالي طاهر عصبي لكن الحقيقه ما يطي ابته ولا بمرته بحيث صار من يدخل يخوزر
بينه ومن يطلع ويريدنه بس انفك حلكنا لكن عمه وسيله ما تنطي مجال
واتزوجت امي اجه رجلها واخذها اسمع يكولون اخذها للزياره هو يشتغل معلم الصبح امي اجت بوستنا
وانا ورقيه سوينا روحنا نايمات بس احنا متغطيات ونبجي بدون صوت واسمع امي اتوصي بعمتي وسيله
... فدوه ام فواز البنات امانة الله وامانتج
وسيله //. ولا يهمج عليه معزتهن من معزة بناتي واكثر روحي خيه الله ايسعدج
وراحت امي وصارت جياتها قليله وانا ورقيه رحنالها مرتين بس شفناها تضوج عرفنا موتضوج من عدنا بس
لان حماتها وعمتها وياها بالبيت
ومن رجعنا كلنه العمه وسيله //بعد مانروح الامنا
عمه //ليش شلي صار
انا =هاي المره الجبيره تخزر بينا وبتها تهز بايدها وتگول والله ما ادري
عاد عمتي كالت //بعد ما ترحن تريد عليه تجي تشوفجن اهنا هذا بيتجن
عمتي ام فواز جانت شخصيتها قويه وبنفس الوقت كانت حنينه وما تقبل بالغلط بس جانت تضوج من صبيحه
وصبيحه تحاول تبتعد عن وسيله رغم هنه بنفس البيت وما تريد تتواجه وياها
وره زواج امي بقت صبيحه أبيت اهلها وكوثر يم اخوانها وعمه تطبخ وسهير تغسل مواعين وانا ورقيه أنظف
لأن سهير كالت الرقيه //بعد تنظيف البيت عليج مو تعرفين بس تتقولين حجي وتخلين الرجال يكتل
مرته وتريدينا نخدمج انتي وأختج وأمج شابعه نوم
وسيله //سهير تره والله عيب هيج تحجين هنه بعدهن زغار
سهير //وانا هم زغيره توني 16 سنه وشايله بيت ورجل وعايله
كان بيت جدي 400متر خالي صبار بنا من فلوسه مقابل ان يكون اله 200 و200 باسم جدي يعني للورثه
كانت بصفنا قطعه 150 متر بيها غرفه وحمام ومطبخ خالي صبار اشتراها لمن زعلت صبيحه
ودز على خالي طاهر الي جان ينافت علينه يريد له بس زله واحنا جنا ما نسوي اي شي
علمود ما ياخذها علينه حجه وتصير مشاكل ونطلع احنا الغلطانات هيج وصتنا عمه وسيله
صبار //طاهر شنو ما ناوي ترجع مرتك
طاهر بغضب //خليها تولي اريد اادبها
صبار// وجهالك
طاهر// ما عليهم شي گاعدين مدللين
وسيله //لا خويه حتى لو مدللين بس يبقون بحاجة أمهم
صبار //شوف طاهر انت عندك جهال واحنا همه عدنا الولد وزينب وغدير وبنات عليه وعطاء
وبعد ماترهم انا اشوف تعزل
طاهر// شنو صبار تطردني من بيت ابوي على مود بنات جاسم
صبار باوعله وهز راسه /:لا افه عليك ابو صلاح تره بنات جاسم عايشات بحصة امهن وراتب ابوهن وانا
وصية ابوي ما اخلفها
كال بنات عليه امانتكم ورحنا العمهن واتكفلناهن بعد شكو داعي الهلحجي بس انا لكيت حل
طاهر /:وشنو ها لحل
صبار /؛القطعه الي اشتريتها اخذها الك مقابل تتنازل عن حصتك أبيت ابوي صحيح البيت مبني
بس تره الحصه تطلع أقل وانا اساعدك أبناءها هسه مؤقت تجيب مرتك وتكعدون بالغرفه
والفلوس العندك ومن عندي اكملك البيت واشتري راحتك وروح اسال الدلالين الي
يبيعون ويشترون بالعقارات يكلولك انت الربحان وانت بكيفك
طاهر /: ها اشوف يصير خير
لكن ثاني يوم العصر ما طلع عمي طاهر بس بالغرفه هو وجهاله المغرب طلع ورجع جايب عمال شالو
الاغراض للقطعه وصبيحه رجعت بنفس اليوم وبس اسمها طلعت ابحدها مخلصتها كله يمنا هي وجهالها
كبرنا احنه جنا خمس بنات بنات خالي صبار اثنين غدير وزينب كملن سادس وحده وره الثانيه واتزوجن
اقاربنا إخوان وانا ورقيه اختي وعطاء اكبر مني بسنه
رقيه كوه كملت الثالث متوسط تحب التلفزيون وشغل البيت وانا وعطاء جنه شاطرات كلش
عطاء
هي بت خالي صاحب تسولف امي تكول أمها عهود خوش ابنيه حباها خالي وكال الجدي ارمي روحي طلقه
اذا ما اتزوجتها وفعلا جدي زوجه عهود الي بقت خمس سنوات ما حملت وبقت تراجع الاطباء هي
وخالي الي جان عنده ضعف وبقت واتحملت ولا بيوم سمعنا منها حجايه وجانت دائما تقنعه وتروح
ويا للطبيب حتى يتعالج إلى أن الله سبحانه رزقهم وحملت وجابت عطاء وبقت عهود هي وصاحب ابيت
جدي واتعرض خالي صاحب الحادث سياره وبقى تقريبا سنه ما يكدر يكوم وهي دارته وكامت بواجبه
حتى امي تكول طيلة السنه ما راحت وشافت اهلها بس گاعده اتداري بخالي رغم اهلها مو بعيدين لكن هي
ما تقبل اتعوفه تكول يجوز يحتاج شب
لكن فجأه خالي اتبدل على زوجته وصار ما يطيقها ويسوي وياها مشاكل من ولا شي وعلى اتفه الاسباب
بعدين عرفنا السبب انو من جان يراجع للمستشفى وره الحادث هناك متعرف على بنيه جانت ازغر منه بعشر
سنوات وجانت حلوة كلش اسمها سهير بحيث خالي صاحب ترك مرته وبته الي انشلع كلبه يالله حصل عليها
ومرته الي صبرت ويا وجازه صبرها بان جاب سهير وفرضها علينه كزوجه ثانيه وخير عهود بكيفها تبقى تربي
بتها او تحب تروح الاهلها ويطلگها
عهود من شافت تصرف صاحب ما هانت عليها كرامتها عافت البنيه وراحت الاهلها وهي شايله طفله وياها
هموم وقهر وخذلان من انسان حبته لكن هو جازى حبها بالخيانه
رغم معارضة الكل الكل ما قابلين على تصرف صاحب لكن هو ما مهتم الرفض اهله وعدم قبولهم بالي سووا
من اجت سهير ويا ساله خالي صبار كله
أهل مرتك ما كالو وين أهلك عمامك إخوانك
كال /: انا دبرتها سدكم امين
صبار /: يعني ناس ما سألوك ليش اهلك ما اجو وياك وخطبو
صاحب /: تحجي صدك ابو فواز بس دزيت عليهم رجال اعرفه كالو ايكبع وياخذ نعرفه ونعرف اهله
وره شهر من زواجه طلك عهود والبنيه رجعت البيت جدي ما قبلو اهلها تبقى عدها ربتها عمه وسيله
أما عهود بمجرد ما كملت العده اتزوجت وراسا حملت صار عدها ولد وانوب صارت كل سنه تحمل وكأنما
تعاقب خالي صاحب الي جان ولا مهتم لان كل اهتمامه بسهير
خالي طاهر كمل البيت وخلا باب بيناتنا وجانت صبيحه مقيمه عدنا بالبيت وبس تعيب وهي تروح
الساعه 11 للبيت تكلي طماطه لو تشوي باذنجان ع الغدامن يسألها خالي طاهر تكله ملتهيه بجهالك
جانت تجيب وياها ولدها وبناتها الي يشبعونه كتل اذا ما يشوفون عمه وسيله لو فواز لو سلام
من يشوفونهم يسكتون لان يخافون منهم
و كبرنا عمي جاسب أتذكر اجه وره ما تزوجت امي كال أخذ البنات بس خالي صبار كله
ما انطيهن انا مسؤول عنهن وبيومها صار حچي بعدها راح عمي وما صار يجي لو يسأل علينه
چنت صف اول متوسط من عمي جاسب اتوفه بيومها اخذنا خالي صبار انا ورقيه وراحت عمتي وسيله
وخالتي قسيمه ويانه وخالي يوصي بيهن اتعازن واي حچي زايد ما اسمع وبيومها وصلنه للفاتحه
وعاملونا مثل الغربه بتنا ليله ورجعنا
كبرنا رقيه أتزوجت مقداد ابن خاله قسيمه وانا وعطاء بقينا ندرس فواز استلم الشغل ويه خالي صبار
وسلام دخل أداره وإقتصاد ونجح واحنا بقينا ندرس للبكلوريا كوثر جابت هندسه وداومت لان خالي طاهر
جابلها مدرسين اما احنا انا وعطاء اعتمدنا على نفسنا عطاء عادت سنه انقبلت علوم بايلوجي
انا جبت معدل اياهلني ادخل هندسه مدني بس لان كوثر وياي غيرت من الأعلى للأدنى ورحت علوم بايلوجي
ويه عطاء واجرنا خط وصرنا نروح ونرجع سووا رغم كوثر بنفس الكليه بس غالبتنا بمرحلتين
هي ما أجرت ويانه لان كالت ابو الخط متعوده علي جانو أكثر الأحيان فواز او سلام وساعات اثنينهم اذا يصدف
عدهم شغل يم الكليه يخابرون جنه نطلع نتسابق فرحانات لان عطاء جانت تحب فواز وفواز جان دائما اذا راد شي
يأمر عليها وأهلنا الي همه خالي صبار وعمه وسيله دائما يكولون انا السلام وعطاء الفواز بس جانو من يمرون
علينه للكليه كوثر تحشر نفسها بالنص خصوصا اذا كان سلام موجود وما تسمي سلام كله
ابن عمي
مره خابرونه واجو علينه وشافتهم كوثر ما صعدت جان فواز يسوق وسلام بالصدر اشو هاي راحت فتحت
باب الصدر من جهة سلام ولزمته من ايده وهي تكله
عفيه ابن عمي انزل خلي يشوفنك صديقاتي لان ذاك اليوم من صعدت شافتك وحده كالت ابن عمج
مو حلو بس انا كتلهم ابن عمي يخبل عفيه سلام انزل
فواز وهو يضحك ويأشر على نفسه // انا اروح وياج انا احلى من سلام بس وديني على بنات صاكات
كوثربابتسامه // يالله تعالو انزلو
سلام :: شنو كوثر مو عيب هالحجي شنو يكولن ابن عمج مو حلو شنو خلي يشوفنك صديقاتي
انا شلي غرض بصديقاتج وتكولين علي حلو
فواز //كوثر ما عليج بي خلي يولي هذا معقد انا انا اروح وياج
شويه واجن تلث او أربع طالبات
- - هلو كوكو
هي بدلاعه ما تلوگ الها //هلاااو أقدم الجن اولاد عمي سلام وفواز
وحده من صديقاتها - - يا هلا هذا سلام الي تحجينه عنه
فواز من مكانه //وانا اخو الجبير فواز رجل اعمال واعزب
- - فرصه سعيده
سلام بقلة صبر =كوثر اذا تحبين ابقي ويه صديقاتح وارجعي ويه الخط لان احنا مستعجلين يادوب نلحك
نوصلچن ونرجع
هي سلمت ع صديقاتها وصعدت كعدت بالوسطه واحنا ساكتات اشوف سلام صاير عصبي بس فواز
الطريق كله يحشش ويصنف وكوثر بس تسولف وياهم وانا وعطاء ساكتات وصلنه كوثر يم بيتهم واحنا
نزلنه لكينه عمه وسيله بالمطبخ سلمنا وصعدنا الغرفنا نغير ملابسنا انا غرفتي فوك الي ابحدي من تجي
رقيه او امي ينامن بيها وعطاء هم غرفتها ابحدها غرفتين البيت عمي صاحب من كملت لبس نزلنا انا
وعطاء وساعدنا بتحضير الغدا
تفاجئنا بكوثر جايه هي تكل العمه وسيله
- - اليوم ماما مسويه مركة شجر وانا ما أحبها كلت اجي اتغدا وياكم
عمه //هلا بيج حبيبتي بيتج هذا
وكعدت يم سلام وانا اريد أكلها بعيوني واحنه نخلي المواعين ع الطاوله
فواز //وين سهير
وسيله //اكيد نايمه هسه تكول جنت سهرانه ويه الجهال
انا رديت =يمته سهرانة اشو الليل كله عطاء تسوي ممات مره الانمار ومره الجود
كوثر ردت // انتي رضوى لا تصيرين خبيثة شكو بيها اذا ساعدت خالتها ما بيها شي اخوانها وتخليهم
على راسها شوفوني انا شلون ربيت اخواني ويه امي بس صحيح فاقد الشئ
انا خزرتها وكلت =شقصدج
كوثر /:قصدي يعني لان انتي ما عندج إخوان ما تحسين بنعمة الاخوه وشكد همه سند للبنيه
وسيله //لاعمه كوثر منو كلج رضوى ماعدها إخوان
كوثر وهي تعوج بحلكها /:اعرف عمه هسه تكولين فواز وسلام اخوانها واخواني همه
عمه وسيله /:همه مو اخوانها اولاد خالها بس تره عدها رقيه واخوانها من أمها هم عدها أخ
وأخت بعدين يمته انتي لو امج ربيتن اخوانج اشو امج كل سنه تحبل وتجيب وانتي ملتهيه
يا رايحه ياراده انتي وامج خلف الله ع الكاع ربتهم
فواز //والله انا بالنسبه الي اصير اخوها الرضوى غصبن ع اليرضى والما يرضى بس حرامات مو
زغيره بوياي جا دللتها دلال ماصاير
عمه //وهسه انت مقصر اشو شحده الي يحاجيها
فواز/:والله الي يحاجي رضوى امه بعدهي ما جايبته
انا ساكته وانقهرت من كلام كوثر بس عمه وسيله سكتتها
جان خالي صاحب توه جاي واجه كعد ويانه ع السفره شاف كوثر كلها
صاحب /:هلا كوكا اليوم عدنا
كوثر/:اي عمو اجيت اتغدا بعد طبخ عمه ام فواز ما يتفوت
صاحب/:اي عاد الصدك ام فواز ماكو وحده تلحكها بالطبخ
انا بخبث =عمه باجر سويلنه مركت شجر لان انتي تسوينها تخبل
عطاء //اي يمه فدوه سويلنه يوميه شجر
وسيله/: مو تدللن شكم رضوى وعطوه عدي
اهنا كوثر تقصدت تحجي وتسمعنا
كوثر //تدري عمو اليوم من اجو فواز وسلام علينه للكليه خفت عليهم من الحسد
صاحب/::ها وليش
كوثر/:لأن البنات التمن علي كللي ولج كوثر منو ذوله الحاتيين
عاد انا كتلهم ولد عمي
صاحب //كليلهن طالعين على عمي صاحب حلو وسبع
فواز //يعني عمي انت ما تخاف
صاحب/:شنو ولكم ما تعرفوني انوب اخاف ومنين باالله
سلام راسا حجى بصوت عالي //هله ام انمار تعاي تغدي
خالي صاحب نز من مكانه واحنا ضحكنا سلام كله ::عمي شنوا هالتهنبل انت تخاف من خيالك
صاحب/:انجب سليم طيح الله حظك
فواز وهو يضحك //اسكت سلام عمي صاحب شقاوة ما يخاف بس من سهير
وصرنا نضحك
عمه وسيله //أكلكم فواز سلام بعد ممنوع تروحون للكليه
فواز //وليش بالله
عمه //اخاف تنحسدون شنو ربحي بصاحبات كوثر لو برضوى وعطيوة
سلام ::اتامرين امر ياست الحبايب
جنت كل شهرين اروح يأخذني خالي صاحب على مود أقبض الراتب التقاعدي مال ابوي هو بس الي لان رقيه
تزوجت وانا هم ادزلها منه لان اكول خطيه الها حق براتب ابوي يعني واذا تزوجت وكنت كل ما اريد اروح
خالي صاحب يذكرني بي
هلا خالي شلونج
=الحمد لله انت شلونك
تعبان كلش --انا قبل لا أسأله هو بادرني --
رضوى يمته تقبضين راتبج
=باجر او عكبه ليش خالو
باجر انا اخذج لان وداعة رضوى وعيونها الحلوات محتاج أخذه وبس يصير عدي ارجعه تعرفين أراجع
طبيب على مود الخلفه
=تدلل خالو من اقبض أخذ منه مصرفي انا ورقيه والباقي الك
وج شنو تنطين الرقيه كل ما تقبضين موماخذتلها رجال شكبر علباه هو يصرف عليها
=مي خالف خالي هي اختي والها حق براتب ابوي
هسه باجر تحضري
ان شالله
المشكله ما اكدر أكله ما انطيك بس دووم اسمع خالي ابو فواز يكله وين إيراد التريله وهو يكله رحت
بيهن للطبيب وانا اشوف هو ما يصرف ع الببيت لو فلس وسهير كل ما يأخذ مني فلوس تروح وترجع
محمله علاليك ملابس ومكياج وعطورات
من صرنا سادس اعدادي هي صار عدها توم اولاد وما شاء الله طايرة بيهم ومن اجت وجابتهم خالي صبار
ذبح ذبيحتين الوجه الله وفواز جاب ذبيحه وسلام همه اما خالي صاحب صار يبجي من الفرح
تربية الجهال صارت على عطاء هي تسوي ممات لان سهير تخاف على رشاقتها ما ترضعهم
وعطاء خطيه كله عليها بس ساكته لان تحب أبوها وفرحت من صارو عدها اخوان رغم انا وسلام وحتى
عمه وسيله ما محسسينها بيوم انها وحيده بالبيت
انا أكف مواعين الغدا واغسلهن وانظف المطبخ
العشا نسوي انا وعطاء ونتساعد بغسل المواعين لان ما تلحك من أوامر سهير خاتون او سوسي وهذا
اسم الدلع الي يناديها بي خالو صاحب
سهير زغيره وحلوة كدرت تخلي خالي صاحب يطلك عهود الي اتزوجها عن حب والي صبرت ويا وشكد
بقت صابره وهو ياخذ بالعلاج وهي تكول السبب مني ما تريد أحد يعرف انو السبب منه ومن صارت البنيه
سمتها عطاء بس هو عافها واخذ سهير الي جدي الله يرحمه وعمي صبار منعو منها وهو ولا امتنع
وهاي اكدر أسميها اكبر خبيثه بالعالم
سهير تلبس گله ضيگ وبدون ردن ولبسها كله اغراء ومن تشوف واحد من الولد تخلي شال على راسها
خلي نكول اسقاط واجب والمكياج والعطور وصبغ الشعر يعني كل اهتمامها بنفسها جان عليهاالتنظيف
تنظيف البيت وكله تخلي على عطاء وبس تشوف خالي تكوم تشتغل وتسوي روحها تعبانه
اولاد خالي صاحب عمرهم سنتين من صارو راد يسميهم على اسم جدو ابو والثاني على اسم عمه
بس سهير كالت لا إلا أسميهم أنمار وجود تصدكون هي ما تعرفهم كله على عطاء
عطاء كل شهر تروح البيت جدها ابو أمها وهناك تروح تشوف أمها الي تحملها هدايا
وام عطاء صار عدها 3اولاد وبنات اثنين
أما امي فتجي تشوفنا انا ورقيه كل شهر ويصدف رقيه هماتين تجي ونكعد بالغرفه امي صار عدها ولد وبنيه
ورقيه صار عدها احمد امي قبل لا تجي تتفق ويه رقيه ويجن سووا يباتن ليله او بالاكثر ليلتين ومن اكلهن
ابقن بعد يمي يتعذرن بازواجهن والجهال والبيت انا ما اهتم لان عندي عمه وسيله عوضتني عن الام والاخت
وخالي صبار عن الاب وفواز عن الاخ
الشهاده لله يمته ما يحتاجون خوالي امي او رقيه او خالتي قسيمه ما نلكاهن الا اجن
كعدنا الجمعه الصبح على صوت عياط خالي صاحب وسهير واجت صبيحه تصرخ وتلطم عى وجهها
نزلنا نركض وعرفنا انو خالي صبار وعمه وسيله توفو بحادث سياره وهمه رايحين للزياره
