رواية كيد الرجال كامله جميع الفصول بقلم جمانه السعيدي
اتمنى كل الرجال تاخذ عبره من صاحب القصه
وتحاول تتصرف بحكمه بهيج مواقف
حتى يكدرون ياخذون حقهم كامل ومكمل
اذا صادفهم هيج موقف
كل مره نحجي بكيد النساء
هلمره القصه عن كيد الرجال
ااكدلكم القصه حقيقيه
بطل القصه اسمه لطيف
الطول ١٦٧ حنطاوي شكله معقول
اني لطيف مهندس الكترونيات وضعي المادي كلش زين
عندي مكتب اني وولد صديقي نشتغل خير من الله اضافه للوضيفه
عائلتي تتكون من أخ ازغر مني وثنيين خوآت وحده اكبر مني ووحده ازغر
ابوي وامي موجودين والحمد لله
من اني زغير مثابر واشتغل واجمع احب الشغل
والفلوس الي احصلها اجمعها
ابد مو بخيل على اهلي ولا على نفسي
وبنفس الوقت اجمع فلوسي
اني مرزوق ولله الحمد
بعد ماتخرجت كدرت اشتري قطعه ارض كانت بمنطقه توزيع جديد وسعرها معقول
جمعت الفلس على الفلس وبنيتها طابق واحد
على كد فلوسي
اهلي كانو يتباهون بيه
ودائما يحجون بشطارتي وشلون اجمع الفلس على الفلس كونت نفسي قبل لا ازوج
مشكلتي بدت لمن حبيت بت الجوارين
كانت جميله بشكل مو معقول
سحر واسمها عليه
سحرتني جننتني ماكنت اتمنى شي من هاي الدنيا بس
ارتبط بيها
البنيه حلوه وازغر مني بخمس سنوات كانت تاركه المدرسه من المتوسطه
مايهمني حتلو ماتقرا وتكتب مايهمني
اريدها يمكن اذا ماازوجها يصير بيه شي
جمانه السعيدي
اخذت اهلي ورحت اتقدمتلها بعد ماتوضفت وكملت بناء بيتي
اهلها رحبو بيا من اول مره
طبعا موضف وعندي عمل وعندي بيت
مستحيل يرفضون وخصوصا اهلها حالتهم الماديه
وسط يعني امشين أمورهم
بيتهم بسيط
بلاضافه هما جوارينا من زمان ويعرفوني ويعرفون أخلاقي
كان الاتفاق من البدايه اعيش وحدي
ازوج بيتي مااسكن بيت اهلي
اهله كانو طايرين بهاي الزواجه
بس اني كنت اسعد منهم كلهم واخيرا الانسانه الي احبها وتعلقت ببها راح تصير من نصيبي
بدينا نمشي باجرائات الزواج
ماخليت شي بنفسها كلشي تطلبه اجيبه الها
جمانه السعيدي
بحيث خواتها واقاربها كانو يحسدونها على هاي الزواجه
كل مره اروح اشوفها اخذلها وياي هديه
كنت مندفع بهذا الحب بدون وعي
يعني هي حست بحبي الها ولهفتي عليه
من ايام الخطبه
كانت مسيطره على هذا الحب من أول لقاء
وعدها طلبات ماتخلص
بس اني سعيد بيها خليها تطلب اني اذا ماانفذ طلباتها
مااستاهلها
اي شي تريدا اجيبا
كانت تلبس وتدلع خبلتني بلزايد
طيرت عقلي مني
حلوه حلوه بيضه وعيونها كبار جسمها يخبل
ابتسامته سحر
سبحان الله كلشي بيها حلو او اني كنت معجب بيها الدرجه ماكدرت اشوف عيوبها
هاي العيوب كانت بتصرفاته مو بشكلها
كنت انتضر اليوم الي ننجمع اني وياها بيت واحد
حددنا يوم العرس وكنت اسعد انسان بهاي الدنيا
سويت عرس ماله مثيل
والزفه كل الناس تحجي بيها
زفونا على بيتنا
امها وامي اجن ويانه حضرن العشى وراحن
كعدت كبالها
لطيف...انتي تدرين اني شكد احبج
سحر...اعرف
لطيف...لا ولله ماتعرفين اني اموت عليج لو تطلبين عيوني ذني تاخذيهن
كلشي مااتمنى من رب العالمين غير يخلينا البعض
وحياتنا تكون احلى حياة
سحر... امين
لطيف..هلكد مافرحان بليلة عرسنا ماكدرت انام
خاف اعمض ويطلع حلم
للصبح واني اباوع عليه سبحان الخالق المبدع شكد حلوه
الصبح نمت
غفيت تقر يبا ساعين وفرزيت لكيتها نايمه بصفي
سحبتها بحضني وكانما اريد اتاكد من وجودها بحياتي
بيومها للثنين الضهر يله كعدنا
اتصلت بأمي حتى ادزلنا غدا
هي دخلت تسبح واني كاعد انتضرها تطلع من الحمام
كل شويه اوصل للحمام احجي وياها
اريدها تطلع مااكدر اتحمل غيابها عني ابد
حضرت الاكل
طلعت كعدتها بصفي اوكلها بايدي
ماريدها تتعب مااريدها تبتعد عني اني رغم الزفه والعرس بس بعدني مامصدك هي وياي
صارت زوجتي
يمكن اني بالغت بهذا الحب
بس هاي مشاعري الحقيقه ومااكدر اخفيها ابد
اني سعيد بوجودها بحياتي
جمانه السعيدي
من اطلع من البيت اريد بس ارجع لان اشتاقلها
دللتها دلال ماصاير ابد
اغلب الوقت اجيب اكل من برا ومن ارجع انضف البيت واساعدها بلشغل
اغسل ملابسي بلغساله
اكويهن بايدي
لو كالت ضايجه اخليها بلسياره وافتر بيها
لو تطلب اي شي اجيبا بعمري مابخلت عليه بشي
من اباوع عليه اكول معقول هو هذا الحب
شلون كدرو يختصرون هاي المشاعر الحلوه بكلمه من حرفين
الي احس بي مو حب هذا هيام تعلق عشق
اني مجنون بيها مو بس احبها
جمانه السعيدي
سحر...اريد مصرف
لطيف...اي شكد تردين
سحر...اني اريد دفتر توفير اجمع بي مبلغ يكون خاص بيه
لطيف...من هاي العين وهاي
باجر اخذج واسويلج دفتر توفير
وكل شهر اخذي اي مبلغ يعجبج من استلم الراتب وخلي بدفتر التوفير
فعلا سويتلها حساب بلمصرف اجمع بي فلوس
اريدها تعيش مرتاحه
من اشوفها تضحك عبالك محصل جائزه
لا تكولون جاي تبالغ اني متيم بيها
من يجون اهلها زياره اني اقوم بلواجب وزياده
بس من يجون اهلي علينا اضوج تروح تنام تكول اني مريضه
وماتقبل تطبخ
تكول ليش هلتبذير احنا اولى بهاي فلوس العزيمه
ماكنت اكسر خاطرها اكول ميخالف
رغم الفلوس تكون من عندي وذوله اهلي مثل ما اهلي يعزمونا لازم نعزمهم
اهلي حسوا وجها ثكيل من يجون وبدو يقللون الزياره
او تكون زياره على الماشي
يعني مو وقت الاكل
ومن اعزمهن يرفضون الجيه
جمانه السعيدي
كلما يفوت وقت اكثر كنت اتعلق بيها اكثر وماا تخيل حياتي من دونها ابد
حتى واني بلشغل ماكو غير صورتها كدام عيني
واشوفها احلى وحده بهاي الدنيا
وهي فعلا حلوه
فات سنه على زواجنا بدون اطفال
بس اني مايهمني الاطفال وبعمري ماحاولت افتح وياها هذا الموضوع
الاطفال رزق من رب العالمين
واذا رب العالمين ماقسم النا اطفال خلاص هاي هيا الحمد لله والشكر
احنا مراح نسبق رب العالمين بلاخير الي يجي من رب العالمين هلا بي
سحر...اريد اروح للدكتوره اشوف ليش ماكو حمل
الناس كلي الي يشوفني يسئلني
لطيف....شعلينا بكلام الناس انتي اذا مرتاحه هيج
مالج شغل بااحد
سحر.. لا اريد انروح اني وياك ونشوف شنو سبب تأخير الحمل
لطيف...صار من هاي العين وهاي
اخذتها المركز متكامل للفحص والعلاج مختص بهاي الشغلات
اجرينا اني وياها كل الفحوصات الي تخص الحمل والاخصاب
بعد اسبوع طلعت كل الغحوصات
وبين عدها خلل يمنع الحمل
هي سمعت هذا لخبر وهي تخبلت شلون اني مايصير عندي اطفال
لطيف...اهدي حبيبتي راح نروح اكثر من مركز
ونتاكد من هاي التحاليل اليوم الطب اختلف
ايجوز نلكا حل
سحر.. خاف تعوفني لان مايصير عندي اطفال
لطيف.. تحجين صدك اني اعوفج علمود الاطفال
اعوف الدنيا كله ومااعوفج
حتلو مايصير عدنا اطفال طول العمر مراح اعوفج ابد
..
هذا وعد مني
سحر.. تاخذني الغير مركز اعيد التحاليل
لطيف من عيوني ذني حتلو تردين اخذج خارج العراق
اخذج مايهمني
بدت رحلت علاج وفحوصات وزرع وعلاجات غاليه
من مكان المكان
كل الي احصلهن من فلوس
كبل اخذها بيهن
٣ سنوات واني ماخليت مركز يعتب عليه
ولا دكتوره ولا تحاليل
ولا علاج غالي من الخارج
بس بدون فايده ماكو اي تقدم الحالته
كل هذا الوقت اني افتر بيها من مكان المكان وماعجزت ابد
ولا حاولت ابين الها اني متملل منها
بلعكس كنت اصبرها دائما
لطيف.. انتي أغلى شي رب العالمين دزه اليه
انت كنز ومستحيل افرط بي
مااريد جهال اريدج انتي وبس
بس هي ماكانت تقتنع بكلامي رغم تشوفني احترك كد.امها واحاول بس ارضيها
بكل شكل اريدها ترضا ومايهون عليه زعلها ابد
الحد مارجعت بيوم ولكيتها تبجي
تخبلت كعدت بصفها على الجربايه وحضنتها
لطيف...ياستار ليش تبجين شصاير شصاير
فهميني مسحت دموعها وخليتها على صدري
احجي شصاير لا تخوفيني
سحر...انت راح تعوفني
لطيف...اعوفج شنو اعوفج
سحر...اي تعوفني لان تعبت مني ومراح يصير عدنا اطفال
اكيد راح تعوفني بيوم من الايام
لطيف...اني مستحيل اعوفج بيوم من الايام
لا علمود الاطفال ولا علمود شي ثاني
انتي احلى شي صار وياي بهاي الدنيا
سحر.. اهيي اهيي هذا بس حجي بس يطول الوقت راح تعوفني وتزوج وحده غيري
حتلو انت زين الناس مراح تعوفنا بحالنا راح تبقى تلح عليك الحد ماتزوج غيري
جمانه السعيدي
لطيف....يمعوده وين لكيتي هذا الحجي مستحيل اعوفج ابد
سحر... .اريد ضمان
لطيف...شنو الضمان الي تردي اني مستعد
سحر....اسجل هذا البيت باسمي حتى إذا فكرت تزوج
عليه لو تعوفني على الاقل عندي سكن اعيش بي
لطيف...هذا الشي يخليج تطمنيين
سحر....اذا تحبني صدك سجل البيت باسمي
لطيف.. اني روحي مسجلها باسمج مراح يغلى عليج البيت
ياا بيت هذا الف بيت تستاهلين
من باجر اخذ اجازه وابدي بلاجرائات
واحول البيت باسمج مو تدللين
البيت وصاحبه اسجلهن باسمج
سحر...اي هسه اطمنت
لطيف...بدون ماتبجين انتي بس اشري واني انفذ
هذا كان اول قرار غلط اتخذته بحق نفسي
كنت اعمى بحبها ومايهمني اي شي بهاي الدنيا بس
تبقى وياي وماا افقدها ابد
