رواية عشق الضابط كامله جميع الفصول بقلم زينب نور
اني اسمي نرجس عمري ١٩ سنة مرحلة ثانية جامعة اني تربية رياضية جامعة بغداد جادرية
اني بطبعي رياضية يعني اتابع كرة قدم و فريقي برشلونة من شروط القبول ب تربية الرياضية أن يكون جسمك مناسب مع هاي اكو بنات وولد ب جامعة ما اعرف شلون نقبلو بهيج اجسام !
المهم جماعة التربية الرياضية غالبا ما تشوفوهم كاشخين ولله حرام علينه نكشخ كل يوميه احنه ب التراك وبس !
اني قبل جنت اقلد ع الناس الي يكولون أن هاي قصص حقيقية ب واتباد اكول وين أكو هيج شي بس الله شوفني أن اكو هيج قصص وهسه داكتب بقصي 😭😂🥹
بدت قصتي بيوم ٢٠٢٤/١/٥
سوتها بدت السنة وجان دوام ب الجامعة جنت بوكتها جاي اتريك بره الجامعة و من كملت جان اكو رجال جبير كولش احبه
بيبع مي ب الطرقات ف دائما اشتري منه ب الف هيج واكله خلي الباقي الك يعني لأن جان حالته تعبانه وهو كولش جبير يعني دائما اكول ماكو ولد عنده يساعدو شي كلشي ماكو خطيه
بهذا اليوم لكيت صايرة سيارات شرطة وهوسه و الشرطة ياخذون ب الي يجدون ب شارع ف اني بطبعي قويه و ما اسكت !
رحت ركض من شفت الرجال ماخذي كلت الهم
: وين ماخذينه !
جان التف الي شرطي مدري شنو باوعلي من فوك ل جوه جنت لابسه بجامه شويه ضيكه لان عندي تمرين ركض و دريز برشلونة طويل وعريض ف ضام جسمي من جوه !
: للمركز مجداين وين نوديهم قابل !
جان باوعت بعيونه وما خفت
: ومن شوكت المجدي صار ينحبس ب العراق شو بغداد مليانه مجاديه !
وخر وجهه وكمل شغله
: عيني أوامر ف روحي منا !
اخذ الرجال جان كمشت الرجال وشوي عليه صوتي
: هسه هذا بيبع مي ع باب الله ليش تاخذه!
ما رد عليه وأخذ الرجال وراح ف صحت علي
: ديبيع مي بشنو مضايقك ؟؟ وين ماخذينه اروح وياكم !
التفت وابتسم
: مو رايحين لمدينه اللعاب مو جايه ويانه! للمركز اختي رايحين للمركز !
سئلته قبل لا يروح
: وين هذا المركز صاير ! شنو اسمه
صعد ب السياره قبل لا يحرك
: صدك راح تجين ورانا عود ؟؟
ابتسمت وكلت اله
: اي ف كلي وين !
باوعلي صفح مدري شلون لهذا السبب ما احب الضباط و الشرطه !
( معلومه هذا مو البطل )
: تعاي صعدي بصدر ولله يفرجها !
فرحت و صعدت وراه بسرعة !
المهم تقريبا الطريق جان نص ساعة بسبب الازدحامات مال جاردية بعد !!
دخلت للمركز وبصراحه كل شجاعتي راحت من عندي خرب المركز وحده يخوف و الشكولات البي يخوفن بس حاولت أبين ما مهتمه !
دخلت و اخذو الرجال و البقيه للحبس واني بقيت واكفه احاول ادافع ع هذا الرجال
جان اكو ضابط كاعد يستمعلي واني اسولف
: سيدي ولله يعني هذا الرجال اني كل يوميه اشوفه وما بي اي ضرر صدكني يعني الرجال كولش حباب ويبيع مي ع باب الله !
وكف الضابط وصبلي جاي و قدمه
: اهدي اختي اهدي أن شاء الله هسه يجي الضابط محمد هو الي انطه أوامر ولله مو يمي وهو يحلهه !
اخذت الجاي و أثناء ما جاي امشي تشكرت منه ع الجاي و اني ما جاي اباوع وره اول ما درتي وجهي انضربت بواحد بحيث بس لحت صدره من طوله !
و انذب نص الجاي عليه رفع حاجبه وصاح بعصبيه
: عميه ما تشوفين!
المفروض كل انسان طبيعي يخاف الا اني لأن حلفت بوكتها اني حيوانه مو انسان !
شسويت ؟؟ ( خرب كل ما اذكر اضحك )
ذبيت الجاي الي بقه ب الكوب عليه كله بحيث فرغ شفت ملامح وجهها تألمت من الحرارة مال الجاي و كلت الي ببرود
اني بعد ذبيت الجاي علي هو حتى شرايين بوجهه طلعت من العصبية مالته المركز كله ساكت تحسم منتظر ردة فعل !
ما لزمني ولا سوه اي شي بس كلي تفضلي كدامي !
أني حسيت بخوف مو طبيعي ب مشتيت كدامه لحد ما فتح باب المكتب مالته دفعه بسيطة منه دخلتني للمكتب !
فتح اللوكر مالته وطلع قميص ثاني وهو ينزع بقميصه اني خجلت درت وجهي وهو حس ف بدل بسرعة ما طول !
: باوعيلي !
طلع صوته بأمر درت وجهي علي لكيته كاعد على الكرسي كدام مكتبه يلعب ب القلم بأصابعه!
: شنو اسمچ !
طلع صوتي خايف
: نرجس .
ضحك بستهزاء
: مجاي اتعرف حبيبي ، اريد اسمچ الثلاثي !
: نرجس ميثم محمد !
بقه يفكر بالاسم لحد ما سئل
: والدج استاذ جامعي ؟
ضحكت وكلت اله
: استاذ جامعي ؟ هو الي يدرس ب الكلية العسكرية هم يسموه استاذ جامعي ؟
اخذ يفكر ويباوعلي و السكوت مالته وترني
: ما تحبين الضباط مو ؟ حتى ابوج الي تعلمت كلشي من عنده من جنت طالب ب الكلية العسكرية ما تحبي ؟
:اي ما احبكم ! راح تحبسني بتهمة كره الضباط ؟!
كام من الكرسي و تقدم عليه بخطوات بطيئة
: اي راح احبسچ بتهمة الاعتداء على ضابط !
اني حسيت مجاي يشاقه جان كلت اله
: انت تعرف اني بنت منو مو ؟ راح تحبس بنت استاذك الجامعي الي تعلمت كلشي منه !
ضحك بصوت عالي
: شوفي حجيتي وآخر شي رجعتي ع صيت ابوج الضابط ها يحلو ؟
غمز و تقدم اكثر واني رجعت بخطواتي لوره وهو كمل كلام
: لأن اني تعلمت كلشي من ابوج راح احبسچ لأن علمني اي واحد مدلل لو مدللة تمشي بصيت اهلهها احبسها و أدبها شوي !
اني بعد ضهري ضرب ب الحايط وهو حصرني طلع صوتي متوتر
: اكدر ع الأقل اخابره ؟!
بنفس القرب وما ابتعد كلي
: حقچ !
كال كلامه وكبل ابتعد وخر من عندي !
اني طلعت فوني و اتصلت ع بابا دك مدة و رفع الاتصال
: ها باباتي حبيبي !
ما طولت وكلت اله
: اني ب المركز **** تكدر تجيني !
صوته بين بي الخوف
: ها بابا خير ؟ شصاير ؟
؛ تعال وهمه يفهموك !
:ماشي جاي .
المهم هو ما قبل يوديني حبس بس بقيت كاعدة ب المكتب يمه و هو مشغول ب الاوراق الي كدامه ما طول بابا ربع ساعة هو ب المركز !
واضح الي ب المركز دلو ع المركز و دك الباب
: تفضل !
صاح محمد بصوت عالي و دخل بابا ركض عليه بخوف
: حبيبتي شكو ؟ شصاير ؟
اني محجيت بس كبل بجيت بحضنه بابا وخر من يمي أجه يصيح ع الضابط و شافه انصدم
: محمد ؟!
ضحك محمد و تقدم منه مد ايديه اله وسلم
: استاذ ميثم .
بابا وخر أيده واخذه بالحضن وكضوها ضحك ونسوني !
: هيج تعامل بنتي ضابط محمد ؟!
ضحك محمد و كال
: استاذ بنتك ذبت جاي عليه تقبلها ؟!
: انت الي غلطت عليه وكلت عميه !!
اني كلت بعصبيه و ووجهي كله دموع !
: انتي شنو جابك للمركز بابا ؟
مسحت دموعي وكلت الي ع الي صار بالتفصيل ف بابا شوي صار عصبي !
: انتي شعليج ب الرجال نرجس !!دخلتي نفسج بهوسه ورحتي للمركز ع شنو !
محمد ما قبل وكله
: مصار شي استاذ هسه راح نطلعها هي مسوت شي و الرجال لخاطرها هم يطلع .
بابا طلع مفاتيح سيارته وانطاني اياهن
: انتضريني ب السيارة حسابج بعدين !
اخذت المفاتيح وطفرت !
نص ساعة هيج يله بابا اجه حرك و رحنه للبيت ومحاضرة كامله ب السيارة ع ما ادخل ب الاشياء الي ما تخصني !
وصلنه للبيت احنه بيتنه كلش جبير و قريب ع جامعتي ف مرات اتمشه للجامعة وهمات عائلتنا جبيره!
بابا وعمي عايشين بنفس البيت و احنه ٤ بنات و ماعدنا ولد و عمي عكس بابا ٢ ولد وعدهم بنية وحدة ! واكيد ماما و عمتي ويانه همات !
اعمارنه متقاربة خلي اعرفكم ب العائلة الكريمة 😭😂
اني نرجس كلت الكم بالبداية عمري ١٩ سنة
و اختي غدير بعدهي رابع علمي !
و ميس عمرها ٢٤ صيدلة فراهيدي هاي سنة تتخرج أن شاء الله .
و الصغيرة كلش زينب بعدهي اول متوسط !
ماما ما مكملة دراسة وبابا ازوجها بابا أستاذ جامعي ب كلية عسكرية!
أما عن عائلة عمي فهي عائلة هم كيوت ولطيفة اني يعني احبهم ما عدنا كره الكرايب وهيج
عمي اصغر من بابا ويشتغل مهندس نفط و عمتي مدرسة انكليزي
ولدهم
الجبير ياسر مهندس نفط ع أبوه طلع عمره ٢٦
و الثاني احمد بعده كلية تربية رياضية وياي بنفس الجامعة بس هو مرحلة ثالثة !
و اختهم الصغيرة جنات ب السادس علمي الله يوفقهه !
وبس هاي العائلة وخل نكمل :–
دخلت للبيت وبوجهي صعدت لغرفتي وضربت الباب قوي بعصبية وبابا صيح عليه
: اي بس هذا الي كادره عليه !
طلعت ماما من المطبخ وسئلت
: شكو ميثم ؟
وحجو ع الي صار المهم اني اليوم كله جنت نايمه احاول انسه كل الي صار واختي ميس كعدتني
: كومي حب الساعة حتصير ب ١٠ بليل !
فزيت وكمت غسلت توضيت وصليت و كمت تعشيت لكيت ماما وعمتي يخلون العشه ع ميز الطعام و اني ساعدتهم !
سمعت صوت بابا يكول تفضل محمد تفضل اعتبر نفسك ب بيتك !
دخلو علينه واني انصدمت واني اشوفه كدامي
: ام ميس تذكرين طالب محمد الي جنت اسولف الج علي ! كبر وصار ضابط !
شويه ماما فكرت وبعدين كالت
: يا هله خاله بيك كل الهله!
: تخيلي جان يخدم ب النجف و انقل ل بغداد و نازل ب فندق كلت اله بيتي المن موجود راح يكعد ويانه!
ها ؟؟؟ شنو خربببب !
هذا كله احجي ب بالي !
: لا استاذ شسالفه مؤقتا ولله خاله بين ما الكه شقة زينة هنا !
ماما ما قبلت وكالت
: لا ولله ميصير تبقى يمنه بعد !
باوعت عليه واني جنت بوكتها لابسه ملابس بيت يعني براحتي لابسه هودي عريض وجواه ستريج ضيك !
: ماما نرجس كومي اخذي جنطته وخليها ب غرفة الضيوف وحضريها اله ،كومي ميس ساعديها وانت تفضل ع العشه !
اني بعدني مصدومة بين ما هو يباوعلي وعيونه مبتسمة بس احس بتلاعب ومكر !
اخذت جنطته الي هي نفس جنطة السفر و وديتها لغرفة الضيوف سويتها اله و رتبتها غيرت الاغطية مال الجربايه و عطرتها لأن بيها ريحة خزن محد داخل اله وطلعت !
لكيت الكل مرحب بي و كاعدين يتعشون صاحلي احمد
: تعاي نرجو تعاي تعشي !
ابتسمت ب تمثيل
: مالي شهية ولله اني حصعد ى غرفتي !
اجه صوت ياسر وهو يسأل وعيونه عليه
: نرجس متأذية من شي حبي ؟ بيج شي؟
ابتسمت اله وكلت
: لا مبيه شي ولله بس تعبانه !
ابتسم الي ومبين ما صدك ب الحجة مالتي !
صعدت ل غرفتي وافكر شلون راح اتخلص من هذا الكابوس !
