رواية علي حافة الثأر كامله جميع الفصول بقلم زينب ماجد
بغداد _اليرموك
عام ٢٠١٣
الساعة التاسعة صباحاً
بينما هي گاعدة بمكتبها مندمجة بالشغل توقع الاوراق والحاسوب مفتوح كدامها، انفتحت الباب ودخل احد وهو شايل صينية بيها فنجان گهوة وقطعة شوكلاتة صغيرة وگلاص مي حطها كدامها : كهوتج ست
ما انتبهتله وهي تشتغل، عدل وكفته وهو شايل صينية ومنزلها ويسألها : تحتاجين شي ثاني ست
جاوبته بدون متباوع : شكراً
-شكراً الج ست
راد يطلع رفعت وجها وهي تباوعله : ارفع البردة خلي يدخل الشمس للمكتب بلا زحمة
-تأمرين ست
وهو يسرع للبردة دخل السكرتير وهو يكللها : ست الاستاذ مازن موجود ورايد يشوف حضرتج
رفعت الاوراق وجمعتهم بيدها وضربتهم على المكتب وهي تصفطهم : ما اكدر هوشيار عندي اجتماع مستعجل.
- بس موجود وكاعد دينتظر !؟
- ينتظر يا هوشيار شكو عليه ؟
من اللائق اللي يريد يجي ياخذ موعد قبل ليجي حتى يعرف اذا فارغين او عدنا شغل اما اللي يجي بدون موعد .. فينتضر .. وضح ؟
- مفهوم ست
حطت ايدها على طرف الحاسوب وهي تسده وتجاوب السكرتير : ممتاز
اخذت فنجان الكهوة وكالتله : بلغهم يحضرولي السيارة على ما اشرب كهوتي .. حتى اطلع، الساعة عشرة لازم اني موجودة بالأجتماع.
- بعد ساعة تقريبا للأجتماع اني اكول لو اخليهم يحطولج ريوك تتريكين؟ مو صحيح تحضرين الأجتماع وانت مماكلة اي شي !
- شكراً هوشيار بس مستعجلة وازدحام بغداد ما ينحزر عيب اوصل الأجتماع متأخرة .
- طيب على راحتج
اني رايح اصرف الاستاذ واخليهم يحضرولج السيارة
اثناء وهو يحجي هزت راسها وسحبت التليفون وهي تشرب كهوتها ، شافت اتصال من ( شوان ) .. انطت صامت وشمرت التليفون ع المكتب واخذت الفنجان مرة ثانية تكمل كهوتها الصباحية ، رجعت تباوع باوراق كدامها وتتأكد منهم.
...
بغداد_ الحرية
طلع شاب يمشي بأستعجال و هو يتوجه للشارع العام، صاح وراه ابو الدكان وهو يسلم عليه : ها عبااااس اليوم تركض مغمض خير ؟
- هلا بيك حجي صباح الخير .. ذكرتني اطيني باكيت جكاير واحسبها ع الراتب بروح موتاك
- امم لو ما صايحلك اخيرلي
- دطيني حجي فدوة مستعجل
كام الحجي وهو يسحب باكيت الجكاير : وامك شلونها راح تضل بالمستشفى؟
- لا جبناها امس اختي ام علي يمها واني طالع لشغلي
- خير ورحمة اذا رجعت لشغلك اقلها تعيل امك يا بويه الله يعينكم على مصيبتها .
- لا الحمدلله ربك ما يكطع شفتلي واحد اطيته القاسمه الله ورجعني وهاليوم داومت بس حارس عد واحد تاجر هسه مرشح للانتخابات وبته مستشارة مادري مديرة والله ما اعرف بس يكولون كشرة ما تنحمل
: اكلك اعبيس لا من هسه كشرة وما تنحمل وتعوف الشغل اتحمل امك مريضة ومحتاجة اليعيلها، كعدة البيت ما تفيد، المحل وما فلحت بيه .. افلح بشغلك هاذ بس كون راتبه يسوى
- لا الحمدلله ان شاءالله خير
اخذ الجكاير وطلع مسرع للشارع صعد بالكيا .. وانتظر الكيا تقبط وابو الكيا واكف ليغاد ويصعد ركاب .. صاحله : سايقنا حرك اتأخرنا يمعووود
- بس خل اقبط
- على سالفتك معطلين يا خوية دمشي
- تشيلون كراوي الكراسي الفارغة اذا اتحرك ؟
كام يتحاجون وياه الشباب الصاعدين، نزل عباس خوف من ان يتأخر وهذا اول يوم شغل ، وكف تكسي وطلع كبل .
وصل متأخر عن الموعد ربع ساعة تقريباً والسكرتير حسن عصبي وكاعد يأمرهم يطلعون سايق اخر فوراً .. وصل وصار كدامه كاله : امر استاذ
- متأخر باول يوم دوام الك !؟
- اسف استاذ بالله العلي العظيم ازدحام بتكسي اجيت.
هوشيار وهو يحاجي المسؤل : شوف غيره ياخذ مفاتيح السيارة واصرفه.
- استاذ بالله العظيم طالع من الصبح بس والله ازدحام
- بغداد بكل وقت ازدحام على حجيك هذا محد يشتغل لان اكو ازدحام اعذاركم مراح تنتهييييييي ؟
صاح بصوت عالي ومتعجرف
رد عليه عباس بقلق خايف يخسر الشغل:- اسف واذا انعادت حقك عليه استاذ
- روح يم الاخ وهو يعلمك شغلك واستعجلوا دقايق والست فيان تنزل .
-تأمر أستاذ
دخيلك يا علي كالولي بس هي كشرة .. طلعوا كلهم كراوي تعبانة، بس يلا المهم تعدى الموضوع .
فرح عباس من تنازلوا بموضوع صرفه، ومشت السالفة راح يمشي بفرح لمدير الكراج يتسلم منه مفاتيح السيارة.
صعد هوشيار وهو يبلغها : السيارة بإنتظارج ست.
حطت فنجان الكهوة بمكانه ، ووكفت كدام المراية عدلت شعرها .. ورتبت السترة ودكمتها، والتفتت اخذت الاوراق وهي تحجي وتوصي : المناقصة الثالثة دققها وحطلياها ع المكتب ، ومازن لو خابرك انطي موعد على باجر الصبح ، وممنوع احد يدخل المكتب عداك حتى لو جان الكهوجي سلمان ، يدخل بحضورك .
- تأمرين ست
اشرلها بأيده وهو يرشدها: منا اتفضلي
مشت وهوشيار وموظف ثاني يمشون وراها .. وصلت للسيارة هوشيار خزره ، واشر لعباس .. عباس واكف اباب السيارة منتظرها تصعد
.. اشرله يركض يفتحلها السيارة
هي ما انتظرت تقدمت تمد ايدها وهو ركض حط ايده حتى يفتحلها الباب ، سحبت ايدها وتراجعت ليورا وهي تباوع بوجه عباس وتنار الهوشيار تسأله : ريبر وين ؟
- ست ريبر صار وياه حادث والسيد الوالد امر بحارس شخصي جديد لحضرتج
- حارس !
- تعرفين هالفترة الوضع حرج والوالد متخوف لذلك وصى بحارس شخصي لحضرتج
باوعت عليه ، من فوك ليجوا وهو لازم باب السيارة
مدت ايدها وهي تكول : ممكن تنطيني مفاتيح السيارة بدون زحمة ؟
هوشيار : ست تعرفين توصيات الوالد ما....
قاطعت هوشيار وهي توجه كلامها العباس : مفااااااتيح السيارة
طلع عباس مفاتيح السيارة وانطاهياه، سحبت السويج وتقدمت صعدت السيارة بدون سايق او حارس شخصي وهوشيار يحاول يخليها تنزل واحد يوصلها حتى لو هو .. ما سمعت وكالتله : عفوا بس الباب بلا زحمة.
سحبت الباب وتحركت بسيارتها وطلعت
بالطريق دك تليفونها ، سحبت التليفون وهي كاعد تسوق ردت : اسفة بابا حاليا دا اسوق نحجي بعدين .
- فيان شلون تطلعيييين وحدج اني مو كلت خلونا ناخذ حذرنا هالفترة .. انت ليش مصرة تعانديني وتأذيني؟
- بلي بابا بس ريبر مجان موجود
- ريبر مسوي حاااادث ما راح يكدر يكوم بشهررررر
- طيب ماشي بس خليني اني اختار الحارس الشخصي انت تعرفني بهالموضوع اتحسس
- مو وقت تتحسسين ولا تحسين تخابرين ع الحارس هسه وين ما انت يجيج
- بابا ارجوك اني حاليا دا اسوق وما اكدر احجي ويا احد وعندي اجتماع اخلصه ونحجي .
- راح اخلي الحارس يوصلج لمكان الاجتماع وما اريد اسمع اي اعتراض مفهوم
- مع سلامة بابا
حطت التليفون بدون متقفلة وكملت السياقة لحد ما وصلت للمكان ، صفت السيارة ومشت حضرت الأجتماع .
اتصل ابوها بهوشيار وهو يطلب منه يخلي الحارس الشخصي يتبعها لمكان الاجتماع ، وينتظر يم سيارتها .
هوشيار دز على عباس اللي راسه اندار من رفضته يشتغل وهو بالكوات دبر الشغل ، كاله : اركب تكسي وروح على هذا العنوان وابقى انتظر الست فيان لحد ما تكمل .
ضل يباوع بوجهه وهو يفكر عنده فلوس تكفي الكروة لو لا ؟
صاح : وقت تصفن بوجهييي تروح لو اشوف غيررررك ؟
- لا لا استاذ اروح
طلعت اركض من غرفة السكرتير وامد ايدي بجيبي شكد عدي .. محفظتي بيها ٧ الاف دينار بالله تكفي اخذ تكسي لو اخذ كيا، خاف اخذ فورتات واتأخر واني منا مليوصة عليه وكوا مدبرها
وكفت تكسي طلب ابو التكسي ٨ الاف ضربت ع السيارة وكتله : رحم الله والديك توكل
ومشيت لابو الكيا صعدت ووين ما توصل توصل بعد شسوي اسعى يا عبدي واعينك وهاي جاي اسعى حسب مقدرتي شسوي بعد
ومن كيا لكيا تقريبا اقل الساعة يلا وصلت للمكان الهي بيه هالشرفنص والله من كالولي مديرة توقعتها اعجيزة تاليتها طلعت هاكداتها اصغر مني من امدا الدنيا اي والله تاليتها من شافت جهرتي فزت ما رضت بيه سايق .. ام وجه المصفح ..
وصلت للمكان الف الحمدلله والشكر بعدها ما مخلصة اجتماع ، ضليت كاعد بالاستعلامات انتظرها تكمل ، فوك الساعتين يلا كملت وطلعت اني كاعد ما انتبهتلي .. طلعت كبل وهي تطلع نظاراتها من جنطتها وكاعد تلبس بيهن
لحكتها ومشيت وراها وكتلها : العفو ست الاستاذ هوشيار وداني على حضرتج .
التفتت عليه ووخرت نظارتها : وداك !
-اي وداني على حضرتج
-انت عربي ؟
حصرتني الضحكة تسألني عربي ليش غير احنا ابغداد كلنا عرب ! فحجيت بعفوية : چا هندي !؟
عقدت وجهه : العفو شنو هذه الطريقة اللي كاعد دا تحجي بيها، مو معقول !
- اسف ست اي عربي .
-اني اسفة بس اعتذر منك، ما احتاج حارس، تكدر تروح
-اروح وين غير اجيتج حتى اخذج
- لا لا .. ابد مو معقول
-ست العفو بس الواحد بيا طريقة يحجي وياج يعني ما جاي افتهم
- مو لازم تفتهم يا عزيزي تكدر تتوكل
- وين !؟
- وين متحب !
- بس ودوني حتى اجي اخذ السيارة منج واوصلج
- هم ودوووك !
- ست جا شكول هذا حجيي وهاي لهجة اهلي بيا لهجة تريديني احاجيج ؟
رفعت حواجبها ممتعضة من الوضع وهي ترفع نظاراتها تريد تلبسها وتندار وتنطي ظهرها كام يمشي وراها ، ويحجي وكفت : ارجوك لا تتبعني واحجي ويا اللي كالك تشتغل حتى يوفلك شغل ويا غيري اني اعتذر منك واتمنى ما تتبعني .
- بس ودووي عليج وصالي ساعة بالطريق اتنعثل لحد ما وصلت
- لومهم للي دزوك ، اني مالي ذنب ، اعتذر جدا من حضرتك.
- خويا يا تعتذرين رحمة لاهلج بالقران تبهذلت والله من الصبح لهسه افتر.
- واني شنو ذنبي !؟
حجتها وهي تفتح باب السيارة وتصعد
وكف وعرضلها : جا ورامن افتر رحمة لاهلج غير وراج
- العفو انت شلون دا تحاجيني هيج !؟
- اي علميني الطريقة الاحاجيج بيها شلون وانا خادم بس كليلي
- الباب اذا تسمح
- بابيش غير اوصلج
- العفو انت مدا تفهم عليه! كتلك ارجع للي شغلك ووصاك بيه يوفرلك شغل غيري ، اني ما اريد حارس شخصي ولا رايده سايق ، كافي الله يخليك وابتعد من طريقي بلا زحمة
سحبت الباب وسدته ورجعت بالسيارة وطلعت من الكراج ..
انهضم حيل يتوسل بيها يشتغل عدها وما ترضى ، رجع خابر على الولد كاله : هسه اشوفلك
اتواصلوا ويا هوشيار وهشيار تواصل ويا ابوها
كاله : ممنوع حتى لو ما تقبل يرافقها خل يصعد السيارة بدون قبولها.
هوشيار وصى بعباس يروح ورا الست فيان
خابره الولد كاله : اخذ تكسي وروح وراها السيد الوالد مصر تشتغل وياها استغل الفرصة وروح
- واني ست شرنفص وين الكاها، اكعد ادور وراها بشوارع بغداد
- ههههه شرفص شنو؟
- والله وعلي بهذلتني من الصبح لهسه تتكلب وارجووووووك واني جد جدي مستلك من وراها
- حقك خل اخابر واشوفلك هي وين راحت حتى تروحلها
-اليوم ما عدنا شغلة وعملة بس الحك وادور وراها هالشرفصة هاي
- ههههههه بعد رزقك عدها
- من خ* بهيج رزق حشى رزق الله
سد الخط وكعد ينتظر لما خابره كاله : بالبيت اللي بالمنصور روحلها
انطاه العنوان وكام يدلي بيه لحد ما وصل البيت ووكف وخابر كاله : انتظرها اذا ما طلعت ورا الظهر الوالد يجي ويحل الموضوع .
بقى ينتظر برا .
.....
فيان : صفيت السيارة بالكراج ، ونزلت للبيت ، فتحت باب الصالة باجي كاعدة تصير عمة ابوية : هلو باجي
تستمر القصة أدناه
- هلو يحياتي بنيتي حبيبتي شعجب شو راجعة من وقت اليوم ؟
- عندي شغل باربيل وجاية دا اخذلي جنطة صغيرة حتى اروح .
- يعني اليوم مراح ترجعين لهنا .
- لا راح ابقالي يومين هناك.
- شوان خابر عليج وديكول متجاوبني
اجت ام غيث المساعدة مال البيت ابتسمت واني اتجاهل سوأل باجي : هلو خالة
- هلا يكليبي جوعانة احضرلج شي داده ؟
- والله هو اني جوعانة وميتة جوع هماتين مو بس جوعانة ... بس حجزت وطيارتي ب٣ لازم استعجل .
- ع السريع على ما تكملين تلكين الاكل جاهز
- تمام ماكو مشكلة اذا ما اتعبج خالة .
- لا يكليبي شتعبيني تعبج راحة بنيتي
- شكراً ، اكوم اجهز نفسي واطلع
باجي :- لعد اني راح اروح لبيت عمج ميهلي ابقى بالبيت وحدي صايرة عندي قهرة من الكعدة وحدي
- على راحتج باجي
كمت من مكاني واني انزع السترة مني واصعد لغرفتي .. دخلت الغرفة .. الشبابيك مفتوحة والشمس بنص الغرفة وكلشي نظيف وعطرها طيب .. نزعت الكعب من رجلي برجلي الثانية ومشيت حافية للكنتور علكت سترتي بالكنتور ووكفت كدام المرايا .. باوعت النفسي .. رفعت راسي للسكف وغمضت عيني .. دقايق استشعر الهدوء ...
لكن رغم كل الهدوء والبرود الحواليا بس اكو نار مشتعلة .. وصوت مدا يهدأ براسي ..
صوتها وصريخها مدينمحي من خيالي
رغم مر ٩ سنوات .. بس لحد هسه ما نسيت الصار
ولا راح انسى .. لحد ما ابرد كلبها باللي سوو بيها هيج .
مشيت للحمام بغرفتي .. سبحت ولبست البرنص .. وطلعت واني الف بالحزام على خصري .. واخذ ريموت السبلت وارفع التدفئة واركض للشباك حتى اسده .. شفت من فوك الولد الاسمر العربي موجود وواكف بالباب : صدك يحجي !؟
سديت الشباك واخذت المنشفة واني انشف شعري .. سحبت السشوار وشغلتها واني امشي الهوى الحار عليه مو بس على جسمي حتى ادفى .. نشفت شعري كله .. مشطته ورفعته ذيل حصان وحطيت كريم يثبته حتى ميتخربط لو يكوش .
اخذت تراك شتائي ثخين .. رصاصي فاتح ووردي
فتحت الكنتور سحبت جنطة سفر صغيرة وحطيت بيها احتياجاتي .. وسحبتها وراي ، صعدتلي ام غيث : عنج خالة اني اشيلها الج
- لا لا شكرا خالة اني اشيلها
- ابوج خابر وعصبي
- على ؟
- على موضوع السفر المفاجئ ومدا تردين على شوان .. وموضوع الحارس اللي بالباب
تحجي وهي دا تنزل وياي : عجيب ليش كل هالضغوط اني مو صغيرة عمري ٣٥ البكدي اولادهم بكبرهم واني ابويه بعده لهسه يكولي شنو لازم اسوي وشلون امشي واروح !؟
مو حالة هاي !
- من خوفه عليج خالة
- اي خوف دا اكول عندي شغل ما رايحة اتونس !
شافتني باجي : يكول عايفة الحارس يركض وراها ليش باجي خطية
- واني ظالمته اعتذرت منه ما اكدر
- تعرفين الوضع مو زين يا بنتي وهو على وجه انتخابات اتحملي هالفترة
- اي اوكي ما كلنا لا بس مو هذا الحارس ، اني راح اروح لاربيل واشوفلي احد منك يكدر ينتقل لبغداد ويشتغل ويايا
- وشبي هذا الحارس !؟
- الي اسبابي الشخصية اللي متخليني اتقبله .
ام غيث :- عربي
- هالشي يخصني ارجوكم
- بس لازم تطلعين من هالعقدة انت انتقلتي لبغداد وبغداد كلها عرب اذا بقيتي بهالحالة مراح تكدرين تعيشين اني احجي لمصلحتج باجي اذا واحد غلط مو معناها الكل مو زين .
- افتهم هالحجي ودا احاول ، بس ما اريد الحارس الشخصي يكون عربي بهشكل ما راح اكدر ارتاح .
- حاولي لا تخلين ابوج عصبي ومتضايق منج خابري وارضي الله يرضى عليج بنتي .
-طيب طيب لازم اروح تأخرت ، نحجي بعدين.
- اكلج جهزته خالة
-ما اعتقد الحك اكل لازم اروح
- زين اصبري بس احطلج بحافظة
ركضت حتى تحطلي الاكل واني سحبت الجنطة وشايلة جنطة الأيد وارفع ذيل شعري من الكاب مال التراك واعدل بيه ، طلع الاسمر العربي كدامي تنهدت وانتجيت ع السيارة : شكد محتاج ؟
عقد حاجبه : ما فهمت ؟
-كولي شكد محتاج فلوس حتى انطيك وتروح لحد متشوف شغل يناسبك حتى لا تكول ظلمتني
- العفو ست اني زلمة رايد اشتغل مو مجدي حتى اخذ فلوس ما تعبان بيها .
- كاعد دا تبيع كرامات براسي وانت من الصبح لحد الأن مخليت مكان مفتريته ورايه !
- اذا انت تشوفين فرفرتي وراج قلة كرامة غلطانة ، اني افتريت ورا رزقي وكاعد اشتغل ما راكض وراج .
- اسفة مو قصدي اقلل منك بس صدكني اني ما راح اكدر اكون مرتاحة بالشغل وياك والخلل بيه انت حشاك ما بيك شي بس اني مريضة نفسية وممكن اذيك ومراح تكون مرتاح بالعمل لهذا افضل تشوف عمل اخر، لمصلحتك.
-اتحملج
عقدت حاجبي : تتحملني شنو !
- باب رزقي شسوي اني لو ما محتاج الشغل حيل ما كاعد اذل بروحي كدامج حتى ترضين اشتغل بس كل انسان والله يعلم بظروفه
ضليت اباوع عليه تنهدت وسحبت السويج من جنطتي ولزمته من طرف : بس راح اذيك هواية والشغل وياية مينحمل وهاي اني دا اكولها الك من البداية
ابتسم وهو يكلي : على عيني
صعدت السيارة ورا وهو صعد ورا الستيرن : الاجازات ممنوعة تحت اي ظرف.
- تأمرين
حرك السيارة ، وام غيث انطيته الاكل مالتي وكف اخذه منها .. حطه يمه ع الكشن الامامي .
سحبت الحاجز من الكشن وانتجيت عليه : - تحسب نفسك عايش بالشغل واذا صار ورحت للبيت .. وخابرت بأي وقت .. اي تأخير ينخصم من راتبك
- تأمرين ست .
- غير الاسود ممنوع ينلبس .. اذا بحضور رسمي قاط اسود وقميص ابيض ، واذا طلعة عادية تشيرت وبنطرون اسود .
- خادم
- كلام اثناء القيادة او بدونها ممنوع .. السؤال ممنوع .. واي امر يتنفذ بدون نقاش او كلام .
- ان شاءالله
- جنسيتك وينها ؟
مد ايده على محفظته، حجيت : خليها عندك لتطلعها ، خاف يطلبوها .
- ماشي ، بس وين ست ؟
- لمطار بغداد
- زين
ساق بهدوء لحد ما وصلوا مطار بغداد كالتله: اطبك السيارة بكراج المطار وتعال .
- اروح وياج لاربيل !؟
- اول سؤال !
حجتها واندارت من عنده كالها : لا لا اسف ما مو قصدي اسألج
اندارت : انت من اولها مدا تعرف تلتزم بالملاحظات اللي كتلك عليها ! اعيد وللمرة الاخيرة وحتى لا بعدين تكول ظلمتيني .. ممنوع السؤال .. ممنوع الكلام .. تنفذ المطلوب منك وبس !
- اسف ، تأمرين ست
تنهد ومشى وهي اندارت وسحبت الجنطة وكعدت ع الستيج تنتظر وخابرت حتى يرتبون موضوع سفر الحارس الشخصي وياها ..
اجاها، حجت : سلم الجنطة وخلينا نتوجه لصالة الانتظار
اخذ مني الجنطة وسأل الولد الواكف : اخوي وين اسلم الجنطة ؟
اشرله .. مشى للولد كاله : ٢٥ الف
- مال شنو
- احنا راح ناخذ الجنطة ونكمل كل الاجرائات وتصعد .. فلوس الاجرة
- ماليش غير افتهم مال حجز يعني؟
- خوية انت مسلمني الجنطة حتى اسويلها بوردنك تصعد الطيارة بدون ما تحتار بيها وتوكف سرا.. اذا ما تنطي روح انت احتار بيها وحدك وسلمها
_ مشكور خوية
اخذ الجنطة وهي شافته من بعيد ما سلم الجنطة انما وكف ازدحام ، اشرت للولد اللي بالمطار انطته فلوس وكالتله : استلم الجنطة عنه .
اخذ الفلوس وراح الولد اخذ الجنطة من عباس وهو واكف سرا ، باوعلها عباس ، اشرتله .. اجا وكف يمها : الأكل بقى بالسيارة مو ؟
- اروح اجيبه
- ميحتاج شوف احد يقدم النا وجبة خفيفة بالمطار
- المطار غالي حرام الاكل يخيس اروح اجيبه واجي ما اطول
راح جاب الأكل واجا ، هي بمكانها .. الحافظات بيها بورك وتبسي لحم وتمن .. وفاكهة .. حجت : جيبلي جاي
- تأمرين
راد يمشي صاحت : العفو ، معرفت اسمك ؟
- عباس
- عباس
هممم
طلعت من جنطتها ٢٥ وانطته
: ما يحتاج ست اني اجيبه
- اني مو صديقتك ولا قريبتك حتى تحاجيني هالشكل وكتلك الكلام ممنوع انت ليش محاب تفهم !
- اسف ست بس يعني ما متعود اخذ فلوس من مرة
- شنو من مرة! استنقاص هذا من حضرتك لو مفتهمت ؟
- لا حشاج بس بعد تعرفين احنا عرب والمرة اليتكفلها رجال ما يصير تدفع وهو موجود اني هيج تربيت
- كتلي عرب ..
تنهدت : المهم هنا اني مو صديقتك ولا وحدة انت متكفلها ، هنا انت بواجب تشتغل شغلك وبنهاية الشهر تقبض راتبك وانتهى ..
مفهوم ؟
حجتها وهي تمد ايدها، اخذ الفلوس من ايدها وهو عاقد حواجبه، وراح اشترالها جاي واجا قدم الها الجاي والفلوس ، اخذت بس الجاي ، وسحبت من حافظة الاكل قطعة بورگ.
عباس : عركت من كثر ما متوتر اخاف اسويلي حاجة وما ترضاها هالشرنفص هاي هنوب خابرت اختي ما حصلتها .. غير تجاوب حتى اكلها اني مسافر ..لا شايل فلوس وياي لا ملابس لا صخام وممنوع احجي ممنوع اسأل مو شغل هذا امتحان دخيلك ربي شكد صعبة هالبت ، خ.. بالدنيا الذبتني عليها .
دك تليفونها وهي كاعد تاكل
اباوع البوتين مالها ابيض وصخاية ما طاخه
باوعت لحذائي .. لازم اشتري احذية وملابس سود مثل ما رادت .. بس خل احصل راتبي بالاول
كاعد تحجي مدري ويامن بالتليفون كالتله طالعة الاربيل
عقدت حاجبي وباوعت للتذكرة بيدي الرحلة لسليمانية ! باوعتلي من شافتني كالت اربيل واني اتحقق من التذكرة .. سكتت سدت الخط ، دك تليفوني
علياء اختي : العفو من رخصتج
باوعتلي ، انداريت عنها واني ارد : ها علياء وينج لخاطر ربج اخابرلج وماكو وين انت ؟
اي زين اسمعي اكلج
اني رايح لسليمانية ، اي اي شغل
اي بديت شغل ما ادري شوكت ارجع باجر عكبة وراها يمكن ما ارجع ما ادري .. هسه يا خوية عود من اجي الله كريم اني ادري شوكت ارجع وضميت عليج .. ديري بالج على امي ومن تحتاجين شي خابري على محمد يجيج .. الله كريم من استلم دبريها والله ما عندي الله كريم الله كريم روحي هسه .
سد التليفون ووكف ينتظر .. وهي كاعدة
دك تليفونها .. شوان ما ردت
وكامت من مكانها ، كامت تتمشى بالمطار ، اندارت هو وراها يمشي ، اتجاهلت وكملت مشي وهي تفكر .
لحد ما صار وقت الرحلة ..
دخلت وهي تنزع الباتة رادت تدنك وهو وراها ولازم سرا وراه ناس .. كاللها : العفو ست لا تدنگين اتركي وروحي فوتي
عافت الباتة وعبرت من الجهاز ومشت كعدت ، اجا وهو شايل الباتة كامت وهي تكله : العفو منك ، نزلها
انطاها الحذاء وكعدت هي تلبس وهو كدامها يلبس
انفتح الباب حتى يتوجهون المسافرين للطيارة مجان اكو غير ٤ نفرات هو وكف كالتله : انتظر الكل يستقر بالطيارة يلا نروح
رجع كعد دقايق وكامت هي وياه راحو للطيارة
مضيفة الطيران رحبت بيهم وانطتهم المقاعد مالتهم باول الطيارة .. كعدت يم الجامة وهو كعد بالكرسي اللي يمها باوعت عليه لان كعد يمها ، ما تحمل حجاها : لا تباعين كاعدين بالطيارة بعد وين اطير ؟
سحبت السماعات من اذانها - العفو !؟
-لا يعني بس .. ولو السؤال ممنوع غلسي
-انت شدا تحجي ؟
- اجاوب لو ممنوع
- اي ؟
-حسيتج متضايقة من كعدتي بصفج بالكرسي بس هي المضيفة انطتني حسب المقعد مو اني لو بيدي ما اكعد انحصر وياج كرسي بصف كرسي .
- انت غريب الأطوار !
- اني ! .. اي هم صح اني غريب الاطوار
وكفت المضيفة وهي تطلب من المسافرين يربطون احزمة الأمان : جريت الحزام فالت اسحبه مكاعد يصير .. ردت اصيح المضيفة هي مدت نفسها وسحبت الحزام وانطتنياه
من مدت نفسها عطرها شك خشمي شك ..
فلشج على هالعطر هاذ انسحنت .. اخذت الحزام وربطته .. اني اول مرة اطير طيارة ما صاعد بيها كبل من تحركت ومشت احس كلبي وكف وتخيلات تجيني اطيح الطيارة واموت
الطيارة تمشي سريع غمضت .. ارتفعت .. احس اذني كامت اطن .. حجت : لتغمض ولتسد حلكك ابقى طبيعي
فتحت وكتلها: ما اسال وما احجي افتهمناها مال افتح عيني وما اسد حلكي بعد هم هاي لازم عليها قيووود !؟
- لمصلحتك مدا احاول احط قيود
- ها ، مشكورة اذا طلعتي اتدورين مصلحتي
- مدا تلاحظ نفسك فظ بالكلام ؟
- فظ يعني شنو ؟
-تجاهلت كلامه ورجعت حطت السماعات بأذنها والتهت عنه وهي تسمع .
اقل الساعة .. وهبطت الطيارة وهو لازم كلبه بيده من الخوف .. وما يتحرك من مكانه منتظرها تكوم حتى يكوم .. انتظرتهم لحد ما نزل الكل .. كامت هي وهو كام سوالها طريق .. سحبت جنطتها اللي بأيدها واتعدته .. نزلت من الطيارة وهو يتبعها ..
راحو وكفوا لحد ما وصلت الجنطة .. رادت تسحبها وتشيلها كاللها : عنج ست
سحب الجنطة وكام يجر وهي تمشي طلعوا برا حطت نضاراتها وكالتله : وكف سيارة
حط الجنطة بصفها ووكف اخذ تكسي .. السايق يحجي كردي كاللها : العفو ست اني ما افهم كردي ، تقربت فتحت باب السيارة وصعدت بلا ما تحجي ..
هو صعد ليكدام ومتوتر
التعامل وياها صعب وخايف من اقل خطوة تضوج ويخسر شغله .
سألها السايق : بۆ کوى دەگەیت؟
جاوبته : بو گوڕستانی تەنیاکران
- باشە
مشى بينا السايق دك درب لحد ما بينت مقبرة متروكة .. وصلنا الها ، وهو يسألها : کێ لە تۆ هەناوە لێرە؟
جاوبته : بە تۆ پێوە نییە
-ببورە
عباس : مثل الاطرش بالزفة كاعد بنصهم ولا جاي افتهم شكاعد يحجون
رجع سألها : شوێنی گۆڕەکە نیشانم دەدەیت؟
- ئێرە وەستانهوه
وكف السيارة نزلنا مكبرة مهجورة على تلة ..
ضليت اباوع وين جاي شدنسوي ؟
شفتها كاعد دا تنزل الجنطة اخذتها من ايدها ، كامت تمشي بنص الكبور .. كمت احس بيها كامت تبجي وتحجي بالكردي ..
تستمر القصة أدناه
اريد الكفلي كلمة افتهمها حتى اعرف خيط السالفة ولا افتهمت سالفة غير بش بش بش
لحد ما وصلت كبر مكتوب عليه بالكردي وما افتهمت الكتابة .. بس افتهمت اسم ( جيهان )
كعدت مقابيل الكبر وصارت تبجي بقوة وتضرب على اذانتها وتحاجي الكبر وترجع تحط راسها وتبجي .
حاولت ما ادخل ..
بس خطية كطعت روحها ، كتلها : كولي يا الله على كيفج ويا نفسج .
اخذت نفس ومسحت وجهه وبقت مكابلة الكبر وتبجي بدون صوت بس الدموع تجري
جولة والجو بارد ومن ما تصد الهوى يطكك اصطكيت من البرد واني بطرك القميص والقمصلة وبنطرون واحد .. رجلية ماتن من البرد زين هي ما بردت بطرك هالتراكسود هذا .
كمت اباوع لاديها ترجف واطرافها صارن زرك من البرد .. حجيت : العفو ست بس الجو بارد وهيج احتمال تتأذين
اندارتلي والدموع بعينها وهي تكلي : ابقى بمكانك ولا تدخل
كامت من مكانها اندارتلي وهي تمسح بالدموع وينزلن :
لو ما امثالك جان اختي ممدفونة هنا
جان اني مو هذا حالي ولا هذا حزني
جان هسه اني اسعد بنية بالحياة
فتحت عيونها حيل حجت بصيغة تهديد وكراهية: انتم العرب نقمة ع البشرية اكررررهكم كلكم ولو بيدي اسوي اللي سواه هتلر بيكم .. واحطكم كلكم بمحرقـ/ـة وادفنكـ/ ـم كلكمممم بصف اختي دا يبرد كلبي منكم واخذ ثارها .
- العفو ست اخذي راحتج
ابتعدت منها ووكفت ليغاد عنها..
شني هالعنصرية هاي برة .. شلون انسانة حقودة .. فرضا واحد عربي مأذيها اني ياهو مالتي اعرفها تعرفني .. صبرك يا علي طكت روحي .
ضليت واكف مصطك
لا اكو شي البد بسدة .. لا سيارة واكعد بيها .. بنص الكبور واكفين .. مرت ساعة .. ساعتين .. كعدتلي على كبر .. عظم العصعص كمت ما احس بيه ادري يالشرفنص كعدت كم دقيقة جمد عظمي انت صارلج جم ساعة كاعدة على هالكاع الباردة ما اتأذيتي ما بردتي ما تحسين .
احس جسمي كام ما يقاوم من البرد ..
كل ما جاي تختفي الشمس ينزل برد ما صاير .. ثلجت صرت قالب .. عمري وحياتي اسنوني ما رجفن هيج اريد اسيطر عليهن واوكفهن يطكن سن بسن من البرد وهي مستمرة كاعدة مقابيل القبر ..
كمت احاول اتحرك امشي حتى بلكت احتر
اخذ الطريق روحة جية ..
تريد تغرب الشمس وهي كاعدة ..
اجيت يمها .. كتلها : العفو ست اذا كملتي راح تغيب الشمس والمنطقة ما كاعد اشوفن تكاسي تمر منها .
متجاوب .. حجيت ..
ست .. ست فيان
مجاوبت حطيت ايدي على جتفها كاعد انزها .. جان توكع ع الكبر واتطيح : لا يا الله
فزيت الها بسرعة .. اندها وكمت اضرب بخدها .. اريدها تحس متخربطة .. الزم اديها ووجها عبارة عن قطعة ثلج كمت افرك باديها .. بخدها اهز بيها ما تحس ..
وخرت منها وجكيت القمصلة مالتي ونزعتها ولفيتها بيها وكمت انده بيها كامت تصيح : اريد اموت ، اريد اموووت .
- جا تموتين هنا بالچولة، وبس اني وياج هذا هم فكر حظي .
ست .. ست
اهز بيها جسمها يرجف .. مديت اديه جواها وشلتها من الكاع .. وطلعت من المكبرة اريد سيارة تمر ماكو والدنيا غربت ..
لحد ما مرت شاحنة عرضت ووكفت بنص الطريق ، وكفلي ، كمت اصيح عليه : بروح اهلك ساعدني
وكف ونزل يركض فتحلي الباب بس عالية الشاحنة شلون نشيلها ونصعدها .. نزللتها وتجيتها ع الشاحنة وانداريت وحطيتها على اجتافي وشلتها وصعدت بيها كعدت وكتلة : لحظة بس اجيب غراضها بروح اهلك
ركضت جبت جنطها وصعدت .. كمت افرك اديها وادفي بيها والسايق يرطن كردي فلا افتهمت كلمة عليه .. بس مبين خايف ويحاول ينصحني ومحروك كلبه بس ما جاي افتهم شي .
ضلت تهذي : قتلوها .. كالتلي لتسامحيهم ابد قتلوهاااا
لزمت خدها كصتها حرارتها كامت ترتفع ..
نزلنا السايق كدام باب مسشتفى .. شلتها ونزلت وهو نزل الجنط وحطهن بالباب واني اركض شايلها اريد سديا احطها عليها ..
شنو هالمستشفى هاي المهجورة شو مستشفياتنا تروج ليل ونهار شني ما يتمرضووون صحت : منوووووو هنا
طلعلي واحد من غرفة .. وهم كام يرطن كردي كتله : دجيبلي سدية بسرعة
ما جاي يفتهم علي .. بس ركض جاب كرسي كعدتها ع الكرسي واخذناها لردهة كام يحجي ويأشرلي اشيلها ع السديا .
شلتها ونومتها ع السديا
التموا عليها اثنين .. كعدوها وحطولها مغذي .. الغرفة جان بيها تدفئة .. اختلط الجو عليه حار وبارد انشلت بسرعة .. عيوني كامت ادمع ..
حجيت ويا المضمد : ابره مال فلاونزا عندك ؟
حجه : انت عربي
- الحمدلله من لكيت احد يحاجيني عربي
- تمام بس كص وصل حتى نكتب العلاج الك والها .
- سكت دهرا ونطق كفرا .. ما لكيت احد يحاجيني عربي بس بالفلوس لا والحظ ..
مشيت وهو يكلي : ع اليمين
رحت طلعت الباقي عندي الفين دينار .. دفعت وصل الف .. وكتب اسمها : فيان دلشاد
بعد ما عرفت اكثر هو هذا كل الحكت اعرفه عنها وعساني ما عرفتها .
كالي عمرها ..ما اعرف عمرها شكد بس اتوقعت نهاية العشرينات مبين عليها .. كتله ٢٨
كتب وانطاني الوصل مشيت انطيته للدكتور .. ورحت وكفت يمها حست و اندارت باوعت عليه ، لعبت روحي منها ومن عيارتها سحولتنا من بغداد بطيارة حتى تجيبنا تكعدنا على كبر وهيج يصير بينا .. مال اكضها اشبعها بوكسيات الله ربها حاطها بنية جان هسه بردت كلبي بيها وانعل ابو الشغل لابو هيج رزقة تعبانة .
حجت : خلينا نرجع لبغداد
- الساعة ٩ بالليل .. وسيارات لبغداد ما اندل .. خلي يطلع الصبح ونرجع
- احجز ع المطار
تنهدت وذبيت حسرة : ست اني اكول
- انت متكول ومتناقش ، احجز وبس
- ومنين احجز اني شغلتي سايق وحماية اوديج اجيبج هاي الامور ما اعرفها لا اتكعدين اتشمرين عليه افتهمتي لو لا .
اندارت عليه : ويايا !!
- اي وياج قابل ويا الحايط بهذلتيني من الصبح ليجاي اركض وراج بتل بتل بنص الكبور مكعدتنا شكد كتلج كومي خل نروح دكيتي راسج الا تكعدين شايفتلج مسلسل تركي وكاعدة اطبقينه براسي
بقت تباوع متعجبة اني كاعد ارزلها طكت روحي بعد ما اتحملت، حجت : احسب نفسك مفصول لما نرجع البغداد
- وعساني انفصل الرزق اليجي منج لا هله بيه ، وما دامني مفصول مفصول خل اطلع البكلبي وابرد كلبي .. بس كليلي اشايفة روحج ؟ فد مندلة ما تستحين ما تخافين على روحج الدنيا انفجارات والواحد ما سالم بروحه وانت من مطار لمطار وتفرفرينا بالكبور محد يصدج محد يردج ويكلج وين موليه دايرة على كيفج .. بس ما حذب الكال الاستحوا ماتوا
كعدت من مكانها وهي تحاول تسحب الجنطة ، صحت بيها : اسمعي لج اكعدي بمكانج ما بيه حيل عيارة بعد .. اكعدي
- اسمع كلمة ثانية راح اشتكي عليك افتهمت.
- لط... روحي اشتكي عد اليعجبج ، استچني بمكانج يلا .
- اطلع مني فوراً
- فورا
حجاها وهو يقلد بحلكة ويكمل :.. كاعد ويا كرندايزر اني فورا
- انت من صدك بلا اخلاق اني اقرف منكم ومن منطقكم وهمجيتكم .. امشي من كدامي مدا اتحمل اشوفك كبالي ابتعددد
عافها وطلع وكف برا ، طلع جكارة وضل يدخن وحدة ورا اللخ مرت نص ساعة رجع دخل لكى عيونها مدمعة ، باوعتله دارت وجهه منه ، وهي تمسح وجها .
تليفونها صامت يرج ..
سحبت قمصلتي من عدها ومدتلياها بدون ما تحجي اخذتها ولبستها دخل المضمد تفقد المغذي ووخره من ايدها كامت تحجي وياه كردي ... نزلت من السديا .. حطت الكب فوك راسها واخذت جنطتها الصغيرة ، ولزمت جنطتها الثانية عتيته منها واخذتها وكمت اسحب بالجنطة وامشي وهي تمشي وراي ..
حسيت نفسي امشي بسرعة وهي تمشي مريضة كوة تتنفس ..
كمت اخفف وامشي انداريت ونترت بيها : ابقي هنا خل اشوف تكسي واصيحج
ولاول مرة تسمع كلمة وما تعاند وكفت وانتجت ع الحايط واني تركت الجنطة يمها طلعت انتظرت تكسي تفوت وكفتها واجيت .. اخذت الجنطة وكتلها : امشي
مشت كدامي للتكسي .. صعدت ورا واني حطيت الجنطة ليكدام .. وطبكت باب السيارة ، نزلت الجامة : منتظر زفة حتى تصعد ؟
- بس جفيني شرج اني ادبر روحي لا تخافين .
- لتخاف نتصافى ببغداد واحاسبك على كل كلمة حجيتها ما ناسيتلك تجاوزك ، اصعد .
- اذا صعدت راح اتجاوز اكثر وما راح يعجبج
- اصعد بدون نقاش ، بردت .
- وبردة امي كون
صعد ليكدام وشمر الجنطة ليورا ضلت تباوع : انت من صدك قليل ادب
- يعجبج يعجبج ما يعجبج هذا الموجود
- مقرفين .. ه م ج .
- اسمعي اكلج اسكتي مني لا اسمعج فشار حتى بالهندي ما سامعته
- اتجرأ وشوف
- صبرك يربي على هالشرفنص
- شنو اني شكلت ؟
- شرنفص .. عرمة ما تنكدرين ولا تندكرين ولا تنردين
- ارجوك اني اقرف من هيج كلام .. خلينا نحترم بعض لحد ما نوصل بغداد وقتها نتصافى وكل واحد ياخذ حقه
- حتى الحق اليجيني منج كش لا هله بيه .
- ممكن تسكت ونسد الموضوع ؟.. ارجوك
سكت .. نزلوا بالمطار
وتليفونها يرن وما ترد
يربي هسه تطلع شاردة من اهلها وابتلي
ولو هي غير مديرة شكبرها وشكدها شتشرد ولو النسوان لو مو مديرة شركة لو تصير مديرة كالة ناسا هم محد يعرفها شتريد وشتفكر.
كعدنا بصالة الأنتظار
كامت تتأذى من الكانونة البيدها ودا تحاول بايد وحدة تجر باللاصق وتريد تنزعها ..
كمبصت كبالها وكتلها : لحظة
اخذت ايدها وكمت اسحب باللاصق على كيف .. لحد ما سحبت الكانونة ويا اللاصق كامت ايدها تجري دم جريت كلينكس من جيبي بسرعة حطيته على ايدها
سحبت ايدها بسرعة : هاي ماسح خشمك بيها و دا تحطها على اييييييدي
- اعتبري ديتول
وخرت الكلينكس بسرعة .. جرا دم ما مسحت بيه مدته اليه وهي كاشة روحها : اخذته منها ومشيت ذبيته بالسلة .
باوعتلها حاطة ايدها على مكان الجرح تلوثت دم
مشيت للاستعلامات مال المطار .. اخذت كلينكس نظيف واجيت جبته الها
- انطتني التكتات موعد الرحلة ١١ ونص لمطار بغداد الدولي .
اخذته من اديها وكعدت بصفها باوعت الساعة بيدي عشرة وثلث بعد فوك الساعة شيصبرنا هنا بس احسن اقلها دافية شوية
رجعت ظهري للكرسي باوعتلها مرجعة راسها للحايط ومغمضة عيونها وحاضنة نفسها بردانة .. كمت من مكاني نزعت القمصلة .. لزمت باثنين اديه وحطيت عليها فتحت عينها كتلها : احتريت خليها يمج اريد اروح اشرب جكارة .
رحت ليغاد عنها ورثت جكارتين
دك تليفوني .. باوعته هوشيار .. باوعت عليها .. ما جاوبته ، ضميت التليفون بجيبي .
شمرت الجكارة ورجعت كعدت يمها
فزت من النوم .. كامت تمد نفسها تريد تسحب الجنطة جريتها الها فتحتها وكامت تطلع منها قماش صوف .. مثل البطانية بس تنلبس.. وسدتها
شالت جنطتها الصغيرة وحطتها بسدي وحطت راسها وكامت تغطي بنفسها بالغطوة وقمصلتي.. بس اكوم تتزحلك الجنطة مالتها وتوكع . بقيت كاعد دايخ تعبان الفلاونزة كضتني لعبت بيه لعب راسي موتني من الوجع
رجعت راسي كمت اغفي .. مددت رجلية ليكدام وغمضت عيوني .. وغفيت ما دريت بروحي .
فزيت على واحد كاعد يندهني .. كمزت من نومتي هي نايمة باوعت الساعة ١٢ وربع
لا يا علي راحت الطيارة مشت ..
رحت اسال .. نص يعرفون عربي
كالوا راحت الرحلة اكثر من مرة نادينا بس انتم ما صعدتوا الطيارة
- وهسه شلون رحمة لاهلك ؟
- لازم تنظرون الرحلة الجاية الساعة ١١ الصبح
- يا صبح يا ظهر صدك تحجي
- اخي مو مشكلتنا انتم ما انتبهتوا لموعد رحلتكم فاتتكم الطيارة احنا شعلينا
- ماكو غير طريقة
- اذا تحب اكو تأجير سيارة جمسي .. توصلك لبغداد
- ومنين اجرها
- انطيك رقم وخابره
- انطيني رحمة لاهلك
انطاني رقم سيارة .. خابرته كال : ورقتين هسه اجيك
- كول يا الله خوية سعر الطيارة مو هيج
- براحتك روح طيارة
- سهلها ابو توفيق الله يخليك
- ما بيها اعتذر
- زين شكد ونوصل بغداد ؟
- ٤ ساعات
- توصلني مطار بغداد
- لا كراج النهضة حتى اخذ كروة مناك .
- مو مشكلة بس خلي تعدي هالليلة الكشرة انتظرك اخوي اخوي
- نص ساعة واني يمك .
رجعت يمها الجنطة واكعة وراسها صاير ع الحديدة وما حاسة ولا تدري وتليفونها بالجنطة يرج .
تنهدت ودنكت شلت الجنطة وحطيتها يم راسها وكعدت حست سحبت الجنطة حطتها جوا راسها ورجعت نامت .. رجعت راسي ليورا كامت عيوني شي تغفي شي تكعد والانفلاونزة لعبت بيه لعب
عطست بقوة اهتز الكرسي الجواي فزت هي .. كمت امسح بالكلينس بقوة متت .. دك تليفوني .. كوة اتنفس .. رديت : الو
- وين انت خوية
- طالعلك
حجت - شنو صار ؟
- راحت الطيارة واحنا نايمين
- ليش انت نمت ؟
- اكلج اسمعي اني ..
- مدا احاسبك بس على كيفك راحت احجز ع اللي بعدها
- شو دمشي رحمة لاهلج امشي
جريت القمصلة منها لبستها بهمة وسحبت الجنط
- وين راح نروح الجو بارد بره
- جان فكرتي بالبرد من بهذلتينا هالبهذلة هاي
- بهذلتك ! منو الصبح جان يكول اتحملج وكتل نفسه حتى يشتغل هسه دا تكول بهذلتينا انت من صدك وقح
- اطخ ابالي والحسين اعلمج الوقح شلونه امشي كبالي .. امشييييي.
- مراح امشي اذا متكولي وين راح نطلع ؟
- لا والله شو تمشين بلا ما تعرفين
سحبت ايدها وجريتها
جرتها بسرعة : انت من صدك ما تستحي
كضيت ايدها من يم زندها ومشيتها كبالي كامت تحاول تدفع بيها واني امشيها واجر بجنطها .. طلعنا المطار جانوا حرس موجودين وهي تصيح نترنتها من ايدي وذبيت عليها الجنط مستغربة شلون اتصرف وياها هيج .
اتجاهلتها وخابرت على ابو السيارة دلاني اجا الحرس ويسألها اذا اكو مشكلة كامت تباوعلي بخزرة وهي تكوله : ماكو مشكلة
- السيارة ذيج اتفضلي ست فيان
- تستهزأ حضرتك
- ليش مو يصيحولج ست
- وغصبا ما عليك
- دمشي ست امشي
مشت كباله وهو ينعثل بالجنط وراها صعدت الجمسي وهو صعد الجنط ورا وكعد يم السايق ليكدام ..
باوعت التليفون طفى شحن
ونفس ما جاي اتنفس اجر بخشمي وماكو ميفتح اختنكت والتدفئة بوجهي خنكتني خنك
انداريت لكيتها متمددة بس كاعدة خزرتني
انداريت عنها .. ما حاجيتها.. اريد انام راسي مأذيني كلش احس يريد ينفجر من التعب .. وجع براسي شك راسي شك من الوجع كمت افرك براسي بس اريد ارتاح .. ما الزمها احطها جوا التاير على هالحالة الصارت بيه اليوم .
ساعتين مرت والسيارة طايرة بينا طيران
كوا يلا نمت بس اتفزفز لحد ما وصلنا لكراج النهضة نزلنا والسايق منتظر كروته .. كتلها : داينيني ورقتين واحسبيهن بركبتي باقرب وقت اشتغل وارجعلجياهن ..
مجاوبتني طلعت المحفظة من جنطتها ومدتلياها : ما اكدر الزم جيزدانج بكيفي واصرف انطيني دين
- ادفع وشوفلنا تكسي ياخذنا للمطار ناخذ السيارة ونرجع .
- ما اخذ اني اتصرفي واني رايح اشوف تكسي
احجي وعاقد وجهي روحي طالعة من البهذلة البهذلت بيها روحي من البارحة لليوم .. هميت ردت اروح اشوف تكسي لاحظت ابو الجمسي من شافها وحدها واني مشيت نزل واجالها والكراج ما بيه ولا مرة كلهم رياجيل وكاموا يتفحصوها بعيونهم وهي مفرعة ولابسة اتراكسود ..
رجعتلها وكف ابو الجمسي كتله : خوية كتلك ابقى بمكانك واني اجيبلك الفلوس
ما جاوبني كاللها : ست اذا ما عندج خليها
دفعته : انت هي .. احاجيك
- وانت منو يمك اذا جاي تاخذ الكروة منها لا تفك حلكك
دفعته حيل وكتلك : ما لك كروة افتهمت .. امشي منا يلا
- ذب من ايده واجا تلاوى وياي .. كضيته اتلازمت وياه وهي تصيح : شدا تسوووي صدك تحجي اتررررك ابتعد
.. التموا الرياجيل عفته لان هي وياي مو مال اخليها يم لمة هالرياجيل ..
صحت بيها : امشي من غضب الله على راسج كوووون امشي
- انت شلون تحاجيني بهالطرييييقة
- اكلج امشي امشييي
سحبتها ، جرت نفسها
- مدام وصلنا بغداد كلمن يروح بطريقه اتوكل مناية
- اتوكل منا حتى توصلين لبيتج حبلى بتوم بتل بتل دمشي شيخلصني لو صار بيج شي .. ابيج يكلب العراق فوك راسي .
- ابيج .. لا لا اني ما اكدر مستحيل شنو هالمنطق هذا عجييييب انت معيدي !
- عاجبج اطلعلج معدنتي هسه واكتلج هنا واصلخ جلدج بت الاوادم ما جاي اتنفس انت شنو بليتيني بلووووة .. امشي
صحت على تكسي وكف : وين خوية فتحتلها باب التكسي وصعدت الجنط .. هي طلعت ٣ ورقات تريد تحجي سحبتهن منها اخذت ورقيتين وكتله : خوية بس اطيهن لذاك السايق رحمة لاهلك
نزل وداله الورقتين ورجع صعد .. كتله لمطار بغداد يرحم اهلك
- تأمر
طلع بينا الدنيا ليل بعد الضوا ما طالع .. والدنيا تخوف ضباب حرحارة ايدك كوة تشوفها .. وصلنا لمطار بغداد صرفت الورقة وانطيته كروته ونزلنا .. وكفتها هي والجنط ومشيت جبت السيارة واجيت ونزلت صعدت الجنط .. صعدت هي كبال الستيرن وسدت الباب ..
فتحته : شوفي من اوصله لبيت الخلفوج عود ذاك الوكت اتعايري بكيفج خليني اخلص من مسؤليتج ساعتها شتريدين تسوين سوي عسى ما تكطعين روحج
- الباب بلا زحمة
: الظاهر انت ابد مو مال عيني واغاتي .
لزمت ايدها وجريتها حيل نزلتها كامت تصيح فتحت الباب الورا ودفعتها صعدتها وطبكت الباب وراها .
وهي الطريق كله تنك : انت وقح
سفيه .. متحترم .. معيدي .. ويا العرب ويا رطينة العرب ، الحايط لو جاوبها اني جاوبتها .
ابوها واصل بالدولة اذا صار بيها شي ينهجم بيتي امن توصل لبيتهم سالك وطبها مرض شيصير بيها يصير المهم اخلي ذمتي من مسؤليتها.
لحد ما ردنا نوصل بيتها .. نزلت افتح الكراج
بسرعة طلعولي لمة رياجيل واحدهم عيونه تجدح نار .. ويريدون يتلاكفوها وواحد يصيح : وييين جنتيييي
والاخر يكلهم : اتركوووني وياها
انداريت هي وراي .. والخوف بعيونها
صاح حجي وهو يكللها : انت عاجبج اتلحكين اختج
صرت بيناتهم : الست مريضة واضطرينا نرجع بغداد فورا
شوان : انت حسابك وحد عنها شكد خابروك لييييش مترد
- جانت متخربطة وما دريت عن التليفون
وكف ابوها كال : لو كذبت .. ثق راح ادفعك روحك ثمن كذبك .. جاوب وين جانت ووين اخذتها ؟
اباوعلها المديرة المقتدرة اللي سايكة علينا وتأمر وما عاجبها احد الخوف استحل ملامحها ونظرات الترجي وضحت بعيونها اللي اتحولت فجأة من العجرفة والغرور الى الخوف والترقب ، اتذكرت من خابروها بالمطار كالتلهم اني رايحة اربيل رغم جانت التذاكر بيدي سليمانية ..
فنطقت بسرعة وبدون تردد : جنا بأربيل .
