رواية الشك يلاحقني الفصل العاشر بقلم جمانه السعيدي
زينب اليوم العرس وفرحتي شكبرها كعدنا الصبح بثمانيه من النوم وقررت هاجر تروح وياي للصالون
حجزنا بدله وكل ملحقاتها وطلعنا بلتسعه من البيت
وصلنا اكو عرايس اثنيين قبلنا
كعدنا ننتضر
زينب ...هجوره ولج مامصدكه
صدك اني وهمام راح نزوج
هاجر...صدكي حبيبتي
صبرتي واخذتيلج واحد صاك
احلى من رجولتنا اثنيينه اني وحنان
سبحان الله عبالك مفصل الج حتى طويل مثلج
زينب....قول اعوذ برب الفلق هاي شبيج لاتحسديني
ولج منيين ما اشوفه ما اصدك موضف وحلو ومتمكن
وعاف كل البنات الي ويا واجا خطبني
لو ادري من زمان رايحه وي امي للزياره وضايعه
هاجر....هههههه لاتحجين هيج كدامه هسه يكول مرتي خبله ويعوفج
زينب....يارب تمم على خير هجوره ولج من بعيد وهيج احبه لو صار زوجي شلون يمكن بس يكول حبيبتي
يغمى عليه
هاجر....تعال يهمام واسمع هاي الخبله الي تورطة بيها
جمانه السعيدي
كملت تسريحه وميكب واتصلنا على ام همام خل يجي ياخذون صور
ام همام...همام حبيبي تروح اجيب زوجتك من الصالون وتريد تروح للاستوديو تاخذ صور ذكرى للعرس
همام...ما اريد اي صور
ام همام...ليش ماما البنيه هاي اول فرحته خطيه تكسر بخاطرها
همام...ما اريد اخذ صور هي غصب عود اني اخذلها بلموبايل وبعدين اسحبهن
ام همام....براحتك يله خل نروح نجيبها نوصلها الاهلها
وبعدين الزفه
همام يله
ورحنا جبناها من الصالون ومن سمعت ماكو صور عبست وضاجت
همام ردت كلشي يخلص بسرعه حسيت نفسي ضايج كلش
من طلعنا من بيتهم بلزفه واني حسيت بندم موطبيعي
السيارات تمشي وجماعتي خبصو الجو بلهورنات
واني الندم كتلني حسيت تورطت
الندم اكل روحي اكل
كان ودي افتح باب السياره واشرد واعوف كلشي
ردت اغير كلشي بلحضه
بس ماكدرت ضحكت امي وفرحته منعتني
وشيبات ابوها وهو يسلمها اليه وعيونه الحزينه على فراكاها
منعني ان اغير كلشي
وصلنا للفندق وصعدنا الغرفتنا
امي ماتكدر تصعد بقت جوا
وامها صعدت ويانه واخر كلمه كالتها
زينب امانتك كتلها بعيني
دخلنا ونسد علينا الباب حسيت نفسي ختنكت ما اعرف ليش
قربت ورفعت البركع جانت حلوه لا مو بس حلوه كلش حلوه
كلشي بيها حلو حتى خجلها حلو
المشكله مني مو منها اني ما اكدر اطلع من الماضي اللعين الي عشته
بستها بكصتها وكتلها تكدرين تبدلين وتاخذين راحتج
اشرت براسها اي وراحت فتحت جنطتها وطلعت سيت نوم ودخلت للحمام
واني نزعت سترتي وكعدت على السرير
شويه اندكت الباب عشى من الفندق هديه العرسان
وامي هم جايبتلنا عشى
طلعت من الحمام مدنكه وعلكت البدله
همام...تعاي اكلي اكيد جوعانه
زينب...لاشكرا موجوعانه اكلت نستله بلصالون
همام...هذا هواي اكل حرامات اكلي اي شي
زينب...اني اذا جعت اكل
همام اكلت شويه ودخلت للحمام بدلت لبست تراك وطلعت علكت قاطي
كعدت على جهة السرير وهي كعدت بلجها الثانيه واحد ضهرا للثاني
كعدت اشويه وهي كاعده وطال الصمت بيناتنا
حسيت نفسي عاجز وما اكدر اسوي اي شي ولا حتى اكدر اكوم من مكاني
الندم اكل روحي اكل تندمت على الزواج وبقيت كاعد ومحتار ما ادري شسوي
همام...زينب اني تعبان اليوم حيل تعبت من فرت العرس
راح انام
زينب...براحتك اني هم انام
جان اكو اثنيين بطانيات تغطيت بوحده ونطيتها ضهري ونمت
لا مانمت كاعد وامثل نايم
جمانه السعيدي
زينب....اول مادخلنا رفع البركع وباسني براسي وكال روحي بدلي اني فرحت حسيته مايريد يحرجني وابدل كدامه
وبعدين كال تعاي اكلي اني من الخوف فقدت شهيتي
خفت وافكر شراح يصير
خصوصا اني غريبه عنه وماكو اي كلام بيناتنا
كم كلمه من انخطبنا لليوم
بعدين فاجئني كال اني تعبان اريد انام
اني فرحت حسيته مقدر وضعي ومايريد يخوفني يريدني اتعود علي
تلفلفت بلبطانيه وماكدرت انام
كلساع اباوع علي منطيني ضهرا واني مامصدكه هو نايم بصفي
الحد ماغفيت ما ادري بنفسي
غفيت واسمع صوت واحد مختنك وكوه يتنفس
كان يصيح *ممممممم مممم** وحلكه مسدود اني نومي كلش خفيف
كعدت لكيت همام عركان ومختنك يمكن كابوس
زينب....همام همام همام شبيك حلمان اختنكت
همام....اي اي كعدت اريد مي
زينب طفرت جبتله ماي وكعدته شرب شويه وجبت كلنس مسحت وجها
زينب....يمكن شفت كابوس
همام....اي كابوس لاتخافين هسه ارجع انام انتي بعدج كاعده
زينب...لانمت بس صوتك كعدني
همام بيش الساعه
زينب بلاربعه راح ياذن اكعد صلي وارجع نام
همام راح للصحيات يتوضا واني نزعت السيت ولبست تراك
احمر واسود وطلعت الاحرام وحضرت سجادة الصلا
همام طلع واني رحت توضيت
وكعدنا نصلي سويه
همام خلصت وتلفتت اسلم جمالها غير بلاحرام يخبل عليها
كاعده تستغفر وتصلي
درت وجهي مااباوع عليها وكنما اخاف احبها وتعلق بيها
رغم هي حلالي بس ما اريد احبها حيل
اخاف من الزمن ما اعرف شضام اليه
خلصت وكعدت على السرير وهي اباوع عليها بلمرايه نزعت الاحرام وعدلت شعرها بايدها لابسه تراك ضيك يخبل عليها
دنكت وستغفرت ربي
جمانه السعيدي
تمددت وتغطيت وهي طفت الضوه واجت اتمددت بصفي
زينب....همام انت احسن
همام...اي احسن نامي بعد ما ازعجج
زينب...لامازعجتني بلعكس خفت عليك دوم تجيك هاي الكوابيس
همام...لا لان مضغوط هاي الفتره وتعبان
رجعنا نمنا كعدنا بلعشره وطلبنا ريوك وتريكنا
همام زينب سبحت ولبست فستان كريمي يخبل عليها ومكياج خفيف
واني هم سبحت وبدلت
كعدت ترتب بلسرير اجاها اتصال جان راسا رفضته
واني عيوني شاطن
منيين هذا الاتصال وليش رفضتي
زينب...من امي خفت احجي وياها وازعجك
همام.. انطيني التليفون
انطيني التليفون تليفونج بي رمز
زينب...تفضل مابي اي رمز تكدر تتصفح بكيفك
همام اخذت التليفون فعلا مابي رمز دخلت على الاتصالات
اخر اتصال ست الحبايب
انطيتا اتصال ردت امها صباح الخير زنوبه شلونج حبيبتي كعدتج
انطيتها التليفون وخليتها تحجي وياها
بعدين رجعت اخذته منها وبقيت اصفح بي نخلته نخل مالكيت اي شي
زينب اطمنت اني ماعندي شي اخاف منه ولا ضامه اي شي
هذا جهازي كدامك بدون رمز يمته ماتحب اخذه وتصفح بي براحتك
همام سكتت ماجاوبته
بعدين طلعنا نتغدا بلمطعم
طبعا زينب لابسه عبايه وكلش محتشمه
كعدت وكامت تباوع على المطعم
همام عيونج لا تباوعين نزلي عيونج
زينب صار اكو أومر ثانيه
تغدينا ورجعنا للفندق
زينب ممكن نرجع للبيت
همام ليش احنا حاجزين ليلتين
زينب اختنكت اني مامتعوده على هيج اجواء
احس الفندق يخنكني خل نرجع للبيت
همام يله حضري ملابسج راح نرجع للبيت
شكرا لزيارتكم عالم روايات سكيرهوم
