رواية قلب مغتصب الفصل العاشر 10 بقلم ورود الخالدي

رائد::::

وصلت البغداد الظهر ..يعني وقت الغده فتت للبيت ابويه شافني:

السلام عليكم:

هلا وليدي ..شعجب جيت بسرعة اول البارحة رحت للبصرة

رحت ولكيت فرحان امشي الشغل وما كو شي تعرف نص الشهر احنا والشغل مو ..هوايه كلت ارجع اشوفكم وارتاحلي كم يوم:

اي زين سويت 

اكعد اتغده..سماء بويه..صبيله غدة 

اباوع ع سماء عيونها ذبلانات مبينه هواية باجية وهسه هم گوة مانعه نفسها من البجي..كلت:

لا يابه اتغدو انتو اني اريد ابدل واسبح هسه..

فتت لغرفتي منتظرهم يصعدون حتى احجي وياها..وبس خلصو غدة وصعدهو ..رحت للمطبخ جريتها من ايدها ودخلتها لغرفتي وسديت الباب

لج شبيك عيونج رايحة..من البجي ..الا تخلين حنان وابويه يحسون عليج!!

لا همه سألوني شبيج كتلهم درجاتي مو زينه وبجيت اليوم..

باوعت بعيوني ورجعت دمعت وكالت:

رائد ..اخاف يفصلوني ويروح تعب هالسنه كوله !

محد يفصلج وعيونج..وهذا البجي كله ما اله داعي ..اني جيت وكلشي راح احله اهدي انتي واعتبري مصاير شي

شلون اهده وادارة الكليه يردون يحققون وياي باجر بحضور اولياء الامور

اي خلي يحققون عادي ..هي هاي الزينه:

شلون زينه واني جذبت عليهم وكتلهم انت زوجي ويردون وثيقة تثبت انت زوجي!

هههه عادي اصير زوجج شنو يعني عظمه:

رائد انت كولشي عندك سهل شنو اصير زوجج يردون عقد زواج يعني منين نجيبه

نجيبه...سماء ..سهله هاي العصر نروح نعقد يم اي سيد وونخلي تاريخ العقد قبل فتره..

مسحت خدها وكالت؛

يصير يعني:

انتي بس كولي نعم وانت وكيلي وكولشي يرهم ..لو عندج اشكال بالموضوع:!!!

لا..لا شنو اشكال معندي شي المهم ينحل هالموضوع

هاي هيه العصر اروح لابويه واتفاهم ويا..لازم اخلي بالصورة؛؛

حيل خافت :

لا..لا ..الحجي اذا عرف ..يكول لخاله وخاله تموتني تموت وتطردني من البيت 

لج منو يطردج انعل والديها اذا تتنفس وياج..

ضربتني ع صدري هيج غفل:

لتغلط ع جدو وبيبي همه ميتين

ههههه هسه عوفج من جدو وبيبي وروحي غسلي وجهج وارضتاحي وانسي..

مشت خطوتين ورجعتلي:

رائد..اني اسفه..دخلتك بموضوعي ..وجبتك من الشغل ركض و

جريتها حضنتها.. بعدين لزمت وجهها باديه:

ليش عندج احد غيري ادخلي بموضوعج!!♥️♥️♥️

لا..معندي غيرك..

هاي هيه بعد شكو تعتذرين..

الله يخليك الي..

متحملت دنكت بستها بشعرها وهديتها حتى متخاف..مني وقبل متطلع :

اوكفي ..هذا الولد شنو اسمه تعرفين اسمه الكامل وبأي قسم هو

هااا اسمه باسم...اي وسمعت العميد كله باسم مجيد ..وهو ويانه بنفس القسم..

هاي هيه روحي..

قبل متوصل للباب رجعتلي:

انت ..انت شنو راح تسويله..

معليج روحي انتي..

لا فدوة كولي شراح تسويله..

هسه انتي شعليج شنو خايفه عليه:؟؟

موانت عصبي واخاف تموته!

واذا مات يطبه مرض يستاهل!

لا..لا عفيه لتموته..اخاف الشرطة ياخذوك ويعدموك ..واضل وحدي 

استغفر الله راح تخبلني هالبنيه ..شهالحجي التحجيه شهالبراءه شهالكلمات التطلع منها ركض بدون حساب..

رحت يمها لزمت اديها 

لتخافين ما اموته ..ولا يعدموني...بس أأدبه 

ماشي ..

شو ابتسمي حتى يصيرلي واهس 

ابتسمت هديتها وراحت 

بس طلعت خابرت جماعتي وكتلهم يدورولي على هذا العار باسم..ويعرفولي عنوانه ..ويصير خير

سماء:::

هو كلي ارتاحي ..واهدي بس شلون ارتاح واهده بقيت قلقه منا لما طلع العصر نص ساعة ورجعلي هو والحجي والظاهر هو حاجيلة كولشي ومتفق ويا ميجيب طاري لخاله ...لان حتى الحجي يعرف خاله تكرهني...واخذوني وياهم ..للسيد ..عقدنا اني ورائد والحجي قنع السيد يسوي العقد بتاريخ قديم طلعنا من يم السيد ورجعنا ..للبيت رائد وصل الحجي للمول مالته واني بقيت يمه بالسيارة

رائد هذا العقد يرهم يعني راح يحل الموضوع:

هو صافن بوجهي مدري شبيه يباوعلي هوايه ..وبعدين كال:

شلون ميرهم..غير صرتي زوجتي ...واني ولي امرج حاليا..

الله كريم..

ثاني يوم الصبح راح ويايه للكليه واول مدخل ع الادارة ..جان صوته عالي..كلهم:

شهالمهزله الي دتصير ...يعني انتو جهة تربويه مسؤوله عن التربيه والتعليم هيج مهازل تصير بكليتكم ..لا ..وعايفين المذنب ومجلبين بركبه طالبه ...شعبالكم اني راح اسكت على حق زوجتي ..من باجر اقدم شكوى بالوزارة واجيب حقها كامل:

العميد كله:

على كيفك انت فهمت الموضوع حتى جاي بكل هالانفعال ع الادارة 

اي..فاهم ..الموضوع زين ..طالبة عدكم جتي تشتكي من تحرش زميل ..بمكان متصيرون بصفها تصيرون ضدها ويه المتحرش!

ممكن تهده وتشوف هذا التسجيل مال الكاميرات

شوفه التسجيل

اي وشنو يعني ضربته راشدي..ليش مبحثتو ودورتو ع الحقيقة ليش تضربه راشدي..اذا ما مسويلها شي..التصوير صامت يعني معرفتو شنو الكلام الي..دار بيناتهم..الاخ مسويلها صور فوتو شوب ..ويكلها لو ..انام وياج لو انشر الصور اكو احد بيكم يقبلها على بنته لو مرته...وجايين تلوموها وتحولوها لمجلس تحقيق ..وانتو تعرفون حق المعرفة اذا طالبه يتحقق وياها سمعتها شلون راح تصير كدام زملائها!!

هذه..قونين الجامعات مو بادينه اي طالب ..يتعدى بالضرب وبالدليل ..يتحول مجلس تحقيق..

ماشي هو جايبلكم دليل اني ..هم زوجتي..مراح اداوم الى ان اجيبلكم دليل كامل على تهديده..الها ..والصور الي مسويهن الها..

لزمني من ايدي وراد يمشي العميد كله:

عادي لتداوم بس نريد وثيقه تثبت انت زوجها حتى ..نرفقها ويه اوراقها..

طلعله العقد شافه 

بس هذا عقد شرعي مورسمي!!

اي عقد شرعي عاقد عليها سيد يعني زوجتي ..واذا تريد عقد محكمة من باجر اعقد حتى ..تحققون براحتكم ..

استنسخ العقد الحالي وجيبه ..

رحنا استنسخنا العقد وانطيناه نسخة ..وطلعنا قبل منطلع من الكليه:

رائد الموضوع يخوف شلون بيه

سماء الخاطر الله لتضلين هيج ..رچيچة..وتتراجفين من كل تطور يصير..تره ماكو شي يخوف انتي صاحبة حق ..اصلا هو العميد ..ارتبك وخاف من عندي لا الموضوع يطور واروح اشتكي بالوزارة خلي كلبج اقوة وعوفي كلشي عليه..

بس انت كتله راح اجيب صور ودليل منين اجيبهن..

معليج انتي هاي شغلتي

وصلني للبيت وطلع طول النهار مرجع للبيت وبالليل هم مرجع لنص الليل وهو مجاي بكلبي النار وين راح رائد وشصار وياه

الصبح كعدت ..لكيت غرفته مقفوله يعني راجع للبيت ونايم ..سويت ريوك ..طلع الحجي وحنان تريكو ..هو هم كعد ..غسل وجهه عيوني بيه الف سؤال اريد اسأله شصار شافني قلقه وكلي لهفة ..من فات للمطبخ عضلي شفته عود بعدين نحجي..صعدت حنان تجيب جنطتها سمعته كل للحجي:

يابه مو تتأخر

لا هسه بس اوصلها واروح للمول اوصي حامد ورجع للبيت ..

ماشي انتظرك

طلعو حنان والحجي ..ركضت سألته:

رائد انت ماكو من البارحة مشفتك..شصار مصار

ههه شنو مفتقدتني لو مشتاقتلي!!

اووف رائد فدوة بلاشقه..وين رحت البارحة وشصار..

وج خلي اتريك..ماكو شي كل الخير

هااا خير..

اي خير ..

بس خلص ريوك اجه الحجي ..رائد كلي:

روحي بدلي سماء حتى اخذج لكليتج..

هاا ابدل..ليش شنو الي حتسويه

سماااءروحي بدلي بسرعة

رحت بدلت بغرفة رواء ورجعت ركض سمعتهم يحجون:

يابه مثل مفهمتك ..

وليدي هاي مال الكوامة اشوفها راح توسع الموضوع اكثر؛؛

يابه لعد من البارحة لليوم اني شسولف عليك خلي الموضوع يكبر اني اريده يكبر..احنا اصحاب حق ولازم اشلع عيونهم هو واهله واخذه

بعد شتسويله اكثر ..الولد داخل مستشفى غير كاسر خشمه ومصكطه وماخذ موبايله؛

يابه هسه وقت معندي ..اهله اشتكو عليه واحتمال بس اطلع تاخذني الشرطة اني اخذ سماء للكليه ...قبل ميبدي الدوام حتى الحك افض شغلتها وارجع اذا لزموني تلكة الموبايل عدسماء اول شغله تسويها ادز ..ابو زيدان يكاومهم ..وبعدين تشتغل باوراقي..اطلعني..بكفاله ..

هسه انت ليش تسبق الامور يجوز متنلزم!!

يابه ..حسين الشرطي خابرني من البارحة وكلي مشتكين لاتطلع هاليومين تنلزم واني حتى اذا منلزمت اروح اسلم نفسي اليوم حتى ميتركب عليه الحق بالقانون شيردون يسوولي هيه مشاجرة واذا ع الموبايل انكر اني ماخذه حاليا

والله ما ادري الله يستر...اذا انت ضارب الولد يجوز همه يكاومونه؛

لا يابه الشغله فسدة وتحرش ويدرون ابنهم الغلطان ميفضحون رواحهم ويكاومون احنا نكاومهم اصلا لو يردون يكاومون جان دزو الكوامة من البارحة مو ضالين لحد الان سكته وبس مشتكين .. ومن اطلع بكفاله نقدم شكوى اني من جهة وانت من جهة حتى نخنكهم خنك بالقانون وبالعشاير

اني اسمعهم وكلبي يركض عزززة بعينج سماء الموضوع كبر صار بيه شكاوي وشرطة وعشاير..شلون بيه شلون راح تخلص المشكله..يمكن..رائد راح ينسجن بسببي هم

اخذني رائد بالطريق شافني اعصربديه من القلق كلي:

اهدي سماء ...ماكو شي

ماكو شي شلون رائد شرطة وشكوى وعشاير وانت راح تنسجن بسببي:

ههههه عادي واذا انسجنت يومين تلاثة شنو خاف احبل بالسجن!!🤰🤰😁😁😁

رائد كولشي عندك سهل الموضوع حيل تضخم ..خلي ابطل من الكليه احسن وانت روح للبصره خاف الشرطة تلزمك!!

افه..والله ..اني اخليج تبطلين..لو انهزم واني صاحب حق عمت عيني والله ..

وصلنا للكليه دخلنا ع الاداره طلع الموبايل وحجة ويه العميد :

هذه الصور ..شوفها..

منو يكول هذا موبايله

هذا موبايله حصلته بطريقتي تكدر تتأكد من تتصل برقم شريحته اكيد اخذتو رقمه مثل ما اخذتو رقم سماء..شوف هذه الصور ومو بس صور زوجتي مسويلهن فوتو شوب..مجموعة بنات هم مسويلهن ...فوتو ويجوز يريد يهددهن مثل مسوة ويه زوجتي..وحتى برنامج الفوتو كدامك موجودة بيه مسودات التعديل..اكو دليل اكبر من هذا

طبعا العميد بقه صافن ..رجع رائد يحجي بحرگة وياه:

اعتقد ..حقها تضربه مو راشدي واحد لا المفروض تشبعة جلاليق لو مو بالحرم الجامعي ..استاذ ترضاها زوجتك لو بنتك تتساوم على شرفها ..اذا ترضاها..اعتبر الكليه متعاونه وياه على ابتزاز الطالبات:

استريح اخي ..الموضوع مو هيج ينحل انت دتتهم الادارة واحنا شغلنا نحقق بالموضوع .. موننحاز لاي طالب:

اني كلبي مشتعل نار مأمن على زوجتي يمكم ..داخل الحرم الجامعي ليش يسموه حرم غير اله حرمة مستحيل اسكت على حقها هذا الطالب اذا مياخذ اقصى عقوبه اني راح اصعد الموضوع لاعلى مستوى

اكيد على ضوء هذه الصور والادله الجديدة راح نتخذبحقه اقصى اجراء وهو الفصل من الكليه ..

العميد اخذ الموبايل ..وحول الصوروالمعلومات الموجودة ع الحاسوب الي كدامه لان رائد كله اريد اقدم شكوى ضده ..بالمركز ..ولجهاز مكافحة الابتزاز الالكتروني ..

اخذ الموبايل وطلعنا....رجعنا للبيت اتصل بالحجي كله راح اسلم نفسي الموبايل عد سماء سوي الي كتلك عليه

من راد يطلع كتله..وكفت كباله بجيت وكتله :

هااا راح يحبسوك مو!!

جرني من ايدي..حضني كيفه وباسني بشعري وكلي

..اليوم اطلع...اسلم منا وابويه يطلعني بكفاله..ما اتأخر عليح والله

وطلع من البيت راح ..وخلاني دمعتي بعيني يربي بس لا ميطلعوه..اجه الحجي الظهر....تغده عادي ..وحنان تغدت .ميته من القلق كل هذا ديصير وخاله متدري اذا درت شتسوي بيه يربي..ومن صعدت خاله ..انتهزت الفرصه وكتله:

حجي رائد يطلع اليوم:

اي ابن خالته راح يكفله..قبل ال٢ يطلعوه سكتي تره خالتج متعرف مابينه حيل تكلبها علينا عزاا اسود 

ماشي حجي..

وفعلا قبل ال٢ رجع 

اول مدخل ابتسملي..فرحت من شفته وكتله 

الحمد لله بسرعة طلعوك هاي هيه بعد ميحبسوك؟

وج طالع بكفاله ورانه ..هوايه شغلات ..

ثاني يوم عرفت اهل الولد ماخذين عطوة مدري علك مدري شيسموها ٣ ايام ..طبعا اني ما اداوم .بهالايام ..رائد كلي لتداومين منا للامتحانات  

وباليوم الثالث جوي عمام ..رائد وولد عمه هوايه ناس وهوايه شباب وصلو الظهر.. وطبعا خاله عرفت ..لان الحجي اضطر يسولفلها الوقت كوله تخازر بيه وجهاا انكلب ..تريد تنفجر منتظرة بس فرصه تنفرد بيه..وحتى الحجي كل شويه تكوله يصير خير ويصير خير..خلي الناس تفض وتروح والله كريم

الناس تجمعو كولهم بالاستقبال يحجون بصوت عالي واسمع رائد ووياه ولد شاب يمكن ابن عمه حيل يشحرج صوته راح من التشحرج....عاد خاله مصدكت اخذو الجاي وملتهين يسولفون ويتطالبون لزمتني بالمطبخ كطعتني تكطع بالعضات والتكرص ملخت شعري تملخ تضرب بيه ..وتفشر وتكلي :

ولج عاهر شوكت عقدتي ويه رائد واني ما ادري ..

تضرب بيه وفحطانه ووتفشر كل شويه تكولي شلون عقدتي من وره ضهري

ومن طلعو اهل الولد رجعو عمام ..رائد كلهم كعدو بالصاله عافتني وبقت تسمعهم شيحجون:

بعد شتريد بويه رائد ..صارت كلها من جانبك والحق تركب عليهم!!

اي لان احنا اصحاب حق:

ولك انت شبيك طافر خلينا نسولف ويه العالم ..والله غلطت من تنازلت عن الفصل ذوله مبينين مو مال احترام؛

عمي اني ما ادور فصول اني ادور رد اعتبار ..ومادام راح يتنازل بالقانون ..واني الدعوة مالتي تبقى عليه اخذ حقي منه بالقانون احسن من الفصول:

الحجي كال:

عمي والله ابو الولد مبين من اهل الله عوزة شويه ويبجي!

حجه واحد صوته خشن 

طبعا يبجي..خاف ١٠٠ مليون منين بجيبهن ويشيل من المنطقة غير هذا هجمان بيوت ..كلك اخلي ابني ينسجن سنتين تلاثة ولا ..ينهجم بيتي. 

بقو يسولفون شويه ..ورادو يرحون الحجي جلب بيهم وزعل ..كالو ابو سعد مريض وعنده علاج ..ومحاسبين حساب نبات ....جلبو بيهم رائد والحجي مقبلو كالو مرتبطين بشغل غير مرة نجي ونضل يمكم اسبوع..المهم طلعو .وراح وياهم رائد ..وما اكللكم خاله شسوت بالحجي لعبت لعب . شلون تشتغلون من ورة ضهري وشلون تعقد لبنك واني ما ادري ..وعليمن تعقدله على هاي بت اليكرهوني ..وصعدت فوك ادردم ..صعد فوك واول مره اسمح لنفسي اصعد وراهم اسمع شيحجون يعني اصنت عليهم..لان الموضوع يخصني

يامرة شنو من وره ضهرج....وشنو عقدتله:

اي غير عاقدله عليها ..ابو رائد عفت الدنيا كلها وعقدتله على بت ايمان ..الي اشوف دم سنوني من اشوفها..

انتي شبيج محضرة العطابه قبل الفشخة خابصة روحج بالعقد..شنو هو رائد بحالها هاي بت اختج لو يشتريها بفلسين شو عقد كلاوات لان كسرت خاطرة وميريد يفصلوها ..من الدوام والسالفه ..كبرت شويه وبس تخلص الطلابه والدعوة يطلكها..انتي شنو تغشمين نفسج مو تدرين بيه اريد اخطبله وحده من بنات عمه بعد بت اختج سيصخم بيها وتتراجفين

وشوكت يطلك؟؟

يمعودة اسبوعين تلاثة

انت ليش ضميت عليه

لان شغله تافهة واني اشوفج ملتهيه بالمول مردت اشغل بالج

اي خوش عذر ابد ما انساها الك

وسمعته يتشاقه وياها 

وخر عني ..وخر..وخر؛؛

والياخذج باجر للصايغ وياخذلج احلى كلادة

اي..اذا هيج ..ماشي

نزلت من يمهم ..بسرعة صبت دموعي..حيل اثر بيه كلام الحجي من سمعته كال هو بحالها لو يشتريها بفلسين..ليش شبيه ميشتريني بفلسين شناقصني ...ورجعت لنفسي احجي وياها..اي ..ناقصني هوايه اني مجرد يتيمه اخدم عدهم ..قابل اقارن نفسي باقاربه وبنات عمه اكيد مو بحالي واخلاقه تخليه يعطف عليه ويريد يطلعني من هالمشكله..بجيت لما صفت عيوني ..بس ليش دا ابجي شبيه ضجت عليه ..ورجعت لنفسي وج سماء تحجين من كل عقلج الولد يريد يساعدج شبيج تبجين عليه شنو حبيتيه وحتى اذا حبيتيه شنو راح تكدرين تكوليلة ..اول شي راح يفكر بيه هو انه انتي مثل خالتج مجلبه بيه سدي حلكج وسكتي وطلعيه من دماغج للابد رائد مو حلم بالنسبه الج ...لا اكبر . واكبر الف مره من الحلم 

شكرا لزيارتكم عالم روايات سكيرهوم