رواية شيخ البصره الفصل العاشر بقلم مجهول
اتعشيت وكملت وجان تجيني مروة بس متحمسة وتريد تحجي شي ومتردده.
مروة:- خالة بلسم .
بلسم:- تعالي حبيبتي كولي.
مروة:- انه اعرف الشي الي راح احجيه عيب بس والله مااتحمل مااكلج.
بلسم:- احجي ولج شمنتظرة؟
مروة ابتسمت ونزلت راسها:- جمال خابرني.
بلسم فتحت عيني :- ولج نصي صوتج وتعالي ..
اجتي كعدت بصفي
بلسم:- شعنده مخابرج وليش حجيتي وياه والله خالج اذا يعرف يطيح حظنا.
مروة:- والحسين ماقبلت احجي وياه بس دزلي رسالة كال لازم احجي وياج ضروري وصار عندي فضول وحجيت وياه.
بلسم:- وشيريد منج؟
مروة:- كلي اذا اجي اخطبج توافقين؟
بلسم:- شجاوبتي؟
مروة ابتسمت بخجل :- كتله اي موافقة.
بلسم:- زين و دراستج مروة لا تعوفيها تره والله تتندمين.
مروة:- انه كتله بس هالسنه اتخرج من السادس و اكعدن بالبيت مااداوم جامعه.
بلسم:- زين انتي ماعندج طموح ماتريدين تتخرجين من الكلية وتتوظفين؟؟
مروة:- يا وظيفة انه للمدرسة بالدفرات اكعد الصبح و اروحلها .
صفنت عليها واحجي بداخلي يعني صدك اكو بنات كلشي متوفرلهم فلوس و عيشة زينه بس ماعدهم الطموح انو يكملون دراستهم و يصيرلهم كيان واكبر طموحاتهم الزواج
واكو بنات وضعهم المعيشي مايساعد بس بالدراسة تتميز و يكون عدها طموح واجتهاد عالي.
مروة:- خاله خاله تتوقعين خالي يوافق؟
بلسم:- والله خالج ماينحزر ماتعرفين ردات فعله شلونها.
اندكت الباب و دخل ضرغام و جان تطفر مروة من مكانها و راحت لغرفتها.
ضرغام:- شبيها مروه چنها مخبله بس شافتني طفرت؟
بلسم:- هاااا مابيها شي هيج صارت مو بقصد.
ضرغام وهو مامقتنع:- اممممم عالعموم اكلتي؟
بلسم:- اي اكلته كله.
ضرغام:- عفيه. زين صايره تسمعين الكلام.
بلسم:- اي اسمع الكلام اذا جان الاسلوب حلو 😉.
ضرغام:- خوش بسمار.
بلسم:- هههههههههههههه.
الحلو بضرغام ابد ماديفرض نفسه عليه كأنه مخطوبين بالجديد ولا عبالك حيصير سنتين متزوجين.
((الناصرية))
هند وهي تدك على رجليها:- ولج يمه الحكيلي ضرغام حيروح من ايدي.
ام هند:- عبنج ثولة وفاهيه حيصيرلج سنه متزوجه ماعرفتي تحبلين ؟
هند :- يمه هو انه بكيفي ماصار حمل شسوووي وهو مايتقربلي دائماً ..باله يم هاي الفصلية الساقطة.. فرت مخه فر مايشوف احد غيرها .
ام هند:- شنو مايتقربلج كل يوم البس واتكشخ للرجال و اتقربله بس كولي انتي غبيه وماعرفتي تكسبين زلمتج.وخليتي وحده لا راحت ولا اجت تاخذه منج.
هند:- وتالي شلووون شسوي؟ هاي الساقطة راح يخلالها الجو و تاخذه و انه اعرف بي يحبها . دبريني يمه .
ام هند :- خليني امخمخها بدماغي و يصير خير .
نرجع للبصرة
بلسم:- كعدت الصبح ونزلت جوة لكيت بثينة و سهاد ديسوون ريوك والحجية كاعده وتسولف وياهم
الحجية:- هلا بهالطول هلا ببنيتي .
بلسم:- بستها من راسها صباح الخير حبيبتي خاله.
الحجية:- صباح النور بعد روح خالتج هااا بشريني شلون صرتي؟
بلسم:- لا الحمدلله زينه مابيه شي ان شاء الله.
الحجية:- اي يستاهل الحمد.
تريكنا والبنات ماخلوني اساعدهم ولا امد ايدي بشغل البيت. وفعلاً احس اني بين اهلي وناسي. تعودت عليهم وتعودو عليه.
ضرغام وفلاح كالعاده يصير عدهم شغل بغير محافظات ويروحون سوة .
كاعدين و جان يدخلون علينا ام بثينة وابوها .
ابو رافد:- السلام عليكم .
كلنا:- وعليكم السلام.
الحجية:- ياهلا بالجايينا اتفضلو اتفضلو.
بوسنا ام رافد و دخلو للصالة وية الحجية.
بلسم:- اني رأساً عرفت جايين يخطبون مروة لجمال.
ابو رافد:- چا الولد وين؟ لا ضرغام لا فلاح؟
الحجية:- والله ياخوي تعرف بشغلهم على ساعه يخابرونهم ويكلولهم تعالو محتاجينكم .
ابو رافد:- اي الله يگويهم .
الحجية:- سهاااد سهااااد.
سهاد:- نعم يمه.
الحجية:- يمه حضري الغدا بيت خالج اليوم يتغدون يمنا.
سهاد :- على راسي خالي و مرته.
ابو رافد:- يسلم راسج بنيتي.
كعدوا البنات يجهزون الغدا و صار الظهر واجوي رقية ومروة للبيت .
باوعت على مروة وابتسمتلها وهي تسوي حركات بوجهها شنو؟ شكو؟
اشرتلها و دخلنا لغرفة الحجية:- ولج بيت خالكم اجوي.
مروة:- صددددك؟ يمه كلبي يايمه لحكيني .
بلسم:- ولج شبيج اثكلي شوية.
مبين بعدهم مفاتحين الموضوع دينتظرون خوالج يجون من الشغل.
مروة:- عزا العزاني يا فشلة الفشلة.
اني خربانه ضحك عليها خايفه وخجلانه وماتعرف شتسوي .
بلسم:-دروحي اصعدي فوك اسبحي وبدلي ملابسج ونزلي سلمي عليهم.
مروة :- مو اخاف افوتن عليهم واطكها بضحكة اعرف بروحي زمالة وفطيرة.
بلسم:- متت ضحك .. ولج دروحي عاد قبل مايجي خالج ضرغام و ترتبكين اكثر.
مروة:- رايحه رايحه .
صعدت فوك واني ميته ضحك على سوالفها
والله كبرت وبدو يجوها خطابة.
نزلت مروة وسلمت عليهم وام رافد تباوع عليها ومبتسمة.
صارت تقريباً بل٢ الظهر و اجوي ضرغام و فلاح من شغلهم
اول مادخلو سهاد كلتلهم تره بيت خالكم جوه.
ضرغام باوع عليه شافني كاعده بالمطبخ ابتسملي و كرص خدي و فات . واني عبالك كرص كلبي صايره فدمره كلبي مايتحمل هالحركات 😅.
ضرغام:- هلا بالجاينا ..هلا خالي
ابو رافد:- هلا بيك شيخ الله يساعدك.
ضرغام:- منين طلعت الشمس؟
ابو رافد:- يحفظك الله وليدي والله جايك بشغله .
ضرغام:- اي نحجي بهالشغله بس قبلها نتغدا و نسير للديوان ونتفاهم.
ابو رافد :- مثل ماتكول شيخنا.
صبو الغدا و اتغدينا و طلع ضرغام وفلاح و خالهم ابو رافد.
ضرغام:- سهاد حضرولنا الجاي و دزيه بيد علاوي للديوان.
سهاد:- اي خوية من عيني .
ضرغام:-
دخلنا للديوان و اجه عمران ابن عمي وكعدنا ..جابولنا الجاي و حجيت
:- اي خالي انه اسمعك أمرني.
ابو رافد:- مايأمر عليك ظالم وانه خالك
احنا اجينا اليوم وطالبين منك طلب.
ضرغام:- كول خالي اسمعك.
ابو رافد:- نريد بنيتكم مروة لولدي جمال.
ضرغام عكد حاجبه.
ابو رافد:- انت تعرف وليدي متخرج وعنده محلات اجهزة و الحمدلله الله موفقه وناقصه بس بنت الحلال. وانه بصراحة كتله انتظر اخوك الجبير يتزوج بس هالوليد ماعنده صبر و عزم الا نجيكم ونخطبها.
ضرغام:- ايييييي .. خير ان شاء الله
انت تعرف البنية يتيمة وانه الي مربيها ومستحيل اجبرها على شي يعني لازم اخذ رأيها و اردلكم خبر.
ابو رافد:- والنعم من ربايتك شيخ .. وانه راح انتظر جواب البنية منك .
ضرغام:- ان شاء الله خير .
راحو بيت اهل بثينة ودخل ضرغام بس وجهه مايتفسر.
وصاح:- مروووة مرووووة.
نزلت مروة:- نعم خالي.
ضرغام:- تعالي كليلي شعندج وية جمال؟
مروة:- هااا و و و والله ماعندي شي وياه.
سهاد:- شهالحجي ضرغام بنتي شعدها وية جمال؟
ضرغام:- اسألي بنتج الي كاعده وتتبسم وياه.
سهاد:- ولج يالمكموعه شنو هالحجي الي ديحجيه خالج جاااوبييي.
مروة وهي تبجي :- والله ماعندي شي وياه والله.
بلسم:- انصدمت من ردة فعل ضرغام يعني مرات يتصرف تصرفات تخليني انفر منه.
بلسم:- مروة ماعدها شي وية جمال.
ضرغام اندار عليه وهو عاكد حاجبه:- وانتي شمدريج يابه؟
بلسم :- لأن مروة كلشي تسولفلي و الولد مو غريب و استفسر مني انو اذا اتقدم لمروة تقبل لو لا واني كتله اي تقبل.
ضرغام:- شنوووووو؟؟؟؟ شنو استفسر منج وشوكت سألج؟ وانه هنا شنو طرطور؟
بلسم:- من عزمونا عالغدا اجه واستفسر مني واعتبرني مثل اخته مابيها شي.
ضرغام:- وانتي شصخممم وجهج وتدخلين ؟؟؟ على اي اسااااس؟ خالة البنية لو عمتها؟؟؟
بلسم :- كلش انقهرت من كلامه :- ليش انتو معتبريني غريبه؟
ضرغام فقد اعصابه:- اي غريبه ..شكو تدخلين بهالامور وشكووووو تلغين بكيفج وتكليله اي موافقة؟
بلسم بصدمة :- اني اسفه لأن تدخلت نسيت اني فصلية و غريبة بيناتكم و وعد مني بعد مااتدخل بأشياء ماتخصني ولا اعتبر نفسي من اهل البيت. عفتهم وصعدت لغرفتي بس احس كأنه انضربت براسي و كلبي يوجعني حيييييل من القهر
بچيت من كل كلبي لأن كلام ضرغام يجرح
واذا بهالفترة تقدمنا بعلاقتنا خطوتين بكلامه هذا رجعني ١٠ خطوات ليورة.
ضرغام:- صرت عصبي و كمت احجي حجي جارح بحق بلسم بس شلون تكله لجمال مروة توافق اذا تقدمتلها وماخلتلي اعتبار.
ضرغام:- شوفو دااكلكم هالموضوع ماينفتح بعد افتهمتوووو؟
بثينة زعلت من ردة فعل ضرغام بس فلاح فهمها انو تصرف جمال غلط و المفروض كبل يجي ويحطهم بالصورة و كللها انو ضرغام من حرصه على مروة هيج اتصرف وهو يحب خاله واكيد ماراح يكسر علاقته وية الاهل.
ضرغام:- كلش جرحت بلسم وفشلتها كدام اهلي بس مهما يكون هي غلطت ولازم تتحمل نتيجة غلطها.
بلسم:- بقيت اليوم كله حابسه نفسي بالغرفه وكل مااتذكر حجي ضرغام ابجي .
اندكت باب غرفتي مسحت دموعي وفتحت الباب و طلع ضرغام
بلسم:- نعم محتاج شي؟
ضرغام :- دخلت وسديت الباب
تعالي اكعدي .
بلسم بحدية:- مااريد اكعد اذا عندك حجاية احجيها واذا ماعندك اريد انام تعبانه ولو انت مابقيت حجاية تعتب عليك.
ضرغام بعصبية:- اشو انتي صايره تهوبزين وماتعرفين تحجين؟
بلسم:- هاااا اني اسفه تجاوزت حدودي وياك اي حقك ليش اني شنو بالنسبه الك غير خدامه تخدمك وتخدم اهلك ولازم تهيني واتحمل اهانتك بكل رحابة صدر
مو هذا حجيك من اول مادخلت لهالبيت بس اني صوجي نسيت هالكلام و انت اليوم ذكرتني بي.
ضرغام:- بلسم مو قصدي هالشي.
بلسم قاطعت حجيه:- لا قصدك بس تدري حابة اهنيك لأن كتلك ماراح تكسرني بس انت نجحت وكسرتني
ذليتني وهنتني بأقسى الطرق خليت العالم تباوعلي بنظرة شفقة و شماته.
ماتحملت احبس دموعي وكمت ابجي واحجي:- تعرف شنو يعني بيوم وليلة تتغير حياتك و ياخذوك غصبببب بعيد عن اهلك
تعرف شنو بنية تخلت عن حلمها و طموحها و تروح بمكان مو مكانها و مجتمع مختلف عن مجتمعها
تعيش وية ناس عمرها ماشايفتهم ولا تعرفهم؟
تسمع كلام جارح وكله اهانه من شخص المفروض يكونلها سند و ظهر؟
تدري حلمي حالي حال اي بنية تنزف من بيت اهلها و لابسه فستانها الابيض و رجال يحبها ويحترمها ويقدرها.
كل هذا اتخليت عنه وماجنت رايده غير بس يكونون اهلي بخير و اعيش بكرامة
وانت ماقصرت حتى كرامتي مسحتها بالكاع.
رحت تزوجت علية بس لمجرد انو تقربتلي واني رفضت و لجأت لأقسى عقوبة ممكن تذلني وتكسرني بيها
ماحاولت تفهمني ما حاولت تستوعب ليش اني سويت هيج
ماحاولت تكسبني وتكسب كلبي
كضيتها ويايه صياح وعياط وضرب وتريد اول ماترغبني اسلمك نفسي واني الممنونه.
ضرغام اني تعبت
تعبت منك ومن سوالفك تعبت واني ادورلك اعذار كاااافي ارحمني ..
ضرغام:- اسمعها تبجي وتحجي بحركة كلب انقهرت لأن صدك انه ما حاولت اكسبها وصدك هي ضحت بهواي اشياء .
جريتها من ايدها وحضنتها
ضرغام:- كافي بلسم كافي اهدي
انه اعتذر
اعتذر عن كل مرة اذيتج بيها بتصرف او حجاية ..
لزمتها من وجهها وباوعت بعيونها الي تارستها الدموع:- بلسم انه احبج بس من اصير عصبي اتصرف تصرفات واحجي حجي اتندم عليه بعدين.
انتي الوحيدة الي سكنت كلبي وماعرفت الحب الا وياج ، انتي خربطتي احوالي وكلبتي كل موازيني. ماجنت متصور بيوم راح احب وحبيتج وضجت من حبي الج لأن اعتبرته ضعف .
بس هسه انه جاي وكلي ندم واريدج واحبج.
بلسم:- اباوع على ضرغام اول مره اشوف عيونه مدمعه ويحجي الي بداخله.
باسني من راسي وكال:-
اخذي وكتج وصدكيني ما افرض نفسي عليج وراح اتغير لخاطرج بس انطيني فرصه اصحح اغلاطي و اذا جرحتج مره ثانية اوعدج انو ارضى بأي عقوبة تعاقبيني بيها. واعتبريها اخر فرصه .
بلسم :- بقيت ساكته مااعرف شنو ارد .
باسني من ايدي وراسي و عافني ونزل.. حسيت نفسي ارتاحيت من حجيت كل الي بكلبي .
ضرغام :- دخلت لغرفتي وانه كلبي يتكطع
اصفن واتذكر كلام بلسم و اموت الف موته. صدك احبها ومااريد اخسرها.
كعدنا ثاني يوم و جمعت الكل من الجبير للصغير وحتى بلسم خليتهم يصيحوها حتى تسمع الكلام الي راح احجيه:-
انه البارحة غلطت بحق الكل و مو عيب الزلمه يعترف بغلطه بس عيب الي مايتعلم من اغلاطه
وانه كدام الكل اعتذر من كل شخص مسيته بحجايه محلوة
انتو اهلي و عزوتي وانه اعرف الصح من الغلط واعرف مصلحة كل واحد بيكم وين. انه معتبر نفسي ابوكم والاب من يقسى ف قسوته مو كره وانما حرص.
باوعت على مروة وكلت:-
مروة بنيتي انتي موافقة على جمال ولد خالي ؟
مروة انصدمت ومن الخجل طلعت تركض من الصاله .
سهاد:- يا خوية الله يسامحك ماتعرفها تخجل مبين من خجلها موافقة .
ضرغام :- ابتسمت وكلت:-على بركة الله بس انه عندي شرط انو تكمل السادس وتتخرج يلا يتم الزواج.
الحجية:- عين العقل يا وليدي وانه رأيي من رايك.
فلاح:- وانه هم ماعندي مانع جمال خوش وليد وشاريها للبنية.
ضرغام:- على بركة الله. اليوم اردن خبر لخالي بالموافقة و نحدد يوم قراية الفاتحة والعقد.
سهاد:- چا يصير ام البنية تهلهل؟
الحجية:- ولج اسكتي يالصمخة لا تفضحينا.
بثينة:- يا بعد اخيتج انه اهلهل بمكانج كلللللللللللووووش.
ضرغام باوع علية وابتسم وجان يكوم واتقرب عليه كدام الكل لزمني من وجهي وباسني من راسي وكال كدام الكل :- هو يصير شيخ يتغير ويتنازل علمود شخص؟؟؟
كلهم ضحكو وكالوله:- اذا هالشخص بلسم ف تستاهل الواحد يتغير علمودها.
بلسم:- اني خجلت من كلامه و ابتسمت ونزلت دمعتي. ضرغام شال راسي ومسح دمعتي وكال
:- مااريد اشوفن هالدموع مره ثانيه.
واني ضحكت بوجهه وكتله ان شاء الله.
جانت فرحتنا بهاليوم كلش جبيره و حسيت كأنه فتحت صفحة جديدة بحياتي وية ضرغام.
شكرا لزيارتكم عالم روايات سكيرهوم
