رواية غاليتي الفصل العاشر
غاليه : خلاص ماتفكرش فوت الموضوع
المنجي : اسمعي ! بكرا توا انجي وندوي معاها وانقوللها اني جبته لكي ونبي نخطبك وهانطلع من عندكم نحكي لأمي
غاليه تسمع فيه وفرحانه ومعش ردت
المنجي : كنك ساكته
غالية : انا مانبش انزرك بلكي انت ماتبش توا
المنجي اضايق : شنو الكلام الفاضي الي تحكي فيه هضا !!
غاليه : و حتى خايفة من ردة فعل هلك ؛ امي امينة بذات حسيتها مش راضيه وتحسابني قالبتلك راسك عليهم وكان تعرف انها انا توا تكرهني
المنجي : خلاص توا انهي الموضوع انا قلت بكرا يعني بكرا و مش هايصير الا كل خير
غاليه : مش عارفه خايفه بكل
المنجي : انا في ظهرك والله ماتخافي من حاجه
غاليه : ان شاء الله خير ....
وسمعت صوت خطوات خافت
بصوت واطي : بيبي توا نحكو بعدين
منجي : خلاص تم رد بالك من روحك ...... وسكر
غاليه دست التليفون تحت الفراش و صبت ترفع في شعرها ..
صفاء : وين ماشيا
غاليه تفتح في الباب : للحمام
مشت لقت الباب مسكر دقت عليه
انس : من ؟ 😡
غاليه : نبي الحمام 😥
انس : شويا ازف 😑
غالية مصبيه عند الحمام يعني قدام دار المقعد
الي فيها سرير بوها !
مصبيه والباب مردود
مختار : ماصدقت تريحت علي هالبنت
سعاد تحكي بصوت واطي : امتى انقوللها غاليه
مختار : افتحي معاها الموضوع بعد تاخدي راي امينه توا اتشور عليك
سعاد : هو حتى مصطفى ولد حلال ويستاهل
مختار : والعيل كسيب حالته كويسه مش تعبان كيف خوه الكبير
غاليه تسمع ومصدومه
كرعيها معش شالنها تبي اترد للدار ويادوب قادره تمشي وماسكه في الساس
(( شيء مآ يقف في حنجرتي , يخنقني ..
أريد آلبَوح , و أريد البكآاء .. ! )) 💔
المنجي قاعد يدخن تليفونه رن
بحت لقاها #غاليتي
ابتسم وفتح الخط : شكلك رايفتي عليا بسرعه !!
غاليه تبكي
المنجي انفجع وقمعز في السرير : كنك ..! حبيبي
غاليه تبكي : شي يابيبي متضايقه
المنجي مستغرب : توا كنتي تضحكي وتلعبي كنك
غاليه تبكي وساكته
المنجي : خايفه عشان موضوع بكرا !! والله ماتخافي وراس عيوني واخدك واخدك
غاليه سمعت كلامه زادت تبكي اخرى
_________________
11:00 ص
امينة وسعاد في المطبخ
امينه تضحك : انتي ليش زعلانه بوها عنده حق يبي ايتريح عليها
سعاد : انا كنت انقول بلكي عندها حد بنتي وعارفتها الفتره الاخيره تغيرت و فرحانه انشوف فيها
امينه : والي تبيه كنه ماجا وخطبها ياهبله
سعاد ساكته وتسمع فيها
امينه : خلاص البنت عطيتوها ومعش تندس قوليها لها في العشيه
سعاد : ان شاء الله وانتي طيبه
المنجي خش عليها : صباح الخير
سعاد ابتسمت : صباح النور
امينه : كنك روحت توا غريبه ؟
المنجي : لا طالع اخرى غير عرقت ماقدرتش نقعد برا هكي .. ؛ عمتي سعاد قاعده بعدين ؟
سعاد ابتسمت : قاعده كنك خير
المنجي : نبي نشرب معاك قهوه
سعاد تضحك : تعال مرحبتين
المنجي طلع للصاله .....
امينه بحتت في سعاد : ياناعليااا وسواس تغيير دبش وحمامات يروح في اليوم قريب اربع مرات يغير ويدير حمام
سعاد تضحك : نجيه انظيّف مايتحملش الحمو
امينه : بكل في الصيف يتعب فيا لكن متريحه من الغسل والتحديد
سعاد : يحدد بروحه ؟
امينه هزت راسها بمعنى لالا : يخاف على دبيشاته ياحنه يلمهن ويشيل فيهن للمغسله
سعاد ضحكت : ياناااعلي عليك طبع
___________
اميره وهناء في الدار
هناء تدويلها : خلاص اتفقنا تقعدي
اميره متكيه في السرير : رنت عليا ماما نوضتني الصبح بددددري ياما دارت قالتلي ليش ماكلمتوني شكلها عميمه كلمتها
هناء اطبق في الدبش : امي من امس قالت توا انكلمها الصبح وانقوللها انك تعبتي فجر ومايبوش يفجعوك
اميره : معناها لازم نركب حوشي انا نستقبلهم فوق لكن خايفته يقعد قاعد
هناء : توا انشوفه لكي طلع ولا لا !
اميره : وكان قاعد
هناء : وكانهو قاعد وانخلي باتي يحكي معاه يقوله يخاطاك اليومين هذينا ع الاقل نين اتردي صحتك
اميره تنهدت : خاطري نطلق
هناء فنصت فيها : ياحماره تبيها تاخده !! واتخربي حوشك تي والله امس في الليل يبكي بكاء قدام باتي
اميره : سمعتيهم شن قالو ؟
هناء هزت راسها بمعنى اها : يقوله نادم ونزوه وعدت ؛ شكلها لاعبه بعقله وجه المعيزه
اميره بحتت فيها : شن عرفك ؟
هناء : ماهو امي حكت معاه قاللها انا كنت نعرفها قبل مانخطب اميره بعدين انقطعنا فتره ولما عرفتني اجوزت خطرلها تبي اترد واترن عليا وادزلي في صور واتجيه في المكتب
اميره اضايقت : حتى هو غير يسلم داير تليفون من ورايا
هناء : توا غير تريحي يومين وروقي بعدها لازم تحكي معاه واتراجهو
اميره سكتت شويا وردت تحكي : عارفه ياهناء ضميري يأنب فيا
هناء اتحط في الدبش في الدولاب : كنك على شنو ؟
اميره : بنت جيرانكم غاليه كنت ظالمتها ومانحبهش وعرايك انا واحمد من ايام الخطبه عشانها
هناء ابتسمت : وانا شن كنت انقولك ؟؟ انقولك انتي ماتعرفيهش كويس صح ولا لا
اميره : مستحيل ننسى موقفها معايا امس اتحسيها بمروتها وصاحبة صاحبها
هناء : غاليه رغم الظروف الي عاشتهن بس بنت قدعه
اميره ابتسمت : في حاجه بينها وبين منجي ؟
هناء ضحكت : قصدك حتى انتي فاطنه ؟؟
اميره ضحكت : اصلا عيونهم فاضحاتهم اكيد الدنيا كلها فاطنه مش غير انا
___________________
4:30 م
غاليه قلبها يدق وادير في القهوه
صفاء مقعمزه احداها : يبي يحكي لماما اليوم ياريته سبق
غاليه عيونها يدمعن : نبي انقوله في الليل ماقدرتش
مروه : احسن خليه يدويلها وتقوله هي الي صار بلكي تنتهي القصه الي معش فضت
غاليه : ياناعليااا قلبي يبي يطلع من مكانه خايفه يابنات نبي انمووووت
صفاء : انتي عارفه ماما لها زمان خاطرها تنخطبي وتفرح بيك وجا مصطفى الحقير خرب اللقطه خصوصاً انها فقدت الامل من عيالها
سعاد تباوعتهن تلبس في طرحة الصلاة : منجي جا وتن القهوه
غاليه سكرت عيونها ودموعها نزلن لا ارادياً : ياربي قويني
_____________________
المنجي مصبي قدام الباب
سعاد فتحتله الباب
المنجي خش مالباب : السلام عليكم
سعاد ابتسمت : وعليكم السلام خش
المنجي يسلح في كندرته : شن جوكم
سعاد نهدت : والله قاعدين ماغاباك انت
المنجي ضحك : كنك تقول شايله هم الدنيا عمتي سعاد هونيها تهون
سعاد : ييييه يامنجي كان نحكيلك خش للصالون توا انهدرزلك
_______
اميره في حوشها مع هلها
نوريه : والله اول مابحتت في الشاشه وشفتها امينه قلبي انقبض
امينه : حي باهي الي مارنيت عليك في الليل راكي شن درتي
اميره تبكي
امينه حطت يدها على كراعها من فوق : خلاص سلم بنيتي توا ربي يعطيك وتحملي اخرى واتجيبي بدال العيل عشره
نوريه بحتت فيها : عادي ياماما حتى انا اول حمله ليا نزلت
امينه : اها اغلب الصبايا اتصير معاهن اول حمل يقعد مش ثابت
اميره اتبحت في امينه وتبكي
امينه اتبحت فيها و واجعتها
قربت منها و ضمتها : وراس بنيتي ماتقهري روحك
اميره اضبطتها وتبكي : واجعني خاطري ياعميمه
نوريه : مايوجعك خاطرك ياميرو سلم حمادي معاك وجنبك ديما ان شاء الله ربي يعطيكم كل خير
هناء ماسكه تليفونها واترن على غالية
وغاليه ماتردش تليفونها في الدار
___________________
المنجي يعيط : كيف تعطوها كيييييف عمتي سعاد انا جاي بالحلال
سعاد مقعمزه قدامه : كان على عيني ماياخدها غيرك بس هو سبقك يامنجي
مختار خش بالكروسه : السلام عليكم ايش في ؟
المنجي برم عليه : عمي مختار نا دخيلتك
مختار : صوتكم عالي كنكم
سعاد نزلت راسها ومتضايقه : على غاليه
مختار بحت فيه : كانك جيت مانعزها عليك يامنجي را عطيتها لك بدبشها الي عليها بس ولد سيدها سبق والدنيا نصيبات
المنجي يهز في راسه : ماتقهرونش فيها ايش الي ماداره ولد سيدها انديره انا حط شروطك وانا حاضر
مختار ابتسم : القصه مش قصة شروط وماديات انا راجل وتربطني كلمتي
المنجي راقيله : بس ياعمي لازم تاخد راي البنت
مختار : خديته وهي موافقه ومتريحه مع ولد سيدها
المنجي مصدوم : لا مستحيل
سعاد فنصت فيه
مختار : كيف مستحيل !!!
غاليه طلعت تجري مالمطبخ خشت دارها تندب واتخبط في وجهاا: وووووه علياااااا وووووه علييااااااا
صفاء تمسك في ايديها : ماديرش في روحك هكي
غاليه اتنط في نص الدار : يانااعليااا قهروووووني في عممممري قهروووووني في عممممري ياصفاء
مروه تبكي عند الباب
وفاتحة الباب تسمع فيهن شن يقولو : حي علمك ياغاليه بابا قاله البنت موافقه ومتريحه مع ولد سيدها
غاليه اتخبط في وجها : توا يحسابني نكذب عليه وفرحااانه حي علياااا وووووه ووووووه 😭😭😭
صفاء تمسك فيها : اسكتي بس خلينا نسمعو شن يقولو
مختار متضايق : خلاص ارضا يالنصيب وان شاء الله ربي يكتبلك الي فيه الخير
المنجي : انجيبلكم شيوخ قبايل انجيبلكم الي تبوها عمي مختار انجيبلك باتي توا هالوقت بس الله يستر بيتك ماتردني
مختار : حتى خويا عطيته كلمه ومانقدر نطلع معاه عيل وخلاص ان شاء الله ربي يعطيك بنت الحلال الي تستاهلك
المنجي صبا بلا مايزيد ولا كلمه وخانقته العبره وضاق عليه النفس
لبس كاويشه و فتح الباب وطلع
مشى لعند قدام حوشهم
ركب في سيارته وفتح سوريته
وحط راسه ع الدومان
اعصابه تعبن و برمت بيه الدنيا 💔
(( ياربي عاقبني في صحتي وعافيتي بس ماتعاقبنش في غاليتي ))
_______
غاليه تبكي في الدار ومعاها خواتها
سعاد فتحت الدار وخشت : خليك تستاهلي هذي الي ادس حاجه على امها كانك قايلتيلي راهو صبيت معاك
غاليه نزلت قمعزت ع الارض وتبكي : ياماما انحب على كرعيك يامامااااا ماتعطونش لغيره ماتقهرونش في عمري
سعاد فنصت فيها : صبببي باتك يسمع فيك عليك فناصه وقلة ادب
غاليه تبكي وحاطه ايديها على فمها : يامااامااا ماتكسروش قلبي ياماااماااا
سعاد : الحاجات الي قالي جابهن لكي اترديهن له
غاليه : خودوووووهن الحاجات بس ماتقهروونش ياماما حسي بيااا انا بنتك
سعاد : انا كاني عارفته فرخ ويلعب عليك را ماسكتت لكن المنجي غالي عليا وعارفته جاي مالباب ف لميهن بلا شوشره ورديهن له
مختار يدق في الكروسه دق على باب دار البنات وفتح
غاليه برمت وجها شور الساس ومسكت بكيتها
مختار : انتي يابت
غاليه خانقتها العبره : نعم يابابا
مختار : الله لا يسامحك كانك عصيتي كلامي و طلعتي عن طوعي
غاليه سكرت عيونها و عضت فمها وتبكي وماسكه بكيتها
مختار : ربي كاتبلك نصيبك مع ولد سيدك وانا عطيتك و الفاتحه والدفع بعد اسبوعين وفرحك بعد شهر يعني سكري فمك واسكتي
غاليه بصوت واطي : ياناااعلياا دمرتوو حياااتي نهيتوها بيديكم
مختار بحت في سعاد وطلع وسكر الباب
سعاد طلعت وراه
غاليه صبت تندب : وووووه علياااا قهرتي السووووده حي عليك ياغااااليه حي على كاينتي حياتس انتهت
صفاء ومروه يبكن ويبحتن فيها
_________________
المنجي خش للحوش وساكت
امينه نازله مالدروج بحتت فيه : كنه وجك شين
المنجي عيونه رقرقن و خش قمعز في المربوعه وساكت
امينه لحقاته : في من بس ؟؟؟ من هلكم ولا هلي
المنجي بصوت واطي وماحوتك مايدوي : غاليه
امينه انفجعت : كنها شن صارلها ؟؟
المنجي : باتها عطاها
امينه انصدمت : باهي نعرف قالتلي سعاد
المنجي دف الطاوله بكراعه وعيط : وكننننك ماتقووووولي
امينه مصدومه : وانت ايش مالك بيها غاليه ؟؟
المنجي يعيط : نحبها ونبيها والله ماهو واخدها غيري
امينه عيطت : طحححح سعدي عليك نسابات جايبهم لياا ابتاعين حبوس
المنجي : مش عمتي سعاد جارتك وكيف اختك على اساس ! ولا نفاق ؟
امينه فنصت فيه : احترم نفسك انا كانهي اختي من دمي ولحمي عيالها هكي ماناخد بنتها
المنجي صبا يكسر في الصالون : تي والله كان ياخدوها مني نقتل روحي
امينه اتفنص فيه : تقتل روحك على فرخه وشن ولت هي غاليه
المنجي يكسر ويعيط في الحوش
امينه اتعيط : مايطلع منها نص انصيص لاعبه بعقلك وانا انقول ايش الي قالبك
هناء مصبيه وساكته مصدومه
مشت تجري لبست عبايتها
امينه شافت هناء طالعه طلعت وراها : تعالي هنااا
هناء مشت تجري وماردتش عليها
امينة ردت للمنجي : عاجبك شهدت علينا الناس اميره بايته عندها امها الله لا يسامحك
المنجي مسك فازه ع الطاوله عزقها ع الارض كسرها
امينه شهقت : يانااااعليييي هذي من حياة امي رزيتني فيها ارزيني فيك
المنجي متعصب بكل وطلع
قمعز في السياره وماحوتك مايتنفس ....
غاليه مقعمزه ع الارض في دارها وتبكي : ياناعليااا قهرتك في عمرك ياغاليه
صفاء مقعمزه ع الكرسي : باهي صبي قعمزي في سريرك وابكي مش كويس ع الزليز
غاليه بحتت فيها : نرضي بابا ولا نرضي قلبي ؟؟ نااااار ياصفاء والعه فياااا
صفاء عيونها دمعن : حاسه بيك والله
مروه سمعت صوت الباب صبت : را يطلع منجي
وطلعت تفتح
غاليه سكتت واتباوع مالباب
هناء مصبيه قدام الباب وترجا
مروه فتحتلها وبحتت فيها : خشيلها في الدار
غاليه مصبيه وترجا بانت عليها هناء
اضبطتها وردت تبكي : ياناعليااا هنيوه كيف اندير
هناء تبكي معاها : عليك كاااينه الله يقهرهم في عمرهم
غاليه تبكي منهاره
هناء ماسكتها من ايديها واتقمعز فيها ع السرير : كيف يطعوك وانتي مش عارفه حتى عند ربي حرام
غاليه تبكي : كسرو قلبي ياهنيوه 💔 حي على منجي شن صاير فيه يااااربي صبره وصبرني ع البلوه السوده
هناء تمسح في دموعها : كسر الحوش ودار نهار سمعته يعيط لبست وجيتك
غاليه زادت تبكي : ياحبيييبي ووووه علياااا 😭😭
هناء تليفونها رن بحتت لقاته وسام
فتحت الخط
هناء صوتها مبحوح : الو
وسام سكت : شن العياط الي احداك عزاء من ؟؟
هناء تنهدت : هذي غاليه
وسام انصدم : ان شاء الله بوها ؟؟؟
هناء : لا فال الله ولا فالك ؛ هلها عطوها بلا مايقولولها
وسام : نعنجد هذ !! كيف جت وهي وين رأيها
هناء : تخلف بعيد عنك
وسام اضايق : نعنجداااا ! مانجا شن صاير فيه ؟
هناء : كسر مربوعتنا كلها ويعيط ويخبط سيبته وجيتها انا
وسام : لا حول ولا قوة الا بالله هياا سكري توا انرن عليه ..
____________________
#بعد_أسبوع 🌹
1:30 ص
المنجي متكي مع الشباب في المزرعه
وماسك طاسه في يده ويشرب 🍺
وسام دق عليهم الباب وخش جوا للحوش
فتحله علي
وسام بحت في منجي و انصدم
المنجي عاطي بظهره ويشرب
عمران مدله الشيشه : زيييد ياغالي برد على خاطرك
وسام كر منه الكبايه وبحت فيه : من امتى انت تشرب ؟؟
المنجي : خطاني ياراجل حل
وسام يخبط فيه على كتفه : انا جايبك انتعشو معاهم وانغيرو جو مش نلقاك تسمط فيها
اشرف سكران : خليييييه مالك وماله
وسام ماعدلش عليه : ويكر في المنجي
و يبحت في علي : صبيه معايا
علي جا ويرفع فيه من كتوفه
المنجي صبا : خلااص ازف صبيت بروحي
وسام يهزب فيه : وانا في السياره انقولك ماتستسلمش وتوا ربي يحلها من عنده هضا الي قدرت اديره دغري هكي طحت بثقلك
علي مصبي : يسمع فيهم وساكت
وسام يهزب : عابي عليك والله طلعت انسان ضعييييف
المنجي متضايق وطلع تليفونه يفتح فيه
و يعيط : هاااك شوف الرساله الي دزتها ليااا
وسام مسك منه التليفون
المنجي : عندي حق نسمطها ولا لا ؟؟؟
وسام يقرا في الرساله
(( حبيبي سامحني لاني ماطلعتش قد كلمتي معاك ؛ انا صح وعدتك اني انكمل معاك حياتي للنهايه بس القدر والنصيب كانن اقوى مني ومنك وانا ممكن اندير اي حاجه في حياتي لكن مستحيل نعصي بابا نبي منك اتسامحني و تكمل حياتك بلايا واتأقلم ع الوضع الجديد نعرف انها صعبه عليك كيف ماهي صعبه عليا وانا مازلت اصعب لان انفرض عليا شخص مانحبش ومانبش لكن الله غالب بس انت مازلت حر وتقدر تختار اي حد تكمل حياتك معاه . خليك عارف اني نحبك وحانقعد نحبك طول عمري وادعي ربي ياخذني قبل ماتنكتب عليا كلمة متزوجه لانها صعبه ونار ان شاء الله ماحد يذوقها خلي بالك من روحك عشان خاطري . #غاليتك ))
وسام قراها وتنهد
وبحت في المنجي شافه مقهور ومتحسر وقلبه مكسور من جوا
حط يده على كتفه : مزال ربي يقدر يقلب الدنيا في لحظه
المنجي بصوت واطي : تخلت عليا ياوسام
وخنقاته العبره ؛ كر منه التليفون و طلع وسيبه
وسام لحقه يجري لقاه مصبي وماسك التليفون يتصل ...
غالية حزينه وباين على وجها الحزن مرهقه وتاعبه
راقده في سريرها بالجنب وحاطه يدها على خدها وسارحه
(( زعما في شن يدير توا ؟
ليا اسبوع قافله التليفون واليوم كيف فتحته
ودزيتله رساله زي هذي شن ردة فعله هاتكون ))
تليفونها رن مسكت قلبها وسكرت عيونها
فتحت الخط ويادوب قادره تدوي
غالية : ألو ..
