رواية غاليتي الفصل الحادي عشر
ليا اسبوع قافله التليفون واليوم كيف فتحته
ودزيتله رساله زي هذي شن ردة فعله هاتكون ))
تليفونها رن مسكت قلبها وسكرت عيونها
فتحت الخط ويادوب قادره تدوي
غالية : ألو ..
المنجي يحكي وداهش : متريحه توا ؟
غاليه تحكي بشويا : ماتلومنش على شي درته ! كله مش بإرادتي
المنجي يعيط : انتي بعتيني
غاليه : معش تقول بعتيني انا مابعتكش
المنجي : بعتيني بالرخيص وسلمتي فيا وانا الي مش راجل لاني وثقت فيك
غاليه : بابا عطاني قلة السماح تبيني نعصيه عشان انحبك ؟ عمره ماكان الحب اهم من رضا الوالدين
المنجي ضحك بهزوه : هاهاها دكيها في هلك توا
غالية استغربت : انت كنه صوتك هكي ؟؟؟؟
المنجي سكت
غاليه انصدمت : ان شاء الله مش الي في بالي
المنجي يكح : مش شورك بيا
غاليه عيطت : معقوله خشيت ع الخط هضا ؟؟
المنجي يتنفس بصوت عالي : ليش درتي هكي
غاليه عيونها دمعن : وانت ليش درت هكي مش كنت اتهزا عالناس الي يشربو ويسكرو ؟؟
المنجي ساكت
غاليه : تبي تقعد زيهم ؟؟
المنجي يغير في الموضوع : انتي متأكده تبيني انخاطاك ومعش تبيني ؟؟ الكلام الي في الرساله قده انتي ؟
غاليه سكت وتبكي بدون مادير صوت
المنجي : ردي وكان قلتيلي خطاني انا والله ماعاد انجي شورك
غاليه تبكي ومتردده : اها
المنجي : شن اها ادوي قولي خطاني ومعش نبيك ومعش نحبك
غاليه تبكي : مانقدرش انقولك
المنجي : يعني تحبيني
غاليه : اها
المنجي يعيط : لييييش درتي فيا هككككي ! مش خذينا عهد مافش واحد يتخلى ع الاخر ؟؟ وين كلامك
غاليه تبكي : باهي اهدااا مش كويس علي صدرك شوف كيف دهشت
المنجي يعيط : تبي ولد سيدك ؟؟؟ بدلتيني بيه ؟؟؟ هذي اخترتهااا
غاليه ساكته
المنجي يعيط : رددددي علياااا
___________________
هناء تحكي مع وسام : باهي امتى مروح للحوش انا جو المزارع انريب منه عارفتهم يقعدو شرب وصبايا
وسام : تي اين صبايا يامسكينه
هناء اتأفأف : انا عارفه اصلا
وسام رقاله : تي انا جايب مانجا انغيرله في جوه شويا اتقوليلي صبايا
هناء سكتت : شن العياط الي احداك
وسام تنهد : هضا مانجا يعبر على مشاعره
هناء : كنه ؟؟
وسام : يكلم في المدام شكله
هناء اضايقت : ياحبيبي ياخويااا مقهور
وسام : مهما نحكيلك شن صاير فيه مش هاتخيلي بناء احلامه كلهن عليها و وخرت في نص الطريق
هناء : حتى هي مسكينه مش منها
وسام : تي فكيني وراس امك بوها قاللها كلمتين قالتله به وسيباته الي يحب عمره مايسلم فلي يحبه ويعاند عليه العالم
هناء تنهدت : باهي جيبه للحوش ماتخلش غادي
وسام بحت في المنجي وهو يعيط : احسن حل ان يروح يرقد ويهدا ؛ خلاص عطيني دقايق بس نطلع بيه
المنجي يعيط : موقفك معايا سلبي وهذي اخر حاجه توقعتها انا مستعد انعاند عليك الدنيا كلها ومانخافش مالخساره
وسام كر منه التليفون وسكر
المنجي بحت فيه وداهش : كنك حتى انت ؟
ومد يده يبي ياخد منه التليفون : هات الخرا
وسام سكر التليفون وحطه في جيبه : اطلع قدامي تعال
المنجي داهش وماردش عليه وقعد ويمشي وهو ساكت
وماحوتك ايتنفس
خانقته العبره بس يكابر 💔
مايبش يبكي ويحس روحه مكسور
مايبش حد يشفق عليه وماحد يشمت فيه ويقول دار عليها هكي وعاند امه وفي الاخر سيباته ..!
" تماسك ! لقد كُنت في وضعٍ أسوأ مرات عدة ، المسألة مسألة صمود."
__________________________
امينه في الصاله مع هناء : قالك جايبه للحوش ؟
هناء هزت راسها : جاي بيه في الطريق
امينه : المضحكه لعبت بعقله نص انصيص واهي اول واحد جاها واتي وافقت عليه
هناء اضايقت : اسمعي ياامي الظلم حرام شهاده لله مشيتلها يوم كان عندهم المنجي اطير للسقف وتنزل
امينه : هبّي هبّي عليهاااا حركات الفرخات نعرفهن كويس تاريته الساكت ناكت وانا الي نحسابها طيبه تاريتني انا الي طيبه
هناء : لا لنقانها مغصوبه ونحكي معاها اتقولي نار راكبه فيا غير باتي زرني
امينه اتشايرلها بيدها : فكيني فكيني 🖐🏼 حركات الخمسه بلدي
هناء اتأفأف وسكتت
سمعت الجرس رن
امينه بحتت فيها وصبت : اهم جو خشي خليني نفتحله قبل ماينوض بوك
المنجي مصبي قدام الباب وساكت
وسام مصبي احداه ويرن ع الجرس : امسك روحك واقنط مشيتك قدام هلك را يفطنو وتقعد ليلتك جميله بكل
المنجي ساكت
امينه فتحت الباب وبحتت في وسام : خيرات ياوسام كيف حالك
وسام سلم عليها : شنو حالك عميمه شن دايره
امينه : الحمدلله خشو
المنجي خش ويمشي و قريب يطيح
وسام يبحت فيه وفي امه
قرب منه وفنص فيه : اقنط مشيتك ياراجل
امينه فطنت وشمة بنته انصدمت : طيييييح سعدك ؛ طييييح سعدك خششاتك ع السكير
وسام بحت فيها : لا غير ضغطه هابط
امينه اتحرك في صبعها : لالالالا والله مادسو علياا انا نعرف وماني بنت صغيره
المنجي متضايق وساكت
خش مالباب ويركب ع الدروج
امينه تمشي وراه واتهزب فيه بصوت واطي : حي كان ينوضلك بوك ويلقاك هك والله ايتبرا منك يامضحكه تبي تسقد لحوش راجلها وانت تسكر وتبكي وتشلا عليها
وسام مصبي في الصاله : ياعميمه
امينه برمت بحتت فيه
وسام شايرلها بيده بمعنى تعالي
امينه جاته : نعم
وسام يحكي بصوت واطي : راعوه شويا الفتره هذي
امينه : هو الي دارها في روحه بروحه
وسام : قصدي هو باني احلامه كلهن عليها البنت هذي وفي لحظه كل شي انهد
امينه تعصبت : منك لله ياغاليه كلبتي ولدي وعميتيه ودمرتي حياته
وسام اضايق : توا الي صار صار ؛ وهكي ربي رايد بس انتو اوقفو معاه الفتره هذي لان المنجي مش كويس وحالته مش تمام
امينه تسمع فيه وساكته
المنجي ركب داره وسكر على روحه بالمفتاح
سلح دبشه وقعد بشورت وزقب ع السرير ورقد على طول لانه له ايام مايرقدش كويس وتاعب مالتفكير والتخميم في روحه وفي غاليه وفي حياتهم الي خربت 💔
________
11:30 ص
غالية راقده تليفونها يهز تحت المخده
طلعاته بسرعه تحسابه المنجي بحتت لقاته رقم غريب !
زعمك انرد !!
فتحت الخط وقعدت ساكته
سمعت صوت بنت : ألو
غالية : الو
-: غاليه صح ؟
غاليه : اها ؛ من ؟
:- انا اميره مرات احمد
غاليه قمعزت : اهلين كيف حالك
اميره : تمام الحمدلله انتي شن دايره
غاليه : ماشي حالي سامحيني انا مفروض انكلمك ونسأل عليك بعد الي صار بس ليا اسبوعين في حاله
اميره : عارفه والله وعشان هكي رنيت عليك حكتلي هناء انا كنت عند هلي ليا اسبوع وامس جا عمي روحني بالغصب للحوش
غاليه : انتي شعفتيه وعطيتيه درس خلاص توا ردي معاه عادي حرام
اميره : خليك مني انا ؛ قوليلي انتي شن دايره والله قلبي معاك
غاليه : ماعاد عندي ماندير ياميرو شوفة عينك حالتي
اميره : انا عمتي قالتلي انك سيبتيه وانخطبتي لواحد واتي ؛ بس ماصدقتش لعند حكتلي هناء
غاليه اضايقت : اكيد كارهتني هي طبعا
اميره : فوتي المهم منجي عارف انك غصباً عنك
غاليه : حتى هو يقولي انتي بعتيني
اميره : جربتي تحكي لخطيبك وتصارحيه ؟
غاليه استغربت : كيف نحكيله ؟ انا مانكلمش فيه اصلا شرطت عليهم ان مانكلمه لا يكلمني
اميره : جربي احكي معاه قوليله انك تبي واحد ويبيك وان هو خرب عليك
غاليه سكتت .... : مانقدرش انخاف
اميره : هلك عرفو ان منجي يبيك والي صار صار وهو كان فسختي خطبتك هايجي يخطبك وانتهت القصه
غاليه تسمع فيها وساكته اتفكر في كلامها
__________
المنجي في الشقه
جايب عمال يركبو في المطبخ
يسمع في صوت حد يكح عند الباب
برم بحت لقاه باته
المنجي : حاج
رجب يبحت في الشقه : ماشاءالله الله يبارك
المنجي ابتسم : شن رايك ؟
رجب : لا ماشاءالله حتى الديكورات الي في الساس والجو كله ميه ميه
المنجي ضحك : سلمك ياحويج
رجب بحت فيه : شن حالك ياباتي
المنجي يبحت في المطبخ : الحمدلله لقيت روحي قاعد قلت انكمل الشقه خير مانصرف الفلوس الي داسهن
رجب : نسأل فيك على حالك مانسألش ع الحوش
المنجي سكت
رجب : تبي تطلع من حالتك هذي خلي امك تخطبلك ونفرحو بيك سلم ولدي
المنجي هز راسه : لالا نبي انكمل شقتي وانعيش فيها بروحي خير مالهم هكي متريح
رجب : غير تقول بكرا بعد بكرا تجيب عويله تلقاهم لاقدام
المنجي ساكت
رجب : اليومين هذين تريح و رتب امورك وانا توا انخلي امك ادورلك
_________
3:00 م
امينه اتمد في التبسي لرجب : زيد رز
رجب ياكل : لا هكي تمام
هناء اتبحت في المنجي وتاكل
المنجي ساكت يحرك في الرز قدامه وخلاص
هناء اتأفأف
رجب بحت فيها : كنك ؟
هناء متضايقه : بصراحه مش طريقه انحرمت من شوفة غاليه مش متعودين نحنا ع الوضع هضا ياباتي
امينه اتبحت في المنجي وساكته
رجب ياكل في اللحم : وشن حرمك منها
هناء : بعد الي صار معش خلوها اتجي عندي
رجب : توا نمشي لمختار ندويله بعدين انخليها اترد اتجيك زي قبل واتبات اليوم عندك
امينه : مش عارفه عليش عاطيينها اكبر من حجمها خلاص هلها مايبوهش اتجي خليهم براحتهم
رجب بحت فيها : خلاص انتهى الكلام
المنجي صبا
رجب : وين ياباتي ؟
المنجي : الحمدلله
وخذا دخانه من المطبخ وطلع للجنان ....
_______
اميره في الحوش مقعمزه اتغدى
احمد فتح الباب وخش لقاها تاكل وماسك في يده كيس كبير
اميره بحتت في الكيس وردت تاكل
احمد ابتسم : السلام عليكم ؟
اميره : وعليكم السلام
احمد قمعز احداها ع الطاوله
اميره صبت
احمد مسكها من يدها : وين ماشيا
اميره بحتت فيه : انحطلك تاكل
احمد كرها : قعمزي شويا نبيك
اميره قعدت مصبيه وبرمت وجها
احمد مزال ماسك يدها : سادنا خلاص عاقبيني عيطي عليا هزبي بس ماتقعدش ساكته انا نادم وانا غلطت في حقك
اميره بحتت فيه وعيونها دمعن
احمد كرها احداه وقمعزها
قرب منها وباسها على راسها : انا اسف والله مانستاهلك
اميره قعدت تبكي : كنت انتوقع انك ادير اي حاجه في الدنيا بس انك اتخوني هذي ماتوقعتها
احمد يبحت فيها : انتي شاركتي فياا اتفشكي علياا و كل حاجه بجوك وهي لعبت بعقلي ادزلي في صور و مش هانقولك الكلام الي يصير واتجيني في المكتب شن اديرلي
اميره تبكي : وانت مع كل وارد عطشان ؟؟
احمد هز راسه : اكيد لا بس انا راجل مش هانحكيلك تفاصيل اتخش واتسكر المكتب وشن ادير
اميره غطت وجها بإيديها : خلاص معش تقهرني ماهو كنت تبي تاخذها
احمد : هبل انا ناخد وحده هكي !! كنك انتي
اميره تبكي
احمد : والله نزوه وعدت وماعاد اتعاود
ومد يده كر الكيس مده لها
اميره بحتت في الكيس وبحتت في احمد
احمد ابتسم وباس راسها : افتحيه هيا
اميره فتحاته وابتسمت : ورد 🌹 ...
وحطت يدها اخرى مسكت باكو فتحاته لقاته حديده وخاتمها ذهب
بحتت في احمد وضحكت ومزال عيونها جرتهن دموع
احمد ضحك : عجبك ؟
اميره تمسح في عيونها : واجد هكي
احمد قرب منها باسها : مش خساره فيك
اميره ابتسمت واتبحت في العلبه
احمد يحكي بصوت واطي : عارفه اثبتيلي انك بنت اصل لما ماحكيتش لهلك الموضوع وماخربتش صورتي قدامهم
_______________________
5:30 م
رجب مصبي عند باب المربوعه : كبر مقدارك عارفك مش هاتردني
مختار مقعمز ع الكروسه : يارجب راك صاحب حوش وهذي بنتك تخش تاخدها وتطلع مافي حد يدويلك
رجب ابتسم : عارفك والله ماتقصر
غاليه جت لابسه عبايتها : بابا انا ماشيا
مختار : عدي يابابا مربوحه
رجب بحت فيها وفتح الباب : هيا غاليه
غاليه متضايقه : والله كان خليتني خير ياعمو
رجب يسكر في الباب : خلاص اسكتي هضا حوشك وغادي حوشك
___
احمد برا في السياره يبيب واميره راكبه لاوره
احمد : مش معقوله ياامي هضا كله
اميره : عيب ارجاها اكيد اتكمل في لبسها
احمد برم بحت فيها : وين ماشيا هي ؟
اميره : حوش عمتك امباركه بات سلفتها توفى ماشيا اتعزي
احمد : واااااو بنة مرق في طاسه
اميره تضحك
امينه مصيبه في الجنان : راك اتقربجي اتنوضي خوك
هناء مصبيه وماسكه في الباب : باهي حاضر
امينه اتفتش في الشنطه : وراك اتوري قدام خوك انها قاعده نص انصيص اقعدي بيها في الدار
رجب فتح الباب الي برا وخش
بحت في امينه : هيا ولدك برا يرجا
غاليه خشت ابتسمت لأمينه : خير
امينه : كيف حالك ياغاليه مبروك عليك
غالية اضايقت : الحمدلله كويسه
امينه طالعه : هيا بالسلامه
هناء جت تجري اضبطتها : وحشتيني بكل
غاليه ابتسمت : حتى انتي
رجب : ماتبن شي من برا ؟
هناء : سلامتك ياباتي
رجب ماسك الباب : تبن شي وصن المنجي وهو طالع
هناء : باه
رجب سكر الباب وعدا
غاليه بحتت في هناء وقلبها يدق : هو قاعد ؟؟
هناء هزت راسها بمعنى اها : راقد فوق
غاليه : مع اني بحتت برا سيارته مش قاعده
هناء : امس كان في المزرعه وروح بيه وسام سيارته سيبها توا يجيبها وسام في الليل
غاليه قعمزت في الصاله : كلمني هو امس
هناء : شن قالك
غاليه : يعيط ويهزب قالي بعتيني وكلام من هكي
هناء صبت : تعالي للمطبخ انديرو نسكافيه واحكيلي بالتفصيل
_____________________
6:30 م
المنجي طالع مالحمام لابس توته سوده
وينشف في شعره
حط المنشف على حديد الدروج ونزل
يسمع في صوت في المطبخ
غاليه تشرب في النسكافيه : ف انا متلخبطه ماما اتقولي احكي معاه
هناء : حكيتي معاه ؟
غاليه هزت راسها بمعنى لالا : مستحيل
المنجي كح وخش للمطبخ ساكت
غاليه قلبها يدق وبحتت فيه
المنجي مايبحتش فيها بكل
ولع سخان الميه : هناء وين القهوه
هناء اتبحت فيه وفي غاليه : في الدولاب الثاني ؛ انصبي انديرلك
المنجي هز راسه بمعنى لالا : توا انديرها انا
غاليه عيونها تعبن دموع وهي اتبحت فيه
هناء قرصتها و قربت اتوشوش فيها : بطلي بكاء خلاص تقبلي الوضع
غاليه مسحت عيونها وسكتت
المنجي يحط في البكرج ع النار : رنت عليك ساره ؟؟
هناء : ساره بنت خالتي
المنجي : اها
هناء استغربت : وانت من امتى تحكي مع ساره
المنجي : عندي ع الفيس و لها يومين اتخش تحكي معايا
هناء بحتت في غاليه : اهااا
المنجي : جايا في الطريق بايته عندنا
غاليه انصدمت وبحتت في هناء
هناء : باهي انغيرو جو حتى لولي بايته باتي جابها بالغصب
المنجي : ترا وين حاطين السكر ؟
_____________________
8:00 م
المنجي مقعمز في داره
ويدخن ويسمع في #الصافي
((( لغيري رمآگ القسم وإنتي ليآ
مبروگ گآن عشتي معآه هـنيّه ")
يآالله إتهـنّه ..
وتزهـى معآه طول مآ إتمنىّ
گلآ أنظآري هـآلشقى رآمنّه ..
وديمآ إيتبآگن من سريب الغيّه ") 💔
إنتي طيري ..
وإنتي دواء عقلي وإنتي ليري
لگن حكم مولآي جيتي لِــ غيري
مگتوب من ربي موبيديآ ") 💔 )))
دق الباب
المنجي : ايوه
ساره فتحت الباب وتباوعاته : مفاجأه
المنجي ابتسم : اهلااا
ساره خشت سلمت عليه : شن جوك
المنجي : تمام والله انتي شن دايره
ساره مصبيه عند الدولاب : تمام قاعده حال الكساد ؛ ليش ماقلتلي ان غاليه عندكم
المنجي يحك في شعره : مش عارف والله ماشفتها مانعرفش انها قاعده
ساره : هناء قالتلي بايته
المنجي : باهي اتغيرن جو
ساره ضحكت : تي وين عالصافي قالب بيه الدنيا
المنجي ضحك : شن عرفك له الصافي !
ساره : نسمع فيه عند خوتي صوته مميز
__
غاليه وهناء في الصاله
غاليه اتبحت فوق : تسمعي في الضحك !!! مبسووط معاها
هناء : وتقوليلي تبي تروحي !!؟ عاجبك الوضع هضا ؟
غاليه فنصت فيها : نبي انروح اها يعني نقعد شن اندير ننقهر وخلاص
هناء : بالعكس ماتعطيهش راحتها .. ولا ندويلها
غاليه بحتت فيها : شن تدويلها
هناء : انقول قدامها انكم تبو بعضكم
غاليه هزت راسها بمعنى لالا : توا تشمت ويحلالها الجو
هناء : هانقوللها علي داره المنجي عشانك على اساس هو يبيكي بس مافش بينكم شي
غاليه : فكيني منها
هناء فنصت فيها : مش شورك انا هانقول
انفتح الباب وخشت امينه : السلام عليكم
غاليه وهناء : وعليكم السلام
امينه اتسكر في الباب : كنكن قاعدات هنا
هناء : كنا في المطبخ وطلعنا حموانين قعدنا قدام المكيف
امينه اتشاريلهن بيدها : صبن صبن شكلكن تبن تموتن
غاليه صبت واتسقم في دبشها
امينه : وين منجي
هناء : في داره معاه ساره
امينه : فيش ادير معاه ساره فوق
هناء : عديلها من اول ماجت وهي تدحنس عليه
امينه فنصت فيها : عيب عليك تحشمي راهي بنت خالتك
هناء ضحكت : والله هضا الحق بنت اختك دحناسه 😂
