رواية رغبة ملوثة الفصل العاشر بقلم دلال عماد
"سليل"
گـاعـدة الصـبح صافنة بالفراغ ودمعتي بعيني اليـوم يجـون ياخذوني ويجيبون بنتهـم اوووف ربـي شراح يسوي بيا هذا اوس مدري حسـام اكـيد راح ينتقـم منـي ماراح يعوفنـي بحالي والنوب ابـويا بعده زعـلان منـي، بين ما چنت تايهة بأفكاري اجا اسـامـة گعد يمي وگال
اسـامـة: شـبي الحـلوو ضايـج
سليل: اريـد اراضي بابا ومالي وجـه
اسـامـة: لتحچين هيـچ حبيبتي ابويا يحبچ ويخاف عليچ بس هوَ هسة زعلان منچ لان اذيتي وجرحتي من سويتي هاي السالفة
سليـل بدموع: والله اسـفة ماعيـدهها
اسـامـة: حبيبتي كـافـي تتاسفين المهم عرفتي غلطچ حتى بعد ماتكرريها، يا سليل يا گلبي احـنا مو على مود منحبچ سوينا هيچ بس يا حبيبتي احنا نعرف مصلحتچ ونعرف الدنيا شبيها وشمابيها وكذلك نعرف هذا الولد ماهاويچ وانما رايد يقشمرچ ويتسلى براسـچ وبعدين يعوفچ وانتِ تبقين تتعذبيـن، واحنـا مانريد يصير بيچ هيـچ الـي يحبـچ ويريدچ من صدك يجي من الباب ويطلب ايدچ على سنـة الله ورسـوله واحنـا اكيـد نوافق وماراح نوگف بوجهكم وبوجه سعادتكـم بس اذا چان الحب صادق مو كاذب يا عيني
سليل: انـي هسـة راح اتعاقب على الـي سويتـه وماراح يصيـر الشـي الـي انت تگـول عليي
اسـامـة: لا منـوو يگـول ماتعرفين ربـچ شكاتبلچ بالمسـتقبل وهـما سنتيـن وتنگضي ان شاء الله وترجعيلنا، ونـرجع مثـل قبل ان شاء الله
سليل بدمـوع: ان شاء الله حبيبي
اتقرب حضني وباس راسي وگال
اسـامـة: راح احاچي ابويا هسة ومن اصيحچ عود تعاي
سليـل بفرحة: مااشـي ماشـي
راح اسـامـة طب لغـرفة بابا وسـد البـاب عـزاا انـي جسـمي صـار يرجـف خـفت كـلش لا يتـعصب ويطلـع يضربني، گـعدت ادعي ان الله ماكو شي وان شاء الله بابا يرضى عليا ويقبل يصالحني، لان والله صـدك نـدمانة على گـد شـعر راسـي تقريـبًا مـرت نص ساعة وانـي متوترة واكل بأظافري شويه وسمعت اسـامـة صـاحني اتملكني الخـوف وجسمي صار يرجـف اكثـر گوة مشيت بخـطوات متثاقلة احس روحي رايحة لجـهنم برجليهه وصلت لبـاب الغـرفة واني اتمنـى المسـافة تطـول اكثـر مادري شلـون راح اخلي عيـني بعيـن ابـويا بعد الـي سويتهه وشـنو راح يكون موقفـي
فتحت باب الغرفة على كيف شفت اسامة وبابا گاعدين ع الچرباية اسامة شافني بس بابا چان داير وجهه باوعلي اسامة بنظرات يقصد بيها انو اطمأني ماكو شي نوعًا ما ارتاحيت واسامة گالي
اسامة: طبي سليل
سليل: طبيت للغرفة ورحت وگفت يم اسامة
اسامة: سليل تعاي بوسي راس ابويا واستسمحي منه على الي سويتي
اتقربت على بابا بست راسه وكمت ابچي واگول:
ساامحنيي بابا والله ماعرف شلون ضحك عليا وخلاني ارد علي، والله بحياتي مارادة على ولد اني هاي اول مرة واخر مرة وداعتك اسفة والله ماعيدها اسفة اخر مرة والله
حضني بابا وگعدني يمه وگـال
مروان: ادري والله ادري بحياتچ محاچية وي شخص لان اعرف تربيتي زين بسس شلوون هذا الكلبب ضحك عليچ وخلاچ تردين ماعررف، وشوفي تالي متالي شصار يا سليل يابنتي احنا من نمنعكم من هاي السوالف مو كرهًا بيكم ولا تعقيد، بس لان نعرف عقلية هيچ نوع من الناس ونعرف بشـنو يجروكم ويقشمرون عليكم وتالي متالي تصير مصيبة الهها اول مالها اخر مثل هاي المصيبة هسة، شوفي بابا اني تعرفين شغلي شلونه واشكااال مارة عليه اشكال مو واحد وثنين صرت اعرف هذا النوع من الناس وحافظهم ماكوو اهل مايخافون على بناتهم او اولادهم من هيچ شي لان ولد الحرام هوواي يا سليل هواي، هسة هاي العادات والتقاليد الي يحچون الكل عنها ومعاجبتهم موجودة عد اغلب الناس بالعاالم بس اكو ناس ماتعرف تستخدمها بطريقة صحيحة وماتعرف تعلمها لأولادها بطريقة سليمة وهنا الغلط لان بهيچ حـالة الأولاد راح يشوفون نفسهم هما الصح واهلهم معقدين ومتخلفين بكلشي، وماراح يميزون بين كلام اهلهم الصح والخطأ لان بنظرهم انو اي شي يحچونه اهلهم تعقيد وتخلف بينما اهلهم خايفين عليهم واني وياچ اكو بعض الأهل ماعدهم تفاهم كله ذبح ويخبصون بالحچي ويسوون أشياء تافها بأسم العادات والتقاليد وهما مايعرفون اصلًا شنو هي، مجرد كلام ويطبقو ويا بابا هاي العادات عند الناس الفاهمة ليش صارت؟ صارت حتى تمنع المشاكل وكثرة المعصية بيـن الناس يعني اذا بنية حچت وي ولد واخذتهم السوالف وبحجة حب وعشگ يضحك عليها ويقشمرها وياخذ الي يريده منـها والي هوَ شرفها وراها يذبها، وهذا الشي حررام يا بابا حرام وأهلها راح ينظرون وراح تبقى ماتتزوج طول العمر لان الناس ياخذون عنها غير نظرة او عندچ مثلًا ولد حچه وي بنية وحبها بس البنية طلعت موخوش تقشمر علي بحجة حب وتسوي مشاكل وتاخذ فلوس او اي شي تريده من عنده وتعوفه بكل بساطة، وهي هاي الناس الي ماتخاف الله ممشيه أمورها وسوالفها التعبانة بأسم الحب بس هذا مو حب لا، الي يحب من صدگ يجي من الباب مو من الشباك والحب لا عيب ولا حرام بس العيب والحرام الي يستخدمون الحب بالطريقة الغلط يعني يزنون ويسون كلشي حرام والله شنو حب، هذا ابد مو حب هذا يسمونه اشباع غريزة لا أكثر ومثل ماك
گتلچ الحب مو حرام لان الرسـول (صلى الله عليه وسلم ) حب امنا خديجة عليها السلام واخذها على سنة الله ورسوله وحاشاه الف مرة لا ضحك عليها ولا سوالها شي هوَ حبها بصدق وهيا حبته قبل ميحبها أصلًا ومن گلتله تريد تتزوجه اخذها والي يحب من صدگ يجي يخطب واذا حبهم كان صادق وماسوو شي يعصي رب العالمين ماراح يعوفهم وراح يجمعهم بالحلال بأذنه جل جلاله
فـ العادات والتقاليد يا بنتي منتشرة بين الناس من ايام اجداد اجدادنا حتى تمنع الحرام وتمنع المشاكل بس الأغلب جهلاء وميعرفون يستخدموها بالطريقة الصحيحة وعدهم ذبح بـ ذبح ماكو تفاهم مثل هسة هاي المشكلة الي صارت الچ وللبنيـة المسكينة الي مالها ذنب بشـي هاي كلها حرام واذية لان الي مالهم ذنب بشي يوگعون بيها، واني هسة مازعلان منچ لان انتِ مچنتي تعرفين الصح من الغلط بس هسة اني شرحتلچ وفهمتچ واتمنـى تسمعين كلامي وماتعيديها بعد واني من ضربتچ ضربتچ بحالة عصبية ومو بوعاتي لان ماگدر اتخيل انو واحد نذل يقشمرج ويضحك عليج ويسيء بحقچ وحق
اخلاقچ ويأذيچ
بابا يحچي واني دموعي ينزلون، ياربي احمدك واشكرك على هالنعمة الي انطيتني ياها شكرت ربي الف مرة بملبي على هالأهل الواعيين والفاهمين الي رازقني بيهم... ابتسمت وگتله
- ماعيدها بابا وداعتك ماعيدها اني غلطت وهاي راح اتعاقب على غلطي حتى لا اكررها
مروان: لا تتوقعين يا بابا اني فرحان لان راح انطيچ بيدي لا والله متعذب وكاسرة ظهري هالسالفة بس ما باليد حيلة اذا ماصار هيچ راح تكبر هواي، بس بنتي اكلچ ياها قبل ميجون اذا انتِ مرايدة تروحين كولي وماخليچ تروحين لو شما يصير...
سليل: لا بابا لا ماريدها تكبر اني موافقة اروح ولا تخاف عليا ماكو شي ان شاء الله رب العالمين موجود وياي وهوَ راح يحميني من كل شر
مروان بحزن: ان شاء الله
سليـل: بست بابا وگتله لا تخاف بنتك گدها ان شاء الله، وهسة راح اطلع ابدل لان شويه النوب حيجون
مروان بتنهيدة: ماشي
اسامة بقهر: روحي حبيبتي بدلي
سليل: ابتسمت الهم وردولي الابتسامة طلعت من يمهم واني فرحانة حيـل لان راضيت بابا، هسة اني كلش مرتاحة وارتاحت نفسيتي بس الي بقى مضوجني هي سالفة روحتـي، قاهرتني حيل بس شسوي خليتها على الله لان ماريد تصير مشاكل اكبر وابويا واخويه يصيرلهم شي بسببي لان وكتها ماراح اسامح نفسي أبدًا
***"
"الأنـبـار"
رقية"
اليـووم راح اروح هاهيـه، راح اعوف ولايتي واهلي لمدة سنتين بسبب مشكلة انـي مالي ذنـب بيـها اهلي كلهم ضايجين، بس ما اكثر مني احس روحي رايحة للموت برجليه راح اروح لناس ماعرفهم ماعرف أطباعهم عاداتهم تقاليدهم كلشي ماعرف عنهم بس مجبورة اروح لان ماريد تكبر المشكلة اكثر واكثر.
گاعدة اتريگ بين اهلي وهما يجيبون بالأكل ويخلون گدامي واني اكل عبالك راح اروح للصحـراء ماكو اكل هناك هههه كمـلت اكـل وگلتلهم ايمـت راح نـروح گالوو هسـة گلتلهم عجل رايحة ابـدل.
صعدت وطلعتلي فسـتان بنفسجي طويـل، جثـير حلوو وبسيط ومناسب لهيج شي وهم عجبـني رحت غسلت وجهي الي وارم من البجي ولبست شيلة بيضة وحذاء ابيـض وجنـطة بيضة وجنطتي الي حطيت بيها غراضي ونزلت بديت اودع اهلي رحت على امي حضنتها وابچي وهيا هم تبچي وخرت عنها وگلتلها لا تخافين يووم همـا سنتين وارجعلچ ان شاء الله واضل گاعدة على گلبچ
الحجية ببچي: سنتين جثـير يـا يمـا والله چثير
رقـية: يـوم كل ما تشتاگيلي بس خابريني واني اخليهم يجيبوني عليچ والله
الحجية: ان شاء الله يوم ان شاء الله، بس ديري بالچ على نفسـچ يا يما ما وصيچ
رقـية: ان شاء الله حبيبتي
خلصت من امي ورحت على مرت اخويا هم نفس الشي حضنتها وثنينا بچينا ورحت على امير حضنتو وبستو وگتلو
- بعد عمتك لا تسوي مشاكل اني چم يوم واجيك حتى نلعب سوى خووش
امير: اي عَـمة
رحت على اخواني واحد واحد حضنتهم وهما هم يحضنوني بچيت چثيير لان راح افارگهم، احبهم حيلل وماگدر على بعدهم وخصوصًا حسـام صح كل الي صار بسببـو بس هم احبوو ويبقى اخويا وصديقي وماگدر ازعل علي
بعد ماودعتهم باسو راسي وانطوني فلوس ترسولي الجنطة ترس تگول رايحة للسوگ
صار وكت روحتي طلعنا اني واخواني وامي طلعت ورانا تودعنا توني دصعد بس ماتحملت رجعت على امي حضنتها حييل وهي نفس الشي
فكرة انو راح ابتعد عنها كل هالمدة ماتفوت لعقلي ابد هوَ اني واگفة يمها ومشتاقتلها شلون لو اروح وخرت عن امي وبست راسهها وگتلها
رقـية: راجعتلج يوم لا تخافين
الحجية: ان شاء الله يوم ان شاء الله
صعدت بالسيارة ويا الشيخ بعد ماودعت امي، وحسام واحمد بالسيارة الثانية وعمي ابو معن ومعن يجون ورانا وانطلقنا...
چان الطريق طويل ومتعـب اني گلت لشهم راح انام ومن اوصل گعدني گالي اي، ارتچيت على الشباك واهجس راح اطگ من القهر بس الله كريم الحمدلله على كل حال غمضت عيوني ورحت بغيـر عـالـم
گعدت على صوت ضهم وهـوَ يگلي
شهم: رقـية حبيبتي گومي
رقـية بنعاس: هـا شنـوو
شهم: وصلنا بنتي
رقـية: وين؟
ثواني واتذكرت كلشي واستوعبت انـو اني وصلت لبيـت اهل البنية، البيت المجهول الي راح اعيش بي سنتين من حياتي فركت عيوني نزل شهم ونزلت وراه وعمي ومعن واخواني هم جو وراح احمد دگ بابهم... دحكت البيت مرتب ومبين علي چبـير ما شاء الله، الله يديموو لأصحابوو
ثواني وانفتـح الباب طلع ولد ضخم اني گـبل نـزلـت راسي مانتبهت على ملامحوو سمعت عمي يحجي ويا ويسلم علي وهوَ اتهلى بينا وگاللنا تفضـلوو فتنـا على البيـت وطلعلنا رجال چبيـر يمكن ابـو البنيـة رحب بعمي وأخوني وگالي
مروان: بنتي طبي منا ام اسامة موجودة طبي
رقـية: هزيت راسي وفتت ليـجوا امشـي ببطئ خايفة ومستحية ماعرف البيت وماعرف منين افوت ووين اروح مشيت شويه وفتت على المكان الي گالي عليه الرجال، شفتو مطبخ وگفت وجسمي يرجف ثواني وجتي مـره گالت
ايات: اهـلًا وسهـلًا بنتـي تعـاي تعـاي تفضلي
رقـية: رفعـت راسي شفتها چانت المره حلوه ومبين عليها حبابة بس چانو عيونها وارمات، اكيد من البچي على بنتها فتت مشيت ورا المرة وفتنا ع الصـالة چان اكـو بنتين گاعدات وهم عيونهم وارمات من البچي وحـدة چبيرة بس ما چثـير يطلع عمرها بـ 17 سنـة والثانية مبين عليها صغيرة رفعو رأسهم شافوني ضلوو ساكتات والمره كالتلي
ايات: اتفضلي بنتي اگعدي
رقـية: گعدت وگالتلي
ايات: شنو اسمچ
رقـية: اسمي رقية
ايات: عاشت الأسامي حبيبتي واني ام اسامة وهذول بناتي هاي سليل وهاي نـورا
رقـية: دحگت على سليل اريد اشوفها چانت بنية شگرة وحلوه حيل، بس شكلها تعبان حالها حالي ابتسمت بهدوء ورديت تسلمين خـالة ربي يحفظـهم الچ، ابتسمت الي سليل بحزن وكأنها تگلي اني السبب بالي انتِ بي، قطع صفنتي صوت الأم تگول
ايات: ويحفظچ حبيبتي
چانت تحچي ومبين عليها حيل مقهورة الله يعينها ان شاء الله ويعيني
شويه وسمعت صوت شاب اجا گال
اسامة: يـوم تعاي جيبي البنات حتى نعقد الشيخ اجا
ايات: اي حبيبي تعاي سليل ورقية تعالو بناتي
گمنا اني وهاي البنيـة سليل وگفنا يم الباب گالو اول شي راح يعقدولي اني وگفت وسألني الشيخ وانطيتو موافقتي، كل الي عرفتو انو الي صار زوجي
گمنا اني وهاي البنيـة سليل وگفنا يم الباب گالو اول شي راح يعقدولي اني وگفت وسألني الشيخ وانطيتو موافقتي، كل الي عرفتو انو الي صار زوجي اسمو اسامة بس هذا الي افتهمتو، اما سليل فقاصر لهذا ابوها چان وكيلها وعقدو هي وحسام
بـعـد ماخلصـو عقـد گالو راح يروحون دمعت عيوني وگلت لأم سليل
رقـية: خالة عفية خلي اودع اهلي
ايات: هسة احاچيهم يما اوگفي
راحت خالة ام سليل تحاچيهم شويه وصاحتني گالتلي تعاي، رحت ركض على عمي واخواني حضنتهم وبوستهم وهما هم حاضنيني ومقهورين حيل بس ما اكثر مني بـعـد ما ودعتهم وخرت عنهم شفت سليل هم نفسي تودع بأهلها وتبچي وهما حالتهم ما احسن من حالنا يارربي حسام شسويت بيا وبالبنية شسوييت ياخوويا دمرتني ودمرت بنية بعمر الورد...
راحو اهلي واخذو سليل وياهم واني چنت واگفة بالگراج وشفت اهل سليل كلهم يبچون والولد الضخم الي شفته طلع معصب وراح ماعرف وين لحظة اني تزوجت منو وكم اخ هي عدها؟ شويه وصاحني ابو سليل گالي
مروان: تعاي عمي تعاي طبي جوا نحچي وياچ
رقـية بتوتر: هاا اي جيتت
چنت خايفة وهوَ حس عليا وگلي لا تخافين بنتي ابد
رحت گعدت بالأستقبال واجو ابو سليل وام سليل ونـورا گعدو وگال ابوها
مروان: شلونچ بنتي ان شاء الله بخير
رقـية: اي عمي بخير الحمد لله
مروان: شنو اسمچ بابا
رقـية: رقية
مروان: عاشت الاسامي ابويه،
شوفي بنتي رقية انتِ من اليوم صرتي بنتنا حالچ حال سليل ونـورا فابد لا تخافين وتضوجين هـي ان شاء الله كلها سنتين وتعدي بسـرعة واحنا بمثابة اهلچ واني ابوچ شماتحتاجين تعاي عليا ابد ماريدچ تستحين مني ولا من ام اسامة الي هيا امچ وان شاء الله تعيشين يمنا مرتاحة مثل ما چنتي ببيت اهلچ، واكيد تداومين وتكملين دراسة واي شي تحتاجي لو تگولين لأسامة زوجچ لو تجين عليا خوش بنتي
هجست براحة من حچه وياي هيچي الحمدالله طلعوو خوش ناس ما مثل ما چنت متخيلتهم الف الحمد لله
يمايي بقى بس الولد الي عقد عليا هوَ هذا الي خايفة منوو ياربي دخيلك يطلع هم خوش ولد وحباب ومايسويلي شي ان شاء الله
گطعت صفنتي ورديت بأبتسامة شكرًا عمو ماتقصرون والله
هوَ هم ابتسملي وبهالأثنـاء گالتلي ام اسامة
ايات: بنتي اكيد انتِ تعبانة وجاية من طريق طويل خلي نـورا تاخذچ لغرفتـچ، نـورا گومي اخذي رقـية لغرفتها حتى ترتاح خطية
نـورا: ماشي تعاي رقـية
ابتسمت واتشكرت منهم ورحت ويا نورا توني انتبهت على بيتهم چثيـر حلو ومرتب واثاثهم نازك حيل وشي راقي ابد مو هوسة
وصلنا للغرفة ونورا گالتلي
نورا: هاي غرفتچ منا وجاي، طبي غسلي وارتاحي واذا تريدين هم اسبحي حمـام موجود داخل الغرفة
رقـية: تسلمين حبيبتي
نـورا: ولو حبي تدللين شتحتاجين گوليلي اني بهاي الغرفة الي يمچ خوش
رقـية: خوش
راحت نـورا واني فتت وفوتت جنطي على الغرفة جانت الغرفة حلوهه ولطيفة لونها وردي الله لوني المفضل نفس لون غرفتي الي بالأنبار سديت الباب وفتحت الجنطة وطلعتلي ملابس، ودخلت سبحت ع السريع وطلعت مادري ليش خايفة ومتوترة اهجس احد راح يفوت عليا يمكن لان بعدني ما متعودة اتمدتت على التخت وصحت
- اووف هسا ارتاحيت
اهجس نفسي چنت اشيل بلوك واصعدو ع السطح من گد التعب نمت وماحسيت على روحي...
****
"سليـل"
بدلت ملابسي وكملت لبست بنطرون اسود وتيشيرت ابيض وترانشوز ابيض رفعت شعري كعكة وشلت جنطتي واغراضي ونزلت شافوني اهلي...
امي ونورا گاموا يبچون نزلت دموعي ورحت حضنتهم وابچي اجا اسامة حضني وباس راسي وگلي
اسامة: ابد لاتخافين لو مهما يصير ابقى اني بظهرچ خليها ببالچ
ابتسمت وحضنته ورجعت رحت على بابا الي گاعد مدنك ويدخن جگاير حضنته حيل وبچيت وهوَ هم بچه كللش انقهرت من شفت بابا يبچي مسحت دموعه وگلت:
لا بابا لاتبچي ابد والله ماكو شي عليا ابد لتخاف
مروان وهوَ يمسح دموعه: ان شاء الله بابا ان شاء الله
كعدت احچي وياهم واقنعهم انو ماكو شي واحاول اضحكهم واطلعهم من جو الكآبة الي هما بي دقايق واندگ الباب عرفت اجو راحو اسامة وبابا فتحو الباب واني گعدت يم نورا طولو شوية وماما راحت تشوف شكو دقايق واجت جايبة بنية وياها چانت البنية حلوه ومبين عليها خايفة عرفت هي هاي اخت حسـام اجت گعدت وماما حاچتها شويه حتى تروح خوفها وتوترها حسيت بتأنيب الضمير حيل خصوصًا من شفت هاي البنية الي مالها ذنب هيچ حالها.
شويه وصاحونه حتى نعقد او بالأحرى حتى اروح لمشنقة اعدامي رحنا اول شي عقدو لأسامة ورقية ووراهم احنا
وگفت اودع بأهلي لان گالو راح نروح ودعت اهلي وحضنتهم وبچيت كللش لان راح اعوفهم كلش راح اشتاقلهم بس ما باليد حيلة وخطية رقية هم حالها اسوء من حالي وگعت بمشكلة هي مالها ذنب بيها وصارت الضحية بينا، الله يصبرها ويصبرني ان شاء الله
طلعت حتى اروح وياهم اجا ولد اخذ الأغراض باوعت شفته ولد يشبه حسام بس مو حسام اي حسام اعرفه واعرف شكله كلش زين يجوز هذا اخو اخذ الجنطة مني وكال... جيبي اختي اني اشيلها
گتله تسلم اخذها وطلعنا وطلعت وشفت الشخص الي چنت اتمنـى اموت وماشووفه ع الشي الي سواه بيا هه شفته واگف يم سيارته ولازم الجگارة ويدخن وعاگد حواجبه، اي هوَ هذا حسام اني متأكدة هوَ هذا مادري شصارلي من شفته جسمي كله صار يرجف وشعور غريب حاوطني ماعرف شنو اريد ولا اعرف شبيه اندار شافني صفن شويه ورجع دار راسه وصاح
حسام: يلا استعجلوو ورانا طريق
سليل: صعد بالسيارة والولد الي شايل جنطي صعد ويا وشاب چبير گالي
شهم: تعاي وياي خويه
سليل: ماشي
رحت ويا وصعدنا بالسيـارة وانطلقـنا بـأتجـاه الأنـبـار الطريق جان طويل واني اتمنـى انو ابقى بالطريق وما اوصـل للبيت واتمنى الطريق يطول بعد ولا اشوفه لحسـام مره ثانيـة لان ماضمن روحـي شسـوي
وراها بكم ساعة طبيـنا للأنـبـار چـانـت كلش حلوهه اول مره ازورهـا بحياتي بس ريتني مازرتهـا هيچ زيـارة تمنيـت لـو ويا اهلـي زرتهـا واتمتعت بجمالهـا لكـن القـدر رايـد غيـر شـي والحمدلله على كل حال
طـول الطـريق ساكتـين محـد حچه چنا بس انـي والـرجال الي صاعـدة ويـا بالسيـارة والباقي صاعدين
طـول الطـريق ساكتـين محـد حچه چنا بس انـي والـرجال الي صاعـدة ويـا بالسيـارة والباقي صاعدين بغيـر سيـارات
مـن بـعـد مادري كـم سـاعـة وگفـت السيـارات يم بيت واحنـا هم وگفنا، چان البـيت چبيـر وضخم كلش نزلنا من السيـارة وهمـا طبـوو للبيـت واني امشي على كيفي سمعت صوت ورايا يگول
- استعجلي لا تمشين بفهاووة
انداريت شفته حـسام مادري شيصير بيـا من اشوفه هيچ تجيني رجفة بگلبي وبطني عبالك بيها فراشات وتطير رجع گال
حسـام بعصبية: فووتي شبييچ صااافنة
فزيت من صاح بيا ورحت طبيت للبيت وهوَ طب ورايا مشيت بخطوات متثاقلة ماعرف وين اروح ومن وين اطب، البيت اول مره اطب بي
بهالأثنـاء نقذتني بنيـة طلعت من داخل البيت چانت متوسطة بالعمر گالتلي
اسـراء بأبتسامة: تعاي حبيبتي اتفضلي يا اهلًا وسهلًا
ابتسمت بخفه وطبيت وراها امشي گوة خايفة ماعرف ليش
چانت هي تمشي واني وراها البيت چان هواي چبيـر طبينا على صالة بيها مرة چبيرة بالعمر گاعدة على التخم شافتني اشرتلي بمعنى اروحلها والبنية الي وياي اندارت عليا وگالتي
اسـراء: تعاي حبيبتي سلمي على عمتچ ام زوجچ
سليل: هزيت براسي ورحت اتقربت منها وبست راسها وگتلها بتوتر... ممرحبا خالة
الحجية: يـا چثـير الـهـلاا بنتي تعاي هين يمي اگعدي تعاي
گعدت بهدوء يمها وگالتلي
الحجية: شنو اسمچ يا گمر
سليل بخجل: اسمـي سليل
الحجية: يما انـدار عليچ
سليل: خجلت من كلامها فـ اكتفيت بأبتسامة بسيطة رجعت گالتلي
الحجية: مثل ما گالتلچ سلفتچ اني عمتچ ام زوجچ وهاي سلفتچ اسراء تصير مرت ابني الوسطاني احمد وهذا ابنها امير، والي چنتي ويا بالسيارة هذا شهم ابني الچبير وشيخ العشيرة مالتهم، اما المصگوع حسام تعرفينو ما يحتاج اعرفچ علي
سليل: من ذكرت حسام كزبر جلدي ما ادري ليش، اكتفيت بالسكوت وهزيت براسي بمعنى اي رجعت گالت
الحجية بغصة: وبنيتي وحيدتي رقسة يم اهلچ اكيد شفتيها
دمعت عيني وحسيت بخجل من ذكرت رقية صرت ما اعرف شگول هي شافتني هيچ گبل غيرت الموضوع وگالت
الحجية: اسـراء تعاي اخـذي البنيـة لغـرفتها حتى ترتـاح
اسـراء: اي يمـا جـايـا
سليـل: اجت البنيـة واخذتني وصعـدنا فـوگ طبينا على الغرفة وگالتلي
اسـراء: هـاي هـي غرفتـچ حبي ارتاحي بيهـا اليـوم وعود من يجهز الأكـل نصعدلچ يـا هين
سليـل: تسلمين ماتقصرين راح اتعبچ وياي
اسـراء: لا ولـو تدللين ولا تستحين مني ابد، اني اختچ من هين ورايح
سليـل: حبيبتي تسلميلي اتشرف والله
اسـرا : حياتي الشرف الي، هسة ارتاحي عـود بعدين نسولف وتشوفين الأهل وتتعرفين عليهم زين
سليـل: ان شاء الله
طلعت البنيـة من الغرفة واني گعدت على الچرباية چانت البنية حبابة كلش وام حسـام هم ورده ربي يحفظهم وان شاء الله الكل يطلعون مثلهم
بدلت ملابـسي واتمددت ارتاحيت نوعًا ما من شفت تعاملهم حلوو وياي واستقبالهم حلوو وماحسسوني أبـدًا انو اني سبب بروحت بنتهم.
****
رقـية"
گعدت على صـوت البـاب ينـدگ گمت امشي وافرك بعيوني فتحت البـاب شـفت نـورا گالتلي
نـورا: هاي شنـوو اسفـة گعدتچ
رقـية: لا حبيبتي عادي هلا بيچ بأي وكت
نـورا: يعمري وبيـچ اكثـر جيت اصيحچ حتى تتعشين لان صار الأكل
رقـية بخجل: هاا ما جوعانة
نـورا بتسائل: شلون ماجوعانة وانتِ جاية من طريق طويل ونايمة ومن الصبح ولهسة مماكلة
رقـية: بصراحـة استـحي
نـورا: ها هههه، لا تستحين احنا منا وجاي اهلچ بس ميخالف لان بعدچ ممتعودة راح اگول لماما نجيب عشانا ونگعد اني وياچ نتعشا هـنا شتگولين؟
رقـية: اي والله ياريت هيچي على ما اتعود
نـورا: تدللين انتظريني دقايق
رقـية: ماشي گلبي
راحت نـورا واني رجعت گعـدت على التخت شويه واجت شايلة صينية بيـها دولمة ومقبلات وكباب وببسي
خلت الصينية بالگاع وگالتلي
نـورا: يلا تعاي هسة هم تستحين
رقـية: ههههه جاية
رحت گعدت وياها وبدينا ناكل سوى الصراحة الأكل چان چثيـر طيب ونـورا حيل حبابة وعفوية وتحب تسولف وتشاقة چثيـر حبيتها وحبيت سوالفها
خلصنا اكل وهي شالت الصحون گمت داساعدها ماخلتني گالتلي
نـورا: اگعدي اني اغسلهم لاحگة على الشغل لاحگة
رقـية: هههههه
طلعت نـورا واني نظفت المكان الي اكلنا بي ماحب اشوف هوسة اختنك منها كملت وگعدت على التخت
مرت دقايق واجت خالة ام اسامة عليا گالتلي
ايات: شلونچ بنتي ان شاء الله مرتاحة
رقـية: اي والله خالة شكرًا الكم
ايات: انتِ بنتي وماريد رسميات بيناتنا واذا تگدرين منا وجاي صيحيلي ماما او يوم الي يعجبچ
رقـية: ان شاء الله يوم تدللين
ايات: يما فدوهه رحت اگلچ بنتي
رقـية: گولي يوم
ايات: اسامة يريد يحچي ويتفاهم وياچ شويه
رقـية بخجل: ها ليش
ايات: يريد يتفاهم وياچ من هسة حتى تتفقون على حياتكم
رقـية بتوتر: اا ماشي
ايات: راح اطلع اني هسة وراح اصيحه يجي هنا خوش
رقـية: خوش
يمااي طلعت يوم حتى تصيح الولد يجيني اخخ يماا استحييي اول مرة راح احچي ويا ولد ماعرفو وفوگاها نگعد ثنينا سوى بغرفة وحدة ونحچي يمااي
بين ماگاعدة افكر واكل بأظافري من التوتر اندگ الباب
جتني الرجفة وخفت ماعرف ليش دگ مرة ثانية واني ساكتة وادعي بگلبي ان شاء الله يروح ان شاء الله
اندگ الباب اكثر عاد گلت عيب لازم ارد
رديت وگلت
رقـية بتوتر: اتفضل
انفتح الباب وفات الولد اني گـبل نزلت راسي استحيت حيل وهوَ اجا يمشي بأتجاهي واني بس اشوف رجلي تتقرب لي يمي جاب كرسي وگعد مقابيلي وگال
أسامة: احم السلام عليكم
رقـية بتوتر: وعليكم السلام
أسامة: شلونج رقية
رقـية: الحمدلله
اسامة: شوفي رقية راح اطب بالموضوع گـبل لان اعرفچ مستحية مني هسة، واني جاي احاجيچ اليوم واتفاهم وياچ على هاي السنتين الي راح تبقين بيها يمي بس ماريدچ تقاطعيني وتسمعيني للأخير
رقـية: اي
اسامة: يا بنت الناس انتِ تعرفين المشكلة الي صـارت والي بسببها انتِ هنـا، وراح تبقين يمي هاي السنتين معززة مكرمـة مثل ما چنتي ابيت اهلچ وابد لا تخافين اني ماراح اتقربلچ ابدًا بـدون رضـاتچ ولا راح اجبرچ على شي تعيشين هنـا
مثل ماتحبين وتكملين دراستچ هم ومن تكمل المـدة اذا حبيتي تبقين وياي ابقيچ على راسيي، واذا ردتي ترجعين على اهلج براحتچ اهم شي لاتخافين ولا تستحين ابد خوش
ارتاحيت لكلامو چثـير وحسيت الخوف والتوتر بدو يروحون الف الحمدلله يارب،
بين ما اني صافنة رجع گالي
اسامة: ها متفقين
رقـية بخجل: اي متففين
اسامة بأبتسامة: خوش يلا اخذي راحتچ اني طالع
رقـية: رديت الأبتسامة بخفه وهو طلع
ارتاحيت نفسيًا، اووف شگد چنت ضايجة وخايفة بس هسة ارتاحيت واطمأنيت على نفسي بس الضوجة الوحيدة الي باقيـة بيـا انو مشتاقة لأهلي ولبيـتنا، ان شاء الله تعدي هاي السنتين بسرعة وعلى خيـر يار ب.
رغبة ملوثة
"سليل"
بقلم: دَلال عِماد.
****
"سليل"
چنـت نايـمة وگعـدت مفزوزة على صـوت صيـاح جـوى، يا سـتار شكـوو گمـت بسـرعة وطلعت من الغرفة ركـض بـدون وعاتي بس اريـد اعرف شكـوو نزلت للطابق الأول وشفت بنية واگفة بنص البيت تبچي وتصيح چانت حلوه هواي ومحجبة، بس مبين عليها منهارة وتحچي
حنين: هاااييي تاليييتهاا حسـااام تخوووني وتتتزوج واحننا بعدنااا مخطوبيينن هااااا
حسام بقى ساكت وما رد عليها رجعت گالت بصوت أعلى...
حنين ببچي: ليييش بشنوو قصرررت وياااك ليييش
حسـام: حنين بس خلي افهمچ
حنين بصياح: لااتفهمنييي ولاشييي وانيي اگوول هذاا شبيي يطول بالخطوبة يطول بالخطوبة، اثااري حتى يلعب بكيفوو بسس هينن يا حسام هين، اني اصلًا بعدد ماريددك وهااي حلقتك اخذها وروح العب براحتك كللشي بيناتنـااا انتهـى
حسـام بحدة: حنين وگفي
حنين بعصبية: وخرر عننييي مارريد اشوف وجهك بعدد يا خاااين كللشي
بيناتنا انتهى
طلعت البنت تركض وتبچي وحسام طلع ركض وراها، بصراحة دمعت عيوني وانقهرت كلش عليها وعلى روحي يعني هاي تصير خطيبته خطية، لعد شكد حقير ونذل خاطب ويقشمر على بنات الناس، حسبي الله ونعم الوكيل علي الله يعينها ويعيني على ما ابتلانا... چان الكلام كلش سهل بس الفعل صعب وكلامي انو انساه واكرهه سهل بس من اجي احاول انساه واشوفه گدام عيني صعبة حيل صعبة، هي طلعت والكل طلعو وراها يحاولون يحچون وياها ويهدوها لكن چانت حيل عصبية وماتتفاهم وطلعت وعافتهم للحضـة حسـيت بـذنب، حسـيت انو بسببـي صـار كـل هـذا بس بعدين فـكرت انـو اني مالي ذنب اني ضحية حالي حالها لان اني مچنت اعرف بي خاطب، لو اعرف مستحيل ابقي بحسابي حتى
بهالأثـنـاء اجـا حسـام يمشي بسرعة عيونه حمرر وعصبي اتقـدم عليا اني من شفت هيچ خفـت وردت اطلع ركض بس چان اسرع مني، اتقرب جرني من ايدي وسحلني ووراه، اهله يصيحون علي وهوَ مامهتم يمشي بسرعة ويسحـل بيـا وصلنا لـغـرفة مادري المن ذبني بيـها وطـب وقفـل البـاب اجا اتقرب عليا ولازم فكي بقـوة وگـال وهو صاك على سنونه
حسـام بعصبية: ارتاحيتييي هـسة هـاا ارتاحييتي
سليـل بخوف: ووخرر عني شبييك اني شعلييه ما سويت شي
عصر فكي بقوة وگال
حسـام: انتِ شعلييچ مو؟ عـجللل موو بسببچ خطيبتـي عاافتنـيي يا حقيـررة
حيل ضجت من كلامه يحچي وكأنو ما مسوي شي استجمعت قوتي وكلت:
- والله يا استااذ هالشـيي صارر بسببك انت مو انيي
حسـام بحدة: بسبببييي شنووو حيوانة
سليل ببچي: انتت اليي ضحكت عليا وقشمرتني وماخليت قيمة واعتبـار لخطيبتك انتت اصلًا لو تحـبهها ماتسـووي هيـج وتخـونهها مع الف وحدة غيرها چان ع الأقل اكتفييت بيهااا
حسـام بصياح: هذذذذاا الشييي مااللچ علااقة بييي افتهمتتتي انيي اليي اقرر احب منووو او اخطببب منوو، وثااني شيي اذا انتِ هييچ شريفة شكوو تجاوبين واحدد ما تعرفيي
سليل بعصبية: شرررريفة وغصبًا عنك افتهمت لو لا ع الأقل ما بعتلك شرفي مثل بقية السافلات الي عندك
لزمني من شعري بأيده الثانيـة وگـال
حسـام: غصـباً عنن منوو يوللل ان ما راويتتچ نجـوم الظهر يا سليلل ما يطلع اسمـي حـساام
سليل: وخرر عنيي وخرر محد گللك اضحكك على بناات النااس اليي من ايدده الله يزيده
ماحس الا راشدي فر وجهي فر ورجع حچه بصوت عالي
حسـام: احچييي عدددل لا اكسررر راسسچ افتهمتييي لو لاا، انتِ لو ما عاجبچ ماتجاوبينن ولدد ماتعرفيننو ولاا عباالچ اذا خطيبتيي سوت هيچ يعني هاهيه عاافتني لاا اراضيها واتزوجها غصبًا عنچ وهسة تشوفين اذا ماكسرت خشمچ ما اطلع ابن ابوي
سليـل: وماتتزوج ميتة عليك اني والله يالله، ترى حالي من حالك انجبرت على هذا الزواج المعفن، وعلى فكرة محد بالدنيا يگدر يكسر خشمي افتهمت لو لا
حسـام بأستهزاء: هه ابد مميته ابد
سليـل: وخرر عنـي
هد شعري وفكي بقـوة وگـال
حسـام: رووحيي ولي لغرفتچ يلاا ماريد اشوف وجهچ
سليـل: هه على اساس اني ميتة على شوفت وجهك الخايس
گتله هيچ وركضت دافتح الباب بس چان اسرع مني ولزمني دفعني ع الحايط وگال
حسـام: هاااي اخرر مررة اسمعـچ تحچيين ويااي هيچ افتهمتتي لوو لاااا
سليـل: هزيت راسي بـ اي وهـوَ عافني فتحت الباب وطلعت بسـرعة لگيت اهلـه ومرت اخـو گالولي
- خوما سوالچ شي
سليـل: روحو اسألو
گتلهم هيچ ومشيت على غرفتي ع السريع طبيت لغرفتي وگعدت على الجرباية اتنفس سريع عبالك بغرفته مچان اكو نقطة اوكسجين الحقيير ايده توجع عبالك ايد مجرم خوب فكي احسه انكسـر
بس شو صار كل هذا وما بچيت معقولة اني عرمة؟
او عيوني نشفت من البچي اي اي اني مو عرمة هاي شكد ما بچيت عيوني نشفت وبعد ماتنزل دموع
ضحكت على تفكيري وشون گاعدة اواسي روحي بهالأثـنـاء انـدگ البـاب گمت فتحته وشفت اسـراء گالتلي
اسـراء: عادي افوت
سليـل: اي اتفضلي هلا بيچ
اسـراء: تسلمين حبيبتي اا شسمو خوما اذاچ حسـام؟
سليل: اي الله يكسر ايدو ان شاء الله
اسـراء بأسف: والله ماعرف شنـوو اكولچ بس اعذريني حبيبتي بعدچ بأول يـوم وسوى بيچ هيچ بس لا تخافين الشيخ واحمد راح يحچون ويا وان شاء الله تكون اخر مرة
سليل: هه ان شاء الله لان اذا عادها صدگيني راح اشتكي علي
اسراء: گولي يا الله حبيبتي
سليل: عوفينا من صخمان، احچيلي عن عاداتكم شوية حتى اعرف اتأقلم
اسـراء: يوو هاي ينرادلها گعدة تعاي تعاي
سليـل: ماشي
گعدت هي ورحت گعدت يمها وگتلها يـلا احچيلي... گالت
اسـراء: شـوفـي...
كعدت شرحتلي عن العائلة كلها وعن عاداتهم الي تختلف جذريًا عن عائلتنا، گلت بگلبي تقاليدهم صعبة ان شاء الله اگدر اتأقلم وياهم اني اهلي صح محافظين بس ذولة متشددين اكثر لان شيوخ وهيچ
ابتسمت وگلتلها
سليل: اهاا هـسا فهمـت
َ
اسـراء: اي وترى والله كلهم حبابين وگلبهم طيب حتى حسـام حيل گلبو طيب بس مشكلتو ابو نسوان، والله هوَ خوش ادمي بس لو ما هاي سالفتو الطايح حظها هالخايس
سليل: هههههه مدح ذم؟
اسـراء: هههه الأثنين
ضحكتني كلش كعدنا نسولف ونضحك سوالفها تخبل وهي حيل حبابة وعلى نياتها تحچي وتجفص ههه جـديات شكد چنت ضايجة من
اسـراء: هههه الأثنين
ضحكتني كلش كعدنا نسولف ونضحك سوالفها تخبل وهي حيل حبابة وعلى نياتها تحچي وتجفص ههه جـديات شكد چنت ضايجة من اجت روحت كل ضوجتي...
****
حسام"
بـعـد ما اجـت حـنيـن تبچـي وتتكـاون حـاولـت چثيـر احـاجيـها وافهمـها بـس مـا قبلت وطلعت رحت وراها بسـرعة بس مالحگت عليـها صعدت وي خالتها وراحت اتعصبت حيل وفتت جـوى وشفت سليل كدامي چن شفت شيطان گدامي اتعصبت حيل ورحت ركض جريتها ومشيت بيها لغرفتي اهلي يصيحون ورايا وهيا تبچي وتسحب بأيدها بس ماهتميتلهم وصلت الغرفة فتت وذبيتها بالكاع وقفلت البـاب ضليـت اصيـح عليها وارزلهـا وهـي ترادد عصبتني حيل وضربتها راشـدي وماسكتت لسانها طويل وتتطاول حـيل عرمة طلعت وچفصتلها بكلمة ورادت تفلت بس گضبتها ودفعتها على الحايط گلتلـها هاي اخر مرة اسمعج تحچين وياي بهيچ كلام هزت براسها ووخرت عنها وعفتها تطلع بين ما طلعت اجو شهم واحمد عليا استلموني
شهم: انتت تاالي ويااك هاا
حسـام ببرود: شكو
احـمد: بطلل هذا برودك وبعدين البنية بعدها أول يوم هين وانت هيچ تسوي بيها
حسـام: والله عاد مرتي وبكيفي
شهم: الله يسوود وجهك على هذا تفكيرك بويه انت مفتهم الزواج غلط يوولل عيب عليك استحي بعـد الـيوم جبناها
حسـام: وخطيبتي عافتني من وراها
احـمد: لا مو من وراها من ورى سوالفك انت اذا هيچ تحب خطيبتك شكو تدور بنات، غيرها ادبسز
شهم: لا تخليها براس البنية كل الي صار من جـوى راسـك انت، انت الي سويت كل هالمصايب
حسـام: لا اله الا الله
الشيخ: حسـاام جرر عددل احسن الك
حسـام: كافي عااد محد اله شغل بيـا
احـمد: لا النا شغل ونص احنا اخوانك اكبر منك وغصبًا عنـك تحترمنا
حسـام: الله كريم
شهم: حسام هاي اول مرة واخر مرة اشوفك جاي يم البنية ماالك شغل بيها افتهمت، ولا تنسى اختك هناك ما نعرف شي عنها كافي خلي رحمة بگلبك ترى شتسوي ببنت الناس جاي تطلع بهاي المگرودة رقية
حسـام: ان شاء الله هسة اريد انام ممكن
الشيخ: مايصير براسك خير لا والله
احـمد: ضل بعقلك هـذا ضل
حسـام: هسة اني شحاچي گلت اي
طلعوو هما ضايجين واني رحت تمددت حتى انام ودك جهازي رفعتو شفت مرتضى صديقي فتحت الخط وگلت
حسـام: الو
مرتضى: لكك هـاا عار
حسـام: ول ياهلاا شعجب متذكرني اليوم
مرتضى: والله گلت اشوفك ميت لو عايش
حسـام: وهسة شفتني يلا روح ولي دنطمر
مرتضى: طمرة بـلا گعـدة كون
حسـام: تعيش حبيبي يـوم الك
مـرتضى: ههههه دولي ولي
حسـام: هههه يول دولي عاد
مرتضى: وليت وليت إلى اللقاء
حسـام: هههه
سديت التلفون من عنـدو وخليت ايدي على عيوني حتى انام
هذا مرتضى صديقي واخوي وعضيدي
ومن زمان احنـا سويه وهـوَ مـن الديـوانيـة بـس عـايـش بالأنبـار صارلـوو خمس سنين، ومن جا للأنبـار سكن يـمنا وصار جيراني ومن ذاك الوكت اتعرفنا وبالصـدفة طلع يداوم ابغداد بس هوَ استخبارات اني جيش، وصرنا نروح ونجي على بغداد سويه وتعرفنا اكثر وصرنا مثل الأخوان، يجي لبيـتنا ويگعد ويانا عادي واحنا نروحلهم يعني صارت صداقة عائلية مو بس اني ويا واهلي هم يحبونو ويحترمو لان يعرفو خوش ولد ومؤدب واهلو هم يحبوني حيل خوش ناس وطيبين مابيهم عيب واحد ربي يحفظهم ويخليهم ان شاء الله.
****
"سليل"
صـارت الدنـيا ليـل تقريبًـا واسـراء گالتلي
اسـراء: راح اگـوم اسـوي العشـا تجين تگعـدين يمي لو تضلين بغرفتچ
سليـل: لا راح اجي يمچ شسـوي وحـدي
اسـراء: ديـلاا تعـاي
سليـل: جيـت
نزلنا اني وهي للمطـبخ وبـدت اسـراء تطبـخ وتسولف وياي واني گلتلها جيبي اسـوي زلاطة ماقبلت بس لحيت عليها گامت جابتلي الأغراض وگعدت اسوي زلاطة وهي تگلي النواشف بهالاثنـاء طبـت ام حسـام شافتني ابتسمت وگالت
الحجية: اليوم المطبخ منـور
سليل: ابتسمت بخجل وگلتلها منـور بأصحابه
اجت گعدت يمي وگالت
الحجية: يمـا اعذريني على الي سواه حسـام اليوم، بس ما عليچ فركتلچ اذنو فركة گطمتها گطم وبس يحاچيچ مرة ثانية تعاي گليلي
سليـل: هههه تسلمين
الحجية: يمـا ما چنـت اتخيل چنتي تطلع هيچي حلوه عجـل شجالـو هالحسيم راكضلي ورى الزرگات، طبعًا ماقصد على خطيبتو لا اقصد على الزرگات الي يعرفهم بالنوبايل مدري شسمو اما خطيبتو هم ماخيرها عليچ حبابة وتخبل
سليـل بخجل: ههههه اي صح شفتها حيل حلوى
اسـراء: هههه يا يمـا غير تگضبين ابنچ تشوفي يحچي ويا منو
الحجية: يول اني شعرفني بالنوبايلات مال هالوكت اني يا بنيتي چان الحجي الله يرحمو يجيبلي الصرصر ويخابرون عليا بي اشيلو واخلي كدام عيني حتى يفتح عبالي ع العين تفتح المخابرة كلشي ماعرف
سليل: هههههه
اسراء: ههه ها حجية منو يخابرچ
الحجية: يمدهورة منهو يخابرني صحباني قابل غير الحجي منهو يسأل عليا غيرو
سليل واسراء: هههههه
الحجية: اي المهم جبناها على طاري السقيعات الي عند ابني مسوودات وجه شحبيتن من هالمصگوع المهبول والله شنو حلو، حلو زين شايفاتو من يگعد من النوم خشمو بگصتو وفوگاها هو الضايج
سليل: هههه خلف الله عليچ خالة طلعت مسوودت وجه
حجية: ها شبيچ يولي گاعدة احچي على صاحباتوو الي مصاحبهم
سليل: لعد اني چان مخاويني يا خالة
اسـراء: هههههههههه استغفرالله
الحجية: هم صـح طلعتي انتِ هم سقيعة
سليـل: هاي الدنيا يا خالة بعد شنسوي
گلتلها هيچ وسمعت صوت شباب يضحكون انداريت شفت حسـام واخوانه واگفين يضحكون
عززا طبيت بنص هدومي
حسـام بضحك: شجاچ حجية نازلة حـدر على صاحباتي شمسوياتلچ
الحجية: انچب انت وصاحباتك، ابو النسـوان فوگ ما خاطب هم يركض ورى السقيعات
حشاچ يما سليل
گالت هيچ ومتنا ضحك عليها
سليل: عادي خالة اخذي راحتچ
شهم: حجية گولي يالله البنية اليوم جت
الحجية: چم مررة اعيـد واگول على صاحباتو على صاحباتو حشا سليل
احمـد بضحك: يابا سليل حشاچ حشاچ
الكل صار يضحك واني طبيتت بنص هدومي من الفشلة من گالي هيچ يبوو خرب يومچ سليل احس وجهي يطلع منو نار
الحجية: مااصار العشا يول اسـراء
اسـراء: اي يما اني كملت وانتِ سليل وين وصلتي
سليـل: هم كملت
اسـراء: خوش يلا خلي احظر
سليل: حظرنا الأكل وخالة ام حسـام گالت
الحجية: يلا تعالو اتعشـوو ترى اني جعـت
شهم: اي حجية جينا اكلي بالعافية على گلبچ
الحجية: الله يعافيك يا يمـا والله بس انت تبـرد گلبي مو مثل هالمصگوع ملتهي بصاحباتو ابو النسوان
حسـام: شنو اليوم ما ترحميني حجية
- هههههه
الحجية: وانتِ يمصگوعة ابنـچ وين
اسـراء: عشيتوو وگـاعـد على التـاب
الحجية: خوش
بدينا ناكل واني شوية خجلانة منهم وگـوة اكـل، خطية اسـراء والحجية يجيبون ويحطون گدامي
كملنا عشا والولد طلعو من المطبخ نوعًا ما ارتاحيت لان چنـت متقيـدة منهم واسـراء خلت الچـاي على النـار ووگفت تغسل مواعين واني يمها اساعدها لحد ما كملنا وهي ودت الچاي واني طلعت على الغرفة گعدت وشويه واندگ الباب صحت منو
اسـراء: اني اني
سليل: طبي حبيبتي
اسـراء: خوما ضوجتچ كل شوية جايا عليچ
سليل: لا والله بالعكس اني ضايجة تعاي تعاي
اسـراء: خوش جيت
اجت اسراء وبقينا نسولف ونضحك وتحچيلي عن عائلتهم وطبعهم واخذتنا السوالف لحد ماصارت الساعة 12 واجا عليها ابنها يريد ينام عاد هي اترخصت وگامت حتى تنام واني هم اتمددت ونمت گـبل لان چنت حيل نعسانة
****
رقـية"
گـعدت الصـبح على صـوت القـرأن اللـه صـباح يفتـح النفـس اتذكـرت امي يوميًا هم من تگـعد تشغل قـرأن لحـد مايأذن الظهـر
گمت على حيلي بـدلت وردت اروح اغـسل بـس استحـي اطلـع بـعـدين گـلت بيـني وبيـن نفسـي لي ايمت اضل استحـي انـي لازم اطلع اگعد
وياهم واتعود عليهم بعدين شيگضي السنتين واني حابسة روحي بهالغرفة، گمت فتحت البـاب وطلعت امشي على كـيفي دحگت هين وهين شفت حمام گلتت اييي واخـيرًا، رحـت ركـض فتت غسلت وجهي وايدي وطلعت نزلت جـوى وانـي ادور على المنقـذ نـورا او عمتي، وصلت للمطبـخ شفـت عمى واگفـة يم الطبـاخ وحدها گلتلها
رقـية بأبتسـامة: صـباح الخيـر
اندارت شافتني ابتسمت وگالت
ايات بابتسامة: يـا هـلا صـباح النـور تعاي تعاي حتى تتريگين
رقـية: اسـفة گعدت متأخرة بس تعبانة وماحسيت والله
ايات: يا متأخرة بنتي بـعـدها الـساعة بـ 9 وابـد لا تتأسفين انتِ هـنا على راحتچ حالچ حال نـورا بنتي شوكت ماتگعدين اگعدي، اني بناتي المسعدات للـ 1 مايگعدون
رقـية: هههه والله بصراحة مااعرف شنو اگول بسس انتِ حيل حبابة والله انـدار عليچ
ايات: هههه شنو اندار عليچ
رقـية: يعني فدوه اروحلچ
ايات: يا عمري انتِ اسم الله تعاي تريگي حبيبتي الريوگ جاهز
رقـية بأبتسامة: حـاضر
گعدنا نتريگ ونسولف هـي فـعلًا حـيل حبابة معتبرتني مثل بنتها وتحچي وياي بكل عفوية وابد ماتقصر مني
شويه واجت نـورا گعـدت ويانا اول ماكعدت هي
بس تنكت وتضحك على نكاتها واحنا نضحك على ضحكـها لان نكاتها ماتضحك أصلًا
كملنا ريوك گمت شلت الصحون ماقبلوو اشيلهم بس اني عاندت وگتلهم اني اشيل لان عيب اكل واشرب وع الحاظر خوما خدم يمي
خليتهم على السنك وبديت اغسل المواعين ونورا تساعدني بـعـد ما كملـنا غسـل رحت اساعدهم بتنظيـف البيـت طبعًا اني چنت مستغربة عدم وجـود ابو سليل واخوها الي تزوجني وماعرف اذا عدها اخوان بعد بس بعدين گلت عدهم داومات اكيـد لهـذا ما مـوجودين
كملنا كل شغـل البيـت ورحنـا گـعدنا شويـة بين ما عمتي خلت الأكـل ع النـار اجت نورا گعدت يمي سألتها
رقـية: نـورا انتو كم نفر بالبيت وكم اخ واخت
نـورا: احنا 5 بابا وماما واسامة وسليل واني يعني احنا بنتين وعدنا اخ واحد الي هوَ اسامة
رقـية: اهـا عجـل اشـو انتو وحدكم بالبـيت
نـورا: اي مو بابا لـواء بالجيش واليـوم الصبـح التحق مايجي الا بعد 20 يوم اقل او اكثر حسب شغله واسـامـة طالـب كليـة هنـدسـة ولان هـسا عطـلة فَـ هـوَ يشتغل ويـا عمـي بالصـيدلة
رقـية: ليش هـوَ صيدلاني وديكمل هندسة؟
نـورا: لا عمـي صيـدلاني فـ علمه ع الشغـل واخذه يشتغـل ويـا بالعطـل
رقـية: اهـا فهمت
نـورا: صـدگ انـتِ تداوميـن ويا كليـة؟
رقـية: اي، كليـة صيـدلة
نـورا: هـاا صـدك
رقـية: ايي
نـورا: اني كلش احـب الصيـدلة واتمنـى اكـون صيدلانية
رقـية: اي تكونـين ليـش مـا تكونـين بـس شـدي حيلچ بالدراسـة ولا تسختيـن وتصيريـن ان شاء الله
نـورا: اي ان شاء الله يارب
بهـالأثنـاء فاتت عمتي وگالت
ايات: هـا شدتسولفون
نـورا: تعاي ماما رقـية طلعت صيـدلانية
ايات: هـا صـدك
رقـية: اي
ايات: عفيـة والله خـوش مهنة عفيـة عليچ
رقـية بأبتسامة: الله يعافيچ
ايات: متخرجة لو بعدچ طالبـة
رقـية: لا والله بعدني طالبـة
ايات: اي عفية عفية شدي حيلچ حتى تصيرين احسن صيدلانية
رقـية: هههه ان شاء الله
ايات: نـورا ماما كومي سوي الزلاطة هسـة شوية ويجي اخـوج جوعان
نـورا: ماشي
رقـية: گامت نـورا تسـوي الزلاطة وبقينا اني وعمتي نسـولف شوية واندك البـاب گالت خالة
ايات: هذا اكيد اسامة اجا
رقـية: راحت نورا تفتح الباب واني گلت
اا عجـل راح اگوم اني على الغرفة
ايات: لا لا وين ليش تطلعين
رقـية: مو استحي
ايات: لا ماريدچ تستحين شيگضيها السنتين وانتِ بغرفتچ محبوسة، منا وجاي اريدچ تتعودين ومن اليوم تگعدين ويانا خوش
رقـية بتوتر: خخوش
ايات: يلا گومي هسة وياي حتى نصب الأكل
رقـية: يلا
گمنا اني وخالة وفتنا ع المطبخ حتى نحظر الأكل
وسمعت صوت واحد بالمطبخ يگول
اسامة: السلام عليكم
