رواية غاليتي الفصل الثاني عشر
هناء : عديلها من اول ماجت وهي تدحنس عليه
امينه فنصت فيها : عيب عليك تحشمي راهي بنت خالتك
هناء ضحكت : والله هضا الحق بنت اختك دحناسه 😂
______________
10:30 م
اميره خاشه للحوش تضحك : بطل سماطه را يشوفونا هلك
احمد ينغز فيها في اجنابها : ناعليا
اميره تضحك بصوت عالي : وراسي انا لا
احمد فنص فيها ويضحك : وطي صوتك
امينه طلعت من دار المقعد تضحك : ماشاءالله نجيهم ياربي
اميره تحشمت وجها انحمر : خير ياعميمه
احمد يسكر في الباب : شن جوكم
امينه : هكي نبيكم ديما تضحكو وتلعبو مالكم ومال المشاكل
اميره ابتسمت : ان شاء الله
امينه بحتت فيها : نبو عيل شدي حيلك شويا
اميره بحتت في احمد و تحشمت
احمد يبي يغير الموضوع : وين الحاج
امينه : في الدار خشله
اميره مصبيه ع الدروج : غاليه باتت ؟
امينه : اها حلفلها عمك 😒 و منجي خطرله مايتحرك مالحوش بكل اليوم
اميره ضحكه : الحب وعمايلو ياعميمه
امينه : حباته عفريته طيح سعده
اميره : حرام عليك ياعميمه والله كويسه
امينه : والنبي فكيني انا الي كويسه
اميره ضحكت : توا نركب انشوفهن
___________
غاليه راقده في سريرها ومعاها هناء
وساره متكية في سرير هناء
ساره : قصدك ماتكلمش فيه
غاليه هزت راسها : لالا مانبش
ساره بحتت في هناء : من جدها هذي ولا اطير في العين ؟
هناء ضحكت : نعنجد اطير في العين
غاليه ابتسمت
هناء تنهدت : ياحبيبي ياخويا
ساره : وكنه خوك
هناء : مقهور ياناري
غاليه فنصت فيها
ساره استغربت : قصدك احمد عشان اميره نزلت العيل ؟
هناء ضحكت : عقلك خضر قصدي منجي
غاليه قرصتها
ساره : عليش مقهور المنجي ؟
هناء بحتت في غاليه : علي غاليه
ساره انصدمت : كيف يعني
غاليه بحتت في هناء : تعرفي اتبطلي براده ولا لا
هناء تضحك : ساره مش برانيه خليها تعرف
غاليه فنصت فيها : هناء !!
ساره : شن في احكولي نوعيتي مانحكيش لحد
هناء في عقلها ( كان مانعرفك راني صدقتك ) 😏
غاليه ابتسمت : مافي شي هناء تسخف
هناء : لا في توا انقولك ياحنه المنجي كان يبي غاليه ولما انخطبت قريب مات و كسر المربوعه و ياما دار
ساره انصدمت و وجها انحمر : غريبه مع ان انا نحكي معاه ديما ومن زمان عمره ماقالي
غاليه تنرفزت : لا انتي تحكي معاه في اخر اسبوعين قبلها ماكنتش تحكي معاه
ساره ابتسمتلها : وانتي شن عرفك ولا كان في حاجه بينكم ؟؟؟
دق الباب
هناء : خش
اميره تباوعتهن : خييييير
هناء بحتت فيها : خشي ياحنه تعالي
اميره : اوووو ساره هنا ماحد قالي
ساره صبت اتسلم عليها : شن جوك شن دايره حمدلله على سلامتك
اميره ابتسمت : الله يسلمك
وبحتت في غاليه : خير ياطير
غاليه ضحكت : اهلاً
هناء بحتت في اميره : ياما فاتك من حاجات
اميره غمزت غاليه : في اخبار اتفرح ؟
غاليه هزت راسها بمعنى لالا
اميره : هبله لانك كان درتي الي قتلك عليه راكي متريحه توا
هناء: شنو الي قلتيلها عليه
غاليه ضحكت : مش شورك
اميره تضحك : خلي غاليه تحكيلك
ساره اتبحت فيهن وساكته
هناء : ميرو نبو ننزلو انحطو فيلم تنزلي معانا
اميره ضحكت : اليوم كيف قعد جونا تمام تبي راجلي يطلقني ؟
ساره ابتسمت : كنكم متعاركين ؟
اميره ضحكت : من بعد زلقتي ع الدروج وتنزيلة العيل وانا تعبانه وصحتي وممنوع عليا اي حاجه
هناء ضحكت : ياناري عليك جفاف
غاليه ضربتها : ياوقحه 😂
اميره ضحكت بصوت عالي : احمد فرحان قالي هرمنا وشالني عشاني برا
ساره عيطت : ايقوت فيك وتي روحك معناها 😂
هناء تنهدت : اسمله علينا
غاليه ضربتها بالمخده : تحشمي يافانص
احمد يضبح : اميره
اميره بحتت فيه من ورى الباب : هياا جايا دقيقه بس
هناء تضحك : هابا مش قادر يصبر
اميره بحتت فيهن وضحكت : خلاص انتلاقو بكرا
واتبوس فيهن في الهواء : امواه امواه 💋💋
هناء بحتت في ساره : اكيد هلي رقدو ننزلو انحطو فيلم ؟
غاليه : بس مش رعب !
ساره : لا رعب فكينا من جو الاطفال
غاليه غمت روحها بالمخده : مانحبهنش الرعب
هناء تضحك : صار ماصار عدي اضبطي منجي
غاليه فنصت فيها : ياحيوانه
هناء : انديرو شاهي وسبول وانحطو من التشيبس والحاجات الي جابتهن معاها ساره
ساره : خلاص وين الافلام
هناء : توا انجيب من منجي عنده عرم انا ماعندش
ساره صبت مالسرير : توا انا انجيبه منه
غاليه بحتت في هناء وشقلبت عيونها 🙄
ساره طلعت
غاليه بحتت في هناء : امشي وراها وراس هنيوه ماشيتله عقاب الليل شن تبي منه 😑
هناء : هذي تيسه 😒 معناها انزلي لقمي شاهي حمر و وتي السفره
غاليه صبت : هياا نازله بس هنيني عليها الدحناسه
هناء طلعت تجري : تم
________
منجي في داره فاتح الروشن وامصبي فيه ويدخن
ساره ادق ع الباب مايسمعش فيها
فتحت وخشت اتضبحله : منجي .. منججججي
منجي برم بحت فيها : اووي ! من امتى هنا انتي
ساره : امبدري شويا انضبحلك ماتردش
المنجي : هرجة الشارع مانسمعش فيك
ساره بحتت فيه وضحكت : كنك شكلك تقول داعشي مربي لحيتك وشعرك طاول
المنجي مسك لحيته : اهو جو
هناء خشت بحتت فيهم
ساره : كنك مانزلتي للمطبخ ؟
هناء : لولي نزلت
ساره : ماهو قلتي تبي اتوتي سفره
هناء : انا وياها واحد توا اتوتيها هي ماعليك فينا ياحنه 😏
وبحتت في منجي : مانجا نبو افلام رعب
المنجي : شن تبن فيهن الرعب ؟ غاليه تخاف را افطني
هناء بحتت في ساره واتسمت : لا تمام قالت عادي
لولي 😏
المنجي فطن لروحه ان زلق بالدوه صبا عند الباب : شوفنهن في الرف الي فوق وخودن الي تبه
هناء قربت من الرف وخدت مجموعة افلام : كلهن رعب ؟
المنجي : لا في رومانسيات واكشن انتي شوفي بروحك المهم رديهن بعدين
ساره قعمزت ع السرير : ترا عطيني منهن مجموعه انشوف
المنجي فتح الباب و نزل ...
ساره : اكيد ماشيلها
هناء اتشوف في الافلام : طايح بوجه بكل يموت فيها موت
ساره : اهااا وهي ؟
هناء : هي كان عاجبها بس مافش نصيب انخطبت
ساره : لا شكلها تبيه غير داستها عليك
هناء ضحكت : لا ادس عليا لا اندس عليها نحنا شوالاتنا عند بعضنا
_________
غاليه حطت الشاهي ع النار و مصبيه اتحط في زيت وملح في طنجرة السبول
مصبيه تفتح في الحكيه ماعرفتش : ووووه مبردهن الحكاكي الي هكي
المنجي خش للمطبخ لقاها قاعده
شافها ماسكه يدها ويدها حمره والحكيه قدامها
غاليه بحتت فيه وقلبها يدق
المنجي قرب منها خدا الحكيه حلها وحطها لها مكانها
غاليه بصوت واطي : شكراً
المنجي ماباش يرد
وخذا طاسة ويصب في اميه مالتلاجه ويشرب
غاليه بحتت فيه واضايقت نزلت راسها
هناء خشت : لوليتي لقينا هذينا الثلاثه شن رايك ؟
غاليه : اختارن انتن انا عادي اصلا مانحبش الرعب
ساره بحتت في المنجي : وانت تهرب !
المنجي : كيف نهرب ؟
ساره : المكان الي انجو فيه تهرب منه
المنجي ضحك : تعرفيها اغنية نمشي واعي ماني واعي ؟
ساره : نمشي واعي ماني واعي ؟؟
هناء بحتت في غاليه : شور الدار خفيفه كراعي ❤
غاليه بحتت في هناء وابتسمت
المنجي طلع وركب داره
هناء ضحكت : غاليه الاغنيه الي توا دوس لكي
ساره : شن معناها هي مافهمتهش
هناء : يعني بلا وعي يلقى في روحه يجي للمكان الي هي فيه
ساره ابتسمت وقلبت وجها ودارت روحها تلعب بالتليفون
هناء بحتت في غاليه وغمزتها : يابتاع مانجا
غاليه تضحك : تعرفي اتخاطيني ياهنيوه
هناء ادربك ع الدولاب وترقص : نمشي واعي ماني واعي .. واعي ماني واعي .. واعي ماني واعي ؛ شور الدار خفيفه كراعي 💃🏻💃🏻💃🏻👏🏼👏🏼👏🏼
____________
مختار يحكي لسعاد : وبنتك شن فيها كان كلماته هضا ولد سيدها مش براني
سعاد : هالبنت تبي تهبلني
مختار متعصب : والله مانتخيل نين يرن عليا خويا يقولي بنتك شن اتعد علينا ماتبي تحكي مع ولدي ولا مع البنات ماعاد عرفت مانرد عليه
سعاد : لا البنات مارنن علياا ؟ وغاليه ماعندهاش تليفون
مختار : لا قالي رنن على صفاء كل مره اترد اتقول غاليه مش قاعده وكل مره دايره سبله
سعاد : عليك حشمه تو ندويلها بكرا لما اتروح
مختار : والله بنت الكلب كان ماتربى وتنعدل توا نعرف كيف انربيها من اول وجديد ..
وقعد يكح
سعاد مدتله اميه : هاك اشرب وانت ديما حارق دمك
مختار : تربيتي ماثمرت في ولا واحد من عيالي تقول غضيب والدين المشكله باتي مات وهو يقولي الله يربحك
______________
1:30 ص
احمد في الصاله متكي ع الكنبه ويتفرج ع التلفزيون واميره طالعه مالحمام لافه منشف على شعرها
احمد بحت فيها : صحه صحه
اميره ابتسمت : سلمك ؛ تغطى ياميدو صقع عليك قدام المكيف لابس شورت
احمد : لا جو تمام حاس روحي مزال ساخن اصلا
اميره قعمزت احداه : واجعتني غاليه والله
احمد : عشان انخطبت ؟
اميره : اها والله انقهرت قلتلها تحكي لولد عمها
احمد قمعز : شن تحكي لولد سيدها كنك اتودري في البنت انتي اسيادها ماينقربو بكل
اميره بحتت فيه : باهي وخوك يقعد مقهور هكي ؟ انت شفت شكله كيف قعد وكيف مربي شعره
احمد ضحك : داير طرحة موكلي 😂
اميره تضحك : بطل نحكي جديات انا
احمد تنهد ورد رقد : الله غالب الدنيا نصيب ماعنده مايدير ؛ غير كان ريح روحه بلا تكسيرت الصالون امي توا اطلع حق تحف جدد مني نا 😂😂
اميره ضحكت : لا تاعاتها تاخدهن منه مش انت الي كسرتهن
احمد يضحك : وانتي عند الفلوس ماتعرفي حد ازح دغري نطيتي
____________
البنات ايتفرجن على فيلم
Paranormal activity 3
غاليه حطت المخده على وجها : ووووه عليااا شن الي كرها من شعرها
هناء تضحك : هذا توبي العفريته صاحب بنتهم الصغيره
غاليه مغطيه وجها : لا معش نقدر
ساره مركزه في التلفزيون وتاكل في سبول : تي اس خلينا نسمعو الصوت وانتي اتزوي تقول فار
غاليه : الصوت عالق في وذاني و البنات يطيرن في السقف شن هالفيلم هذا
هناء اتبحت في التلفزيون : افطنن للقطه هذ
غاليه تسمع في صوت برا
بحتت في الصاله
فطنت للمنجي نازل مالدروج ويحكي
في التليفون بصوت واطي
وطلع للجنان وسكر الباب
ساره : من الي طبق الباب
غاليه : ماحد انا قاعده مقابله ماشفت حد بلكي الصوت في التلفزيون
هناء ضحكت : هذا توبي شكله جانا
غاليه بحتت في هناء بلا مادير صوت : م ن ج ي
هناء بحتت فيها غاليه غمزتها
وطبست ع الطاوله اتصب في شاهي : ساره انصبلك
ساره هزت واسها بمعنى به : نص المق مش كله راك اتعبيه افطني
غاليه صبت
هناء بحتت فيها : وين ماشيا ؟
غاليه فنصت فيها : للحمام
ساره تضحك : تبي الحمام مالخوف
غاليه طبست ع الطاوله وخدت تليفونها
______
المنجي مقعمز في الجنان وحاط كرعيه فوق الطاوله
ويحكي في التليفون : المهم عرفته من يعني ؟
صلاح : عيب ياطير راني صلوحه عارفني انت
الباب انفتح المنجي بحت لقاها غاليه
: خلاص تم بكرا نجيك
صلاح : تم نرجاك بيناتنا الو يامانجا
المنجي يحكي ويبحت فيها : اوكي ياصلوحه منور حبيبي
صلاح : بوجودك ياغالي ؛ تشاو
المنجي سكر و طلع دخان مالقرطاس و ولعه
غاليه مصبيه اتبحت فيه : منجي
المنجي يبحت في الجيهة الاخرى : نعم
غاليه : كنك ماتبش حتى اتبحت فيا
المنجي ساكت وينفخ في الدخان
غاليه عيونها دمعن وقربت مالطاوله وحطت التليفون قدامه
المنجي بحت في التليفون وبحت فيها : شنو هضا ؟
غاليه تحكي وخانقتها العبره : تليفونك
المنجي بحت فيها : بدينا في الجو هضا مانش فروخ را افطني للجو الي اديري فيه
غاليه بحتت في الجيهة الاخرى : مانقدرش انخلي عندي حاجه منك ونحنا مش مع بعضنا حتى باقي الحاجات نبي نجيبهن لك غير انا معش شفتك و ..
المنجي قاطعها ومتعصب : كان مثقلات عليك خوديهن احرقيهن ولا عاطيهن لوجه الله انا مانبش انشوفهن وكان تجيبيهن مش هاتعرفي ردة فعلي كيف هاتكون
غاليه دموعها نزلن
المنجي برم وجه ويدخن : خودي الخرا من قدامي وخشي
غاليه قربت خذت التليفون
وجت تبي اتخش بعدها ردت : انت ليش اتعامل فيا هكي
المنجي بحت فيها : مزال عندك وجه تسألي بعد الي درتيه ؟
غاليه انصدمت : كنك اتحسس فيا اني درت هكي بإرادتي
المنجي متعصب : اولا وطي صوتك ليل ! وثانيا باتك قالي انك موافقه يعني عمي مختار يكذب ؟؟؟
غاليه تبكي وماتبش اتشوه صورة باتها قدامها : انا ماقلتش موافقه
المنجي فنص فيها : يعني باتك كذب عليا !!
غاليه : لالا بس هو حكالي بهزيبه وانا خفت انرد وانقوله مانبش
المنجي ضحك بإستهزاء : أحّا ! وتقوليلي مش موافقه والنبي عدي ربي يفتحلك ✋🏼
غاليه تبكي وماحوتك تحكي : مسامحني باهي ؟
المنجي صبا وخذا دخانه : ربي الي يسامح في الناس مش انا
وخش سيبها
غاليه قعمزت ع الكرسي وانهارت بكاء
ياربي انا شن دايره في حياتي ليش يصير معايا هكي !
__________
10:30 ص
المنجي يسخن في السياره ومصبي يمسح في القزاز
غاليه طلعت بحتت فيه : صباح الخير
المنجي ماباش يرد عليها ودار روحه ماشافهش
غاليه اضايقت ومشت بسرعه
المنجي برم يشوف وين ماشيا
انس جاي من بداية الشارع
شافه يبحت في غاليه
انس وقف عليه : تفضل ياشاب
المنجي بحت فيه : خير ان شاء الله ؟
انس بحت فيه زين وضحك : منجي ولا لا ؟
المنجي بحت فيه ومستغرب : ان شاء الله ! من ؟
انس اضبطه : معقوله ماعرفتنش
المنجي : بسلامتك
انس : انس !! ولد مختار
المنجي سلم عليه : ماشاءالله والله ماعرفتك
انس : امتى جيت ؟
المنجي ضحك : ليا شهور قاعد انت الي مش قاعد بكل
انس ابتسم : والله قاعدين حواته وطياح في الشاليهات
منجي : حتى هو راي
انس : تعال شي يوم كسد
المنجي : خلاص ان شاء الله توا انجيك
انس يبي يمشي : تم ياغالي عليا
المنجي ضبحله وطلع تليفونه : ياانوس
انس برم عليه : ايوه
المنجي : كذا عطيني رقمك بالله
____________________
غاليه في المطبخ : لا عادي
سعاد بحتت فيها : ماشفتش منجي ؟
غاليه : توا كيف شفته وانا طالعه في الصبح
سعاد : ماحكش معاك شي ؟
غاليه : قلتله صباح الخير ماردش
سعاد بحتت فيها وساكته
غالية : امي امينه متغيره مش عارفه كنها
سعاد هزت راسها : لا تهيالك هي قالتلي ان منجي قاللها اخطبيها ليا قالتله كيف نخطب البنت وهي انخطبت
غاليه : لا قالت لأميره اني انخطبت وسيبته
سعاد : توا يعني اميره تبس اتغيرك على امك امينه هذي اخرتها
غاليه سكتت
سعاد بحتت فيها : رديتيله الحاجات؟
غاليه هزت راسها بمعنى لالا : دزيتله مع هناء يومتها قاللها كان ضايقنها خليها تعزقهن
انس خش للمطبخ : اوووي
سعاد بحتت فيه : روحت انت امس ؟
انس : لالا بتت برا جيت توا ناخد دبش وطالع
سعاد : وانتو مافيكم فايده
انس يفتح في التلاجه : شفت المنجي برا متغير بكل ماحوتني عرفته
سعاد : وهو عرفك ؟
انس : لا والله ماجابنش بكل
سعاد ضحكت : هو مشا وسيبك في الابتدائي وانت شكلك تغير اكيد مش هايعرفك
انس : باهي وين شورت البحر الاخضر
سعاد : كان في دولاب الساس
انس بحت في غاليه : طلعيه ليا صبي
____________
3:30 م
مختار سكر الخط : اوكي اوكي
و مشى بالكروسه يعيط : ياسعااااد ياسعاااد
سعاد جت تجري عند الباب : شن في
مختار : ولدك ولد الكلب ضارب عادل ولد سيده بالسياره
سعاد شهقت : طييييح سعده المرزي عليك عمله سوده هذوما نساباتنا توا
مختار داهش ويكح : والي شافوه قالو تعارك معاه وضربه بالعاني
سعاد اتخبط في ايدها : وشن صار فيه عادل
مختار : قالو في العنايه
سعاد : والمرزي وين ؟
مختار : وقفوه ؛ نبو حد يشيلنا
سعاد تبرم في الحوش واتعيط : عليك كااااينه مش عارفه من داعي عليناا استغفر الله ..
وطلع التليفون ادور في حد يشيلهم
مختار : حسبي الله ونعم الوكيل ؛ حسبي الله ونعم الوكيل
غاليه طلعت تجري مالدار : شن في
صفاء مصبيه فم المطبخ تسمع : كنه عادل ؟
سعاد : خالد تعارك معاه و ضربه بالسياره
غاليه حطت يدها على قلبها : وشن صار فيه ؟
سعاد متضايقه : في العنايه و توا نبو حد يشيلنا والمرزي الاخر انس قافل نقاله
_________
4:30 م
منجي في شقته حاط فراش ومتكي ع الارض
وقاعد بروحه في هدوء و فاتح الروشن يسمع في هرجة الشارع
شقته قعدت الملجأ الوحيد له لما يضايق ولا يحب يقعد بروحه يمشي يقعد فيها
(( آحٍبْبْتٌگ جٍدِآ.. .. لُگنْ آلُحٍيَآةّ لُم تٌحٍبْنْآ معآ )) 💔
سكر عيونه وتنهد
تليفونه رن لقاه رجب
المنجي فتح الخط : ايوه
رجب يسوق في السياره واحداه مختار : وينك ؟
المنجي : في الشقه
رجب : باهي لم روحك وتعالي في الجلاء
المنجي قمعز في الفراش : شن في ان شاء الله خير ؟
رجب : خير غير تعال وتوا تعرف ماشي انا وعمك مختار لما اطق فينا رن عليا وانت برا
المنجي صبا ويلم في دخانه و حاجته : اوكي اني طالع توا
_____________
امينه عند سعاد : توا عليش تبكي ان شاء الله مايصيرله سو
سعاد تبكي : هذوما مش عيت سيده هذوما نساباتنا توا الوضع غير
امينه بحتت في صفاء : صبي جيبي اميه لأمك
هناء بحتت في غاليه : هضا خو المنحوس ؟
غاليه هزت راسها بمعنى اها
امينه بحتت في غاليه : انتي كلمي خطيبك سبقي قوليله عليك كاينه باتي تبرا منه وديري روحك متعاطفه معاه
غاليه اضايقت : لالا مانكلمش لا يكلمني
امينه استغربت : كنك اسم الله
سعاد تعصبت ......
