رواية وجه محروق الفصل الحادي عشر بقلم جمانه السعيدي
اصيل... ابو منار اتصل عليه وكال جيب
عمك وتعال نتفاهم على التفاصيل احنا موافقين ننطيك منار
مااكدر اوصفلكم حالتي بعمري ماحسيت احساس السعاده مثل ماحسيت واني اسمع هلكلمتين من ابوها
ودي اكمز ودي اصيح ودي اطلع بلشارع اركض
بعد كل هذا الوقت واني عايش وحدي اخيرا راح يكون عندي زوجه بلبيت
البيت راح يصير بي حس راح ادخل وتستقبلني
بيتي راح تصير بي زوجه واطفال
الحمد لله والشكر راح تصير عندي عائله
بليل رحت على عمي
اصيل....شلونك عمي
عمي...هله بااصيل شلونك اليوم شعجب مبين علينا
اصيل...جايك بشغله مهمه بلنسبه اليه
عمي ...يالله شنو هاي الشغله
اصيل...اني لكيت بت الحلال اريد ازوج
عمي...اي بيها الخير
اصيل...اني حجيت وياا ابوها واليوم اتصل عليه
علمود نروح نتفق على التفاصيل
عمي...اي بيها الخير الصدك انت لازم تزوج
لان كبرت مو زغير وعايش وحدك الله يعينك على الوحده شلون مخلص النهار وحدك مااعرف
اصيل...تجي وياي هسه نروح عليهم
عمي.. اي ماعندي مانع يله
اصيل...رحنا اني وعمي كعدنا بيتهم
ابو منار كان طاير بينا
اتفقنا على المهر وباقي التفاصيل
اني طبعا اي شي يكول علي ابو منار اوافق
لان اني فعلا حبيت هاي البنيه وتعلقت بيها
اتفقنا المهر بعد عرس عبدلله اخوها من بعدها اجهز نفسي للعرس
شكد جنت مرتاح نفسيا
معقوله هاي الحلوه وافقت عليه اني راح ازوج وتكون عندي عائله الحمد لله والشكر
من ثاني يوم بديت انجر بغرفتي غرفتي لازم تكون مختلفه اريد منار تتعجب بيها
طلعت ولد صباغ صبغ البيت كله حتى البيبان صبغتهن
اشتريت بردات جدد
اشتريت طباخ جديد وكاونتر سكمت جديد
جمانه السعيدي
اجا يوم عرس عبدلله وكنت اني اول الحاضرين بلعرس
بصفتي النسيب الجديد
اشتغل وياهم عبالك اهلي
بس ابد ما شفت منار حتى بلزفه ما طلعت
رغم اني كنت واكف بلباب شكد طلعت من بيتهم نسوان
وهي ماطلعت
كمل العرس زفينا العريس رجعت البيتي
بقيت منتظر ابو منار يحدد يوم المهر حتى اكمل شغلي
هم منار تشتري الذهب والمكياج والملابس
بعد زواج عبدلله بعشر ايام اتصل عليه ابو منار وكال بعد يومين المهر حضر المشيه
رحت بليل البيتهم اخذت فلوس المهر حتى منار تشتري الذهب وجهز نفسها للمهر
وصلت البيتهم بس عمي طلع عليه
سلمته الفلوس ورجعت
اصيل.. .اتصلت على عمي ابو حسن وعزمت كم واحد من الجواربن
الناس الخيره تروح وياي للمهر
طلعنا العصر السيارات سدت الشارع
وصلنا لكيناهم ينتظرونا كعدنا والشيخ بدا يحجي
بتفاصيل الزواح بعدين دخل الشيخ جوه عقد المنار
وطلع عقدلي
دخلني عبدلله جوه الغرفه مليانه نسوان
كنت محرج بشكل مو معقول كمت اصب عرك من كد الاحراج
منار كانت لابسه بدله ماروني وشعرها حلوه
عطرها يخبل بس شكلها كلش حزين بحيث ابد ما رفعت راسها ولا باوعت بوجهي
اصيل...مبروك
ماردت عليه توقعت ما سمعتني من الهوسه او محرجه مني
اني هم ماعندي خبره بهاي التفاصيل
وهلكد ما محرج اريد بس اطلع من الغرفه
الكل عينهم عليه
لبستها الحلقه والمحبس وبعد ماكدرت اكمل
انطيت التراجي الامها هنا والكلاده لبستها
كعدت شويه بعدين طلعت
جمانه السعيدي
اكثر شي كان زاعجني بهذا الموقف
ماعندي اهل يفرحولي ماعندي ام توكف وياي
ولا عندي احد من اهلي يفرحلي صعب واحد يكون بهيج موقف وحيد
حلو اهلك يشاركون فرحتك وهاي كانت أول فرحه بحياتي
المهم كعدت خمس دقايق وطلعت
كتلكم اني محرج وماعندي خبره
جمانه السعيدي
رجعت للبيت واني كلي حماس اخلص تجهيزات
العرس واكمل ترتيب بيتي
حتى اخذ منار لان ابوها كال بس تخلص تعال اخذها
كمت اشتغل ليل نهار اريد اكمل كلشي
اتصدكون لمياء حتى ما كلفت نفسها تجي تباركلي
لا هي ولا خواتي
واني اجهز بلبيت مرتين سمعتها تتصل تسئل على امير
الضاهر ما يجي للبيت ولا يسئل عنها
حتى ما يتصل عليها لان مبينه خايفه علي اخباره انكطعت
اني مالي شغل بيهم اريد اكمل شغلي وازوج
رحت مرتين البيت منار ماتجي تكعد وياي
ابوها واخوها يكعدون يمي
بلمره الأولى جبتلها تليفون
وسجلت رقمي بي انطيته العبدلله حتى يوصله الها
من شاف التليفون كام يضحك ويااشرلي تريدها تخابرك
ااشرتله اي
بس ما اتصلت عليه
والمره الثانيه كنت رايح اريدها تجي تشوف اذا ذوقي
بلفراش والبردات والغرفه يعجبها
بس ابوها ماقبل كال ماعدنا بنات تروح البيت العريس
قبل العرس
اني احترمت رائيه وعجبني موقفه
من بعدها شديت حيلي حتى اكمل كلشي
بعد مارحت البيتهم
المن رايح اذا هي ما تطلع عليه
اروح اشوف ابوها
كنت اتمنى تطلع عليه نحجي اني وياها حتى نتعرف على بعض بس مع الأسف ابد ماتطلع من اروح بيتهم
جمانه السعيدي
منار....بعد ماشفت ماكو فايده من رفضي لان ابوي مصمم على كلامه
سكتت ماببدي شي اسوي رغم اني رافظه هاي الزواجه
بس محد يقبل يوكف وياي ويدافع عني
وابوي ما يتفاهم ابد
سكتت وتقبلت الموضوع بس عايشه حالة حزن فضيعه
كلما اذكر اني راح ازوج اصيل
واصابح وامسي بهذا الوجه اتخبل
بيوم المهر بجيت بجي مو طبيعي
بحيث من دخل لبسني الذهب حتى ما باوعت بوجها
مرتين اجا عليه ورفضت اطلع اشوفه حتى دزلي تليفون
وما اتصلت علي
بلكت يحس اني مااريده ويبطل يعني تجي منه
مو مني
بس ماكو فايده جاي يدزلي صور الغرفه
والأثاث والبردات مجهز نفسه للعرس
شفت الصور بس مارديت علي
اصيل ...كملت كلشي واتصلت على ابو منار حتى يحدد يوم العرس
قررت اسوي عزيمه بسيطه بيوم العرس
اسويها بيت عمي واعزم الاهل والاقارب وبعد العشى
اروح اجيب عروستي
كملنا عشى ورحنا اني وعمي جبنا العروس
اجت وياها بس امها
وصلنا للبيت عمي باركلي وراح
وأم العروس دخلت ويانا للبيت
كعدت شويه واجا عليها عبدلله اخذها
وصلتها للباب ورجعت دخلت
ابد ما مصدك هاي الحلوه صارت زوجتي صارت حلالي
يافرحتي الي ما تنوصف ابد
قبل لا ادخل عليها توضيت وصليت صلاة الشكر
وحمدت ربي وشكرته على هاي النعمه الي ما تقدر بثمن
دخلت للغرفه لكيتها كاعده تبجي
بس مو بجي عادي عبالك ميت الها عزيز
اصيل.. هااا ليش تبجين ليش
منار...مااريد اهييي اهييي
اصيل... شنو ماتردين
منار...مااريد هاي الزواجه اني ما مقتنعه ابوي جبرني ازوج
اصيل...شنو مافهمت
منار...اني مغصوبه على هاي الزواجه ابوي غصبني
شكد رفضت وحاولت وياا بس ما قبل
اصيل...تحجين صدك
كامت تبجي بحركه اكثر احس الدموع طالعه من كلبها
مو من عيونها
منار...اي اني ما مقتنعه اني مجبوره على هاي الزواجه
مااريد ازوج
اصيل...وليش ماكلتي ليش ما تواصلتي وياي
ليش ماحجيتي
منار.. خفت تحجي الابوي ولله يموتني
اصيل...بس هيج حرام اني لو اعرف مجان جبرتج
تكملين وياي
منار... اهيي اهيي
اصيل لا تبجين اني مراح اجبرك على هاي الزواجه
قسما بلله لو اعرف فلا كملت إجراءات الزواج
كلشي بالغصب اله الزواج لازم يكون بلاتفاق
اصيل.. هاي صدمت عمري معقوله اني مو محضوظ
اول بنيه احبها واتعلق بيها تصدمني هيج
وين اكو زواج غصب بهلوكت
جمانه السعيدي
طلعت من الغرفه كعدت برا يافرحة الي ما تمت
كل أحلامي اتبخرت من يوم شفتها لليوم واني احلم تكون عندي عائله واودع الوحده
تالي بأحلى يوم بعمري انصدم هيج صدمه
معقول الشي الي جاي يصير وياي
هسه شلون اني مستحيل اكمل هاي الزواجه ولا اجبرها
تكمل وياي وهي ماتريدني
كعدت اكثر من ساعه برا
واني عاجز ومااعرف اتصرف شلون
الصدمه ااكبر مني شلون اني وياها نوصل الهاي النقطه
الصعبه
كمت دخلت عليها للغرفه لكيتها تبجي وتمسح بدموعها
اصيل. كومي
منار...رفعت راسي شنو كومي وووين
اصيل...ارجعج البيت اهلج
منار...شنو
اصيل....اي اني مراح اجبرج تعيشين وياي وانتي ماترديني
منار.. تحجي صدك
اصيل...اي احجي صدك تعاي ارجع الاهلج
واكلهم هاي بتكم وهاي الزواجه الغصب مراح تكمل
منار....انت واعي شجاي تكول
اصيل....اي واعي اني لو اعرف انتي مجبوره على هاي الزواجه جان انسحبت من البدايه
ماكو زواج غصب وخاصه الزواج لازم يكون عن اتفاق وتراضي بين الطرفين
كومي بدلي واني راح انتظرج برا
هسه ارجعج البيت اهلج ومن باجر اطلك وادفعلج كل حقوقج
انتي من حقج تزوجين الإنسان الي تقتنعين بي
منار...مسحت دموعي بعمري ما متخيله اصيل
راح يقبل موضوع الرفض
ويرجعني الاهلي بدون مايقرب عليه
ابتفكيري كل الزلم مثل ابوي
ماكو مره تعترض لو ترفض بس اتفاجئت بردت فعل اصيل
كمت نزعت البدله ولبست بنطرون وقميص وحجاب
مسحت المكياج من وجهي
صاح عليه اصيل منار كلشي لا اجيبين اني باجر ادزلج كل
ملابسج وغراصج للبيت
تعاي بس انتي خل اوصلج الاهلج
منار...طلعت بس جنطتي زغيره بايدي
اصيل...يله كملتي
منار...اي بس خايفه من ابوي
اصيل....اني احجي ويااا لا تخافين
منار...انشاء الله يقتنع
اصيل...يله امشينا طبعا اني بعدني بقاطي مال العرس
مشينا شويه ااشرت التكسي
صعدنا ووصلنا البيت اهلها
اصيل...دكيت الباب
صاح ابو منار منو
اصيل... اني عمي اصيل افتح الباب
عمي...اصيل...ياستار شكوووو
فتحت الباب اتفاجئ اني ومنار جايين
عمي....ياستار شكوووو ليش جايين
اصيل...ممكن ادخل اريد احجي وياك
عمي...اي تفضل
دخلنا للصاله اني ومنار راسا اجت عمتي مستغربه من جيتنا اتأشر المنار شكوووو
اكو فراش مال نوم بلكاع الضاهر عمي فارش يريد ينام
اصيل....انت تريد تنام واني مااريد ازعجك
عمي...احجي
اصيل...اني عرفت منار ما موافقه على هذا الزواج
واني مااكدر اكمل وياها وهي ماتريدني
عمي...اي وبعدين
اصيل....اني راح انطيها كل حقوقها وباجر اطلك
عمي.. انت عاقل مخبل مرجعها بليلة عرسها وتكول
اطلك ولله اموتها هنا خلاص ولا ترجع عليه بليله عرسها
انت تريد اضحك الناس علينا تريدنا انصير سالفه
بحلوك الناس مافكرت بسمعتنا
اصيل....مايصير هي رافضه مايصير تغصبها
راسا طفر ابو منار شال المخده الي على الفراش وطلع مسدس سحب أقسام
واشر على منار
عمي...اموتها هنا واخلص منها
وماترجع عليه بليلة عرسها
شكرا لزيارتكم عالم روايات سكيرهوم
