رواية علي حافة الثأر الفصل الثالث عشر بقلم زينب ماجد
صفنت بوجهه لما كالي هيج ..
بلعت ريكي .. وكتله : يصير ننزل !؟
عقد حاجبه .. تنهد .. انحرج
سكوت دخل بيناتنا رغم موجة من الكلام داخل كل واحد بينا بس .. ديعثر الحجي وميلكاله طريق يعبر بيه .. غير انو يداري سكوته بخجل وحيرة وتوتر ..
نزل الدولاب .. انفتح الباب
راد يلزم ايدي .. اعتذرت وكتله : لا اكدر انزل
لزمت ونزلت على كيفي ومشيت وهو ورايا ..
طلعنا خارج .. حجه : ابقى هنا اجيب السيارة ..
راح ديجيب السيارة مرت تكسي من كدامي وكف وهو يكولي : تكسي
فتحت الباب وصعدت كتله : للمنصور وبسرعة لو سمحت .
داسلها ..
عقلي ضرب ..
اني شديصير ويايا .. جنت متلهفة اسمع ولو رنة رسالة من عنده لما بادر وعبر هربت واحس ما مستعدة اواجهه او احجي بهالموضوع ..
اريده حيل بس ما اريده
احسه كلش يلوكلي .. بس ما يناسبني
بيه كلشي اتمناه .. بس يفتقد لكل شيء
قرار صعب جداً
مو بالسهل اطاوعه وافرح وارحب بتعبيره ومبادرته
رغم جنت كلش حابة ينطق ويحجيلي عن اللي بداخله .. بس لا ممستعدة .. احسه ميناسبني ابدا
نعم متعلقه بيه تعلق عجيب
لكن اكو هواية حواجز المنطق يرفضها ..
اهله وهم كاعدين ببيتي محبوني ولا اتحملوني
شلون يتقبلوني .. امي تشوفه خادم عدنا وابويه مشايفه بعينه اصلا ..
حالته المادية سيئة
تفكيري مو مادي وما اهتم للماديات لكن ما استقبل فكرة اني اصرف ع الرجال وانطي .. تفكيري شرقي جدا بهالجانب .
اني بطريقي لحتى ادرس دكتوراه ..
وهو اي شهادة ما عنده !
يشوف لهجتي تصنع واسلوب حياتي تعقيد وفيك
واشوف لهجته غير لائقة واسلوب حياته تفتقد للتحضر ..
مو لقلقة لسان واكوله موافقة وتعال نعيش اجمل ايام
والمنطق يفرض نظرية مختلفة تماماً عن شعورنا .
وصلت البيت صف ابو التكسي دا انزل ..
طبك عباس بالسيارة كبالي .. انطيت فلوس لابو التكسي ومشيت .. جان عاقد وجهه وواضحة عليه كل معالم الإنزعاج
توقعت من حفوت من عنده حيجي او يسألني ليش اجيت تكسي او ليش تهربت .. بس فتت هو جان واكف بالباب ومرجع اديه ليورا مجتفهم .. ما نطق ولا حرف
فتت للداخل گبل ..
لكيت ام غيث كبالي سلمت عليه .. بالي مو وياها
كعدت بالصالة وعقلي مشوش ما اعرف شنو اسوي !
هي تحجي ..
ندهتني : ست حبيتي
انتبهت : ها
- دا احاجيج بس شكلج مشغولة
- شتريدين ؟
- دا اكولج سويتلج شلون درلمة تلوك الهالحلك بس فدوة اروحلج .. يعني لو ما محتاجة ما اطلب بس جامعة بنتي رايدين قسط هاي الأيام حتى لو دين
- تردين فلوس يعني ؟
- اصير ممنونة يداده والله حايرة الف حيرة وبالكوات نطقتها كبالج بس ادري بيج طيبة وبنت اصول
هزيت راسي وكمت لفوك
بالمفتاح فتحت القاصة كلتلها : شكد تحتاجين ؟
- بس ٥٠٠
طلعت الها ٥٠٠ وانطيتها
بقت تشكر وتمدح هواية كلتلها : ادللي اخذي راحتج ام غيث .. اتصلت ماما وام غيث تحجي .. اشرتلها واخذت تليفوني :
- ها ماما
- وين انت
- ابيتي
- مشتاقتلج
- حبيبتي اني اشوق .. بيج شي صوتج مو على بعضه
- تعاركت اني واكرم .. وطلع من البيت
- على شنو
- مشاكل بسبب عائلته الاولى .. ذيج العايقة مدا تتركني بحالي .. طلعتها لروحي بنت اللذين
- تعالي يمي
- اخاف ابوج يجي ومحابة اشوفه واشوف خلقته
- لا لا ميجي اليوم بابا مشغول
- بأيش
- عرفته على صديقتي المطلقة جديد وتعرفين بابا كل لطيف مع القوارير
- هههههههههه صدك بداعتي .. وهسه هو وياه
- لا لا مراح احجي شي لحد متجين انتظرج
- اوكي اوكي .. جاية لعد.. شكلها السوالف والغيبة اليوم هواي ههههههه حنتونس
- يلا تعالي .
قفلت التليفون ودخلت الحمام غسلت وبدلت وطلعت .. رفعت شعري .. ونزلت .. ام غيث دا تروح كلتلها : كبل لتروحين وصي الحرس يجيبون فاكهة ومشروبات ومكسرات .. ماما حتبقى يمي الليلة
- ادللي احبيبة
مشيت للمطبخ نور كاعدة طبطبت على جتفها باوعتلي ابتسمت : اشونج
- زينة
- مو على بعض
- لا هيج
ابتسمت بوجهه ، وباوعت بتليفوني طلعت رقم ابويه واتصلت .. رد : الو
- هلو حبيبي
- هلا باباتي اني مع الاستاذ صادق يسلم عليج
- وعليكم السلام بس حبيت اخبرك ماما حتجي عندي بالبيت وهي متخوفة لتجي بوجودها فيعني ..
- تمام بابا اخذوا راحتكم .. لكن وصي الحرس ينتبهون اكمل عملي واخابرج
- اوكي حبيبي
قفلته ..
باوعت من الشباك عباس كاعد بالحديقة صافن
طلعت ام غيث دا توصي .. وهو صار يحجي وياها ورجعتلي : بعد اذنج خالة .. يصير الحارس يوصلنا بطريقه اذا ما عندج شي
- احمد وين ؟
- ما اعرف والله يداده
طلعت للحديقة وكف هو بس حيل متضايق حجيت : احمد مأجه ؟
ضل يباوع بوجهي مستغرب
تنهد ودنك راسه وجتف اديه ليكدام واتعدل وهو يكول : جاي بالطريق ست
- ممتاز معناها لما يجي واحد منكم يوصل ام غيث .. ويجيب الاغراض اللي مطلوبة مفهوم
باوعلي .. هز راسه بقهر
انداريت لام غيث : شوفي الحارس اذا متغدي او لا وصبيلا قبل لتروحين
حجيتها ومشيت كعدت بالصالة
ما اعرف اذا اني دا اقسو بتصرفي وتهربي او هو هذا اللازم يصير وكل واحد بينا ياخذ مكانه !
مرت من نور دا تدور شاحنتها
كلت الها : العفو حبيبتي سويلي فنجان كهوة اذا ممكن
- تدللين ست
مشت من كدامي واني مشيت وراها للمطبخ
لكيت صينية الاكل ع السنك، حجيت : ام غيث ليش الاكل هشكل ؟
- العفو احبيبة بس وديتها غدا للحارس ما راد كال شبعان .
باوعتلها : عباس ؟
- اي
دا تحجي وسمعوا صوت الحارس احمد .. اجا ندستها : يلا اجا امشي
- بس اصب الكهوة
صبتلي الكهوة وخلتلياها بصينية صغيرة وحجت : ست وين اخليليجياها ؟
- اتركيها بمكانها وروحي، شكراً
مشت .. واني اباوع من باب المطبخ
احمد اخذ السويج من عباس .. ومشى بام غيث وبنتها وعباس بقى بالباب ..
اخذت كهوتي وطلعت كعدت بالحديقة ..
عصرية والجو حلو .. حطيت فنجاني ولزمت تليفوني
تقرب هو ووكف يمي على صفحة واتكتف .. باوعتله مباوعلي .. رجعت اباوع بالتليفون
متحملت .. حجيت
لو جنت مو مديرتك يا ترى راح تاخذ قرار الزواج بهالسرعة وتطلبني للزواج .. جان مستعد تتزوج بنية لمجرد عندك مشاعر اتجاها !
باوعتله .. عاقد حواجبه وساكت داير عني
حجيت : متجاوب
دار وجهه على كيفه وباوع بعيوني ، اشرتله براسي : شنو فائدة الكلام بعد الصار ؟
- جاوب
تنهد ورفع راسه وحجه بصيغة تذمر:-ست اذا تتذكرين انت طلبني نتزوج واني بس سألتج اذا العرض بعده عبرت عن رغبتي لا تخافين لا محاول استغلج ولا رايد اتصيد فرص ولا اريد اي شي حتى واذا رايدة اترك الشغل هسه اعوفه وانعل خيره
تحركت من مكاني وانداريتلا واني كاعدة وحجيت بنرفزة :-انت كل مرة وكلت اترك الشغل شنو مثلا تهددني !؟
- اهددج ليش الرحت والبقيت يهمج حتى اهدد اني دا احجيلج خاف مضايقج وجودي اريحج
رفعت حاجبي وكتلا : عندك جرأة توكف كدام بابا وتطلب منه اللي طلبته مني ؟
باوع بوجهي بحقد : ماكو داعي
عقدت حاجبي : شنو يعني
اخذ نفس .. وكح ومسح على وجهه وعدل راسه ...
كمت من مكاني : شنو قصدك بماكو داعي
- الموضوع ميسوى ست انسي
- انت قصدك اني ما اسوى ! لو شنو حدد كلامك بلا بلا زحمة
مجاوب فزيت باستنفار : انت شنو تتجاهل لو تستصغر المقابيل بردود فعلك هذه !؟ من احجي وياك تجاوب افتهمتتتتتت
فاتت امي للبيت وانتبهت لصياحي
وكفت تباوع بأستغراب .. توقفت فورا وانداريت الها ، حجيت : شكو شديصير
- ولا شي
تقربنا سلمنا وباوسنا بعض .. ومشينا صعدنا للبيت ..
انداريت من باب الصالة باوعت ورايا .. لكيته يباوع بحقد بس شافني باوعته دار وجهه مني بعصبية !
تركته وسديت باب الصالة
وكلت الها : اي شكو شبيه اكرم
- عوفيني من سيرته يلعن شكلا وشاكلته
- اوكي على راحتج .. متغدية لو اسوي قهوة
- شنو اكو ع الغدا ؟
- ام غيث مسوية دولمة
- تمام حرريها على ما اسبح وابدل احس عركت ..
- يلا روحي
راحت واني مشيت للمطبخ
لزمت جدر الدولمة بارد .. فتحت النار جواه .. ونصيتها
باوعت من الشباك شفت احمد دخل وضل يحجي ويا عباس .. وتبادلوا .. احمد لزم واجب وعباس نزل .
فتحت الثلاجة ..
طلعت مخضر حطيت تختة وكمت اثرم سلطة ..
نزلت ماما لابسة من ملابسي بجامة وقميص ورافعة شعرها الخاولي باوعت : كبار نعمي الثرم .. ام غيث وين لعد ليش انت الدا تسوين الاكل
- سوت كلشي وراحت
- ممسوية سلطة لعد تسويها وتخليها بحافظة خوما فرحانة بنفسها مسوية دولمة وماسحة كم حاجة من البيت .
- مدا تقصر .. عوفج منها شلونه شغلج
- يييه طالعة روحي موظفات غبيات ماكو التزام .. بالمصرف ماكو راحة بالبيت ماكو راحة دا افكر اقدم فيزا اطلع لايطاليا اروح لاخوج وارتاحلي فد شهر هناك .. متروحين
- لا بابا داخل حملة
- عشتو .. صدك شنو هو وندى .. عليج الله طلع وياها
- اي والله جانت زايرتني وعرفتهم على بعض شو ورا ساعتين اخابره طالع وياها !
- شكد نچرة البربو* جابته للدرب بكم ساعة
- كولي ابويه سهل .. مو هي
- اثنينهم مثل بعض بمعودة .. اي شكو انت والحارس تتصايحون
- ماكو شي حجيت واني ادنك اسوي نفس اثرم واتهرب
انتجت ع الكاونتر كدامي ورفعت حنچي
غمزتلي : المشاعر بعدها
اخذت نفس وتنهدت : لا
- تعلميني بيج دا تتهربين
- لان مو ثقة احجيلج مثل لما حجيت ورحتي خليتيها بحلك بابا
- شخليت !؟ كتله افصل الخارس المصلحتها قابل حجيتلا عندج شي وياه ردت انهي هالموضوع
- بس اني مو صغيرة
- ومنو كلج بس الصغير يغلط ؟
هاي اني كدامج وبهذا عمري وبعد كل هالخبرة بهالسنين وهياتني شنو وضعي ؟
المشاعر والحب تخلي الانسان غبي ميفكر بعقله ابد .. لهذا لازم تنطين مجالي الي ولابوج نتصرف بمصلحتج .
- شنو فايدة المصلحة اذا اني محاسة بيها بالسعادة !؟
- وليش حتى متحسين شنو ناقصج الف واحد يتمناج
- الالف اليتمنوني ذوله اني مدا اتمناهم
- بعدج تحبي
- عرض عليه الزواج
صرخت : منو
- اشششش شبيج الحارس منا ماما
- ولج منو اللي عرض عليج الزواج الحارس مالتج
شلون اتجرأ ؟ شكد منطيته مجال حتى اتجرأ يطلب منج زوااااج
- ماما خلينا نقفل ع الموضوع
حجيتها واني اتهرب .. واطفي ع الدولمة
فتحت الكاونتر اسحب صينية مدورة .. وهي تكولي : انت شدا تسوين جوان
- دا اكلب الدولمة
- شدسوين بنفسج
سحبتني وكفتني كدامها
انطيتها الصينية : نكمل حجي بس خلي نكعد
اخذتها وكلبتها طلعت محتركة من جوا كمنا نشيل المحترك من فوك ونرجع الضلوع عليها .. حطتها ع المائدة .. وحطيت السلطة وطلعت اللبن زبادي حطيته والمشروبات .. جرتني : اكعدي كافي خل افتهم
- ماما مو بيدي الموضوع
- شنو اللي مو بيدج فيان .. تحبين الخادم مالتج معقولا
- حارس ماما
- لتجمليها الاولى اصح لانو ميناسبج
- اني مكلت مناسبني .. بس
- شنو البس لج انفصلتي من شوان يحظي شوفيلج واحد براسه حظ يسعدج يريحج مكابلتلي هالفكري ..
- دا احاول
- شتحاولين وانت حاطته كبالج يولي انقلييي
- ماما اكو امور اني اتمناها بالشريك ملكيتها بكثير من الرجال بس لكيتها بيه
- وشنو البيه فكر ضيم جرب شبيه يولي ؟
- شخصيته حنيته اهتمامه .. حتى اسلوبه
- وانت شعرفتي من حنيته وحنانه واسلوبه مرته وشفتيهن غير مديرته طبعا يقدملج كل ذن ديداري رزقه
- هواية صاروا حراس مو مثله هو بيه شي غريب
- اي اني اعرف الشي الغريب شنو .. حظج
ليش انت بناتي تعرفن تختارن تعرفن تقررن .. وين زبالة الزبايل العفو تروحن عليها هيج تروحن لشكو حاوية اتبحوشن وتستنكن الزلم منها وتختارن ..
ليش ما اعرفجن راحت وحدة .. وانت ماما لتقصرين حتى خوش هالمرة انتهي .
- الله يرحمها عاجبني ازورها .. نروح
- تزوريها حتى تكوليلها انغميت على عقلي مثلج
ولج بدل ميصيرلج درس بيها دا تعيدين اغلاطها فيااان لويش دا تعلي لگلبي .
- اكرم صح
- وليش مو صح .. ممخليلي بيت ممقدرني محاسباي احساب .. ميحبني ميعدلني .. مساعدني بفضل منو صرت مديرة مصرف بفضل ابوووج ؟ لو بفضل اكرم ؟
- ولويش انت هنا معناها
احجي واني اخذ الدولملاية اغمس باللبن .. واكل
- مشاكل تصير بين كل اثنين بس مو اروح اخذ واحد لا من ملتي لا من طينتي لا يمي ولا كرباي مو هيج بنتي.
- رجعت ظهري للكرسي واني احط رجل على رجل وارفع راسي بحركة اتحلم بيها : يعني منصير الا لليشبهنا وين متعة الحياة لعد !؟
- ومتعة الحياة من تعيشيها بفگر
- لا بس من نعيشها بحب مو بفلوس
- وهو يحبج ؟
- اي يحبني
- قصدج يحب منصبج
- منصبي شعليه
- لو جنتي بنية عادية يگلبج !؟
- هواية أسأل نفسي هالسؤال وحتى سألته بس ليش ابقى اسأله .. وشنو المهم بالموضوع
- المهم هو رايدج الج لو مصلحة
- مراح تقنعين فيان انت واصلة مرحلة خطرة بهالموضوع اترجاج بنتي انقلي وابعدي من حياتج .. لتعيدين اغلاط جيهان بداعتي مبقالي احد غيرج لو صارلج شي انتهي بعد ما اكدر .
ابتسمت : دا احاول والله .. وبعد يم الله بكيفه يرتبنا
- لج عيني ام غيث هذه طبخها مو شي .. الدولمة توكف ع الكلب حامضة
-لا اني احبها .. شحابة نباوع فلم سويا
- عوفي لفلم لبعدين عاجبني نكعد نسولف
كمت اني وياها .. نسولف ونضحك
شمرت المواعين بالغسالة ورحنا كعدنا بالصالة نسولف .. كلش فرحت بجيتها عليه احس محتاجك وجودها بحياتي هواية ..
اخذت لبن زبادي صبغت وجهه بيه ..
ضحكت من شفتها دا تسوي هيج .. وكفت بصفها يم المرايا وكمت اخذ من ايدها واحط الوجهي .. كصصت خيار ورحنا للصالة حطيناه على عيونا وتمددنا ..
شغلت لا ترحلين ..
لرائد جورج اني متمددة اسمع ..
كلمات الأغنية ذكرتني بجيهان .. كلتلها : بشنو تذكرج هالاغنية
- بجيجو
حجتها بعبرة
كلمات الاغنية من وصلت لـ
تالي عفتيني بجروحي بجروحي
اهمس بأسمج يروحي يروحي
الگلب شيفيده شيفيده وانفاسج بعيده
دمعت عيوني كعدت من مكاني
كلتلها : مدا ارتاح وسيروان عايش حياته ومتزوج ومخلف وهي جوا الكاع .
نزلوا دموعي
كعدت هي : بجال ابوج غير
- مدا انسى صوتها
ولا وجهه لا حنيتها لا ذكرياتنا سوى مدا انسى
وكل ما مرت الايام يزيد الاشتياق ما انسى .. كلش مشتاقتلها ماما
دنكت راسي كمت ابجي كامت يمي هي
اتطبطب على رجلي .. حسيت بيها تبجي
- الله يرحمها راحت يم الارحم بيها مني ومنج .. الله ميضيع حق وداعتج ليطلع حقها من عيونه .
كومي خل نغسل كومي لتبجين ماماتي
اخذتي ايدي ورحنا غسلنا .. ورجعنا للصالة هي كعدت تدور فلم اني رحت حضرت صينية كهوة وكرزات وحب وكعدت يمها اكوز ونباوع فلم قديم لنجلاء فتحي ( امرأة زوجي ) نص الفلم تمددت على رجل ماما واني اباوع نمت .
عاد هي هم نعسانة من خلصت ..
مكعدتني وصعدنا نامت ويايا بالفراش ..
ثاني يوم كعدت بدلنا سوية واتريكنا .. وطلعت دا اوصلها لدوامها .. لكيت عباس واكف برا البيت وكاعد بالسيارة .. صعدت هي منتبهتله
فاني حجيت : عباس قبل لتوصلني خلي نوصل الوالدة ؟
- تأمرين ست
انتبهت هي وباوعتله .. اشرتلي بمعنى .. هذا نفسه ؟
ابتسمت واشرتلها براسي اي
غمتني بأيدها ومدت لاذني همست : يولي صورة جرجوبة انزول عليج وعلى هالاختيار البشع .
ضحكت ..
حجت وياه : وين كاعد عباس
باوعلي بالمرايا وحجه بدون اهتمام : بالحرية
- متزوج ؟
- لا
- بهالعمر وممتزوج شعجب انتو المناطق الشعبية وانتو صغار تتزوجون
-هاي بعد
حجيت : منفصل
- ها يعني مزوج ومطلك اي متكول ؟
ما رد حجت : تحجي من ورا خشمك حضرتك
- العفو منج ست
- شنو جايبيك غصب
- لا ليش مضايق حضرتج ست
- اي معناها جاوب مثل الاوادم من احاجيك
- لما تحاجيني ع الشغل تأمريني امر .
- تستهزأ انت !
تنهد ودار وجهه وكال الها : شنو المطلوب ست
حجيت : الكدامك امي فاعرف شلون تحجي
- هذا شلون مبقيته
غمزتلها تعوفه ..
حجت : شبيج بنتي هذا شنو وعايفته عندج سايق لا خلقة لا اخلاق .. اوصلي للدائرة ونقلي واذا تفصلي تسوين فضل .
انداريت منها صرت امسح على كصتي ..
هو متنرفز منها هي اتعمدت تستفزه .. شنو احجي بينهم .. بقت تحجي وتتجاوز هو سكت مجاوب ابداً
وصلت للمصرف .. لوحتلها ومشيت
حجه : هي تعرف
عقدت حاجبي وانداريت باوعت بعيونه : ويايا
تنهد وركز بالطريق مجاوب
حجيت : شنو هالنبرة شنو هي تعرف ما عدها اسم متعرف تحجي الجملة بطريقة ارقى من هيج
مجاوبني ..
دك تليفوني .. رديت واني منفعله : الووو
اجاني صوت : الو .. اسم الله تخوفين
- منو ؟
- اني احمد
حجيت : العفو يا احمد
ذكرني بيه ابن السياسي المعروف كاله : بلي بلي اتذكرتك التقينا بالحفلة .. اهلا بيك
- كنت قريب من الدائرة اللي انت بيها وفكرت امر نشرب الجاي سويا
- دقايق واوصل الدائرة
- معناها نوصل سويا
- اهلا وسهلا بيك .
باوعتله بغضب ودرت وجهي منه ..
وصلت الدائرة هو طبك السيارة بعدني بالساتعلامات لكيته ورايا .. تبعني لمكتبي لفوك .. ومخلد صف ويايا .. وهوشيار طلع بوجهي صاروا حواليا شي يحجي عن قائمة اعمالي وشي ديكولي كمل التقرير ..
اعتذرت منهم وكلت لهوشيار : بلغ سليمان الاستاذ احمد راح يجي يشرب عدنا كهوة ولو وصل بلغني بوصوله .
حجيتها هوشيار كدامي وعباس واكف ..
باوعتله ودخلت لمكتبي .. دقايق وبلغوني بوصول الاستاذ احمد .. استقبلته بمكتبي وانداريت كعدت مقابيله مو ورا المكتب ..
ضل يسولف ويحجي عن عمله ويسألني ..
وعزمني على حفل خطاب انتخابي لوالده استقبلت الدعوة وشكرته لان جايبلياها بنفسه ..
حسيت بكلامه نوع من الاعجاب والتقرب بس جان محترم جدا بالكلام ورجل مهني ..
سلم عليه ونزلت وياه للاستعلامات ودعته ..
صعدت .. لكيت عباس واكف .. عرضلي : اكدر احجي وياج ست .
- اتفضل
حجيتها وفتت قبله ..
فات ورايا وسد الباب .. كعدت ورا مكتبي : كول شنو بعد؟
- رايد كتاب نقل اذا تسمحين
- شنو السبب
- اسباب خاصة
- مرفوض
- اكدر اعرف ليش ؟
رفعت حواجبي وسويت حركة بشفايفي : اسباب خاصة .
اخذ نفس وهز راسه : هاي ست الج تأمرين
طلع من المكتب ..
صرت اشتغل واحاول ابعده من فكري ..
مدا اكدر .. احس بكل لحظة ادوره وانتظر موقف او كلمة تجمعناه رغم محاولاتي البائسة بالإبتعاد
كملت شغلي رجعت ع البيت ..
وصلني وبادل دوامه ويا احمد ..
نفس الروتين .. بس مديغيب عن بالي .. وحدتي بالبيت دا تنطيني مساحة اكبر للتفكير بيه وحده .
جان ديوصلني ..
دگ تليفونه .. رد اسمع صوت بنية اجاه
كاللها : ها عيني .. لحظة بس اوصل واخابرج حاليا دا اسوق .. ماشي حبيبتي .
قفله .. حجيت : علياء اختك ؟
باوعلي : نعم !!
- اذا علياء محتاجتك روح للبيت وارجعلي وقت ما اخابرك
- لا لا مو علياء
عقدت حاجبي : هممم لعد منو
- هيج
من حجاها رفعت حاجبي وضحكت بأستهزاء : هيييج
وباوعت بعيونه بالمرايا .. يتجاهلني ميباوع .
هزيت راسي ودرت عنه ..
وصلني للدوام .. كتله : اتفضل اخذ راحتك لتبقى ..
-مو مشكلة ست
- لا يا عزيزي مشكلة لازم تحجي وتاخذ راحتك وبعدين اني ما احتاجك حالياً .. احتاجك بالليل اترك السيارة واتوجه اخذ تكسي وروح
حجيتها ومشيت دخلت الدائرة ..
كملت شغلي واخذت السيارة وطلعت للصالون ..
سويت وجهي شعري .. مكياجي .. ورجعت للبيت لبست فستان بس رسمي ابيض .. وكعب عالي ..
نزلت جوا ..
عباس واحمد واكفين اثنينهم منتظريني ..
عباس جان لابس قميص ابيض وبنطرون اسود قماش .. ورايح للحلاق مبين لمعة الحلاقة بوجهه ..
جذبني شكله ..
صعد عباس ليكدام واحمد فتحلي الباب صعدت سده ورايا ... نزلت الجام كتله : ابقى بالبيت لحد ما ارجع .
-تأمرين ست
مشى بالسيارة رغم طالعة لمحفل
بس وجهي ميكصه السيف .. متضايقة ولو بودي انفجر بيه ... وما اعرف ليش متضايقة اني نفسي اسأل نفسي شعليج مو متردي ؟ مو رفضتيه شلج علاقة لو ارتبط بوحدة لخ !؟
وصلني للخضراء وكفتنا السيطرة .. ندست عباس من كتفه انطيته الكارت اخذه مني وقدم الكارت للسيطرة فتح النا الطريق
حجه : ست تدليني المكان ما اندله
- للقصر الرئاسي
- واني يومية كاعد عجس بالقصر وين اندله ددليني
- شنو هالاسلوب شبيك
- هسه دليني
- احجي عدل ..
وكف السيارة .. نفرت : انت صدك تحجي شعندك وكفت
- جا ما اندل
- ومتندل توكف اتحررررك
- واني شجاي اكلج دليني
- اكلك انت شلعته لكلبي بتصرفاتك مناوي تتعدل لو شنو
- والله ست كتلج انقل وانت ما رضيتي عمي اني ما تناسبني هالشغلة عوفينييي
- انت مفكر الشغل على كييييفك اتحرك
- وين اتحرك
- لا تصييييح
دفعته من جتفه : لا حول ولا قوة الا بالله ..
- انت على منو دا تدعي ها على منو
- هو اني دااااعي جاي اذكر الله حتى ذكر الله حرااااااااام
- لا تصييييح
- وانت ادوسين ابطني وتكولين لا تصييييح
- لك امشي فضحتنا موكفنا بنص الشارع امشي
شغل السيارة بنترة وداسلها .. شحط السيارة
ياربي صبرني على هالمشكلة هذا ..
يمين
خلص الشارع واخذ يسرى
وصلنا القصر .. اجا واحد من الحرس كاله :اغاتي عوف السويج بالسيارة وتفضلوا
باوعلي : ست اني راح اضل بالسيارة
- انزل
حجيتها وفتحت الباب هو نزل بسرعة ولزملي الباب الكعب جداً عالي .. لزمت بالسيارة حتى اوكف عدل .. شفته منتظرني حتى يسد باب السيارة ..
تعدلت ووكفت عدل
وصرت امشي وهو يتبعني
دخلنا القاعة .. استقبلونا من الباب واخذتني لطاولة .. مشيت كعدت كدامها .. هو سحب الكرسي راد يكعد .. كتله : لتكعد ..
توقف .. باوعلي درت وجهي
رجع الكرسي واتعدل وبقى واكف .. حطيت رجل على رجل هواية سياسيين رجال ونساء متواجدين .. شافني احمد من بين الحضور .. ابتسم واجا عندي
- يا مرحبا .. نور ما جانا
ابتسمت ووكفت مديت ايدي صافحني واخذ ايدي صار يطبطب عليها : سعيد جداً بحضورج
- اني الأسعد والي الشرف بالحضور شكراً جزيلاً لحضرتك ..
بعده لازم ايدي حجه : توقعت ما تجين كالوا متعجرفة
- وشطلع ؟
- اميرة الأميرات فرحت جدا بجيتج
عباس : ست كاكا دلشاد موجود
باوعنا اثنينا على عباس .. فد انحرجت
هو ابتعد وكال : اخذي راحتج ستي
- شكراً الك
راح انداريت العباس : انت صدك تحجي شنو كاكا موجود احرجتني عبالك مسوية جريمة ودا تحذرني ابويه راح يشوفني
- فد واحد لغاف بواك شافج حلوة راح لازك بيدج وانت بسهولة تضحكيلا .. طبعا هو وابوه بايكين نص العراق ليش ما تضحكين
خزرته : عباس كافييي
سحب الكرسي وكعد كام يفرك بوجهه .. بقيت اباوعله ، حجه : متعمدة ادخليني لهنا وتخليني بهالوضع حتى تذليني وتعرفيني حجمي حتى تكليلي لا تباوع فوك .. اني ما اذيتج اني بس حجيتلج عن اللي حسيته رفضتيه وما يناسبج انعلي ابو خيري فصليني ليش تذليني
- بشنو ذليتك ممنوع الحرس يبقون برا للوازم امنية لازم يدخلون ويانا القصر .. فبعد بشنو اتعمدتك بس انت متحترم
- اني ممحترم !؟
- اسلوبك ويايا شيتسمى .. وبعدين اي مشاعر هذه الكاعد تحجي عنها مخابراتك لو النسوان اللي ميخلصن بتليفونك دا تضحك عليه لو شنو .
- يعني اذا حجيتي ويا هذا الامعة ولزم ايدج عادي اني لازم المعهن واسكت بس من اني تخابرني وحدة وتحجي هنا اني كاعد اضحك عليج
- سمعتني كتلا حبيبي ؟
- لااا قصرتي لو كايلتها هي شبقى بعد
همست - انت صلف وجريء ومتخلف وكل الصفات السيئة مجموعة بيك تدري ؟
- رحم الله والديج معناها ست خلينا ننهيها ما طول البيناتنا ما يصير خلي ناخذ قرار .. انت ما تضوجين ولا تتدخلين بعلاقاتي ولا اني الي علاقة بذوله الامعات اليفترون داير مدايرج خووووش ؟
ديحجي اشر بحاجبه وكالي : اجا الوالد
اخذت نفس وانداريت شفت بابا اجا : هاي شنو حاضرة ؟ شو مكلتيلي ؟
- ما اعرف غاب عن بالي
حجيتها واني كمتلا دا ابوسه من خده
وكف سياسي يسلم عليه عرفه عليه وكاله : بنتي وبقية ما تركته بهالحياة
سلم عليه وهو يكول : لا لا واضح مو الابن سر البيه البنت سر ابيها
ابتسمت بمجاملة وابويه كالي : اخذي راحتج باباتي اني رايح اكعد ويا الجماعة
- على راحتك حبيبي
مشى رجعت كعدت .. وعباس كعد
حجيت : لهسبب اني رفضت .. كل واحد بينا من عالم
الدنيا مو بس مشاعر وبس اكو فرضيات تحيطك تكون واقعك وملزم بيها
دمعت عيوني : تعتقد بابا المحاط بكل هاي الشخصيات لو وكفت كدامه وكتله اني رايده هذا الإنسان راح يقبل !؟
عوف بابا : امك لمجرد ما حست انت كاعد تميل غيرت تصرفاتها ويايا وسمت عملك بالكلمة اللي اطلقتها .. ونعتتنه بالفاظ قبيحة ..
تكولي مالي علاقة واكدر اعوف امي اكولك كذب
مثل ما اني اكذب واكولك اعوف ابويه ورايا واتبع عواطفي .
- انت معتقد الموضوع سهل !؟
يمكن انت رجال ومتهتم بس اني !
اختنكت وكمت اداري بوجهي حتى ما أبجي .
حجه : لا تخافين اجه الامعة هسه يسد النقص
ضليت الاوع بوجهه ..
وكف احمد ووياه بنية : كاعدة ليش متكومين خليني اعرفج بالعائلة .
ابتسمت ابتسامة مزيفة وكمت وهو يكولي : اقدمج اختي الكبيرة
- اهلا وسهلا
صافحتها وبقوا يسولفون واني اجامل ..
حجه : عاجبج ناخذ كوفي نشربها سوية
- تمام
اخذت جوزداني ومشيت وياه وعباس ويايا
حجه : سمعت انفصلتي انت وخطيبج او زوجج هو كان
- خطيبي
- كم سنة مخطوبين كالوا هواية
-١١ سنة
- ١١ سنة وانفصلتوا !؟
- هيج صار
-يعني ممتزوجين زواج رسمي بينكم
- لا .. الخطبة كانت مبنية على مصلحة وبقيت ١١ سنة يلا كدرت اكسر هذا القيد
- معاناتج كبيرة .. اني مثلج تقريبا صار ٩ سنوات زواج انتهى بأنفصال .. بس كان الضحية بينا طفل واحد .
- الطفل مكان يستحق التضحية للبقاء ؟
- الطفل لما يبقى بين زوجين ممنسجمين وكل وقتهم عرك والبيت ساحة معركة وباعتقادهم ديضحون يبقون لاجل الطفل بالحقيقة هم ديدمروه للطفل لهذا بمجرد ما طلبت الطلاق هي اني اذعنت وطلقت وكلتلها الج كامل الحق اذا حبيتي تتركين ابني عندي وتشوفين حياتج او تبقي يمج وتوصله كامل حقوقه
- وكان خيارها الثاني
- بالفعل .
حجه : شتشربين
- اسبريسو
طلب : اسبريسو اثنين .
ووكف باوعلي .. انت الوحيدة لأبوج
- لا عندي اخ بس عايش بأيطاليا
- يعني وحدج هنا مدللة
ابتسمت : تكدر تكول هيج
حجيتها وباوعت لعباس عيونه تكاد تكون بكصته من الغضب مشتاط ..
- معناها الرايد ياخذج لازم يوزنج ذهب يلا ابوج يقبل ينطيج .
- مو بالذهب .. بالإنسان الجيد
- والله صح الفلوس ما تغير معدن الإنسان اذا جان مو خوش كلشي مينفع وياه
وكف واحد من الحرس وراه : استاذ
شاوره هز راسه كاله : جاي
نزني عباس باوعتله اخذ نفس ..
حجيت ويا احمد : اخذ راحتك
اني اخذ السبريسو وارجع
- شكو نروح سويا راح يوصل الوالد حتى يلقي خطابه .
اخذ فنجان انطاني واخذ فنجانه
وصرنا نمشي للقاعة الكبرى .. الحرس كلهم بالباب واني دخلت وحدي وصلني ليم ابويه .. وكفلا ابويه سلم عليه واني كعدت يم بابا ..
رجع والدي كعد وهو يسولف ويا صديقه ...
حطيت رجل على رجل .. وبقيت اباوع لعباس من بعيد .. اندارلي بابا : شلونها معنويات بنتي الجميلة
- دا احس دخت
- بس حضورج بيهج اجتماعات مفيد جداً لمستقبلج .. يخليج معروفة بالاوساط مما يسهل عملج .
- معناها استقبل احمد راح يفاتحك بموضوع خطوبة هاليومين
عقد حاجبه : فاتحج بموضوع خطوبة
- لا بس لمح لهالموضوع
- وانت ؟
- اني شنو ؟
- مستقبلة الموضوع يعني ؟
- لا طبعاً
- شكلي ما راح اشوف حفيد بحياتي وانت بهالتفكير
باوعتله ابتسم .. ضحكت ودرت وجهي .. اباوع فد وضعية ... السياسيين اللي يتعاركون ع القنوات وبيناتهم حرب كلهم كاعدين مع بعض ويضحكون والوضع بينهم توب ...
وصل رئيس الحفل وصار يلقي خطابه .. وكاعدة استمع بكل ملل .. باوعت عباس من بعيد عيني من بين الحضور كله تعلقت بيه .. وكأن القاعه فرغت من كل هالشخصيات والناس الموجودين وعيوني مدا تشوف غيره
عاقد حواجبه ومتضايق ..
اتضايقت من الكعدة .. اترخصت من بابا وكمت من مكاني .. ورحت امشي لعباس هو باوعلي وكف عدل .. وصلت اله فتحلي الباب عبرت وصار ورايا .
حجيت : خلي نطلع دخت ..
توجهنا من القصر طلعنا هو اشر للحارس وانطاه الرقم واح جاب السيارة ونزل انطى السويج لعباس فتحلي باب السيارة ..
صعدت ..
ورا كرسي السايق وهو صعد ليكدام ..
طلعنا القصر .. طلعت اغنية لا ترحلين
الموسيقى تفتح النفس تريح الأعصاب تخليك تسترخي لو هموم الدنيا فوكاك .. فملت راسي على الكرسي الكاعد عليه يم كتفه .. باوعلي بالمرايا
شافني صافنة ومدمعة رجع يركز بطريقه
حس بيه دموعي نزلوا .. باوعلي : ليش تبجين
- متضايقة
- منو المضايقج
باوعتله : انت
اخذ نفس واتنهد : واني شمسوي
- ماخذني من نفسي
باوع وابتسم .. حجيت : اني مو رافضة اني اتمنى بس الأمر مو بهالسهولة ابداً .. لو اني قنعت كل الحواليا راح تتحول حواجز ..
- ليش تختلقين الحواجز وهي بعدها مصايرة ؟
- تكدر
باوعلي .. كملت : توكف كدام ابويه وتقنعه انت رايدني وانت رايدين الك وبس مثل مكلت !؟
- اكدر بس النتيجة اعرفها
- معناها مثلي دا تتوقع الحواجز مدا تختلقها .
سكت .. بقيت استمع لموسيقى الاغنية
صارت دموعي تجري بهدوء واجر بخشمي وامسح بخدي .. مد ايده وهو يسوق لخدي ومسح دموعي : خليني اولي ما اسوى تنزلين هالدموع لخاطري .
-لتحجي هيج
سحب ايدي وبقى لازمها .. لحد ما وصلنا للبيت كعدت عدل .. حجه : من تبدلين وتكملين تكدرين تخابريني ؟
-ليش ؟
-بدون ليش
هزيت راسي ونزلت للبيت سبحت وبدلت .. ودست اتصال وفتحت سبيكر .. كال الو
-ها
-ارتاحيتي
-بس سبحت ودا اريد امشط شعري
- اني كلش تعبان
-ليش ؟
- ما ادري جاي احاول الزم روحي ما افكر ما اهتم بس مو بيدي روحي تشتاط كل ما شافت احد حواليج .. واصعب عليه من احس مو من حقي احجي ..
- كلهم عمل
-دسكتي تقنعيني الامعة هاذ الحجالج قصة حياته يريد يشتغل
-لا احمد ناوي فعلا بس مو ابالي ممفكرة بيه نهائي
حجيتها واني الف بشعري كبة فوك راسي والزمة بقراصة .. حجيت : جانبا عن كل شعور .. حاليا شعور الجوع مأذيني جداً .. شهالحفل الفكر ميعرفون يحطون اوبن بوفيه لليشتهي ياكل ما عدهم غير الكيك والكهوة ..
- واني من الصبح ما حاط لكمة بحلكي ..
- مممم انزل اطبخلك
ضحك : اتطبخيلي ! جبيرة هاي ما اتدبرينها
- شوف هو الأندومي طيب ترا وينفع اكله سريعة تصدك باليابان الاندومي هو الوجبة الرئيسية
- عوفي اليابان كولي اني عوبة
ضحكت بهمس : هذا تجاوز ترا
- لا هاي الحقيقة
ضحكت : اسكت لك اجلح
- اني اجلح
- والله اجلح واحد شفته بحياتي بعد لتضوج مو الواحد ملازم يضوج من الحقيقة
ضحك : ها هم صح
يحجي واني نزلت للمطبخ : اكولك هو حتى اندرمي ماكو
- اروح اجيب واجي
- ياريت
- يلا كايم
مشى للاسواق واني وياه ع الاتصال .. فات للاسواق وهو يكلي : شمشتهية اجيبلج غير الاندومي
- على ذوقك ما اعرف
- حلا لو كرزات
- كلشي
ضحكت .. ضحك وكال تأمريني امر
كاعد دياخذ بالغراض ويحجيلي باسمائهن ..
انفتحت باب المطبخ على كيف فزيت واني اكول منو .. نزلت التليفون بسرعة ..
صار شوان كدامي ..
ويا منو كاعدة دا تضحكين وتسولفين ؟
- انت شعندك جااااي
- شوفيني ويا منو جاي تحجين
- اطلع براااا منا اطلععععععع
كام يتلاوى ويايا يريد ياخذ التليفون ..
كمت ادفع بيه لزمني من الكباية مال شعري : احمد مو .. ما عولتي ننفصل حتى تكوشيلج على واحد توب مووو ... ما فاركج اليوم موووو رايحتله تلبين دعووووته مووو
- ووووووخر دا اكووولك
- شعجب مكملتي الحفلة ويا بالفندق ها .. جان جبتي للدرب مو افضل
- وخر مني دا اكولك ... وخر
اندفع الباب بسرعة وطب عباس جراه مني بقوة انركع اباب المطبخ لزمت عباس من هدومه : لتتعارك يواه اطرده
شوان اجا على عباس يريد يلزمه
وعباس يذب بحيله عليه ويكلي : اذا زلمة مد ايدك واشوفك الامهات شتجيب .. الحرمة كدرتك ع النسوان تاااااالي الليل
راد يلزم عباس كمت ادفع بيه صرت بينهم ..
سحبني عباس وشمرني وراه ..
وكام يدفع بيه ويتعارك وياه ويريد يطرده
لزمت تليفوني خابرت على بابا كتله : بابا تعال بسرعة
- شكوووووو
- شوان هجم عليه للبيت .. وصار يضربني اللهي خليك الحارس ديطرده ويتضارب ويا الحارس
- مراح نخلص من هالسالفة منخلصصصصصص .
قفله مني صار يتصل بشوان وعباس دفعه برا البيت وسد الباب وصاح : دخلي جوا وقفلي الباب بسررررعة
دخلت بسرعة ..
بس كمت ارجف والزم بشعري راسي وجعني من ملخته الحيوان .. رجع دك عليه الباب عباس .. فتحته كال : خابرتي ابوج
- اي هو خابره .
- شراد منج
—معتقد عندي شي ويا احمد
- وهو شمدري باحمد
- يدري حتى بمشيتي وياه ما اعرف
- معناها مراقبج
- والى متى اني تعبت
ديحجي صفت سيارة برا ..
حجه : ابقي هنانه وسدي الباب
قفلته وهو راح فتح الباب طلع ابويه
دخل يستفسر عن الصار كتله : شاك عندي شي ويا احمد ومدري منو موصله اني رايحة للمحفل و كاعدة ويا احمد هناك
- هذا شلون هيج يتجرأ اني جنت وياج بالمحفل هو شنو ويجي يتعدى ع البيت ؟
- لان لحد هسه انت ممنطي بيه وسانده لهذا ديتجرأ ووصلت بيه يضربني ويجر شعري ويعنفني بابا اذا بقى الوضع هيج اني مستحيل اتحمل ارجع اعيش بهولير اقلها هناك يفكر الف مرة قبل ليتهجم على البيت مدا اتحمل
حضني : اني اعلمه لا تخافين تلاكي هو متحسف خسرح وديحس بخسارته الجبيرة الج ومدا يعرف شلون يرجعج
- نجوم السما اقربلا ..
-تمام بابا بس اهدي .. وكومي ويايا دنروح لبيتي
- ما اريد .. تعبانة اريد انام بس كدامك لو اتعدى ع البيت مرة لخ مراح اسكت والله
- كلت الج راح احل الموضوع .. امشي ارتاحي
حجاها واندار صاح : عبااااااس
- ليش وحدك تحرس ؟
- استاذ احمد خابرني واحنا بالمحفل وكتلة راح اخذ مكانه
- الجدول بينكم تبادل
- نعم استاذ
- معناها لازم نزيد عدد الحمايا بالبيت .. رحمن راح يبقى وياك ما اريد تغفى عينكم عن حمايتها لو اتعرضت لموقف مشابه انتم المسؤلين امامي .. مفهوم
رحمن : بس كاكا الاستاذ شوان مدير المالية بالدائرة لو حاول يعتدي احنا شلون نكدر نصده
- تسوي اللي سواه عباس تدفعوا لبرا وتبلغوني مفهوم
- تأمر كاكا
راح طلع .. واني بالمطبخ
راسي كلش اذاني شوية واجا دك الباب عباس .. فزيت وكمتلا : ها
- بس هاج
فتحت الباب انطاني علاكة الحلويات ..
اخذتها وكمت حطيت جدر مي وسويت اندومي بس طلع المي هواية ونفسي مسدودة وما الي خلك اكل ..
طلعتلي بطل كزاز بيبسي وكيكة سادة
وشلت العلاكة وجدر الاندومي تلكاني رحمن : عنج ست
- جبته الكم تاكلوه
- رحم الله والديج ست ليش تعبتي نفسج
طلع عباس ..
ورحمان اخذ الصينية للغرفة : ليش ما كلتي ؟
- مجاي على بالي راسي مأذيني راح اخذ كيكة وانام
- تمام تريدين اجي وياج
حجاها وابتسم
- وين
- يعني هاف ما تكدرين تنامين
ضربته : لا تصير سخيف افتهمت
- هشش دا اشاقة ارتاحي ولتفكرين اني راح اكعد هنا
عفته ومشيت صعدت فوك ..
اتكلب بفراشي كوا نمت
كعدت الصبح ..
عباس نايم ورحمن كاعد كتله : اتركه نايم لتكعده
- اني اروح وياج ست
- ماشي
انطيته مفاتيح السيارة وطلع ضليت اباوع لعباس نايم بالفانيلة الداخلية وعلى بطنه وحاضن المخدة ..
اخذت نفس ومشيت
رحت للدوام شغل بشغل
واني كاعدة فات بابا
شلت راسي وهو يتقربلي : شلون صارت حبيبتي
- كلش متضايقة بابا شوان تعب نفسيتي جداً
- حجيت وياه ومراح يعيد الصار وكلت اله كانت وياي بالمحفل واني شفتها من وكفت ويا ابن الاستاذ .. وما من حقه يحاسبج اساسا
- معناها ليش دا تبررله انت جنت ويايا ؟
اذا مجنت يعني راح اطلع عن الطريق ؟
- اتركي عنج هالموضوع اني حطيت اسمج ايفاد للأمارات .. اكو مؤتمر بابو ظبي تحضري عني .. ومدة الأستضافة ١٠ ايام .. مدفوعة التكاليف من كل شي .. تروحين هناك شوية ترتاحين الامارات وجهة ايجابية تريحين من الضغوطات وتستعيدين صحتج النفسية
- شوكت
- بعد ٤ ايام بس دزي جوازج
- وحدي
- ليش منو حابة يكون وياج
- مو احد بس اروح احتار بالجنط والحجوزات والاماكن .. اني تدوخني هذه السالفة وتعقدني
- حطي اسم واحد من الحماية يرافقج ويشيل عنج هالأمور .. واذا تريدين حطي اسم امج مو مشكلة اخذولكم اجازة وتونسي لتبقين متضايقة ماشي بابا
- تمام
مسح على راسي وكال : قدمي الجوازات بابا حتى يفيزوها
- اوكي
طلعت من الدائرة لكيت احمد .. رجعت البيت عباس مموجود بس جوازه عندي .. لان احجز عليه دائما لما اروح هولير.
فدزيت جوازه ويا جوازي .. وقدمته
هو ميدري .. يومين الثالث اتفيزت الجوازات ..
وبلغوني السفر باجر
طلبت مخلد
اجاني : امري ست
- بلغ عباس يحضر عندي
- تأمرين ست
دا اشتغل ع الماك شوية وحضر .. دك الباب: تفضل
فات : العفو ست طالبتني
- ارجع للبيت عباس وجهز نفسك للسفر باجر
- وين لاربيل
- لا لابو ظبي
- وين يعني
- متعرف ابو ظبي وين
- لا لحظة اتذكر عاصمة يا دولة الامارات لو قطر ؟
- الامارات
- نروح للأمارات
- وحدنا
- لا وفد
- هااا .. تأمرين ست بس شوكت موعد السفر
- باجر العصر
- تمام
راح واني مدري ليش لزمني كلبي
ليش دا احطه بسفرتي .. ودا اقربه اكثر .. احس الدا اسوي كلش غلط بس نفسي مستمتعة ومتحمسة ويمكن ما اتحمست لسفرة بحياتي بكد متحمست لهذه احس راح يصاحبها شعور مختلف واللي يرافقني انسان اني متقبلته من داخلي .
رحت صالون قصيت شعري وصبغته صبغة جديدة ومعالج واظافري .. وتنظيف وجه وطلعت لماكس مول اخذت كم قطعة ملابس للسفر .
ثاني يوم .. جهزت جنطة سفري بس كلبي يدك ما اعرف ليش ومتحمسة وخايفة بنفس الوقت ..
وصل عباس ..
خابرني كتله : تمام نازله بس تكدر تصعد تنزل انت الجنطة ثكيلة مدا اكدر اشيله
- جايج
طبت ويا ام غيث صعدت وياه دك الباب ودخل الغرفة اني دا ارش عطر ..
من شفته انخمش گلبي ..
لزمها كال يابويه هاي اني راح ابتلي بيها مو
ضحكت واني اكوله : ايييي
شالها ومشى سريع نزل بيها ..
اخذت جنطتي الصغيرة ونزلت .. صعدها بالسيارة وكام يصفك بيده ونزل الباب .. ومشى كدامي فتحلي الباب صعدت
ابتسملي وسد الباب ..
وصعد كدامي .. تحركت السيارة ..
ركزت بالباب لما طلعنا منا .. جان احساس بداخلي يكولي ما راح ارجع نفسي مرة ثانية من هذا الباب .
طلعنا للمطار ..
طبك السيارة ضحكت : تتذكر
ضحك : اتذكرت من نزعتي الكعب ولبستي حذائي
- شلون شردة جانت
نزل فتحلي الباب :- تخيلي جنا شاردين من شوان
نزلت واني اكوله : غير جنه خافطفين ابنه
سد الباب وهو مركز بعيوني
حجيت : نظرات دا تخجلني
- وهو اليشوفج يكدر يشيل عيونه عنج انت صايرة حلوة لو عيوني ما جاي تشبع منج
- عيب هالكلام .. امشي
عفته ومشيت وكالعادة اصده وكلبي طاير طاير بمغازلته
مشيت هو اخذ الجنط وصاح على بنكالي .. حطهم بعربة حديد وصار يمشي كدامنا البنغالي .. واني امشي وهو بصفي ..
ردت اعثر بالكعب لان امشي سريع ويا البنغالي ..
لزم ايدي : الله الله .. على كيفج ممستعجلين بعد ساعة للطيارة
عدلت وكفتي وهو لازم معصمي باوعت لايدي حتى يتركها نزل ايده وشبكها باصابعي وكال : امشي
- بس ايدي
- واذا ما انطيتها شتسوين
يحجي واحنا نمشي
حجيت : بس هي ايدي
- يمتى يجي الوكت الاكدر اطلبها وتصير الي
ابتسمت .. مشينا مسافة واحنا شابكين ادين بعض
سحبتها لما قربنا باب الخروج .. طلعنا من الكراج دخلنا المطار .. الوفد جان بانتظارنا
اعرف بعضهم ..
نساء ورجال .. ضيفونا بالمطار بكافتريا وكعدت اني وعباس على طاولة وحدة طلبت بس كوفي .. وعباس طلب جاي
بس خجلتي مدا يشيل عينه عني ..
همست : السالفة متبشر خير اذا من اولها هيج
- مضايقج
- لا بس ايعرفوني يعني ..
- اسف
دنك وهو يكلي : حاس كلبي يريد يطلع من مكانه
حجه الشعور اللي دا احسه .. همست : ليش ؟
- ما اعرف
حطوا الكهوة والجاي .. صار يخوط اني اباوع للخاتم اللي بأيده .. حجيت : شنو خاتمك
- عقيق يماني مال والدي
- مو محمد الجبير
- اي بس اني اخذته ومعتز بيه .. باعي الزخرفة من الجوانب شمكتوب ؟
كمت اركز بيه .. مكتوب (يا علي) مزخرف من الجانبين ابتسمت .. حلو
- كدامج
- شو تنطينياه مدام حجيتها
ضحك ونزعه من ايده وانطانيا .. كلش عريض عليه ضليت اباوع بيه : راح اخذه
- اجيبلج غيره
- اريده هو
- اسويلج مثله بالضبط
- متفقين
دا احجي حطت ايدها عليه مرأة اسمها ست لمياء سألتني عن ابويه وكمت اتجاوب وياها
صار موعد الرحلة دخلنا .. وبعدها صعدنا الطيارة ..
كعد الكرسي البصفي لزك وصار كلش قريب .. الطيارة مليانة والقرب ما بيني وبينه ايده طاخة بيدي اذا اريد اوخر لازم اضل مايلة روحي حتى ميطخني ..
اقلعت الطيارة غمض عينه
همست : تخاف ؟
- لا بس تصير عندي دوخة من احس الطيارة ارتفعت
لازم بكرسي الطيارة حيل
اخذت ايده عندي فتحتها .. هو فتح
كمت امسح على راحة ايده وامشي اصبعي على خطوط ايده .. اخذ نفس واني ماخذة ايده
همست : مارجعها الك بعد
- اخذيني وياها ولا ترجعيني
تركت ايده وخجلت ..
مد ايده واخذ ايدي شبكها وعصر ايدي بأيده .. بقيت دايره عنه واباوع للغيوم من الشباك واحس كلبي طاير فوكهن .
شوية وقدمولنا وجبة اكل .. ترك ايدي والمضيفة حطت الاكل كمت افتح بيه .. ستيك لحم وسلطة وفاكهة ومكسرات .. اني اخذت الشوكة كمت اكل فواكه .
هو اكل الوجبة كاملة بس الفواكه ما اكلها
شلت وجبتي خليتها كدامه : لا لا شبعت
- ما احب اكل الطيارة
باوعلي : ليش
- هيج احس تصير عندي لعبان نفس
- راح تلعبين نفسي
هههه صار ياكل وجبتي .. كمل فتحتلا كلينكس مبلل انطيته .. ابتسم واخذ مني .. صار يمسح واخذ ايدي كام يمسحها بالكلينكس الثاني ..
احس مرتاحة كلش وشعور ماليني بالحب
وصلن مطار ابو ظبي نزلنا ورحنا استلمنا الجنط .. كوفد لكينا باص منتظرنا اخذوا منا الجنط واتوجهنا للفندق .
طلبوا من عدنا نتفضل بالمطعم على ما تجهز غرفنا .. تركنا الجنط ورحنا كعدنا بالمطعم جان دنيا ليل بس المطعم فخم جداً .
اجوي ياخذون طلباتنا ..
عباس طلب برياني لحم .. واني طلبت سلطة سيزر
وطلب نركيلا نزلوها الها مسبقا صار ينركل وهو كاعد كبالي حجه : يضايقج
- لا لا اخذ راحتك عادي .
- زين هسه اذا اريد اخابر امي شلون
- انطيته تليفوني
خابرها
- ما يصير من تليفوني
- ما اعرف
بس اتصل طمنها
خابرها وطمنها وكاللها بعدين نحجي
نزلوا الاكل اكلنا وهم جهزوا الغرف ..
صعدنا كلنا .. باوعت الكارت الغرفة ٧٥٠
باوعت بالكارت مالته ٧٥١ .. حجيت : زين يعني غرفتك بصف غرفتي
- اي حرامات
باوعتله : شكد سخيف
ابتسم .. فتح المصعد هو جر جنطتي وجنطته ومشى كدامي وصل غرفتي انطيته الكارت حطه ع الباب فتح القفل .. دخل جنطتي .. حجه :غرفتج جرباية ام النفرين ليش
- لعد اشون ؟
- ما ادري .. انت طالبة هيج
- لا
- اخذي راحتج ولو الود ودي اني اخذها
- شتاخذ ؟
- راحتج
- امشي لك سخيف
ضحك وطلع برا ..
قفلت الباب وبدلت ودخلت للحمام اخذت دوش دافي ارتاحيت .. وطلعت للغرفة بالبرنص .. لزمت تليفوني باوعته
رسالة واصلتني من عباس
كاتبلي ( كاعد اتخيلج تسبحين بصف غرفتي جاي اموت ) مبادلته الرسالة لان حسيت الكلام صار يتحول للجرأة اكثر .
بس اثر بيه الكلام ..
شسورت شعري .. واخذت روب خفيف ستن نمت بفراشي اخذت نفس .. عندي رغبة جانحة اله دا اتمنى يكون هو يمي الان انام على صدره احس بنفسه بس مو بالحرام .. اني ما احب هالطريق واصلا ميصير .. بس مدا اكدر امنع عقلي ونفسي من انو تتخيله وهو بجانبي.
دك تليفوني ..
باوعته هو .. رديت .. جاوب : الو
- ها
- شدسوين
- دا انام
- ها .. اي
صار يتنهد وياخذ نفس
حجيت : محتاج شي
- محتاجج
- شتريد
- اريدج يمي
- عباس
- لا تكليلي ما اقبل والحجي ممنوع وعيب انطيني طريقة يصير اللي دنفكر بيه مو عيب ومو حرام
- ماكو
- اكو بس انت مصعبته
- عباس
- عيونه وكلبه وروحه لج حركتيني حرك
- لتأذيني اكثر .. اريد انام
- تنكرين ما جاي تتمنيني يمج ؟ شنو اليمنعنا اثنينا كبار وواعين ونعرف اللي يفيدنا من اللي يضرنا
- بس ما اكدر
- ليش
- ما اكدر
- زين بس عقد ميخالف
- عقديش عباس مجايين لهنا حتى نعقد !
- اعرف بس رايدج افتهميني .. رايد شي يحلل البيناتنا بحيث اكدر الزم ايدج براحتي المج بحضني براحتي .. مرايد اكثر من انو .. تصيرين يمي بس
- عباس اتفهمني
- اني افتهم ومقدر وضعج بس اني ما رايد اكثر افتهمني
- عباس ما اكدر ..
- ليش تعقديها ترا هو مجرد كلام يحلل بيناتنا المشاعر
- اخاف
- من شنو
- من ان ننجرف لامور متجوز
- ميصير هالشي لتخافين .
- لا عباس ما اكدر
اخذ نفس .. هاهية براحتج قابل اجبرج
اني بس ردت تصيرين يمي مردت اكثر واذا شايفتها هواي عليه ما بلازم
- مو قصة هواية عليك بس يعني
- افتهمت افتهمت .. عوفيها .
- ماله داعي تضوج
- ما ضايج حبيبي منو كلج ضايج
كلمة حبيبي قبعت بداخلي ..
اخذت نفس وهمست : متأكد؟
- نعست تصبحين على خير ورانا شغل
- عباس
- بيباي بعدين نحجي
قفل الخط .. كعدت من مكاني اتضايقت
شسوي مو بيدي اخاف اخطي هيج خطوة ومشاعري تجرفني .. اروح اعقد عقد بدون علم ابويه صعب .
بس هو اتضايق ..
ما اعرف حقه او لا .. هو طالب نكون مع بعض واني هم اتمنى بس .. صعب كلش صعب .
ضليت الليل افكر ومتضايقة حيل
اتصلت بيه ما رد .. اتضايقت اكثر ..
شينومني ..
كوة نمت وجه الفجر ..
للصبح الساعة ٨
دك تليفوني منبه كعدت رحت للحمام ضليت جوا المي ساعة بس اريد اصحى والنعاس يروح من عيوني .. بس عبس
بدلت ونزلت جوا توجهت للمطعم
نظام اوبن بوفيه كامل ما لذ وطاب
بس روحي مطابتلها غير القهوة .. اخذت فنجان كهوة وشفت عباس كاعد كعدت بنفس الطاولة الكاعد بيها
حجيت : صباح الخير
- صباح النور
- بعدك ضايج
- لا
- شو دا احس مو على بعضك
- نعسان ما نمت
- اني هم كلش نعسانة .. بس اتصلت عليك بالليل مجاوبت كلت نايم
- اسف مسوي التليفون صامت ما ادري
- هممم
كمت اشرب الكهوة ..
هو جايب اكثر من ماعون حاط بيه اصناف ..
اخذت ماعون بيه جبن وزيتون صرت اخذ الزيتون بالشوكة هو والجبن واكل بس الزيتون قليل خلص بسرعة ..
هو انتبه كام من مكانه جددلي ماعون وزاد الجبن والزيتون وحطه كبالي ابتسمت : بس انت مأكلت
- ما مشتهي اكلي انت
- ليش
- هيج مالي نفس
- عباس انت دا تفتهمني مو
- طبعا
- يعني مزعلان
- لا بابا زعلان ليش واذا زعلان فمو منج انت مالج ذنب اني زعلان من روحي
- ليش
- لان ما اكدر عاجز
- عاجز عن شنو
- انت جاي تتمنيني واني متمنيج من الله بس ما اكدر لو ما حظي الفكر جان ما خليتج تتمنين جان فتت كدام الكل طلبتج واخذج مثل ما غيري بسهولة ديطلبج بس هي بعد الدنيا مو لكل واحد
- عباس دا تضوجني سالفة تقارن نفسك
- بابا ما اقارن نفسي بس عاجز وما راح تحسين بشعوري لان ما عايشته شعور العجز دمرني .. شنو فايدة اشوفج كدامي شنو فايدة اباوع بعيونج وكلبي يدك واتلهف واشتاق واتحسر .. كلهن مو حقي وظال .. الله كريم
- لتضوج
- مضايج منج اني والله
- حتلو بس لتضوج
- ان شاءالله
رجعت اكل ..
ردت اكوم كال : وين
- بس جاي
- اني اجيب كعدي
كام من مكانه باوعت وراه اخذ الكوب وصب جاي
مبين عليه كلش متضايق ..
اجا حطه كدامي وقرب مني اوراق السكر
صرت اكص واحط .. حجيت : شراح نسوي
- نخلص المؤتمر ونرجع ننام
- المؤتمر ب١
- سوي اللي يعجبج باباتي
- باباتي ! جديدة هاي
- اسف ست سوي اللي يعجبج
- عباس ليش دا تعاملني هشكل
باوعلي : شمعامل
- كافي لتضوج ضوجتني ..
- تأمرين ست
- عوف الست ختولي دا اتدقني بيها
هز راسه مجاوبني ..
اتضايقت حيل كلش متضايق ومدا اعرف شأسوي
بقيت اكلب بجهازي .. بس وضعه زاعجني ..
تركت وكمت من الطاولة متضايقة
رحت للغرفة بدلت ولبست وشسورت شعري وبرمته ومكياجي دققت بيه لانه مؤتمر مهم ..
ساعتين نزلت
باوعتها ب١١ ونص هو ماكو
كعدت جوا شويه والوفد اجتمع وصرنا نحجي بموضوع المشروع الجايين بيه .. ونتناقش ..
شفته طلع من المصعد ..
بس مكابلني بالطاولة الكاعدة بيها راح كعد بعيد
اتضايقت منه حيل
وحتى صرت ما اركز وياهم وشيحجون
ركزت بس بيه .. اجا الباص حتى ينقلنا
مشيت هو اجا يمي درت وجهي منه مباوعتله
صعد كعد يمي .. حس بيه متضايقة مكلف نفسه يألني شبيج !
فد ضجت حيل وكلش تضايقت
وصلنا المؤتمر كالي : منا ست
خزرته وكتله : معليك
-تمام
- لتكول تمام يلا وخر
سكت .. دخلت المؤتمر ساعة ونص مدة المختبر هو بقى برا .. مركزت ولا عرفت شكو وشكالوا بالمؤتمر ..
صرت افكر خارج السرب
هو متضايق اني متضايقة منو بحاله ومنو بحالي ؟
ليش الكذب اني دا اتمنى يصير يمي .. ويدللني ويهتم بيه ..
بس .. شنو البس
هو منو مهتم بامري
ابويا شايف حياته طول بعرض
اخوية امي .. اني الوحيدة اللي متوقفة حياتي ومعايشتها مثل ما اريد
وليش اتردد لانو ما عنده فلوس
هياتهم العدهم فلوس لعبانة روحي منهم
الفلوس شتضيفلي لو اخذت واحد متمكن واني مو سعيدة وياه ..
اني لازم اقرر واتبع نفسي واهلي اذا يحبوني راح يتمنولي الخير مو يتمنولي اللي هم يردوه ويسرون حياتي بكيفهم
اعقد مجرد عقد
واروح ابلغ بابا بيه واكوله انو هذا قراري .. يقبل بيه كان بها ميقبل بيه اني مو صغيرة حتى ابويه يقرر عني .
كافي عشت عمري كله حزن وقهر ومأساة
من حقي اعيش عمري الباقي بمثل ما احب وبرضا الله .. عاد اهلي الرضوا بكيفهم مرضىا تاليتهم يرضون .
طلعت من المؤتمر ..
هو منتظر وعاقد حاجبه
حجيت : قررت
باوعلي .. حجيت : ما عندك فضول تعرف
- كولي
- موافقة
- على ؟
- نشوفلنا شيخ يعقد النا .. بس مجرد عقد مو اكثر لحد ما اجبر بابا يقبل بأمرنا متفقيييين ؟ .....
_________
شكرا لزيارتكم عالم روايات سكيرهوم
