رواية شيخ البصره الفصل الثالث عشر بقلم مجهول
ملاحظة:- سرعت بالاحداث شوية حتى لاتضوجون
طلعت من غرفة بلسم ونزلت شغلت سيارتي وطلعت افتريت بشوارع البصره ماادري وين اروح وانه النار شابه بصدري...
شلون راح اطلكها ؟ شلون راح تعوف بيتي وتطلع ؟ معقول بعد مااشم عطرها؟ بقيت احترك عالبطيء ... رجعت للبيت ساعه ١ بليل دخلت الحوش و اشوفن البيت اظلم الكل نايمة وبس ضوه غرفتها معلوك.. بقيت واكف جوه شباك غرفتها مدري شمتاني؟
وبقيت على هالحال لحد ما طفت الضوه وأيست ودخلت للبيت.
رحت للغرفة والكه هند رايحه لسابع نومه معليها بأحد.
مددت عالجرباية وانه عيني ماتاخذ النوم.
كعدت الصبح طلعت لكيت الكل ديتريك و كالعادة بلسم ماكو
اتريكنا وهند كلساع تحط لكمه بحلكي وانه اخذها اريدن امشي الوضع حتى لاتحس بشي اذا جانت هي الي مسويتلي العمل الاسود.
كملنا و كلتلهم صيحولي بلسم وكلكم تعالو عندي قرار واريد اكلكم عليه.
الكل واحد يباوع بوجه الثاني و راحت رقية صاحت بلسم انتظرت تقريباً ربع ساعه والكل صافن عليه وبوجههم الف علامة استفهام .
بلسم:- جنت نايمه لأن مانمت زين بليل وبابي اندكت كلت ادخل
جان تفوتلي رقية:- صباح الخير خاله ابوي يكول صيحي خالتج وتعالي يريد يجتمع بينا.
بلسم:- اني عرفت شنو الموضوع الي يريد يحجيه وكل ضني راح يرفض طلبي مثل كل مره..نزلت سلمت السلام عليكم.
-وعليكم السلام.
الحجية:- وينج يا بعد خالتج مااشوفن وجهج الحلو بالبيت؟
بلسم باوعت على ضرغام وكلت:- مريضه شويه مالي خلك.
ضرغام:- انه اليوم جمعتكم بس اليوم غير عن كل يوم
اليوم اتخذت قرار يمكن كلكم راح تتأثرون بي او مامتوقعيه يطلع مني..
الحجية:- احجي يا يمه مو بطيت كليبي.
ضرغام صفن على بلسم وكال:- انه قررت اطلك بلسم واحررها مني .
الكل تفاجأ والكل انقهر الا هند الي ماكدرت تخفي ابتسامتها ..
فلاح نزل راسه بقهر
وسهاد وبثينة والبنات يبجون
حتى علاوي ركض وطلع بره
والحجية بقت ساكته تسبح و دموعها تنزل
وبلسم الي جانت تظن هالمرة مثل كل مره تطلب الطلاك و ضرغام يعصب ويرفض طلبها تفاجئت بموافقته وبقت صافنه بعيونه وكامت ومشت من دون ماتنطق بكلمه اخذت دموعها وصعدت لغرفتها.
الكل عاف ضرغام كاعد و طلعو من الصالة والحزن مرسوم على وجوههم شلون وهمه اتعودو على روحها الحلوة وطيبتها وابتسامتها بيناتهم .
ضرغام بقه كاعد بمكانه مااتحرك منه و هومنزل راسه.
عم السكوت بالبيت صبو الغدا ومحد حط لكمه بحلكه... بس هند تاكل ولا هامها شي.
للعصر ودخل علي على ابوه:- يابه اكو زلم ثنين واكفين بالباب يردونك.
ضرغام :- كام على حيله بالكوه و طلع ديشوف منو هالزلم.
اجه ابو بلسم واخوها محمد:- شلونك شيخ ضرغام..اني اجيت اخذ بلسم.
ضرغام وهو يحجي وية نفسه (شبسرعه تردين تعوفيني وترحين اقلها اصبري لباجر خليني اشبع من ريحتج بهالبيت اليوم):- اي اتفضل وهسه تجي بلسم.
دخلت وكلت لمروة صيحي بلسم ابوها اجه ياخذها.وانه واكف بالباب.
بلسم كاعده واني انتظر ابوية يجي لأن كتله تعال اخذني للعصر اندكت بابي ودخلت مروة والدمعه بعيونها خالة بلسم ابوج اجه ياخذج.
بلسم:- كمت لبست عباتي وشالي ومروة ماخلتني اشيل جنطتي
اخذتها من ايدي ونزلت واحس هالمشهد تكرر ويايه بس الفرق هالمره اني طالعه واحتمال بعمري ماراح اشوفهم بعد.
نزلت واني اشوف الكل واكف منتظرين يودعوني لا ارادياً بچيت و ركضت للحجية شفتها كاعده ولازمه عوچيتها وحاطه راسها عليها منظرها يكسر الكلب :- خالتي اشوفج بخير وبستها من راسها واني ابجي وهي تبجي ومنزله راسها .
مشيت شوي وشفت سهاد :- سهوده اختي الجبيره الي غركتني بحنيتها الام الصبورة اشوفج بخير .. وتحاضنا و نبجي.
شفت فلاح وبثينة:- اخوية الي جان دوم سند وظهر الي الله يسعدك و يوم نفرح بسلامة بثينه.
فلاح بقهر:- الله وياج خيتي لا تنسينا.
حضنت بثينه وسلمت عليها.
وكفت كبالي رقيه تبجي ردت احضنها بس عافتني وراحت تركض لغرفتها.
دااطلع وشفت ضرغام واكف بالباب ويباوع علينا
وكفت كباله وباوعت بعينه من دون اي كلمه عيونا تحجي .
قاطعنا صوت علاوي وهو يركض بأتجاهي وشمر نفسه بحضني ويبجي :- خالة لا تعوفينا احنا نحبج لا تعوفيني مثل ماامي عافتني .
بلسم:- شهكت من البجي وحضنت علاوي:-اني هم احبك هوايه حبيبي اريدك من تدخل مدرسة تشد حيلك بالدراسة ودائماً تطلع ناجح حتى افتخر بيك واكول للناس شوفو ابني شلون شاطر.
بقه حاضني مايقبل يعوفني واجه اخويه محمد اخذ الجنطة وحطها بالسيارة وابويه جرني من علاوي وصعدني وسد الباب واني اشوفهم واكفين بالباب وضرغام حاضن علاوي ويباوع عالسيارة وهي تبتعد شوية شوية.
بلسم:- انعصر كلبي وعيوني تحركني من كثر البجي.
ضرغام:- اصعب يوم بحياتي يوم فراكها احس روحي ضيعت شي ثمين جان بحياتي
شعوري شعور واحد سحبو روحه من جسمه.
دخلت لغرفتها اتفحص ركن ركن بيها باوعت بالمراية ماحسيت الا مفلشها بيدي والدم يجري.
نزلت داادخل لغرفتي وجان اشوف هند دتحجي بالتلفون ويه امها:- ولج يممممه خلصت منها مااصدكن حجي ام داوود طلع صح ......
اييي اييي يمه طلكهاااا
اخخخخخ راح اطيرن من الفرحة وكون تكمل بحملي حتى صدك اتربع واصيرن الكل بالكل..... اي اي حضرت الفلوس من اجيكم اجيبها .
ضرغام:- صرت اعصاب وبالكوه لزمت نفسي مادخلت املخها اريد دليل قوي عليها حتى اشمرها على ابوها هالكلبة.
رحت لفيت ايدي وطلعت للديوان خابرت على عمران كتله تعال .
اجه عمران وقررنا انفذ الخطة.
دخلت على هند وكلتلها حضري رويحتج نروح لأهلج عندي شغله بالناصرية اذبج يمهم وبعدها ارجع اخذج. هي كيفت ماتدري شنو منتظرها هناك.
اخذتها ثاني يوم من الصبح لبيت اهلها سلمت عليهم وذبيتها ومشيت كلتلهم عندي فصل هنا اكمل الكعده وارجع...
طلعت بسيارتي وجان عمران منتظرني براس الشارع مالتهم بقينا تقريباً ساعتين كاعدين ننتظر هناك وجان تطلع هند وامها اخذو تكسي واحنا حركنا وراهم
وكفو بمنطقه چول كم بيت بي و دخلو لبيت چنه خرابه
خابر عمران على ضابط بالناصرية يصير صاحبه وكله تعالو لفلان مكان لأن عمران متفق وية صاحبه الضابط من اول ما سوينا الخطة.
هي دقايق و الدورية اجتي و نزل الضابط وسوو مداهمه عالبيت واشرلنا تعالو وانه وعمران دخلنا وشفنا البيت اعوذ بالله ماادري شلون دخلوله هذن بنات السكط
رحت دخلت عليهن وهنه يتراجفن
شوفي انه ماراح اضربج كدام الزلم بس وحق العباس اذا ما تعترفين شدتسوين هنا انتي وامج لا ادخلج للحبوس ومااحسب حساب لا عرض ولا شيوخ.. زمخت بيها ولج احجييييييي.
حجت هند وكتت الاول والتالي وامها تدك وتلطم وام داوود لزمناها و خليناها تدلينا وين دافنه العمل واخذها الضابط يذبها بالسجن بس هند وامها ماقبلت ياخذهن لان مهما يكون هي عرضي .
اخذنه العمل و سحلت هند وامها و وديتهم لبيتهم دخلت وشمرتهن وحجيت كلشي لأبو مزهر وكتله هاي بنتك وهاي مرتك وانت اتصرف وانه بعد ما يشرفني هيج نسب و رميت عليها يمين الطلاك و طلعت ومااسمع بس عياطهن وصياحهن ابوهن ملخهن كتل.
صعدت بسيارتي وكتله لعمران انت سوق امشينا للنجف..
رحنا للنجف وصلنا ساعه ١١ بليل
فتنا زرنا و مريت للسيد وانطيته العمل حتى يفكه والحمدلله فكه وكلي الله سترك من هالعمل ولا جان حتى امراض صارت بيك وبأهلك.
اتشكرنا منه وبقينا بالنجف رحت زرت ابوي و اخوي مرتضى الله يرحمه وقريتلهم قرأن و رجعنا.
وصلنا و فلاح ذبح ذبايح لسلامتي بعد ما سولفتله هو والحجية على الي صار.
الحجية:- يمه الله نجاك من هالمله الله لا يوفقهم .
ضرغام:- الحمدلله الله و الامام ماتركوني.
الحجية:- اي يا يمه عبنك كافل يتيمه و بعمرك ما قصرت وي احد دك بابك.
مرت الايام و بلسم بعيده عني وانه احس نفسي ميت جسد بدون روح.
بلسم:-
صار شهر على رجعتي لبيت اهلي
رجعت لحياتي القديمة و صديقاتي وكرايبي زارونا
اطلع مرات وية نهى مرت اسامه لو ويه امي
وفديوم اسامة عزمنا على عشا بمناسبة رجعتي للبيت
وطلعنا كلنا وكعدنا بمطعم وفجأة وجان اشوف شخص بعمري مافكرت بيوم ارجع اشوفه.
شفت حيدر خطيبي القديم هو ومرته و مرته حامل انتبه عليه وباوع واجه بأتجاهنا وسلم على اهلي و وصل يمي
حيدر:- شلونج بلسم؟
بلسم:- الحمدلله بخير.
راح و اهلي يباوعون عليه عبالهم راح اتأثر او اضوج ما يدرون ماكو رجال يملي عيني غير ضرغام .
الام:- حسبي الله ونعم الوكيل على الي جان السبب
مجان هسه انتي متزوجه مثل باقي البنات وحامل؟
انداريت على امي وكلتلها
بلسم:- ماما برأيج هسه وكت هالحجي والله يخليج لا تتحسبين عليهم انتي ماتعرفيهم.
الام دتريد تحجي والاب قاطعها:- ام اسامة كافي هسه مو وكتها خلينا طالعين متونسين وية بنيتنا.
اكلنا و اتمشينا و رجعنا للبيت
بعد شهر بدة الدوام وقررت ارجع اكمل دراستي واهلي جانو فرحانين بهالقرار
رجعت لدراستي وشديت حيلي وصرت مرحله خامسة
جنت مكضيتها بس دراسة حتى صديقات بمرحلتي مجان عندي هواية يدوب على كد الدراسة وجانو دائماً يتقدمولي شباب واني جنت ارفض لحد ما كملت واتخرجت بدرجة جيد جداً
وبقتلي السنة السادسة الي هي سنة التخصص
مرت سنتين على فراكنا اني وضرغام بس ولا يوم غاب عن بالي .
بيوم واني راجعة من الكلية وتعبانه واجتني نهى ولج بلسم
بلسم:- نعم؟
نهى:- ولج جايينا خطار .
بلسم:- منو جاي؟
نهى :- ماادري بس يريدون يخطبوج.
بلسم:- ههههههههه مستحيل اقبل.
نهى:- زين بعدج لا شايفه الولد ولا شايفه اهله وترفضين؟ ليش بلسم تسوين هيج؟
بلسم:- نهى اني شايله فكرة الزواج من بالي خليني اكمل دراستي احسن.
نهى:- بس انتي هيج دتدمرين نفسج صح الشهادة حلوة و اني من اول المشجعين الج بس هسه انتي كبرتي لشوكت تبقين هيج؟
بلسم:- شكبرت يمعوده كل عمري٢٧ سنه .
نهى:- اي وشبقالج على ال٣٠؟ كلها ٣ سنوات.
بهالاثناء دخلت امي.
الام:- كومي بلسم بدلي هدومج ونزلي بسرعه.
بلسم:- ليش حتى استقبل الخطابة؟ لا ماما شكراً مااريد اشوف احد ولا احد يشوفني.
الام:- ولج انتي شوكت صرتي هيج عنودية و كئيبة وماتتحجين؟ وين بلسم الي جانت تضحك الهوى وينها الي مجانت تكسرلنا كلمه؟
بلسم:- بعدها موجوده بس محتاجة احد يفهمها ويطلعها من الي هي بي.
الام:- ومنو هو الي راح يطلعها؟؟؟ شيخ الفكر؟
بلسم باوعت على امي وكلت:- كملتي حجي؟ طلعه مااطلع ومااريد اتزوج افهموني عاد .
الام:- ماشي بلسم لا تطلعين بس بديت اتعصب منج و تاليتها محلوة. طلعت امي ونهى واني نزعت ملابس الدوام ونمت حتى اكل مااكلت .
ضرغام:-
جنت مخلي عمران يراقب بلسم ويجيبلي اخبارها كل فتره و مرات من اشتاقلها اروح اشوفها من بعيد بدون ماتحس مااريد اضوجها بوجودي اكيد ماتطيق تباوع بوجهي.
جنت عايش على ذكراها وما حلت مره بعيني غيرها.
بيوم من الايام قررت اروح لبغداد اشوفها وارجع
وصار الي ماجنت متوقعه .
شكرا لزيارتكم عالم روايات سكيرهوم
