رواية شيخ البصره الفصل الرابع عشر بقلم مجهول
ضرغام:-
بيوم من الايام قررت اروح لبغداد اشوفها وارجع
وصار الي ماجنت متوقعه .
بلسم:-
كعدت الصبح مثل كل يوم سبحت وبدلت نزلت تريكت ويه اهلي وسلمت وطلعت..
اجاني الخط
ورحت للكلية جان عندي امتحان كلش مهم ودرجته ممكن تخدمني بالتخصص
و عالجسر الي يودي للكلية عطلت سيارة ابو الخط
حاول عالج يريد يصلحها ماتصلحت و كللنا دبرو نفسكم تتمشون للكلية او تاخذون تكسي
اني هنا اباوع عالساعه عزززا ماظل وكت نص ساعه وتبدي المحاضرات واول محاضره امتحاني..
ظليت الوب بالشارع امشي واباوع عالسيارات ادور تكسي الكاهن مشغولات و ارجع امشي مسافه وارجع اباوع وهم ماكو اختفت التكسيات على حظي..
ورة ١٠ دقايق واني امشي بس المسافه بعيده للكلية يعني لو اموت مااوصل بالوكت..
فجأة سمعت هورن انداريت وجان الكه حيدر نزل الجامه و سلم عليه.
حيدر:- صباح الخير .
بلسم :- صباح النور.
حيدر :- خيرج اشو دتمشين وين خطج؟
بلسم :- عطلت سيارتنا واريد تكسي ماكو.
حيدر:- اصعدي اني اوصلج اصلاً اني رايح للكلية عندي شغله هناك.
بلسم :- لا ماكو داعي هسه اشوفلي تكسي.
حيدر:- بلسم اصعدي لاتضوجيني واصعدي اعتبريني اسامة يلا بعد شتريدين؟
بلسم:- من سمعته كال اعتبريني اسامة ارتاح كلبي يعني هو ماحاط شي ثاني اباله.
صعدت يمه بالسيارة بس حاشكه روحي يم الباب عبالك حياكلني ... هففف كله من ورة ضرغام خلاني احسب حساب لكلشي.
حيدر:- ههههه الله بالخير.
بلسم:-الله بالخير.
حيدر :- شلونج وشنو اخبارج؟
بلسم باوعت لحيدر وحجيت بكلبي اذا احجيلك انت اول الشماته:- الحمدلله بخير لا جديد.
حيدر:- زوجج شلونه؟
بلسم:- ابتسمت من كال زوجج اجه وجه ضرغام كبالي :- الحمدلله زين.
حيدر:- ماصار عندج اطفال؟
بلسم دنكت راسي (ليش هو احنا تزوجنا مثل العالم حتى يصير عندي اطفال) :- لا والله بعد الله ماكتبه النا هسه.
حيدر:- الله يرزقكم ان شاء الله.
اني عندي بنوته عمرها هسه سنتين و اكو مشروع طفل جاي بالطريق ههههههه.
بلسم:- ماشاء الله الله يحفظهم الك.
حيدر:- تعرفين شنو اسم بنتي؟
بلسم:- لا والله مااعرف.
حيدر :- سميتها بلسم.
بلسم :- (صار وجهي احمر بس اريد اوصل للكلية الكشره الطريق صار قصة عنتر) الله يحفظها الك.
يحجي واني اجاوب كلمتين و ١٠٠ يا الله يلا وصلت للكلية
اتشكرت منه ونزلت هي نزله وهي ركضه للقسم اريد الحك للأمتحان .والحمدلله چان الدكتور توه ديوزع اوراق الاسئلة دخلت للقاعه واخذت ورقة امتحاني وكعدت امتحن.
ضرغام:- نزلت لبغداد اريدن اشوف بلسم احس روحي مفرفحة عليها . باوعت عالساعه هسه هي اكيد بالطريق رايحة للكلية .. مشيت على طريقهم كلت انتظرها اباب جامعتها حتى لو المحها من بعيد المهم كلبي يرتاح.. باوعت صاير ازدحام ابداية الجسر الي يودي على كليتها كالو سيارة عطلانه ورة ربع ساعه انفتح الطريق..
وانه داامشي وجان اشوف بلسم واكفه بالشارع وصعدت بسيارة
عيوني احسهن طفرن من مكانهن و احتركت اعصابي اريد اشوف ويامن صاعدة اتقدمت شوية وهنا الصدمة
صاعدة وية حيدر خطيبها القديم اخخخخخ جان بودي الكاع تنشك وتبلعني ولا شايف هالمنظر
كسرت و وكفت سيارتي احس بعد مااكدر اسوق ضربت ستيرن سيارتي وانه احس كلبي محترك
ليش هيج ياربي ليش؟
معقولة تحقق كابوسي معقول طول الوكت هي جانت تحبه واطلكت مني حتى ترجعله؟ بس شلون وشوكت رجعتله واني اخبارها كلها يمي شلوووون ؟؟؟؟
ضليت تقريباً ساعه واكف عالرصيف جسمي متشنج و راسي يريد يطك من التفكير.. شغلت سيارتي ودرت ورجعت للبصره وانه الطريق كله اتعارك وية اهل السيارات
اخر شي شفت ازدحام بالمدخل و واحد بس يدك هورنات وراي
رأساً نزلت من السياره رحت عليه سحبته من الشباك ودك بوكسات سويت وجهه خارطة
هناك واجت دورية شرطة واخذتني ..
بس انه بيا حال والله لو يحطوني على حبل المشنقة مااطلبن بس يفضوني وياخذون روحي حتى ارتاح.
عمران:- اتصل عليه ضرغام وكلي هو بمركز الشرطة متعارك
انه اخوك هسه مسافة الطريق وجايك.
اخذت فلاح وياي و رحنا طيارة للمركز نزلنا شو شفنا ضرغام طالع وديسلم على رائد شرطة
عمران:- ها يا خوي شسالفة؟
ضرغام:- اتعاركت بالمدخل و اخذوني الشرطة والرائد عبدالله طلع صديقي من قره اسمي كاللهم هسه تطلعوه .
فلاح:- شسالفتك يا خوي مو عوايدك تتعارك وية الوادم.
ضرغام:- امشينا نرجع للبيت تعبان.
رجعنا للبيت وحتى ماكعدت بالديوان سلمت على امي و دخلت لغرفتي للعصر يلا طلعت منها و رحت للديوان وانه ناري ماطفت لحظة.
اذا جان عندي امل ١٠٪ ترجع بلسم هسه صار صفر.
دخلت وشفت الزلم كاعده سلمت وكعدت وانه اذا احد يطخني اجرم بي
عمران:- ضرغام خوية شجاريلك احسك مو على بعضك، احجيلي وانه اخوك يمكن اكدر اساعدك.
ضرغام:- شتساعدني ولك عمران انه انتهى عمري و راح.
عمران:- سلامتك خوية لاتكولن هيج..سولفلي مو والله طكت روحي عليك.
ضرغام:- بعدين عمران بعدين.
صارت ساعه ١١ بليل والزلم كلها راحت وبقه عمران كاعد يمي مايرضى يتركني قبل مايعرف شصاير وياي.
عمران:- وهاي احنا ها ضلينا وحيدنا يلا كلي شصاير وياك.
ضرغام :- اتنهدت وانه احس جبال هموم وحطت على راسي :- اليوم رحت لبغداد عبن اشوفن رويحتي اشتاقيتلها بس ياريتني مارايح و لا شايفها راجعه لخطيبها القديم.
عمران:- وكف وكف شنو يا خطيبها القديم؟؟
ضرغام:- هذا الوليد الي ضل يهوبز علينا من دناخذها فصلية.
عمران :- اي اي تذكرته..بس وانه اخوك الي اعرفه هي صارلها سنتين ماترضى ترتبط بأحد.
ضرغام:- عمران شفتها بعيني صاعده وياه بالسيارة وصلها لكليتها.
انه خلص لازم اطلعها من كلبي وعقلي كافي صار ٤ سنين ابوي اشتعل من قهرها...ليمتى اضلن هيج لا طايل سما ولا كاع وهي عايشه حياتها عادي.
عمران:- لا تستعجل يا شيخ اهدا وانه احس اكو شي ثاني بالموضوع مانعرفه.
ضرغام:- خلص خوية سد الموضوع مااريدن اسمع بي مره ثانيه ولا تروح لبغداد بعد ولا اريدن اسمع خبر عنها.
عمران:-
ضرغام عافني وطلع من الديوان:-
خويي الشيخ عاشكها والي شافه ابغداد دمره وانه خايف عليه هواي لأن هو مو بس ولد عمي
انه احسن ضرغام اخوي الجبير اذا يطلب روحي اقدمها اله .
بلسم:- كاعده بالليل اراجع محاضراتي و دخل عليه اسامة
اسامة :- ها حبيبتي شدتسوين؟
بلسم واني منزله راسي ولابسه نظارتي الطبيه واحجي:- ها حياتي ولا شي داراجع محاضراتي مااريد يفوتني شي لأن هالسنه مصيرية بالنسبة الي.
اسامة:- الله يقويج ويفرحنا بنجاحج.
بلسم واني بعدني منزلة راسي بالكتب:- امين حبيبي.
اسامة ديطلع من غرفتي :- عفت القلم ونزعت نظارتي
بلسم:- اسامة؟
اسامة:- نعم؟
بلسم:- وين رايح؟ رايد مني شي؟
اسامة رجع سد الباب و كعد يمها عالمكتب مالتها
اسامة:- حبيبتي اني ادري انتي هسه ملتهيه بدراستج و اكو هدف واحد كدامج والي هو شهادة تخصصج
بس....
بلسم:- بس؟؟؟ شوكت اقبل اتزوج..مو؟
اسامة:- شلون عرفتي؟
بلسم :- لأن انتو ماعدكم غير هالسيرة.. وماادري شوكت ياناس تفتهمون اني شنو اريد؟
اسامة:- الي تريديه شنو بلسم؟؟؟؟ اشكال ناس اجوج و قابلين بكل شروطج و شباب كل واحد بيهم يسد عين الشمس.. ليش ماترضين هااا؟
بلسم:- لأن مو وكتها.
اسامة عدل كعدته ولزم ايد بلسم:- بلسم حبيبتي اني ادري انتي مريتي بظروف متعبه وادري تعذبتي وية واحد همجي عنده المرة خدامه تخدم بي هو وعشيرته بس هذا مو معناها انو لازم تتعقدين تره مو كل الرياجيل مثل هذا الشخص.
بلسم قاطعت كلامه:- اسمه ضرغام
وبالمناسبة هو مو همجي وعقله يوزن بلد
وصحيح موكل الرياجيل مثل ضرغام لأن ضرغام رجل استثنائي مايشبه احد.
اسامة وهو مصدوم بكلام اخته:- يعني الي افهمه شنو؟؟؟ انتي حبيتيه؟؟
بلسم:- اي وبعدني احبه وعمري مااحب احد مثله.
اسامة:- بس الشي الي دتسويه غلط نسيتي شلون اخذج من حضن بيتج وحرمنا منج سنتين لج نسيتي عذابنا وانتي مو بيناتنا؟؟؟؟ وبعدين
تلكيه هو عايش حياته والله اعلم متزوجله ٢ لو ٣ ومخلف منهن دستة جهال بهالسنتين.
بلسم:- باوعت بوجه اسامة وعيوني دمعت:- اسامة عندي دراسة ممكن اكمل؟
اسامة باوع على اخته واتنهد:- كملي كملي الله يهديج ويفتح عقلج وتعرفين مصلحتج وين.
طلع اسامة واني مسحت دمعتي الي نزلت وية طبكة الباب جريت نفس و رجعت لبست نظارتي و اخذت القلم و عيني رجعت بكتابي.
ضرغام:- مرت الاسابيع وانه حالتي من سيء الى اسوء كضيتها بالشغل والمشاريع كل فتره افتح مشروع جديد بس حتى التهي وماافكر ابلسم.
اطلع من الصبح ماارجع الا ب١٢ بليل وحتى اولادي رقية وعلاوي صرت مااشوفهم هواي.
مر شهرين على الحدث الي صار وانه احسه كأنه البارحة
كاعد بالديوان و زلم وياي يسولفون وانه صافن وبصفي عمران و جان يحجي واحد من الشيوخ:- شيخ ضرغام ماناوي تتزوج؟ چا شنهي حلتلك العزوبية؟
ضرغام:- لا وانه اخوك ملتهي بالشغل وماعندي مجال احكن راسي .
حجه الثاني:- بس يا شيخ انت شيخنا وبعدك صغير شوفلك بنت حلال تناسبك و تزوج وترانا عبن نحبك ونريد نفرح بيك.
ضرغام:- نزلت راسي واحجي وي روحي(چا ليش هو اكو مره تملي عيني مثل ذيج الغزال؟ بس غزالي انصاد ومن زمان هم)
ضرغام:- الله كريم يصير خير .
صار الليل وطلعو الزلم واحنا مثل كل مره نبقه انه وعمران وفلاح اخر الناس
عمران:- چا شمالهم اليوم الشيوخ عليك يردون يزوجونك ههههههههههه.
فلاح:- صدك يا خوي ليش ماتتزوج وترتاح تدري الحجية ظال بالها عليك وتكول خاف اموتن وانه اشوفن وليدي ماله احد.
ضرغام ساكت
عمران:- اباوع على ضرغام حال الضيم حاله اوف ياخوي شبيدي عليك وماسويته.
بعد مرور اسبوعين
الحجية:- ولج يمه سهااد سهااااد وينج يمه.؟
سهاد وهي تمسح ايدها من مي المواعين:- نعم يمه امري
الحجية:- ولج يمه جيبيلي دواي احسن روحي مخنوكة ونفسي ضاج.
سهاد:- اسم الله عليج يمه هسه اجيبه الج.
شربت الحجية دواها وهي مو على بعضها
كومي يمه وديني لغرفتي اتمدد كون ارتاح شويه.
سهاد كومت امها و جان تتخربط عليها الحجيه.
سهاد:- فلاااااح ضرغااااام ولكم لحكوني يااااا يممممه
ولك علاوي علااااوي
علي:- ها عمتي .... يابوية جدتي شبيها؟
سهاد:- ولك روح اركض على ابوك وعمك بالديوان خليهم يجون بسرعه.
علي راح ركض :- بوية بوية جدتي وكعت بالكاع متخربطة.
ضرغام وفلاح وعمران ركضو فد ركضه شالو الحجية و ودوها للمستشفى
الدكتور:- منو وية الحجية؟
كمز ضرغام:- انه انه ابنها.
الدكتور :- والدتك تعرضت لذبحة صدرية بس الحمدلله هسه وضعها مستقر لكن خلو ابالكم ممنوع عليها القلق والتوتر و الانزعاج والعصبية .لأن اذا اتكررت هالذبحة ممكن نفقد المريضه لا سامح الله.. وراح اكتبلها علاج وان شاء الله ماتشوف شر.
ضرغام:- اشكرك دكتور .
دخلنا لأمي وانه ابوس بأيدها وراسها هاي الغالية الي ضحت لأجلنا هاي بركة بيتي و خيره اذا صار بيها شي اموتن وراها.
ضرغام:-
ها يمه شلونج هسه؟
الحجية :- مادام شفتك صرت احسن يا بعد امك.
اجه فلاح يبوس براس امه:- خوفتينا عليج حجيه يلا كومي كافي دلع مامتعودين نشوفج نايمه بفراش.
الحجيه:- والله يا يمه ماظل بيه قوه مثل قبل واحسن ايامي قربت
ضرغام:- يمه لا تكولين هالحجي عمرج طويل ان شاء الله.
الحجيه:- يمه الموت حق و جايينا لا محال
بس انه اريدن اطمن عليك ياوليدي ليمتى تظل بهالحال لا مره تداريك وتداري امورك واطفالك ؟ انه اريدن افرح بيك يا وليدي لا تحرمني من هالفرحة كبل مااموت.
ضرغام:- كافي يمه ابوسن ايدج لا تقهريني ولا تجيبين طاري الموت انتي بس صيري زينه واوكفي على حيلج والي تريديه يصير .
طلعنا امي من المستشفى ورجعناها للبيت وشوية حالتها تحسنت
وانه افكر بكلامها مااريد اقهرها واكسر كلبها.
بعد اسبوع چنا كاعدين انه وعمران وكتله:- انه قررت اتزوج .
عمران:- تتزوج؟؟؟ چا المن ناوي تاخذ ياخوي؟؟
ضرغام:- صار اسبوع افكر وقررت اخذ بنت عمي رجاء بالاقل خالة الجهال ومن ريحة امهم وأأمن على جهالي وياها.
عمران:- رجااااء؟؟؟ بس يااخوي انت ماتحبها.
ضرغام:- انه ماحبيت ولا راح احب غير وحده وهالوحده راحت وعاشت حياتها .. ورجاء تحبني ومن زمان تتمنى اخذها.
عمران:- والله يااخوي ماادري شكلك.
ضرغام:- لا تكول شي يا ولد عمي هذا هو الاسبوع الجاي راح اروحن لعمي واطلب رجاء منه.
بلسم:- استلمت درجاتي والحمدلله كلها عالية و اخيراً تقدمت خطوة بأتجاه هدفي .
ضرغام :- رحت للكاع الي بنيتها مجمع طبي يم السوك من يوم ما راحت بلسم وانه وكفت الشغل بهالمشروع وتركته لأن احسن هالمشروع مسجل بأسمها و بنيته علمودها حتى تحقق حلمها يمي وافرح لفرحتها
بس فرحتي ماتت وراحت من يوم طلعتها من البيت.
بعد مرور اسبوع
بلسم :- طلعت من الجامعة و وكفت داانتظر الخط
واني هلكانه من التعب وجان انتبه على شخص ملامحه ابداً مو غريبه عليه بقيت مركزه و تذكرت 😳.
رحت عليه و هو شافني ونزل من سيارته.
بلسم:- عمران صح؟؟؟؟؟
عمران:- اي ياخيتي انه عمران ابن عم الشيخ ضرغام.
بلسم سمعت بأسمه وجسمي كله اختض :- شعجب هنا؟؟؟ ضرغام بي شي؟ صايرله شي؟
عمران :- والله ياخيتي مااعرف شكلج بس لو تلحكين عليه لو ماتلحكين.
بلسم:- سمعته حجه هيج وكمت ارجف:- شبي ضرغام احجي شبي؟
عمران:- ضرغام ناوي يسوي مصيبه بروحه وهو مايدري.
بلسم:- عمران الله يخليك احجي بدون الغاز.
عمران:- ضرغام يريد يخطب رجاء بنت عمه.
بلسم ردت اتخربط ولزمت السياره وكعدت عالرصيف وماحسيت الا دموعي تنزل عشره عشره :- ليش ؟ ليش هيج يسوي زين واني؟ طول هالفتره انتظر منه خبر وهو ولا يمه.
عمران:- اخيتي انتي صدك رجعتي لخطيبج ؟
بلسم:- رفعت راسي هااا يا خطيب؟
عمران:- هذا الولد الي اسمه حيدر .
بلسم:- حيدر؟؟؟؟ لا طبعاً مارجعت واساساً حيدر متزوج وعنده اطفال ٢.
عمران ابتسم :-والله عرفت اكو شي غلط.
بلسم:- شنو الغلط فهمني؟؟؟
وسولف عمران كل الي صار بهذاك اليوم وهي صافنه بوجه عمران و تبجي
بلسم:- (( هو الحظ الزفت شلون يصير؟ مالكه غير يوم يشوفني بي الا بهاليوم؟؟؟ الك بيها حكمه يارب العالمين)):- سولفت الموضوع كله لعمران وفهمته ليش اني صعدت وياه.
عمران:- وانه اخوج انتي هم اعذريه يعني تره انتي هم غلطانه.
بلسم:- شسوي يا اخوية والله مجان كدامي غير حل .
عمران:- هسه المهم انتي بعدج رايدته و هو يريدج وعاشكج .
بلسم:- بس هو راح يخطب وبعدين رحمه لأهلكم مالكه غير رجاء ياخذها؟؟؟؟؟؟
عمران بضحكة:- هسه اتركي رجاء ياخيتي وخلينا نلحك على الزلمه كبل ما يوكع روحه بهالمصيبه. بس شلون ؟
بلسم ابتسمت:-
....اني اعرف شلون ....
شكرا لزيارتكم عالم روايات سكيرهوم
