رواية عشق الضابط الفصل الرابع عشر بقلم زينب نور
كعدنا ع صوت ام محمد و هي تصيح
- الساعة راح تصير ب ١٢ شوكت ناويات تكعدن ؟؟
شوي تركنا ب تعب لأن نبأ جانت سهرانة وي جعفر و ميس تفكر و اني وي محمد .
- اي عمة كاعدين !
صاحت نبأ بملل وكمنا غسلنا لكينا الكل كاعد رجعت للغرفة لبست دشداشة حلوة و مشطت شعري وشوي مكياج و تعطرت ونزلت .
كمنا ما تريكنه و بدينه نحضر للغدة چان ميس كاعدة ع الكاونتر لان تره مطبخهم كلش چبير و الكاونتر مالتهم هم !
جانت ميس تكلب ب الفون ودخلت حمزه
- صح النوم يا حلوات .
ضحكنا و هو تقرب من ميس الي ما شالت راسها من الفون
- صباح الخير يحلو .
- صباح النور .
- اي شنو قرارچ ؟
- ب شنو ؟
- بزواجنا ؟
- اعتقد البارحة كلت الك جوابي واني رافضة !
- ممكن اعرف ليش ؟
- لأن ما اعرفك ، وكافي تلح حمزه !
نزلت من الكاونتر و طلعت من المطبخ وهو بقة شوي صافن وطلع وراها .
شوي دخل محمد
- هذا شبي طلع ضايج ؟
- ميس رفضته .
- وليش عيني ترفضه ؟ تره حمزه ماكو منه ولله .
- ماله دخل محمد ، ما تعرفه !
- شوفي نرجس ، حمزه عمره ما حب ولا انعجب ب بنيه بحيث توقعنه اني ما راح يتزوج ابد ف اني نفسي ما صدكت من حمزه البارحه كلي !
- اوكي محمد بس ميس ما تعرف اي شي علي ف من حقها ترفضه !
- اي لهذا السبب سوو الخطوبة !
- محمد بله خطبو و ما عجبها و تره سمعة البنية الي فصخت خطوبتها تأثر عليها من مثل الولد !
- شهل تفكير المتخلف هذا !
- روح كل للمجتمع هذا الكلام مو الي !
- سدي الموضوع اخر شي اريده هو أن نتعارك !
بعدنا ب المطبخ و سمعنا هوسه ب الاستقبال رحنا لكينه احمد و غدير جايين ( ع أساس غدير تجي ويانا بس طلع عدها امتحان)
- هلاوو شهل مفاجأة الحلوة هاي ؟
كالت الها و ميس سئلت غدير
- والامتحان ؟
- تأجل ع غير يوم !
ميس ما تدري ب علاقة احمد و غدير بس اني ومحمد هم كلت اله نزل يوسف ( اخ محمد الاصغر عمره ١٩ سنة صيدلة مستتصرية) يسلم ووكف بنص الدرج يباوع بنظرات مصدومة ع غدير
وغدير مستغربة من عده
طلع شوي حجيه متعلثم و متوتر
- اهلا وسهلا .
غدير ردت عليه مبتسمة ب احراج
- اهلا وسهلا بيك .
محمد صيح علي
- واخيرا قررت تنزل من غرفتك بابا أنت جامعة مو لازم تطلع الاول بكلشي !
محمد يحچي وياه وهو بعده صافن ع غدير وأحمد عيونه صارت حمره من العصبية !
غدير چانت بوكتها لابسه كله اسود هاينك اسود و بنطلون اسود عريض وفوكاه جاكيت جلد اسود طالعه باد وحاطه مكياج غامق يعني حمره غامقة و مكياج شوي حاد !
چان خاله ام محمد كالت الها ومبينه نبرة استهزاء ب صوتهه
- خالة اكو واحد ميت الكم ؟ ليش لابسه اسود ؟
غدير شوي تلاسن و ما تسكت
- خالة وي الموديل ، بس اعذرچ اكيد موديلچ راح علي سنين !
ميس كرصتها من وره بدون ما احد يدري وهي واضح تألمت بس بقت مبتسمة
التفتت ل احمد وكالت اله
- مو كلت اوصلچ و اروح ؟
احمد مركز وي يوسف وكال الها وهو يباوع علي
- لا اني قررت ابقى ع الغده ، اذ ما بيها زحمه!
كلها رحبت بي و چانت غدير كاعده ب الغرفة مال خطار الي جنه نايمين بيها
( غدير )
جنت كاعدة اكلب ب الفون و مشغولة وشوي وانفتح الباب رفعت راسي شفت يوسف كدامي
- هلو .
- هلاو عيني ، تحتاج شي ؟
- لا بس دنسولف.
ضحكت وكلت اله
- اي سولف انت مبين الاصغر بين اخوانك ؟
- اي عمري ١٩ وانتي شكد عمرچ ؟
- خمن ؟
- ١٥ سنة ؟
- ١٦ سنة .
- تدرسين ؟
- اي رابع علمي .
- حلو ، شنو تريدين اصيرين ؟
- ما ادري يمكن طب اسنان صيدلة هيج يعني .
- اني صيدلة مستتصرية .
- حلو لعد راح استفاد منك ب المدرسين الي درست عليهم وشلون نضمت وقتك.
- اي عادي بأي وقت .
سحب فوني من ايدي و دخل ع الانستا كتب اليوزر مالته وسوه ل نفسه فولو
- هذا الانستا مالتي بأي وقت خابري حتى لو 5 الفجر اكعد !
- ماشي هاهيه.
باوعلي ومبتسم وطلع من الغرفة .
( خلصت غدير )
جنه نفرش السفرة و نحط الاكل وهل سوالف والكل كعد و لا حمزه شال عينه ع ميس ولا يوسف شال عينه ع غدير و احمد شويه ويتعارك !
الكعده جانت سترس و وتوتر الف !
لمينه السفره و شوي ودخلت ميس للمطبخ كالت ل حمزه الي جان كاعد يشرب چاي ب المطبخ ويسولف ويانه
- اني موافقة حمزه !
الولد شرك ب الجاي من الصدمة كام يكح وباوعلها ب صدمه
- كولي ولله ؟
- ولله راح اتعرف عليك بالخطوبة واذ ما توافقنا نفصخ ما بيها شي .
- وشعجب وافقتي ؟
- كلت انطي فرصة ل نفسي اتعرف ع شخص زين , وابتعد عن العلاقات التوكسك الي بحياتي!
- خوش قرار هاهي اليوم بليل جايين نخطب !
- لا خليها باجر لأن اليوم احنه هم راح نبات يمكم ف باجر من نروح الصبح اكول ل بابا وبليل تجون .
- هاهي ع الخير و البركة !
احنه باقين صافنين عليهم وشوي و طلع حمزه واني كلت اله بصدمة
- ميس شنو الي غير رأيج ؟
- شوفي نرجس الولد مبين حباب و هم عنده مستقبل وتحسي رزين وصدك رجال و همات هذا الزواج راح يخدمچ لأن بعد ما نصير اصدقاء العائلة مدري شنو راح نصير أهل وكرايب ف فرصتچ وي محمد راح تقوى أكثر!
التفتنا ل نبأ الي جانت تفكر بعمق
- ها نبأ انتي شنو رأيج ؟
- شلبس ب الحنه ؟ مالي دخل جعفر يجيب الي فستان جديد !
شكرا لزيارتكم عالم روايات سكيرهوم
