رواية كبرياء شيخ الفصل العشرون بقلم زينب
كمره:بعد ما باسني وانه تخدرت اول مره واحد يتجرأ يسوي وياي هيج فقدت الصيطره تماما يـ؏ـنـي ذبت وانه بين ايدي هاي انه كمره القويه
ضعفت فجأة وردت اوكع بعد رجلي ما حملني عاد هو حس علي وكال
احمد: الله الله شبيج
بعدنا بِسْم الله هاي عود استفتاحيه
كمره: شسويت انت
احمد: شسويت عادي اصلا احنا متأخرين المفروض من زمان نخطي هاي الخطوه
كمره: رجعني لأهلي
احمد: لزمتها من خصرها وقربتها الي وكتلها
بعدج دايخه لو رجعتي طبيعيه
كمره:ليش بستني
قرب شفايفه يم أذني وحسيت بأنفاسه الحاره وهمس
احمد: معقوله ما فهمتي لسه
كمره: شفهم احجي بصراحه انت ليش غامض
احمد: يجي يوم وتعرفين كل شي
كمره: الله يخليك عوفني ﺂﭑ͜ࢪﭼـِٰ̲ـ؏، لهلي هسه ظال بالهم علي
احمد: ما جاوبتيني
كمره: على شنو
احمد: تلبسين العبايه
كمره: لا تضغط عليه خليني البسها من ذاتي واذا على ملابسي أوعدك كله مستور وما راح اخجلك ابد
احمد: براحتج ما راح اضغط عليج حتى لا تكولين علي همجي راح انطيج وقت
كمره: راح تظل حاضني لشوكت
احمد: هاااا اي صح ما حسيت على الوكت وياج ما اعرف ليش يتبخر
عفتها بس هي شنو بعدها مايعه خرب ابليسها من بوسه ماعت جا شلون .....
(انتو افتهموا عاد)
كمره:عافني وراح اخذ ملابسه حتى يلبس وانه كوه مسيطره واكفه شويه واجى وهو بس يضحك علي وغمزلي
كمره: عززززا شيخ شبيك تضحك عليه
احمد: هيج
يلا امشي ننزل نتغدا لا توكعين علي مره ثانيه
كمره: انه خجلت منه وهو ولا همه صدك ما يستحي ومستمر يضحك
احمد عفيه لا تسوي هيج يمهم والله اخجل هسه شيكولون عليه
احمد: شيكولون عادي لا غلط ولا حرام
كمره: فتح الباب ونزلنا وانه الخجل موتني ومدنكه راسي ماارفعه عبالك مسويه مكسوره وخايفه انفضح صاح على هديه وكله تحضر الغدا وتجيبه للصاله دخلنا انه وياه للصاله لكينا الشيخ والشيخه وعمار كاعدين سلمنا عليهم وهما شكلهم فرحانين
الشيخ: بويه هلا وكل الهلا بجنتي وبنيتي يوم المنى واشوفج هيج يوميه تنزلين يمي
احمد:• ﺂنٰ شۨـِﺂءۙ ﺂللـِه۫ہ يابه عن قريب هانت
عمار: يعني انفكت العقده
احمد: والله من يمي انفتحت بس من يمها الله اعلم
الشيخه: شنهي من يمها والله العب فلك بيها اذا اجلتو بعد
كمره: اباوع لأحمد بدي اكوم افترسه فجر قنبلة وانسحب بالله انه هسه شجاوبهم
احمد: شوفي يمه ما عجبها الحجي وانتم تلوموني كله مني هاي يمكم احجوا وياها
الشيخ: بويه كولي ليش تأجلين وشنو رايده
كمره: عزااا هذا السوى وين انطي وجهي
لا شيخ مو هيج انه شعليه
الشيخه: اخاف ناويه تزعلين هم بعـٌـــٌِـ🙈ـٌَُّــًٍــٌّْـد. وانتي زعلج اشهر مو ايام
كمره: لا شيخه والله انه معليه سوء تفاهم صار والشيخ على بخته كبر السالفه
احمد: هاي انه كبرت السالفه
كمره: جا انه
عمار: هوب هوب كافي لا تكبون ما عولنا تتحاجون يابه وانتي يمه مو وكت هذا الحجي خليكم محضر خير وحددوا يوم العرس وخلصوا السالفه
لا يصير شي جديد
الشيخ: هم صدك والله بويه بس انت على راسي
كمره: اسمعهم يحجون ويحددون وانه كلش تحملت على احمد ذب كل السالفه براسي وملص منها بس هين وين يروح مني
جابت هديه الغدا تغدينا انه ما اكلت شي استحيت اول مره اكعد اكابله واكل كلش استحيت منهم ما متعوده عليهم بس بوكته والله جنت جوعانه والأكل جان طيب برياني وانه اموت علي بس كابرت خلصت كمت اغسل رحت للمغسله وشويه حسيت واحد حاوطني وانه على المغسله وظل يغسل ايدي وخله راسه بركبتي وانه بوكته تصنمت ما كدرت أتحرك وحجيت بكلبي اليوم شبي وياي شلون واحد جان صايم وفطر
تقرب يم اذني وحجى بهمس
احمد: شبيج خشبتي
كمره: ماكو شي
احمد: يله حتى نروح مو صرعتيني على اهلج
كمره: وخررر
شلون اتحرك وانت محاوطني
احمد: تحركي يمج انه
كمره: اي وخر شلون قابل أطير
احمد : هااا اي صح ما حسيت على روحي
كمره: هااا انت اليوم الظاهر مو بوعيك
احمد: اي والله بهاي صدكتي
وخرت امشي اوصلج قبل لا يجون الزواحف
كمره: منو هما
احمد: وسام وصديقي ثنينهم نفس الطكه
كمره: هذا الجان واكف يمك
احمد: شلون عرفتي بس لا جنتي تباعيله
كمره: اباوعله شنو لا يروح فكرك لغير شي بس هو قبل لا تطلع وياه سألني على غرفتك
احمد: وانت شعليج حتى يسألج
كمره: انت ليش عصبي وما تتفاهم وانه وين اعرفه اصلا شافني طالبه وسألني وانه جاوبته قابل كفرت
احمد: اي كفرتي
اذا عدتيها مره ثانيه هل مره سماح يله كدامي امشي
كمره: قابل شسوي اكتب ورقه واخليها على كصتي واكتب ممنوع الاقتراب خطر
احمد: هو مو صوجج كله مني لوما معاند جا هسه انتي هنا
لا كليه ولا دراسه ولا هم يحزنون
كمره: تعرف اكو مقوله لإمام علي(عليه السلام ) يكول
لا تندم على شيء فاتك
احمد: صايره تنطين حكم ومواعظ وتراددين هم
كمره: ما ارادد بس حجاية الحق تزعل
وبعدين تعال شلون تكلهم كله مني ليش ذبيتها براسي
احمد: ٲℓانــتيہ السبب
كمره: انه
احمد: اي
لا تسوين روحج متفاجأة منو صرخت وهددت وكالت اكتل روحي وجفصتي هواي بالحجي كله تعرفينه لا تخليني أعيده
كمره: انه شمدريني بت عمك جذابه
احمد: ٲℓانــتيہ غبيه المفروض تستفسرين مو تهجمين
كمره: والله بعد ما اتحمل حجايه منك
عفته ورجعت للصاله راح هو جاب سويج السياره واجى وطلعنا وصلني لأهلي ونزلني وكال
احمد: تلفونج يمج وباجرانه اخذج للكليه
كمره:عود افتح الحضر اول مره
احمد: هههههه • ﺂنٰ شۨـِﺂءۙ ﺂللـِه۫ہ ٰ أوامر ثانيه
كمره: سلامتك
دخلت للبيت قبل لا افتح الباب انفتح بوجهي وانجرت ايدي
فهيمه: تعاي ولج شنهي هاي التطورات وانه اخر من يعلم
كمره: خاله والله خرعتيني مت بدمي
فهيمه: ولج انه صارلي ساعه كاضه الباب وين سجيتي
كمره: خاله خل ابدل ملابسي واسبح اليوم تعبت والله من ارتاح احجيلج كل شي
فهيمه: روحي وانه اليوم ما اروح لو اعرف ابات
كمره: رحت سبحت وبدلت ونمت شوي وكعدت اذكرت ناسيه تلفوني مخلص شحن اخذته وخليته على الشحن وطلعت لكيت اهلي كاعدين بالهول ويباعولي بنظره كلها تساؤل كلت ما دام كلهم مجمعين خل اكت كلشي
وكلتلهم كل شي ما انكر ما فرحوا بس ابوي حجى
ابو صلاح: بويه ٲℓانــتيہ هل مره واثقه من قرارج احنا عفناج المره الفاتت على راحتج ما ردنا نضغط عليج بس هل مره تختلف ما اريد بعد يومين تجيني وتكولين ما اريده ومن هذا الحجي ما اريد اتفاشل ويه العالم
كمره: لا بويه واثقه
وانه اسفه لأن خليتكم بموقف صعب كدام الشيخ واهله واوعدكم بعد ما تتكرر
كمت بست راس ابوي وامي وحضنت اخواني جانو طول فترة الزعل هما متكلين على مودي
اباوع لخالتي تضحكلي وتغمزلي وفرحانه حتى اكثر مني وانفتح موضوع زواج اخوي صلاح يحب بنيه وراح اكثر من مره خطبها بس اهلها ما قبلوا بالأخص اخوها رافض تماما والسبب هم انه لأن خطبني ورفضت فقرر ينتقم مني بهاي الطريقه ما يدري هاي تضر اخته هم بس قررت انه احل الموضوع على طريقتي كتلهم راح اكل للشيخ هو يحجي وياهم اكيد ما يردوله طلب
وكالعادة كعدت يوم ثاني غسلت وفرجت أسناني وبدلت لبست فستان بينصل شوي قصير وبوت لأن جان الجو شتا وبي بروده بس مو كلش احنا البصره قليل شتانا ولبست ستره جلد قصيره يـ؏ـنـي طلعت كيوت انه صح بنت ريف بس لبسي كلش مرتب احب اتأنق وما خليت مكياج حتى الكحل خففته مالي خلك مشاكل من الصبح ادري بي بس يشوفني يطلعها من خشمي وخليت مرطب شفه وطلعت تريكت وشفت صلاح وكتله انت اليوم خلصان مني بسته من خده واطلعت لأن سمعت الهورن بس شافني خنزر ما اهتميت شسويله مكياج وما خليت بعد شسوي صعدت يمه وكلت
صباح الخير هو ما رد ظل بس يتأفف كتله شبيك من الصبح
احمد: ٲℓانــتيہ شفتي روحج من طلعتي عدل
كمره: اي شفت شبيه مكياج وما خليت شتريد بعد
احمد: ولبسج هذا
كمره: شبي والله حلو
احمد: انه كلت مو حلو شبيج بابا ٲℓانــتيہ انه اكلج لبسي عبايه تجين بهذا اللبس الي مفصل جسمج كله ٲℓانــتيہ تحبين تعانديني
كمره: لا والله بس هذا لبسي انت حاول تتعود علي
احمد: يا صبر أيوب
كمره: شيخ اطلب منك طلب
احمد: كولي
كمره: كتله على موضوع اخوي صلاح كله وهو سأل
احمد: هي البنيه تحبه
كمره: هو ما بينهم علاقه بس إعجاب من الطرفين أخوي ما عنده سوالف حب ما حب راد الشغله تكون رسميه كدام العالم
احمد: ليش رفضوا لازم اكو سبب
كمره:هاااا
اي لازم اكو بس انت شيخ اكيد تأثر عليهم
احمد: شنو السبب
كمره: الا تعرف يـ؏ـنـي
احمد: طبعا شلون اتصرف لازم اعرف السبب
كمره: .....
احمد: هاي السكته وراها انه مو
كمره: اخاف اكله وينكلب طنطل عليه هسه انه شدخلني راح أحط نفسي بمصيبه لا على البال ولا على الخاطر
احمد: احجي وراج بلوه مو
كمره: شيخ راح اكلك بس ﻋﻠﻴﻚ العباس لا تعصب
احمد: ٲٳٲسـ๛ۖــۖـتغفـر اللهہ
بابا احجي لا تزهكيني
كمره: هو اخوها الرافض بسببي
هو سمع هيج وهو بسرعه كض بريك انه انطك راسي بالجكمجه وكلت اخ على كيفك
هو ظل يباوعلي وعيونه كلهن شرار وانه لازمه كصتي وافرك بيها
احمد: ليش ٲℓانــتيہ السبب احجي كلشي بصراحه
كمره: كتله كل شي هو انوب عصب بالزايد وظل يضرب على الستيرن بكل قوه وانه اشاهدت استاهل انه جبتها لروحي ردت احجي سكتني بسرعه وكال
احمد: اششش ولا كلمه
كمره: كتله انه شعليه ليش دائما تحملني ذنب هي اي بنيه تنخطب وانه شمدريني يظل حاقد علي
احمد: كتلج سكتي ما اريد ااذيج خليني اهدأ وانه اتصرف
كمره: سكتنا طول الطريق بس هو ولا باوع لوجهي وصلنا قبل لا ننزل كال
احمد: انه وياج هنا واحد ما يعرف الثاني ماشي
كمره: ماشي على راحتك
احمد: من تخلصين محاضرات خابريلي
كمره: • ﺂنٰ شۨـِﺂءۙ ﺂللـِه۫ہ ٰ
نزلنا هو راح للأداره وانه دخلت للقسم بس كل الطلاب تباوعلي اذكرت شنو صار امس حقهم بس لازم يعرفون انه منو بالنسبه اله ما اريد اصير علج بحلوكهم شافتني هبه اجت تركض جرتني من ايدي حيل وأخذتني للقاعه جانت اول محاضره عدنا دكتور سيف دخلنا كعدنا على الستيج وكالت احجي كتلها شحجي
هبه: ايااا بذات وانه معتبرتج صديقتي واسولفلج على كل شي وانتي ضامه علي بلاوي
كمره: باوعتلها وضحكت
هبه: انوب تضحك احجي من شوكت علاقتكم
كمره: يا علاقه ماكو هيج حجي
هبه: تحجين لا اهفج بالكتاب
كمره: هههههه خرب شوف وجهج راح تموتين
والله ورى ما تخلص المحاضره احجيلج كلشي وعد بس هسه الدكتور على جيه
هبه: وعد شرف
كمره: وعد شرف
دخل الدكتور سيف وظل انه احب محاضرته كلش يفهم وهو حباب ويسولف ويانا ويسأل يـ؏ـنـي ضاربها ميانه عكس العله العندي بس اعصاب ونرفزه ومسويه خوفه بالوادم خلص شرح على وكت وظل يسولف ويانا ويسأل دار علي وكال
سيف: يابه مبروك ليش هيج ضامين علينا قابل راح نحسدكم
كمره : انه هنا متت يا كاع انشكي وبلعيني شلون عرف اي اكيد هو كاللهم
كتله هااا دكتور ما صارت فرصه
وهاي هبه شبعتني كرص موتتني
سيف: يابه تستاهلين وشايفين الف خير ولا تنسون عزمونه عود انتو شيوخ وأهل كرم
كمره: تدلل دكتور
خلص محاضرته وطلع وانه البنات دارن علي كلهن هاي تسأل شنو وهاي شلون صارت وهاي تكلي ليش ماكلتي كوه خلصت روحي منهن
طلعنا انه وهبه رحنا كعدنا على مصطبه وحجيت الها كلشي مم اول ما بلشت عداوتنا لحد اليوم الصبح
هبه: وانه اكول اكلتي الرجال اول ما دخل اثاريج مو خاليه
كمره: والله بوكتها جنت متفاجأه ما ادري بي اصلا يدرس ما جان متعين
واحنا بوكتها جنا منفصلين واحد ما يعرف عن الثاني شي
هبه: ومن نزف خشمج دم وانه تعجبت اجى طلعني من المحاضره وظل يسأل عليج وخلاني اخابرلج كدامه حتى يطمن
كمره: هاي شوكت
هبه: من رحتي للبيت
كمره: يـ؏ـنـي مخططين سوة علي
هبه: لا ولج سليمه
جان خايف عليج وجها ما يتفسر راد بس يطمن وهو كلي ما اكلج
كمره: يله مادام خلصت تحقيق امشينا لا نتأخر ونحصل رزاله راح تبلش محاضره
دخلنا جانت محاضرته دخل كالعاده اعصاب وبدى يشرح ولا جنه يعرفني خلص وطلع
هبه: اكلج عندج شي هسه
كمره: لا شعندي مثلا
هبه: امشي نروح للكافتريا ناكل جعت
كمره:روحي وحدج ما اريد اشوف العقده
هبه: عفيه امشي وياي منو يكول نلكاه
كمره: نلكاه حظي واعرفه كلش زين اسود
هبه: شعلينا بي قابل راح ياكلج
كمره: لا وما خايفه منه بس اخاف لا تصير مشكله وانتي ما تعرفين احمد والله ما ينجرع كفيني شره
هبه: اذا ما اجيتي وياي ازعل عليج ولا احجي وياج بعد
كمره:ليش تلحين ٲℓانــتيہ ناويه على خرابي
هبه : ولج معليج بي
كمره: امشي امري لله
رحنا مشينا وانه خايفه اصادفه دخلنا ماكو شي بس شفت من بعيد احمد اجى وكعد هو والدكتوره ساره ما شافني بس انه ظلت عيوني عليهم
هو وياها عادي بس هي مبينه من تصرفاتها تكل لأمها وأبوها ميته علي وانه من يمي ميته ردت اكوم املخها بس شسوي هو مانعني وما اكدر حتى اروح يمه شطت وهاي هبه شوطتني بالزايد تكلي
هبه:ولج شوفي بدها تكعد بحضنه
كمره: هبه سكتي انه روحي فايره
هبه: ولج هاي لو انه اكوم واسحلها من شعرها عليها حلال وعليج حرام
كمره: انه رايحه
هبه: ولج تعاي اشاقه وياج لا تروحين
كمره: انه ما رايحه الهم رايحه للمحاضره
هبه: يااا وانه عبالي رايحه تسحلينها
كمره:خليهم يشبعون نارهم تاكل حطبهم
كمنا رحنا وعفناهم وانه تعمدت فتت من يمه كلش صارت عيوني بعيونه وخزرته خزره تسوى حياته وهي تباوعلي بشماته دخلت للمحاضره وكملت كلت ولا اكله خلصت خابرت على صلاح يجيني كتله احمد ما يكدر يطلع عنده محاضرات شويه واجاني صلاح ركبت وياه
وديتله رساله كتله اجى علي اخوي ورحت وياه لا تكلف نفسك اخاف اعطلك عن شغلك
احمد: جنت كاعد بغرفتي اصحح اوراق الامتحان واجتلي ساره كالت تريدني بشغله عدهم مشكله وعرفت انه شيخ عشيره واكدر احل مشكلتها كالت احسن شي نكعد بالكافتريا حتى اسمع مشكلتها واعرف احلها رحنا وكعدنا ما جنت أتصور اشوف كمره هناك بالبدايه ما شفتها بس بعدين من كامت وشفتها وشفت خزرتها الي عرفتها غيرانه بكلبي فرحت جا بس ٲℓانــتيہ موتتني من الغيره عليج بس ما تصورت غيرتها قويه من شفت رسالتها متت ضحك وكلت
واخيرا راح اخليج تستوين على نار هاديه
رجعت للبيت تعبان من الدوام تذكرت شغلة صلاح لازم احلها اله اتصلت علي وكتله يجيني للمضيف العصر سبحت وبدلت وتغديت ونمت ساعه واكعدت رحت للمضيف شفته كاعد سلمت علي وحجالي كلشي كتله سهله ومحلوله لا تشيل هم دكيتله صدر هي الك مو لغيرك واجى ابوي هم كلناله واتفقنا على يوم نروح وناخذ كم شيخ بعد ويانا سيد ابو راشد صديق الوالد هم كلمته مسموعه وابو صلاح هم ويانا
اجى اليوم الي نروح بي التمت العالم عدنا ورحنا على بيت البنيه اهلها خوش ناس بالبدايه عارضوا تالي قبلوا بس اخوها كمز من بين الناس وكال ما عدنا مره للزواج عرفته نفسه الجان خاطب كمرتي ابوه واخوانه يكعدوه ويهدوه وهو يطفر على روسنا خصوصا من عرف انه منو اخر شي عاف الناس وطلع وابوه كال مالكم شغل بي البنيه الكم بس أنطوني مهله أقنعه
طلعت وانه روحي طافره منه وكلت بكلبي هاي البنيه جكد حركت كلوب
هم يجي يوم وتحرك كلبي
جا غير موتها يصير على ايدي
رجعنا وانه صارلي مده ما حاجي ويه كمره هي سوتها شغلة زعل واحنا بالكليه عبالك اغراب اشوفها بس بالقاعة وانه ومرات المحها هي عاندت وانه اعند منها بس الى متى لازم اخلي حد لكل تصرفاتها هي مو طفله وانه بديت احبها وتعلقت بيها وأحس البعد عنها يأذيني قررت احدد موعد زواجي وحجيت ويه اهلي كلهم فرحوا خو امي ما سايعتها الفرحه وسام كام يركص ويدبج وما يعرف شيسوي بس شفت عادل دنك انقهرت علي وقررت أقنعه يرجع يخطب سلمى مهما يكون هي بت عمي وهو اخوي هسه اكيد تعلمت من غلطها وعمار رجع لبغداد يكمل الكورس البقاله حتى يتخرج بس ما دزيته لوحده راح هو وابن عمي مرتضى وشكم زلمى من زلمنا مثل الحرس هي كم شهر وتعدي
قررت احجي وياها واكللها دكيت تلفون عليها مره ومرتين والثالثة ياله شالت هاي عادتها ما تبطلها
كمره: الوووو ( بنعاس)
احمد: الووو جنتي نايمه
كمره: اي
احمد: صح النوم بعد وكت
كمره: الساعه وحده باجر وراي دوام شنو حلمت بيه ودكيت
احمد: اي شفتج تخنكيني
كمره: تستاهل الخنك
احمد: اهاااا
بالله ليش شمسويلج
كمره:تعرف شمسوي
احمد: ههههههه
كمره: ترى نرفزتني دكيت حتى تضحك علي
احمد: احب انرفزج
كمره: تصبح على خير
احمد: لا ولج وين بعد وكت
كمره: شتريد والله نعسانه كوه فاتحه عيوني
احمد: باجر انه اجي عليج عندي وياج موضوع مهم
كمره: ماشي تريد بعد شي
احمد: اي
كمره: شنو
احمد: فد بوسه صغيره هيج لا على البال ولا على الخاطر
كمره: انت صاير منحرف روح للدكتوره ساره تبوسك
احمد: هههههههه
كمره: طاح على كلبك ماي بارد هاي حبيبة كلبك
احمد: شعندي غيرها على الاقل تحبني مو مثل بعض الناس حتى سلام ماكو
كمره: هاي انه هيج
روح اشبع بيها شكو جاي علي
احمد: انه كلت اسمج
كمره: انت تقصدني اكيد هاي كلها بسامير
احمد: يا ريت تفيد روحي خمدي احسن الج
كمره : شخمد طيرت نعاسي انت ودكتورة كلبك
احمد: ههههه لهل درجه كبت الغيره عندج
كمره: رايحه اخمد احسن الي
سديته وكتله انه اعلمك اذا ما خليتك تغار نفس ما هسه انه ميته يصير خير
طارت نومة عيني وظليت افتر بالغرفه شلون المخبله ما نمت لحد الأذان كمت صليت ورجعت انام وقت النقال للسته ونص
دك النقال توني نايمه حتى ما شبعت نوم الله لا ينطيك يا احمد كمت بدلت وتريكت وطلعت لكيته بالباب نازل من السياره لابس بنطلون اسود وقميص زيتوني ورباط وجاكيت طالع يخبل جان منتجي على السياره ولابس نظاره وباوعلي وضحك اشرتله شكو كال اصعدي
صعدت بنرفزه وهو مستمر يضحك وانه اشتعلت بنار
كمره: اكلج شايفني قرد من الصبح وتضحك علي
احمد: هههه احلى قرد
كمره: كول شعندك من موضوع
احمد: شعندج مستعجله اليوم كله النا من نرجع نحجي
كمره: ارجع وياك
احمد: اي وغصبن عليج اذا سمعت كايله لخوج اكسرج واكسر سيارته
كمره: اي مو تايهيلك
احمد: شهل نبره لا تخليني اعلي صوتي عليج ولا تجاوزين حدودج وياي
كمره:انت هذا الفالح بي بس تصيح وتهدد وتعصب وكلشي ما مفتهمه منك
احمد: من اسلوبج ما تعرفين تصرفين
كمره: اسكت عنك احسن الي
سكتت عنه ودرت على الجامه جكد جنت مشتاقتله وميته على شوفته
وصلنا للكليه ونزلنا وكال
احمد: كمره الله عليج اليوم لا تصرفين من راسج وكافي زعل ما مليتي
كمره: ما زعلت بكيفي انت تجبرني
احمد: شفته رادت تبجي كرصتها من خدها وكتلها وداعت هاي العيون الحلوه والخدود الحمره ما تحلى بعيوني مره غيرج لا ساره ولا عشره مثلها
كمره: اول مره اسمع هيج حجي حلو منه خجلت وباوعتله جاي احجي وسكتني
احمد: لا تحجين شي هسه ادري بيج تلوصين كلشي كملي محاضراتج ويصير خير ولا تنسين تخابريلي
كمره: ماشي
عفته ومشيت دورت على هبه ما شفتها جان اول محاضره عدنا امتحان رحت للقاعه ظليت أراجع لحد ما اجت هبه وياها شلة بنات سلمت علي وكالت
هبه: صباحو حب
كمره: صـُ̲ـٰبـٲحَ الــُ̲ـٰنـَوٓ୬ر
هبه: خيرج اليوم وجهج يضحك
كمره: هيج ماكو شي مثل كل يوم ٲℓانــتيہ اليوم غير شكل وهاي البنات شنو
هبه: صاحباتي جانن وياي بالسادس وافترقنا واليوم قررنا نلتقي ونروح نتغدا بمطعم واجيت اسألج ترحين ويانا بعد الامتحان ونرجع قبل لا ينتهي الدوام
كمره: لا روحوا انتم اكيد احمد هسه ما يقبل
هبه: هو قابل شمدري نروح ونرجع بلا ما يحس
كمره: لا حبيبتي كلشي يعرف واذا عرف رايحه وياكم يذبحني على جبلة الصبى
هبه: كيفج مو وجه نعمه انتي
كمره: كملت الامتحان وراحوا ظليت وحدي رحت للمكتبه اخذت كتاب احتاجه وكعدت تقريبا ساعه ورجعت عندي محاضره كملت المحاضره وطلعت ردت اروح لأحمد اكله خلصت لأن تلفوني خلص شحن
وانه امشي صادفت سجاد كبالي جاي اعبره بس شو هذا وين ما اروح يصير كبالي كتله بلا زحمه ﻋﻠﻴﻚ اريد افوت
سجاد: ما تفوتين
كمره: ٲٳٲسـ๛ۖــۖـتغفـر اللهہ انت شتريد
سجاد: اريدج
كمره: وانه ما افيدك
سجاد: هه ادري ٲℓانــتيہ تباعين للعالي
كمره: شتقصد
سجاد: تدورين شيوخ ودكاتره
كمره: احترم نفسك واحجي عدل وخر من طريقي
سجاد: ما عجبج الحجي مو شفت ثكلج واخلاقج عبالي تختلفين طلعتي حالج حال العبريه
كمره:انت شنو ما عندك شغله غيري ماكو احد يردك ومو انت تقيم اخلاقي انه اعرف • رﯛحـ̲ٓۛـي زين وهسه وخر عن طريقي خليني اولي ترى وصلت حدها
سجاد: ٲℓانــتيہ شايفه روحج لا عبالج عندج علاقه ويه دكتور كلتي هاي هي ادوس على هذا وذاك ترى اصحي باجر يشبع بيج ويشمرج واذا شمرج انه موجود اسد الفراغ ماشي يا حلوه
كمره: أيا حقير انت صدك ما تستحي وما مربى وما عندك كل تربيه بس يجوز هاي أخلاقك وعبالك الناس كلها مثلك روح تعلم الأدب وبعدين تعال انطي محاضره
سجاد: عفت الأدب والأخلاق الج يا متربايه
كمره: ما تحملت حجيه نرفزني ضربته راجدي بدون وعي يسوى حياته
كدام الطلاب
شفته عيونه صارت حمر رفع ايده يريد يضربني وما اشوف الا .....
شكرا لزيارتكم عالم روايات سكيرهوم
