رواية خيط الدم الفصل الثاني والعشرون بقلم زينب طالب
جرُوح الگلب كِلش مغمچات
...........
شفق
نايمة على رجلة واسولف وهو يلعب بشعري سألتة استفسر منة
:: صارم
صارم :: عيونة
:: امي رجعت لبيتهاا هم عرفت؟
صارم :: رجعت وقبضوا عليها ساعات وطلعت شلون محد يدري
::شنو طلعت يعني ماتحاسبت على السوتة؟
صارم :: لعرفتة من اكرام لان امهاا ماعليها شي طلعت روحهاا منهاا
:: يعني شنوو راح حق جوري؟
صارم :: ميروح ميرووح امچ الا ماتنزلم اذا مو هسة بعدين الها يووم خاصة هالفترة
جاي تلعب وية روس كباار الا يعلسوهاا يلة ترتاح
:: شنو تقصد فهمني شدسوي يعني؟
صارم :: هذا الكلب جاي يذبهاا بمصايب وهية مطيعة الة شيگول تنفذ بدون اعتراض
:: ليش تسوي هيچ معقولة تحبة؟
صارم :: يا حب هم ذولي شكول حب
:: لعدد شنو لازم عليها لزمةةة
صارم :: بالضبط لزمات مو لزمة وحدة بس متگول تبين للناس هية تحبةة بس المظموم اكبرر
:: اخخخ صارم والله تعبت منهاا حتى منك استحي من تصرفاتهاا
صارم : اي مو امي علوية وتسنحين من امچ شو اثنينهن من نفس الطهارة
:: الله ياخذهن
صارم :: امين ، يلة تعالي هواي حچينة خلي نفعل هسةة
:: شنفعل سالمين لا تصير منحرف
صارم :: مشتاگلچ وداعة عيونچ طفح بية الشووگ
:: اني هم والله صدگ يمك بس احس بعيدة عليك
صارم :: هسة اقربچ اليةة
حچاها سحبني عليه التقت عيونة سوية عيوني مليانة حزن وعيونة مليانة شوگ وتعب تقرب مني باسهن بهدوء حركتة الاحبهاا منهاا ايدة ترسم ملامح وجهي استقرت على شفتي مسح عليهاا
برقة تقرب لدرجة صرنة نتفس نفس النفس سحبهن بين شفايفة بهدوء وايدة تتجول على تفاصيل جسمي نساني نفسي ووتعبي وبخبرتة خلاني اتفاعل وياه
ساعة من المشاعر الدافية لجمعتنة سوة گدرنة نعبر بيها على شوگنة وحبنة لبعض اخذني لحضنة ولفني قووي بستة من تفاحة ادم الاحبهاا وايدي تلعب برموش عيوونة الطوال سحب ايدي عضاهاا صحت متأذية
:: اوووي شگد خبيث أذيتني
صارم :: تستاهلين شلعتي رمووشي
:: احبهن طوال
صارم :: لاتضربيهن عين ويوگعن
:: شنو قصدك اني احسدد!
صارم :: لمعروف اصحاب العيون الملونة عينهم بالمكان
:: شگد خبيث
صارم :: اگلج حبيبتي مناوية تنامين ترة اعيد الجولة مرة ثانية
:: لالا حنام بس اسألك اخر سؤال
صارم :: شلون اني وية فضولچ سألي خلصيني
:: من شووكت صرت انتَ واكرام صحبة على علمي متطيقة چنت
صارم :: لاشنوو مااطيقة بس چنت اضوج من تصرفاتة عينة گوية لايخاف ولايستحي گدامي ويبصبص لجوري من يشووفها تروح الشخصية يبقى يرهوول
:: ايععع لعبت نفسي
صارم : والله شبيچ من يشووف اختچ الفصمة عيونة يصيرين گلوبات حمر اخزر بيه ومايفيد
بس من وگفلي بفاتح الحجية وگفتة محد يسوويها ولهسة هو متابع القضية من بعيدد لان غير ضابط لازمهاا وهو وياه مو على وفاق بس ينزل من نفسة لخاطري او بالأصح لخاطر جوري
ووگفتة بالفاتحة هو وشيخ جعفر وگفة تشررف چانت ماحسيت نفسي وحدي ذبيت حملي عليهمم
:: يعني جعفر هم صارم صديقك؟
صارم :: اي بس مو مثل اكرام هذا ميانة وياه عادي بس ذاك استحي منةة من نلتقي يبقى ينصح بيةة عبالك يهودي گدامةو نوب يحچي كلة فصحى
يخليني اصفن بوجهه
:: ههههه بلكت تتعض وتگووم وصلي
صارم :: اصلي اصلي بس مو هسةة
:: چاشوكت العمر يمشي حرام عليك عليك الله اسمع كلامي والتزم صدگني ترتاح
صارم :: اهووو معيلچ يلةة نامي
عرفتة ضااج مالحيت وياه اكثرر غمضت عيوني وسكتت باسني براسي ابتسمت لحنيتةة ونمت براحةة
الصبح گعدت على المنبه گمت اركض دخلت سبحت وصليت وگعدتة وراهة رحت لجوري عدهاا دوام
تريگوا وطلعوا وهو يمشي ويوصي بية قفلي البيبان ولاتفحيهن لأي احدد واني اطمأن بيه
خلصت شغلي وحميت الاكل ورحت تمددت سني من البارحة هايج علية موتني وهسة اكلت علية زاد
عبالي مثل كل مرة شوية ويصير زين بس ابد زاد
مانقص گمت بسرعة شربت مسكن اثنين ورشيت مخدر عليه هو جايبلي قبل فترة كلشي مافاد بقيت ادگ براسي من الألم لااگدر اخابرة يقلق وهسة حتى محد مفتح ولااگدر اتحمل الوجع
اذن الضهر بالگومة صليت وبقيت الووب من الوجع منا لمن رجعوا دخلت جوري قبلة شافتني شادة راسي وگاعدة ركضت علية تسألني خايفة
جوري :: شبيچ شفق ليش هيچ عيونچ چنتِ تبچين؟
قبل لاارد عليهاا دخل من شافني تخبل يسأل رديت بصعووبة
:: سني موتني من الصبح لهسةة
جوري :: يبوو هم رجع عليچ اخذتي علاج
:: اخذت مفاد كلشي
صارم :: امشي نروح للدكتور
:: وين اكو هسة احد مفتح خليها العصرر
صارم : معليچ ندوور شنو تبقين هيچ للعصر گومي وجع السن مينحمل
ردت عليه جوري
جوري :: چانت بيبي عدها مثل تگولة داىماً هسة تذكرتة
صارم :: شنوو
جوري :: تگول ماوجع الا وجع الضرس وماهم الا هم العرس تذكرين شفق
هزيت راسي مبتسمة بحزن
صارم :: الله يرحمهاا يلة گومي حبيبي
:: العصر صارم لاتلح فدوة مااكدر احچي يلة گوموا تغدوا
راحت جوري تبدل وهم هم سبح وبدل واجة يمي واني الوب من الوجع وهو حاير بيةة طلعت جوري وصبت الغدة گعدت وياهم اريدهم ياكلوون يلحون علية واني حچي مااگدر احچي اذا افتح حلگي يطب هواء ويموتني مااكلو خطية يادوب كم لگمةة
بقوا يمي للىعصر بدلت واخذني رادت جوري تبقى تنام ماقبلت اخاف عليهاا اطلع واعوفها وحدهاة ادري بيها تعبانة بس گلبي مينطيني اخليها وحدهاا
اخذنة تكسي ورحنة للدكتور دفع فلوس للسكرتيرة ودخلتنة جوري بقت برة ماقبلوا يدخلون اثنينهم
دخلنة شافة ولد شاب نوب يخبل عين الله عليه
مو دكتور ضيم لزم ايدي وهمسس بأذني
صارم :: تتحملين نشوف غير دكتور شو ماارتاحيتلة هذا چنة ميعرف
:: شعرفت عنةة وگلت ميعرف؟
صارم :: هاا ولچ صحيتي شنوو عجبچ
:: صحيح حلو بس مو احلى منك حياتي
صارم :: نچبي نچبي يلة ولي خلي نشووف شيسوي
ابتسمت بألىم اموت على غيرتة علية تمددت على
الكرسي وهو واگف فوگ راسي تقرب الدكتور حيل
يريد يفحص حچة صارم
صارم : دكتور شوية ابتعد خنگتهاا
_اخي شلون اشوف سنهاا اذا ابتعد اجيب ناظور
صارم :: اني اشوفة الك اذا تريد
_لعد شعندك جايبها الية رجاء ابتعد خليني اخلص شغلي وراكم مراجعين ليش تضيع الووقت
لزمت ايدة باوعلي خزرني وابتعد فحص الدكتور سني وگال
_حرامات تشلعية يبين راح احشي الچ بس يراد جلسات كون تكمليهن موافقة
::اي موافقة
_يلة لعد خليني ابنجج
يمةة اجاك الموت ياتارك الصلاة ابرة البنج تمووت صار شگد يوجعني بس من ورة الابرة مااروح للدكتور بس بعد مابيها مجال اني شفتها شطوالها اجةة يغمي علية لزمني صارم يهدي بيةة عيوني دمعت من الخووف تقرب فتحت حلكي وضربها حسيت الوجع مالتها زرف گلبي
يقيت شوية حتى سشي مفعولهاا وبدة يشتغل بس صارم شلع گلب الرجال يلزمني يوحر ايدة يتقرب يخزرة يسألني يرد بمكاني اخر شي مل دفع الكرسي ونهض
_اذا نبقى هيچ للصبح منكمل اخييي شبيك
صارم :: شبية شمسويلك هسةةة
_ترة مصختهاا كل مرضية تجيني هنا حسبة اختي ماالها داعي غيرتك الزايدة هااي
صارم :: ديلة كمل شغلك كمل
_شنوو حضرتك تأمرني اطلعوا برة مااكمل
صارم :: شنو متكمل تعوفهاا هيچ غير تموت من الالم
_لعدد انت َ تفضل برةة
صارم :: لاوالله شتحجي انتَ مااطلع
_ثق باالله اذا ماطلت مااشتغل سنهاا
بقى يباوعلي حاير اشرتلة براسي يطلع اريد اخلص لعبت نفسي باوعلي بعصبية وطلع صااح جوري اجت يمي رجع يكمل شغلة ويستغفر كمل وگال
الاسبوع اليجي الجلسة الثانية بس اذا اجيتِ لاتجيبن الأخ ويااچ لانة متزمت لدرجةة
هزيت راسي وجوري تشكرت منة وطلعنة لگيتة يروح ويجي بالمكان شافني سحبني من ايدي
وطلعنة يمشي سريع اجيبت اوگع صااحت بية جوري
جوري :: هااي شبيك صاارم اوگف جيب العلااج راح توگعها ترة تعبانةة شوف وجهةا اصفرر
_من حچت هيچ ندار علية باوعلي خايف درت وجهي منةة لعبت نفسي من تصرفاتة اخذ الورقة منهاا وراح للصيدلية جاب العلاج واجة راد يلزم ايدي ماخليتة لزمتني جوري اجر تكسي ورجعنة للبيت
بوجهي للغرفة راسي يفتر تمددت بفراشي تعبانة
دخل هو گعد يمي بدون صوت ماحچيت وياه بقينة على هالحالة الى ان دگت الباب جوري وفاتت بيدها گلاص حليب ابتسمت لحنيتهاا گعدتني اخذتها منها
:: تعبتچ
جوري :: يووو شسويت قابل شربي كلة زين الچ
حتى بس اصلي اسويلچ شوربة
:: لاهذا كافي ميحتاج
جوري :: لاشلون من الصبح بلا اكل ميصير وراچ علاج ، اي صهري ليش ساكت سمعنة صوتك الحنون
صارم :: معليچ بيةة
جوري :: ها معاقب مو تستاهل ترة
صارم :: جوري
جوري :: هاا
صارم :: طلعي برة
جوري:: يا تطردني من غرفتكم مع الأسف عليك
صارم :: ديلة ولي سويلنةة عشةة اليوم حتى غدة ماتغدينةة
جوري :: اي مو تدلل ابو النسب
صارم :: صايرة ملطلطة احسچ خاف الضابط طلع عينچ
جوري :: اجاوزك بأخلاقي ماارد عليك
طلعت من الغرفة گمت لحيلي صارت صلاة اخذت هدوم اسبح قبل لااطلع من الغرفة تقرب سحبني عليه باوعلي مسوي نفسة فقيرر حچيت بزعل
:: خيرر شنو تريددد؟
صارم :: زعلانة مني؟
:: لاعليمن ازعل قابل فشلتنة وية الدكتوور وسحلتني گدام العالم ردت توگعني تسوة ازعل على هالشي اكيد متسووة
صارم :: شفق اغاار تعرفين شنوو اغار عليچ مااتحمل احدد يشووفچ
:: الغيرة الزايدة مو حلوة ترة بعدين الرجال مسوة شي يخليك تتخبل لهدرجة
صارم :: لاتگولين تتخبل عيب تحچين وياي هيچ
:: اوكي اسفة يلة وخررر
عفتة اطلع رجع سحبني باسيني من شفتي حيلل لدرجة ردت ابچي من الوجع دفعتة قووي يلة وخر
وهو يتنفس سريع صحت بية متأذيةة
::شبيك ترة حلگي يووجعني اجيت توگع الحشووة
صارم :: احبچ البرعة
:: خووش خووش
عفتة وطلعت والله مو صاحي هالرجال وراح يخبلني وياه سبحت وطلعت صليت وتعشينة نايمين بالليل
وحسيت صووت يمي فتحت عيوني خايفة باوعت
لصارم يحچي وهو نايم تقربت علية اريد اسمع شنوو يگوول نكسر گلبي واني اسمت كلامة
صارم : يمةة يمةة ..لليشش .هيچ غدرتيني
چا.. انة هم ابنچ
نزلت دموعي عليه اكثر كلامةة مامفهوم بس لعرفتة يعاتب امة تقربت منة اگعدةة فززز خطية لزمت ايدية اهدي
اسم الله اسم الله حلم حلم
صارم :: شصاار ؟
::مصاار شي هااك اشرب
اطيتة مي شرب شوية تمدتت اخذتة لحضني شبگني قوي خاتل بحضني ضميتة لصدري اقرة ايات على راسة واتحسب على امةة واخوو وزوجتة وكل شخص الة يد بتدميرة بقيت على هالحال الى ان غفيت من التعب
الصبح لگيتة گاعد قبلي مستحي ميخلي عينة بعيني
سويت الوضع طبيعي صبحت عليه وسويت الة
ريوگ تريگوا هو جوري وراحوا، العصر اجت علينة هدوء بطنها كبرانة وصايرة مربرة تخبل ذبت عباتها وگعدت على الكرسي فحطانةة قدمت جوري مي الها ضحكت عليهاا
:: ههههه شبيچ چنتِ تركضين شوو فحطاانة
هدوء :: سكتي يمعودة صايرة بس امشي لو اتحرك افحط بالدوام يطيح حضي الله وكيلچ
غيرر تخلص هالسنة الگشرة
::يلة مةبقى شي شدي حيلچ حتى تنجحين مو هم دور ثاني لاتخزين رجلج
هدوء :: ههههه هو يمشي ويوصي بية هدوء اقري ونجحي زحمة مرتي تعيد اني ارفع راسي بيچ ومن هالحچي يجيب ويقشمر بيةة
:: لعد شيسوي الزلمة يريدچ تنجحين
هدوء :: يمعودة صعب اكره العربي شجاني ورحت الةة
:: ديلة مو زين يمعودة حمدي ربچ لا تتبطرين
هدوء :: الحمد لله اي جوري كرومي شلوونة ؟
جوري :: يسلم عليچ
هدوء :: ياا منين يعرفني ولچ
:: هههههه هاي شبيچ تجذب عليچ بسرعة صدگتي
هدوء :: وگعتي گلبي عووبة اي ماكو اخبار عن امچن
:: تزهو بالنصر تسوي السواية وتطلع منهاا مااعرف ش وكت تتعاقب على لسوتة بينة
هدوء :: الها يوم لاتخافين، هسة گومي جوري سويلي شي حلو روحي مشتهية الحلا
جوري :: وليش اني مو هاي صاحبتچ
هدوء :: شتعرف صاحبتي خليها تسووي تمن يلة تسوي حلويات
:: ها ولچ گلبتي عليةة چلبة
هدوء :: هسة شنو تسون لو اروحح؟
جوري :: شنو رأيچن نسوي كليجة من زماان ماماكليها وهم نقرأ الفاتحة لبيبي تحبهاا
:: بس ماعدنة مواد كافية
جوري هسة اطلع ةشتري
:: لااا ممنوع طلعة ستري علينةة هسة امد راسي اشوف اذا اكو طفل ادزة للمحل كتبيلي ياهن بورقة
هدوء :: نوب اني خبصتچن بيةة
:: نتحملچ شنسوي لخاطر البيبي
راحت جوري كتبت المواد لنحتاجهن واجتي اخذت فلوس دائما صارم يخلي يمي من يطلع مااصرف بس هو يكول خليهن اخذت منهن وطلعت فتحت الباب مديت راسي دنيا العصر والجهال تلعب طووبة صحت عليهم اجاني واحد يركض فحطاان
_هاا خالة امريني؟
:: هههه فدوة تگدر تروحلي للمحل محتاجة كم شغله
_'اي تددلين بس من تطلعين خلي شي على راسچ زحمة شعرچ طاالع
::بس اني ممحجبة
_ليش عووزچ كبررر
::يااا عزة شگد وكح انتَ
_لامو وكح بس انصحچ خايف عليچ
:: تمام راح اخذ بنصيحتك هسة شنوو تروح لو اشوف غيررك
__مو گتلچ اني شنوو تردين
:: تفضل هااي كاتبتهن بورقة
مديت ايدي الةة اخذ الورقة قراهاا وشگاها وشمرهاا صحت بيه
:: هاي ليش سويت هالشكل؟
__زعطوط گدامچ وكاتبتهن ب ورقة الية حفظتهن لاتمافين
:: بس هواي تنسى
_لاماانسى يلة فووتي مااتأخر
:: عافني وراح يركض عزة بعينة بگد الفصمة وبيه البلة اذا كبرر شلوون بس والله سبع مبين
انتضرتة بالباب اباوع على الاطفال يلعبوون تمنيت اروح العب وياهم بس صارم يعلگني بباب البيت
شوية اجاني يركض من شافني صااح
_ليش واگفةة هناا
:: انتضرك غيرر
__مو گتلچ فوتي اني اجيب الغراض
::يلة مو مشكلة شوفني شجبت بس لانسيت شي
_لاماناسي تأكدي
ااخذت العلاگة فتحتها جايب كلشي ومرجع الباقي شلت الف وانطيتة ماقبل حچة
_شنوو اخذ كروة اخذي الفچ وفوتي واذا تحتاجين شي بس دزي علية
:: ليش انتة وين بيتكم وشنو اسمك ماعرفت
_بيتنة ذاك الباب الابيض بس گولي صيحولي
حبش اجيج ركض
:: شكراً حبوش متقصرت
_اددلي
حچاها وراح يركض حسيتة زلمة بهيئة طفل اخذت الغراض وفتت لگيتهن گاعدت بالگااع اخذتهن جوري وبلشت تعجن العجينة واني وياها وهدوء تسولف فوگ روسنة عفناها ترتاح شوية وفلسنة التمر وكملة باقي الغراض وراها بدينة نلفها احنة نلف وجوري تشوي بالفرن صارت الصلاة واحنة بعدنة خابرها زوجهاا گتلها مترحين لليل گلتلة عاد وافق الرجال ماحچة شي خلصنة كلشي ريحتة صارت تطگ بالخشم جوري الىعيارة طبخها يخبل متعلمة من بيبي الله يرحمهاا عفنة جوري تلم الهوسة وفتنة نصلي
كملنة سوينة چاي وگعدنة نسولف وناكل عيني للساعة صارم لهسة ماكو قلقلت عليه جوري بثمانية استأذنت تروح خليت الها علبة كليجة يقرون اافاتحة
وراحت ونستنة بيوومها كلش
جوري فاتتت تقرة واني واني بقيت اتفرج تلفزيون بالصالة صارم ادگ عليه ميرد ضل بالي للساعة بالعشرة فتحت الباب على جوري شافت وجهي مخطوف گامت خايفة تسألني
جوري :: شبيچ شفق لونچ اصفر يوجعج شي
::صارم
م
جوري :: شبيه؟
::لهسة ماكوو الساعة عبرت العشرة
جوري : خابرتيه
::يدگ وميشيلة
جوري :: نتصل علة رجل هدوء يشووفة
:: عيب من الرجاال
جوري :: لعد شلوون نبقى هيچ بقلق
:: ساعة اذا مااجة نتصل
بعدنة نسولف سمعنة الباب نفتح ركضنة نشوف دخل صاارم عيارة عن اعصار للغرفة ورگع الباب باوعتلي جوري واني صافنة وراه حچت تصحيني
جوري :: شفق شبيچ واگفةة روحي وراه
:: شوفي شكلة يخووف خال يضربني
جوري :: يايوم ضاربچ امشي شوفيه شبيهه
سمعت منها واتجهت للغرفة فتحت الباب لگيتة يور بالكنتوور بقيت اراقبة طلع سلاحة حطة بخصرة
واتجه للباب عبالك ميشوفني گطعت الطريق عليه
باوعلي بغضب وأشرلي اوخخر هزيت راسي برفض
لزمني من ادية بقووة وحچة من بين سنونة
صارم :: گتلچ وخري شفق وخررري
::مااوخر گلي ووين رايح وشنو هذا السلاااح لبيدك
صارم :: معليچ انتِ معليچ
::لاالية نص مااخليك تطلع الا تگليي وين
مسح وجهة يهدي بروحةة وصار يفتر على نفسةة بالغرفةة يروح ويجي حرت بأمر اول مرة اشوفة هيچ شوية ودار وجهةة علية يباوعلي بحيرة تقدمت لزمت ايدة اهدي چانت ترجف حچيت بهدوء
::شبيك احچيلي
صارم :: اريد اطلع
:: تطلع بس گلي وين؟
صارم :: احاسبهم
:: منوو؟
صارم :: لغدروني وطعنوني بضهري اجة الوقت لأحاسبهم بيه...
شكرا لزيارتكم عالم روايات سكيرهوم
