رواية خيط الدم الفصل الثالث والعشرون بقلم زينب طالب
اريدَ اندل هَوى المرتَاح من يا صُوب؟
..........
جوري...
اكرام :: شليتي حالي يم غمازة ماحن گلبچ علية
وتخلينة نعقد؟
ابتسمت بوجهة ورديت عليه بخجل
:: موهسةة
اكرام :: ليش شمنتضرة؟
:: مامستعدة هسةة
اكرام :: علمود بيبيتچ؟
::اي تعبانة مامستعدة روحي ماتهوى الفرح جرحي اخضر بعدة
اكرام :: حقچ حقچ بس اني مااگدر انتضر بعدد ماجاي اعرف كلشي اسووي حياتي مخربطة اريدچ تعدليها اليةة بدخلتچ الها
::انتضر اكرام انتضر فترة بسيطة بس على الاقل اخلص هااي السنة
اكرام :: اخخخ شعندي غير الانتظار والصبر
استحيت من حسرتة دنگت راسي رجعت رفعتة صافن علية ناسي احنة وين خجلت من نضراتة احسهاا اخترقتني حچة بصوت حنون
اكرام :: الحجاب زايدچ حلاة فوگ حلاتچ
::شكراً، يلة روح لايجي صارم اذا شافك يسويها هوسة عليةة
اكرام :: رايح ديري بالچ على نفسچ
:: ان شاء الله
باوعلي نضرة اخيرة وراح بقى بالسيارة يباوعلي من بعيد من شاف صارم وصل شخطها وطلع التفتت على صوتة وهو يحچي
صارم :: عينچ هيووو وين صافنة
:: هاا ماصافنة شبيك دسلم
صارم :: شنو ماصافنة غشيم گدامچ صافنة عالشارع اكوو شي
:: صارم ماكوو شي لا على كلشي ادقق يلة خلينة نروح تعبانةة
صارم :: ليش اني اگدرلچ چنچ اختچ، امشي امشي
حچة هيچ ومش قبلي رحت وراه ساكتة وهو قلقل كل شوية ملتفت علية يباوعلي حچيت واني امشي
:: ترة قلقتني شكو كل شوية تباووع
صارم :: معليچ لچ يلةة دوسيلهاا
:: اكثر من هيچ ترة دااركض
صارم :: دا ام حلگ الاعووج
:: عززة صارم اني حلگي اعووج
صارم :: سألي اختچ بس غير منريد نضوجج
:: جذاب والله
صارم :: بكيفچ لاتصدگين
بقيت ساكتة بس وصلت للبيت دخلت صحت من الباب
شفق شفق وينچ
طلعت من الغرفة تركض على صوتي حجت بخووف
شفق :: خيرر ليشش تصيحين شصايررر
:: صدگ اني حلگي اعووج
شفق :: اسم الله منوو گال هيچ
:: هذا رجلج يگول حلگج اعووج
شغق :: ياصارم صدگ تحچي
صارن : شنو مجذب قابل شوفي وجها بيه طن تنمر
:: والله تغاار اني احلا من مرتك ترة
صارم :: خب ولي احلى من مرتي ام حلگ
شفق :: ياا صارم خليت عقلك وياهاا صدگ تحجي
صارم :: شمسوي غير احجي الحقيقة
: يا حقيقية شبيكك
شفق :: ياا جوري شبيچ راح تبچين والله يجذب عليچ وين اكوو بجمالچ
:: لعدد سكتي رجلج لا ارتكب بيه جريمة
عفتهم وفتتت للغرفة اسمعها تحجي علية وهو يضحك شگد مستفز هالشخص بدلت ملابسي
وطلعت اتوضة شافني عووج حلگة چنة مضروب جلطة ماتحملت ضحكت على شكلةةة
::ههههههه عززة والله تضحك صاررم بسس عادد
صارم :: هسة حاچي اني شبيچ هيوو
:: انتَ الكلام وياك ضايع خليني اكل لگمة واناام احسلي
شفق :: تعالي حبيبتي اكلي معليچ بيه هوو يحب يضووج المقابل
صارم :: متحبون الصراحة
::ديلة عيني يالصريح اكل شگد تحچي
اكلنة وهو يداهر بية ساعة اضوج ساعة اضحك مااسيطر على روحي كملت اكل ورحت للغرفة
صارت المراية يمي وگفت اباوع على حلگي استكشف ضعف ثقتي بنفسي والله جذاب حلكي حلوو بست روحي ورحت تمددت واني اتذكر اكرام ولهفتة حتى نتزوج
مرت الأيام مابيها شي جديد غير صارم لمتخبل صدگ هاي الفترة واسمع العرك والصياح بغرفتهم استحي حتى ادخل يطلع وتركض وراه تريد تروح وياه وهو مايقبل بس هية تعاند يستلسم وياخذها وياه اسأل شفق ترد علية بعدين احچيلچ واسكت
التهيت بدراستي والأمتحانات قربت شديت حيلي حيل اريد انجح واعبر الرابع اكرام اشوفة من بعيد كل فترة يجي يوگف بالسيارة من يجيني صارم ويطمأن علية يرووح
اليوم اخر يوم للأمتحانات رجعت الضهر الدنيا حارة
هو يهف قبلي اني اريد الحگ بيه تعبت عفتة وگعدت على الرصيف فحطانة مشى مسافة طويلة يلة حس بيه مو وراه باوعلي واجاني يركض ووگف فووك راسي ايدة على خصرة ويحچي بتعب
صارم :: ها حجية شو كعدتي؟
:: تعبت ترة شبيك تركض ادري احدد يركض وراك ترة مو وضعيةة
صارم :: لاوالله نووب ماراضية گومي لچ گوومي لعد شتردين امشي على مشيتچ
:: اي نمشي براحتنة شعدنةة هو بيتنة قريب
صارم :: اي مو جاي نتمشى على الكورنيش ولچ شمس ادگ بالراس امششي
:: لعد خليلي خط اذا هيچ
صارم :: بسيطة باچر
:: تضحك علية عطلنة بعدد
صاؤن :: جوررري گوميي ترة وصلت هناا منچ
يحچ ويأشر على خشمة
:: گمت امري لله
صارم :: تفضلي ست هانم
باوعتلة صفح ومشيت قلبة شويةة وسبقني صرت
الحگ بيه من غير فايدة الى ان وصلنة للبيت بس سلمت بوجهي للحمام سبحت وطلعت مشطت شعري وصليت بقيت بأحرام الصلاة وطلعت اتغدة جاي ناكل حچت شفق
شفق :: يلة حبيبتي استلمي البيت كافي طاح حضي هاي الايام استلمي بعد اختچ
:: كملي جميلچ وخليني انامم مشتهية انام براحة بدون ماافكر بشي من باچر نبدي خوش حبيبتي؟
شفق :: يلة اتحمل اذا بس اليووم شسووي اكسب بيچ اجرر
::فديت اختي الحبيبية
صارم :: بدت اللواگة
:: ليدخل بين البصلة وقشرتها ميحصل بس ريحتهاا
صارم :: وانتِ منو منهن البصلة لو قشرتهاا
:: اسأل مرتك هية شنوو اول وراها اني اجاوبك
شفق :: شنو صارم اني بصلة قصدك
صارم :: لاحبيبتي مو عليچ
شغق :: لاعليةة عليةة
صارم :: استغفر الله ارتاحيني هسةة
:: شعلية اني يلة صهري تعيش وتاكل غيرهاا
شحنتها عليه وگمت باوعلي معصب ضحكت وعفتهم
يتصافون ودخلت للغرفة بوجهي للفراش طگيتهاا نومة مافزيت الا على شفق تگعدني مستعجلةة
شفق :: جوري جوري ولچ اگعددي ادري ميتةةة
فزيت خايفةة باوعن بوجهاا صفنت هزتني تحچي
شفق :: شبيچ ركززي گومي ولچ اجوج خطابةة
حچيت مخترعة
:: شكو منوو خيرر شبيچ
شغق :: ركزي ولج اصحي اكرام اجةة واهلة وياه
گوومي غسلي
::يااكرام
شفق :: عزززة بعينچ سهاام شفق اصحي
حچتها وضربتني كفف صحتني بيه گمت لحيلي بوجهي للحمام همزين ليفوت للحمام ميشوفه بالصالة
غسلت وطلعت للغرفة عدل انشف بوجهي الساعة گباللي عززة صار شگد نايمة حتى الصلاة فاتتت
غيرت هدومي فستان اسود كلوش وبيه حزام لفيت الشال رشيت عطر دخلت شفق مبدلة حچت
شفق :: ها خلصتِ يلة تعالي وياي
:: غير اعرف منوو اجةة وشلون يجون بدون موعد
شفق :: شمدريني مستعجل الأخ
::منو وياه
شفق :: هو وياه بنات اثنين مرة وشابة
:: شفق استحي شلوون
شفق :: لالاعليمن شو انت شايفتة قبل بس سلمي وروحي باوسي النسوان وگعدي يمهن
::يلة قدمتي شي؟
شفق :: اي لأن حضرتچ تأخرتِ وعيب منهم
:: يلة طلعي لاحگتچ
طلعت گدامي فاتت واني قويت نفسي ودخلت وراها گلت السلام عليكم ردوا وبجهي للنسوان لوگفن يرحبن بيةة ويسلمن بوستهن وگعدت يمهم مدنگة راسي خجلانة حچت المرة الچبيرة يعني مو كلش تطلع بگد امي گالت بأبتسامة حلوة مزينة وجهاا
ورود :: شلونچ جوري؟
::الحمد لله زينة
ورود :: طلعتِ احلى من الوصف عين الله عليچ تخبلين حبيبتي
::شكراً خالة
ورود :: لا موخالة گولي ام حسن اني اخت اكرام الچبيرة
::اهلا وسهلاً بيچ
شفق :: شربي عصيرچ حبيبتي
ورود :: قابل دنجربكم احنة
شفق :: لعد الحجية مااجت وياكم
ورود :: اي والله نعتذر منكم بس امي مريضة هالفترة واني ابدالهاا ان شاء الله اكفي واوفي
شفق :: ولنعم منچ حبيبتي
صارت تسولف هية وشفق وكل شوية تسألني وارد عليهاا البنية لوياهاا تباوعلي بطرف عينتا ماارتاحيت لنضراتهاا احسها مغصوبة على الجية شفق تسألهم عن عاىلتهم تريد تعرف كلشي وهو وصارم يسلفون وحدهم كل شوية يسرق نضرة عابرة
يخاف من صارم لايلگفة
لعرفتة هاي المرة اخت اكرام الچبيرة ارملة وعايشة عدهم عدها بنت ولد هية معلمة واكرام وراها ضابط برتبة(....) واخو صغير بگد شفق طالب جامعة وامهم وابوهم حالتهم المادية كلش زينة حسب كلامهاا
سألتها شفق
شفق :: على كلامج حالتكم زينة وماكو شي يمنع اخوج يزوج ليش لهسةة بدون زواج؟
ورود :: هاا والله امي وابوية هم يتمنون يزوج ويومية يجبولة بنت بس هو ميقتنع الله يسلمة كل وحدة يطلع بيها عيوب الدنيا كلهاا بس حتى يخلص منهمم لان چان رافض فكرة الزواج بس
بيووم وليلة اجاني وگال خوية لگيتها لو هي لو مااريد من اسألة منو ميجاوب ويرد الكم الصافي من يجي الوقت المناسب اخذكم تشوفوهاا وصحيح كلامة من گال بس تشوفيها ينشرح گلبچ الهاا
شفق :: الله يسلمچ يارب الله يقدم لبيه خير الهم
ورود :: عدكم مانع اذا يصير العقد والنيشان الجمعة التجي؟
شفق :: بس منلحگ اليوم ثلاثاء
ورود :: شنو تردون اني وياكم كلة يوصل لباب بيتكم لاتشيلون هم
شفق :: والله مااعرف شنو رأيچ جوري؟
:: بكيفكم
حچيتها بخجل بقت تتفق هية وشفق واخذت رقمها وترخصوا وطلعوا من البيت بقيت بمكاني وهم طلعوا يوصلوهم للبااب شوية ودخلوا حچت شفق وهية تگعد يمي
شفق :: اختة مبينة حبابة كلش ومثقفة بس بنتها ماارتاحيتلهاا
:: اني هم تباوعلي معاجبهاا
شفق :: وسالفة ثانية گلبي ممطمأن الهاا
:: شنو؟
شفق :: امة ليش مااجت حسب كلامها ميتة على ماتزوجة شعجب محضرت
:: مو گالت مريضة
شفق :: ماصدگت
رد صارم عليهاا
صارم :: لاتضمين بالنااس احتمال مرضية صدگ ليش تشيلين ذنبهم
شفق :: من خوفي عليها مااريد شي يعكر حياتها الجاية واذا امة مموافقة معناها استعدي يجوري لضيم جديد
صارم :: گولي يااله حبيبتي ان شاء الله ماكو شي
الولد خوش ولد وشاريهاا بس طلب مني طلب غريب گتلة اسألهم واشوف شنو يگولون
شفق:: طلب شنو ياستار
صارم :: يگول محد يعرف بجوري منفصلة ولايعرف شي عنن حياتها السابقة گايل الهم تعرفت عليها عن طريق صاحبي اني يعني شايفها وعاجبتة
يحچيها گدامي ابن السطل حسيت نفسي طلعلي گرون
شفق :: بس الحياة اذا بدايتها جذب متنجح
صارم :: لااني وياه موضروي يعرفون كلشي مادام هو يعرف وموافق هم هذا هو انتِ بس تخيلي يعرفون امچ ويرحون لبيتكم يسألون شنو يصير امچ سمعتهاا صايرة بالحضيض
شفق :: الله ياخذها شتگولين جوري
:: اني هم وياه مو ضروي يعرفون الماضي مالتي هو يعرف كلش كافي
شفق :: بكيفكم بس امةة ليش مااجت
صارم :: ياطلابة امة لمراح تخلص اليوم ما گالو المرة مريضة شبيچ لحيتي
:: هههههه صارت بيها خوفة
شفق : حقي يمعودين حقي
صارم :: ديلة ام حقي گومي سوي عشةة متنة من الجوع
شفق :: معلية بعد گل لجوري
:: لالا عفية صلاة ممصلية بعدني اروح اصلي
عفتها وفتت اركض وهية تصيح وراي متوضةة اني بس بدلت هدومي وصليت وطلعت اساعدهاا تعشينة وبقينة نتفرج تلفزيون
الصبح گعدت من وقت شبعانة نوم لبست حجابي وطلعت اسمع صوت المي بالحمام يتطعني گاعدين
رحت للمطبخ خليت الچاي على النار وسلگت بيض
سمعت الباب انفتح رحت صارم طلع صبحت علية وسألتة على شفق رد علية
صارم :: نايمة هسة اگعدها
:: لاعوفها خطية اني سويت ريوگ خلص وتعال اكل
صارن :: مو عطلة شعندچ من الصبح گاعدة
:: شبعت نوم وفزيت يلة استعجل
عافني وفات للغرفة واني غسلت وطلعت صليت وراها حضرت الريوگ تريگنة سوية بس خلص طلع واني شديت حزامي على البيت جلف وغسل ماخليت شي ماسويتة المطبخ الصالة الغرفة اشتغل بدون صوت مااريدها تگعد حتى للسطح صعدت غسلتة وتلطرمة بس خلصت لگيت الدجاجة مايعة تبتلها وذبيتها بالفرن باوعت الساعة راح تصير 12رحت للحمام سبحت لان صرت كلي مايات طلعت الخاولي براسي لغرفة شفق ملفلة ونايمة تقربت منهاا گعدتهاا
گعدت تفرك بعينها سألتني على الساعة رديت ب12طفرت من الفراش ووگعت بالگااع ضحكت من كل خاطري عليها صاحت بية
شفق :: ثووول بداال متساعديني اگووم تضحكين عليةة ابعووبة
:: ههههه شوفي شكلچ يضحك يمعودة بعدين شكو طفرتي هيچ
شفق :: راح يجي الزلمة واني ممسوية غدة
:: ليسمعچ يگوول مشرمتها انتِ دگومي غسلي ورتبي غرفتچ سويت اني وكملت كلشي
شفق :: اي همزين يلة لچ تعالي گوميني
مديت ايدي الهاا گامت عفتها ترتب غرفتها وطلعت للغرفة مشطت شعري وصليت وبوجهي للمطبخ الدجاجة بعدلها شوية سويت مقبلات وياها وتمن احمر ولبن خلطت كملت كلشي اجت المسعدة للمطبخ
الشعرمفتوج ولابسة طاگ ودشداشة قصير ربع ردن والعطر يهف منها طالعة تخبل سألتني وهية تستكشف المطبخ
شفق :: شمسوية اليوم البيت يلمع
:: حملة سويت ماخليت شي
شفق :: من شوكت گاعدة لعدد
:: قبل السبعة
شفق :: يعني صارم شفتيه ماسويتلة ريوگ ما گعدني اليووم خطية
:: اي سويتلة واني گتلة لاتگعدهاا
شفق :: فديت اختي الحنية ولچ شلون راح افارگچ اني ماصدگت نجمعنة مرة ثانية هسة راح تتزوجين وتعوفيني
حچتها ونزلت دمعتها ابتسمت وشبگتهاا
:: شفق شو صايرة ام دميعة شبيچ يمعودةة وين اروح قابل اهاجر شوكت ماتردين اجيج وانتِ هم تجيني
شفق :: خاف يطلع حقير يحرمني منچ
:: لا لا اكرام خوش ولد لاتخافين منةة
شفق :: والله اذا زعلچ الا العب بية جولة مااسكت ولااخاف مثل قبل بس خلي يتجرء يسوي شي
فزينة علة صوت صارم وهو يرد عليها فايت بدون منحس عليه
صارم :: الله يعينكم سيادة الضابط شفق من هسة شادة حزامها عليك شبيچ لچ من البارحة لليوم متسودنة عليينة
شفق :: هاي شنو اجيت؟
صارم :: لابعدني شوية واجي
شفق :: صاؤم لاتقلد علية
صارم :: صار حبيبتي بس تعالي هاي عيونچ شبيهم حمرر شسويتيلها لچ
:: والله ممسوية شي هية مروتك ام دميعة صايرة
صارن :: تعالي حبيبتي تعالي علييمن تبچين على هاي ام حلگ الأعوج
باوعتلة بغضب وهو يبتسم بأستفزاز سحب مرتة حضنهاا وباسها من رلسهاا ويمسح دموعهاا نضراتة الهاا كلها حب وحنية ابتسمت لمنظرهم صااح
صارم :: سدي حلگچ راح تطب بيه ذبانة
: ايععع هاي شبيك وياي هالايام شوكت ازوج واخلص منك
صارن :: قصدچ احنة نخلص منچ
:: اي شوف منو يسويلك اكل بعدد خلي مرتك تطبخ
صارن :: ها عيرتينة عمي اني اطبخ ولاهالذلة مالتچ
شفق :: كافي يمعودين شجاكم بس تتناگرون
صارم :: هي لسانها طولان بعدما چانت خرسة
:: والله هو رجلج مستفز ويحرگ گلبي
شفق : يلة خووش عمي اني الغلطانة بس اسكتوا
صارم :: صايرة ادورين ستر حبيبتي ماعرفتچ
شفق :: صارم انتَ مو تعبان؟
صارم :: اي والله كلشش
شفق : روح حبيبي اسبح وتعال حتى نتغدة بدون ريوگ اني
صارم :: مو تددللين شمعتي
حچاها وگرصها من خدها باسة وراح تغدينة وكملنة
وهم راحوا لغرفتهم واني هم العصر اجت اخت اكرام
جابت فلوس الصالون والبدلات ماتأخرت نصف ساعة وراحت رادت شفق نروح للسوگ بس ماقبلت
:: تعبانة اليوم خليها بااچر
شفق :: ولچ هواي شغل شنلحگ بهاليومين صالون وبدلات وكوشة
:: نلحگ نلحگ بس لاتخبصينةة خابري هدوء تراسل البنت لسوت الكوشة الهاا خلي تتفق وياها
وباچر نروح نحجز بدلات وصالون
شفق :: شگد سهلة وشمدريچ نلگة بيووم
:: يبووو شگد بومة حبيبتي
شفق :: والله انت فاهية حبيبتي
عفتها وفتت لغرفتي باليل نايمة واحس گلبي نقبض
اشتاقيتلهاا حيل محتاجتها وياي بهاي الأيام شلوون افرح وهية بعدهاا سنة مصاير الها شلوون اذب الاسود والبس بدلة وهية جوة التراب وحقها لهسة ضايع !
گمت من دون شعور دگيت الباب على شفق شوية وفتحتة شافت حالتي طلعت من الغرفة وسدت الباب اخذتني لحضنهاا ومشتني لغرفتي بدون كلام
گعدت على فراش بيبي تمددت بحضنها وبچيت بقووة وهية تبچي وياي حست بيه شنو سبب حزني بدون مااگول نصف ساعة احنة هيچ اخر شي مسحت دموعها و دنگت رفعتني صرت مقابيلها مسحت دموعي وباستني اخذت ادية بين اديها قبلتهن بحنية وحچت تواسي روحها قبل متواسيني
شفق :: جوري حبيبتي تدرين الميت يشوف ويحس بينة اي لاتستغربين هسة بيبي تشوفنة وتحس بينة
اذا نزعل تزعل لزعلنة واذا نفرح تفرح ويانة هاي
دموعنة تعذبها جوري تدرين شگد الزم روحي وابلع خصتي حتى ماابجي مااريدها تتأذة بگبرهاا
صحيح اول ايام فقدت وماتخيلت نفسي اگدر اعيش من دونهاا بس ربچ انطاني الصبر اي صبرت على فراگها شلون ماصبرت على فراگ ابوية بس مو معناه نسيتهم لاا جمرتهم بالگلب ماتبرد ولاتروح وذكراهم دووم على بالي بس لازم نعيش لان هذا امر الله هم السابقون ونحن اللاحقون
:: تأذيني فكرة افرح وهية مو وياي احس بعد وقت بعد حتى حقها مطلع واني ازوج وافرح
شفق :؛ لا هية تكيف والله من تشوفنة فرحانين خاصة انتِ اذا زوجتي ورجلج عوضچ عن المريتي بيه راح ترتاخ بتربتهاا
:: اخخخخ شفق تعبانة حيل تعبانة فراگها متعبني
شفق :: الله يؤحمها
حچتها بغصة وسحبتني لحنضنها بيومها بقت نايمة يمي نومتني بحضنها بقت تقرة على راسي قرآن
يلة غفيت
ثاني يوم گعدتني من الصبح بس تريگنة رحنة لمحلات التأجير صارم ويانة بقينة نفترر بصعوبة يلة اقتنعت بوحدة لون زيتوني تخبل حيل عجبتني
حجزتها گالو باچر توصل للمركز لحجزنة بيه هم تابع الهم دخلنة واتفقنة وياهم ورجعنة للبيت الضهر كلش
اخذنة غدة ويلنة اكلنة ونمنة
العصر صارم طلع اجت هدوء تلگينها من الباب بالگوة تمشي صايرة بطة شايلة علاگة شكبرهة گعدت بالصالة فحطانة سالتها شفق
شفق :: هاي شوكت تجيبين يمعودة صارلچ سنتين حامل
هدوء :: ههههه ميقبل يجي ولچ عاصي يگول الا امي تتخرج يلة حتى اسجل ؤوضة فد نووب
شفق :: مؤدب هذا ميريد يتعبچ طالع لأبو
هدوء :: اي فدديتة هو وابوو
:: اگلچ عيني مرت الشيخ هاي شوكت تجي تنصب الكوشة؟
هدوء :: باليل كلش، هسة يلة سولنة شي ناكلة حتى نبلش
:: شنبلش ولچ؟
هدوء : اصلخ جلدج غيرر
:: لاعفية عوفيني اني اسووي
هدوء:: اششش ولاكلمة وانتِ عيني شفيقة خابري
رجلج گليلة اليوم شوفلك ديرة لاتجي حتى اخذ راحتي
شفق :: ياا وين يروح الزلمة عيني
هدوء :: شمدريني يل فضنيني بس اول گومن سولي شي اكلة جوعانة
شفق :: كافي اكل راح تنفجرين ولچ
هدوء :: چفن شماكلة اني يلة گومن
عاطت بينة كمنة نضحك شفق خابرت صارم همزين گلها اني اجيبلچن عشةة لاتسون واني خبطت كيكة وذبيتها بالفرن من استوت قطعناها واكلنةها همزين عدنة ببسي من الغدة جبنة ويانة اكلنة وبقينة نسولف للصلاة اذن صلينة ودخلنة للغرفة
گعدت بالگاع وطلعت العدة مالتهاا وبلشت بية صلخت جلدي شفق تلزمني وهية تصلخ بيةة
ولااطتني استراحةة حتى بچي بچيت خلصت
گعدت تعبانة گالت
هدوء :: يلة ارتاحي شوي حتى احف وجهج
::يبوو كافي عادد شنو متحلفة بية انتِ
هدوء :: شفق سكتي اختچ لااگوم اجعصها اني وابني
شفق :: سكتي ترة گبن عدهاا
:: شنوو عفية لوادري هيچ تسوين بية حتى الباب ماافتحة الچ
هدوؤ :: يلة لچ فوگ ماوگعت وصخچ
:: عززة شفق شوفيها شتگوول
شفق :: لاهدوء بهاي ماالچ حق ولچ حتى شعر مابيها خفيف ميبين مثلي بس انتِ شادة ويانة حسرة تسمعين خطبة لو عرس تجيبين شيرتچ وتجين علينةة
هدوء :: يلة كافي حجي تعالي خلي احفچ
:: لاحبابة والله وجهي مابيه شعرى مامبين خفيف
هدوء :: ميخالف المكياج ميصير حلوو تعالي لااگوملچ
رحت يمهاا من لاچارة ليش اني اگدر على لسانها
خليت راسي بحضنها وبدت تحف بية واني اگمزز متت يلة خلصتني بقيت ابچي واغلط عليها وهية تضحك
بهالاثناء ندك الباب راحت شفق طلع صارم جايب عشة تعشينة وكملة اطتني غسولات جسمم مدري مني اتجيبهن سألتهاا شفق
شفق :: اگلچ منين تجيبين هالسوالف شو اني من ادخل للكوزمتك اضل صافنة مااعرف شاخذ
هدوء :: الانستا ساتر علية اطلب واطيهم رقم الشيخ وهو يجب خطية مبتلي بيةة احب هااسوالف ولچ الزلم تتخبل عليهن سأليني اليه
شفق:: اي اي علميها ترة اني الله وكيلچ كلشي ماكو مااعرف صارم شلون مستحملني
هدوء:: الله يعينة ولج دلعي سحضني يضل يباوع لحلگچ
:: يباع بدون هااسوالف عوفي اختي لاتطلعيت عينهاا
هدوء :: امداچ وامدة اختچ والله اني مدللة الشيخ يومية البسلة شكل ابد مااكرر قميص النوم خطية امي مبتلة تنگل وترد ليورة بس بنفسي شغلة باقية
::شنو
هدوء :: اريد ارگصلة بس استحي افاتحة بالموضوع شو هو ماطلب مني الأعرفة الزلم يحبون الرگص
شفق :: ههههه عليچ الله اذا يطلب ترگصين
هدوء :: وداعتچ حتى بدلة رگص مشترية
شفق :: يمة يمة منچ عبالي فقيرة ولچ
هدوء ::بين الزلمة والمرة تنشال الحواجر احلى
تحچي وتغمز لشفق وهاي وضحك عليها حچيت اني
:: تدرين رجلج ليش ميگلچ رگصي
هدوء :: ليش بلة؟
:: الرگص لازم اغاني وهو على حسب علمي گلتي مايسمع ابد
هدوء :: يابة حتى لو على باسم ارگص بس غيرر ينطقهاا
حچتها ومتنة من الضحك عليهاا عفتهن يوسىلفن ورحت للحمام جلفت نفسي جلفة العيد وطلعت اطتني هدوء تراكسود مشتريتة لو نيلي دمعت عيني حچت معترضة
هدوء :: ديري بالچ تبچين اعضچ يلة نزعي الاسود ولبسي هاللون الحلو وان شاء الله ماتلبسينة بس على الحسين
:: شكراّ هدوء تعبتچ ويااچ
هدوء :: شگد اكره المجاملات يلة لبسي وانتِ شفق ماالله يهديچ وتزعيه
شفق :: لاموهسةة لاتلحين فدوة اروحلچ
عافتها براحتها بدلت لبست التراك لونة حلو طلع يخبل علية وجهي منور لان حافة حواجبي مرتبات صارن تشكرت منها مرة ثانية لل11اجة زوجها عليها اتوسلنة بيها تبات ماقبل تستحي من صارم گالا اجيچن من الصبح طلعت مناا اجة صارم واهل الكوشة مناا
عفتهم ينصبوون بيهاا ودخلت للغرفة عزلتها وتمددت بفراشي وراية گعدة من الصبح يردونة بالمركز
ثاني يوم گعدتني شفق من الصبح لگيت هدوء وامها هناا سلمت عليهن واخذتني ام هدوء وابوها وصلنة للمركز وهية بقت وياي لان شفق بقت ترتب البيت وهدوء وياهاا فما گدرت تجي
بقينة ننتضر شوية الى ان اجة سرانة گعدت وبلشت البنية بية مكياج وشعر اخر شي لبست البدلة بمساعدة ام هدوء باوعت لروحي بالمرااية حيل حبيت النتيجة وراضية بيهاا اتصلت ام هدوء على رجلها يرجعنة لأن عندة سيارة خطية شوية واجة
ساعدتني اصعد السيارة وانطلقنة للبيت دخلت تلگتني شفق حضنتني تبچي وهدوء تهلهل وتسحب بيهاا ماراضية
هدوء :: كااافي شفق راح تبچين البنية ويخرب المكيااج ترة اليوم مو عرس ضمي دموعچ للعرس يلة وخري خليها تگعدد
شفق :: طالعة تخبلين جوري
:: مو احلى منچ
بقنينة ننتضرهم يوصلون ماعازمين ناس هواي بس هدوء واهلها وعمتها لأن منعرف احد هناا بقت البينة المصورة لأجرتها هدوء تاخذلي صور بلقطات مختلفة
الى ان سمعناا صوت السيارة
گومني بالغرفة لأن الصالة للزلم عفت الكوشة ودخلت
اسمع اصوات زلم برة وهوسات بالطرمة يهووسون فرحانين دخلن النسوان علينة هواي بناتت بس ماعرفت بس اختة ورود وبنتهاا سلمت علية وحچت بحنية
ورود :: طالعة اميرة حبيبتي
:: شكراً
ورود :: أنيال اخوي عليچ صدگ صبر وناال
ابتسمت لكلامهاا ودنگت بقينة گاعدين بهدوء الى ان ندگ الباب وصوت صارم يحچي وية شفق حتى الشيخ يدخا يعقد انطتني الشال خلتة على راسي وغطتني بيه نفتح الباب ودخلوا اسمع اصواتهم بدون مااشوف شي بقى الشيخ يحچي وكلامة حلو
الى ان وجهلي الكلام وصار يسألني بموافقتي رديت عليه واكرام نفس الشي تم العقد على خير صارت الهلاهل ترگع من كل مكان
ترخصوا الزلم وطلعوا فرغت الصالة اخذوني برة گعدت على الكوشة وهو يمي تقرب شاورني انفاسة تلفح برگبتي قشعر جسمي يحچي بهدوء
اكرام :: مبروك علينة جوريتي
رديت بخجل وشفتي ترجف بصوت يوب ينسمع
:: الله يبارك بيك
جابت اختة الذهب همة مشترينة صار يلبسني وسط الگولات والهلاهل والمصورة توثق هاللحظات الحلوة
بعدها قطعنة الكيك ووكلني متت بدمي مستحية كلها تباوع علية همزين ما غصيت ونفضحت كملنة
سحبني بحضنة حيل وباسني من رگبتي واني
مصدومة ماتوقعت يتصرف هيچ الضخك والهلاهل صارت ترگع علينةة سحبت روحي منة رفع راسي
خليت عيني بعينة عيونة تشع حب وفرح وعيوني
مبتسمة بخجل باسني بگصتي ونطاني علاگة صغيرة وطلع
النسوةن بقن يرگصن شوية وطلعن فرغ البيت بقيت بس اني والبنات اخذنة صور وهدوء گامت ترگص
وامها وعمتها يعيطن بيها يخافن لاتجيب وهية ولاهامها اخر شي گامت شفق طفت المسجل يلة هدئت
للمغرب كل واحد راح لبيتة گمت تعبانة راسي صاير طبل ذبيت البلدة وشفق فتحت الية التسريحة ودخلت سبحت وطلعت بس صليت تمددت بفراشي عفت الهوسة عليهاا صارت عيني على العلاگة لأنطانياها گمت اخذتها وفتحتها طلع تليفون شغلتة
دخلت على الارقام بيه فقط رقمة ورقم اختة نزلت
الرمز وبقيت اتصفح شوية منزل الية كل البرامج
اعرفهن من هدوء بعدني استكشف بيه ودگ
فزيت فزة ووگع من ايدي همزين على الدوشگ چان انكسرر رفعتة قريت الأسم اكرام استحيت ارد مع العلم اني حاچية وياه قبل بس مااعرف شنو صارلي
خلصت الدگة واني صافنة على الشاشة رجع دگ مرة ثانية قويت روحي وفتحت خط خليتة على اذني ساكتة اجاني صوتة يحچي بلهفة
اكرام :: جوريتي!
:: هااا
اكرام :: شلونچ
:: زينة
اكرام :: صوتچ ناصي بس لانايمة وگعدتچ
:: لا هسة ردت انام بعدني
اكرام :: تدرين جوري
:: شنو؟
اكرام :: حاليا اني اسعد شخص بالدنيا
:: الله يديم السعادة عليك
اكرام :: اذا انتِ وياي ابقى سعيد كل عمري
سكتت مااعرف شرد بمثل هيچ كلام مامتعودة الصراحة رافد چان مشبعني مغمة هو ومرتة قطع تفكري صوتة وهو يگول
اكرام :: حبيبتي
:: هاا
اكرام :: عندچ اعتراض اذا نسوي العرس الجمعة التجي؟
:: هااا ليش هيچ مستتحل؟
امرام :: مااعندي شي يأخرني كلشي مجهز والعرس يصير بقاعة
:: قاعة؟
اكرام :: اي قاعة بيتكم صغير ونااس هواي مااريد اضايقكم واني من زمان ناوي من ازوج ازوج بقاعة
شنو گلتِ؟
:: والله مااعرف شنو اگول بس مااعتقد الحگ
اكرام :: عندچ اسبوع كامل جهزي نفسچ بيه وشنو تردين گولي واذا تخجلين مني خبري ام حسن هية تقوم بالواجب بس لاتگولين لاا
:: تمام براحتك
اكرام :: اروح فدوة لصوتچ
ابتسمت وسألتة
:: الوالدة ماشفتها لااليوم ولا من اجيتو قبل كم يوم شنو بعدهي مريضة؟
اكرام :: هاا لا صارت احسن بس عدنة
خطار هواي بقوا بالبيت وماگدرت تعوفهم اعذريني حبيبتي بالعرس راح تشوفيها
سكتت مامقتنعة حسيتة ضام شي علية بقينة نسولف شوية اتفقنة الحنة والعرس بيوم واحد مو يومية خبصة اخذتنة السوالف الى ان وگع التليفون مني من النعاس ترخصت منة ونمت
الصبح بلغت شفق وصارم چان هم موجود بموعد العرس شاشت عليهم
شفق :: شسالفةة شنو مستعجلين وين نلحگ اسبووع بعدين كلها بصفحة وامة بصفحة زين اكو ام متحضر خطبة ابنهاا راح اتخبل
صارم :: هسة انتِ حطيتي عقلچ وياها عوفي امةة شنو راح تتزوجه لو تزوج امة والله خبصتنيا بيها
شفق :: بس راح تعيش وياها واذا طلعت مسمومة اطين عيشتهاا
صارم :: لاان شاء الله متطلع مثل ماتگولين بس اهدي وانتِ جوري اذا مقتنعة فوتي بيهاا معليچ بأختچ مخبلة هاي
:: من شفت ملحتة واصرارة وافقت ميحتاج نطولها اكثرر مو هيچ شفق.
شفق :: والله بكيفكم شتسوون سوو اني محد يسمع مني
:: اذا ماموافقة اخابرة هسةة واكنسل كلشي لاتضوجين
اجت شبگتني وتحجي
شفق :: لالا حبيبتي اني اتمنى تتزوجين وتنسعدين بس الخوف بگلبي يمنعني
:: لاتخافين اكرام زين راح يحافظ علية
شفق :: الله يسمع منچ
اعرف بيها خايفة علية وبنفس الوقت مامتقبلة فكرة اعوفها واتزوج كلما ادخل غرفتها الگاها تبجي تعبت نفسيتي حيل صارم يحجي عليهاا مايقبل وهية تحاول تظم حزنها عني
التهينة هذا الاسبوع بالتجهيزات كل يوم اطلع اني وشفق نشتري الجهاز بعدما دز اكرام فلوس بيد اختة چان حيل كريم مامقصر بشي جهزت نفسي من احسن الملابس والغراض حجزت بدلات الحنة لون ليموني والعرس بيضة وياها حجاب ضبطت وية المركز نفسة لان شغلة حلوو
خلص الأسبوع واجة يوم الجمعة گعدت من الصبح سبحت وتريگت ورحت للصالون شفق وياي وصلاني صارم بدت تشتغل الي كتلة مكياج يناسب البدلتين والتسريحة بسيطة لان من تخلص الحنة البس بدلة العراس والحجاب هية مگالت لا اشتغلتني بكل مهارة وخفة ايد كملت باوعت لنفسي راضية على النتيحة
شفق مكيجت خفيف لبست فستان اسوود يخبل مستور وسرحت شعرهاا طلعت تجنن بس عيونها حزينة چانت من اباوع عليها تبتسم بوجهي تخفي حزنها
خلصت واجة صارم اخذنة من المركز لبقاعة تلگتني هدوء اخذتنة لغرفة التبديل رتبت نفسي وطلعني القاعة متروسة بس نسوان گعدت بمكاني وعيوني تباوع للناس شوية وشفت بنية من بعيد اجت بأتجاهي ركزت زين هاي عبيرر گمت الها اجت حضنتني تبجي الفطيرة
عبير :: جوري يروحي مبروم مبرووك والله فرحت الچ من كل گلبي تستاهلين حبيبتي
:: حبيبتي عبيرر والله گلت ماتجي من حجيت وياچ جيتج حيل فرحتني
عبير :: اكو وحدة متحضر عرس اختهاا شنو تخبلت ولچ شطالعة عيني فلقة قمرر
:: هههه عيونچ الحلوة
بوستني وراحت گعدت شوي وصاحوا العريس اجة نفتح الباب ودخل بيدة باقة ورد بألوان تخبل ابيض واصفر ولابس قميص اصفر فااتح حيل قريب الابيض وبنطرون بيج يخبل طالع مااعرف شلون عرف لون بدلتي مع العلم سألني وماگتلة تقدم بأتجاهي وعيونة مبتسمة وسط الاغاني والهلاهل
قدملي الورد اخذتة منة تقرب مني باسني بگصتي
واخذ ايدي لوسط القاعة اشتغل الموسيقى وصار يرقص بيه مااعرف چنت بس هو يعملي شاورني سوي هيچ واني اسمع منةة
بحركة جنونية مامتوقعة رفعني من خصري وفراني
وسط القاعة گدام العالم صعدت الشعالات والمصورة تصور صارت الاجواء تخبل
رجعني للكوشة اخذنة صورؤ تقرب همس بأذني
اكرام :: يلة جوريتي اروح اني لان صار وقت العرس
هزيت راسي الةة طلع واني اخذوني البنات لغرفة التبديل بدلت بدلتي بسرعة شفق سوتلي حجابي مثل ماعلمتها ام الصالومن رشتلي عطر باوعت النفسي مقتنعة حيل البلدلة مستورة والحجاب زايدني جمال طلعت لگيت اكرام منتضرني
حتى نسوي الدخولية لابس قاط اسود لايگ عليه اخذ ادية باسهن ولزمني حيل تقدمنة وسط تعليمات المنظمة شلون تكون الدخولية اشتغلت الاغنيةة الخاصة والمصورة تصور چانت القاعة متروسة ناس والزلم داخلين ارتبكت شوية بس هو ينطيني القوة من يضغط على ايدي
گعدنة على الكوشة تقربوا كم شخص يسلمون علية وهو يعرفني من ضمنهم مرة چبيرة بس معتنية بنفسها لابسة قاط رسمي ومدندلة بالذهب تقربت لاكرام باستة وابتعدت حچة هو
اكرام :: جوريتي اعرفچ ام اكرام هاي الوالدة
:: اهلا وسهلا خالة
ام اكرام :: هلابيچ
حچتها وباستني وراحت ردة فعلها جامدة خفت منها
مبينة مراضية بقيت واگفة حسيت بية لزمني باوعتلة ابتسم بوجهي طمني گعدت بمكاني استمرت مراسيم العرس بين الرقص والصور والكيك حيل حلوة الاجواء وماتوقعت اعيش هيچ شي من قبل
نسيت ؤدة فعل امة والفرحة ملت گلبي بس اعؤف الفؤح ميدوم الية ولازم اكو شي ينغص علية
خلص العرس وطلعت السيارات اجت شفق وصارم وياها حضنتني حيل تبچي
شفق :: جوري انتِ بنيتي مو اختي بيتي راح يفرغ وحياتي تفرغ من بعدچ بس كلشي يهوون من اشوفچ سعيدة يروح اختچ ديري بالچ هلى نفسچ وخليچ على تواصل وياي حبيبتي
بستها بدون ماارد الغصة خنگتني تقرب صارم عيونة حزينة باسني براسي وابتسم
صارم :: مبروك خوية اطيتچ لرجال كفو ومتأكد راح يصونچ اتمنى كنت گد الامانة وحافظت عليها
حچيت بغصة
:: ماقصرت كفيت ووفيت
صارم :: اكرام جوري اخيتي لاتفكر محد الها اذا بيوم شكت منك لو نزلت دمعتهاا ماتعرف شسوي بيك
اكرام :: بعيوني لاتشيل هم
حچة هيچ وتسالموا اجني البنات هدوء عبير سلمو علية سلمني صارم اله وطلعنة من القاعة صعدني بالسيارة صارت الزفة تخبل والمسويقى ادگ الى ان وصلنة لبيتهم كانت المنطقة راقية وبيتهم حلو مبين وچبير نزلني اكرام ذبوحوه جوة رجلي
دخلوني للبيت صعدتني اختة لغرفتي گبل دخلت اباوع منبهرة بس مابينت هسة تگول مشايفة هاي گعدتني وراحت سدت الباب عيوني تتجول على انحاء الغرفة چانت غرفة ملكية تخبل اثاث مصري
ذهبي فخمة فخمة وچبيرة حيل صفحة غرفة الاخشاب والصفحة الثانية گعدة حلو تخم وبلازمة حيل حلوة بعدني اتفرج بأنحاء الغرفة سمعت الباب انفتح دخل اكرام مبيتسم
نهضت خايفة تقرب لزم ادية باسهن قبل لايحچي ندگت الباب وصوت امة تصيحة ترخص وفتح الباب
فتحت عيوني على وسعها واني اسمعها تگلة بصووت ناصي
ام اكرام :: الك ساعة وحدة اكرام واريد النيشان
شكرا لزيارتكم عالم روايات سكيرهوم
