رواية وجه محروق الفصل الثاني بقلم جمانه السعيدي
اصيل...هلمره اجا عمي وحالف مايطلع اله ابوي يقتنع بلزواج
عمي دازته زوجته لان العروس موجوده ومستعده
منتظره اشاره من ابوي
العروس لمياء اخت زوجت عمي ارمله وعدها طفل
ازغر مني بسنتين
ابوي كان أفضل فرصه المياء
نجار شغله ماشي وماعنده غير طفل واحد ميسور الحال
عنده بيت يعني راح تكعد وتسيطر
كل هاي الفتره عمي يلح على موضوع الزواج
لان زوجته جاي ادفعه تريد تظمن زواج اختها
وعمي جاي يبذل جهد ويتعب حتى هاي الزواجه أتم
المهم هلمره عمي حافظ الدرس زين وجاي وما ناوي يطلع
من الورشه اله ابوي مقتنع
اني هنا كان عمري ست سنوات يعني افتهم
اذكر كلش زين لان اني كنت اخلص يومي بلورشه وياا ابوي
ابوي مانع عليه اللعب بلشارع وياا الجهال
لان يخاف عليه لا اتاذه جسديا بسبب اللعب
واتاذه نفسيا لان اغلب الجهال يتنمرون عليه بسبب الحرك بوجهي كانو يصيحولي ابو حركه اي ابو الحرك
مره ابوي سمعهم وبعد منع عني اللعب بلشارع
اجا عمي كعد
عمي....تعال ابو أصيل اني هلمره جايك بشغله تفيدك
ابوي كان يشتغل عاف الشغل بايده واجا كعد يم عمي
عمي...إلى متى راح تبقى هيج انت وابنك حسره عليكم اللكمه حسره عليكم بيت نظيف واحد يغسل ملابسكم يهتم بيكم
البيت بدون زوجه مايفيد ابد
ولاينسكن شلون متحمل انت وابنك هذا الوضع
جمانه السعيدي
ابوي....اني الصراحه مااريد ازوج اخاف على اصيل لا يتبهذل
عمي...على اساس هو هسه مرتاح شوف حاله
طفل بعمره يلعب يركض ويا الجهال بلشارع وانت
حابسه هنا شوف نشارة الخشب واصله الراسه
بعدين سنة الأخ هو يسجل بلمدرسه منو راح يهتم بي
منو راح يحضر دروسه
انت ملتهي كل الوقت هنا بلورشه على الاقل
من يرجع يلكه لكمه طيبه ياكل
ابوي...وين اكو وحده تهتم وتعتني بي اخاف ازوج
وتطلع وحده لاذمه ولاضمير وماتراعي رب العالمين ويااا
عمي...هاي الشغله عوفها عليه اني عليه بت الحلال
راح اجيبلك وحده ما تحك راسك من وراها
تخليك انت وابنك بعيونها بت حلال خلوقه متربيه
تريد بس تعيش
ابوي...هااا عندك عروس
عمي...اي لمياء اخت ام حسن زغيره وحلوه ارمله وعدها طفل زغير
هاي بضمانتي راح تخدمك انت وابنك
ابوي....ماادري اني اريد ازوج بس من اشوف أصيل
ابطل
عمي...شنو تبطل توكل على الله بليل تعال شوفها
راح اخليها تجي بيتنا
ابوي...اني شايفها من زمان
عمي...خرب عمي يكول من زمان تعال شوف هسه صايره تخبل
ابوي...الله كريم
عمي...اعرف رب العالمين كريم وماكو اكرم منه
هااا شكلت
ابوي...ولله متردد
عمي...لا تفشلني تعال بليل انتظرك
جمانه السعيدي
أصيل...طلع عمي وابوي بقه حسبه اجيبه وحسبه تودي
حاير يوافق ويزوج ويعيش باقي حياته مرتاح
ويصير عنده بعد اطفال
لو اذا ازوج راح يتندم خاف تطلع موخوش مره
وتبهذل احواله
بعد أذان المغرب قفلنا الورشه ودخلنا للبيت
ابوي توضأ يريد يصلي
اندكت الباب اجا ابن عمي حسن يااكد على الموعد
هلمره ماكووو فرار
بعد شغله وخلنها النسوان بعقلهن مايرتاحن اله تخلص
ابوي رد علي اتعشى واجي
تعشينا وابوي غسل وبدل واني ابوي لبسني تراك جديد
طلعنا على بيت عمي
وصلنا ودخلنا كعدنا حابولنا جاي
اني دخلت جوه اللعب وياا جهال عمي
شفت العروسه مبدله ومتحضره الصراحه حلوه
بيضه وسمينه شكلها كلش حلو
جانت لابسه ثوب اسود بس يخبل عليها
سمعته تحجي وياا زوجت عمي
تكلها اني شايفته واعرفه بس اذا ما يقبل ابني وياي
ماازوج
زوجت عمي...مالج شغل اني وابو حسن نقنعه انتي بس روحي اكعدي كباله خلي يتخبل
ولج بس يشوفج مراح يعوفج
اذا بيج حظ تاخذي ابو اصيل حباب وكريم ومتساهل
وشغله خير من الله
راح تعيشين انتي وابنج بلجنه
ابو أصيل فرصه ذهبيه ومراح نعوفها تصير الغيرنا
اني من ماتت زوجته واكول منو سعيدة الحظ الي راح تاخذه ولج كنز تعرفين شنو كنز
جمانه السعيدي
اصيل...ثنينهن ما منتبهات اني موجود وياا الجهال اللعب
وابنها يلعب ويانا
اقصد ابن لمياء زوجت ابوي المستقبليه
اني ماحبيت ابنها وواحد خبيث ماشايف مثل خباثته
يضرب هذا وياخذ لعبة هذا
وبس واحد يقرب علي يبجي ويسوي نفسه مسكين
المهم راحان زوجت عمي واختها كعدن يم ابوي وعمي
اني عفت الجهال ورحت اريد اشوف
ابوي شنو ردت فعله
بس قربت ابوي اخذني كعدني بحضنه
طبعا هي كانت تحجي ماسكتت ابد من كعدت بعد ما سدت حلكها و وبس تحمد بنفسها
واني واني وماكو مني
اني الشاطره اني المعدله اني الشريفه مااطلع من الباب
ابوي بس ساكت ما يحجي لان هي واختها اقصد زوجت عمي ماانطنا مجال يحجي
وعمي كان مدفوع من زوجته واختها
لازم هاي الصفقه تكمل اليله
يعني ابوي مايطلع اله موافق على هاي الزواجه
واكو اتفاق صريح بلزواج بينه وبين لمياء
جمانه السعيدي
هنا يحجن ثنيينهن وعمي ياايد كلامهن ويثبت
علي وكانهن يحجن حكم
وهنا كلامهن كله مديح بلمياء شلون صبرت وشلون اتحملت وشلون كانت زوجه صبوره وتتحمل كل الازمات
هااا وكل شويه زوجت عمي كالت
يوميه يجونها خطابه وهي ما تقبل تريد واحد يستاهلها
وواحد معدل
عمي يكول الي ياخذ لمياء امه داعيتله
وين بعد اكو هيج وحده معدله وشريفه بهذا الوقت
من كل هذا الكلام ابوي ماكال غير كلمتين
ابوي....اني اهم شي عندي اصيل
اصيل مااريد اي احد يعامله معامله مو حلوه
عمار البيت وخرابه على رضا اصيل
اني لو عليه مازوج طول العمر بس الخاطر اصيل اريد ارتبط مااريده يعيش محروم من احساس العائله طول عمره
لمياء...اني هم ام واعرف عن شنو جاي تحجي اني هم عندي امير مستحيل اقبل واحد يتعدى علي
اصيل وأمير ثنيبنهم جهالي
ومستحيل راح افرق بينهم
جمانه السعيدي
اصيل...على اساس هذا الكلام ابوي وافق
وافق يرتبط بلمياء
عمي ماقبل ابوي يطلع اله يتفقون على كلشي ويحددون يوم العرس
يمكن عمي جان خايف ابوي يطلع ويغير رائيه
بما ان لمياء واختها ماعدهن اخوان وابوهن ميت
وامهن مره جبيره ومريضه
عمي كان وكيل العروس هو الي حدد وياا ابوي
تفاصيل الحاضر والغايب
طبعا عمي كان مجرد واجهه لان ام حسن ولمياء محددات كلشي ليكدام محددات الغايب والحاضر وكل التفاصيل
بس عمي كشخ علينا على اساس يخاف الله
ولمياء لازم تاخذ كل حقوقها
مايصير نستغل الموقف لان ماعدها احد ونقلل من مهرها
لو نفاصل باي تفصيله من تفاصيل العرس
ماطلع ابوي من هاي الكعده اله وهو موافق على كل طلباتهن
لمياء اخذت مهر حالها حال البنات بذاك الوقت
صحيح ماكو عرس وهوسه مجرد تجمع عائلي
بس شرطت تريد غرفه جديد
والبيت ينفرش فراش جديد وبردات جديده
حتى الكاونتر بلمطبخ كالت اريده يتبدل
كلشي تم مثل ماتريد واكثر
عقد ابوي عقد محكمه وثبت المهر بلعقد
وحدد يوم عقد الشيخ هو يوم العرس
اصيل..بيتنا بعد ماتغير الأثاث والفراش والبردات
صار حلو
وعطر العرس ترس البيت
اليوم الي ازوج بي ابوي اني بقيت بيت عمي
وأمير ابن لمياء هم موجد بيت عمي بقى يم خالته
شكد وكح وخبيث ويتزعل على كلشي ويريد كلشي
اناني حيل
كل الوقت يعيب على شكلي
لان وجهي محترك يعيب عليه
واني ساكت مو لان اخاف منه بس لان هاي اول مره
من بعد ما ماتت امي ابات بعيد عن حظن ابوي
كنت ضايج ودمعتي واكفه بطرف عيني
هذا الحيوان جاي يعيب عليه ضوجني اكثر مااني ضايج
انعزلت عن الجهال ورحت كلت الام حسن اريد فراش اريد انام
جابتلي ام حسن فراش تمددت علي
راسا امير كام يبجي اريد هذا الفراش انام علي
ام حسن...اني افرشلك غيره
امير...لا هذا لفراش حلو اريده
اصيل..... راحت ام حسن جابت فراش ثاني فرشته
ام حسن...حبيبي اصيل انت جبير وتفتهم تعال هنا
اصيل كمت من الفراش ورحت للفراش الثاني
تمدد امير شويه بعدين رجع يعيط
ام حسن ...هااا خير
امير...اريد امي هسه تاخذوني الامي
كعدت ام حسن تتوسل بي بس يسكت ماقبل
كلب الدنيا اريد امي
اني جنت مدد واباوع علي واكول بكلبي اني هم اريد ابوي
راسا عاط بصوت اعلى
ام حسن...شكووو شبيك
جان يكول اصيل يعيب عليه
واني بس اباوع علي
ام حسن....اصيل دير وجهك
اصيل...درت وجهي عنه وغمضت عيوني
ماكدرت انام كل الي بلبيت ناموووو واني بعدني احوس
وعيني على الشباك
يمتى يطلع الصبح حتى ارجع البيتنا
ضجت حيل
غفيت واني انتظر الصبح يطلع وارجع الحظن ابوي
قصه جدا جميله واحداثها مثيره
شكرا لزيارتكم عالم روايات سكيرهوم
