رواية شيخ البصره الفصل الثاني بقلم مجهول
كعدت الصبح يوم حاله حال اي يوم
اصبح بي على اهلي و اطلع للكلية
وماجنت اعرف القدر شضاملي
..
وصلنا للكلية وحضرت محاضراتي طلعت لكيت حيدر واكف يم باب القسم وشايل ورد بأيده
رحت عليه فرحانه وبنات الكليه عيونهم علينا
بلسم:- هلووو حيدر
حيدر:- هلا يا روح حيدر فديوم اريدج تستقبليني بكلمة هلووو حبيبي هلووو حياتي
بلسم بخجل:- هههههههههه لا استحي بعد وكت
حيدر:- ولج لاتخبليني صارلي ٤ سنين احبج و شهرين مخطوبين وتكوليلي بعد وكت .
بلسم:- ههههههههه شبيك حيدر فضحتنا امشي خلي نكعد بالكافتيريا .
حيدر :- اووووف امشي جمارة كلبي.
بلسم:-ههههههههههههههه.
كعدنا بالكافتيريا وشربنا عصير ورة دقايق دك تلفوني..
بلسم :- الو ها حبيبتي ماما.
الام:- بلسم تعالي للبيت هسه.
بلسم:- بسم الله الرحمن الرحيم شبيج ماما صاير شي ظل بالي.
الام تبجي:- بلسم مصيبه وكعت على راسنا تعالي.
بلسم :- سديت التلفون وايدي ترجف و الف فكره وفكره تجي ابالي
كمت مااشوف كدامي احد بس اريد اطلع .
حيدر :- شبيج حبيبتي شكو شصاير.
بلسم:- م م م ماادري حيدر اامي تكلي تعالي للبيت بسرعه مااعرف شصاير .
حيدر :- امشي اني اوصلج.
بلسم:- يلا امشي بسرعه عفيه.
صعدنا بالسياره و بوجهنا لبيت اهلي
شفت الباب مفتوح و ناس معگلة واكفين بالباب
وصايره هوسه دااريد افوت جان انضرب بواحد طويل وجتافه عريضه لابس دشداشة بيضه وغتره و عباية سوده. كتله اسفه باوع علية وخزرني.
اني مادرتله بال بس اريد اوصل لباب البيت دااشوف اهلي شبيهم. حيدر دخل من باب الصالة و اني دخلت من باب المطبخ
دخلت للبيت شفت امي حاضنه نهى و نهى تدك وتلطم وتبجي كلتلهم..
بلسم:- شكو شصاير ؟؟ ليش دتبجون شكوووو؟
نهى:- مصيبه مصييييبه وكعت على راسنا وتدهك وتبجي.
الام :- اسامة سوة حادث دعم سيارة ولد و سيارة الولد انكلبت و ...
بلسم :- وووو شنوووو ماما احجي ؟
الام :- الولد اتوفى بالمستشفى واخوج هم متأذي كسور بأيده و رجله .
بلسم:- اني رأساً وكعت بالكاع وابجي.
وهسه اسامة وين؟؟؟؟
الام:- اسامة بالمستشفى و قسم من اهل الولد حاجزيه مايخلوه يطلع اخاف ينهزم .والقسم الثاني هنا. ومبينين ناويها على شر.
بلسم:- امي تحجي واني اسمع عياط بالصالة
رياجيل كل واحد يعيط ويحجي من صفحة
خفت على ابوية لايصير بي شي
باوعت من فتحة الباب لكيت ابوية كاعد وحاط ايده على راسه
وشيوخ هواااايه كاعدين ويعيطون ويحجون و حيدر و مثنى رجل اختي ومحمد اخوية كاعدين يم ابوية.
ورة دقايق سمعت عيطة امي بالمطبخ
رحت اركض و جان اشوف نهى متخربطة و امي شايله اية بأيد و لازمة نهى تخاف عليها لتوكع بالايد اللخ.
رحت عليها وجريت نهى رشيت على وجهها مي واضرب على خدها حتى تصحى..
صحت نهى وتصيح اسامة اسامة شسويت بينا اني وبنتك اسامة
وتضرب على وجهها و احنا نبجي وياها.
بعد ساعه صار هدوء بالبيت الرياجيل كلهم طلعو
ورحت ركض دخلت على ابوية وبيدي كلاص مي ..
بلسم:- باباتي حبيبي استهدي بالرحمن وهاك هذا المي اشربه .
الاب:- لا اله الا الله محمد رسول الله...
حيدر:- عمي شراح تسوي؟ هذوله مبينين ناس شرانيين و ماديقتنعون انو الي صار قضاء وقدر.
الاب :- والله ماادري يا ابني اني دايخ وخايف لا يسوون شي بأسامة. لا ديخلونا نجيبه من المستشفى ولا يخلون الشرطة تاخذه ..مبينين ناس واصلة والكل تخاف منهم.
مثنى:-عمي هسه همه على شنو انطونا عطوة ٤ ايام؟
الاب:- حتى يسوون عزا لأبنهم وبعد ٤ ايام يجون حتى نتفاهم وياهم .
نهى دخلت للصالة وعيونها حمره و وجهها مخرمش من اللطم..
نهى:- عمو الله يخليك رجعلي اسامة شيريدون انطيهم
رجعلي زوجي خلي يفرح بأبنه الي بعده مجاي للدنيا.
الاب :- لاتخافين بنيتي بأذن الله نحلها شما يكون الثمن.
بلسم:- اسمع والدي يطمن نهى برجعة اسامة بس ماجنا نعرف الثمن حيكون غالي كلش.
بعد ٤ ايام من القهر والقلق على اسامة رجعو اهل الولد و جايبين اخوية وياهم
بس اخوية مكسر تكسير من ورة الحادث.
و رجعنا نسمع الهوسه والعياط و واحد يجر طول و واحد يجر عرض..
لحد ما على غفلة سمعت صياح حيدر ....
حيدر:- والله تخسوووون ننطيكم فصلية .. شكد تريدون فلوس ٥٠ ، ١٠٠ لو ٢٠٠ مليون ننطيكم بس فصلية مستحيل..
وجان اسمع واحد صوته هز البيت هز
انت اسكت لا احط چيله براسك تتكرفت هنا. تردون تشترون دم اخوي بفلوس
لا والله ما حزرتو الا ناخذ من عدكم فصلية .
و كام واحد يريد يضرب الثاني
و الشيوخ واكفين بيناتهم حتى لا يتضاربون.
بعد ما طلعو اهل الولد سمعت حيدر يعيط ويصيح على ابوية
دخلت عليهم ركض
بلسم:- شبيك حيدر ليش تصيح على بابا ماتشوفه تعبان.
حيدر :- ولج بلسم شلون تريديني اهدأ وهذولة السفلة يريدون ياخذوج مني.
بلسم:- اني سمعت هيج وجان اجمد بمكاني، يعني شنو ياخذوني منه؟ وين ياخذوني واني شعلية؟
الاب :- كافي حيدر ارحمني خليني اعرف افكر دماغي راح يوكف.
حيدر:- شوف عمي فصلية ماتنطوها والله العظيم احرك البيت حرك.
وطلع و ركع باب البيت وراه.
واني واكفه صافنه شديصير هنا؟
بعد ما كعدنا وهدأنا امي سألت ابوية.
الام:- احجي نزار شنو يريدون هذولة؟ صدك يريدون من عدنا فصلية؟
الاب :- اي اي اخخخخخ يريدون فصلية مايريدون فلوس .
الام وهي تبجي:- اييييييي نزااااار اييييي وشراح نسوووووي راح نشمر بتنا شمعة بيتك و ضحكته؟؟؟؟ احجيييي نزااار ليش ساااااكت
الاب:- حط ايده على راسه ويبجي مثل النسوان.
اخخخخ شكد صعبة تشوف ابوك القوي ابو الشخصية القوية هيج مكسور و مهدود حيله.
اسامة:- يابه مستحيل انطي اختي فصلية.. اني السبب واني ادفع الثمن.
نهى:- ايييي اسامة و شتريد؟ اولادك يتيتمون؟
تريد ابنك الي بعده ما شايف النور يصير يتيم الاب؟ وترملني؟
الام:- زاد بچيها.
بلسم:- واني لحد هسه واكفه على صفحة مچتفة ايدي و جامدة بمكاني حتى الريك احسه مادينبلع .
اني وبصوت مهزوز.... يعني شنو فصلية؟
الاهل كلهم اندارو على بلسم وعيونهم مليانه دموع.
راحت الام وحضنت بلسم وكامت تبجي وتبوس بأيد بنتها.
الام:- ماماتي حبيبتي ماتعرفين يعني شنو فصلية؟
بلسم:- لا.
الام تبجي وتضرب رجلها:- سوده عليه ماماتي سوده عليه .
الاب:- بنيتي الفصلية يعني البنية الي تروح بدون حقوق ولا عرس لبيت اهل الضحية حتى تمنع الدم بين الطرفين.
بلسم:- باوعت عليهم وعيوني كلها دموع
عادي اني قابلة اروح فصلية.
اسامة وهو اول مره تخونه دموعه ويبجي:- مستحيل اشمرج هالشمره. ولج اني السبب واني الي لازم ادفع الثمن.
بلسم:- والثمن شنو؟؟؟؟ حياتك مو؟
لا اسامة مستحيل اخليك تموت و اطفالك يتيتمون واني ابقى اتفرج. وبعدين شنو راح يصير قابل ماتعرف اختك قوية؟
اسامة:- ولج يا قوية؟ ولج انتي المدللة مالتنا شلون تتحمليييين؟ ولج احنا هنا لفيناج بالكطن حتى لا تتأذين... تريدينا هسه ننطيج فصلية؟ يا كاع انشكي وبلعيني .
بلسم :- اسم الله عليك حبيبي اسامة ..
الاب :- قبل مانسبق الاحداث باجر نرجع نتفاهم وياهم و نصعد المبلغ بلكي يقبلون.
و مشى اليوم بس كللللش بطيء الكل كاعد مهموم والدمعه بعيونه
شربة المي توكف ما تنبلع كأنه مو مي كأنه سم
صعدت لغرفتي اباوع عالتلفون
حيدر ولا مرة مخابر ..
اتصلت عليه جان يطلع صوته...
حيدر :- الو
بلسم:- شلونك حيدر بس بصوت مخنوك.
حيدر:- شلوني؟؟؟؟ دااموت بالدقيقة الف موته.
بلسم:- اسم الله عليك .
حيدر:- شقررو اهلج؟
بلسم:- باجر يتحدد المصير.
حيدر:- يا مصير بلسم؟ لج هذوله قافلين يريدوج فصلية... يريدون ياخذوج مني.
بلسم وماكدرت تسيطر على شهكاتها :- حيدر مااكدر اخلي اخوية يروح للموت برجله.
حيدر:- يعني شنوووو بلسسسسم يعني حتعوفيني و تروحين انتي للموت برجلج؟؟؟؟
بلسم:- اموت اني ولا اشوف واحد من اهلي يموت.
حيدر:- ولجججج وانيييييي؟؟؟ مافكرتي بيه؟؟؟ اني عادي اموووووت؟؟؟؟
بلسم:- لا حيدر احنا بعدنا عالبر انت تكدر تعيش حياتك وتلكه بنت الحلال الي تنسيك..بس اخوية ومرته واطفاله شلووون؟
حيدر:- ولج انعل ابو اليوم الي شفتج بي وحبيتج
خره بروح اهلي لأن اجيت وسلمت كلبي بيدج...
و فجأة التلفون انسد بوجهي.
واني خلص انهاريت....
ثاني يوم الصبح
كعدنا واحنا ولا واحد بينا عينه اخذت النوم
ولا كدرنا نحط لكمة بحلكنا..
اندكت الباب و رجعو الرياجيل واني كلبي احسه راح يوكف من ورة عياطهم .
الاب:- فدوه لكلبكم اني ماعندي بس هالبنية بهالبيت شلون تريدون تاخذوها مني؟
واحد من الشيوخ:- لعد شلون اخذتو ولدنا من عدنا؟ ابنا مو بشر؟
الاب:- شيخ انت انسان مؤمن وهذا الشي قضاء وقدر ربك كاتب الساعه الي نموت بيها.
نفس الصوت الي هز البيت البارحة
::- ايييييي خلص ناخذ روح ابنك وهم نكول قضاء وقدر و ربك كاتب يومه ونسد الحساب بيناتنا.
امي ونهى كاموا يلطمون من سمعو الحجي واني ساده حلكي اكتم الشهكة وبس دموعي تجري.
الاب:-اطلبو اي مبلغ تريدوه حتى لو اعرف ابيع هالبيت هذا وابقى بالشارع .
::- والله مستحيل غير الفصلية ما ناخذ منكم فلس احمر.. لو روح ابنك.
الاب بيأس و قهر :- حسبي الله ونعم الوكيل .. هاهية راح اسوي الي تريدوه .
واحد من الشيوخ كال
بعد اسبوعين نجي ناخذ منكم المره ... ذبو هالكلمات و طلعو واحد ورة الثاني.
وامي حضنتني وكامت تبجي ..
