رواية شيخ البصره الفصل الثالث بقلم مجهول
ذبو هالكلمات و طلعو..
وامي اجتي حضنتني و كامت تبجي
واني وية كل هذا دمعه مانزلت من عيني كأنه عيوني نشفت من الدموع..
مدري بعدني مصدومة و ممستوعبة الي ديصير والي راح يصير.
بهالاسبوعين عفت كليتي و بقيت يم اهلي بالبيت اريد اشبع منهم اخاف بعد مااشوفهم ..
وكعدت احضر اغراضي حتى اخذهم ويايه .
مر الوقت واجه يوم روحتي للسجن سبحت و لبست هدومي
جنت لابسه بنطرون جينز و بدي اسود و بوتين ابيض
نزلت و اني شايله غراضي شافتني نهى وهي تبجي و منزله راسها
نهى:- اني اسفه بلسم.
بلسم:- حضنتها وكلتلها على شنو حبيبتي؟؟
نهى:- لأن جنت انانية و خفت على زوجي و مافكرت بمصيرج وشنو ممكن يصير بيج .
بلسم:- زوجج هذا اخوية الجبير ومثل ماانتي تخافين عليه تره اني هم اخاف عليه و مستعده اضحي بروحي علموده.. لاتفكرين بهالشي ابد ولا اريد اسمع منج هالكلام... بالعكس.. اريدكم تقووني وتشجعوني .
نهى:- اني كلبج نظيف وابيض وصدكيني ربج يرزق كل شخص على كد نيته
وانتي نيتج طيبه مثلج.
بلسم:- ابتسمت بوجهها وكلتلها الله كريم.
شفت والدتي وكالعاده ماتحجي بس تبجي وتبوس بيه . قبل مانطلع اجه ابوية و حجه ويايه.
الاب:- بنيتي اني اسف لأن خذلتج و ماكدرت احميج ولا كدرت ازفج بيدي حالج حال البنات بفستانج الابيض للشخص الي تحبيه ويحبج.. و راح ابقى طول عمري عايش بندم وقهر لأن ضحيت بيج
انتي مو بس بنتي..انتي صديقتي و ضحكة بيتي .. اني سميتج بلسم لأن انتي صدك جنتي بلسم لروحي وراح تبقين بلسم روحي.
بلسم وهي تتصنع القوه بس عيونها خانتها ونزلت دموعها الي جانت محبوسة بهالاسبوعين:- حبيبي بابا انت ماضحيت بيه اني الي ردت هالشي ولو هذا الشي مصاير و راح اخوية بيها
جان عمري ما سامحت نفسي... مااريدك تعيش بدوامة الحزن والقهر وتحسس نفسك انو انت مذنب . اني راضيه وقانعه انو هالشي صح و رب العالمين كاتبلي مصيري
واعرف ربي مايظلم عبد من عباده.
الاب وهو متفاجئ بكلام بنته الي حسسه بشوية قوة :- ونعم بالله بنيتي .. ونعم بالله.
ودعت امي ونهى بس اسامة جان حابس نفسه بغرفته ومايرضى يودعني .. لبست عباية فوك ملابسي و شال من نهى لأن بالبصره مايصير البنية تلبس مثل لبسي .
اجتي سيارات هواية لباب بيتنا بس ابوية ماقبل اروح وحدي وياهم
ف اخذني هو و اخوية محمد بسيارتنا ..
السيارة تمشي واني اباوع على بيتنا الي شويه شويه بديت ابتعد عنه وكل ماابتعد كلبي يوجعني اكثر.. فجأه شهكت شهكة عبالك واحد جان خانكني و فك ايده و وياها دموع و غصه
محمد اندار عليه مقهور و بچى على بچيتي
وابوية ما كدر يباوع عليه حتى لايضعف. شكد جنت اصبر بنفسي واحاول ماانهار بس بالاخير فشلت كل محاولاتي .
خلصنا الطريق لتعاستي و وصل السجين لسجنه
اباوع السيارات من طبكت و شيوخ و رياجيل هواية واكفين بالباب
نزلت من السياره و دخلت لبيت جبير كلش وحلو
بس ماجنت مهتمه بشكل البيت بكد ما مهتمه بالناس الي عايشين بهالبيت..
جنت اريد اعرف طبيعتهم و من راح يشوفوني شراح يسوون؟ وشلون حيتعاملون وياية.
انداريت على ابوية حضنته و بسته و كتله دير بالك على نفسك وعلى ماما. تودعنا وبهالاثناء
اجتي علية بنية يطلع عمرها ١٧ سنه
اخذت غراضي و كلتلي اتفضلي ادخلي وراية
دخلت للبيت واشوف نسوان هواية لابسين اسود ويباوعون عليه ويتهامسون كأنه مخلوق غريب فات بيناتهم.و وحده ابد ماارتاحيتلها تباوعلي بحقد واحتقار .
دخلتني هالبنية لصاله جبيره وجانت اكو مره جبيره بالعمر وبأيدها عوجيتها و لابسه فوطتها
و بصفها واكفه مره يطلع عمرها بالثلاثينات
الحجية زهرة:- ادخلي بنيتي اتفضلي .
دخلت و وكفت كبالها واني منزله راسي واحس كلبي راح يوكف من الخوف والرهبه و چف ايدي احسه كام ينكط مي من الارتباك.
الحجية زهرة:- تعالي يمه اكعدي بجنبي.
رحت كعدت يمها واني كلمه مانطقت
الحجيه زهرة:- شو دحكيلي ..
مدت ايدها و رفعت وجهي و تباوع عليه
اللهم صل على محمد وال محمد.. وتباوع على المرية الي واكفه بصفها ويبتسمون بيناتهم..
الحجية:- ادحكي ولج سهاد سبحان الخالق هالجمال.
سهاد :- عليه الصلاة والسلام ماشاء الله تبارك الله.
الحجية:- شوفي يا يمه لاتخافين من عدنا حنا هنا اهلج وانه اعتبريني مثل امج . وهاي سهاد بنيتي وايدي اليمنى هنا بالبيت اعتبريها اخيتج .
بلسم:- اني ساكته احس لساني مربوط ..
الحجية تحجي وية بنتها سهاد:- خطية باين عليها خايفه . اخذيها لغرفتها ترتاح .
سهاد:- امرج يمه.. مشي وياي حبيبة اخذج لغرفتج.
اخذتني سهاد صعدتني فوك ودخلتني لغرفة و صاحت البنية الي اجتي اخذت غراضي من بره يمكن تصير بنتها .
سهاد:- مروه .. ولج مريوه وينج؟
مروه :- نعم يمه.
سهاد:- يمه صعدي اغراض مرت خالج خاف تحتاج شي منهن.
مروه:- حاضر يمه.
بلسم:- صفنت يعني اني راح اتزوج خال هاي البنية؟؟؟ عزا بس لا يطلع رجال جبير بالعمر.
سهاد:- حبيبة ماعرفنا اسمج؟
اسمي بلسم.
سهاد:- يا اهلاً وسهلاً حبيبة ان شاء الله ترتاحين عدنا .
بلسم:- ان شاء الله.
تفاجئت من لطافتهم و اخلاقهم الحلوه و اطمئنيت شوية بس بقه الخوف من الرجال الي راح اتزوجه .
صعدت مروه الغراض وكالت لأمها:- يمه خالو ضرغام يكول نزلو البنت السيد اجه حتى يعقدلهم.
بلسم:- طلع اسمه ضرغام .. اني كلبي انقبض من سمعتها حجت هيج.
سهاد :- كومي حبيبة خلي يعقدلكم السيد وبعدها اصعدي ارتاحي.
نزلنا للصاله وعقدلنا السيد من ورة الباب وسمعت صوت الرجال الي راح اتزوجه من كال موافق
اتذكرت هذا نفس صوت الرجال الي هز بيتنا و اتعارك وية ابوية و بقى مصر انو ياخذون فصلية وهنا كلت وية نفسي اجاك الموت يا تارك الصلاة.
بعد ما عقد السيد صعدت للغرفه نزعت عبايتي وشالي و كعدت عالجرباية ..
اندكت الباب وفات طفل صغير يطلع عمره ٥ سنين.
علي:- هلو وياها ابتسامة خجل
بلسم:- هلو حبيبي تعال... انت شنو اسمك؟
علي :- انه اسمي علي . انتي مرت ابوي؟
بلسم:- بصدمة ليش انت منو ابوك؟
علي:- انه ابوي الشيخ ضرغام.
بلسم:- هذا طلع عنده طفل هالنوب اكيد رجال جبير خرب حظي. (تحجي ويه نفسها)
اي اني مرت ابوك بس خلي نتفق اتفاق.
علي:- اي؟
بلسم:- خلينا نصير اصدقاء لأن اني اضوج من كلمة مرت ابوية هههههههه اوكي حبيبي؟
علي:- تمام ههههههههه.
وكعدنا نسولف اني وعلاوي كلش حبيته احس شخصيته شخصية رجال بس صغير.
وفجأة انفتحت الباب بدون استأذان ودخل رجال معكل ولابس عباية على جتفه ماانتبهت على شكله من الفزة والارتباك
ضرغام:- ها علاوي شجاي تسوي هنا؟
علي:- جاي اسولف وية خاله بلسم وصرنا اصدقاء .
ضرغام:- بسته وكتله روح حبيبي على اختك تريدك جوه.
علي :- ماشي يابه..
طلع علاوي من الغرفه وبقينا بس اني وضرغام
واني من الخوف اذا يذبحني ماتطلع مني قطرة دم. و طلع عمره بل٣٠ مو كلش جبير.بس شعجب عنده ٢ جهال وهو بعده صغير ؟؟
(احجي ويه نفسي)
ضرغام:- اكعدي عندي حجايتين احجيهم وانزل.
بلسم:- بقيت مثل الصنم واكفه.
ضرغام زمخ بيها:- ويامن جاي احجي وي الحايط؟
بلسم:-فزيت من عاط بوجهي ورأساً كعدت.
ضرغام:- شوفي اكلج انه اخذتج فصلية لسبب واحد هو انو ماارضى نبدل دم اخوي بفلوس يعني
لو دم لو مره.
اخوج كتال اخوي ولو بيدي الزمه واشرب من دمه بس قانون العشيره عدنا يمشي عالشيخ قبل الكل.. وانه اخذتج مو حتى اعيش وياج وتصيرين مرتي ونعيش حياة سعيده لااااا شيلي هالفكرة من راسج وطول مااني عايش انتي ماتصيريلي مره
انتي شغلتج هنايه خدامه الي و لأطفالي
حسج مااهيسه و الحجيه تداريها وتخلين بالج عليها واذا فديوم سمعتج رفعتي صوتج على اطفالي لو امي اندمج عاليوم الي انولدتي بي
فهمتي؟
بلسم:- اني اسمع و دمي يغلي هذا شديحجي شنو خدامه؟
وكفت على حيلي و اتقربت اله وكتله
اني سمعتك وهسه دورك انت هم تسمعني
اني من اول مادخلت لهالبيت واعرف اني مجايه اكون عائلة واعيش حياة زوجية سعيده
ثانياً صحيح حجيك بعمري ماراح اصيرلك مره لا هسه ولا بعدين
ثالثاً تره اهلي مربيني احسن تربيه وابوية معلمني احترم الصغير قبل الجبير
ورابعاً واخيراً اخوية مو قاتل اخوك وكل الي صار قضاء وقدر و امر رب العالمين واخوية هم طلع مكسر من الحادث والله طلعه من حلك الموت يعني الحادث مو مقصود حتى تكول كتال اخوك.
ضرغام وهو صاك سنونه اول مره وحده توكف بوجهه و تحجي وتواجهه
لزمها من شعرها:- شوفي لج هاي اول واخر مرة اسمحلج تحجين وتوكفين بوجهي انه ماعندي مره تطلع لسانها وتعدد فهمتي لو افهمج بغير طريقه؟
وشمرها عالجرباية وطلع.
بلسم:-جرني من شعري وشمرني عالجرباية و مااحس بس دموعي تنزل اول مره بحياتي احد يمد ايده عليه .
شكرا لزيارتكم عالم روايات سكيرهوم
