 |
اسكريبت سيف ومريم الفصل الثاني بقلم حبيبة المصري
جاوبته بنوع من التشفي :
- أبدًا، في واحد قرب مني و قالي هاتي رقمك فصوتت و لميت عليه الناس وقولت حرامي و هو شاور على صاحبه و قال إنهم حرامية و اديهم اهم بيتعاد تربيتهم.
قبض على كفه جامد وقال بنبرة عارفة اللي بيحصل بعدها :
- اللي قال هاتي رقمك كان لابس ايه؟.
جاوبته بحماس :
- مش عارفة، بس هتلاقيه بيتضرب من عمو اللي لابس جلابية رصاصي.
سابني و قرب من الراجل و خد منه الشاب و كمل ضرب فيه وبعد شويه سابه وجالي وهو بينهج و وشه أحمر، وقال :
- يلا خلينا نروّح.
مشيت معاه وأنا بضحك على اللي بياخدوا علقة دول.
~~~~~~~~~~~~~~~
"منك لله يا أحمد"
قولتها وأنا قاعد على الأرض وماسك ضهري، فقال محمد وهو ماسك كتفه :
"أشوف فيك يوم يا أحمد"
وقال معاذ وهو ماسك رقبته :
"كشفت راسي و دعيت عليك يا أحمد"
فقال احمد بضيق وهو حاطت أيده على عينيه المزرقة :
- ما خلاص بقى منك لُه
ما أنا اضّربت معاكم.
- مش كنت عايزني اقطع هدومي واشحت؟
ادي هدومنا كلنا اتقطعت، قوموا نشحت بقى.
قولتها أنا بضحك ضحكوا هم كمان ..
~~~~~~~~~~~~~~~~~~
- أنزل هاتلي سوداني و ذرة فشار.
- قوليلي بعد اذنك يا معالي المحامي يوسف.
ابتسمت ببرود و قولت :
- بعد اذنك يا معالي المحامي يوسف أنزل هاتلي سوداني و ذرة فشار.
قال بإستفزاز :
- قولي .. يا سي يوسف.
قولت بغيظ :
- يا سي يوسف.
- مش من قلبك.
قالها وهو بيلاعب حواجبه بإستفزاز، فقولت بغيظ :
- ما تخلص بقى يا يوسف.
- خلاص ياختي قائم متزقيش.
- ناس تخاف متختشيش.
