رواية الضحية الفصل الثاني بقلم امل عبدالرازق
- محمود: يعني دا آخر كلام عندك، أبلغ والدِك ان خلاص كدا، مش فارق عندك إني أكبر من والدك
- فريده: بصراحة بعد كلامك انا اطمنت ليك، وموافقة على اللي انت قولته بس لازم تعرف ان أنا وثقت فيك ولازم تكون عند ثقتي
- محمود: اوعدك يا فريده ان انا هوفي بكل كلمة قولتها ليكِ، بس من فضلك انتِ كمان لازم توفي بكلامك
- فريده: انا مش عايزه حاجه من الدنيا غير الستر وبيت دافي واطمن على اخواتي البنات ويكملوا تعليمهم، وطالما انت وعدتني انك هتُقف لبابا وهتخلي منه و ساره مصيرهم احسن مني انا مستعدة ل اي حاجه وهوفي بكلامي واحافظ على بيتك
- محمود: وهتفضلي في الحضانة بتاعتك وان شاء الله هنكبرها، انا اه هتجوزك بس قدام الناس، لكن والله انا مش عايز اعيش مع واحده تانيه بعد مراتي الله يرحمها، بس البيت من غير ست بيكون مافيش فيه حياه وفعلا بيتنا وحياتنا واقفين وانا عايزك تونسي بنتي سمية؛ لأن حالتها النفسية سيئة جدا، انا هتعامل معاكِ كبنت ليا زيك زيها ان شاء الله هيكون عندك البيت الهادي اللي بتحلمي بيه وهيكون بإسمك عشان تطمني اكتر، وصدقيني يا فريده لو مش عايزه تكملي احنا لسه على البر وانا معاكِ في اي قرار تاخديه
- فريده: انا لسه مش عارفاك كويس بس لو هحكم عليك باللي سمعته منك فحضرتك احسن من ناس كتير اوي، ولو رفضتك والدي هيجبرني أوافق بالعافيه، ولو انت اللي قولت انك مش عايزني هو هيشوف ليا عريس تاني بردو بس ممكن يكون عنده ٦٠ سنه ولا حاجه، ما انا بالنسبه للناس منحوسه ومافيش راجل اتجوزته الا ومات
- محمود: انتِ ست البنات كلهم يا فريده، دا جهل وكلام فاضي، الناس مش وراهم غير الكلام وعاملين مش واخدين بالهم ان في رقيب عليهم والملايكة بيسجلوا كل اللي بيقولوه وربنا هيحاسبهم
- شاكر دخل عليهم من غير حتى ما يخبط الباب
- شاكر: كل دا بتشوف العروسة يا استاذ محمود، واضح ان القاعده احلوت اوي، وفريده دخلت دماغك، وواضح كمان ان فريده مبسوطه ومستمتعة بالقاعده معاك
- محمود: انا كنت بشرح لفريده كل ظروفي، وليها الحق تقبل او ترفض، انا معاها في اللي هي عايزاه وتؤمر بيه
- شاكر: لو على فريده مافيش عندي مشكلة مع رأيها اوعى تخاف من النقطة دِ، اهم حاجه رأيي ورأيك، لو هي عجباك يبقى تسمع طلباتي وتنفذها
- محمود: مع احترامي لكلامك بس انا بالنسبة ليا رأي فريده اهم من رأي اي حد، طبعا رأيك مهم بس دَ جواز وهي اللي هتعيش معايا فلازم تبقى مقتنعة وراضية ومبسوطه، واللي هي تقول عليه وتتمناه انا هعمله
- فريده: وانا موافقة على جوازي منك يا استاذ محمود، بعد اذنكم هدخل اوضتي
- شاكر: وقف مصدوم لأنه كان محضر نفسه انه هيجبر فريده على الجواز و اكيد فاهمين ازاي وكمان بقى بيهددها بطلاق امها وتشريد اخواتها، بس موافقة فريده سهلت عليه المهمة ومافيش لا عنف ولا تهديد
- محمود: اتفضل قول شروطك وانا معاك في اللي انت عايزه بس بردو بالمعقول
______
- ليلى حضنت فريده وقالتلها: ليه وافقتي يا بنتي، انا كنت ناويه اروح اعمل بلاغ في ابوكي على عمايله السودا دي واجبارك على الجواز من راجل اكبر من ابوكي نفسه
- فريده: اهدي يا ماما انا كويسه وراضية، صدقيني انا مقتنعه بالعريس دا اكتر من اللي كانوا أصغر منه، الراجل وشه منور وتحسيه تقي ومحترم ومش باين عليه انه كبير اوي علفكره
- ليلى: بتقولي كدا عشان تسكتيني يا فريده، دايما بتيجي على نفسك عشاني انا واخواتك، تعبتي اوي في حياتك يا بنتي، حقك عليا يا فريده، سامحي امك على ضعفها
- فريده باست ايد ليلى وقالتلها: يا ماما انتِ أغلى من روحي، مستحيل ازعل منك، وطالما انتِ بتدعيلي انا واثقه ان ربنا هيبقى جنبي، وبصراحة يا ماما اي مكان بعيد عن ابويا هيكون احسن ليا، و ان شاء الله خير
ابتسمت فريده ابتسامه كلها حسرة ووجع واتنهدت وقالت: مش متخيلة لو كنت رفضت زي ما كنت بعمل كان حصل فيا ايه، انا جسمي لسه عليه الآثار يا ماما، خليني ابعد بقى عن هنا لأن انا بصراحة اكتفيت
- ليلى: ربنا يعوضك خير ويريح قلبك ويحفظك من كل مكروه وسوء ويهدي شاكر، واعرفي يا فريده برغم زعلنا من ابوكي مهما حصل هيفضل
قاطتعها فريده وقالتلها: هيفضل ابويا يا ماما، انا عارفه الحقيقة وراضية بيها، نصيبي يكون ابويا قاسي ومش طايقني وعذابي في الدنيا بسببه، بس اللهم لا اعتراض، علفكره انا مش بكرهه بس انا مستاهلش منه كدا، ربنا يسامحه، المهم دلوقتي متشغليش بالك ب اي حاجه وطالما احنا واثقين في ربنا اكيد كل اللي بيحصل وهيحصل معانا هو الخير.
______
- محمود: اهلا اهلا بالحبايب واضح انكم اتصالحتوا الحمد لله
- كريم: ايوه طبعا يا بابا هو انا عندي اغلى من لبنى يعني، حضرتك كنت قولت انك عايز تتكلم معانا في موضوع مهم
- محمود: جايبه صاحبتك معاكِ ليه يا لبنى، مش عيب يا بنتي كدا، البيت في رجاله ازاي أهلها يوافقوا اصلا
- لبنى: يا بابا وطي صوتك لأنها ممكن تسمعك وهتزعل، هي في شقتي وهتقضي معايا اليوم وكمان خطيبة كريم جايه تخرج معانا بكرا، المهم ايه الموضوع اللي عايز تكلمنا فيه عشان اروح لنورهان ميصحش اسيبها لوحدها
- محمود: انا مش بعرف اقول مقدمات، بس اللي عايزكم تعرفوه اني مش عندي اغلى منكم، وانتو أجمل هدية من امكم الله يرحمها، وانا محبتش ولا هحب زيها
- لبنى: كل دا ومش بتعرف تقول مقدمات يا بابا، ممكن بعد اذنك تدخل في الموضوع علطول
- محمود اتجاهل طريقة لبنى وكمل كلامه وقال: اي راجل في الدنيا بيحتاج لست تخلي بالها منه، وانا بقالي سنتين بعاني ومش عارف اركز في شغلي
- كريم: والله انا قلبي كان حاسس، شكل فرحي هيكون فرحين مش فرح واحد
- محمود: متعودتش منك يا كريم انك تقاطعني وتسخر من كلامي بس بردو مش وقته، المهم يا لبنى انتِ وكريم انا قررت اتجوز وبالفعل النهارده قرأت فاتحة العروسة
- لبنى: نعم نعم يا بابا، انت بتهزر صح؟ اكيد انت بتهزر، ما هو مستحيل تعمل كدا، يعني ايه تتجوز، مش فاهمه يا بابا، اكيد دا مقلب وكمان مقلب مش حلو ودمه تقيل
- محمود: لا يا لبنى مش بهزر ومش مقلب وانا هتجوز وهتيجي معايا بكرا انتِ واخوكِ عشان اكتب الكتاب وهجيب مراتي بعدها ب اسبوع وهتقعد في الشقة اللي جنب شقتك وهنسيب الشقة دِ نتجمع فيها كلنا عشان مش هقدر اغير عفش امكم
- لبنى: لأ كتر الف خيرك ونعم الإخلاص يا بابا، جواز ايه وانت رجلك والقبر خلاص، سيب الكلام دا لكريم يا بابا وعيش سنك الحقيقي، ولا عايز تتجوز وتصبغ شعرك الابيض وتجيب لينا اخ ياخد كل املاكك هو و أمه، ما انت طلع بينضحك عليك بسرعة
- محمود زعق للبنى وقالها بصوت عالي : انتِ بنت قليلة الادب وفعلا مافيش نقاش معاكِ عموما انا قولت اللي عندي بكرا الساعة ٨ بالليل تكونوا جاهزين، مش باخد رأيك يا لبنى انا بعرفك باللي هيحصل، انا ابوكِ بس شكلك نسيتي ولازم افكرك، يلا روحي شقتك اقعدي مع صاحبتك عشان بكرا تخرجي ما هو دا اللي انتِ فالحه فيه
- لبنى: جوازك من عروسة الغفلة مش هيتم افتكر كلامي كويس يا بابا، الناس بتكبر وتعقل إنما انت
- كريم: لبنى من فضلك روحي شقتك؛ لأن انتِ متعصبه دلوقتي وبتغلطي، متنسيش انك بتتكلمي مع بابا مش عيل صغير
- لبنى: انا همشي دلوقتي بس مش هسكت، مش هدخل واحده ملهاش لازمه مكان امي، مش هيحصل مستحيل يحصل، خليكم عارفين دا كويس
خرجت لبنى وراحت شقتها وهي منهاره وبتعيط وكل اللي على لسانها مش هسمح ان ابويا يتجوز بعد امي، مستحيل لو الدنيا كلها وافقت انا مش موافقه
- كريم: انت مقتنع باللي حضرتك قولته دا يا بابا
- محمود: مقتنع وروحت للناس وقعدت معاهم وقرينا الفاتحة، انا لو كنت عارف اعيش من بعد امك مكنتش اتجوزت، انا مضطر ومش بعمل حاجه غلط، انت عاجبك حالنا وبيتنا اللي مش مفهوم ليه نظام دا، و اختك اللي كل يوم بحال، انا عايز حياتي تتنظم وافوق للبنى شوية
- كريم: طالما حضرتك شايف كدا فألف مبروك يا بابا، انا واثق في حضرتك ومعاك في اي حاجه، ان شاء الله بكرا هخلي الصنايعية اللي شغالين في شقتي يخلصوا بدري وهكون مع حضرتك الساعة ٨
- محمود: طيب يا كريم ابقى بص على الشقة اللي قولت عليها بما انك مهندس ديكور وجددها وظبطها واي حاجه انت محتاجها بلغني، ومتنساش تروح بكرا معرض العربيات تقعد ساعتين عشان انا هكون في المدرسة، لازم نتابع شغلنا وخلي ياسين ابن عمك يكمل باقي اليوم
- كريم: حاضر يا بابا اللي تؤمر بيه، حضرتك عايز اي حاجه تانيه
- محمود: ابقى حاول تهدي اختك شوية وتعقلها، يلا اطلع ارتاح، تصبح على خير
_______
- نورهان: بقالك نص ساعه بتعيطي وانا مش فاهمه منك حاجه، ممكن تهدي وتقوليلي مالك يا لبنى، ايه اللي مضايقك يا حبيبتي
- لبنى ردت عليها وقلتلها من وسط دموعها: ابويا قرر يتجوز يا نورهان، هيدخل بيتنا واحده غريبه، وهيجيبها تعيش معانا هنا! في واحده تانيه هتدخل البيت بعد امي، ابويا اتجنن انا لازم الاقي حل للمصيبة دي قبل ما تحصل
- نورهان: طب ممكن تهدي وتفكري بعقلك شويه، ايه أسوأ الاحتمالات يعني، ممكن يتجوز ويخلف ويبقى عندك اخ او اخت صغيره، مش هيحصل طول ما انتِ مش عايزه دا، شغلي عقلك وبلاش تعصي ابوكي وخليكِ ناصحة وكوني قدام ابوكي مطيعة عشان متخسريهوش، قولي نعم وحاضر بدل ما مراته تخطفه منك، كوني ذكية زي كريم، ومن وراه اشتغلي صح وخططي كويس انك تطفشيها، علفكره ممكن تخليها تكره البيت وتطلب الطلاق بكل سهولة، ممكن كمان تخلي ابوكي نفسه يرميها في الشارع اللي جابها منه، بس بالعقل، اللي انتِ بتعمليه دا هيخسرك كل حاجه
- لبنى: مش فاهمه حاجه يا نورهان، ممكن اعمل دا ازاي يعني، انا مش عايزه ابويا يتجوز بعد امي، مش عايزاه يتجوز يا نورهان ويدخل واحده غريبه بيتنا، دا انا مش طايقه خطيبة اخويا، تخيلي يبقى عندي مرات اب، ليه تدخل البيت اصلا من الاول، مافيش طريقة امنع بيها الجوازه دي
- نورهان: طالما ابوكي قرر يتجوز يبقى مش راجع في كلامه، وخلينا نسبقهم بخطوة ونشوف هنطفش العروسه دي ازاي، حاولي بس تقنعي ابوكي ياخدني معاكم وسيبي الباقي عليا
- لبنى: ياخدك معانا فين، انا مستحيل اسمع كلامه واروح معاه وهو بيكتب كتابه عليها
- نورهان: كدا انتِ اثبتيلي انك غبية، عشان نفكر صح لازم نشوف هي شكلها ايه صغيره ولا كبيره، بيتها عامل ازاي، نعرف عنها أي حاجه، ثقي فيا وانا هطفشها ومش هتكمل في بيتكم شهر
_______
تاني يوم في النادي
- روان: عاملين ايه يا بنات، وحشتيني اوي يا لبنى وبجد مبسوطه جدا انك طلبتي تشوفيني عشان نقضي يوم مع بعض
- لبنى: اهلا اهلا بعروستنا، تعالي يا روان اقعدي جنبي هنا
- نورهان: طلعتي احلى في الحقيقة من الصور كمان، كيمو عرف يختار، الواد دا سوسه طول عمره بيحب البنات الحلوه، عرفتي تلميه ازاي دا كان مقطع السمكة وديلها
- روان: متعرفتش بحضرتك انتِ قريبة كريم عمتو مثلا ولا ايه، اصلك بتتكلمي عنه كأنك تعرفيه من سنين، وبعدين كريم من يوم ما عرفته وهو محترم ما شاء الله عليه
- نورهان كان قصدها تستفز روان بس روان اللي استفزتها فردت عليها لبنى وقالتلها: دِ نورهان صاحبتي وأقرب ليا من نفسي، يعني اعتبريها اخت كريم التانيه، وبما ان انا مش فاضية وورايا مشواير كتير ولبسك منظره بيئه والناس هنا في النادي عارفاني وعارفين ان بلبس من أعلى البرندات، فوجودك معانا يعرنا بصراحة
- روان : ثانية واحده بس انتِ ازاي اصلا تكلميني كدا، انتِ اخت خطيبي عشان كدا انا هحترمك لأني بحترمه بس غلطك فيا مش مسموح بأي شكل كان، لو جيباني عشان تقلي مني وتهيني كرامتي انتِ وصاحبتك دا مش هيحصل، ولو على لبسي عاجبني و أهم حاجه انه عاجبني واللي بيحلي اللبس انا مش هو اللي بيحليني يعني مش براند اللي هتقيس قيمتي، بعد اذنكم
- لبنى مسكت روان من ايديها وقعدتها على الكرسي وقالتلها: من الآخر كدا تاخدي كام وتبعدي عن اخويا، اصل الكلام اللي بتقوليه دا مش بيأكل عيش، اخويا لازم ياخد واحده من مستواه وتليق بالمهندس كريم محمود
- روان: وماله مستوايا، الأول انتو بتحددوا المستوى على اساس ايه عشان الصوره تكون واضحة ليا بردو، لو على الدراسة فأنا الحمد لله في آخر سنه ليا في كلية الألسن، حافظة القرآن الكريم، اهلي محترمين ووالدي مش مخليني محتاجه اي حاجه، معرفش المستوى بالنسبة ليكِ بس اخوكي يوم ما طلب ايدي قالي انا اختارتك عشان انتِ بنت محترمه وبنت ناس وأهلك طيبين ومحترمين، ولو على مستوايا انا راضية، وانا شاريه كريم وهو شاريني استأذن انا بقى عشان كريم كان طالب رأيي في حاجات هيعملها في شقتنا وانا لسه موافقتش عليها
- نورهان: شارياه بردو ولا شاريه فلوسه وفلوس ابوه ، احنا عارفين اشكالك كويس اوي
- روان: الحمد لله رب العالمين انا عارفه نفسي كويس وابويا احسن تربيتي عشان كدا مش هرد عليكِ، وواضح اوي من فينا اللي شاريه الفلوس، بس اوعي متجيش الفرح هزعل منك اوي، سلام يا طنط نورهان، عاوزه مني اي حاجه يا طنط لبنى
- لبنى: امشي من قدامي واعرفي انك لو دخلتي بيتي هتلاقي مصير اسود منتظرك على أحر من الجمر.
_____
- منه: ما شاء الله شكلك زي القمر يا فريده، انتِ خساره في الراجل دا، انتِ تستاهلي كل الخير اللي في الدنيا، ربنا يسامحه ابوكي
- فريده: عادي يا منه جوازه زي اي جوازه، بس المهم ميحصلش معاكِ اللي بيحصل معايا، كملي تعليمك ولما تقرري تتجوزي اختاري راجل، وانا في ضهرك
- ساره: هتوحشيني اوي يا فريده، انا بحبك اوي ومش عارفه هنعيش هنا من غيرك ازاي
- فريده حضنتها وبدأت دموعها تنزل وقالتلها: انا مش هسيبكم يا ساره، انتو احلى حاجه حصلتلي، اهم حاجه شدي حيلك وذاكري كويس خلاص هانت وفاضل شهر على امتحاناتك، ركزي عشان تدخلي الكلية اللي بتحلمي بيها، في الزمن دا سلاح البنت في دينها وأخلاقها وتعليمها
- ساره: طب ما انتِ متعلمة يا فريده، ليه بيحصل معاكِ كدا
- فريده: في الأول وفي الاخر اللي حصل دا نصيب، واول واحد اتقدم ليا مكنش وحش بس كان عنده القلب وابوكِ عارف بس كان مداري عليا، والله كان حنين وخلاني اكمل دراسة بس بسبب شرب السجاير تعب وتوفاه الله، والتاني كان صعب ودايما كان بيمد ايده عليا وبسببه انا شيلت الرحم، اتعذبت على ايده وكرهني في الحياه كان نسخة من ابوكي وكل شويه يقولي انا اشتريتك بفلوسي ، لا كان بيصلي ولا يعرف أي حاجه في الدين، خرج يسهر مع اصحابه تاني يوم في حد رن عليا وبلغوني انه عمل حادثه ومات، اسبوع واحد يمر على وفاته و اخواته يطردوني من البيت، دايما اللي بيبص للفلوس خسران، ابوكي مش شايفني غير بضاعة
- ساره: انا خايفه يحصل فيا كدا يا فريده، خايفه بابا يعمل معايا كدا ويعذبني
- فريده: ربنا يسترها عليكم، ربنا قادر يهديه ان الله على كل شيء قدير، وانا في ضهركم، وبسمع كلامه عشان امنع شره عنكم، ان شاء الله خير بس متزعلش ماما ولا تجيبوا عليها اللوم
- منه: ازاي بس يا فريده هو مش ابونا دا اختيارها هي واحنا اللي بندفع ضريبة اختيارها ليه، هي الأساس واختيارها كان غلط من الاول، كان لازم تختار راجل حنين وبيتقي ربنا عشان يكون زوج صالح وأب طيب
- فريده: وهي امك كانت هتعرف انه كدا ازاي، وبعدين جدك بردو جوزها ليه من غير حتى ما ياخد رأيها لأنه قريبه، والبنات زمان كانوا ميعرفوش حاجه، ماما زيها زينا وكتر خيرها أصرت اننا نتعلم، اتعلموا انتو من أخطائي انا و ماما.
______
- لبنى : انا جاهزة يا بابا وجايه معاك عشان احضر كتب كتابك على مرات ابويا
- كريم: سبحان مغير الاحوال، انا عارف ان لبنى قلبها طيب، والحمد لله ربنا هداكي من غير ما نتكلم كتير ونتحايل
- لبنى: اسكت دلوقتي يا كريم، المهم يا بابا انا جايه معاك بس صاحبتي هتيجي معايا عشان معرفش اتحرك من غيرها وهي اللي خلتني أوافق اصلا اني اجي معاكم
- محمود: صاحبتك هتيجي معانا تعمل ايه مش فاهم، دِ حاجه عائلية ومافيش الكلام دا يا لبنى
- لبنى بنفاذ صبر: بابا انا وافقت على اللي انت عايزه ف من فضلك بقى وافق انت كمان على اللي انا عايزاه، ومش هروح من صاحبتي وياريت متضغطش عليا اكتر من كدا
- محمود: لا حول ولا قوة الا بالله، ربنا يصبرني، حاضر يا لبنى هاتي صاحبتك معانا بس انا هركب عربيتي لوحدي كدا، وخلي اخوكي هو اللي يجيبكم بعربيته عشان انا مش برتاح لنورهان دِ
- لبنى: احسن بردو، اقصد يعني احسن عشان تبقى أعصابك مرتاحه وبالك رايق ما انت عريس بردو
______
- شاكر: افردي وشك يا ليلى وخلي اليوم يعدي، بنتك ربنا هداها وموافقة بكامل إرادتها ولا لمستها حتى، بلاش بقى توجعي دماغي وتخلي اللي كان هيحصل في بنتك يحصل فيكِ و الخرطوم جوا انتِ عارفه مكانه
- ليلى: اللي مزعلني بجد ان هيكون حسابك عسير، هتروح من ربنا فين بس، ربنا يتولاك وبناتي ليهم ربنا حنين عليهم و ان شاء الله هيسترها معاهم
- شاكر: انا مبسوط النهارده وكلامك مش هيستفزني، يلا امشي من قدامي جهزي كل حاجه عشان الناس على وصول والمأذون خلاص وصل
- ليلى: ايوه طبعا انت هتقولي، مش بتكون مبسوط كدا غير لما تيجي تقبض الفلوس اللي بتشرطها عشان تجوز بناتك
- شاكر: ايوه هقبض ومش هتشوفي منهم جنيه، ويكون لعلمك انا بعلم بناتك عشان بس يجيلهم ناس معاهم فلوس وعليهم القيمة مش عشان جمال عيونهم
- ليلى: ربنا شاهد عليك ومش هقول غير حسبي الله ونعم الوكيل.
_______
- محمود: اعرفك يا فريده على كريم ابني ولبنى بنتي، دول اللي طلعت بيهم من الدنيا و احلى حاجه في حياتي
- كريم: اهلا وسهلا بحضرتك، ان شاء الله البيت هينور بيكي
- لبنى: ايوه بردو يا بابا فين العروسه، حضرتك بتعرفنا على بنتها احنا عايزين نتعرف على العروسة بقى، ما هو مش معقول تتجوز واحده من عمر ولادك و الا تكون مضطره ومش لاقيه تاكل وعايزه تطلع من الجوازه دي بمصلحة
- محمود: احترمي نفسك يا لبنى وبلاش تخليني اتصرف معاكِ تصرف تاني خالص واثق اني هندم عليه بعد كدا
- لبنى: ايه عايز تضربني عشان المحروسة، رايح تتجوز عيلة صغيره، بزمتك مش مكسوف من نفسك
- فريده: عيب كدا يا استاذه لبنى مهما كان دا والدك وغلط تكلميه بالطريقة دي وكمان قدام الناس، و ايوه يا ستي انا العروسة وقولي اللي انتِ عايزه تقوليه عليا بس متغلطيش في والدك
- محمود: معلش انا معرفتش اربي بنتي كويس، حقك عليا انا يا فريده، تعالى يا كريم ادخل معايا جوا عند المأذون، اتفضلي يا فريده واسف على اللي حصل
- دخل محمود وكريم وفريده وفضلت لبنى واقفه برا مع نورهان وقالتلها: شوفتي يا نورهان بابا زعق فيا ازاي عشانها، النهارده ابويا هو كمان مات، انا ماليش حد بعد ماما الله يرحمها، رايح يتجوز واحده شكلها أصغر من بنته، عايزني أرحب بيها كمان، دا نصرها عليا ومعملش ليا اي اعتبار قدامها
- نورهان: من غير ما تزعلي مني انتِ غلطانه يا لبنى، هو دا اللي اتفقنا عليه يعني، تغلطي في ابوكي قدام الناس، انا عارفه انك اتصدمتي لما شوفيتها والبت حلوه اوي بصراحة، بس بردو لازم تستحملي شويه، المهم تدخلي دلوقتي تعتذري ليها وتباركي ليها هي و ابوكي وتحضنيها كمان
- لبنى: انتِ مجنونه يا نورهان، انا مش هستنى هنا لحظة واحده كمان، انا من لحظة ما دخلت البيت دا وانا مخنوقه ومش قادره اتنفس، قال اعتذرلها قال
- نورهان: اعقلي يا لبنى واسمعي الكلام لو لسه عايزه تبعديها عن ابوكِ، لكن لو استسلمتي براحتك بقى دا اختيارك، بس انا كنت مفكراكي أذكى من كدا بصراحة، يلا مش مشكلة هتبقى بردو منكم وفيكم وليها حق في فلوس ابوكي
- لبنى: مستحيل طبعا، مش مشكلة اتعلم التمثيل بس اطفشها واكرهها في نفسها، يا انا يا هي، محدش هياخد مكان امي، ولا هي هتاخد مني ابويا، انتي عندك حق لازم أصلح اللي عملته واكون ناصحه زي كريم، بس يا خوفي تكون اللي اسمها روان قالتله على اللي حصل بينا
- نورهان: ايوه كدا دي لبنى صاحبتي اللي اعرفها اللي مش بتسيب حقها ابدا، وبخصوص روان لما نخلص من دي الأول هنفكر في طريقة نطفشها بيها وكريم شكله لسه معرفش حاجه
- لبنى حضنت نورهان وقالتلها: انا مش عارفه من غيرك كنت هعيش ازاي بجد ربنا ما يحرمني منك ابدا يا نوري
- نورهان قالتلها بخبث: حبيبتي يا نونو هو انا عندي اغلى منك يعني، دا انتي اللي طلعت بيها من الدنيا
شكرا لزيارتكم عالم روايات سكيرهوم
