رواية الضحية الفصل الثالث بقلم امل عبدالرازق
- لبنى: انا جايه اعتذر لمرات بابا و اباركلها قدام كل الحاضرين؛ لان انا غلطانه في حقها وأسأت ليها، اسفه على طريقتي واندفاعي مش قصدي صدقيني، و اسفه لبابا عشان ضايقته في يوم زي ده
- فريده: انتِ زي اختي يا لبنى وانا مش زعلانه منك طالما عرفتي غلطك واعتذرتي
- لبنى حاولت تتماسك ومثلت الابتسامه و ردت عليها وقالتلها: هو دا العشم فيكِ بردو، و اكيد يشرفني اني اكون اخت ليكِ، هتسامح بنتك ولا هتفضل زعلان منها يا بابا
- محمود: مسامحك يا لبنى، اتمنى من قلبي ميحصلش كدا تاني، خلاص كتبنا الكتاب وفريده بقت فرد من عيلتنا، لازم يكون في احترام متبادل ما بينكم
- لبنى حضنت محمود وقالتله: حاضر يا بابا و الف مبروك يا حبيبي
- شاكر: طب يا جماعه يلا الاكل جاهز وهيبرد ، كويس ان النفوس اتراضت وكله بقى تمام
- كريم وقف جنب لبنى وقالها بصوت واطي: انا حاسس ان في حاجه غلط و اكيد يا هعرفها، اللي حصل من شوية دا هيكون وراه كارثه انا قلبي حاسس، أو مثلا انتِ فقدتي الذاكره، ما هي دي مش لبنى اختي مستحيل، قوليلي يا بت بتخططي ل ايه انتِ و نورهان السوسه
- لبنى داست على رجله وقالتله: هكون بخطط ل ايه يعني يا بارد انت، وبعدين اسكت بقى وافرح لبابا، احنا مش هنشوفه عريس كل يوم
- كريم: ااااااااااه وجعتيني يا غبيه، ناويه تفتحيلي بالكعب اللي انتِ لابساه دا، بت يا لبنى انتِ سخنه ولا ايه
- ليلى: تعالى يا ابني اتفضل اقعد انت واختك مالكم واقفين بعيد كدا ليه
- نورهان: يلا يا لبنى الاكل طعمه يجنن، حقيقي تسلم ايدك يا طنط
_______
- روان: خلاص يا ماما انا قررت ان انا مش هكمل في الخطوبه دي وهسيب كريم
- سمحية والدة روان ردت عليها وقالتلها: محدش فينا جبرك تتخطبي لكريم وبردو محدش هيجبرك تكملي معاه، بس بردو يا روان لازم تعرفي ان كريم شاريكي وبيحاول دايما يفرحك، فكري كويس قبل ما تاخدي اي قرار
- روان كانت بتعيط لأنها مش عايزه تتجوز من حد غير كريم وعارفه انه شاب كويس لكن ردت على مامتها وقالتلها: يا ماما ازاي هكمل بعد اللي حصل من اخته وصاحبتها، ما انا حكيت لحضرتك كل حاجه، اخته دايما بتقلل مني مش بتسيب فرصة الا لما تستغلها في اهانة كرامتي، انا خايفه من الحياه معاهم بعد كدا، لو هعيش مع كريم في بيت واحد ماشي، لكن معاها في نفس العماره والله الفكره نفسها رعباني
- سمحية: ردك عليها كان كويس وهي دلوقتي اكيد خايفه انك تقولي ل اخوها، صدقيني يا بنتي اللي بيعمل كدا وبيهين الناس، وبيإذيهم بلسانه بيكون انسان ضعيف وعنده نقص، تصرفاتها كلها بتدل على كدا، وحقيقي بتصعب عليا جدا، ربنا يهديها، لما كريم يجي يزورنا هنتكلم معاه ونسمع منه قبل ما تاخدي اي قرار، اتفقنا؟
- روان: كريم شاب محترم وبيحب يشتغل ويعتمد على نفسه مش معتمد على فلوس والده، وحنين اوي وطيب، مش عايزه اسخره بسبب اخته، وخايفه اكمل معاه اخته تكون سبب في خراب بيتي
- سميحة: ادعي ربنا يختارلك الخير وقولي لا حول ولا قوة الا بالله واستغفري كتير، استخيري ربنا و ان شاء الله هيكتبلك الخير يا بنتي
_______
- رامز: الحاله ناشفه اوي اليومين دول وبجد انا مش عارف اعيش خالص وحياتي بقت مش زي الاول، فين العز اللي كنا عايشين فيه يا نورهان
- نورهان: مالك بس يا رموزتي، ما احنا حلوين اهو وبنخرج وننبسط، انا عارفه انه مش زي الاول بس اعمل ايه لبنى الغبيه كل شوية تزعل ابوها منها فبيعاقبها ويقلل المصروف وتقريبا باعت معظم الدهب اللي مامتها كانت سيباه، الفلوس اللي كنت باخدها منها قلت خالص
- رامز: ما تشوفي لينا اي مصلحة نخرج بيها من ورا البت لبنى دِ، دول معاهم فلوس كتير اوي، ما تشغلي دماغك الحلوه دي بقى يا نونو
- نورهان: لو تعرف انا بكره لبنى دي ازاي يا رامز، اطيق العمى وهي لأ، بس معلش مضطره استحملها وأظهر ليها اني بحبها عشان افضل قريبه منها وعايشه معاها في خير ابوها، انت عندك حق لازم نشوف مصلحة حلوه نطلع بيها من وراها، بس بصراحة انا مش عارفه مصلحة زي ايه يعني
- رامز: انا عندي فكره وعايزك تسمعيني للأخر وبلاش تندفعي، اتفقنا؟
- نورهان: قول انا سمعاك، بس ياريت متقولش حاجه تعصبني عشان انا اصلا متضايقه لوحدي وخرجت معاك عشان اغير جو
- رامز: ايه رأيك اخطب البت لبنى يا نورهان، بما انها عندها نقص وكدا، ممكن نستغل النقطة دي لصالحنا احنا وامثل عليها اني بحبها زي ما هي بعيوبها قبل مميزاتها ومش عايز من الدنيا غيرها، وبما ان ابوها كاتب الشقة ب اسمها فسهل اننا نضحك عليها ونخليها تكتبها ليا ونبيعها واخليها تبيع الدهب والعربية اللي معاها واتجوز انا وانتِ بالفلوس دِ
- نورهان: انت عبيط يا رامز؟ انت عارف انت بتقول ايه، واعي يعني للكلام اللي بتقوله دا؟ انت اكيد اتجننت، مستحيل طبعا
- رامز: يا بت اهدي وافهميني، هي متعرفش حاجه عن علاقتنا ببعض، كل معرفتها بيا اني قريب امك زي ما قولتي ليها قبل كدا، شغلي دماغك وخلينا نستفاد، وبعدين انت اللي في القلب يا جميل، اكيد انتِ عارفه كدا كويس
- نورهان: طب سيبني افكر في الموضوع دا كويس، هرد عليك بعد فرح ابوها
- رامز: ايه دا هو ابوها هيتجوز، ازاي متعرفنيش يا نورهان، مش انا قايلك تحكيلي كل حاجه بتحصل في بيتهم
- نورهان: و انت هتعمل ايه بجواز ابوها يعني، اه يا اخويا اتجوز وكتب كتابه بقاله اكتر من يومين ولبنى متضايقه جدا بسبب الموضوع دا، وبكرا العروسة هتنور البيت، متخيلة لبنى وهي جيباها من شعرها دلوقتي
- رامز: لا دا انا اطلبلك عصير تاني وتحكيلي كل اللي حصل من الاول خالص، عشان انا حضرت في دماغي فكره احسن من الخطوبة ب الف مره، احكيلي يلا يا وش الخير
______
- كريم: مالك يا روان يومين مش بتردي عليا ليه، قلقتيني عليكِ
- روان: بصراحة يا كريم انا مش عايزه اتواصل معاك الفترة دي خالص؛ لان انا اعصابي بايظه ومش عارفه اخد قرار
- كريم: ياه للدرجة دِ، طب انا عملت حاجه زعلتك مني، صدر مني اي تصرف مش مناسب، لو كدا عرفيني عشان بجد انا مش فاهم حاجه
- روان: لأ يا كريم مافيش كدا، بس انا خايفه اوي، خايفه من الحياه معاك و خايفه معرفش اتعامل مع اختك، نفسي يبقى لينا بيت لوحدنا بعيد عن أي مشاكل
- كريم: قوليلي يا روان ايه اللي حصل لما خرجتي مع لبنى ونورهان، حد فيهم ضايقك، ما هو انتِ مكلمتنيش من اليوم دا، وكنتي كويسه قبل ما تخرجي معاهم
- روان اتوترت وخافت تكون هي السبب في المشاكل اللي هتحصل بينه وبين اخته فردت عليه وقالتله: لأ خالص كانت لطيفه جدا معايا وانا مبسوطه اني شوفتها واتكلمت معاها
- كريم: طب الحمد لله طمنتيني، اصلا البيت الفترة دِ كله متوتر ومحدش فينا مستحمل حاجه، بخصوص حياتك معايا بعد كدا، اوعدك انك هتكوني ملكة بيتك، وبيتك هيكون مملكتك لوحدك، احنا فعلا هنكون لوحدنا ويوم الجمعة هنتجمع مع بابا ولبنى ولو حبيتي تنزلي كل يوم شويه تقعدي مع لبنى هفرح اوي وربنا يحببكم في بعض
- روان: انا اقصد يا كريم يكون لينا بيت لوحدنا مستقل بعيد عن بيت والدك
- كريم: صعب وبالتحديد دلوقتي يا روان، بابا مش هيوافق وهيفكر ان قراري دا بسبب جوازه، ممكن لما نستقر وظروفي تسمح اشتري بيت هعمل كدا اكيد، بس دلوقتي صعب لان بابا مش هيوافق و انا مش عايز ازعله مني، غير كدا خلاص مش باقي على فرحنا حاجه
- روان: خلاص يا كريم اللي تشوفه، ربنا يكتبلنا الخير، و انا اسفه على عدم ردي، بس حقيقي انا خايفه اوي وبفكر في كل حاجه خاصة بمستقبلي
- كريم: متتأسفيش انا اكيد مراعي دا، توترك طبيعي اكيد لأنك مقبلة على حياة جديدة، و ان شاء الله هتكون مليانه حب وسعاده، اطمني يا روان طول ما انا عايش هسعى اني اوفرلك حياة تليق بيكِ
_______
- لبنى: هيجيبها البيت النهارده يا نورهان، مش هقدر استحمل كل دا، حرام عليه ازاي يتجوز واحده أصغر من بنته، ازاي يفكر اصلا يتجوز بعد امي اللي افنت عمرها كله في خدمته
- نورهان: انا مش هسيبك يا لبنى، انا مش عندي اغلى منك يا حبيبتي، هفضل معاكِ لحد ما تزهقي مني وتقوليلي يلا ارجعي بيتكم، اوعدك هنطفشها من هنا، طول ما انا جنبك متخافيش
- لبنى: الحياة كانت من غيرك صعبه اوي يا نورهان، انا بثق فيكِ اكتر من نفسي، شكرا لأنك موجوده، انا لو أطول اقدملك عيوني مش هتأخر
- نورهان بصت ليها بحزن اكيد معروف انها بتمثل، كلنا عارفين ما عدا لبنى، الطيور على أشكالها تقع🐍، المهم لبنى سألتها وقالتلها: مالك يا نورهان ايه اللي مضايقك يا حبيبتي
- نورهان: كفايه اللي انتِ فيه يا لبنى هاجي انا كمان اشيلك همي، انا كويسه تطمني
- لبنى: هَم ايه اللي تشيليه ليا بس، انتِ عبيطة يا بنتي! احنا واحد يا نورهان، وانا بشاركك كل حاجه
- نورهان: زعلانه على اخواتي والحالة اللي وصلنا ليها بسبب قسوة بابا علينا وكمان انتِ عارفه انه متجوز ومش بيسأل فيا انا واخواتي وامي ، تخيلي بقالهم اسبوع كامل محرومين من الاكل زي باقي البشر، عايشين على العيش والجبنه بس، طبعا انا كنت بجيب ليهم كل حاجه بالمصروف اللي باخده منك، بس انا مراعية الظروف وكفايه اللي انتِ فيه
- لبنى قالتلها بحزن حقيقي واضح على صوتها وملامح وشها: ازاي تعملي كدا بس يا نورهان، ازاي متعرفنيش حاجه زي دي، احنا مافيش اي فرق بينا، انا اه اعرفك من سنه وعمري ما شوفت اخواتك مشفتش غير مامتك، بس صدقيني هما زي اخواتي من غير ما اعرفهم، هجيب ليكِ ألفين جنيه دلوقتي تمشي بيهم الدنيا وكمان اسبوع هوفرلك زيهم، اطمني طول ما انا في ضهرك
- عارفين دموع التماسيح؟ دِ دموع نورهان، حضنت نورهان لبنى والدموع اتجمعت في عيونها وقالتلها: انا مش عارفه من غيرك كنت عملت ايه انا و اخواتي، ربنا ما يحرمني منك ابدا يا لبنى
- لبنى: اللهم آمين وما يحرمني منك يا نونو، بس دلوقتي خلينا نفكر هنعمل ايه مع اللي اسمها فريده دِ عشان نبعدها عن بابا
- نورهان: دا انا محضره ليها شوية خطط إنما ايه، هيعجبوكِ اوي يا لولتي، هنطفشها وهتقول حقي برقبتي
______
تعالوا نروح بقى لبطلتنا فريده في بيت والدها
فريده كانت لابسه فستان بسيط مش فستان فرح، كانت فستان عادي لونه ابيض، ولفت حجابها بشكل بسيط وجميل، وما استخدمتش اي ميكب نهائي، كانت جميله جدا زي الفراشة، ورفضت فكرة الفرح ومحمود كان فرحان انها رفضت لأنه مش حابب ان دا يحصل
- ليلى حضنت فريده وقالتلها: النهارده هتبعدي عن حضني تاني يا فريده، ربنا يملى حياتك الجديدة بالسعادة والحب والرضا، ربنا يجعل محمود العوض لقلبك، انا واثقة ان ربنا هيعوضك وهيراضي قلبك؛ لأن انتِ طيبة وتستاهلي كل الخير
- فريده: انا بحبك اوي يا ماما، افضلي ادعيلي و ان شاء الله خير
- منه: فريده متبقيش طيبة زيادة عن اللزوم زي كل مره، خليكِ ناصحة وقوية مع اللي يحاول يستقوى عليكِ، بنت جوزك دِ مش ساهله وشكلها مش ناويه على خير هي واللعبة اللي كانت معاها، مش عارفه اللي اسمها نورهان عامله في نفسها كدا، وشها كله ألوان احمر على أخضر وحاجات مش مفهومه كدا، ليه الإنسان يخفي جماله اللي ربنا خلقه بيه ويحط الحاجات دِ
- ليلى: يا بنتي دعي الخلق للخالق وربنا يهديها، قولي الحمد لله الذي عافانا مما ابتلى به غيرنا، ومنه معاها حق يا فريده، متسمحيش لحد يكسرك، واضح ان محمود طيب وشاري، ابوكِ خد منه ٢٠٠ الف جنيه والراجل وافق وكمان جابلك دهب بالرغم ان ابوكي قاله هات ٢٠٠ الف والدهب وصل، لكن هو حب يفرحك
- منه: هتوحشيني اوي يا فريده، الحياة من غيرك مش هتكون حلوه، كنتي مهونه علينا كل المرار اللي بنشوفه هنا
- فريده حضنتها وقالتلها وهي بتبكي: انتو كمان هتوحشوني يا منه، مش هسيبكم وان شاء الله هتكملي تعليمك وساره هنكمل تعمليها اوعدك ب دا يا نور عيني
- ساره: انا بحبك اوي يا فريده، انا عندي احن اخت في الدنيا، كان نفسي يكون نصيبك احسن من كدا وتتجوز من واحد يستاهلك ويستاهل قلبك، بس زي ما ماما قالت واضح ان زوجك انسان محترم و ان شاء الله هيتقي ربنا فيكِ
شاكر دخل عليهم فجأه وشافهم وهما بيعيطوا فقال ليهم: خلاص بقى انا حفظت المشهد دا من كتر ما بيتكرر، يلا يا فريده عريسك واقف برا مستنيكِ ومعاه ابنه
- فريده كان نفسها ابوها ياخدها في حضنه ويودعها لو لمره واحدة ردت عليه بصوت حزين ومكسور: انا جاهزه يا بابا
خرجت فريده من اوضيتها ومعاها مامتها و اخواتها كانوا بيودعوها بدمعوهم، ليلى وبناتها الحزن كان مالي قلوبهم بس كانوا مش عارفين يعملوا حاجه، ليلى حضنت بنتها لآخر مره قبل ما تمشي وتسيبها، كانت بتستودع فريده عند ربنا الذي لا تضيع عنده الودائع، ركبت فريده مع محمود وكريم اللي كان سايق بيهم، وطول الطريق كانت شارده وخايفه ومتوتره وكل اللي في بالها يا ترى محمود هيوفي بوعده معاها ولا لأ؟ هل هيعاملها زي بنته ويسيبها تراعي اخواتها ولا لأ؟
صوت محمود خرجها من شرودها، كان بيقولها خلاص قربنا نوصل وهتنوري بيتك ان شاء الله، ابتسمت ليه ابتسامه هاديه، الحقيقة انها حاسه بأمان بوجود محمود
_____
- نورهان: زي ما اتفقنا يا لبنى، داري البودره جي كويس واول ما ترشيها عليها وانتِ بتباركي وتسلمي عليها هتفضل طول الليل تهرش وجسمها كله لونه هيتغير و يا سلام بقى لو عندها حساسية منه، ليلتها هتبقى سودا، اصلا ابوكِ هيخاف ليكون عندها مرض معدي او جرب مثلا
- لبنى: تمام هعمل كدا، بس خليكِ جنبي عشان انا متوترة اوي، وخايفه بابا ياخد باله، حاولي تشغليه و اتكلمي معاه وباركي بقى والحاجات دِ، اسكتي اسكتي طالعين خلاص في الاسانسير
- نورهان بدأت تزغرط وقالت اول ما شافت فريده ومحمود: الف الف مبروووك يا عمو محمود، مبروك يا عروسة، بجد انتِ زي القمر
- فريده: الله يبارك فيكِ ويسعدك، متشكره جدا
- لبنى حضنت محمود وقالتله : مبروك يا بابا وربنا يسعدك! يلا افتح باب الشقة عشان عروستنا الحلوه مينفعش تقف على السلم كدا، يلا روح افتح الباب وشغل النور على ما اسلم عليها
لبنى حضنت فريده وقالتلها بصوت واطي: الراجل اللي ضحكتي عليه و اتجوزتيه دا ابويا، اتأكدي اني مش هسيبك تاخديه مني، انا مضطره امثل قدامه اني بحبك عشان مخسروش ، لكن انا بكرهك وفاهماكِ كويس اوي، عموما مبروك يا عروسة
فريده كانت مصدومه من الكلام اللي بتسمعه من لبنى وقالتلها بعد ما بعدت عنها: الله يبارك فيكِ وعقبالك
لبنى كانت بتشغل فريده بالكلام عشان تعرف ترش المادة اللي معاها على فريده ولبسها، كانت بورده لونها ابيض ومش واضح حاجه من الفستان لأنه كان ابيض هو كمان فالمهمة كانت سهله عليها
محمود: اتفضلي يا عروسة ادخلي شقتك برجلك اليمين، نورتي البيت كله
_____
- نورهان: ها طمنيني عملتي ايه، رشيتي عليها البودره دِ ولا لأ ؟
- لبنى: سمعتها كلمتين حرقوا دمها، ورشيت عليها وكله تمام
- كريم كان واقف بعيد وشايف اللي اخته عملته وسمع كلامها مع نورهان وقالهم: مش خايفه منك ربنا منك ليها، علفكره هتتحاسبوا على اللي بتعملوه، و انتِ يا لبنى تصرفاتك كلها بتثبت انانيتك وانك مش بتحبي ابوكِ، و كان ممكن انادي عليه واقوله اللي عملتيه بس مردتش أفضح اختي الغالية، نورهان هتضعيك وبكرا افكرك
- لبنى: ملكش دعوه بينا يا كريم، اطلع نام و ارتاح وفكك مني ومن نورهان، انشغل في خطيبتك، يلا بعد اذنك داخلين ننام
دخلت لبنى ونورهان وقفلوا الباب في وش كريم
______
- محمود: مالك يا فريده انتِ كويسه؟
- فريده ردت بكسوف لأن جسمها كله فجأة بقى بياكلها: لا مش كويسه وفيا حاجه غلط، جسمي كله وجعني فجأة، بعد اذنك قولي فين الحمام انا لازم اخد شاور حالا
- محمود: طبعا تعالي اتفضلي هوريكِ فين الحمام، ولو محتاجه اي علاج من الصيدلية هجيبه ليكِ حالا
- فريده: انا اسفه والله عارفه اني بتعبك معايا، بس ياريت فعلا تجيب ليه اي حاجه للحكة؛ لأن جسمي كله تعبني
- محمود: حالا هرن على كريم يروح الصيدلية
دخلت فريده الحمام تاخد شاور، ورن محمود على كريم ونزل بسرعة كلم الدكتور اللي فاتح صيدلية قدام عمارتهم ووصف ليه حالة فريده وكمان كان لمح شكل العلبة اللي مع لبنى ووصفها لدكتور وبالفعل الدكتور عرفها واعطاه علاج مناسب، اخد العلاج طلع بسرعة لوالده، محمود فتح ليه الباب وخد منه العلاج والكريم الملطف للجلد اللي دكتوره قاله عليه، محمود شكره وقاله يطلع يرتاح.
كريم: حاضر يا بابا ولو احتجت اي حاجه كلمني علطول، وياريت تقولها متلبسش الفستان تاني الا بعد ما تغسله لانه اكيد واقع عليه حاجه اتسبب في اللي حصل
- محمود: عندك حق يا كريم، معلش تعبتك معايا يا ابني
______
محمود: فريده كريم جاب ليكِ علاج وفي كريمات وحاجات لازم تستخدميها
- فريده: طب ممكن تخليهم قدام الباب وتمشي عشان اعرف افتح باب الحمام واخدهم
- محمود: اكيد طبعا، بس انتِ كدا هتباتي في الحمام ولا ايه، هتخرجي من الحمام ازاي
- فريده سكتت شوية وبعد كدا ردت عليه وقالتله: اكيد ماما لما جابت لبسي الشقة رصته في الدولاب، لو متاح بس تجيب ليا عبايه من عباياتي هكون ممتنة جدا ليك
- محمود رد بتوتر وقال : اكيد طبعا، ثواني وهرجعلك، ان شاء الله هتبقي كويسه
______
- نورهان: زمانها دلوقتي بتهرش في جسمها على آخرها كأنها أصابها الجرب
- لبنى ضحكت على كلام نورهان وقالت: احسن تستاهل، دِ لسه هتشوف العذاب ألوان
- نورهان: طب يلا نامي عشان احكيلك باقي خططنا بكرا الصبح
- لبنى: تصبحي على خير يا نونو
_______
- فريده: بجد شكرا على وقوفك جنبي ومساعدتك ليا
- محمود: مافيش شكر طبعا، دا واجبي يا فريده وأهم حاجة تكوني بخير دلوقتي
- فريده: انا مكسوفه منك جدا والله، بس حقيقي مش عارفه ايه اللي حصلي فجأة
- محمود: قدر الله وما شاء فعل، الحمد لله انها جت على اد كدا، اتوضيتي ولا لأ
- فريده: ايوه اتوضيت الحمد لله
- محمود: يلا عشان نصلي، بس الاول لازم تعرفي انك قدام الناس مراتي، لكن بيني وبينك انتِ زي بنتي بالظبط او اختي، اي حاجه انا راضي بيها، وفي حاجه كمان اسمحيلي اقولها
- فريده اطمنت لما سمعت كلامه وقالتله اتفضل طبعا قول: انا عندي وعدي يا فريده، بس ممكن في حاله واحده بس اخلف بوعدي فيها
- فريده اتوترت وخافت وقالتله بصوت ضعيف ومهزوز: ا اي ايه هي الحالة دِ
- محمود: لأ اهدي خالص والله انا حتى ما هنام معاكِ في نفس الأوضة، كل واحد فينا ليه أوضة، بس يعني الحالة اللي اقصدها، انه مع الوقت لو حصل واطمنتي ليا وقبلتي بيا كزوج انا مش هيكون عندي مشكلة، انتِ في كل الحالات زوجتي على سنة الله ورسوله صلى الله عليه وسلم، بس والله ما هلمس شعره واحده منك بدون موافقتك، ويشهد ربنا اني مافيش مني اي مشاعر اتجاهك حاليا، بس انا بتكلم على المستقبل مش اكتر
- فريده : ان شاء الله خير، بعد اذنك هقوم اصلي وانام
- محمود: مش احنا هنصلي سوا يا فريده
- فريده: انا عايزه اصلي لوحدي واقفل اوضتي عليا بعد اذنك لو تسمحلي
- محمود: تمام اتفضلي اكيد مش همنعك
_______
تاني يوم
- رامز: اختفيتي فجأة وقفلتي موبايلك ومبقتش عارف اوصلك خالص يا نورهان، ايه اللي حصل بقى لكل دا
- نورهان: كنت مع لبنى يا رامز، قفلت الموبايل عشان خوفت انك ترن عليا ولبنى معايا، لازم نخلي بالنا، وانا جيبت ليك الف جنيه تمشي نفسك بيها
- رامز: الف ايه يا اختي، يعني دا اللي ربنا قدرك عليه، الف جنيه اعمل بيهم ايه انا، يعني تغيبي يومين وترجعي بألف جنيه
- نورهان: رامز لازم تشوفلك شغلانه تمشي بيها نفسك، حوار تهكير موبايلات البنات وتهديدهم بالصور عشان تاخد منهم فلوس هيوصلك للسجن، شوف اي شغل يكون ليه مرتب ثابت
- رامز: و ايه كمان يا نورهان، كبرتي وبقيتي بتقدمي نصايح، حد لعب في دماغك ولا ايه، ما انتِ كنت واحده من البنات اللي هكرت موبايلها بس نصيبي اني حبيتك وبقى في بينا شغل والدنيا ماشيه اهي، اظبطي عملك عشان متزعلنيش منك
- نورهان: حبيتني ولا بتستغلني انا حقيقي مش عارفه احنا بنعمل ايه بالظبط، دا لو لبنى عرفت ان انا ماليش اخوات وابويا اصلا مسافر برا مصر هتقطع علاقتها بيا، بس سيبك من كل الكلام دا، الخطة اللي اتفقت مع لبنى على تنفيذها انت دور اساسي فيها، وقالتلي لو انت عرفت تحقق الهدف من ورا الخطة دِ هتاخد منها ٢٠ الف جنيه، خلي بالك لبنى كانت رافضة الفكره دِ بس انا فضلت وراها لحد ما اقنعتها عشان انت تطلع بمصلحة
- رامز: ٢٠ الف جنيه مره واحده، قوليلي على الخطة بتاعتك و انا معاكِ في اي حاجه طالما فيها فلوس
- نورهان: عايزينك تفبرك كام صورة للعروسة الجديدة وحاجه كمان هقولك عليها، بس الاول جيبلي اي حاجه أكلها، لاني استغليت نوم لبنى وخرجت بدري عشان اقابلك
_______
- محمود: صباح الخير يا فريده، ايه اللي صحاكِ بدري كدا، انتِ تعبانه ولازم ترتاحي
- فريده: انا دلوقتي كويسة الحمد لله، وبعدين الساعة ١١ يعني مش بدري ولا حاجه، انا قولت اقوم اتفرج على البيت وأجهزلك فطار ونفطر سوا
- محمود: يااااااه اخيرا حد هيهتم بيا ويصحى عشان يفرحني ويعمل الاكل ومش هفطر جبنه وشيبسي زي كل يوم، المشكلة عندي في الوقت بصحى بدري اروح الشغل وبرجع من الشغل اغير واروح المعرض
- فريده: زي ما انت وفيت بوعدك معايا انا هوفي بوعدي معاك، و ان شاء الله هعملك الغدا و يا رب اكلي يعجبك و اي حاجه تحتاجها هعملها بكل حب ، وبخصوص الصباحية وكدا ماما نفسها تيجي ليا هي واخواتي بس والدي بيمنعها، والله هما نفسهم يشرفوني قدامك بس مافيش في ايدهم حاجه
- محمود: كدا انتِ بتزعليني منك يا فريده، من ضمن وعودي ليكِ اني هساعد اخواتك يكملوا تعليمهم، معنى كدا ان انا فاهم وعارف ظروفكم، متبقيش حساسه ولا تفكري في الموضوع دا خالص، و اعرفي ان مافيش بينا اي فرق، اي حاجه نفسك فيها اتمنى وانا هنفذ
- فريده كانت بتسمع محمود وكل اللي كان بيتردد في ذهنها ان هو دا عوضها من ربنا، اد ايه هو حنين ومتفهم وانسان بشوش وراضي، قلبها كان مرتاح في وجوده، ابتسمت ليه ابتسامه هاديه بكل رضا و حب وقالتله: انت عارف ان انا شايله الرحم؟
- محمود: طبعا عارف وراضي بكل اللي يجيبه ربنا، وصدقيني يا فريده اي بلاء في حياتنا بيكون عطاء من ربنا عشان يراضي قلوبنا ومع الوقت بنعرف الحكمة من البلاء دَ وبنتأكد انه خير! بس لازم نتحلى بالصبر
- فريده: الحمد لله رب العالمين، هقوم اجهز السفره، وشكرا على كلامك المريح للقلب، و احنا بنفطر ياريت تحكيلي اكتر عن لبنى وبتحب ايه و بتكره ايه
_______
مر اول اسبوع ومحمود كان طيب جدا مع فريده وهي بدأت تطمن بوجوده، وبدأ يرجع شغله وكانوا متفقين ان يوم الخميس هتروح معاه تزور أهلها، وبالفعل جه يوم الخميس صحت بدري جهزت الفطار ليه وفطرت معاه وسابها و راح المدرسة، وخلال الفترة دِ لبنى كانت بعيدة عنهم وكانوا مش بيلمحوها لكن بعد ما ابوها خرج من البيت بنص ساعه خطبت على باب شقة فريده وفريده فتحت ليها
- لبنى: صباح الخير يا فريده، قبل أي حاجه انا بعتذر جدا ليكِ بسبب الكلام اللي سمعتيه مني في أول يوم جيتي فيه هنا، صدقيني انا بسبب كلامي دا قافله على نفسي باب شقتي ومش بخرج منها واستنيت لما بابا يروح الشغل عشان اجي اعتذرلك
- فريده: طب ممكن تهدي، محصلش حاجه وانا مش زعلانه؛ لأني مراعية تعلقك بوالدك بس صدقيني انا مش جايه اخده منك، انا نفسي نبقى اخوات وحبايب ونبعد عن المشاكل؛ لأني بصراحة اكتفيت منها، وبعدين تعالي ادخلي ليه واقفه برا كدا
- لبنى: انتِ بجد طيبة اوي يا فريده، ان شاء الله هنبقى اصحاب، معلش كنت عايزه اطلب منك طلب بسيط
- فريده: طبعا اتفضلي انا عيوني ليكِ
- لبنى: تسلمي وتسلم عيونك، الخط بتاعي اتحرق امبارح، فلو متاح اخد موبايلك خمس دقايق اعمل مكاملة مهمه وارجعه ليكِ هكون شاكره جدا، ولو مش هينفع طبعا مش هزعل
- فريده: اكيد طبعا متاح، ثواني هدخل اجيبلك الموبايل وهعرفك الباسورد عشان لو قفل منك تعرفي تفتحيه
- لبنى: بجد تسلمي يا فريده، مش هنسى معروفك دا ابدا، المكالمة دِ بالنسبة ليا تحديد مصير
_______
- نورهان: ها طمنيني عملتي ايه؟ عرفتي تجيبي الموبايل منها ولا رفضت، انطقي يا لبنى متوترة كدا ليه
- لبنى: الموبايل اهو يا نورهان، خلصي بسرعة عشان حاسه ان قلبي هيوقف من الخوف، ربنا يسترها لأن لو بابا عرف ممكن يطردني من البيت عادي
- نورهان: اهدي ومتخافيش، يلا بسرعة سجلي الرقم ورني عليه، وحلو اوي انها لغت الباسورد، كدا الخطة هتكون تمام، وهنطلعها من البيت بفضيحة
شكرا لزيارتكم عالم روايات سكيرهوم
