رواية ختم الملائكة الجزء الثاني الفصل الثاني
أول مادخلت القصر شوفت سلم طويل لمنصة عالية فوقها عرش ذهبى ضخم وشخص قاعد عليه
حواليه فوق المنصة 10 من العمالقة .
قربت من السلم وبصيت فوق على ملامح الشخص اللى قاعد على العرش الذهبى.
شاب شعره اسود فاحم بس حواجبه ولحيته بيضاء.
وشه مفهوش تجاعيد عينيه حادة زى الصقر
وقفت عند أول درجة فى السلم وقلتله بصوت عالى :
انت عظيم ؟!!
قالى بصوت اجش مش مناسب لشكله :
اركع على ركبتيك انت فى حضرة عظيم .
كنت لسه هقول حاجة قاطعنى وقالى :
اركع على ركبتيك ياخائن.
ركعت على ركبتى وانا فارد جنحاتى.
قالى :
- انت يوهان !!
قلتله وانا راكع.
- ازاى عرفت اسمى ؟!!
ضحك ضحكة مستهترة وهو بيقول :
- أنتوا أغبياء ومتعجرفين شايفين أنكم ملوك على الارض ومينفعش تقوموا بأعمال الخدم عشان كده فتحتوا مملكتكم للبشر الفقراء من أرض الزراع واللى بيعبدوا الذهب ومستعدين يعملوا أى حاجة علشانه , حتى ولو كانت الحاجة دى التجسس على الملايكة ونقل أخبارهم لألد أعدائهم ...
تحب احكيلك قصتك ؟!!
انت خائن لارض عظيم قبل ما تكون خائن لارض الملائكة وقودت جاردينيا بنت الحكيم جاوه لهلاكها وجاى دلوقتى عشان تنتقم من مملاكتك عن طريق الخيانة.
سكت شوية وقال :
- انا فى حيرة هل اقتلك لانك دنست نسلى ولا انتهز الفرصة واخلص عليكم كلكم!!
قلتله :
- انا شايف ..
قطع كلامى وقال :
- انت متشفش حاجة انا اللى اقول امتى تتكلم وامتى تسكت.
كمل كلامه وقال :
- انا مندهش ازاى بعد ما قدمت علمك كله لمملكتك تخونها وتتجوز من نسل الد اعدائها ؟
فضلت ساكت , مردتش والصمت عم المكان ,شويه وقلتله :
- دا سؤال!! اجاوب ؟!
قالى :
- اعدل وقفتك وجاوب ياخاين.
قلتله وانا بقوم :
الإجابة بسيطة الحب، انا حبيت جاردينيا ومهمنيش هى نسلها ايه!!
سؤالى انا بقى ليك .
أنا عارف ان معاك ترياق ابديه تانى واللى المفروض كان يبقى لزوجتك بس انت فضلت ان يكون عندك اكتر من زوجة بدل زوجة واحدة تعيش معاك الابدية.
معرفش دى انانيه ولا انت عايز تبقى متفرد ومحدش زيك .
صعدت كام درجة من السلم وأنا بفكر بصوت عالى وقولت :
معقول على مر العصور مفيش واحدة حبيتها وقررت تديها الترياق عشان تعيش معاك طول العمر , طيب بلاش زوجة , مفيش ابن من ابنائك حبيته يكمل معاك طول العمر؟!!
العمالقة اللى فى القاعة كانوا بيبصوا على عظيم فى تساؤل ,فعرفت انهم من ابناؤه المقربين .
سألنى باستغراب :
- انت عرفت ازاى ان فى ترياق تانى ؟!!
كملت صعودى على درجات سلم المنصة وخدت بالى من أبناء عظيم اللى كانوا بيبصوا لبعض بأندهاش .
وقفت على السلم وكان فاضلى درجة واوصل للمنصة اللى فوقيها العرش وقلت لعظيم وانا ببص فى عينه :
- الاجابة هى الحكيم جاوه.
مش بس كده انا اعرف عن مملكتك اللى متعرفهوش انت يا عظيم واقدر اخليك تكسب الحرب قدام الملايكة وتحكم الممالك كلها .
واقدر برضه اخليك تخسرها لانى الوحيد فى القاعة بل فى الممالك كلها اللى يعرف نقطة ضعفك وعارف ليه لحيتك بقت بيضه وعارف الحاجة الوحيدة اللى مرضت عظيم واصابته بالحمى .
حسيته ارتبك وامر كل اللى فى القاعة بالانصراف.
بصوله باندهاش , زعق فيهم فنزلوا من السلم وهم متذمرين.
صعدت أنا أخر درجة لمنصة عظيم وقولتله بصوت واطى :
فى عصر من العصور حكم أرض الفردوس قائدة أنثى من الملايكة خانت زوجها مع بشرى , قصدى عملاق , لا قصدى عظيم!!
دنستوا العهود فالمرض أنتشر و مرضوا الملائكة و أنت كمان مرضت من نفس المرض , وخدت عهد أمام النهر المقدس أنك مش هتجيب سيرة اللى حصل فى مقابل أن اللعنة تزول من عليك , وبالفعل حصل , بس اللعنة سابت علامة فى حواجبك ودقنك علشان تفضل مفكراك بأثمك , خلينا فى موضوعنا .
أنا جاى أخلصك من الملايكة و أمنحك حكم الممالك كلها وكمان أعالج أثار اللعنة اللى على وجهك وأخليك منيع زى الأول لانك مش منيع دلوقتى، المرض خدش فيك حاجة .
قال وهو عينه فى عينى :
غلطة عمرى انى مقتلتش الحكيم جاوه , ورث هرطقاته للملايكة الاغبياء اللى زيك ..
مش كل كلامك صحيح .. كما انك متعرفش نقط ضعفى لان مليش نقطة ضعف.
سكت شويه وقال وهو بيلعب فى دقنه :
ولنفترض ان انت تقدر تحقق دا كله هيكون ايه المقابل ؟!! الانتقام بس !!
قلتله :
الانتقام وسيلة مش غاية .. انا غايتى انى اكون زيك ابدى.. فانا طلبى هو ترياق الابدية التانى ..
عظيم ضحك بسخرية وقال :
يعنى انت قلت ان انا عايز اكون متفرد وبتطلب منى الترياق التانى !!
قلتله :
انت طماع اوى يا عظيم شوف انا هديك كام حاجة قصاد حاجة واحدة.
انا هسلمك مملكتى ورؤوس الملايكة على سيفك وهرجعك زى الاول فى مقابل جرعة من سائل .
قالى :
سائل فى نظرك لكنه اغلى ما عندى.
قلتله :
انا مش هاخد اغلى ما عندك الا لما اسلمك اغلى ما عندى , يعنى لما تنتصر على الملايكة واسلمك مفاتيح الفردوس ولما لحيتك ترجع سوداء وتعالج الشرخ اللى جواك انا متاكد ان انت هتديلى الترياق من نفسك .
قالى :
ابدأ .. اتفضل اشرحلى خطتك هنهزمهم ازاى ؟!!
قلتله :
عجبتنى نون الجماعة معنى ذلك ان انت وافقت.. هنهزمهم بدول.
ومديت ايدى فى جعبتى وطلعت 3 زجاجات.
قالى باستغراب :
ايه دول ؟!!
1
مسكت اول ازازة وقلتله :
دى زهرة الحياة واللى فيها المادة اللى مرضتك انت والملائكة.
مسكت تانى زجاجة وقلتله :
ودى رغوة البولى يوريثان مادة عازلة للحرارة.
مسكت الزجاجة الثالثةواللى فيها سائل لزج وقلتله :
اما دا بقى للثيران اللى بتحبوا تربوهم وتصارعوهم فى ارضكم .
قالى :
وضح اكتر !!
شرحتله الفكرة وشفت على وشه علامات الانبهار , ابتسم وهو بيقول :
انت عامل حساب كل حاجة!!
قلتله :
زى ما بقولك هديك اغلى ما عندى فى مقابل اغلى ما عندك واظنها صفقة رابحة بالنسبالك.
ريح ظهره على العرش وهز راسه وقالى :
منكرش انك ابهرتنى.. هنبدأ من بكرة نحشد للحرب.
************************************************
" حنوش "
ادم سكت فجأة، فقلتله :
مالك وقفت ليه؟!! كمل قول ايه اللى حصل .
قالى :
سامع صوت ناهيرا فى ودنى بس المرة دى وهى بتنتقم.
قلتله :
بقولك ايه متلخبطنيش ايه حكاية ناهيرا دى؟!!
قالى :
يونان اخطأ نفس خطيئة اخوه يوهان واتجوز بشرية من ارض الزراع بس الفرق انه فضل محتفظ بالموضوع فى السر.
لحد ما قتل جاردينيا وقتها بعت مراته البشرية مع بنتها ناهيرا على سفينة عشان يداروا فى ارض الزراع بعيد عن ارض الفردوس.
بس للاسف القراصنة هجموا على السفينة وقتلوا ام ناهيرا واسروا بنتها ناهيرا.
قلتله :
لا دا كدا الموضوع كبير اوى , طب وبعدين!!! احكيلى.
************************************************
"ناهيرا"
أسمى ناهيرا و دا كل اللى اعرفه عنى، معرفش ايه اصلى وفصلى..
اعرف بس انى اتأسرت من وانا طفلة وعيشت وسط قراصنة ارض البوار..
الجماعة الخفية اللى عايشة على حدود ارض البوار وبتقتات على السفن اللى بيرميها سوء حظها فى طريقهم..
الجماعة دى ميعرفش بوجودها غير سكانها الهاربين والمنبوذين من أرض العمالقة وأرض الزراع..
عيشت حياتى كلها جارية..
اتعرضت لكل أشكال العذاب على ايد معشر الرجال،
النساء هنا مجرد أسرى وجوارى فقط لتحقيق متعتهم ورغباتهم الحيوانية ..
مفيش طريق للهروب..
فضلت عايشة 15 سنة مستلمة لمصيرى على أمل تنقذنى معجزة فى يوم.
لكن املى مات النهاردة..
النهاردة اخر يوم ليا على قيد الحياة..
مستنية دورى..
مستنية اطلع فوق منصة الإعدام، عشان يذيبوا جسدى فوق صخور الواكا..
الذكور الأوغاد، اللقطاء، اولاد الكلاب..
جريمتى انى دافعت عن نفسي ضد ذكر حاول يغتصبنى فى السوق قدام الناس..
زقيته بايدى ، رأسه وقعت على حجر، فمات الوغد!!
هتقتلوا أنثى عشان دافعت عن نفسها؟!!
لو كنت ذكر كنتوا سيبتونى، لكن هتقتلونى عشان متشفوش كل يوم هزيمتكم على وش أنثى يا اوغاد!!
محتشدين دلوقتى فى الساحة عشان تشوفونى انا وباقى الاناث المتمردين على رغباتكم الحيوانية وهما بيتعدموا على صخور الواكا..
مستنيين تشوفوا جلودنا وهى بتدوب وعظامنا وهى بتتحرق!!
بتعشقوا المشهد دا مش كدا!!!
بتعشقوا تشوفوا صخور الواكا اللعينة وهى بتمتص جميع سوائل جسمنا لحد ما نتحول لبخار يفضل فترة قصيرة ويختفى للأبد...
رسالتى الأخيرة ليكوا..
الموت ليكوا يا اولاد الخنازير!!!
