 |
اسكريبت ساجد ورحمة الفصل الثاني بقلم حبيبة المصري
كنت بنضف الشقة لوحدي بعد ما سي السيد ساجد خلع مع صحابه و لبسني الشقة كلها لوحدي ... الندل !
بس هل أضايق و آكل في نفسي ؟
أكد لا عشان بشرتي متبوظش معلش كلو إلا بشرتي اللي مفلسة سيجو عليا ... بس برضو يا رب يخسر هو و صحابه الصيع دول الماتش عشان أشمت فيهم بمزاج رايق، أرجع للتنضيف بقا، بصيت للشقة المقلوبة فوقاني تحتاني و العفش المتنطور في كل حتة في الريسبشن زي فِرد الشرابات في الغسالة وانا بكلم نفسي زي العبيطة :
- هل اسيب طبلة وداني سليمة؟
أكيد لا طلاما هتكسر يبقى اتكسر كُلي
قولتها بثقة كبيرة و رحت جبت الـ headphone بتاعتي صديقتي الصدوقة في رحلة التنضيف بعد ما الضايع الكبير يروح يلعب كورة مع صحابة و يسيبني أنضف لوحدي، ولأني عارفة أني مش هخلص قبل 12 بليل شغلت رواية 11 ساعة و وصلت الفون بالـ headphone وهاتك يا تنظيف و دعاء على أشرار الرواية اللي يارب يقعوا كلهم في بلاعة مفتوحة !
- تصدق و تؤمن بالله أيها البطل أنت غبي و حلوف كمان وماشي ورا حرباية، حلوف ماشي ورا حرباية
- والله تستاهل حد قالك تطلقها أديها اشفت غليلي منك و أتجوزت غيرك
- أيوا يا سوسو أديه فوق دماغه أزاي يحط سكر علي المانجا بتاعتك و يشربها، عديم الإحساس بصحيح !
كل ما يجي وقت الصلاة أسيب الرواية و الشقة و اصلي لحد ما بعد عناء و مرمطة مسحت الشقة و أخيراً خلصت و معملتش غدا و يبقى يخلي الماتش يأكِله أبن محمد ده ... أحم، بصراحة أنا لو عملت أكل هتبهدل و كمان نص الأكمل هيبوظ، فشغلت دماغي و عملت طبق سلطة يأكل أربع أشخاص أتسليت فيه وأنا بكمل الرواية بكل انشكاح بعد ما البطل و البطلة أطلقوا و البطلة اتجوزت غيره ...
الساعة أتنين بليل لقيت سي الصايع بيرن عليا بكُل تذلل رديت عليه بتعالي وقولتله :
- عايز ايه ؟
- أحم، رحومة حبيبة قلبي اللي ماليش غيرها يحطلي ماسكات
- أنجز ياض مش فضيالك
- ماشي ماشي للضرورة أحكــــام، هستحملها لحد ما أطلعلها
قالها بهمس فاكرني مش هسمعه أبن محمد بس علي مين سمعته، و لقيته بيقول بمسكنة :
- رورو حبيبة قلب أخوها، أحدفيلي المفتاح عشان خاطري
- معلش يا سيجو مش هقدر، اصل بعيد عنك بقالي عشر ساعات بنضف الشقة، أطلع علي المواسير ولا اتسلق الحيطان زي سبايدر مان
- معلش تعالي علي نفسك أنا مدغدغ من الماتش، و بعدين البلكونة بينها و بين الريسبشن مترين تلاتة مش حوار
حسيته بيقولها من تحت سمانه فا قولتله بلا مبالاة :
- معلش يا حبيبي أنا كمان مدغدغة من التنضيف صرّف نفسك عشان معندناش رجالة تدخل البيت بعد الساعة عشرة
- بالله يا رحمة بقا مش قادر والله
قالها بمسكنة فاكرني هضعف زي كل مرة بس لأ مش كل مرة هبقى طيبوبة فا قولتله :
- خلاص يا حبيبي روح نام عند صحابك الصِيع الضايعين اللي أنا مش بطيقهم، أو روح نام في الملعب اللي لبستني في الشقة لوحدي عشانه
- ليه بس كدا يا رحرح دا أنا حتي جايبلك شوكولاتة و ميكس فراولة ؟
- ثابتة علي مبدأي، مش هتغريني
- طب لو قولتلك معايا علبتين كورن فليكس و بسبوسة هتقولي أيه؟
أحم ثواني و كُنت في البلكونه بحدفله المفاتيح بكل حنان ما هو اغراني برضو، طب الثبات علي المبدأ راح فين؟ ببساطة يا اخواتي في الله الثبات علي المبدأ ده مبيأكلش بسبوسة و كورن فليكس ...
دقايق و لقيته بيفتح الباب و داخل بالكوتشي، رفعت المساحة في وشه ولا الساموراي في أيامه و قولتله بتحذير :
- ماسحة الشقة و السيراميك لسه منشفش، الكوتشي برا !
قولتها بحزم فـ لقيته هيعترض و يتمسكن عليا، مدتهوش فرصة الأعراض و ضربته بيها على رجله و قولت بتحذير :
- وربنا يا ساجد لو دخلت بيه لتصحى الصبح تلاقي أوضتك متبهدلة و مقفول عليك الباب بالمفتاح ومش هفتحلك غير وأنت مخليها فُلة شمعة منورة
طبعاً سيجو مبيكرهش فحياته حاجة قد التنضيف فا لم نفسه و قلع برا و دخل وهو مفرهد خالص، يعيني صعب عليا حبة صغنتتين بس يستاهل ... حط الحاجة علي الطرابيزة و قعد علي الكنبة وهو فطسان خالص فا سألته بفضول :
- كسبتوا الماتش ولا خسرتوا ؟
- خسرنا للاسف
- الله أكبر، فرحانة فيكم يا شوية ضايعيين وشوية و هنلمكم من الملاعب، ده ذنبي عشان تسيبني أنصف لوحدي بعد كدا
- أنتِ شمتانة فينا يا مفترية
- اه شمتانة أوي حقي خلص خلاص، وأقولك علي حاجة؟، مفيش أكل خلي الصيع صحابك يعملولك أكل ها
قولتها بإستفزاز فلقيته بيبص للسقف و بيقول :
- كشفت راسي و دعيت عليكِ يا رحمة يا بنت محمد
- بس يا ظالم أنا المفروض ادعي عليك، صدق من قال ضربني و بكي سبقني وأشتكي
و طبعاً دخلت عملتلنا طبقين كرون فليكس عشان صِعِب عليا ينام جعان، أقول ايه بس، طيبة قلبي دي اللي مودياني في داهية و مشندلة حالي
~~~~~~~~~~~~~~~
