رواية شيخه عراقيه كويتية الفصل الثاني بقلم جمانه السعيدي
حكمت....صحيح هم مايفرضون زواج رحيم عليه
بس خالتي بدت تلمحلي
كلما تلعب على وسام تكول يمته الله يجبر خاطرنا ورحيم يصير عندا ولد
لو تكول فلان ازوج ويااا رحيم وصارو عندا ٣ اطفال
كلامه ينزل مثل السم على كلبي
كلش اضوج بس ارجع واكول حقه ام وماعدها غير هذا الولد
وتريد تشوف جهاله
بين اريد اوصله فكره اني رافضه وبين اريد اروح انطيه الضوء الأخضر ادور زوجه الرحيم
بس مااكدر مو بيدي اني احب رحيم وحيل متعلقه بي
خصوصا وهو ابد مامسمعني كلام موحلو
ولا مضوجي
ويعاملني معامله حلوه حيل
بهاي الفتره وكع عمي مريض هو كان يعاني من التهابات
حاده وكان دائما يشكي من رجلي
قبل الناس عادي الي يتمرض مايركض للطبيب مثل هسه
اله يوكع بلفراش ينتهي كلش يله يروح للدكتور
اتئزمت حالة عمي حيل
ورحيم كل يوم ماخذه الدكتور بس بدون فايده
الحد ماتوفا عمو سنة ٨٤ خيم الحزن على بيتنا وبين وحشة المكان
احنا اصلا عائله زغيره والنوب عمو مات
حالة خالتي هم موزينه من كد الحزن والبجي على عمو خسرت عيونه وكامت متشوف
وحالته النفسيه ادهورت
حقه فقدت شريك عمرها وابنه الوحيد ماعندا اطفال
حزينه وتنعى كل النهار
اما اني كنت متمسكه بوسام حيل
متعلقه بي بشكل موطبيعي وجوده يعوض النقص الي جاي احس بي
بهاي الفتره قررت انهي هذا الوضع
عرضت على رحيم بزوج
اريد اطلع رحيم وخالتي من حالة الحزن
اريد رحيم يصير ابو حقيقي واني عوضي على رب العالمين كافي عليه وسام
جمانه السعيدي
طبعا وسام بااسم امه وابو الحقيقين ابد مافكرت انقله الاسمي واسم رحيم
يكفيني عايش عندي حتلو مو بااسمي
حكمت...خاله اريدج ازوجين رحيم
خالتي...يايمه فدوه اروحلج اي رحيم وحيد واريدله
جهاله يملون البيت علينا
حكمت...اي خاله شوفيله وحده على معرفتج كنت احجي وحسره بكلبي شكبره كوه لازمه دموعي ماابجي
مابيدي شي امه حيل حزينه علي
حتى هو مو مثل قبل يدخل للبيت ساكت ويطلع ساكت
بس بدينا نسئل وندور حالة خالتي صارت بلنازل
حيل بحيث رحيم تخبل
خاف يفقدها مثل مافقد ابو
وهو حيل متعلق بيهم ثنيبنهم
ورجعنا دخلنا بداوم المستشفيات والدكاتره والتهينا
عن موضوع زواج رحيم
بعد سنه وأربع اشهر من وفاة عمي اتوفة خالتي وهسه
البيت صدك صار وحش علينا
بقينا بس اني ووسام ورحيم
الحرب الايرانيه العراقيه كانت مشتده حيل
والشوراع ملينا فواتح للشهداء
وكل شارع بي فاتحه لو ثنيين
الموت كان يفتر بلشوارع والناس نست طعم الفرح
اما سناء بطلت تجي تأخذ وسام مني
ووسام صار متعلق بيه اكثر مااني متعلقه بي
ماله غيري ومالي غيره
حبيته وهو يكول ماما كل مره يناديني ماما
احس التعب والحزن كله يروح مني
بس رحيم خيم الحزن علي وصار واحد ثاني قليل الكلام قليل التفاعل بلبيت على طول صافن وحزين
حكمت...حبيبي..اذا تريد تزوج ماعندي مانع
رحيم...اي زواج وامي ماصار ست اشهر ماتت
حكمت...امك راحت الرب العالمين الي احسن مني ومنك
والحياة لازم تستمر ازوج بس نقسم البيت
بيتنا جبير اقسمه قسمين ولا تنسانا اني ووسام
رحيم...اني جاي افكر فكره ثانيه
حكمت...شنو هاي الفكره
رحيم...اكو جماعه طلعو للكويت يشتغلون هناك يكولون
خير من الله الشغل
اريد اطلع اشتغل هناك واشوف مستقبلي
حكمت..وتعوفنا
رحيم...اني اطلع بلاول اشتغل واستقر هناك واذا شفت الوضع زبن ادز عليكم تجون وراي
حكمت...اني مااكدر اطلع من العراق متعوده هنا
رحيم...خلاص اني اطلع اشتغل هناك وكل فتره انزل اشوفكم وارجع
حكمت...بكيفك مااكذب عليكم عندي يسافر يشتغل ولا يزوج ويجيبه كبالي لان بس اشوفه يزوج اموت
فرحت بفكر السفر لان توقعت هو شال فكرة الزواج من باله
اني اكثر وحدا شجعته على السفر خصوصا هو معفي من الخدمه العسكريه لان وحيد ماعندا لا اخ ولا اخت
المهم سافر رحيم بلبدايه بقه ست اشهر واني مااعرف اخباره بس الي مطمني الكويت مابيه حرب مثل العراق
وابوي كان يكول دائما الكويت خير
بعد ست اشهر دزلي مصرف بيد الناس الي تجي وتروح
ورساله يكول اني زين وتوني يله لكيت شغل واستقريت
لا تخافين عليه
بقينا على هذا الحال كل فتره يله تجينا منا اخبار اطمني علي ويدزلي مصرف صح المصرف مايكفيني
بس ابوي عينه عليه ويدزلي مسواك واني هم اخيط
ملابس ومشيت اموري
ليليه ابوي يجي يبات يمي لو واحد من اخواني والصبح يطلعون والمسواك يومي من اهلي
اني ماكنت اتسوك ابد الفلوس الي احصله اجمعه مااشتري اله شي ضروري
جمانه السعيدي
الحد سنة ١٩٨٦ الشهر الثامن دزلي رساله كاتب بيه اني ازوجت وانتضر طفلي الاول اتمنى تقدرين وضعي
حسيت نفسي مثل بنايه عاليه وقويه ونهارت فجئه
وكعت من طولي وماحسيت اله اني للمستشفى
واهلي واكفين يمي
الدكتور مشخص حالتي وكايللهم هاي شبه جلطه
اكيد انجلط لان رحيم اختار وحدا غيري يكمل حياته وياها لا والمصيبه وينتضر طفل بلطريق
خلاص رحيم مستحيل يرجعلي بيوم من الايام
بقيت شهر كامل واني امشي واحجي بدون وعي
وانتضر خبر من رحيم يكول هاي الرساله مو اني دزيته اللج
اجتج بلغلط
اريد واحد
يكول هذا حلم انتي تحلمين مو حقيقه
رحيم حب العمر رحيم حب الطفوله
شلون انطا كلبه يزوج وحدا غيري
لو طالع السبب منه مجان عفته ابد بس هم هيج الزلم
يفكرون بس بنفسهم
طول النهار احس نفسي مريضه بس مااعرف اني ليش مريض مريضه من حب رحيم
مريضه لان خذلني واختار وحدا غيري
بعد هاي الفتره تقريبا بثمن اشهر دزلي مصرف وكاتب صارت عندي بنيه سميته شيخه
بلحظته فكرت انفصل عنه بعد اني شنو وجودي بحياته
ماله معني
هو اختار حياة جديده ونساني
من اجا ابوي بليل يبات عندي فاتحته بلموضوع
حكمت...يابه اني اريد اطلك
ابوي...شنو شنو شنو تطلكين انتي صار بعقلج شي
حكمت..بلعكس اني هسه وعيت
ابوي...اس مااسمع هذا الكلام مره ثانيه ماعدنا بنات تطلك
حكمت...يعني عاجبك هذا الحال هو بدوله واني بدوله
عندا زوجه وطفله واني باقيه هيج
ابوي...عندج بيت ساكنه بي وكل فتره يدزلج مصرف
وعندج وسام جاي يسليج وتخيطين بعد شتريدين
حكمت..اريد اطلك وارتاح
ابوي...شنو قابل تزوجين بعد يابابا سمعة المطلكه مو حلوه
وانت بعد مو زغيره
ولي يزوجج شراح يقدملج انت بيت عندج وعمل عندج و ولد عندج
شنو يقدملج اكعدي واسكتي ازعل عليج اذا سمعت هذا الكلام مره ثانيه فهمتي لو لا
حكمت...فكرت بكلام ابوي هم صحيح اني مايصير عندي اطفال والي يزوجني مراح يقدملي شي ماعندي ابد
اكعد واسكت احسن اليه
بس الشي الوحيد الي سويته غلط بديت ادخن من العصبيه والضوجه
ادخن بدون مايدري اي احد بس وسام وجان زغير مايفتهم
بهاي الفتره عمرا خمس سنوات
جمانه السعيدي
هسه رحيم يحجي القصه من وجهة نضرا
وحسب ما تحجي شيخه وماسمعت من الاهل بعد وفاة ابوها وامه
رحيم...اني وحيد اهلي متعلق حيل باامي وابوي مدلل
عدهم ويحبوني واحبهم
من فتحت عيني للدنيا واني اسمع الكل يكول انت الحكمت وحكمت اللك
حبيته حب عفوي حب تعلق من اني زغير واني اعرف حكمت اليه يعني تخصني حبيته وتعلقت بيه
بعد زواجنا طلعت حكمت احلى من اني توقعت
حبابه وطيبه وخادمتني وخادمه اهلي
حمدت ربي وشكرته على هاي النعمه
بس فرحتي ماكملت حكمت طلعت عقيمه ومستحيل يصير عدها اطفال
هذا الخبر دمرني لان حكمت زينه وماتتعوض
حرامات
اني اريد اطفال اريد اشوف جهالي وهاي كانت امنية امي وابوي
بقيت لمدت خمس سنوات انتضر تصير معجزه ويصير عندي طفل بس رب العالمين مااراد
حكمت جابت ابن اخته حتى يعوضه حلم الامومه
بس اني مااكدر اقبل بهيج وضع
اريد طفل مني من صلبي بس الضاهر هذا الشي مامقسوم اليه ابد
من توفا ابوي حسيت نفسي ضايع وماعندي هدف بلحياة
بعدا تمرصت امي ولحكته
هنا كرهت البيت وكرهت العراق كله
العراق الي مابي غير ريحة الموت منتشره بكل مكان
اكو جماعه طلعو للكويت وبدو يحجون عن الشغل والعمل
والحياة هناك شلون حلوه
قررت اطلع اعيش خارج العراق واشتغل واشوف نفسي
بس ماكان الزواج هدفي
بلبدايه كنت طالع علمود الشغل وبس
بس صار شي اني ماكنت متوقعه ابد
جبرني على الزواج
لا تتخيلون هذا الزواج كان بارادتي
هسه احجيلكم قصة زواجي
