رواية ام الدويس الفصل الثاني بقلم محمود الأمين
لكن أبو نواف كان بيصرخ في التليفون وبيقولي الحقني الحقني
والخط اتقطع مكنتش فاهم حاجه خالص.. حاولت اتصل بيه تاني
مرة يديني مشغول ومرة يديني مغلق ومرة هذا الرقم غير موجود بالخدمة
كانت حاجه غريبة جداً.. طيب هتصرف ازاي دلوقتي؟
كنت عارف ان ابو نواف قاعد في فندق كبير من أكبر فنادق القاهره.. نزلت من المحل وروحت علي الفندق
دخلت الاستقبال ولقيت الموظفة بتقولي
_ مساء الخير يا فندم.. نورت الفندق
_ مساء النور متشكر جداً.. انا عاوز أسأل علي واحد هنا عندكم نزيل
_ مين يا فندم؟
_ اسمه ابو نواف هو رجل اعمال إمراتي
_ اه طبعاً يا فندم نعرفه.. خير في حاجه؟
_ لا لا مفيش هو صديق شخصي ليا.. وكلمني وكان بيصرخ وانا جيت عشان اطمن عليه
_ غريبة يا فندم مفيش اي استغاثة جتلنا من غرفة النزيل.. عموما انا هبلغ المدير حالا بس اهم حاجه تكون متأكد
_ بقول لحضرتك كلمني وكان بيصرخ
_ حاضر يا فندم.. دقيقة واحدة
...
وغابت خمس دقايق ولقيت مدير الفندق جاي عشان اعيد الكلام مرة تاني.. قلي
_ أنا هبعت 2 من الامن يشوفوا الحكاية اي.. بس اهم حاجه تكون متأكد من كلامك
_ متأكد والله متأكد.. هو في اي حضرتك؟
_ في ناس بتاجي تشتغلنا وبيحطوا نفسهم تحت طاولة القانون
_ لا يا فندم انا جاي احكي اللي حصل ولازم اطمن علي الراجل
_ تمام يا فندم تحت امرك
..
استنيت شوية في اللوبي او الاستقبال يعني لحد ما لقيت المدير داخل عليا وهو مدايق جداً وبيقولي
_ النزيل زي الفل وهينزل لحضرتك حالا وزي منا توقعت حضرتك جاي تبلغ عن حاجه محصلتش وانا حذرتك
انك هتتحاسب
_ والله العظيم اللي قولته حصل.. حتي هوريك سجل المكالمات
..
وكانت الصدمة اللي بجد ان سجل المكالمات ممسوح بالكامل.. صدمة مش عارف اتحملها
غير اني فضلت مسهم وباصص للراجل اللي كان هاين عليه يرميني بره الفندق
لكن في الوقت ده ظهر ابو نواف.. وعلي وشه ابتسامه خفيفة وقال
_ اهلا وسهلا بيك يا اتش منور الفندق يا غالي
_ ابو نواف أنت بخير؟
_ بخير الحمدلله.. مالك وشك مخطوف ليه؟ واي الكلام اللي بيقوله الموظفين دول
_ كلام اي يا ابو نواف؟
_ بيقولوا انك جاي تقول اني كلمتك وكنت اصرخ بالفون
_ وده فعلاً اللي حصل علي فكره
_ لا أنت شكلك تعبان شويه.. حبيبي انا كنت نايم ولقيت باب الغرفة بيخبط قومت فتحت لقيت الموظفين
بيسألوني نفس سؤالك
..
أنا مكنتش مصدق.. ابو نواف أعتذر لمدير الفندق ومشي معايا لبره الفندق وقلي
_ انا عاوزك ترتاح ومتشلش هم المحل
_ انا مش شايل هم المحل.. بس انا شوفت حاجه مش عارف افسرها
_ حاجه اي؟
_ المرايا اللي في المحل دي.. المرايا دي غريبة انا شوفت فيها حاجات ومش عارف ده اي
_ انت بتقول اي وشوفت اي دي مرايا يعني هتشوف فيها اي غير نفسك!
_ لا مشوفتش نفسي شوفتك انت.. انت وبتتحصر علي موت ابنك وشوفت ست مرعبة بتدبح 3 ستات
انا مش فاهم حاجه يا ابو نواف مش فاهم حاجه
...
الراجل وشه اتخطف وبان عليه الخوف والذعر من كلامي.. وقلي انه عايز دلوقتي يروح المحل ويشوف المرايا ورغم انه طلب غريب شوية وافقت
واتحركنا علي المحل.. طول الطريق وابو نواف شايل الهم وبيفكر في حاجه مش فاهمها
وبمجرد ما وصلنا المحل.. دخل جوه وبدأ يكسر في المرايا ويصرخ.. صوت صرخاته لم الناس عليا وافتكروا في معايا مشكله
لكن انا خرجت الناس بره.. واخدته وخرجنا بره المحل ركبنا عربيته وهو بيعيط زي الاطفال
وبسأله في اي؟.. مش بيجاوب ومش بيقول غير ابني
موتوا ابني!
مش فاهم حاجه ولا مين اللي موت ابنه والله
وصلته الفندق بعد ما هدي شوية ورجعت البيت.. مش شايف قدامي عايز انام وارتاح.. رميت جسمي علي السرير ونمت.. نمت بعمق
وصحيت بس اي ده أنا مش في اوضتي.. انا في مكان اشبه بمستشفي.. ايديا ورجليا مربوطين في سرير
مش عارف اتحرك.. واتفتح الباب ودخل منه واحدة.. واحدة انا عارفها كويس ماسكة في ايديها منجل وقربت مني
كنت مرعوب.. وشها كان عليه غضب رهيب.. رفعت المنجل لفوق ونزلت علي رقبتي.. صحيت وانا بصرخ وماسك رقبتي
كان كابوس.. كابوس مفزع رهيب.. اعوذ بالله من الشيطان الرجيم.. اعوذ بالله من الشيطان الرجيم
الحمدلله
..
قومت وبصيت في الساعة كانت 10 الصبح.. انا محدش صحاني ليه؟
قومت وروحت علي المحل.. دخلت عشان اتصدم اكبر صدمة في حياتي.. المرايا اللي ابو نواف كسرها قدامي امبارح سليمة.. مفهاش خدش واحد
قربت من المرايا وبصيت فيها
شوفت ابو نواف ميت قدامي.. منتحر وقاطع شريينه وواقفة فوق دماغه نفس الست المرعبة
رجعت لورا.. مسكت التليفون واتصلت علي ابو نواف
المرة دي رد عليا وقلي
_ معلش يا هشام.. انا سافرت الفجر واحدة من زوجاتي تعبانة وسافرت عشان اشوفها
_ زوجاتك؟... انت متجوز كام واحدة؟
_ 4 بس في واحده ماتت فيهم.. وخدت ابني معاها خدت ابني معاها
الراجل كل ما تاجي سيرة ابنه ينهار ويبكي وانا لسه مش فاهم حاجه.. بس قلي انه هينزل بعد اسبوع
بصيت من تاني للمرايا وانا هتجنن.. ولسان حالي انتي رجعتي ازاي؟.. هو انا في كابوس انا مش فاهم اي اللي بيحصل
حاولت اتناسي وبدأت افرش المحل بمساعدة ابو نواف اللي سبلي مبلغ كويس عشان ابدأ بيه في السوق.. اقدر اقولكم ان الفلوس كانت زي الرز.. كنت محقق مكاسب كبيرة جداً
لدرجة اني نسيت ابو نواف اللي قلي نازل بعد اسبوع وقولت يمكن انشغل ومكلمتوش.. اكيد دلوقتي الكل بيقول اي قلة الاصل دي؟ صح
لكن بعد يومين صحيت علي صوت رنة تليفوني كان رقم غريب مش مصري.. رديت كان ابو نواف اللي كان بيتكلم بنبره كلها خوف وقلي
_ كان لازم يموتوا زي ابني.. كان لازم يموتوا عشان ابني
_ هما مين اللي لازم يموتوا؟
..
الخط اتقطع.. ومفيش دقيقة والتليفون رن رديت واول كلمة سمعتها كانت صدمة
_ استاذ هشام مش كده؟
_ ايوة مين؟
_ البقاء لله.. ابو نواف تعيش انت!
_ انت بتقول اي؟
_ ياريت حضرتك تركب علي الامارات من بكرة عشان انت لازم تحضر فتح الوصية ابو نواف وصي بده
..
وقفل.. مكنتش مصدق اللي سمعته لكن معايا رحلة هعرف منها كل حاجه واي حكاية ابو نواف؟
