رواية قلب مغتصب الفصل الثالث 3 بقلم ورود الخالدي

سماء:::

عبارته الاخيرة الي كالها سكتتني (( انتي خدامة والخدامة الها حدود ملازم تتجاوزها))

بقيت صافنه بوجهه لحظات وحاولت على كد ما اكدر امنع دموعي حيل اذتني كلمة خدامة رغم اني ..صار سنين اخذم ابيت خالو..وهسه اخدم ابيت خالتي..بس محد سمعني هالكلمة حتى خالتي التكرهني ومرت خالو المسمومة..الكلمة..طلعت من حلكة كولها ثقه وهذا دليل على انه ..خالتي قبل متجيبني كايلتلهم جبتلكم خدامة وخلصت اللحظات بسرعة شفته كام اخذ العصير والكيك وطلع من المطبخ...

مكدرت انام الكلمة حيل اذتني كل حرف بيها احسه طعنه بكرامتي.. وبگلبي وبروحي..والغريب انه اني حتى من راح مكدرت ابجي واهدي نفسي واعبر عن جروحي بالدموع لان البجي يريح بس مكدرت حتى ابجي وارتاح رجلي هم جانت توجعني ..دنكت لفيتها وتمددت ومدري شلون نمت واني مختنكة من اثر هالكلمة.

اني موقته منبه موبايلي ع الساعة ٧ حتى اكعد من وكت الم فراشي قبل ميكعدون يتريكون ومن دك المنبه فزيت...ردت اكوم وجعتني رجلي بس غصبا عليه كمت اعرج شويه عليها ..رغم المها خف واحسن بهوايه من البارحة لميت فراشي وكوه صعدت الدرج وخليته بالغرفة الفوك نزلت سويت جاي وحليب وطلعت جبن وقشطه ..ورتبت الريوك نزلت خاله والحجي ...وسماح هم جتي تريكت ..مبينه منايمة من البارحة لان من كعدت بس تتثاوب..تريكو وطلعت خاله والحجي..بالسيارة وسماح تريكت وبقت شويه تكلب بموبايلها وفاتت لغرفتها اكيد راح تنام منا للوحده لو الثنتين الظهر تكعد تتغدة وترجع تنام....بقيت وحدي بالمطبخ ...دك تليفوني طلعت نغم صديقتي ع الواتس متصله شلته وبقينا نسولف ع الدوام وبدايه الدوام تقريبا ثلث ساعة بعدين سدته بقيت شويه افكر مضل شي للدوام..وخالو مشترالي كم لبسه للدوام واصلا ملابسي مال العام ..عتيكات ومحببات واستحي ادوام بيهن ..اصلا مطلعتهن من الجنطه خليتهن بالغرفة الفوك ونزلت كم تراك ودشداشه جوه ابدل بيهن مصفطتهن ومخلتهن بالكاونتر جوه بكرتونه مال معجون من جابو المسواك اول يوم جيت بيه مشمرتها اخذتها صفطت بيها ملابسي وخليتها بالكاونتر جوة نزعت تراكي الجنت نايمة بيه ولبست دشداشتي المقلمة وطلعت اللحم جامد ..وخليته جوه البوري بعدين طلعت كنست الصاله ومسحت الطبلات والبلازما وبالريشه ..نفظت التحفيات ..بعدين فتت لغرفه رواء الي لحد الان مشفتها ..الغرفة نظيفه بس فتحت الشباج حتى يتبدل الهوه بيها..ورجعت للمطبخ..كلت التهي بالغدة اليوم اسوي تمن باكله على جهة ومركة سبيناغ وتمن عنبر ع جهة من البارحة الحجي كلي سويهن باجر وبديت اطبخ على كيفي ساعة 11 كملت طبخ وبقت بس الزلاطة لازم اثرمها هسه وقبل ما اثرم شفته طلع من غرفته وسمعته يدندن وهو يغسل وجهه ع المغسله الي يم الحمام وارتاحيت من حسيته بس غسل وجهه وطلع اي همزين طلع مراح يفوت للمطبخ....هو طلع منا والباب اندكت ..طلعت فتحتها..طلع ابو الغاز ..فتحتله الباب دخل اثنين قناني مليانات واخذ الفارغات .. ولان خلاهن بالباب اضطريت ادخلن وادوس على رجلي وهي توجعني...فتت ردت اثرم الزلاطة استغربت من شفت رائد رجع بسرعة وفات للمطبخ بيده باندج شمره ع الطاوله وكلي:

جبتلج باندج لفي رجلج قوي بمكان الالم..

وقبل ما ارد عليه طلع من المطبخ وراح الغرفته هم دقايق وطلع بيده ملابس فات للحمام يمكن يريد يسبح اني ..بقيت اكشر بالخيار واثرم ..بيه بعدين طلعت طماطة غسلتها ..اتذكرت الحجي يحب الخس ويه الزلاطة البارحة عجبته الزلاطة ام الخس كلت خلي اثرم خس ويه الزلاطة..طلعت خس وبينما دا اثرم ...حسيته فات للمطبخ بس مشلت راسي بقيت اثرم الى ان شمر الباندج كدامي ...

ليش مشدتيها ..لعد شكو..جبته غير تشدين رجلج بيه؟؟

 شلت راسي منتهت ع السجين ..عزااا..هذا شلون يوكف كدامي هالشكل بطرك البرموده ..عززاا بدون فانيله وشامر الخاولي ع متنه متت من المستحة وهالكد متفاجئت وارتبكت واستحيت بسرعة جرحت ايدي بالسجينه.. ومن حسيت باللام كمت بسرعة غسلت اصبعي ..طلع منه دم . رغم جوه المي بس الدم مستمر يطلع زمخ بيه

شبيج ثوله انتي ...غير تنتبهين ..

ادنه يمي لزمت اصبعي ورجعت ليوره 

مبيها شي جرح زغير..

راح جاب لاصق وكطن وكال:

هسه اني اشتغل مضمد عندج مره رجلج ومره ايدج ..شهالسخافة هاي شكد ثوله انتي؟؟

تحملت كلمته قررت ما ارد عليه ..جر ايدي نشف الدم من اصبعي وخله عليه لاصق وهم رجع حجه بنتر:

تعالي 

دنكت ما اكدر احاجيه شبيه هذا ميستحي معنده احساس واكف كدامي مصلخ بطرك البرموده..

انتي شنو طرشه ..مو دا اكول تعالي كعدي ع الكرسي..خلي اشد رجلج بالباندج؛؛

لا..لا ماكو داعي صارت زينه رجلي روح انت اني اشدها

اهوووو..

ادنه جرني وكعدني ع الكرسي ..شهالجرأة شو هذا عنده عادي يلزم ايدي ويجرني وهسه كعدني نتل ع الكرسي وكعد بالكاع ..سحب رجلي يريد يشدها شديصير عرفه ولفه وحتى اذا عرفه وولفه ..ميصير هالشكل حيل خجلت منه لا وفوكاها مصلخ وهو اصلا ضخم وعضلات يربي شهالاحراج ..مدري شبيه بس يلزمني اضل ارجف البارحة هم من لزم رجلي ما اسيطر عليه ترجف وحدها وهسه هم ..

خرررب ..بابا شبيج ..شبيج لخاطر الله تره مراح اذبحج اريد اشد رجلج ولج ثبتي ..

كوه صبرت احاول اثبتها بس وطبعا يشد بيها واحسه يدردم بداخله خلص لف وكلي:

لتفتحيها منا لباجر ترجع الاعصاب الاربطة لمكانها والعظم ياخذ قراره ويروح الالم من كيفه..

ماشي..

كمت احس رجلي احسن بس كلبي ممرتاح عبالي راح يطلع من المطبخ بس بقه كاعد ع الكرسي ..يااا غير يروح يلبس ملابسه شنو حيضل مكابلني هالشكل بس شلون قابل اكوله روح منا استحي ..كلت خلي اصبله جاي وارتبله ريوك يجوز كاعد منتظر الريوك اي خلي يتريك ويروح ..صبيت جاي وطلعت قشطه ومربه وجبن وصمون بصينيه وخليتهن كباله شو هذا بسرعة كلي:

هذا شنو؟!

ريوك غير؟

ومنو كلج اريد ريوك سمعتيني كتلج اريد اكل!

لا..بس حسيت انت جوعان كلت خلي اسويلك ريوك!!

ما اريد ريوك شيلي ومره ثانيه لتتصرفين من كيفج .. بعدين شنو هاي مال حسيت انت جوعان...تره البارحة عرفتج ..شوكت لحكتي تحسين بيه؟؟

ادنيت شلت الصينيه...وكتله:

العفو يمكن خاني التعبير اقصد فكرت انت ممتريك كلت يجوز جوعان ويريد ريوك..

كام من الكرسي ..

وكال:

شوفي لا فكرتي ولا حسيتي اني من اجوع اكول جوعان شنو قابل مستحي لو محتاج عزيمة ..

عافني وطلع .اي همزين راح ..عابت شكد حقنه ويدقق بالكلام . يعني اليحجي وياه لازم يحسب حساب لكل حرف يكوله ..هو مطلع من غرفته الى ان جوي خاله والحجي والتمو كولهم ع الغده..التهيت اصب غده واخلي كدامهم...طبعا اني ما اكعد يمهم من اول يوم خاله كالتلي من نكعد نتغده لو نتعشه لتكابلينه ع الاكل وطلعي من المطبخ ..اثناء الغده لو العشه ..وفعلا طلعت بره نظفت الممر الخارجي وبعدين فتت لكيتهم متغدين ومخلصين سويت جاي وخليت كدامهم..بس وره الغده..لمحت نظره غريبة بعيون رائد..ما اعرف شنو جانو يحجون من جنت بره بس عيون رائد جانت مغيمه حيل حزينه

رائد::: 

بس اكلت اول خاشوكة من تمن الباگله تذكرت امي .اوووف هذه اكلتي المفضله ..جانت امي تسويها مخصوص الي ..ومجنت امل منها ..وحتى اذا يزود منها تضمه الي لثاني يوم..عجيب ..نفس الطعم ..نفس..طبخ امي ..كلبي غيم واني اتذكر لمتنه ع الطاوله هاي وامي تطبخ وتصب وتكول لحد يمد ايده منا لما يخلص الحجي صلاته.. وننتظر ابويه يخلص صلاه وناكل سوه ..وماما خاشوكة بحلكها وخاشوكة بحلكي وابويه يكلها

 شنو ماعنده ادين لو طفل وتعسين بحلكة

 هي تضحك :

شعندي غيره ..وشما يكبريضل وليدي الزغير

 والبنات يغارن سماح تزعل

 ليش متوكليني بس رائد توكليه.

...ذكريات تملخ الروح ..اوف يمه مشتاقلج...بعد عمري يايمة يا ام سالفة الدافيه وگلب الحنين ..من رحتي عن هالدنيا لليوم ..مااستطعمت بلكمة ولا اتهنيت ..اليوم اول مره اكل ..هالكد وبهالشهيه ..الاكل مثل اكلج ..يمه ..احس نفسج ولمسه ايدج بكل..لكمه ..جنت احجي ويه نفسي صافن سمعت ابويه كلي:

ها ..شو ضربتلك صفنه !!

انتبهت 

ماكو ..شي يابه هيج بالي راح يم الشغل والعمال:

وليدي حتى وكت راحتك تفكر بالشغل ..شبيهم العمال قابل زعاطيط 

اروح انام ..احس نفسي مشبعان نوم ..

اي روح نام ارتاح..

رحت نمت ...ساعات طويله اي اني هالشكل كلما ارجع من البصره اخلصلي يومين ٣ نايم اعوض السهر والتعب ونقص النوم العندي...وبقيه الايام اخلصهن تمرين وطلعة ..كعدت من النوم باوعت ساعة ٦ ونص الدنيا ضلمت لان الوقت تأخر شهر التاسع انتهى وراح ندخل بالعاشر يعني بداية شته..كمت من فراشي بس فتحت الباب ...اويلي هبت ريحة اكل طيبه رحت غسلت وجهي.. وفتت للمطبخ شفتها ترتب بالاماعين كعدت ع الكرسي وبقيت اكلب بموبايلي ...

سماء::::

كملت العشه طفيت الاكل بينما جنت ارتب بالمواعين دخل للمطبخ يربي تالي شلون وياااا صدوك هذا معنده احساس ولا مستحه ..الصبح ..كعد كبالي مصلخ وهسه لابس فانيلة علاكات وهم جسمه كوله مكشوف هسه اذا ميستحي..ع الاقل يلبس ملابس بيها خير الجو شويه بارد مومال هيج لبس..يجوز هو متعود ماخذ راحته ابيت اهله بس اني حيل ضايجة من هالحاله واستحي اكوله البس ملابس من تجي للمطبخ ..فكرت هو ردوده حادة اخاف اكوله ويرد رد يضوجني خلي اسكت احسلي خلصت ترتيب المواعين باوعت الساعة بالسبعة الا ثلث بعد نص ساعة يجون خاله والحجي..من بره ..لان همه يرحون سوة ويرجعون سوه احتمال يشتغلون بنفس المول.. كلت خلي اطلع اكعد بالصاله ع ما يجون ..قبل ما اطلع سمعته كلي:

شو مصبيتلي اكل ..شعجب ..محسيتي لو مفكرتي!

هذا شبي شهالتناقض الصبح يكولي لتتصرفين من كيفج ولا تحسين ولا تفكرين وهسه يكولي ليش مصبيتلي ..شنو يعني ابرمج نفسي على مزاجة كل شويه يحجي شكل بعدين ليش ساكتتله من حقي ارد:

اكولك شبيك انت شو كل شويه تحجي شكل ..الصبح تكولي لتتصرفين من كيفج ولا تحسين ولا تفكرين..وهسه تكولي..محسيتي ..لو مفكرتي ..وليش مصبيتلي اكل ..انت شنو عندك شيزوفرينيا ..ومتستقر على كلمة!!

شو هذا شمر موبايله حيل عالطاولة وكام خفت.كلت بكلبي بس لا يضربني...لان عليت صوتي شويه..

شنو ولج شكلتي ...؟؟ منو الي عنده شيزوفرينيا...اني؟؟

كلت خلي اتشجع وارد:

اي تصرفاتك هالشكل تكول الصبح تحجي شكل وهسه تحجي شكل:

محجه باوعلي من فوك لجوه..رجع كعد كلي:

صبيلي..عشه:

صبيتله ع السريع عشه 

طلعيلي طرشي ثرمي ناعم ع السريع

طلعت طرشي ثرمت الخيار وثوم العجم وباقي الطرشي وخليته بصينيه..باوع عليه 

منو كلج تخلين ثوم؟؟

هو الثوم ويه الطرشي وانت كلت ثرمي ناعم؟؟

ما احبه الثوم لكطي من الطرشي وطلعي وحده وحدة؟؟

لا راح اثرملك غيرة ع السريع

باوع بعيوني كانما ديخطط لشي :

لا اريده هو نفسه واطلعين منه الثوم وحده وحده

رحت جبت خاشوكه ..عاف اكله واجه وكف على راسيي اخذ الخاشوكة وكال ؛

لكطيهن بأيدج!!

مديت ايدي ردت الكطهن لزم ايدي كلي :

مو بهاي ايدج ..بأيدج اليسره!

بس..بس اصبعي مجروح وبيه لزگة..

هد ايدي اليمنه ..ولزم اليسره وخر اللزكة وكلي:

يلله لكطيهن كدامي:

مديت ايدي الكط الثوم بس الطرشي مالح الجرح حيل حركني فهمت هو ليش سوه هالحركة مال الطرشي حتى يعاقبني اي حسيت الي ديسوي عقوبه ..قررت ما ابين انه ايدي..دتحركني..بقيت الكط بيهن الى ان خلصت هو بقه واكف ع راسي يراقبني..من خلصت ردت اكوم اغسل ايدي

لزم جف ايدي حيل!!

هاي وين!!

اروح اغسل ايدي طلعته الثوم كوله؟؟

وبالنسبه للمي مال الطرشي البيدج ..حرامات تغسلي ويروح بالسنك؟؟

شنو قصدك مفهمت؟؟

هسه افهمج

حيل خفت منه من جر ايدي وخله اصابعي بحلگة وسحبهن حيل بشفته ..بحيث اصبعي المجروح بسرعة طك دم بحلكة ..يمه هذا شنو يربي زومبي لو مصاص دماء ..كلبي كام يدوك ابلعومي بسرعة بجيت ..طلع اصابعي من حلكة وخله ايدي ع الطاوله بحيث الغطه مال الطاوله بسره بين بيه الدم الي يطلع من اصبعي ..وقبل ميهد ايدي كلي:

شوفي..ولج..اذا ..سمعت منج اي كلمة لا مو كلمة حرف واحد يغثني..لو نبرة صوتج تعله شويه عن الطبيعي المرة الجايه ما اخلي اصابعج بالطرشي ..لا..اخليهن بالتيزاب واتفرج عليهن شلون يحتركن ...وما اكتفي اعضهن وامص دمهن ..لا المرة الجاية اسويهن وجبة لحم مشوي..اكرطهن وابلعهن ..فهمتي!!

جنت ابجي وحيل مرعوبه منه:

اي..اي..فهمت..هدني!

هدني ورجع ياكل ..عادي حتى مغسل حلكة من الدم

طلعت من المطبخ كعدت بره ابجي وكلبي احسه ماكو من الخوف ومن هالموقف اخذت درس ..وعرفت هذا مو صاحي وعنده افكار اجرامية ويخوف ..وقررت ابد ما احجي وياه ولا احتك بيه..اباوع ع اصبعي الدم وكف بس ايدي ملطخة دم قليل ..ردت اكوم اغسله بمغسله الحمام بس خاله والحجي جوي بسرعة مسحت دموعي وكلت خلي ابين طبيعي 

هاا...شو طالعةبرة!!

نظفت الممر من ورق الشجر..بس الهوه عالي..تعبت بالخالي بلاش!!

الحجي كال:

بابا ..ياممر الجو بيه كرصة برد اكو وحدة تنظف ممرات بهالليل..

وينه البرد ..زين تسوي خليها تنظف حتى يصبح البيت نظيف؟؟

شتنظف؟! ..فوتن ..فوتن ..ميت من الجوع خلي تصبلي لكمة ..

فتنه جوه ركضت طلعت لزكة خليتها ع اصبعي وبديت اصب عشه الهم..هو بعده بالمطبخ ياكل وهمه غسلو اديهم وكعدو يمه خلصت ترتيب عشاهم طلعت كعدت بالصاله

شفته طلع من المطبخ غسل وفات لغرفته

كلت اروح احاجي خاله ع ملابس الدوام:

فتت للمطبخ بعدهم ياكلون

خاله عكب باجر ادوام ..ومحتاجة ملابس للدوام؟؟

محتاجة ملابس شنو لعد هاي الجنطة البيها طن ..الجبيتيها وياج مابيها ملابس للدوام مال العام الفات!!

فكرت كلت بس اكولها عندي ملابس مال العام اخاف متشتريلي فكتله:

لا معندي ملابس 

الحجي كال:

اخذيها باجر وياج للمول خلي تختار كم لبسه للدوام؟؟

اخذها وتختار شنو حجي....بعدين باجر..اني الصبح كوله مو بالمول اروح للنقليات اتأكد من البضاعة الكصيتها دازيها نفسها لو مغيرين بيها مثل الطلبية الفاتت دازيلي ..الوان تلعب النفس تالي كوة قبلو يبدلوهن..

منا لباجر الله كريم

وانسد موضوع الملابس عرفت هي متريدني اروح اخذ على ذوقي تريد هي تشتريلي شلون مجان...بس ثاني يوم الصبح تفاجئت خطية الحجي اجه ساعة بالتسعه كلي:

يله بتي خلي اخذج للمول تاخذين ملابس للدوام

حيل فرحت رحت وياه طبعا المول حيل ضخم اول مفتت كتله:

حجي انت تشتغل ويه خاله هنا اشوفكم ترحون سوه وترجعون سوه!

لا هي ..المول مالها وحد..واني اشتغل بمول ثاني بالفرع الثاني ملابس رجالي..بس نفتح سوة ونعزل سوة ونرجع سوه؟؟

هااا فهمت

يله فوتي اختاري اي شي يعجبج؟؟

لا..حجي..اخاف اخذ شي ويطلع غالي وخاله متقبل انت اشتريلي!!

صار

توقعت ياخذلي لبسه او لبستين ..بس اخذلي اكثر من ٤ لبسات مال دوام يخبلن..ورجع اخذلي نفانيف وجنط واحذيه كتله

 حجي هوايه صارن خاف خاله متقبل.؟

معليج ..بخالتج..تعالي فوتي لقسم الداخليات اخذي..اليكفيج واليعجبج ..

دخلت اخذت ملابس داخليه كم قطعة طلعت لكيته ماخذلي بعد دشاديش..وتراكات ..يربي صارن هوايه متأكدة هسه تصير مشكله بسبب هالكمية مال الملابس😱😱😱

الفصل الرابع من هنا 

شكرا لزيارتكم عالم روايات سكيرهوم