رواية قلب مغتصب الفصل الرابع بقلم ورود الخالدي
حنان:::
رجعت للمول ساعة ١١ بعدما كملت معاينه للطلبية واكدت حجز حتى يشحنوها الي باجر لو عكبه ..اول مدخلت للمول تلكتني خديجة طبعا خديجة اقدم عامله تشتغل بالمول وحيل تعزني وتسميني باجي :
هااا باجي الله يساعدج مبينه تعبانه.
اي والله رجليه ماتن من الوكفه هناك..
باجي هاي القائمة مال الملابس الي اخذهن الحجي اليوم!
استغربت ..الحجي ماخذ ملابس عزااا اول تالي يجي للمول ياخذ ملابس :
الحجي اجه لهنا اخذ ملابس؟؟
اي هو وهذه البنيه الحلوة بنت اختج ..!
اجه هو وسماء؟؟
ما اعرف اسمها بس كال بنت اختج!
اخذت القائمة اول مشفتها هبط كلبي عزززا العزاج حنان ..هاي شنو شكد ماخذين غراض وكل لبسه سعرها فوك ال١٠٠ الف ..هذا شبي الحجي مافكر ..من كرف هالملابس كلهن لقندرة سماء وهي جايه وياه الصلفة ...وماصدكت شافته كريم وايده فلته وكامت تجيب وتعبي اي...هدوم وجاياتها بلاش..بس شسوي قابل احاسب الحجي....لا ما اجيب طاري للحجي اخذهن منها وارجعهن بسكته..بعدني دا افكر سمعت خديجة تحجي:
باجي..تره اني ما احسد تعرفيني ..بس هاي بنت اختج شكد حلوة ..ولون عيونها غريب..تدرين بيها ملامح منج لازم كل اقاربج هيج حلوات...لان انتي حيل حلوة وبنت اختج هم تخبل!
يووووه خديجة شكد تجاملين ؟؟
لا والله باجي مو مجامله انتن حيل حلوات ..والبارحة العاملات ضلن صافنات ع بنت اختج شهالبياض..وهالجسم والنزاكة.. واكيد الملابس الي اختارهن الحجي الها راح يطلعن يخبلن عليها
اي احنا كولنا هالشكل ..هسه نضل نسولف على بنت اختي انبهي ع الزبونات مو وكت سوالف
راحت مني يمي..تكول الملابس اختارهن الحجي ..يعني موهيه مختارتهن ..هاي هم سالفه ثانيه بعد ما اكدر ارجعهن من جهة الحجي يزعل ..ومن جهة..العاملات هسه شيكولن ..عزتهن على بت اختها...اوووف قهر بس خلي ارجع للبيت اعرف شلون ابرد كلبي بيها..وما صدكت ..صار الظهر ورجعت ويه الحجي طبعا مفتحت الموضوع ويه الحجي لان اعرفه يزعل..تغديت عاديوصعدت ..خليته نام ونزلت ..لكيتها تمسح بالطاوله اووف بودي املخها تملخ ادنيت جريتها من اذنها حيل:
اخ..اخ خاله اذني!
انعل ابوج لا ابو اذنج ولج ليش ماصبرتي للعصر ..حتى اني اجيبلج سلابات للدوام
والله اني..ما الي دخل هو الحجي اخذني للمول!
وانتي ماعندج لسان ماكتيله انتظر خالتي!
مقبل والله كتله خاله متقبل كال معليج بخالتج!
اي كلج معليج...بيه وانتي ما صدكتي..كارفه ..ملابس ..اشكال والوان ..كاسره ظهري كسر وكل لبسه سعرها فوك ال١٠٠ مو هذا حلال ابوج الكلب ابن الكلب ..وتلبسين اليعجبج منه
خاله ..والله كتله ..اريد بس لبستين بسيطات هو الي اختار ..وكتله ذني هوايه كال معليج ..انتي حتى كتله رجعهن هم مقبل!
اي مصدكتج ..الخبيثه كولش مصدكتج..
دنكت على زندها عضيتها ..يمكن شلعتلي وذره لحم ما ارتاح كلبي ..هي بجت ..بت الخره وصرخت
ولج..والله الموت قليل بحقج..
لخلختها راشديات وصعدت شسوي خلي تاخذهن بس من فوخت كلبي بيها يله ارتاحيت شويه
سماء:::
والله عرفت ..مراح تمر عليه سلامات ..خالتي نزلت تتراجف عليه بودها تاكلني ..كامت تحجي وعضتني ..وضربتي ٣ راشديات حيل ..بقيت ابجي ..طلعت ايدي شفت عضتها ..حتى مكان سنونها واضح حيل وطالع منه دم دقليل والعضه عبالك عضه جلب...حيل وجعتني العضه...بس شسوي يعني ما اكدر حتى ادافع عن نفسي لو ارد عليها اخاف تطردني بالشارع
واجه الدوام فكرت شلون اداوم الكليه بعيدة وجان خالو ماجرلي خط ..وابو الخط نفسه ياخذنا كل سنه ..كلت شلون اخابره ..وانطي عنوان خاله ..بس اخاف خاله متقبل لازم اكولها بالاول..يربي اخاف اكولها اريد ااجر وتصير عصبيه ..بعدين اني هم احتاج فلوس اشتري سجلات واقلام ..وكم كتاب ..شلون بيه خالو مخلالي فلوس..من راح...فكرت اليوم من يتعشون احاجيها كدام الحجي حتى تنحرج وتقبل ومتصير عصبيه
وانتظرت يتعشون ..ومن حسن حظي مجان هذا رائد الحقنه موجود ع العشه لان صار كم يوم يروح وقت العشه مالهم للتمرين اي اشوفه يلبس رياضي وجنطته ع متنه ويروح يتمرن يرجع يسبح ويفوت للمطبخ يكولي صبيلي عشه..اصبله بسكته واصلا ما احجي وياه نهائيا اخذت حذر منه بس اذا سألني عن شي اجاوب بسرعة واطلع من يمه المهم تشجعت وكلت احجي ويه خاله مادام الحجي كاعد:
خاله باجر اول يوم اداوم!
اي وهاي الساعة المباركة وشتردين..اسويلج حفله لليله بمناسبه بداية دوامج!!
طبعا هي تصنف عليه بس الحجي ضحك:
متجوزين من سوالفج حنونه هههه تكلها حفله
خاله مو لازم اخابر ابو الخط ..حتى يندل بيتكم ويجي ياخذني!!
ابو الخط منو النوب!
ابو الخط خالو مخليلي خط لان الكليه بعيدة!
اي واني شعليه متخابري لابو الخط
مو اذا اخابره لازم باجر انطي فلوس لان هو ياخذ فلوس كل شهر مقدم
هلو..هلو..يعني تردين كل شهر فلوس خط ..فوك الملابس الزينتي راسي بيهن
قبل ما احجي الحجي كلها:
حنان كل الطالبات عدهن خطوط ..يعني شلون قابل تروح مشي..
والتفت عليه
بنيتي..خابريه اني انطيج
انته تنطيها شكو ..ترة زودتهاابو رائد ليش اطلع عينها عليه..اني ادفع خطها المصخم..بعد شتريد ..سلطانه سماء
ما اريد شي شكرا خاله بس اريد اشتري كم سجل واقلام وكم كتاب
الحجي كال:
ذني عليه اني ادزهن الج كتبيهن الي ويه قائمة المسواك وادزهن
شكرا حجي ربي يحفظك..شكرا خاله ربي يخليج
خابرت ابو الخط واتفقت وياه ونطيته العنوان ..حضرت ملابس وطبعا طبخت من الليل ونظفت مخليت اي شي نقص حتى خاله ..متضل تحجي علية ..كعدت الصبح رحت للدوام عادي رجعت لكيتهم متغدين بس لاحظت غرفة رائد مقفوله وسيارته ماكو حتى بالليل ما اجه تعشه ومن خلال ما اسمعه من الحجي انه هو يشتغل بالبصرة ومن يروح يتأخر اسبوع لو 10, ايام وحتى اسبوعين ممكن يتأخر..اي الف الحمد لله والشكر اسبوعين ما اشوف خلقته اكبر راحة نفسية..ودوام عندي وانشغل ويه صديقاتي ..هم راحة نفسية ..احبك ربي ..المهم مر 5 ايام رجعت اليوم الخامس من الدوام من دخلت للبيت تفاجئت اثنين بنات كاعدات بالصاله بس وحده منهن شكلها مثل شكل ذوله الي يسمهوهم عمش .. شعرها ابيض..كوله ورموشها بيض وعيونها زرك لا بسه نظارات طبيه .. يمكن وحده منهن رواء اي خاله كالت عايشه يم خالتها وبيبيتها تجي كل شهر مرتين 3 بس منو منهن رواء بس لا هاي البنيه..الشكلها غريب بس فتت كلت
مساء الخير
هنه ردن ..
مساء النور
وللاسف جانت هيه فعلا رواء لان ادنت يمي وكالت:
انتي سماء كرايب حنان مو؟؟
هاااا تعرفيني!
اي سماح حجتلي عنج
اي زين ..ها..تغديتي لو بعدجن ممتغديات
لا متغدينا بعدنا بابا وحنان بعدهم مجايين
لعد خاي احمي الغده حتى تتغدهن هايالبنيه بت خالتج!
اي هذه رفيف بت خالتي وياي بنفس الصف
اي زين يعني ادرسن سوه
اي ندرس سوه..
عفتهن كاعدات بالصاله وتذكرت حجي خاله ..من كالت لا تصادقين رواء وتخليها تتعلق بيج لان تريدها تضل يم خالتها وبيبتها..بس البنيه مبينه حيل حبابه وخطيه شكلها يكسر الخاطر..صح بيضه ثلج وشعرها هم ابيض بس همه ذوله الي بيهم متلازمة الالبينو شكلهم مدري ليش يكسر الخاطر
بقت البنيه هي وبت خالتها يومين ..وراحت ومرت الايام عاديه ومرت ٤ ايام..فزيت بالليل ع الضوة بعيوني ..وشفته راح فتح الثلاجة اخذ فاكهة ومي..كلت بنفسي اهووو هذا اجه ..لا هله ولا مرحبه راح تشتغل المغثة مالته..ثاني يوم جان عادي رحت للدوام ورجعت..كلت خلي اغسل الملابس الظهرلان العصر اسوي عشه والوقت الباقي هم يله الحك اقره واسوي اكل لثاني يوم واحضر ملابسي حتى انام من وكت..غسلت ملابسي وملابس سماح سوة وبعدين غسلت ملابس الحجي وخاله ..وبالاخير السله الي بيها ملابس هذا الي ميتسمه ..طبعا السله مليانه..ملابس اكيد مجمعهن مال ١٠ ايام بديت افصل البديات عن البنطرونات الكابوي عن القمصان شلت البنطرونان وكع منهن زنجيل مفتوح بس مبين ذهب. كلت يجوز وياه مدالية لان مفتوح خلي ادور الجيوب ..مديت ايدي حسيت اكو فلوس طلعتهن ياااا ذني ورقتين يعني٢٠٠ دولار شنو هذا ميفرغ جيوبه ..لو ناسيهن هسه اني شعليه يجوز ناسيهن خلي اضمهن ومن اشوفه انطيهن اله فكرت اخاف بعد اكو اشياء بملابسه..دورت لكيت كارت مال شركة بيه ارقام موبايلات ..رجعت دورت القمصان لكيت واحد بيه١٥ الف..والثاني بيه ٥ الاف..يااا هذا شبيه شو فلوسه هنا وهنا گبر شكد اثول.. لا وفوكاها يكولي ثوله هسه منو الاثول هو لو اني ..
العصر جنت اسوي عشه شفته فات للحمام يسبح ..طبعا طول النهار هو نايم حتى غده متغده ..بس ميبطل هالطبع طلع من الحمام لابس بس سروال البدي بايده والخاولي ع متنه ..وكعد ع الكرسي..كلي
صبيلي اكل
حيل ضوجني من كاعد بدون بدي يعني ميفكر اني انحرج منه قررت اكوله اي ليش اسكت لازم يلبس ملابس ويبطل يدخل عليه للمطبخ هالشكل بس شلون ابدي يعني يربي استحي منه واخاف منه وتذكرت غراضة وفلوسه وقبل ما اصب غده طلعتهن خليتهن كباله ..
هذه الاغراض لكيتهن بملابسك..لازم تفرغ ملابسك قبل متخليهن بالسلات..
باوع عليهن بعدين باوع بعيوني كلي:
وشنو صارت عليج زحمه من طلعتيهن ..عادي نسيتهن بواحد من بناطيري !
لا مو بواحد كل حاجة لكيتها بقطعه ملابس شكل قسم بالبنطرونات وقسم بالقمصان واضح انه انت متنتبه ..ودائما تنسى اغراضك وفلوسك!!
هاااا...ما انتبه يعني اثول مو؟؟
لا العفو مكلت اثول بس اكو هوايه شغلات انته متنتبه عليها؟؟
هوايه شغلات..يعني جمع..موشغله وحده..وشنو هالشغلات بله!
يعني ..مثلا انت تطلع من الحمام مصلخ ..وتجي تكعد بالمطبخ تاكل هالشكل شتشوف هذا الشي صحيح يعني!!
اهااا يعني انتي معتبره هاي شغله اني ممنتبه عليها..لا اشو منتبه ..شنو شفتيني طالع من الحمام ملاصي ..متشوفيني لبست سروال وطلعت يعني منتبه ع نفسي مو طالع بدون وعي
خليت الصينيه يمه وكتله:
واذا منتبه انت تشوف هالشي صح!
بسرعة وكف وجرني من ايدي انلطخت بجسمه ورجعت ليوره
وبصوت حاد كلي:
اي ..هذا بيتي وكل تصرف ..اتصرفه ابيتي اعتبره صح..لج شنو مشكلتج انتي وشعليج بيه..اطلع مصلخ لو لابس!
جان لازم رسغ ايدي حيل وصوته خشن وحاد ..فكتله:
مو..مو انت تطلع هالشكل..واني استحي..و...و انحرج..والله حيل انحرج
بثواني تبدلت ملامحه وشفت مثل الابتسامه جوه عيونه
راد يحجي كتله:
اي وبعد اني..اني اسمي سماء..يعني لتصيحلي لج..حباب!
بقه لازم ايدي وبنبره صوت مختلفه كلي:
هااا...تستحين..وتنحرجين..ومتردين اكلج ..لج..واسمج سماء..واني حباب🧐🧐
اي
هد ايدي وكال:
ماشي ست سماء!
راح لبس البدي وكعد كلي:
هسه تمام ست سماء!!!؟؟؟؟
اي شكرا
اكل وطلع من المطبخ من طلع ارتاحيت اي همزين كتله حتى يحسب حساب يلبس ملابس كاملة كدامي ..والحمد لله مصار عصبي ..توقعت يعصب بس معصب بالعكس جان كولش هاديء هالمرة
ثاني يوم رحت للدوام عادي ..بس بالرجعة ابو الخط ما اجه والبنات كالن سيارته عاطله وهنه قسم صعدن تكسي وقسم اتصلن باهلهن ..اجوي اخذوهن بقيت بس اني ومروه مروه كالت:
ناخذ تكسي شتكولين
يوصلج وبعدين يوصلني..
طبعا مروة ما اعرفها ..يعني علاقتي بيها بس ع كد الخط وكلت اذا نصعد تكسي اكيد لازم نتقاسم الكروة واني معندي ولا فلس واستحي ..فكتلها
لا مروة تسلمين اني راح اتمشه خابرت على خاله ادزلي سياره راح اتمشه لنهايه الشارع ع ما يجي سايق خاله
هااا
خليتها واكفه تأشر لتكسي واني قررت امشي مشي للبيت اي امشي كولهن كيلوين ٣ اكدر امشيهن ولاا حرج نفسي وافوت من شارع المحلات اقرب يصير..
رائد:::
كعدت ساعة ١١ تريكت شلون مجان وطلعت كلت افتر شويه وارجع تكسرت من النوم بينما دا افتر بالسوك انتبهت هاي هيه لو غيرها..اي هيه والله..تمشي بصف المحلات شنو ترجع مشي من الدوام الي اعرفه هي عدها خط ليش راجعه مشي وكليتها بعيدة زين ليش تمشي بصف المحلات كلبي لعب ..كلت خاف عدها شي لو متواعدة ويه احد تلتقي بيه وره الدوام اي ..ماكو اقوى من هالاحتمال فكرت ارقبها مشيت سلولي وراها..بس هي تمشي سريع وابد متلتفت كلت لشوكت ابقى وراها وكفت يمها وصحتها:
سمااااء
التفتت..جتي وقبل متحجي كتلها:
صعدي
فتحت الها الباب ..صعدت
طبعا بگلبي النار ..وليكدام ..فكرت ما اصدك اي عذر تكوله:
اليوم ابو الخط عطلت سيارته ورجعت مشي!!
اي خوش عذر مال عطلت السيارة!!
عذر شنو!
اي عذر مرتب؟؟
لا مو عذر فعلا ابو الخط عطلت سيارته ورجعت مشي!!
هااا ترجعين مشي ٣ كيلوات بهالظهاري وتتختلين بسد المحلات!!
اتختل بسد المحلات؟!!شنو قصدك!!
عادي ..لاتهتمين ..بس لاتجذبين حتى اذا متواعده براحتج انتي لا بت عمي ولا بت خالي واتعير بيج!!
التفتت عليه اويلي ..بسرعة بجت:
اوكف..اوكف هنا ..نزلني
انزلج؟؟
اي نزلني!!
انزلج شنو!!
صوتها طلع مكسر من كالت
نزلني هنا خلي اروح للي مواعدته مو تكول عادي!!
استفزتني بسرعة وكفت على جهة وزمخت بيها!
عندج تفسير ثاني الدنيا ظهروتمشين بصف المحلات فسريلي غير تفسير مقنع!!
معندي تفسير غير الحقيقة السايق ما اجه لان عطلان ورجعت مشي!!
والسايقها عطلان ..ماكو تكسي تصعد بيه وترجع للبيت .. كل هالمسافه مشي..!!
مسحت خدها وكالت :
البنات كولهن اخذن تكسيات وراحن لاهلهن
وانتي ليش مخذتي تكسي ست سماء!
لان..لان..معندي فلوس..معندي كروة ارجع بيها فرجعت مشي!!
حيل صدمتني من كالت معندي فلوس :
شنو معندج فلوس..وليش تصرفين كل فلوسج اثناء الدوام متفكرين يصير عندج هيج ظرف؟؟
اصلا معندي فلوس اصرفهن بالدوام!!
شنو معندج فلوس يعني خالتج التحفه متنطيج مصرف للدوام!!
لا متنطيني اصلا بالكوة قبلت ..تدفع للخط
خرررب لج تحجين صدك ترحين للدوام ولا فلس بجيبج !
مو مشكله هي سنه وحده تخلص شلون مجان!
خرررب غيرتج حنان ياكلبه بت الكلب!!
لتغلط على جدو!
هاااا مقلبتي على جدو!!
اي ليش تغلط عليه جدو ميت؟؟
حيل انغثيت عليها وكسرت خاطري مديت ايدي بجيبي طلعت فلوس خمسنات ما اعرف شكد ومديت ايدي :
هاج خلي ذني عندج ومن يخلصن كوليلي
ممدت ايدها بسرعة كالت:
شنو ذني!!
مصرف الج للدوام
اشكرك..
تشكريني شنو لج اخذيهن!!
اعتذر..ما اكدر اخذ منك شي!!
ليش شبيه اني اجكجك؟؟
لا بس انت شخص غريب عليه ..لا اخويه ولا ابويه ولا من اقاربي على گولتك لابت عمك ولا بت خالك اني
هااا شخص غريب..زين انتي مو تشتغلين ابيتنا..واطبخيلي اكل طيب ..اخذيهن عاد بمكان تعبج وبمكان اكلج الطيب!
اهووو هم بجت:
رائد ..اني..اني مو خدامة عدكم حتى تنطيني فلوس لو اقبض فلوس بمكان تعبي..وحتى اذا خاله مفهمتكم اني خدامة انت ممسؤول عني هي الي جابتني وهي المسؤوله عن مصرفي مو انت..
هي تحجي وتبجي واني ..موكف السيارة ع صفحة الرصيف ..ومعندي شغل وعمل صافن عليها ..متونس ع صوت بجيها خشمها صار احمر وخدودها وردي من البجي والعيون قصيدة شعر وحدهن ..والشعر مثل الليل
متحملت مديت ايدي وره ظهرها ودنيتها يمي هي خافت وجفلت
رائد ..ايدك!!
خليني احجي شبيح ادورين فگريات ..ولج هاي المباديء وسوالف الكرامة ..متوكل خبز بهالايام معندج فلوس ..وخالتج متنطيج..واجتج فلوس ع البارد اخذيهن ..
كوه حجت احسها ماتت من الخوف من جريتها يمي:
آخذهن..آخذهن ..شنو!!
اي ..ياثوله ..اخذيهن مني..وشغلي عقلج ..فكري شلون تقطيني مرة ثانية!!
اقطك..شنو!!
اي ..لو وحدة غيرج ذكية..تاخذهن مني ..بابتسامة..وتكولي هاا اكلي طيب عجبك..بيك خير وادلل چنك على اكل يوميه اطبخلك اشكال والوان..
ياااا
اي....شبيج متعجبة اخذيهن وسكتي
جريتها يمي اكثر ردت افتح ايدهاواخلي بيهن الفلوس بس هي حيل خايفه مني ..سدت اصابعها بكل قوتها وكالت:
ايدك..وخرها عني رائد..ما اريد شي..احنا بالشارع تره..اختنكت اني
كسرت خاطري هديتها..شسويلها متقبل..تاخذهن شمرتهن ع الدشبول..
بكيفج
رادت تفتح الباب زمخت بيها:
ايدج عن الباب
دست بانزين ومشيت سريع ..بصراحة..حيل غثتني..بس ما اكدر اجبرها تاخذ مني شي
شكرا لزيارتكم عالم روايات سكيرهوم
