رواية شيخ البصره الفصل الرابع بقلم مجهول
انه الشيخ ضرغام
عمري ٣٤ سنه اخذت الشيخه من والدي الله يرحمة
علمني اصول الشيخه من انه صغير كنت احضر وياه بالدواوين و كعدات العشاير
واكتسبت منه الخبره.
اني كنت متزوج من بنت عمي اخذتها لخاطر ابوي يعني لا حب ولا شي
بس لانه هي بنت عمي وجانت خوش مره ومعدله
شالتني بالصلوات وبعمرها ماقصرت وياي..
اجاني منها بنيتي رقيه عمرها ٧ سنوات وبعدين الله رزقني بعلاوي عمره ٥ سنوات.
بعدها اتمرضت مرتي ام علي و اتوفت الله يرحمها ..
جانت ايام صعبة عليه لأن مهما يكون هاي زوجتي وام اولادي .. واشوف علاوي ورقية شكد جانو متعلقين بأمهم.
مرت سنه على فاجعتي بوفاة زوجتي و انصدمت بفاجعة ثانية الي هي وفاة اخوي الصغير مرتضى
بحادث ابغداد جانت عنده شغله هناك و بالرجعة صار الحادث..
سوينا كعدة وية اهل الولد الي سوه الحادث وكتل اخوي و جنت ناوي الشر وياهم واسوي الدم للركب
رحنا لبيت اهل الولد الي كتل اخوي جان ابوه رجال جبير بس مبين مثقف ومبينين عائلة راقية
واحنا واكفين بالكراج مالتهم وفجأه طخت بيه بنية
بس شنو من بنية
تكول ملاك مو مره و وياها ولد شاب
عرفت بعدين انو هاي بنتهم و هذا خطيبها وكلت خلص مادام عدهم بنية الا احرك كلبهم عليها مثل ماحركو كلبي على اخوي وخاصة هي الصغيره والصغير يصير مدلل مثل اخوي مرتضى الله يرحمه..
حاول ابوها ينطينا فصل فلوس بس انه مارضيت الا فصلية و هذا خطيبها المخنث كلساع يكوم يهوبز و انه اسكته لحد ما الاب استسلم و وافق ناخذ بنته..
انطيناهم مدة اسبوعين وناخذها . بيومها نزلت لابسه عباة وشال حرامات جان عبالي ارزلها على اللبس بس طلعت متستره
وابوها ذبها و بقى يتوسل بيه انو ادير بالي عليها
كتله الله كريم و عفته ودخلت
جبت السيد عقدلنا و من طلع السيد وانه داخل للبيت شفت رقية كاعده اباب المطبخ وتبجي
رحت عليها..
شبيج بوية ياهو وياج؟ ليش تبجين؟
رقية:- يابه صدك تزوجت؟
ضرغام:- اي بوية تزوجت .
رقية:- يعني جبتلنا مرت اب و ام جديده بدل امي ؟؟؟ حتى تاخذ مكانها؟؟ وتاخذك من عدنا...
ضرغام:- بوية انه ماجبتلج ام جديده و امج مستحيل احد ياخذ مكانها.. وانه محد ياخذني منكم ولا ياخذكم مني
انه ماعندي بهالدنيا غيرج انتي واخوج
انتو روحي من الدنيا... لاتفكرين بهالافكار لأن غلط ..وبنيتي الشيخه الحبابه ماتفكر بالغلط صح؟
رقية:- يعني ماتعوفنا ؟
ضرغام:- اعوف روحي ومااعوفكم.
رقية ابتسمت بوجه ابوها واطمئنت
ضرغام:- انقهرت على رقيه بعدها طفله وانحرمت من امها وتخاف لاتنحرم مني هماتين بستها من راسها ودخلنا للبيت.
واول مادخلت سألت على علاوي كالو يم عروستك فوك.. انه صفنت عليهم وحجيت بكلبي يا عروستي؟
صعدت فوك ولكيت علاوي كاعد بصفها ويضحكون ويسولفون
كتله انزل جوه... حتى احجي ويه الطركاعه الي جبتها على كلبي
حجيتلها حجايتين سميت بدنها بيهن
بس فاجئني ردها..طلع عدها لسان وتحجي وتوكف بوجهي ..وهي تحجي وانه صافن على عيونها كلها تحدي
بصراحه تعصبت لأن متعود من انه وصغير ماكو بنية او مره توكف بوجهي
تجي هاي بكد ام الفلسين تواجه وتحجي؟
جريتها من شعرها رزلتها وشمرتها عالجرباية
بس طلعت من الغرفه مفور
على يا اساس توكف بوجهي ..بسيطة الا اراويج نجوم الظهر.
نزلت جوه وشفت الحجية واختي سهاد و رقية نايمه بحضن جدتها ..
ضرغام:- اسمعو كلكم هاي الطركاعه الفوك من باجر تنزل تساعدكم بشغل البيت و تداري رقية وعلاوي و امي وهي الممنونه
وحسكم اسمعكم تكولون مرتك لو عروستك
هاي ماتصيرلي مره فهمتو؟؟؟
كلهم كالو امرك.. بس حسيت عيون والدتي بيهن حجي
كلت لسهاد كومي اخذي رقيه وصعدو اكل للطركاعه الفوك
سهاد:-امرك يا خويه بس لاتصير عصبي.
راحت سهاد واخذت رقية وانه كعدت يم والدتي الحجيه.
الحجيه:- شبيك يا يمه تره البنية حليوه ومبين حبابة وخوش مره .
ضرغام:- يمه لخاطر العباس لاتجيبيلي طاريها
اساساً كل مااعاين لوجهها اتذكر اخوها و دمي يفور .. مو زين ما صكعتها بكتله .
الحجيه:- استغفر ربك يا وليدي حرام هاذ الحجي
البنت مالها ذنب و كل الصار قضاء وقدر
وبعدين تعال هنا ليش الي مات بس اخوك؟؟؟ ليش هو مو بزري و المدلل مالتنا؟؟ بس انت الفكدت؟ انه هم فكدت قطعه من كلبي
بس انه انسانه مؤمنه بقضاء الله وقدره سبحانه
والبنت مالها ذنب وحرام علينا نظلمها ..
ضرغام:- يمه والي يسلمج سدي موضوعها تراني كوه كاض نفسي وما كاتلها.
انه طالع للديوان محتاجه شي.
الحجيه:- الله يهديك يا وليدي .
ضرغام:- طلعت واحس روحي مخنوك .
ماكو غير اخوي و صديق دربي الي يواسيني ويخفف عني.
اتصلت بعمران ابن عمي واجاني للديوان
عمران:- ها يا ولد عمي شبيك شايل هموم الدنيا على جتافك.
ضرغام:- اووووف يا عمران ليش هي ظلت مصيبه ما صارت وياي ..حتى لو جبل هم جان انهد.
عمران:- لا لا لا ما ظنتي الشيخ ضرغام بهالسهوله يتعب ويستسلم.
ضرغام:- والله ياابن عمي الدنيا ما دترحمني بس مااكولن غير الله كريم هو الي يجازي صبري وتعبي.
عمران:- ونعم بالله.
وضلينا كاعدين بالديوان وناس رايحه وناس داخله وماحسينا غير الساعه ١١ بليل.
عمران:- يلا شيخنا انه اترخص هم ارجع للبيت.
ضرغام:- الله وياك خويي سلملنا على عمي .
فعمران :- الله يسلمك..يلا في امان الله.
ضرغام:- في امان الله.
دخلت للبيت كلها نايمه
وانه تعبان من طريق بغداد والكعده بالديوان رحت شفت علاوي ورقية نايمين ..بست راسهم ودخلت نمت بغرفتي .
بلسم:- كعدت الصبح باوعت اني وين؟؟
نسيت انو اني مو ابيتنا و هذا بيت جديد راح اعيش بي باقي حياتي خدامه مثل ماكال ضرغام.
رحت سبحت ولبست تراك اسود ونزلت
اباوع عليهم كلهم يباوعون
الحجية:- بلسم يمه هاي شلابسه بنيتي ؟
بلسم:- لابسة تراكسود خالة.
الحجية:-احنا ماعدنا وحده تلبس هيج بنيتي ماعندج دشداشة سوده ؟
بلسم:- لا خاله اني ماعندي دشاديش.
بهالاثناء دخل ضرغام وعينه صارت بكصته من العصبية.
ضرغام:- هاي شنو شلابسه انتي؟ شعدنا ملهى؟ ماتعرفين ولد عايشين وياج بنفس البيت؟
بلسم:- تره ملابسه شي عيب هو تراكسود وماعندي دشاديش لان مالبس غير التراكسودات ابيتنا.
ضرغام:- اصعدي البسي عباتج بسرعه وتعاليلي للسياره يلا بسرعه (زمخ بيها).
بلسم :- صعدت فوك لبست عبايتي وشالي ونزلت لكيته منتظرني بالسياره
رحت وصعدت ليورة وجان يعيط علية.
ضرغام:- لازم انه السايق مال حضرة جنابج صاعدتلي ليورة تعالي هنا لا انزل اسحلج من شالج هذا الي ملافته عدل.
بلسم:- نزلت بسرعه وكعدت يمه ليكدام .
ضرغام:- البسي شالج عدل لا اكص راسج.
بلسم:- لبست شالي عدل بس اريده يسكت صوته كلش عالي ويفزز.
اخذني لسوك يمهم بالبصره و وكف السياره .
ضرغام:- ماتنزلين شمنتظره افتحلج باب السياره؟
بلسم نزلت واني اعصاب من وراه وترني بس يعيط وماعاجبه شي.
مشينا شوية عن السياره ودخلنا محل صغير مال دشاديش وكلبيات وعبايات و جانت اكو مرية جبيره الي دتبيع
بس واحنا نمشي كلساع يجي واحد يسلم على ضرغام عبالك مدري منو فايت للسوك.
فتنا للمحل واستقبلته المرية الجبيره
وجابتله كرسي تكول عبالك جاي عليهم وزير مو شيخ.
ضرغام:- حجيه نريد كم قطعه من عندج بس اريدهن كلهن سود لأن بعدها ٤٠ اخوي الله يرحمه ماطالعه.
المرية:- انت تأمرني شيخنا كله كدامك موجود.
على غفله باوع عليه وخزرني عود يعني فضيني واختاري .
افتريت بالمحل واختاريت دشداشتين سودة جان يكول اخذي بعد فد ٥ قطع خوما تكضينها بدشداشتين .
اختاريت ٣ دشاديش بعد و اخذت كلابيتين حلوات بس هم سوده احتراماً لوفاة اخوه.
ضرغام :-بعد ممحتاجه شي ثاني؟
بلسم:-لا .
ضرغام اتحاسب وية المرية وبالكوة اخذت الفلوس خطية وهي اساساً مبينة حالتها موزينه بس شكد مبينين اهل كرم ونفس طيبه.
رجعنا للبيت وهو طول الطريق ساكت ويتأفأف زهكني.
دخلت للبيت وشفت نفس المره الي اول مااجيت جانت كارهتني ومطايقه تباوع بوجهي واكفه ومتخصره وتباوع عليه من فوك ليجوه.
رجاء:- اي عمي فصلية وكاعده تفرفر بالسياره وتتسوك والله بنات بغداد مو سهلات تربية سكط.
بلسم :- صرت عصبية ردت اردها بس سبقتني خالتي الحجية.
الحجية:- ولج رجاء اذا مااحترمتي نفسج والبيت الي داخلتله تره تشوفين شي مني ما يسرج
ف صمي حلكج واسكتي.
تعالي بنيتي بلسم ماعليج بيها شوفيني شأخذتي.
بلسم:- اباوع على رجاء وجهها صار احمر من الفشلة .حيل. واباوع عالحجية يا الله شكد خوش مره هاي رب العالمين دازها الي نعمه.
رحت عليها واجتي يمها سهاد هم وكعدت اراويهم شنو اخذت و كلولي بالعافية.
صعدت بدلت ولبست دشداشة صح عريضه بس حلوه عليه ولفيت الشال ونزلت
جان يصير ضرغام كبالي وشفته يباوع من فوك ليجوه ما يعجبه العجب عافني ودخل لغرفته.
اني هم مادرت بال ونزلت كعدت يم الحجية جان تكلي كومي ويه سهاد واتعلمي الشغل منها لأن مااعرف اسوي اي شي .
وكمت وياها انتبه عليها شلون تشتغل واتعلم منها.
مر اليوم وصارت دنيا ليل واني هلكت من التعب هاي شلون هيج يشتغلون هلكد
اباوع على سهاد بعدها بحيلها ولا عبالك دتشتغل
متعوده .
استأذنت من الحجية وكلتلها اروح ارتاح شوية
صعدت مددت وغفيت من التعب وماحسيت الا ثاني يوم الصبح.
شكرا لزيارتكم عالم روايات سكيرهوم
