رواية قلب مغتصب الفصل الخامس بقلم ورود الخالدي
رائد:::
وصلت للبيت فتت لغرفتي ...والحقيقة بعدني ضايج عليها ..رغم ..اكره خالتها كره العمى وبودي انتقم منها بأي طريقة ..والمفروض اي شي من طرف حنان ميثير عندي اي تعاطف ..بس متحملت خطية راجعة مشي كل هالمسافة معدها خمس الاف ترجع بيهن بتكسي ..شابه تخبل ..چنها قطعه من الجنة ..متحمله تخدم وتنظف..وتطبخ عد ناس غربة حتى بس تكمل دوام اويلي شكد الدنيا صعبه عليها..اصلا صفنتني ..المفروض معدها فلوس ومحتاجه ..ع الاقل تقبل تاخذ مني حتى تسد حاجتها وتصرف على نفسها ورغم حاولت اقنعها واضغط عليها بس مقبلت ..ومستحيل انسه ذيج اللحظات من جريتها جوه ايدي وحاولت افتح ايدها..ابد ما انسه ملامحها ..ولا اصابعها الي سدتهن بقوة حتى ما افتح ايدها واخلي بيها فلوس..زين هي هيج طبيعتها لو هذا فلم حتى تبينلي انه هي كرامتها غاليه عليها وعزة نفسها فوك كلشي ..وتذكرت من لكت فلوس بجيوبي لمتهن ورجعتهن اصلا اني ناسيهن وما ادري بيهن ..جان ممكن تاخذهن بدون ما احس..وياهن زنجيل ذهب ...هم جان ممكن تاخذه واذا اسألها تكولي ما اعرف عنه شي او ملاكيته ..بس هي رجعتهن هذا دليل ع الامانه والاخلاق الحلوة العدها..تعجبني المرة التتصرف هالشكل ومتغريها الفلوس..اجتني فكرة ثانيه كلبي بعدة يلعب اكول اخاف تمثل عليه الامانه هم ويمكن اذا تشوف فلوس هوايه يتغير كولشي وتنسى الامانه وعزة النفس والكرامة ..خلي اجرب اختبرها مخسران شي..
بنفس اليوم..طلعت من غرفتي لكيتها تمسح بالطبلات مال الصاله كلت اي خوش فرصه ..
اكول اشوفج تنظفين وتلمعين المطبخ وكل الغرف شنو غرفتي ممشموله بالتنظيف؟؟!!
التفتت عليه:
لا ..بس خاله كالت غرفتك دائما مقفوله ..انت تقفلها ما اعرف بصمة لو كارت ..يعني انت متقبل احد يفوت الها..
اي صح ما اقبل بس اذا احد ينظفها اكيف!
مو خاف خاله متقبل!
اكولج شو انتي ادورين حجج مرة انته قافلها ومرة خاله متقبل خو كولي ما اريد انظف غرفتك!!
لا..العغو ..بس خاله هي الي حذرتني وكالت غرفة رائد خط احمر!!
من سمعتها كالت هالشكل عرفت هي كلامها صح لان اعرف حنان بيش تفكر..مو خوفا على غرفتي..بس ابالها هوايه امور
يمعودة خالتج وره المغرب يله تجي ..هنه عشر دقايق تنظفيها واطلعين واني اصلا راح ابدل واطلع انطيج الكارت فتحي الباب نظفيها واطلعي ..ميرادلها روحة للقاضي
ماشي
فتت بدلت ..وتعمدت اعوف القاصة مالتي مفتوحة بيها هواية فلوس ...وتغري اي واحد ياخذ منهن ..وطبعا غرفتي والبيت كوله كاميرات رابطهن ع موبايلي و الكل يعرف اكو كاميرات مخفيه بس هي ما اعتقد تعرف ..اصلا حتى المطبخ بيه كاميرات يعني نظام16 كاميرا..مخفيه اني مخليهن لان معظم الوقت البيت فارغ بس سماح تنام بغرفتها ومتدري بالدنيا شيصير بيها..بدلت وطلعت ونطيتها الكارت ..وصعدت سيارتي مشيت مسافة ووكفت شغلت التصوير مال غرفتي ..شفتها تنظف ..وجنت منتظر اللحظة الي تشوف بيها القاصه وانتبهت هي شافتها مفتوحة واكيد شافت الفلوس مصفطه وجنت منتظر تمد ايدها ..بس بطلة طلعت ممدت ايدها اصلا سدتها ولمعتها وعافتها ..وبقت تلمع بالاخشاب اني اراقبها لمت الملابس وطلعتهن ورجعت عدلت الجربايه ..بس من خلصت طخت بالكومدي وكعن الغراض....خررب..خرررب وكعت صوره امي الي مخليها ع الكومدي ..ويمكن انكسرت جامتها اي والله انكسرت شفتها تباوع عليها ..ودنكت تلم بالكزار..يله عادي طخت بيها ووكعت من ارجع ابدل جامتها..ردت اسد الكاميرا استغربت توقعت ترجع الصوره لمكانها ..بس مرجعتها اخذتها وطلعت..وسدت الباب..هاي ليش اخذت صورة امي عادي خو تكلي وكعت بالغلط اذا شفتها مكسوره ليش اخذتها وياها صار عندي فضول كلت يمكن اخذتها ومن ارجع تعتذر مني وترجعها الي..للغرفة ..طفيت الكاميرات من موبايلي وطلعت رحت للقاعة تمرنت ورجعت بالليل فتت للمطبخ لكيتها تقره ..كتلها جوعان ..
صبتلي اكل منتظر بأي لحظة تكولي انكسرت الصوره لو تجيبها وتجيني ..بس من ردت اطلع من المطبخ انطتني الكارت ومجابت طاري للصورة...صار فضولي اكثر..شلون راح تتصرف ..ولشوكت راح تبقى صوره امي عدها..رجعت لغرفتي..واكيد مفتقد صورة امي ..بس ..قررت انتظر..
سماء:::
يربي هسه شسوي لازم اصلحها الجامة ..وارجعها باجر صوره امه مخليها يمه ع الكومدي واكيد يومية يشوفها..يربي محد يفوت لغرفته واكيد راح يجي يسالني عنها واذا عرف اني كسرتها يجوز يتعصب.. واخاف يضربني لان مره عليت صوتي كلب الدنيا ..هالنوب صورة امه شيخلصني منه ..بس ماعندي فلوس شلون ابدل الجامه اكيد يبدلوها بفلوس ضليت افكر..منين اجيب بعدين تذكرت البنات حيل عجبتهن احذيتي والجنط مالتي اي الحجي اخذلي ٣ جنط ابيع وحده منهن واصلحها..فعلا رحت للدوام ثاني يوم كلت للبنات عندي جنطة اريد ابيعها لان ممتناسقه ويه لبساتي...طبعا سعرها غالي بس اني بعتها ب٢٥ الف شسوي مضطرة ابيعها محتاجة فلوس..ضربت المحاضرة الاخيرة رحت بسرعة دورت محل مال تصليح واخيرا لكيت ..كتله بسرعة بدلي الجامة لان اريد ارجع للكليه طبعا الولد بسرعة بدلها..واخذ مني ب5 الاف..انقهرت لان بعت الجنطة الحلوة ع مود ال5 الاف بس يله قابل عندي حل ثاني
رجعت للبيت لازمة كلبي بيدي بس لا يفتقد وجود الصورة ويسالني عنها....بس الحمد لله مسالني ..انتظرت خاله والحجي الى ان طلعو واعرف هو يكعد العصر يبدل ويروح للتمرين بس شلون افوت لغرفته ارجعها ..اذا الكارت عنده بينما دا افكر شفته مخلي جنطته ع متنه يريد يطلع ركضت وراه كتله:
رائد..انطيني الكارت اكمل تنظيف غرفتك البارحة ملحكت انظفها زين
فرحت ..من انطاني الكارت..اخذته ورحت فتحت الغرفة باوعت هو طلع ..فتت للمطبخ فتحت الكاونتر طلعت الصورة ورجعت لغرفته بس خليتها ع الكومدي التفتت لكيته وراي فزيت كلي:
شبيج فزيتي!!
هااا فاجئتني والله!
وين جانت صورة امي!
الصورة..اقصد الصورة جانت..جانت!!
اي..وين جانت؟؟
اوكف فدوة لتصير عصبي ..بس خلي افهمك؟؟
كعد ع طرف الجربايه جر ايدي..كعدني كباله
يله فهميني !
شوف اهده شويه واني احجي!!
ولج احجي شفتيني لازملج سجينه..
البارحة من نظفت..وكعت الصورة وانكسرت!
كسرتي صورة امي؟!!
والله..والله وروح بابا وماما...ممتقصدة طخيت بيها ووكعت بعدين اني اخذتها وصلحتها فدوة لتصير عصبي!!
اخذتيها وصلحتيها و ع اساس ترجعيها بدون ما اعرف..مو!!
اي
ليش؟؟
لان اعرف صورة امك عزيزة عليك ..اني يتيمه مثلك ومحتفظة بصورة ماما وبابا بجنطتي ..يوميه اشوفهن قبل ما انام ..فكلت اكيد..تتعصب وخفت ..منك اخاف تضربني
رقت ملامحه من حجيت طبعا اني من خوفي بعدلي شويه وابجي ..شفته رفع ايده غمضت كلت هاي هيه حيضربني ..بس هو خله ايده ع خدي وكال بصوت ناصي:
خفتي لا اضربج....سماء
اي والله
ابتسمت عيونه..وكلي :
هيج اني ..قاسي وماعندي رحمه بنظرج ؟!
سكتت استحيت هو وخر ايده وكام جاب الصورة يباوع عليها وكلي:
موتكولين ماعندج ولا فلس شلون صلحتيها؟؟
بصراحة بعت جنطتي ع صديقاتي .. وصلحتها..
من كتله بعت جنطتي تخبل..خله الصورة ع الفراش وكلي بصوت يخوف:
لج انتي مخبلة ..بعتي جنطتج شنو ..شلون بعتيها ع صديقاتج مو عيب تبيعين اغراضج انتي مخبلة ....مخبلة
مجان عندي فلوس والله وكلتلهن لونها ميعجبني وبعتها..
وباجر شنو راح تبيعين من تحتاجين شي والمن راح تبيعين ..!!
شنو قصدك؟؟
قصدي..معروف ..سماء..معروف..لج مو انطيتج فلوس كتلج اخذي مني مصرف؟؟
ما اكدر اخذ منك والله
ليش ..ليش احنا ابيت واحد..وانتي من الصبح لليل تشتغلين ابيتنا..
كتلك اني..مو خدامة
يابه مو خدامة ..مو خدامة..اخذي من خالتج كوليلها؟؟
ممحتاجة شي والله..
اليوم ممحتاجة باجر تحتاجين لاي ظرف ولاي شغله افرضي صديقاتج عزمنج ورادن تعزميهن لو دخلتي كافتريا لو احتاجيتي شي لو جعتي لج مو جنت طالب مثلج جيبي مليان فلوس.
انت مو مثلي ..انت رجال تشتغل من زمان وعندك اهل صرفو عليك الى ان تخرجت عندك اب الله يخلي الك ..اني معندي لا اب ولا ام ولا حتى اخ لو اخت بس خاله ..وخاله كوه جارعتني ابيتها..ليش تقارني بيك..اني ...متأقلمة ويه حياتي وراح اصبر هالسنه الى ان تخلص ويدز عليه خالو ياخذني هناك اشتغل ..وحتى خالو ما احتاجة ويجوز استقل بنفسي..و..
ومنا لما تتخرجين لازم تضلين لافلس ولا عانه مو؟؟
عادي متعودة
شفته مكدر يرد
دنك ع صورة امه انطانياها!!
هاج هاي صورة امي ما اريدها هالشكل..اريد جامتها نفسها!!
جامتها نفسها شنو!!
جامتها الي نكسرت
منين اجيبها انكسرت بعد!
ما اعرف اخذيها ورجعيها الي بجامتها الاصلية
مترجع بعد انت تطلب مني جامتها الاصليه ..يعني طلب تعجيزي !!
يعني تعرفين اكو شي تعجيزي بالدنيا..واذا تعرفين اكو اشياء تعجيزيه ..لازم تفكرين انه الدنيا مرات تعجزنا وتكسر كلشي حلو بحياتنا مثل اهلنا وناسنا ويرحون للابد وبعد ميرجعون ..بس الله ميخلينا وحدنا ومينسانا يدزلنا ناس توكف بظهرنا وتساعدنا لو يهيءالنا الظروف حتى نعيش
مفهمت..!!
سماء ..اني لا ابوج ولا اخوج..ولا ابن عمج ولا ابن خالج شخص غريب..مثل مكلتي ..بس انتي وياي ابيتي عايشه..اكل من ايدج لكمة طيبة وتغسلين ملابسي وتكويهن..وتنظفين غرفتي ..مدا اكول انتي خدامتي ولو كلمة خدامة مبيها شي شغله شريفه ..بس غيرتي متسمحلي اخليج محتاجه شي اصلا من البارحة لليوم افكر شلون انطيج مصرف او اقنعج تاخذيه
حسيت نفسي كاسرة خاطرة ..متتحملت فدمعت:
كسرت خاطرك اني ..مو؟؟
خررررب سماء لخاطر الله ...لخاطر الله كافي ولتبجين لاكاسرة خاطري ولا بطيخ اخذي مصرف مني خلي ارتاح
ليش؟؟
بدون ليش اخذي مني حتى بالي يرتاح من ناحيتج!
عندي مصرف بقى عندي٢٠ الف
بسرعة طلع فلوس من جيبه وخلاهن بيدي ..كلي ٢٠ الف ميكفن اخذي مني ..صرفي ودخلي كافتريا وعزمي صديقاتج..صرفي بدون وجع كلب واني كلما اروح وارجع من البصرة الج مصرف مني....
ياااا.
اي سماء اخذي مني ولتصورين اني ادفع بدون مقابل!!
خفت ..من كال مقابل ..فكري راح بعيد كتله:
مفهمت
المقابل يوميه تسويل تمن باگلة
تمن باگلة؟؟؟
اي والله اكلتي المفضلة
ابتسمت..
صدوك تحجي!!
اي اشتري منج الماعون ب٥٠ الف تمام
ههههههه
باوعت هوايه فلوس خلاهن بايدي
بس ..رائد هوايه فلوس هذه ما احتاج هالكد والله
شكد بيدج!!
حسبتهن ٦خمسينات يعني٣٠٠ الف
٣٠٠
يعني مال٦ مواعين تمن باگلة
لا ..جديات اخذ بس خمسين
عصر الفلوس بايدي
ولج اخذينهن قطيني كلما اجي لبغداد لتصيرين غبية
كال عبارته الاخيرة وياها ابتسامه اول مرة اشوفه يبتسم بوجهي استحيت ودنكت ..اضطريت اخذهن ..طلعت من غرفته
حنان ::
كاعدين دنتعشه كولنا ودك موبايل الحجي..برقم اخووشفته كيف
هاا شوكت يوصلون للعراق..وسكت انوب رد حجه
اكيد نجي كولنا هو اني منتظر جيتهم حتى نلتم كولنا ابيت ابو سامي..وسده
الحمد لله والشكر ابو سعد باجر يوصل من الهند
هااا خلص علاج
اي باجر يوصلون ينزلون بمطار اربيل ..حضري نفسج انتي وسماح وانت هم فرغ نفسك باجر طالعين الصبح!
يابه معندي شي ..اكيد اروح اذا متصلو بيه العمال اليوم باجر رايح وياكم
كلبي انقبض من كال باجر اروح..وياكم ..شلون قهر اذا راح وتلتم عمامه يضلن بنات عمه المشلتحات يفترن عليه واني اموت من القهر ..لو نسوان عمامه كل شويه يسالنه شوكت نفرح بيك وشوكت تعرس واخاف ابو يفتح وياه الموضوع ويخطبله وحده منهن ..فكلت :
حجي روح انت وحدك استقبل اخوك تره اني عندي شغل قوي هالاسبوع وسمعته ..رائد هم عنده شغل يجوز يتصلون عليه شيجيبه من اربيل للبصرة
حنونه ..هذا ياشغل هو الشغل يخلص ....شو يخلص العمروالشغل ميخلص ..يمعودة نروحلنه اسبوع ١٠,ايام نغيرجو بعدين شوفه عينج بين شهر وشهر ابوسامي يخاير ..ويكول مابيكم جيه ومابيكم جيه صار فوك السنه ممجمعين ابيت اخويه ابو سامي
رائد هم كال لابو
اي يابه فعلا عمي ابو سامي يزعل وابو سعد هم جاي من سفره علاج شيخلصنه من لسانه لازم نروح كولنا..وع كولتك نغير جو اسبوع لو١٠ ايام
اي هذا الحجي العدل
رائد:::::
اي متريد نروح اعرف شلون تفكر هالصاقطة تخاف اروح والتقي ابنات عمي ..الف مرة كتلها فكي عني ياخة ..معليج بيه ..مجلبه بت الكلب لاتعرف حلال وحرام ولا شرع ...كاتلة روحها احبك ما احبك لا وتريد تنهزم وياي چمالة....بسطتها كم مرة هنتها هددتها اكل للحجي ميفيد شنو من مخ براسها ..تحبني القذرة متدري بيه اتمنى اكطع لحم من جثتها واكله هالكد ما اكرهها..بس مبينه مثل البزونه تحب خناكها..لوما اخاف على ابويه لينجلط من الصدمة جان حجيتله كلشي وخليته يطلكها ويطردها بس خاف اكله مرتك تكلي خلي ننهزم ..اني وياك ويروح ينجلط من القهر..
اكيد ينجلط مرته وابنه صدمة ميتحملها ..هسه اني لو منطيها مجال لو كلمة لينه جان كلت حقها شابه واني فتحت الها مجال بس بحياتي ممنطيها ريك حلو وتدري بيه اكرهها كره الصنم..بعد شكو مجلبه نسوان عقولهن فارغة..
ثاني يوم كعدنا من وكت حتى نسافر..طبعا راح نروح بسيارتي لان اكبر من سيارة ابويه فكرت ابويه يكعد يمي بالصدر وهي وسماح وسماء يكعدن بالكشن الورة بس من صعدنا شفت سماء ماكو وهي سدت الباب كلت:
شنو سماء متجي..؟؟
هي..جاوبت :
تكول عندي امتحانات شهريه متكدر تجي..
شنوتضل وحدها بالبيت؟؟
وشكو عليها قابل ياكلها الطنطل ..
اضطريت احرك ..مردت ابين اني مهتم هوايه بموضوعها هاي حنان عوبه وتغار واذا طوخت بالاسئله راح تخليها ابالها وتسود عيشتها وهي مناقصة فكرت اوصل اربيل وهناك يصير خير
وفعلا وصلنا لاربيل واستقبلنا عمي بالمطار ..باوعت الساعة ١٢ ونص الظهر كعدنا ابيت عمي سامي نتغدة فكرت شلون الكه حجه ارجع بيها البغداد ..بالي ضل هناك بودي بس اروح اطش السؤال بوجهها واكولها ليش مقبلتي تجين حتى اذا اكو امتحانات جان اخذتي اجازةواجلتيهن ليش تبقين وحدج بالبيت شنو السبب..واجتني فكرة وقتت المنبه مال جهاز بعد ربع ساعة حتى من يدك ع اساس مكالمة من البصرة وفعلا دك وع اساس فتحت خط وشلته:
الوو..هلا..فرحان
وسكتت
هاي شنو شوكت ..طبت الغذائية مو ع اساس بعد ٥ ايام
وسكتت
يمعود وين اجي اني باربيل يم عمامي..دبرها انت..اهووو كتلك ما اكدر اجي اليوم وصلت لاربيل تريدني اجي من اربيل للبصرة تحجي صدك ..
وسكتت ع اساس ديشرحلي
ماشي ..امري لله
التفتت على ابويه وعمي ابؤ سامي:
يابه مضطر ارجع للبصرة؟؟
لك يابصره وين تلحك ..الساعة ب١٢ ونص يرادلك نهار كامل يله توصل؟؟
يابه السيارات محملة وحاجزيهن بالسيطرة مال البصرة الا يجي المالك يطلعهن
خليهن محجوزات شنو يعني؟؟
والسواق يابه..هم يضلون وياهن خطيه الجو بارد وعدهم عوائل
بس متلحك؟؟
عادي اوصل بالعشره ..بالليل احسن مايضلن محجوزات للصبح؟؟
بكيفك يابه بس مو تستعجل وتسوق سرعه
ماشي
سلمت على عمامي ورجعت لبغداد طبعا الطريق من اربيل لبغداد خمس..ساعات اله شويه..وصلت للبيت الساعة بالسته مدكيت الباب فتت... وصلت لباب الصاله دفعت الباب منفتحت يمكن قافلتها ..عندي مفاتيح طلعتهن فتحت القفل دفعته منفتح..هاي شنو ليش مينفتح ..دكيت حيل باب الصاله ..سمعت صوتها
منو!!
اني رائد؟؟
تأخرت يله فتحت الباب من انفتحت شفتها مدنيه التخم والطبلات كتلها هاي شنو؟؟
اني خليت التخم والطبلات وره الباب ؟؟
ليش يعني؟؟
حتى متنفتح!!
غير مقفوله شلون تنفتح؟
مو اني وحدي واخاف كلت اقفلها واخلي وراها اغراض حتى متندفع
واذا تخافين ..ليش مقبلتي تسافرين ويانه؟؟
مو اني الي مقبلت خاله مقبلت كالت ابقي بالبيت كتلها اخاف كالت طبج مرض!!.. بس انت ..ليش اجيت؟!!
شكرا لزيارتكم عالم روايات سكيرهوم
