رواية شيخ البصره الفصل الخامس بقلم مجهول
كعدت ساعه ٦ ونص لأن نايمة من وكت واساساً متعودة على كعدة الصبح من اروح للدوام..
بدلت ملابسي ولبست دشداشة وشمرت شال على راسي ونزلت
شفت الكل نايم بس اني كاعده
بقيت افتر بالبيت وطلعت للحديقه مالتهم كلها خضار و ورد وهوى الصبح يرد الروح
بقيت تقريباً ربع ساعه بره و دخلت واول مادخلت شفت الحجيه طلعت من غرفتها..
بلسم :- صباح الخير خالتي.
الحجية:- صبحج الله بالنور بنيتي شو كاعده من الصبح خيرج؟
بلسم:- نمت البارحة من وكت و متعودة على كعدة الصبح للدوام.
بهالاثناء طلعت سهاد و بنتها مروة
سهاد :- صبحكم الله بالخير .
الحجية:- صبحج الله بالنور.
اي بنيتي وين چنا نحجي؟
اي اي انتي وين چنتي اداومين؟
بلسم:- اني طالبة طبية مرحلة رابعة ونزلت راسي بحزن لأن تذكرت مستقبلي وشهادتي الي تركتها والله اعلم راح ارجع اخذها لو راح ابقى سجينة هنا.
سهاد:- ها چا كلش زين عليج العباس ماتعرفين تقرين هالمكموعه مريوة شالعه كلبي بالدراسة .
ماادري شوكت تعوفها ويجي نصيبها واخلص من همها.
مروه:- هاااا يمه شنو كاعده على كلبج ؟؟ لو ابوي عايش جان ماخلاج تحجين هيج.
بلسم:- انقهرت على مروه
اي عادي ادرسها لأن حرامات تعوف الدراسة علمود الزواج البنية شهادتها سلاحها
تاخذ الشهادة ولاحكة عالزواج.
مروه باوعتلي بفرحه واني ابتسمت بوجهها.
سهاد:- لا يمه شبي الزواج؟؟ اشو انه بس بلغت تزوجت وكونت عائلة . واحنا هنا عدنا البنت بس تبلغ تتزوج وتروح يم رجلها.
واحنا مندمجين بالنقاش فجأة سمعنا صوت ضرغام.
ضرغام:- هذا الحجي على ايامنا قبل لكن هسه اتغير كلشي وصار لازم بنياتنا يكملون دراستهم ويحصلون شهايدهم.
مروة:- فدوه رحتلك خالي بس انت عالراس وباسته من راسه.
سهاد:- ولج يالمكموعه بس انت عالراس مو ؟؟ شقصدج وانه شنو بالمداس؟؟
ضحكنا كلنا
مروه:- لايمه حشاج ينكص لساني اذا كلت هالكلام
انتي وخالي و عشيرتي كلها عالراس صدك جذب سهوده انه شعندي غيرج؟ احبل اجيب؟
سهاد وهي تضرب مروه على راسها:- كومي ام لسان
لسانج شطوله كومي حضري جنطتج وكعدي رقية وياج يلا وراكم مدارس.
مروه:- حاضر يمه .
ضرغام:- ها يمه شنو اليوم ماكو ريوك؟
الحجية:- لا يمه هسه سهاد و بلسم يكومون ...يلا بنياتي كومن سوون الريوك.
ضرغام:- مروه كعدي خالج فلاح وياج عدنا شغله بالناصرية لازم نطلعلها من وكت.
مروه من بعيد:- اي خالي حاضر.
نزلو الجهال ولابسين ملابس المدرسة وشايلين جنطهم اكلو و راح ضرغام يوصلهم لمدارسهم.
وراها نزل فلاح يصير اخو ضرغام الوسطاني
عمره ٢٩ سنة خاطب بنت خاله اسمها بثينة .
فلاح :- صباح الخير يمه. وباس راس امه.
الحجية:- صبحك الله بالخير وليدي تعال اكعد اتريك هسه اخوك يرد راح يودي البنات للمدرسة
فلاح باوع علية :- شلونج اخيتي؟ ان شاء الله مرتاحه؟
بلسم :- الحمدلله بخير الله يسلمك.
فلاح :- يمه جان زوجتيني وحده مثل مرت اخوي شوفي شحلاها چنها حورية خوما مثل بثينة چنها ميت طالع من الكبر بكفاله.وخربان ضحك.
الحجية:- ولك انت يمتى تستعدل شبيها بنت اخوي هااا؟ تهبل چنها العافية.بس الله ينطي الجوز للماعنده سنون.
وفلاح يضحك واني اضحك على ضحكته
شكد حبابين اهله لعد هو شبي روحه ٢٤ ساعه بخشمه و اعصاب نار. (احجي ويه نفسي)
ضرغام:- دخلت للبيت ولكيت الخاتونه واكفة والضحكة شاكه حلجها ويه اخوي وانه اريدها من الله اشوف عليها الزله .
شبيج واكفه جنج فزاعه و بس تتمضحكين؟ استحي شويه كولي هالبيت طالع منه ميت مصارله شهر
فلاح:- شبيك ياخوي انه الي دااضحك وبعدين ياهو هاي الفزاعه؟ چا اذا كل الفزاعات هيج اروح اكابل بستان خالك واكعد يم الفزاعات الحاطهن ههههههههههههه.
ضرغام:- ردت اكسر سنون فلاح وسنونها فرحانه ديتغزلون بيها
زمخت بيها :- روحي جيبيلي عباتي من غرفتي يلا وكافي مياعه.
راحت وفلاح بعده يضحك خزرته وحصر الضحكة وكمل الريوك .
اجت جابتلي عباتي ولج انتي صمخة ؟ انه كتلج عباتي السوده وين جايبتلي البيضه شصخم بيها؟؟؟
بلسم:- وكفت كباله وكتله تره انت ماحددت يالون تريد شلون اعرف انت تريد السوده ؟؟ اشتم كفه ايدي لو عندي الحاسة السادسة؟
ضرغام لزمتها من ايدها وعصرتها حيل:- ولج عليمن تعلين صوتج وتراددين؟ انتي مو مال عيني واغاتي شو دتعالي
سحلتها سحل من ايدها وصعدتها بالغرفه وضربتها كف فريت راسها.
بس صلفة مانزلت ولا دمعه.
بلسم:- وكفت على حيلي وكتله :- ها ما شبعت مااشتفى غليلك ؟ يلا اضرب بعد اضرب وطلع قهرك بيه .. وخليها ابالك لو تضرب وتهين منا لنهاية حياتي
بعمري مااسمحلك تكسرني .
ضرغام:- ولج كم مره كتلج لا تراددين واستري على نفسج بس الظاهر متعوده ماتمشين الا بالضرب .ورحت جريت شعرها.
بلسم وهي تباوعله بتحدي:- انت غلطان بعمري محد ضاربني وماد ايده عليه لأن اني مو حيوانه لا يمك ولا يم اي احد ثاني .
هي ترده و هو يزيد بعصبيته واذيته الها .
ضرغام:- خنكتها ودفعتها عالحايط ولج لا تراددين ولج والله ماارحمج .
بلسم:- ضرغام خنكني وماحسيت على شي بعد حسيت مثل الستاره نزلت على عيوني وصار كلشي اظلم.
ضرغام :- فقدت اعصابي و خنكتها ووجهها صار احمر وشفايفها زركه لحد ماوعيت على نفسي انه شجاي اسوي ابتعدت عنها وهي وكعت مغمى عليها.
شلتها من الكاع چنها جثة و حطيتها عالفراش شفت منظرها يقهر و ركبتها بيها طبع اصابع ايدي وهي مثل الطير المجروح
فقدت اعصابي و ضربت ايدي بالحايط ماحسيت على نفسي..
نزلت جوه على سهاد لكيتهم واكفين يم الدرج ويخافون يصعدون
ضرغام:- سهاد اخذي مي وصعدي عليها تخربطت.
سهاد:- يمه يا ستار ياربي.
وراحت ركض جابت مي و صعدتلها
وامي كاعده بالمطبخ وروحها تلوب.
الحجية:- ولك يمه شمالك تسودنت .. شسويت للبنية احجي؟
ضرغام :- يمه لسانها طويل وعيونها وكحه وتتحداني وانه كلشي ولا مره تحط راسها براسي والله اكسر راسها وراس الخلفها..
اباوع على ايدي بدت تصير زركه و تورمت.
فلاح :- ضرغام شوف ايدك كوم خلي اوديك للمستشفى اكيد بيها كسر .
الحجية:- يممممه كسر ؟؟ كوم وليدي كوم لخاطري واستهدي بالرحمن .
ضرغام:- لا اله الا الله .
اخذني فلاح للمستشفى سوولي اشعه وطلع كسر بكف ايدي جبسوها الي و طلعنا بوجهنا للناصرية . وانه الطريق كله افكر ابلسم
كعدت لو بعدها مغمى عليها؟ زين شلون اروح للبيت اخاف تحتاج مستشفى
بعدين حسيت على نفسي وطبها طب عساها بالموت انه المره الي ترادد مااعبرها بقندرة.
وصلنا للناصرية لبيت الشيخ حسن جانت عدهم طلابه بس طول الكعده وانه بالي مو يمهم
بالي يم الي صار اليوم وكل شوي استغفر .
خلصنا طلابتنا و ردنا نرجع بس الشيخ حسن مارضى خصوصاً الدنيا عتمت والطريق خطر .
قررنا نبات يمه.
كلهم نامو بالليل وانه ضليت كاعد عيني ماتاخذ النوم..انه ليش افكر بيها ؟ وليش هيج فقدت اعصابي وياها ؟
استغفرت الله وكمت صليت صلاة الليل عسى يهدى بالي وانام.
بلسم:- فتحت عيني واشوف سهاد والبنات و علاوي كاعدين يمي..
سهاد:- ها حبيبة كعدتي ؟؟ شلونج ؟؟ شنو يأذيج؟
بلسم:- كمت كعدت كتلها ركبتي توجعني وراسي راح ينفجر.
سهاد :- هسه راح اسويلج شوربه اكليها و انطيج مسكن.
بلسم:- مااريد مااشتهي.
سهاد:- لا تشتهين ولا زم تاكلين .
اباوع على رقية تباوعلي من بعيد كلتلها
انتي رقية؟؟؟
رقية:- اي انه رقية.
بلسم :- ابتسمت بوجهها و كلتلها تكدرين تساعديني اريد اروح للحمام.
خطية رأساً اجتي و لزمت ايدي واني ابتسمتلها وهي ابتسمتلي .
دخلت للحمام غسلت وجهي واباوع ركبتي كلها زركه انقهرت على وضعي و نزلت دمعتي الي جنت حابستها واني اتصنع القوه.
بجيت لحد ما تعبت جان اسمع رقية دكت باب الحمام.
رقية:- خاله انتي زينه؟ بيج شي؟
كمت مسحت دموعي وفتحت الباب وابتسمتلها
بلسم:- اي حبيبتي اني زينه .
رجعت لزمتني و رجعنا للغرفه تمددت على الفراش لأن الدوخه دمرتني .
علي:- خاله ابوية ليش هيج سوه بيج؟
رقية:- ولك علاوي عيب .
بلسم :- لا حبيبي اني وكعت ابوك ماسوالي شي.
علي:- لا انه سمعت ابوية يعيط ويصيح.
سهاد فاتت شايله صينيه:- انه كم مره كلت محد يحشر روحه بشغلات الكبار.
علي:- عمه اريد الف اروح اشتري .
سهاد :- ماكو الف وبس يجي ابوك اكله على سوالفك.
علي:- اهووو قابل انه شحجيت .
بلسم:-هههههههههههه تعال حبيبي اني انطيك فلوس واشتري لرقية و مروه وياك.
علي:- هييييي شكراً خاله وباسني من خدي و طلع .
وانتبهت على رقية تباوع عليه ومبتسمة.
سهاد:- هاج حبيبة اريدج تكملين الشوربة كلها حتى انطيج مسكن.
بلسم :- عاشت ايدج ام مروه تعبتج.
سهاد :- هني ومري.
ولجن اشو بعدجن كاعدات روحن ادرسن مو عدجن واجبات.
مروة :- يمه كملت واجباتي بس بقه الرياضيات شكد مااحاول افتهمه دماغي قافل .
بلسم:- روحي جيبي كتابج اني ادرسج.
سهاد :- لا حبيبة انتي تعبانه شحالج.
بلسم:- لا مابيه شي جيبي كتابج خلي التهي بالدراسة احسن.
كملت اكلي و شربت مسكن وكعدنا ندرس اني و مروة وفهمتها على المسائل الرياضية والحمدلله افتهمت.
كملنا واباوع رقية واكفة بالباب وشايله كتاب انكليزي حسيتها تريدني اساعدها بس مستحيه.
بلسم:- تعالي حبيبتي رقية تريدين اساعدج؟
رقية:- لا ممحتاجة مساعده بس دااشوف مروة كملت لو بعدها.
مروة:- اي كملت يلا امشينا لغرفتنا.
بلسم:- رقية بعدها ممتعوده عليه واحسها خايفه وحقها ما الومها .
صارت ساعه ب١٢ تعبت ونمت .
كعدت ثاني يوم الصبح خطيه سهاد ماخلتني اساعدها بالريوك بس ماشفت لا ضرغام ولا فلاح يمكن مموجودين بالبيت...
بعدني ممكملة حجايتي ودخلو ثنينهم للبيت اباوع ضرغام ايده مجبسه
صارت عيني بعينه عفتهم وصعدت فوك .
ضرغام اول مادخلنا للبيت شفتها كاعده يم امي بس عيونها مورمه وركبتها زركه .. اول ماشافتني صعدت فوك.
الحجيه:- هلا يمه الحمدلله على سلامتكم.
ضرغام:- الله يسلمج حجيه .
شلون صارت ايدك وليدي؟
ضرغام:- زينه مابيها شي كسر خفيف .
الحجية:-الله يهديك يا يمه ويبعد عنك الشيطان لأن العصبية الزايده هاذ شيطان يخليك ماتحس على نفسك وتصرفاتك يا وليدي.
ضرغام:- والله يمه العصبية دومها مرافكتني هذا طبعي . طالع على ابوي الله يرحمه.
الحجية :- الف رحمه على روحه ابوك صح عصبي بس مايفقد مثلك .
دخل علاوي:- هلا يابه .وباسني من راسي.
ضرغام:- هلا وليدي ها حافظت على البيت بغيابي .
علي:- اي يابه انه رجال البيت بغيابك ماخليت احد محتاج شي حتى مروة ورقيه رحت اشتريتلهن .
ضرغام:- هههههههههههه عفيه بوليدي السبع .
بلسم:- صعدت فوك مااكدر اباوع بوجهه اكرهه .
ورة كم ساعه اجوي البنات من المدرسة و مروة فرحانة ماخذه درجة عالية بالرياضيات ..
مروة :- يممممه شوفي درجتي بالرياضيات.
سهاد:- ايييي الف الحمدلله ان شاء الله دوم تطلعين درجات عالية وافرح بنجاحج بحق الحسين وال البيت.
فلاح:- ها منج من الشيطان طول عمرج ثوله منين جبتي هالشطاره؟؟؟
مروة :- اني شاطرة بس مدرساتي هنه ثولات مايعرفن يفهمن
بس من درستني مرت خالي البارحة رأساً افتهمت وجبت درجة عالية.
ضرغام:- اسمع مروة تحجي وتكول انو بلسم مدرستها واكول يلا همزين كدرنا نستفاد منها بشغله.
بلسم نزلت واجتي مروة عليه فرحانه و باستني خطية كلش فرحت من شفتها هيج. واباوع ضرغام كاعد وعينه علية .
عفته ورحت للمطبخ ساعدت سهاد بالغده صبينا و اتغدينا ..
ورة الغده جان تفوت علينا رجاء الحية.
رجاء :- السلام عليكم .
الكل:- وعليكم السلام.
ضرغام:- هلا رجاء شلونج وشلونه عمي؟
رجاء بأبتسامة:- كلنا بخير مدامك بخير ابن عمي.
اباوع عليها هاي شبيها ماعت من حجه وياها ضرغام ..
جان تندار عليه وتباوع من فوك ليجوة بنظرة استهزاء عفتها ورحت للمطبخ دااصب چاي..
جان تجي وراية:- يااااا خطية شصاير بحالج ياهو هيج باسطج؟ هههههههههههه
بلسم:- استغفر الله العظيم.
رجاء:- ها ولج يالفصلية جنج ماعاجبج كلامي .
بلسم:- لا ماعاجبني لأن هذا شي مايخصج كافي تحشرين خشمج الطويل بأشياء خاصة.
رجاء:- لا فوكاها لسانها اطول منها الفصلية الصايعة الضايعة ام البناطير الحصر.
سهاد دخلت وسمعت حجيها:- رجاء شهالحجي مو عيب عود انتي الجبيرة الفاهمة كم مرة الحجية كالتلج معليج بالبنية.
رجاء :- يا بنية هاي ؟ ولج هاي توديكم للبحر وترجعكم عطشانين.
بلسم:- شلون راح اسحلها من شعرها. احجي وية نفسي.
سهاد:- رجاء اذا ماتفكين ياخه من البنية تره اروح اكله لضرغام وهو يعرف يتصرف وياج .
رجاء:- لا لا عيني كلشي ولا تغثين ابن عمي الغالي خلص لخاطره راح اسكت.
بلسم:- اباوع عليها هاي شكد ماتستحي عمه بعينها.
راحت رجاء كعدت يمهم بالصالة واني حجيت ويه سهاد.
بلسم :- اكلج سهاد هاي منيه وليش هيج تتصرف؟
سهاد :- هاي بنت عمي رجاء تصير اخت المرحومة ام علاوي زوجة ضرغام.
ومن وفاة اختها لحد هسه كاتله روحها تريد ضرغام ياخذها بحجة هي تربي رقية وعلاوي
بس ضرغام معتبرها مثل اخته .
بلسم:- هااا هسه افتهمت شبيها هيج حاقده عليه... خلي تاخذه بالعافيه عليها.
سهاد:- شهالحجي بلسم اكو وحده عاقل هيج تحجي على رجلها؟؟ وبعدين هذا اخوية مااقبل هيج تحجين عليه.
بلسم:- اني اسفه مو قصدي لاتزعلين مني.
سهاد ضحكت :- لا حبيبة ماازعل منج الله شاهد اول ماشفتج وانتي دخلتي كلبي وحسيتج حالج حال مروة بنيتي.
بلسم :- ههههههههه هاي شنو سهاد تره انتي بعدج صغيره ليش هيج مكبره نفسج.
سهاد:- الضيم الي كبرني ياحبيبة اووووف من يوم ماتزوجت واني بنت ١٤ وماارتاحيت لا بزواج ولا بغيره
هاهية الحمدلله على كل حال. وطلعت سهاد من المطبخ.
بلسم :- انقهرت عليها احسها صدك شايله هموم الدنيا على راسها.
دخل ضرغام للمطبخ وشافني واكفه دااصب جاي سوه نفسه دياخذ كلاص من يمي واتقرب عليه
اني لا ارادياً وخرت من يمه وباوعت عليه
وهو عينه صارت على ركبتي.
اتقرب وكال
ضرغام:- شلون صارت ركبتج؟ بعدها تأذيج؟
بلسم بحدية:- كلشي مابيه ما دتأذيني.
ضرغام:- الحمدلله . عافني وراح
واني افكر شنو هالرجال ساعه اعصاب ساعه حنين و طيب والله راح يخبلني.
اخذت الجاي و قدمته الهم وهو ياخذ الاستكان وعينه بعيني
انطيتهم الجاي وصعدت لغرفتي اريد ارتاح .
شكرا لزيارتكم عالم روايات سكيرهوم
