رواية قلب مغتصب الفصل السادس بقلم ورود الخالدي
سماء::::
سألته كتله:
وانت ليش جيت!!؟
هااا ليش جيت..تردين اكلج الصدك لو اجذب عليج؟؟
الصدوك طبعآ
شوفي من صعدنا حتى نروح لاربيل توقعت تجين ويانا ..بس خالتج التحفة كالت مقبلت تجي عدها امتحانات.. مردت الح واطول بالاسئله بس بداخلي لعبت عندي..كلت هي تعرف راح نبقى اسبوع او١٠ ايام ليش مفكرت تاخذ اجازة ..احسن متبقى وحدها كل الفترة..بعدين ..فكرت بكل الاحتمالات واول احتمال فكرت بيه هو انتي عندج خطط ثانيه من ضلتج اهنا وحدج!!
حلكي نشف من سمعته هيج يحجي خو نظراته كلها..ايحاءات ..وتلميحات:
خطط ثانيه يعني شنو!!
يعني ...اي بنيه بعمرج مستحيل ..تضل وحدها كل هالمدة بهالبيت الجبير خصوصا وكت الليل اذا ما مأمنه راح يكون وياها ونيس!!
ونيس شنو انت منتبه ع نفسك شدتحجي!!
اي منتبه ..اني كتلچ ..تردين تسمعين مني الصدك لو اجذب عليج كلتي اريد الصدك..وهو هذا الصدك اني هيج فكرت..واكيد من فكرت هالشكل..جيت ركض اشوف شيصير ميصير ابيتي من من وره ظهري؛؛
لك..لك انت ..شدتمخرط؟؟
هذا مو تمخرط هذه الصراحة ..اني هيج فكرت :
و..و..وليش هيج فكرتك عني شبدر مني ..اشفت عليه ..حتى تفكر انه اني ممكن ادخل احد لبيتكم..او مثل مسميته ونيس ..يعني اني بنظرك بنيه موزينه..ليش شمسويه ... وماخذ عني هالفكرة!!
كافي حنان..تصير خالتج ..حتى اخذ عنج الف فكرة من هالنوع!!؟؟
واذا حنان خالتي موزينه وكل الي من طرفها موزين ليش ملفيها ابيتكم ليش ابوك اتزوجها وستر عليها وباقيه عايشه بيناتكم لهليوم؟؟
ابويه تزوجها ..وكل ظنه من تزوجها ستر عليها وتابت وانتهى الموضوع..بس حنان ..بالحقيقة لاتابت ولا ادور الستر الي تحجين عليه!!
ليش..شبيها اشفت عليها..لو لان مرت ابوك وتكرهه تشمر عليها تهم..تره حرام عليك..من تاب ..تاب الله عليه..
هيج بلحظة خطف ادنه لزم ايدي وجرني وبوجهي كال:
والي تايبه وادور ستر..وشرف تجي بكل عين وكحة تفوت على غرفة ابن رجلها الي هو محرم عليها حتى اذا رجلها مات يعني مثل حرمة الاب والاخ والابن ..لابد الابدين ..وتكوله احبك ..تعال ....ننهزم سوه...واني الك وانت الي!!!😱😱
متحملت كلامة اختنكت..كتله :
هدني..هدني:
لعبت نفسي حسيت نفسي راح اتقيأ بوجهه هالكد ما كلامة جان قذر وبشع
نتلت ايدي حيل ورحت للسنك ..حسيت روحي طلعت تقيات بالسنك ..اجه ورايه للمطبخ غسلت وجهي ..والتفتت عليه سمعته كلي:
هاااا لعبت نفسج من الحجي...مو !!
لك انت شنو من بشر شلون عندك قابليه هيج تحجي..خالتي..تحبك..شلون ..شلون حبتك اذا ما انت بادرت وفتحت الها الباب
رجع ادنه يمي راد يلزمي ادنيت ليوره
احجي..وانت بمكانك..لتمد ايدك القذرة عليه
رجع خطوتين وكال:
اني مو قذر سماء واذا انتي لعبت نفسج من الحجي وهو مموجه الج..اني حجيها وجهته الي ..وجه بوجه ..وتخيلي شنو احساسي تجاهه اخذت ابويه وموتت امي الحنينه بحسرتها تتوقعين ..اني افتح الها باب حتى تحبني ولج لو جنت انذل احقر انسان بهالدنيا ما اسويها.. واذا عندج شك مستعد اواجهج بيها....وهي الي اخليها تكولج كم مرة بسطتها كم مرة طردتها وكتلها فكي عني ..ياخة...
واذا انت هيج شريف ليش ممخلي ابوك بالصورة!!
ابويه يحبها . ..مخبل بحبها ....واذا عرف اكو شي بيني وبينها لو شم ريحة مراح يفكر هي الي ذابه نفسها عليه لا راح يفكر بالضبط مثل ما انتي هسه فكرتي راح يفكر اني الي مخليها تخونه وياي وابويه بهالعمرميتحمل هيج صدمة..اي ..هيج صدمة تقضي عليه خلاص..
باوعت بعيونه حسيت هو يحجي الحقيقة ..لان كمية الالم الي يحجي بيها واضحة من نبرة صوته :
وانت ليش باقي وياها بنفس البيت انت حالتك زينه تكدر تأجر لو تشتري بيت وتطلع ..وتخلص من هالشر..!!
سماء اعوف بيت امي وابويه الها..على جثني تتهنى ابيت امي ..ولج عبالج هي باقيه عليه..هاي ساقطة..اي شاب يكدر يقشمرها بحجايتين!!
وتذكرت عبارته من كال كافي حنان خالتج حتى افكر بيج الف فكرة من هالنوع....بسرعة تحولت افكاري وتخيلته حاسبني مثلها ..بسرعة نزلت دموعي وكتله بصوت عالي:
وانت ..هسه جاي مناك ركض ..لان مفكرني مثلها ..اي انت هسه كلت ..كافي حنان خالتج حتى اخذ عنج.. الف فكرة من هالنوع..اي انت مفكرني مثلها..مو!!
راد يدنه عليه
سماء!!!
ابقى بمكانك واسمعني رغم ميهمني ..تصدك او متصدك او افكارك تتغير او متتغير!!
مسمع كلامي ادنه لزمني من متوني دفعته واني ابجي:
كتلك لتخلي ايدك عليه وخليني احجي:
شفت نظرته تغيرت ..بيها نوع من الندم بس مهمني احساسه:
شوف ..باوع عليه زين..
مفهمت شنو باوع عليه سماء..اهدي ..اهدي لخاطر الله لتبجين!!
كتلك باوع عليه زين!!
مفهمت شتردين تكولين:
شفتني زين..حلوة اني مو!!
قبل ميجاوب كتله:
ميحتاج تحجي اني حلوة واعرف نفسي حلوة كولش واحلى من خالتي ..وازغر منها....واكدر اصير مثلها واشتغل شغلها القديم ويجوز اتزوج واحد احسن من ابوك ..واغنى من ابوك..
سماء..اسمعيني!!
خلي احجي كتلك لتقاطعني
اكدر مو...اكدر كولشي اسوي ..وممجبورة اخدم ابيت خالو ومرت خالو المسمومة تكرب عليه لو اجي هنا اشتغل طباخة وغساله ومكناسة ابيتكم ..وخالتي تضربني وتعضني ..لو انت تتامر عليه وتمارس عليه دور..جبير البيت اليخوفني ويرعبني وما اكدر اتفس ويا بحرف ادافع بيه عن نفسي..
طبعا احجي وابجي..بس اخذت نفس كلي:
كافي سماء ..اعرف والله ..اعرف شسوي كلبي لعب مو بيدي لو ادري مجاي اصلا
لا همزين اجيت وحجيتلي افكارك..
خرة على افكاري بس اهدي كافي لتبجين
وبعد شتريدني اكولك..هاا..تريدني اكولك ..شنو اكدر بعد..مثلا اكدر اكبل ويه اي شاب وياي بالكليه هاا واختار شاب زنكيل لان الزناكيل يحبون الحلوات ويصيرون كرماء وايدهم فلته ..وياهن واخلي يصرف عليه طول سنين دراستي ..اكدر لو ما كدر جاوب
وبعد اكولك شاكدرو
اختكت وكحيت التهيت بالكحة
جرني حيل وحضني وكلي:
وج كافي كافي..فهمت والله فهمت كلشي....
رجفت بحضنه كتله:
لك هدني ..لتحضني هالشكل خررب هدني ..هدني!!
ما اهدج والله منا لما تسكتين..كافي بجي..وج اني مطي..والله اكبر مطي لان شكيت بيج لحظة ..
لك هدني انت متهمني شكيت لو مشكيت!!
لا ..اهمج..كل هذا البجي والدموع والتبريرات وما اهمج ..ما اصدك..اهدي فدوة الكلبج هذا اليرجف بادية!!
رائد..وخر عني ..كتلك وخر خنكتني
اوكفي لحظة
هدني شال ايده راد يمسح خدي..استغليت الفرصة وخرت من يمه ..عفته وركضت للدرج نزلت جنطتي هو شافني شايلتها..ركض لزمني قبل ما اطلع من باب الصاله:
وين رايحة!!
اطلع من بيتكم!!
تطلعين من بيتنا..وين ترحين بهالليل!!
اي مكان بهالدنيا اكرملي..من ما ابقى هنا!!
خلص الجنطةمن ايدي وشمرها..وكلي:
خطوة وحدة متخطيها برة بيتنا
عفت الجنطة ومشيت باتجاه الباب وكف كبالي , .. وابتسم:
اموتج ..والله بس اطلعين برة
رائد انت!!
اني ميت من الجوع سويلي اكل ..
اكل!!؟؟
اي سويلي عشه ..ميت جوع وروح امي!!
ماشي اسويلك اكل بس لو انت تطلع ترجع لاربيل ..لو اني تخليني اطلع!!
دسويلي عشه ..اتعشه واروح هسه الاربيل ..!
ماشي..
رحت للمطبخ فكرت اكلي كبه وبتيته ..واسويله زلاطة يتعشه وينقلع خليت الطاوه ع الطباخ ..وهالكد ممتاثرة بكلامة دمعتي بعيني اشتغل وافكر ..بكل كلمة كالها..بحيث ترست الطاوة نص بطل الزيت وخليتها تحمه..ع العين الجبيرة وبقيت اثرم زلاطة ..بالي مشغول بكلامة..ماكو دقايق والنار اشتعلت بالطاوة عاليه هو كاعد بالصالة شاف الضوة مال النار قوي اجه ركض.. هاي شنو النار
ما ادري منتبهت الطاوة احتركت يا الله شلون تنطفي..
اهدي وخري عن الطباخ..
طبعا الطاوة تيفال بيها يدات باغة هو طفه الطباخ بس بقت النار باللدهن شالها راد يخليها بالسنك ..واني من غبائي فكرت افتح المي عليها حتى تنطفي ركضت بسرعة هو خلاها بالسنك واني فتحت المي وسمعته قبل ما افتح كلي:
لا..لا..لا هي..تطفه
بس اني اسرع ..
من فتحت المي ..بسرعة الدهن الحار انتشر وطفر على اديه وملابسه صرخ
اخ..اخ..خررب اديه..
ارتبكت:
انت احتركت..احتركت اديك رائد
اخ..متت ..متت يايابة نار اشتعلت باديه ولج ليش فتحي المي.. حركتيني؟؟
عبالي تنطفي بالمي..اسفه..والله ما ادري..
ادنيت لزمت اديه اويلي الدهن حركهن من الداخل خطية اكيد ديتوجع
هسه شسوي ..رائد شسويلهن اديك؟؟
لج روحي جيبلي اي شي من الصيدلية متت كتلني الالم!!
رحت ملكيت بس لفاف ولزكات وسبيرتو وحبوب وكبسول جبتهن كولهن:
ماكو عصارة حروق بس ذني الفها الك بلفاف..
لج يالفاف ..شلون يصير!!
لعد شسوي.
كولشي لتسوين اني رايح للمستشفى!!
شلون تسوق اديك اثنينهن متأذيات
لج معليج بيه اني ادبرها!!
لعد اروح وياك للمستشفى!!
خرررب لج معليج هسه اروح وارجع بسرعة
طلع اباوع عليه من الجامة فتح باب البيت بالكوة خطيه مبين حيل متأذي بس شلون يسوق واديه محتركات يربي شبيه ثوله مجان لازم افتح المي علي الطاوة..وهي مشتعله
رائد:::
رحت للمستشفى دخلت للطواريء ضمدولي اديه بس متت وهمه ينظفون مكان الحرك خلولي من هذه الشبكات البيهن دهن مال الحروق وانطوني كبسول التهابات وبراسيتول وضمادات الكبسول والبراسيتول خلاهن الولد بجيبي بس الضمادات ما اخذتهن ما اكد الزم العلاكة فعفتهن رغم الدكتوركلي احتمال تصخن عليهن وميصير يلامسهن المي لمده ٣ ايام والحرك يوميه يتبدل ضمادة ...كلت خلي ارجع للبيت بس بقيت كاعد شويه بحديقة المستشفى كلت الحرك بعدة يوجعني واعرف نفسي ما اتحمل خاف اعيط بيها وهي شبعت بواجي اليوم بسببي..خلي اهده ويروح الالم يله ارجع للبيت وبينما جنت كاعد شفت نورس صديقي ..طبعا احنا اربعة اصدقاء بالقاعة اني ونورس وفؤاد وصلاح من شافني اديه اثنينهن مضمدات اجه يركض:
خيرك شبيك ..ولك!!
شبيه بنص الخير متشوفني..
شبيهن اديك شنو محترك
اي احتركن اديه
شلون ..؟!
بالدهن بالمطبخ انت شتسوي بالمستشفى..؟
خالي داخل..هنا ..انت شنو جاي وحدك!!
اي والله من الم الحرك ومن حلاة روحي جيت وحدي مستعجل
جاي بتكسي مو؟
لا بسيارتي
خرب غيرتك لك شلون اجيت تسوق وانت اديك مستويه
هاي بعد صارت .. اصلا حتى العلاج عفته نصه بيه ضمادات ما اكدر الزم العلاكة.
ديله كوم اني هم طالع وهمزين جيت بتكسي ..خلي اسوق بمكانك واوصلك...والضمادات اروح اجيبهن الك اخليهن بالسيارة
ماشي
كمت وصعد ت راح جاب الضمادات ورجع يسوق بمكاني والله مهامني وجع اديه افكر شلون اوصل واراضيها ..تكلي تعشه وروح لو انت تروح لو اني اروح ..حيل اذيتها بكلامي رغم اني اعرفها ومتأكد هي شريفة وماعدها قارش وارش واصلا بداخلي مجاي وشاك بيها بالدرجة الاولى بكد ما ..مفكر شلون راح تخلص هالايام وحدها..بس اذا كلت الها ..هالشكل شنو راح تصدك لو راح ..تنسه كلامي اكيد مراح تنسه ..شبعت بجي وهي كاعده تبررلي وتشرحلي تحجي وتبجي..
بينما دا افكر خلص الطريق ..نورس نزل وفتحلي الباب ساعدني انزل لان ما اكدر الزم شي طبعا بابنا بقت مردوده فات فتح الباب السلايت ودخل السيارة كتله فوت كلي مستعجل احتمال باجر امر عليك سد الباب وراه وراح..قبل لا اوصل باب الصاله شفتها فتحتها ..عيونها مليانه قلق ..من شافتني بلهفة كالت:
هاا رائد شلونك شلون صرت بعدك تتوجع !!
من شفت لهفتها وقلقها ابتسمت بداخلي وكلت لكيتها..ماكو غيرها هي هاي الطريقة الي اخليها ..ترضة وهي الممنونه.. اخليها تحس بالذنب تجاهي ..ع ابو حركتني واني دا اتوجع بسببها..اي خوش لعبة والله واني عاد شلون شاطر بهالسوالف من جنت زغير جنت لوتي اسوي نفسي مريض حتى ما اداوم رغم ابويه يعرف سوالفي ويكول مابيه شي يجذب يريد بس يغيب من المدرسه امي الحنينه تكول ..مريض متشوفه شحاله جانت خطية بسرعة تصدك من اسوي نفسي مريض شيطان جنت من طفولتي
مرديت عليها رجعت سالتني بلهفة اكثر:
شبيك رائد شو متحجي؟؟
ولج شحجي اريد اموت من الالم نار مشتعله بأدية وبكلبي!!
سودة عليه ..كوله مني ..كوله مني والله
تعال تعال فوت جوه الهوة بارد عليك
ههههه اويلي ..تعال جوه والهوة بارد اشتغل الدلال ..وغبي اليلكة دلال وميدلل نفسه
فتت جوه ..كعدت ع التخم ..ادنت يمي
اشوف ايديك!!
سماء عوفيني لخاطر الله اكلج ميت ..ميت من الالم شتشوفين اديه مضمده ما اتحمل لمسه هوه شتشوفين..
يربي شسويلك هسه شلون يهدا الالم يعني الدكتور مكتبلك مهديء لو مسكن
مكتبلي شي انطاني بس كبسول ..وبراسيتول وكلي احتمال تصخن صخونه قويه الليلة .. وملازم الحرك يوصله مي
عزززاا تصخن اليوم..زين انت اخذت الكبسول
لا..بعده بجيبي مماخذ منه
راحت خطية تركض ومرتبكة افكر بس لا تنجبح من الارتباك جابت كلاص مي ..وكالت:
وين باي جيب مخلي العلاج..
بجيبي الايسر مال البنطرون..ادنت يمي مدت ايدها طلعت العلاج
انطيك هسه منه ..هو بعد الاكل لو قبل الاكل
شمدريني
فتحته شافت الصيدلاني كاتب بعد ..كالت :
بعد الاكل ..وانت مماكل شي اصلا رحت وانت ميت جوع
ما اريد شي خلي افوت لغرفتي انام
طبعا اني جوعان بس متعمد ادلل واكلها ما اريد حتى تلح وتكلي لازم تاكل وفعلا كالت:
شلون تنام وانت جوعان ومتأذي ومماخذ علاج هسه بسرعة اسويلك اكل؟!
اهووو كتلج ما اريد ..اني بياحال اصلا ما اكدر اكل!!
لا فدوة عليك الله اكل حتى لو شويه ع مود العلاج
ليش تلحين!
فدوة اكل ..شتحب اسويلك..
يابه سوي اي سريع حتى لو بيض وطماطة اريد انام بلكي من انام الوجع يهدأ
راحت تسوي عشه ..من جهة اكول خطية ..لهفتها وقلقها ومن جهة اضحك بداخلي احس نفسي مدلل هههه
ماكو عشر دقايق وجابت الاكل يمي..بيض وطماطة وزلاطة وخبز ..بعدين صفنت وكالت:
بس شلون راح تاكل واديك مضمدات!!
مو كتلج ما اريد انتي تلحين!!
لا..لا بسيطة اني اوكلك.
.راحت جابت كلينس وكعدت بصفي حيل قريبه تلفلي بيض وطماطة وتخلي بحلكي ويه كل لكمة تمسح حلكي بالكلينس..فعلا متونس..لا وفوكاها ويه كل لكمه اكولها كافي وهي تكولي لاعفيه كمل عشه ..وبقت تلفلي واصابعها الحلوات مرات يجن بحلكي ويه اللكمة..شهالونسه ربي..
خلصت الاكل كله جان تكولي:
والله انت بطل يله خلي انطيك العلاج
ههههه تكلي بطل عود تشجعني ..خلت الكبسوله بحلكي وشربتني مي ..وراها البراسيتوله
مسحت حلكي وشواربي..ادري بيها مستحيه..مني بس كوه عليها مقتربه مني هالكد اي اكدر احس هي شكد متوتره من نفسها العالي وكل شويه تجر حسره ..عادي خليها ..احس نفسي سلطان زماني وهي دتداريني ..وين الكه هيج فرصه وساعة الحظ متتعوض وعلى كوله المصريين هو حد لاقي دلع وميدلعش نفسو😁😁😁
اريد انام بس ريحة البيض تضوجني..شلون انظف اسناني!!
هااا..تريد تنظف اسنانك ..اجيبلك الفرچة والمعجون ..ومي هنا تنظفهن..
لا اني اكوم ع المغسله:
اي عفيه يله كوم واني اساعدك
كمت يم المغسله..هي خلت معجون ع الفرجة..وكالت:
يلله
لا لا بطلت اروح انام
ليش مو تريد تنظف اسنانك
لا زحمه انتي تنطفيهن والله ميت من الخجل منچ!!
لا..لا عفيه لتستحي مني يعني انت ..متاذي وهاي حاله استثائية قابل شبيك باجر اطيب وتصير زين عفيه لتستحي خلي اساعدك
مسكينه شأكلها تصدك ..عبالها مستحي..متعرف رائد لا يستحي ولايخجل...ويدور حجج حتى يدلل
بكيفج..
نظفتلي اسناني بس من كدام وشالت مي باديها خلت بحلكي ..اويلي مي من اديها عسل مو مي تغسيل وشلون چفوفها ترفات ..مال تعضعض بعدين دنكت ع المغسله اخذت مي وتمضمضت..مسحت حلكي ولحيتي وشواربي ..هسه اني لو محترك من زمان مو احسلي حتى اشبع دلال وترافه
انت بعدك تتوجع؟؟
ما اريد اضوجج بس حيل متأذي راح انام بلكي ارتاح
اي روح نام....
ومثل الي تذكرت وكالت:
انطيني الكارت افتح غرفتك متكدر تفتحها
بجيبي نفسه..
مدت ايدها طلعته ومشينا سوه فتحتلي الباب
تمددت ع جربايتي سحبت بطانيه وغطتني..قبل متطلع كالت:
راح اعوف الباب مفتوحة شويه اذا صخنت صيحني . مراح انام راح اقرة
ماشي
راحت من يمي خرررب يومها شكد فقيرة وفطيرة وكلشي يعبر عليها..اويلي شلون..ملتهيه بيه ..هنياله الي تصير من نصيبه يشبع حب ودلال..ومو بس حب ودلال..لا..دفو..وجمال هم!!♥️♥️♥️
نمت لان حيل تعبان ورة ساعتين او اكثر فزيت من البرد ..شو حيل بردان يمكن ضخنت فعلا..شنو انكلب التمثيل مالتي صدك ...كلت اصيحها تغطيني بعد لان بردان ..بس قبل ما اصيح عليها هي جتي ..شافتني كاعد كالت:
ها عيني ليش كعدت ..اني كل نص ساعة اجي اشوفك اخاف لتصخن..
والله ..يمكن صخنت اشو حيل بردان..غطيني..
غطتني بعد بطانيه
هسه احسن! اروح يعني!!
لا بعدني بردان...ابقي يمي🥰🥰🥰
