رواية وجه محروق الفصل الخامس بقلم جمانه السعيدي
اصيل وصلت للمستشفى
نزلت جبت كرسي نقلنا ابوي اني والسائق خلينا على الكرسي
اجيبه منا وارجعه منا ولا حركه
دخلنا جوه اخذته ادفع بي الغرفة الطوارء للدكتور
اصيل...دكتور ابوي دكتور
الدكتور وكف باوع علي قرب منهو بس شاف حلكه بي زباد ابيض وراسه واكع على جتفه
افتهم ابوي ميت قرب وخله السماعه على كلبه
بعدين شاف النبض من ايده
الدكتور....شيصير منك ابوك
اصيل...اي دكتور ابوي شبي ليش ما يتحرك
الدكتور.. البقيه بحياتك ابوك ميت
اصيل...مات شنو مات هسه قبل شويه جان يشتغل بلورشه
دكتور شني مات
الدكتور...مات هو اصلا وصل ميت
طفل عمره ١٥ سنه متعلق بابو ومايشوف الدنيا كلها
اله بعيون ابو لا مو بس ابوي
امي واخوي واختي وصديقي وأهلي كلهم عيوني الي اشوف بيهن شنو مات
اصيل...دكتور فدوه اتأكد
الدكتور عافني وراح يجيب الممرض حتى ياخذ ابوي الغرفة التشريح يشوف شنو اسباب الوفاه
اصيل..دنكت على ابوي بسته
اصيل...بويه بابا عيوني احجي وياي بابا اني اصيل
احجي وياي
انت هسه قبل شويه كنت واكف تسولف عليه
تكول عدنا شغل هواي لازم نخلصه بسرعه
الدكتور يكول ابوك مات شنو مات اكيد هذا الدكتور غلطان حاجيني بابا حبيبي
شو ارفع راسك اذا ماتكدر تحجي بس افتح عيونك
بس خل اشوفهن واني اعرف شتريد
فدوه حاجيني اني منو اليه من بعدك
عليك الله بروح امي حاجيني
لا تتشاقا وياي اني ماأحب هيج شقا
حاجيني شو ارفع راسك شنو يوجعك اني افهم الدكتور
لا صدك عود تريد تعوفني
زين جان انتظرت شويه لمن اكبر واصير ولد شاب
ترا بعدني زغير ولله بعدني زغير
شلون تعوفني وصيت منو عليه منو الي كتله عينك على اصيل
يعني هي هاي محبتك اليه تعوفني وحدي
ولله مااكدر ابقى وحدي اريدك تبقى وياي
جمانه السعيدي
دخلو ممرضين ثنيين والدكتور يردون ياخذون ابوي
اصيل...اوكف يابه حاجيني لا تاخذو من رخصتكم
هو هسه يصير زين ابوي واعرفه
ياما وياما تعب بس ابد ما يوكع
اخذو الكرسي يدفعون بي
امشي وراهم واباوع بلكت ابوي يلتفت عليه
معقوله يعوفني من جنت زغير ماقبل ابقى بيت جدي
وقتها جنت ٣ سنوات
كال لا مااعوف اصيل بقى متمسك بيه
ابد ماحب واحد اكثر مني حتى خواتي ما يحبهن بكدي
معقوله اكو واحد يحب واحد هلكد ويعوفه
امشي ورا واصيح يابا ابو اصيل اني وياك مااعوفك
لاتصدك اعوفك انت ماعفتني ولا يوم
اني هم مااعوفك
اباوع عليهم شالو وخلو على السديه وهو ابد ولا حركه
عبالك نايم
طلعوني وطبكو الباب كعدت بلكاع منتضرهم يطلعون
ويكولون ابوك يريدك
كمت ابجي ادموعي ينزلن على وجهي بدون توقف
وصلت لمياء بس شافتني ابجي راسا ملامح وجها كلهن اتغيرن
لمياء....شبي ابوك اصيل شبي مات ولك ابوك مات
اصيل...مسحت دموعي لا ما مات مستحيل يكون مات
ابوي قوي ما يهمه الموت
بس هو تعبان هسه يطلعون وسئليهم
ابوي عايش ما مات
طلع الممرض من الغرفه
لمياء....شلونه ابو اصيل
الممرض...البقيه بحياتكم جاي يشرحون الجثه حتى يعرفون اسباب الوفاه
راسا عاطت لمياء بصوت عالي
لمياء...يايمه يبووووي شلون رحت وعفتنا
اصيل....تكابلنا اني ولمياء وكمنا نبجي
اول مره من دخلت لمياء البيتنا لليوم نتفق اني وياها على شي اتفقنا العزيز مات
الإنسان الطيب الي عاش يداري ويهتم ويجيب ويخلي
مات
الشخص الي مقدمنا على نفسه مات
اجا عمي وولده اجو الجوارين ورانا
الكل يحاول يهديني بس اني هاي الناس كلها مو بعيني
اريد ابوي
اني مااكدر اعيش وحدي اريد ابوي
المستشفى صار هوسه وعمي يروح منا ويرجع منا والناس كلها تسولف بلدفنه والتابوت والفاتحه
واني عيني على باب الغرفه
اريد ابوي يطلع اريده يحاجيتي
دخلو التابوت اباوع شالو ابوي خلو داخل التابوت
مات وما ودعني ولا حجه ولا كلمه شبي ليش مستعجل على الموت
ابد ماقربت علي هذا مو ابوي هذا واحد ثاني
ابوي مايعوفني اكيد هذا حلم ابوي واكف بلورشه
ابوي جاي يشتغل بلورشه
عفتهم كلهم ورجعت للبيت دخلت للورشه كلشي مالكيت
كمت اصيح يابا يابا وينك اني ادور عليك
وين رحت كعدت على صفحه وكمت ابجي طلع مو حلم
هاي حقيقه الي بلتابوت ابوي
ابوي تعب من هاي الدنيا وقرر يرتاح
كعدت بلكاع مثل الطفل الزغير التايه
ربع ساعه واجا حسن ابن عمي يريد ياخذ الاوراق الخاصه بابوي وهم جاي يتفقدني
حسن...هاي انت هنا جاي ندور عليك
اصيل...مسحت دموعي جاي ادور على ابوي اتوقعت الكا هنا بلورشه
حسن.. انت شبيك تخبلت ابوك مات تعال اريد الاوراق
حتى يطلعون شهادة وفاة
يله كوم تعال مااندل الاوراق
جمانه السعيدي
اصيل...كمت امشي على كيف اسحل بروحي سحل
فتحت الكنتور طلعت الاوراق
حسن...يله امشي راح نطلع للنجف
اصيل...سكتت امشي ورا عبالك بغير عالم
وصلنا للمستشفى الناس بس شافوني اجو يعزوني
واني بس اهز براسي
الناس جاي تعزيني واني ولا كلمه بس اهز براسي
بعد مااكدر احجي احس مالي طاقه على الكلام
جمانه السعيدي
كملو الاوراق صعدنا ورحنا للنجف
الكل يحجي وينطى رائيه واني ساكت احس كلشي
انتهى خلاص
بلنسبه اليه الحياة خلاص انتهت
اي شي يصير بعد ماله معنى ومايستاهل احجي عنه
دفت ابوي نزلته باديه بلكبر
العزيز الغالي الي اعز من روحي مات ونزلته بايدي بلكبر
اريد اطلع من الحفره مااكدر رجليه ماتن
الدفان وحسن ابن عمي سحبوني وطلعوني من الكبر
رحت كعدت على صفحه منا لمن اجمعو وصعدو بلسياره
ومشينا
رجعنا للبيت اباوع باب الورشه مسدود
معلكين علي قطعة تعزيه بسم ابوي
نزلت دخلت للبيت بس صوت العياط
لمياء وخواتي يعيطن على ابوي
أصعب يوم مر عليه هذا اليوم حتى حجي مااكدر احجي
شكد حقيره هاي الدنيا
ماكفاها اخذت مني امي لا لحكتني واخذت ابوي
خلصت النهار كاعد وساكت لا اكل ولا اشرب ولا احجي
خلصت الفاتحه وكلمن رجع البيته
بس ابوي مارجع
لا اخذني وياا ولا رجع علمودي
عمي كعد يوصي بيه انت رجال البيت
دير بالك على خواتك انت سبع وكد المسؤليه
هذا البيت باامانتك انت مسؤل عن هاي العائله
اي مسؤليه الي مطلوب مني اشيلها الي بكدي بعدهم يلعبون بلشارع
واني مطلوب مني اشيل المسؤليه
تخيلو الحمل الي جان شايله ابوي بكل قوته
مطلوب مني اشيله
اني بس عندي عتب واحد ليش ابوي مااخذني ويااا
معقوله هو عافني حتى اشيل هذا الحمل بمكانه
هيج ابوي يشوفني جبير وقوي
واكدر اتحمل هاي المسؤليه وحدي
شكرا لزيارتكم عالم روايات سكيرهوم
