رواية وجه محروق الفصل السادس بقلم جمانه السعيدي
اصيل...كل الي بلبيت حزين على موت ابوي اله امير
الموضوع عادي بلنسبه اله
سوالف وضحك وكانما ماكان عايش بهذا البيت
عبالك مايعرف ابوي ابوي اكثر واحد اتاذه
بسبب تصرفات امير الطايشه
الضغط والسكر يصعدن بسب امير وخاصه الضغط حيل اتاذي ابوي من الضغط بسبب امير
اصيل...اني اكثر واحد اتاذيت اتمرضت بسبب هذا الفقد
كلشي بلنسبه اليه انتهى الحياة مالها طعم مثل قبل
صح اني عشت يتيم الام من اني زغير
بس موت امي مااثر عليه مثل موت ابوي
لان ابوي كدر يعوضني عن امي وعن العالم كله
بس هسه اني وحيد
ومراح الكه واحد يحبني بكد ابوي
بعد ما خلصت السبعه بدت الناس تحضر للمدارس
اني كان المفروض اقدم للاعداديه
بس لمياء ماقبلت
لمياء...اسمع اصيل انت الزم الورشه واشتغل بمكان ابوك
انت مسؤل عن عيشتنا
احنا ماعدنا مصدر ثاني للعيشه
صرنا كلنا بمسؤليتك
اصيل...والمدرسة يمتى اقدم
لمياء...يااا مدرسه احنا بحال مدرسه هسه شنو راح تحصل من المدرسه
انت تلزم شغل ابوك وتصرف علينا
طبعا هي ماتريدني اكمل لان شاطر وكل سنه أنجح واطلع من المتفوقين وابنها يخلص السنه بسنتين
وترك المدرسه من زمان
اتخيلو طفل عمره ١٥ سنه لازم يعوف المدرسه ويشتغل حتى يعيش عائلته
احس نفسي موكد هاي المسؤليه اني اريد واحد يكون مسؤل عني مو اني مسؤل عن عائله اربع نفرات واني الخامس بهذا عمري
بس ماعندي حل ثاني لازم اقبل ابوي مات وعافلي حمل ثكيل
لازم اصبر واتحمل
اكثر شي خلاني اقبل بهذا الوضع خواتي
بعدهن زغار ومااريدهن يتبهذلن بعد وفاة ابوي
لان الصدك لمياء وأمير ابد مايهموني
جمانه السعيدي
ثامن يوم بعد وفاة ابوي فتحت الورشه
بكل ركن بيها اشوف ابوي بكل خشبه وبسمار اشوف ابوي
صعب اكعد اشتغل وحدي
بعد ماخلصت عمري اشتغل وياا ابوي
اشتغل بدون واهس هيج شلون مجان
يوم يومين اتلاثه حسيت فعلا هاي مسؤليتي
لازم اشتغل حتى اخواتي مايحتاجن احد بعد ابوي
من اول ايام ولمياء كلما ينتهي النهار توكفلي وكفه
لمياء...هااا وين شغلك مو تلعب هيج وهيج
اصيل...بس اني توني بديت وحتى الشغل بعدني ما مسلمه
ولا قابض فلس بعدني
لمياء....كل فلس تحصله تسلمينا بيدي
اصيل...صار
لمياء كانت تشك بذمتي تريد تسيطر عليه
تخوفني تخليني تابع الها امشي بااوامرها
يعني اني اشتغل واتعب وهي تستلم الوارد من الورشه
بدون مااحجي ولا اتنفس
بنفس الوقت ابنها ترك المدرسه وطاير يلعب ويصرف
وهي ابد ما حملته مسؤلية شي
بلعكس تاخذ تعبي وتنطي الأمير يطلع يلعب بي
ويصرف على جماعته
شهر كامل من بعد أربعين ابوي وهي اي فلس يجي للورشه تاخذه
بدا الوارد يقل
لمياء...ليش الوارد قليل وين الفلوس شوف اصيل
دير بالك تلعب هيج لو هيج
هاي فلوسنا فلوس خواتك ممنوع تمد ايدك عليها
جمانه السعيدي
اصيل...بقيت اباوع عليها بغضب
لمياء...ليش تباوع عليه هااا كشفتك اني واكفتلك وكفه
ممنوع تاخذ الف من وارد المحل
وهسه احجي الصدك ليش الوارد قليل
اصيل....انتي جاي تاخذين الوارد كله وما تعوفيلي فلوس
اشتري خشب وبسامير وصبغ وغره
وبعد هواي مستلزمات شلون تردين وارد وما تنطيني
اشتري احتياجات الشغل
لمياء...موهذا خشب
اصيل...هذا الخشب مايصير غير ضهر كنتور لو ميز
بعدين هذا الخشب ما يتحول وحده كنتور لو ميز لو جربابه
ينرادله غراض
لمياء...يعني شكد تحتاج فلوس شوف انطيك فلوس ترجعهن وياهن الارباح
اصيل...اني هذا الشغل ما يعجبني اني ماشتغل عندج
انتي جاي تحاسبيني وكانما اني حرامي
اذا ماعندج ثقه بيه تعاي انتي اشتغلي لو جيبي ابنج يشتغل وينطيج الوارد
لمياء...انت شنو تعيرني لان تشتغل شنو العيشه واكفه عليك واذا ما اشتغلت
زعلت لمياء تمشي ودردم عليه ماعاحبها كلامي
عزلت الورشه ورحت للبيت
لكيتهم متعشين وماعايفلي اكل صعدت نمت بغرفتي بدون اكل
ثاني يوم مانزلت من الغرفه للضهر بعدني بغرفتي فوك
اتفاجئت عمي صاعد الغرفتي
اكيد لمياء اتصلت علي تشتكي مني
عمي.. شلونك اصيل
اصيل..كعدت على حيلي هله عمي هله بيك
عمي.. ليش مزعل لمياء ترا هي مثل امك وتريد مصلحتك
اصيل.. اني امي ماتت ولمياء مو امي
عمي...ترا هذا الحجي عيب اذا مو الخاطرها الخاطر خواتك
اصيل...واكفه تحاسبني على الربع
تريد فلوس على الحاضر اني ماعندي الفانوس السحري
اخلي ايدي تطلع فلوس
الشغل حتى يستمر يريد فلوس اشتري خشب
اشتري مواد تخص العمل
كل يوم توكف وتأخذ كل الفلوس اليوم اجت مالكت فلوس لان ماعندي مواد اشتغل بيهن
تكول انت اخذت فلوس الشغل
ترا حتلو اخذ فلوس الشغل اني جاي اتعب
ليكون هي متوقعه شغل الورشه سهل الله وكيلك تعب موت بليل مااكدر انام هلكد ماضهري واديه يوجعني
بعدين هي باي حق تحاسبني هاي ورشة ابوي
هي مادافعه فلس احمر بيها يعني فضل مني اشتغل
وانطيها مصرف
اني اشتغل الخاطر خواتي وبس
عمي...وهسه شنو الحل
اصيل...ارجع اشتغل بس بشرط اني انطيها مبلغ معين كل يوم يكفي مسواك البيت
وبعد مالي شغل بيها ولا توكف تحاسبني على اي شي
هي ما مسؤله عني
غير هيج مراح انزل واشتغل ابد
اروح اشتغل وياا اي نجار احسن اليه الكل يعرفني ويعرف سمعت ابوي كلش زين
الف ورشه تطلبني بس اكول اريد شغل
واطلع اسكن برا وهي خلي ابنها الشفيه الشاطر يعيشها
مو اني اشتغل وهو يطلع يتونس بتعبي
ترا اعرف كلش زين شجاي يصير بهذا البيت وساكت
جمانه السعيدي
عمي...ليش تكره لمياء وامير
اصيل...مااكرهم ومالي شغل بيهم بس مال تكعد لمياء تحاسبني على الزغيره والجبيره وتعاملني عبالك حرامي
وتصرف تعبي هي وابنها مااقبل
كل يوم انطيها خمسين الف مصرف للبيت
ومالي شغل لا بلغاز ولا بلامبيرات ولا بلمسواك
مالي شغل بكلشي هي أدبر نفسها هي هم سوت راتب ارامل وهيج الوضع كلش تمام
اذا ما تقبل اطلع من هذا البيت
انت وصللها هذا الحجي عن لساني لان هي مجاي تقتنع بكلامي
نزل عمي حجا وياها طبعا هي ماقبلت اسمعها تصيح
هو شايف نفسه عليمن مان عليه صار شهر واحد من اشتغل
شو مان علينا ترا اقفل الورشه لو اجيب واحد يشتغل بيها بمكانه توه لزم الشغل
شنو طلعنا من سنيين يوسف
اني متحملته كوه وصابره علي علمود ابو الله يرحمه
اصيل...بقيت فوك مانزلت بيومها ولا فتحت الورشه
وهي حتى مافكرت وقت الغده ادز عليه فاطمه حتى انزل للغده بس اني مصمم
لو تقبل بشروطي لو مااشتغل وهاي الورشه بعد ماافتحها
اني مااشتغل عدها
اذا ما كل واحد يعرف حدوده من هسه
مراح نكدر نستمر اني وياها سوه
العصر رجعت دزت على عمي اريدك اجيب واحد يشتغل بلورشه
عمي رجع عليها حتى يقنعها
عمي ...مايصير هذا لحجي اذا قفلتي الورشه منيين راح تعيشون
واذا جبتي واحد يشتغل بيها الله وكيلج راح يبوكم
ويكعدكم على الحديده حتى غراض الورشه تبيعيهن
وماتسدين الديون
وين اكو بعد واحد ابن حلال يشتغل بضمير
خلي الولد يشتغل هاي شغلته ومتعلم عليها
وراح ينطيج خمسين ألف كل يوم خوش مبلغ كافي عليكم
وبعد لا تدخلين بحياته وبشغله
جمانه السعيدي
اقتنعت لمياء بكلام عمي ووافقت علي
صعد عمي فوك وكال هاي هي لمياء قبلت بشروطك
من باجر افتح ورشة ابوك واستغل بيها
اصيل..نزلت فتحت الورشه وبقيت اشتغل للعشره بليل
ولاواحد اجاني ولا واحد كال تعال اتعشى
جعت حيل لان من البارحه بدون اكل
عبرت على البيت لكيتهم متعشين وغاسلين المواعين
هيج بدت الحرب ولمياء خلتني بعقلها
رحت قفلت الورشه وطلعت على اقرب مطعم تعشيت
ورجعت
صعدت فوك اريد انام لكيت غرفتي مقفوله وملابسي برا الغرفه
بجيس زباله
هذا الشي معنا لمياء بعد ماتريدني بهذا البيت
اخذت ملابسي ورجعت البيت امي
نزلت فراش فرشته وتمددت علي
اصيل...بويه شوف بعد ماعفتني لمياء حملتني المسؤليه
كلها واني مااكدر عليها
جبير عليه هذا الحمل
وياريت على هذا وبس من تطبخ ما تحسب احسابي
وطردتني من غرفتي
كله بسببك انت جبت هاي الحيه اليبتنا
لمياء دمرت حياتنا اني وياك
انت متت بسبب ابنها واني انطردت من البيت بسببها
انت المسؤل لو باقين بس اني وياك
هواي احسن على الاقل هسه انت موجود وياي
بمكان مااني نايم بهذا البيت وحدي
شكرا لزيارتكم عالم روايات سكيرهوم
