رواية قلب مغتصب الفصل السابع بقلم ورود الخالدي
رائد:::
ابقى يمك شنو اسوي ..يعني خلي انطيك براسيتول هو خافض حرارة بلكي تصير زين!!
ضجت من كالت ابقى يمك شسوي حسيتها تململت برغم اني هالمرة مجاي امثل فعلا مصخن وحيل بردان فكلت الها بنتر:
انطيني سم براسيتول بلكي اخذه واموت!!
راحت جابت مي وخلت البراسيتوله بحلكي وشربتني مي:
بعد وحده:
مو هذا ابو الالف اخاف مو زين عليك اثنين!!
وانتي ع اساس خايفة عليه انطيني بعد وحدة كتلتني الصخونه
انطتني بعد وحدة..وغطتني
وقبل متطلع كالت اني بالمطبخ مراح انام اذا احتاجيتني صيحني!
روحي ماكو داعي اصيحج!!
راحت اني بقيت جوه البطانيه لزمتني نفاضة قويه وطبعا المريض يصير نحس ..وره نص ساعة عركت ...ومتت عطش بس عزت عليه نفسي اصيحها واكولها عطشان ضلت عبارتها مال ابقى يمك شسوي بخاطري...لهذا مصحتها وره ساعة راح مفعول البراستيولات وهم صخنت بس هالمرة اقوى النفاضة حسيت بيها جتي تلمست كصتي..وكالت:
عزززاا..عزززاا نار مشتعل نار انت رائد
وهم راحت ركض جابتلي براسيتول انطتني وحده كتلها
بعد وحدة
مقبلت ..راحت جابت كرسي وكعدت كبالي..كل شويه تخلي ايدها ع كصتي..كعدت الصبح سابح بالعرك..فراشي صاير مي وشعري وملابسي وميت من الحر..شلت البطانيه عني دفعتها ..دفع باوعت خطيه نايمه وركبتها مايلة ردت اكعدها ..كلت خليها نايمة افوت للحمام اخذ دوش متت من العرك والحر...بس اديه شلون انزع ملابسي...اهووو يا ادية يابطيخ ..خلي اسبح لعبت نفسي من نفسي....وفتت للحمام مهتميت نزعت ملابسي ووكفت جوة الدوش رغم الدنيا باردة بس سبحت بمي تقريبا بارد..بعدني دا اسبح سمعت دكاته قويه ع باب الحمام سديت الدوش ..وبديت انزع الضمادات من ايدي هي ادك بالباب
رائد..شنو دتسبح ..رائد..رائد ميصير اديك يلوحهن مي ..لتخلي المي يوصلهن!
هاي بطرانه اصلا اديه والضمادات صارن تشريب ..بينما افتح بالضمادات الجلد بده يتشلع ويه الضمادة اسمعها تكلي:
رائد انت دا تسمعني..رائد دير بالك من المي!
روحي جيبلي شورت وسروال
اي
راحت ورجعت دكت الباب مديت ايدي اخذتهن:
عززاا عززززاا رائد ليش فتحتهن هسه يلتهبن
لج سكتي خلي ابدل شخبصتيني
لبست الشورت..حسيت اديه تملخت ومن لبست السروال لان ضيك وجريته متت وبقى مكان الحرك يجري دم كلت عندي ضمادات واضمدة من طلعت شافت اديه بيهن دم كالت:
ليش..ليش سبحت وبللتهن الدكتور مو كلك ميصير يوصلهن مي ليش هالعناد قابل انت جاهل وتتعاند ويه نفسك شوف ايديك شلون يجرن..دم..
كعدت عركان متحملت..
تعال اكعد ..اكعد هنا يم الطاوله رحت كعدت هي بقت تكلب بادية
هسه شلون تروح للطبيب..مرة ثانية
وج ساعة بالسته وين اكو طبيب اكو ضمادات بالسيارة روحي جيبيهن..السويج ما ادري وين شمرته من جيت البارحة نورس خلاه بجيبي شوفي بالجيب بعده
اي..
راحت ركض تذكرت موبايلي ممنزله من البارحة باقي بالسيارة فصحت عليها
جيبي موبايلي وياج..تلكية ع الدشبول:
ماشي..
راحت..ورجعت بيدها الضمادات والموبايل جرت كرسي وكعدت كبالي
انت تضمدهن ..شلون تضمدهن اني ما اعرف كلبي مينطيني اخاف اوجعك..
لتخافين ..شنو قابل عمليه كبرى هنه ضمادات خليهن ع الحرك ولفيهن...لتخافين
ماشي اذا توجعت كولي!!
فتحت الضمادات خلتهن ع ايدي وهي تلف متت من الوجع بس مردت احسسها خطية بس يمكن حست بيه دمعت ..وكالت:
هاا توجعت..مو
هسه اني توجعت انتي شبيج بجيتي..
عافت اللفاف ع النص وبجت اكثر
كوله مني اني حركتك..ودتتوجع بسببي ..اني اسفه والله اسفه سامحني مو قصدي وانت تعرف مو قصدي اني غبيه من فتحت المي!!
ابتسمت بوجهها كسرت خاطري شهالترافة شهالكلب ..الحنين ..تبجي لان وجعتني ..ردت اطمنها فضحكت:
يمعودة شالسالفة شنو ضاربتني طلقة قابل دلفي ..لفي يمعودة!
وبدون متمسح دمعتها استمرت تلف ...شلون بالله ..هي تخبل وترفه ..وگلبها مثل گلب ..طفلة واني ما اتحمل هالكميه من الحنية روحي ..هم طريه😍😍😍..واخاف ..الوصها للسالفة
خلصت لف ايديه كالت:
جوعان اكيد جوعان مو!!
بكيفج
اي مبين جوعان خلي اسويلك ريوك
راحت سوتلي ريوك جاي وحليب وجبن ومربه وكعدت يمي توكلني اويلي .. الاصابع الترفه من تفوت بحلكي اطيب من المربه.. هم توكلني وتمسح حلكي ..
من تريكت رجفت شافتني كالت:
شوف هسه تتمرض ..سبحت وطلعت بالسروال حتى شعرك منگع ..اروح اجيبلك بلوزة وخاولي مو زين عليك تبرد اكثر تروح تصخن مرة اللخ:
هههه..من زمان محد ..محسسني انه اني مهم هالكد حيل مكيف بهالقرب وهالتطورات وهالاهتمام..
راحت جابتلي بلوزة وكالت:
حاول تسد اديك حتى متتلجم اني البسك ع كيف
لا..هالمرة صدك بعد ما اتحمل صبرني ربي ...واكفة بين رجليه وتلبسني البلوزه متت التوتر عندي يقره مليون..هي نيتها بريئه حاسه بالذنب وتريد تساعدني حتى تخفف من هالذنب...واني نيتي رذيلة ..كل شويه الشيطان يكولي ولك اجفتها..هالوصلة الترفة ..فرصة متتكرر وحدكم ومحد يسمع ولا يشوف وحتى هي فقيرة و فطيرة وحتى اذا حصلتها قابل شراح تسوي تفرفح شويه وتسكت وموقفها ضعيف ابيت اهلك ووتعرف خالتها تكرهها ومتصدكها وحتى اذا صدكتها ابسط شي راح تطردها وهي..معدها مكان لك فأكيد مراح تحجي دفوت بزودك ..الفرص متتعوض..
.واني من جهة اكول النفسي لك اذا هي فقيرة ومكسورة جناح انت هالكد نذل خطية مأمنه بيك ومقتربة منك لهلدرجة گوة عليها اصلا مرتبكة وكلبها يركض من المستحة ..انت شبيك حيوان ..زمال كل همك ..ترضي الشيطان الي بداخلك...لك حركة وحده زغيرة مو تمام منك تحس بيها ١٠٠/١٠٠ راح تجفل منك ويجوز تنهزم من البيت وانت متريد تخسر لمستها واهتمامها ودلالها الك ع مود لحظات ضعف ...الزم نفسك لك ساقط ..اركد..استجن.. ولتلوص الدنيا ..اصلا كلبك مينطيك تاذيها وتكسر روحها الحلوة الجنها ...نبع مي بارد وصافي
اوف اثنين يتصارعون بداخلي شيطاني وضميري ..بس عمت عيني اذا اخلي الشيطان يغلبني ..
كعدت كبالي كتلها فتحي الجهاز شو في منو متصل شكو ماكو الرمز نمط حرفM
اخذت الجهاز فتحت الرمز كالت:
هوايه مكالمات ..يمكن الحجي لان انت كاتب الوالد
دنته عليه شفته:
ابويه كالب الدنيا بالاتصالات دكي عليه..وفتحي سبيكر:
دكت عليه..بسرعة شاله:
لك وين انت ابن الكلب من البارحة لليوم اتصل ضل بالي عليك وهالنوب ممخلي عندي رقم جماعتك بالبصرة
يابه اني بياحال اصلا ما ادري بالموبايل وين هسه شفته
من شلت راسي شفت وجهها تغير ..كلت خافت لا احجي لابويه ..هههه اعتيادي مراح احجي ولا راح اكله اني ابغداد ..اصلا اني مجذب عليه شلون احجي فكال:
ليش بيا حال شصاير ياستار
وصلت لكيت العمال متعاركين ويه الضابط البسيطرة وموقفيهم وبطلاع الروح طلعتم من البارحة لليوم اني حلكي يابس ..وواسطات من كم ضابط اعرفهم يله طلعوهم!
هااا..وطلعتهم عفيه عليك...شوكت ترجع يعني:
ما اكدر ارجع هالاسبوع انذار بالسيطرات ولازم ابقى هناك كل شحنه تعبر من البصرة لازم اني بالسيطرة امشيها
هااا براحتك:
انتو شوكت ترجعون لبغداد:
حسبه ١٠ ايام ..لان بيت عمك سعد يردون يعقدولها لاختك تعرف جانو منتظرين جيه ابو سعد وهسه الفرحة فرحتين عدهم
خير ان شالله
يله اخذ راحتك دير بالك مو تتنزفز ع الضباط مابينه حيل
ماشي..سلملي ع عمامي اتعذرلي منهم لان رجعت بسرعة
همه يعرفون شغلك بس نسوان عمامك زعلن
ههههه..ماشي اني اخابر ع مرت عمي ابو سامي من افرغ
وسديت الخط ماكو . ساعة ودك باوعت هذا صلاح اكيد نورس حجاله ..كلت ما ارد اخلي يتصل وما اجاوب اذا اجاوب لازم افتح سبيكر وهذا صلاح ميانتي وياه فول ولسانه زفر يفشر وعيب من سماء تسمع فشايرة
دك مرة مرتين ٣ هسه يبطل ماكو هي ملتهيه ترتب بالمطبخ شافتني ما ارد:
العفو اذا عندك مكالمة خاصه اني افتحلك خط واطلع برة
مكالمة خاصة شنو!!
اي يجوز تنحرج تحجي كدامي.. لان موبايلك ديدوك هوايه
ابتسمت بداخلي كلت اويلي بسرعة طارت نيتها:
هااا كلتي رمز ..حرف M واتصالات ومدا يرد لازم صاحبته هذه
ياااا واني شعليه...مودا ..اكولك افتحلك خط واروح..و
بعدها تحجي ..دك صلاح :
تعالي فتحي خط وكعدي واقري الاسم بالاول
شافت الاسم فتحت خط وسبيكر:
هاااا..رودي شلونك ولك نورس يكول محترك!!
اي والله بعد صارت..
شلون احتركت يول سولفلي!!
شسولفلك قدر وصار بعد
هههههه هااا قدر وصار لو انت هوايه تلح على اديك من تتفرج ع الموقع الازرك واكيد صارت بيهن جدحه كهربائية وثكبن 🔥🔥🔥😁😁😁
خررررب لك مطي..محضورة..محضورة
هااا محضورة شمدريني اني
دسده وولي
العصر نجيك اني ونورس وفؤاد
شكو جايين مابيه شي ..ولد القنادر!!
هاي شنو خاف ماعدكم ببسي تقدمولنا..يله منريد احنا نجيب ويانا
لك..
وسده خررب فشلني كدام البنيه والنوب العصر يكول جايين..هاي شلون ..ورطة عيب اخابرهم واكلهم لتجون ..باوعت سماء ماكو يمي خطيه سمعته وطلعت صحتها:
سماء وينج
جتي يمي
شفتي لهذا ما ارد اجاوب هذا..ساقط ولسانه زفر..خو مضجتي
لا شعليه بيكم اني..كتلك افتح خط واروح انت كلت ابقي
لان توقعت تفكرين بنيه دتتصل واني مجاي ارد ..ردتج تسمعين صوت ولد..وحتى حرفM تره حرف امي ..لان اسمها مريم
رائد شعليه اني حرف امك لوصديقتك اني ياهو مالتي ماكو داعي..تشرحلي اصلا
حيل انغثيت ما اعرف ليش من كالت ياهو مالتي بيك وشعليه وماكو داعي تشرح حسيت نفسي كولشي ماكو بالنسبة الها فعلا اني اصلا شنو اعني الها هي من جتي لليوم ..مصار عدها اي فضول من ناحيتي متفكر تسمع عني اي شي يخصني ولا تسأل هادئة وساكته اني وحدي الي ادخل بيها واخليها تضطر تحجيلي يعني وكفت الها بالشارع ذاك اليوم واكولها شعندج تتختلين بسد المحلات اضطرت تشرح وتبجي..والبارحة جيت مثل المخبل ..وشكو عندج ضاله وحدج..واشمر عليها حجي سخيف وهم جبرتها تحجي وتشرحلي وعيونها صفت من البجي.....وهسه حسيت بفشله عظيمة من كعدت اشرح الها انه معندي صاحبه تتصل عليه ردت برد..غثني حيل شعليه بيك ياهو مالتي..خررررب ..خرررررب تالي شلون وياها يعني
شفتها اخذت ملابسها طلعت من المطبخ ورجعت مبدله ملابس دوام ..شتلبس ياكل ويشرب ويه لون بشرتها وترتيب اللشه كالت:
اروح بس محاظرة وحدة..عندي امتحان شهري تعرف امتحانات نص السنه راح تجي ولازم ما افوت امتحان شهري ..ما اتأخر امتحن وارجع اسويلك غده ..البارحة مطبخت التهيت وياك بس اليوم ارجع من وكت ماشي
اخذت جنطتها..رادت تطلع رجعت عليه:
نسيت خلي انطيك علاج
راحت جابت علاج انطتني كبسول وخلت يمي مي..وكالت اروح لو تحتاج شي ..اجيبلك وياي
ابتسمت
شتجيبلي يعني
اي شي محتاجة من برة
ماكو..شي على بالي بس من احتاج اخابرج
اي خابرني..
راحت ورجعت
بس شلون تخابرني متكدر تلزم الموبايل وحتى رقمي مو عندك!
ههههه يمعوده سجلي رقمج واني ادبرها ساعة الاتصال
اخذت جهازي كتبت رقمها وراحت
بگلبي اكول لاتتأخرين امتحني ورجعيلي ركض ..♥️♥️♥️
وفعلا متأخرت ..رجعت من وكت اول مدخلت ابتسمتلي:
بعدك كاعد بالمطبخ!؟؟
وين اروح ..بلا ادين..منتظرج وانتي اديه
ههههه ....جبت ويايه باگلة اعرف انت تحبها..مريت ع السوك لان طلعت من وكت راح اسويلك تمن باگلة يجنن
بقيت كاعد يمها تفلس باكله وتطبخ ..هههه هم متونس بحياتي مصارلي خلك اكعد بالمطبخ كل هالوقت ..لا وعندي خلك اراقبها شلون تشتغل وساكت عبالك دا اتابع فلم ذهب مع الريح بعدين سألتها اريد احجيها:
شلونج بالامتحان :
لتخاف عليه اني شطورة..اصلا كل سنه امتياز!
هااا يعني..ممكن تكملين دراسات عليا..
صفنت بوجهي
شو صفنتي!!
لا..بس دراسات عليا ..احتمال بعيد
ليش..اذا..شاطرة ..ادرسي للنهاية!
شتتصور وحدة بظروفي عدها هيج طموح!! اكيد لا..بس اخلص هالسنه خالو يدز عليه ...واسافر لالمانيا اشتغل ..وان شاء الله اتوفق..هناك...
تسافرين بس تخلص هالسنه!!
اي اكيد حتى خاله تخلص مني واني هم اخلص..من الخدمة وتتغير حياتي..بعدين انت هم تخلص..واهلك يخلصون والامة العربيه كولها تعيش بسلام بس اطلع لالمانيا
ههههه الامة العربية كولها تخلص منج ..زين اني شعليه ومنو كلج اريد اخلص هذا تعبير غريب
اكيد انت هم تخلص ..رائد اني اعرف ..كل شخص يحب يكون حر ابيته وميتقبل ابيته دخلاء يقيدون حريته؛
وانتي بيش مقيده حريتي ست سماء!!
يعني جنت اكثر حريه ..تسبح وتطلع مصلخ واني ..قيدتك واحتمال اكو اشياء ثانيه قيدتك بيها تره محد يتصرف على طبيعته اذا اكو غريب ابيته
اذا هيج تفكرين براحتج ..وبالتوفيق ان شاء الله
اشكرك ربي يخليك..ويشفي اديناتك ع السريع
هسه هي تحجي ع طبيعتها اني ليش انغث ..خرب حجيها يغثني ..شريد منها .. بنيه عايشه بلكمتها ليش ضايج من تكول حتى انت تخلص..اوووف والله ما اريد اخلص ..وياريت ايديه متطيب بسرعة حتى احس بلمستها من اداريني....
العصر اندكت الباب هي برة خررب فتحت الهم الباب ذوله الساقطين .. واجتني:
رائد اصدقاءك جوي فتحت الهم الاستقبال
ماشي طالع الهم
اسوي عصير.؟
لج كلشي لتسوين هسه يرحون ولتجين للاستقبال ابد
ماشي
رحت كعدت يمهم ..سلمو وسالوني ع الحرك كتلهم بالدهن بالمطبخ فؤاد بلسانه حجي:
اكلك شو لاعصير لا شي تره جايبين ويانا ..عاد قدمولنا من عنده حرامات ضال بالطارمة
محد هنا منو يقدم الكم روح هز طولك وجيب واشرب
شنو من يقدم غير هسه اختك فتحت النا الباب
لك مطي تريد اختي تقدملك..
لا والله اني اريد اتقدملها بس لتفشلني ..تدري بيه ادور على بت حلال ودا ارتب اموري..
صلاح كال:
بعدك انت ترتب امورك اني كامل مكمل شقتي كامله .. ومستقل وتدري بيه رزقي توب
نورس كال :
هاي شنو واني خراعة خضره والله اذا ينطيها الكم اكلب الدنيا
فورو دمي صح احنا ميانتنا فول وزفرة وكلشي نحجي بس متوصل يتزاودن على اختي
انعل والديكم يله..كومو انقلعو ..منا ولد النعل!!
هاي شبيك ..غير نريد نخطب منك عمي انت اختار المن تنطيها والتختارة وعد شرف محد يزعل
ولكم شنو اختار هي سيارة واريد ابيعها!..
على بختك احنا شعدنا جايين على سنه الله ورسوله ناخذ منك الاوكي ونمشي على اهلك بعدين.. غير انت صديقنا..واخونا
اهوووو...تره اختي مخطوبه وعاقدة..وبعد كم شهر عرسها ..سدو الموضوع تره نخرب..
كلهم كالووو..لا....خرب غيرتك..المن منطيها واحنا مندري..
ابن عمها خاطبها شنو اكول لعمامي لا..بعدين وروح امي حتى اذا ما مخطوبه ..ما انطيها لاي واحد منكم؟؟
فؤاد كال :
ليش شبينا ..عوران لو عرجان..لو خارج نطاق التغطية
لك ..دكوم..شبيه انطي اختي لواحد ساقط منكم....
من كلتةساقط ..يدرون بيه اتشاقه
خررب والله لوما مضبر ومحترك جان شبعناك دك بيك بخت محترك
ههههه
بقينا نسولف شويه وطلعو من يمي
رجعت فتت لغرفتي افكر..ههههه والله سوگها ماشي بس شافوها وعبالهم اختي ذبو ارواحهم زروك يردون يخطبون ..ههه ما انلام اني لعد من تعجبني وشيطاني كا شويه يشاورني...
الظاهر ايامي بالجنة سريعة بسرعة خلصن وبسرعة طابن اديه وابويه بين يوم ويوم نتخابر ..واخر مكالمة كلي باجر راجعين لبغداد يعني لازم ..باجر اطلع من البيت همه ميعرفون اني يمها وما اريد يعرفون اصلا..يعني الليلة اخر ليلة ...يمها واخر ليلة باقين وحدنا سوه
شكرا لزيارتكم عالم روايات سكيرهوم
