رواية قلب مغتصب الفصل الثامن 8 بقلم ورود الخالدي

سماء::::

صار ٩ ايام ع خاله والحجي وسماح من راحو لاربيل ..طبعا خلال هالتسع ايام جان رائد كل الوقت يمي يمكن الله جابه ويمكن الله رتب الحرك مال اديه حتى يبقى يمي بگلبي اكول خطية احتركت اديه وحيل توجع بسببي ومن جهة اكول الحمد لله همزين بقة يمي اني اخاف ابات وحدي ...واصلا خليت كومة غراض ع الباب من راحو اتخيل احد يدفعها بس همزين اجه رغم كل كلامة الجارح الي كاله بس بقاءه يمي خفف عليه وخلصني من انه ابقى وحدي او ابات كل هالايام بهالبيت الجبير ..طبعا باليومين الاخيرات الي فاتن رائد ذب الضمادات من اديه لان الجلد كام يكشر وطابن تقريبا٩٠ بالميه لان الحرك جان سطحي والحمد لله وعادي كام يبدل وحده ويسبح وياكل بادية ويخابر يعني رجع طبيعي بس ميكدر يروح للتمرين لان بعد اديه بيهن اثر قليل..واكيد بالايام الاولى جان معتمد كوله عليه اوكله واشربه وانطي علاج والبسه قسم من ملابسه ..لو اغسل وجه وامشطله شعره ...طبعا حيل مستحيه منه ومرتبكة بس شسوي معندي حل ثاني..اديه جانن مضمدات واني السبب ولازم اساعده ..بعدين هو حيل محترم شكد جنت قريبه منه مصدر منه اي تصرف او نظرة او...لمسه تخوفني منه شكد حباب ومؤدب وتربيته حلوة.. 

بالليله الاخيرة .. اجه كعد ع القنفه الي بالصاله تقريبا جاتت الساعة ١١ ونص بالليل ..صاحني جيت يمه كلي 

كعدي..كبالي سماء

كعد كباله..

استغربت من سحب اديه ولزمهن مو بس استغربت بصراحة خفت شويه..باوعتله بنظره كولها اسئله وردت اسحب اديه بس لزمهن حيل:

خو ماكو شي رائد !!

اريد احجي وياج!

اي احجي ..بس ليش لازم ايدي 

سحبتهن مرة ثانيه لزمهن اقوه:

هاي شبيك رائد ..اقصد اديك توهن طابن لتضغط عليهن هدني،رجاءا 

انتي..مخايفة على اديه خايفه منهن او خلي نكول خايفه مني !!

لا..ليش اخاف انت حباب ..بس مستغربه:

سماء صارلنا ٩, او ١٠ ايام وحدنا!!

اي صح

شفتي مني تصرف محلو..او حركة محلوة!!

لا ابد والله حشاك من هالحجي!!

واعتقد انتي تعرفين نفسج شكد حلوة ومثيرة وجمالج يشك الحلك..

دنكت ..متت من المستحة!!

لتدنكين باعي بعيوني خلي احجي الحجايتين العندي وروح امي كوه جاي ارتب الحجي حتى اوصله الج..

باوعت بعيونه :

سماء..اني آسف!

ع شنو؟؟

ع الكلام الي كلته الج اول يوم اجيت!!

تذكرت كلامه حسيت عيوني بدت تحركني وحتى صوتي طلع مو تمام:

وليش تعتذر مو هو هذا احساسك وتفكيرك بيه جان مو جيت وكتلي احجيلج الصدوك مو الجذب!!

لان زمال!!

لا حشاك رائد فدوة هد اديه ماكو داعي تعتذر والله...ميتغير شي اذا اعتذرت 

خررب ..لج والله وروح امي ..ندمان ع كل حرف كلته الج وخليت عيونج الحلوت يجرن دمع بسببه..

بسرعة بجيت ..هو هد ايديه مسح خدي..وكلي:

وحق عرش الرحمن انتي اشرف بنيه شفتها وعرفتها بحياتي..

من كلبك هالحجي ومقتنع بيه لو بعدك مفكرني مثل خاله...يعني اني مثل اخواتك ..معتبرني

لا اشرف من اخواتي بعد شتردين!

دنكت شال راسي 

انطيج تأكيد اقوة ..سماء اني لو حاس مجرد احساس انه انتي مو خوش شتتصورين ابقى يمج ١٠ ايام وما احصلج..

يااا ..مو عيب هالحجي!!

لا مو عيب هذه الحقيقة انتي شابه ....تخبلين واني هم شاب عازب وابو ابويه محترك من العزوبية والكبت ..ولو حاس مجرد احساس انه انتي مو خوش وبيج مجال..تتجاوبين وياي مجان عفتج بحالج ..انتي تعرفيني ..اني ..العندي اكوله لا اخاف ولا استحي..

رائد فدوة عيب هالحجي..اسكت:

لا موعيب ..من اكولج ..المانعني منج شي واحد بس وهو شرفج واخلاقك ..واصلا اخاف عليج حتى من نفسي..اجيت اعتذر منج حتى يصفه كلبج من ناحيتي..واعرفج انه ..انتي منا وجاي مو مجرد بنيه تشتغلين ابيتي حتى تعيشين لا وحدة من اهلي الله يشهد..

الله يخليك..واني قبلت اعتذارك هاي هيه..

يعني تصافينا....ماكو شي بالكلب!!

اي تصافينا..

الحمد لله..

باجر اهلي يجون ..اني من الفجر راح اطلع ملابسي الي جيت بيهن اريد البسهن نفسهن اي ضماد اوعلاج اوي شي بقه ذبيه بالزبل ما اريدهم يعرفون اني جنت يمج!!

ليش يعني !!

تره حجيتلج ع خالتج الصاقطة ..هاي قذرة وكلبها وصخ وقذر مثلها اذا عرفت جنت يمج راح تشتعل الغيرة وتسود عيشتج وتضل تقره براس ابويه ..وحتى ابويه هم ميصدك اني وانتي ١٠ ايام سوة وحدنا وماكو بيناتنا شي..فما اريد حجاية تمسج منهم

ماشي 

طبعا راح اطلع من الصبح اروح يم اصدقائي واخابرهم ع اساس جاي من البصره حتى نتجمع كولنا ع الغدة ماشي

ماشي..

هسه اكولج تصبحين ع خير اروح انام وانتي هم نامي..

تصبح ع خير ربي يخليك

راح نام خليت ملابسه الي اجه بيهن ع التخم كعد الصبح لبسهن صادف يوم جمعه سويتلة ريوك تريك وراح.. بثمانيه دك تليفوني رقم الحجي

الو هاشلونج بتي سماء

الحمد لله حجي شو تأخرتوا

جايين بالطريق اني وخالتج..واحتمال رائد هم يوصل اليوم سويلنا غده مرتب 

صار تدلل حجي ..

وسده التهيت اسوي غده..

وفعلا التمو ع العشه ومن خلال حجيهم عرفت انه سماح عقدت على ابن عمها سعد الي جان خاطبها وراح تضل يم بيت عمها ابوسامي حتى تجهز غرفتها وغراض عرسها ع كيفها هناك لان صعبه تروح وترجع من بغداد لاربيل ..ومن كامو من العشه هو بقه يغسل بيني وبينه ابتسامة خفيفة...همه صعدو فوك وهو دخل لغرفته وره شويه طلع ..واجه يمي واني اغسل مواعين كلي:

باجر رايح للبصرة صار هوايه متيه الشغل وانطي رفض لمكالمات العمال..

هااا تروح وترجع بالسلامة

طلعلي فلوس من جيبه..

شنو ذني رائد

اششش..اخذيهن وسكتي..

مو عندي..هوايه فلوس

معليه عندج ما عندج المهم اخذيهن:

اي شسوي بيهن!!

اشتري عصافير وطيريهن! المهم ارجع الكاج صارفتهن كلهن

ههههه

ثاني يوم راح....الايام تمر عادي اني بالدوام..ودنستعد لامتحانت نص السنه.. واكو بنات صديقاتي مأجرات بيت قريب كولش ع الكليه هنه من المحافظات والعام جنت قبل الامتحانات اكول لخالو ..واروح ادرس وياهن ع الواهس حتى مرات جنت ابات يمهن بالبيت ميحجي خالو..وتوسلن بيه تعالي..يمنه خلي ندرس ونسولف ونضحك هذه اخر سنه وتبقى ذكريات من نتخرج كتلهن ما اعتقد خاله راح تقبل بلكي ايام الامتحانات تخليني اجي اقره يمجن بالنهار

رائد::::

رحت للشغل اول يوم وثاني يوم عادي ملتهي ويه العمال والحماميل....وطبعا....تعب وسهر بس ثالث يوم شويه اخف ..وبس صار عندي مجال ووقت استراحة..روحي ..سافرت مني لبغداد..هناك يمها....خو الذكريات موتتني ..كل لحظة تجي ع بالي ههه اباوع ع اثار الحرك خفيفة باديه باقيه واتذكر من جانت توكلني...لو مهتمه بيه لو تمسح حلكي لو تغسل وجهي وتنشفة لو تساعدني البس..هدومي.. لو تمشط شعري ع كيفها..لو جسمها يلمس جسمي بدون قصداثناء ماتكون قريبه ..مني..ذكريات ..ما اكدر اغمض عيوني عنهن واتناساهن اصلا ويه كل لكمة اخليها بحلكي افتقدها..اويلي طعم اصابعها لهسه بحلكي..عيونها ملاحكتني وين ما اروح ..صوتها باذني ضحكتها تمشي بدمي كل شويه صافن والعمال يفززوني ..يحجولي ع الشغل وع مواقف تصير وياهم وبالي مو يمهم ..وانتبهو عليه مرات يسالوني شو صافن انت ويانه لو وين..ههههه..والله مو ياهم بالي هناك صارلي اسبوع بالبصرة كتلني الاشتياق..متت من البعد اتمنى الايام تخلص بسرعة المفروض ابقه اسبوعين بس بيوم التاسع متحملت وره الغده ..كتلهم راجع لبغداد..

وصلت لبغداد المغرب..بس الجو زفت مغيمه ..وضلمة..واول مفتت بمطقتنا زختها..مطر قوي...وصلت للبيت فتحت الباب ودخلت السيارة ..لاحظت الكهرباء مال البيت..اشتعلت وانطفت مرتين طبعا بس بيتنا....عرفت هذا الواير نفسه الي يطبك كل مره من فوك ..كلت اصعد اخذ خشبه وافصل الوايرات ..فتت جوه طفت بس البيت بيه شواحن ضواهن خفيف واعرف ..ابويه وحنان بعدهم مراجعين للبيت همه يرجعون بثمانيه او قبل الثمانيه بشويه...يعني سماء وحدها والكهرباء تطفه وتشتعل..وحتى متخاف وتتفاجأ بيه من فتت للصاله صحتها:

سماء..سماء وينج !

سمعتني جتي ركض بيدها شاحن..

هلوو..هلوو..رائد..الحمد لله ع السلامة

هلو سماء شلونج..

الحمد لله 

هههه كاعدة بالمطبخ والمطبخ اضلم..

اي والله ..هسه جانت تشتغل الكهرباء

بسيطة هسه اسويها..

انطيني ماسحة..

راحت جابتلي ماسحة..وجتي فتحت الخشبه ..

انطيني الشاحن ..

انطتني الشاحن..وكالت:

شتسوي بالماسحة!

الواير من فوك طابك بس افصله تشتغل..

منين يعني..

منا قريب..

صعدت ركض...وبيدي الشاحن فتحت باب البيتونه المطرحيل قوي بسرعة نكعت قبل ما اوصل للواير..سمعت صوتها:

اوكف ..اوكف رائد

اجتني ركض والمطر يزخ

لج وين جايه لتتمرضين..

وين رايح شتسوي بالضبط

لج نزلي نكعتي مي اريد افصل الواير..

تفصل الواير شنو !!

ذاك الواير شوفيه بس اخلي الخشبه بيناتنهن..

ركضت وكفت كدامي

مستحيل. .متروح..

هههه شبيج مخبلة انتي!!

كتلك متروح الدنيا تمطر قوي شوف شلون نگعنا اني وانت ..

ولج بالخشبه..مو بيدي

متروح كتلك الخشه تبللت بس توصل يم الكهرباء تموت والله

ههههه ما اموت لتخافين؛

والله تموت انزل رائد بروح امك انزل!!

وخري عن دربي خبلة...كل مرة اسويها ..اني؛

وكفت يم الحايط..

انطيني الخشبه اني اسويها انزل انت!!

يعني اني اموت وانتي متموتين!!

اي انت يمكن تموت ابن جيرانا مره صعد للكهرباء بالمطر ومات!!

ضحكت..

ههههه ولج نزلي راح تتمرضين ..هدومج تصب مي!!

ما انزل والله..

بسرعة غافلتني واخذت الخشبه من ايدي ولزمت ايدي..

يله خلي ننزل ..هسه يوكف المطر وتجي الكهرباء

امري لله..

نزلنا جوه

وكفنا بالمطبخ خطية تراكها نكع وشعرها..ينكط مي وترجف من البرد ..خلت الشاحن ع الطاوله بيناتنا:

روحي بدلي يمعودة كتلج البرد!!

لا ما اروح اخاف اروح وتغافلني وتصعد للكهرباء وهناك تموت!!

طكيت من الضحك..

ههههه 

كوه حجيت مختنك من الضحك:

عمي واذا متت كل الناس تموت شنو انتي خايفة علية:

زمخت بيه ..

لا مخايفة عليك طبك مرض تريد تموت روح موت بمكان ثاني مو تموت هنا يمي!!!!

ههههه ليش..يعني شنو الفرق!!

اي موت بغيرمكان...اني اخاف اشوف واحد ميت

صفنت ع حجيها..هههه تكول روح موت بغير مكان اخاف اشوف واحد ميت ...خرب عمي..شكد مشتاقلها..وشكد مشتاق الحجيها الي يطلع عفوي هيج من گلبها بدون حساب..اقتربت منها هي بيدها الخشبه مال الماسحة فتراجعت ليوره ..منا لما طخت بالكاونتر من وصلت يمها خلت الخشبه وراها:

ما انطيك الخشبه..

هههه عوفج من الخشبه ..هسه انتي ميهمج اموت ما اموت ..بس المهم ما اموت يمج لان تخافين من الميت مو!!

اي..

شفتها ترجف مبلله كولها من فوك ليجوة ..وتراكها لاطش على صدرها ضوة الشاحن قوي وموجه عليها طلعلي كل تفاصيلها..وحتى لون عيونها يرهش بالضوه ..ورموشها..مبللات واني بس الله يدري شكد مشتاقلها صارلي ايام منايم بس افكر بيها..

شافتني ساكت 

لتتعب وتنتظر ما انطيك الخشبه..

بعد ما اتحمل خلص كلبي ..ادنيت اكثر ..وحضنتها 

ما اريد الخشبه اريدج انتي♥️♥️♥️

هي جفلت وتفاجئت واني منطيتها حتى فرصه يصير عدها رد فعل بسرعة لكفت شفتها ميت ..ميت شوگ الها..جان ابالي بس ابوسهه بوسه وحدة واوخر عنها بس من حضنتها مكدرت ..اعوفها..بقيت ابوس بشفتها..والفوك والجوه مره وحده وحدة ومره اثنينهن بحلكي ..هي بالبدايه جفلت بعدين حاولت تدفعني..باديها مهتميت لاديها اصلا ما اكدر ابعد حلكي عن شفتها رحت بغير دنيا ..ومن قاومتني زادت لهفتي..بقيت ابوس بيها اسرع ع شفتها ..هدين شفتها دنكت ع ركبتها سمعت صوتها:

رائد..فدوة عوفني..بروح امك عوفني..عليك الله ..عليك رسوله لتسويلي شي..فدوة هدني عوفني..

تتوسل بيه خطيه ..وهالكد متوسلت عفت البوسات وحضنتها حيل وجهها بصدري وحاضنها كل قوتي ..هي تحاول تخلص جسمها ..كتلها:

ثواني..بس ثواني ..لتخافين ثواني..!!

وطبعا مااشرح الي صار ..بهالحضنه ..مهديتها الى ان ارتاحيت ومن خلصت ثواني راحتي فلتتها..من ايدي.. كالت..ودموعها يجرن:

فدوة..رائد خلي اروح من يمك ..لتسويلي شي..فدوة لتسويلي شي!!

بلحضتها صحيت ع زماني ومن صدمتي ..عفتها رحت للحمام ..طبعا كولشي صار من ناحيتي وصار بملابسي ..هي مفتهمت شصارلي..ولا عدها اي فكرة .. لان سمعتها كالت لتسويلي شي...وكفت جوه المي بملابسي ..صح ارتاحيت بس تندمت...مرة الوم نفسي..ومرة ابرر الها..واكول مشتاقلها والكبت دمرني دمار خطيه..مفهمت الي صار وياي بس اني شكد نذل ..يعني شتفاديت..لحظة ضعف وخلصت والبنيه هسه سقطت من نظرها..واكيد كامت تخاف مني يعني..مكدرت اصبر ..وبحضنه ..ممفهومه لكيت راحتي خررب حظي..هسه شنو حالها وبشنو تفكر..صح مسويت الها شي حقيقي وهي بهدومها واني بهدومي ..بس..خطيه شنو ذنبها..هي تتحمل انفعالاتي وغريزتي حتى لو من بره برة..

نزعت ملابس بالحمام طبعا الشاحن مال الحمام ضغيف تلمست بس منشفه معلكه لفيت نفسي ورحت لغرفتي لبست ملابسي .وطلعت:

سماء..سماء وينج 

مترد

سماء ردي 

دورت ماكو بالمطبخ....اخذت الشاحن دورت الصاله ماكو ..فتحت غرفة رواء ماكو رحت لغرفة سماح ردت افتحها مقفوله من جوة..

سماء انتي هنا مو!!

مردت

اعرف انتي هنا ....طلعي اريد احجي وياج..

محجت:

زين اني طالع..

طلعي بدلي ملابسج لتتمرضين..

هم مردت..

والله طالع من البيت ..طلعي بدلي بروح ابوج وامج لتخافين ..

كلت خلي اطلع..اكيد خايفه مني لان حضنتها وبوستها هالشكل ..والا هي متعرف شصار وياي ..ميخالف حقها تخاف بالليل ارجع ..اروح وارجع من يصعدون حنان وابويه فوك اروح اعتذر منها...

سماء:::

بقيت بغرفة سماح قفلت الباب ارجف مثل السعفه مدري من البرد مدري من الخوف الي بجسمي..وابجي ..بدون توقف ..وافكر ..هذا شبيه رائد شجاه..شبيه هيج ..غافلني وجفت عليه يبوس بيه ..وشنو من بوسات ملخ شفتي تملخ وركبتي جلدها حسيته انشلع بحلكه....شبيه يربي شنو شارب شي لو يبلع حبوب اول مرة اشوفه هالشكل ..اكوله عوفني واتوسل بيه ميسمعني حتى من بطل من البوسات حضني حيل كسر عظامي اتوسل بيه واحلف بيه يكولي ثواني بس ثواني..وبعدين تنفس ع السريع وهدني شبيه والله مو طبيعي يمكن شارب لو مكبسل هو حيل مؤدب وميسويها ومعندة هيج سوالف..

اجه حاجاني محاجيته بعدني خايفه منه..وافكر اذا شارب لو مكبسل اخاف اطلعله ويروح ..يسويلي شي لو يغتصبتي اي اليشرب ويكبسل ميدري بنفسه.. بقه يحجي وكال راح اطلع ..سمعت صوت سيارته تأكدت هو طلع..طلعت بدلت ملابس باوعت الساعة راح تصير بثمانيه شلون ابقى هيح كاعده هسه يجون الحجي.. خاله ..ويشكون بيه خلي احظر العشه وما ابين شي..

بلشت ارتب المواعين ع الطاوله اديه يرجفن واسناني اطكطك... حسيت بيهم فاتو كلت يربي هدي.كلبي ليحسون بيه ..واذا عرف الحجي ابنه ..شارب لو مكبسل ومتحرش بيه يجوز يتعاركون وانطرد ...بينما دا اصب خاله كالت:

وج شبيج تتراجفين!!

خاله مصخنه شويه..

اخذي دوه ...خو ما تضلين تتراعصين!!

اي هسه اتعشه واخذ براسيتول..

تعشو وصعدو..

بقيت وحدي بالمطبخ لميت المطبخ بسرعة ..كلت خلي اختل عنه بغرفة سماح اخاف يجي وبعده تاثير الشرب لو الحبوب بيه ويروح يأذيني لو يغتصبني اسم الله اسم الله

وفعلا ختلت بغرفة سماح...وهم وره ساعة اجه دك الباب مفتحتها:

سماء ادري انتي هنا ودتسمعيني..اسف ..والله...

مرديت عليه..

ما اعرف شكولج..حتى اسف هاي متفيد..طلعي خلي نحجي بروح اهلج..

الفصل التاسع من هنا 

شكرا لزيارتكم عالم روايات سكيرهوم