رواية روح أيوب الفصل السابع بقلم رحبة
-مش هشيلها!
قولتها لماما وهي عايزاني أشيل صنية العصير عشان أقدمها للأستاذ اللي قاعد برا !
بس أنا مبشيلش صواني عليها أي شئ سائل عشان بتوتر وممكن تقع عليا !
-طيب هشيلها أنا وانتِ شيلي الحلويات
-حاضر
طلعنا سلمنا على الناس كدا كدا أنا عارفه طنط منال مامت العريس لإنه جارنا لكن مكنش فيه بنا تعامل اد كدا هو كام موقف جمعونا بحضور مامته وخلاص !
وقعدنا وقعدوا يتكلموا شويه وأنا سرحانة في عزال بيتنا لحد م بابا قال هيسيبونا لوحدنا !
امم..لقد وقعنا في الفخ
-السلام عليكم
عامله اي ؟
-وعليكم السلام ،الحمدلله يا بشمهندس
وسكتنا، يا سلام لو دي الرؤية والا بلاش من غير توتر ولا حاجه
-تحبي تسألي عن حاجه؟
-كلمني عنك
-أنا أيوب القاضي ،مهندس وعندي شركة صغيرة أنا وعمر صاحبي والحمدلله الأمور ماشيه ،عندي فرح أختي ويونس آخر العنقود انتِ عارفاهم وبصلي الحمدلله وحافظ قرآن وبحاول أحسن علاقتي بربنا زي أي مُسلم بتوفيق ربنا الحمدلله
-اللهم بارك ربنا ينفع بيك يا رب يا بشمهندس
وسكت !أنا مش عارفه أقول اي ،يعني أتكلم عادي براحتي والا أسكت
-مش حابة تقولي حاجه؟
-أتكلم براحتي عادي ؟
ابتسم وقال
-خدي راحتك
-بص أنا كل اللي طالباه إنك تكون شخص أمين
أمين عليا وعلي قلبي ،حد أقدر أطمن وأنا معاه وأثق فيه من غير م أتردد ودا مش سهل عليا أنا معرفش امته أبقى أطمنت امتي أقول هو دا الشخص اللي هكمل معاه وأنا قلبي وعقلي راضيين فأنا سايباها على ربنا إنه هيخترلي الخير وإن شاء الله لو فيه نصيب معاك أتمني يعني لو في يوم زهقت أو مليت تقولي محبش أتوجع من حد كنت مدياله أماني وبانيه معاه أحلام بإذن الله يعني
ويكون شخص يتقي ربنا فيا يعاملني باللي ربنا أمر بيه واللي الرسول عليه الصلاة والسلام وصى بيه
أنا شخص محتاج تصبر عليه أنا مش بدِّي بسهولة وبرده مش هاجي عليك ان شاء الله
أنا كدا قولت كل اللي عندي ولو عندك اعتراض على حاجه اتفضل
اتنهدت بارتياح كإن حمل كان على قلبي واتشال
وهو كان مركز مع كل كلمة وبيتفاعل معاها بإبتسامة جميلة
حبيتها!
محسيتش إنه مضايق من حاجه بس برده سألته
-ربنا يقدرني وأكون لك اللي بتتمنيه
وربنا م يجيب وجع من طرفي أبدا
بصيتله بدهشة من الجملة اللي مسمعتش أحن منها لقيته مبتسم زي ما هو !
شخص تقيل راسي كدا مش خفيف لأ وفي نفس الوقت عينه حنينه مش قاسية
حاولت أحفظ ملامحه وأركز فيها قبل م الرؤية تخلص عشان بعد كدا لازم أغض بصري
ملامحه تحفة اللهم بارك
-ينفع أسال سؤال؟
-اتفضلي
-هو انت جيت لي ليه؟
-ايه؟!
-قصدي يعني طنط منال اللي جايباك عشان هي بتحبني ؟
-مش فاهم
-من الآخر "هل أتيت لأنني أنا أم لأنك تائه ولا تعرف سوى عنواني ؟!"
ضحك بصوت عالي ضحكة تخطف
-ااه فهمت
اطمني مجبنيش هنا غيرك انتِ
ابتسمتله وسكت
مكنتش عايزة أسمع أكتر من كدا مش عايزة أسمع كلام قبل أوانه ،بس أنا نفسي اللي هبقى معاه بإذن الله يكون جاي ليا عشاني عشان روح مش عشان حاجه تانيه
ملقيناش حاجه نقولها
-طب اي هنقعد كدا ؟
-تحبي نتكلم في حاجه تانيه
-اه
افتح مواضيع عشوائية وناقشني فيها
بصلي باستغراب بس معترضش
اتكلمنا في الهندسة بحكم شغله والطب بحكم شغلي والاقتصاد والكورة والدين وأنا مبسوطة شخص مثقف الكلام معاه ميتشبعش منه كل كلمة بتطلع منه بتسَكِّن قلبي وعقلي!
-أتمنى يكون نقاش مُثمر
ابتسمت له
-جدا الحمدلله
عجباني لغة الحوار وإنك مش متعصب لرأيك
-أنا بحب أسمع ولو الرأي مش مناسبني بتقبله لكن مش شرط أنفذه
-وأنا حابه أسمعك
قولتها بابتسامة والكلمة خرجت مني وأنا مش حاسه
-مش هتزهقي ؟
قولت بثقة
-عمري
-وأنا جاهز
القاعدة كانت هادية وماشيه بسلاسة الحمدلله لدرجة الوقت عدي ولقيناهم داخلين وقعدنا في جو لطيف بحكم إن كلنا عارفين بعض أصلا ماما وطنط بيتكلموا وأنا وفرح سوا وبنلاعب يونس وهو وبابا وعمو بيتكلموا
بابا قالهم آخد وقت أفكر
ملوش لزوم يا حاج بس هنعمل اي !
استأذن بابا يقولي حاجه قبل م يمشي
-متخليش غيابك يطول
وبإذن الله ردك هيفرح قلوبنا كلنا
مشي من غير ما أرد وأحسن عشان مقولش إني موافقة !
عدي يوم واتنين وتلاتة !
وكل يوم بصلي استخارة وحاسه إني مرتاحة ومفيش حاجه حصلت تثبت العكس
دا قلبي وعقلي الاتنين اتفقوا ! رائع!
قولت لبابا إني هبلغه أنا وبابا وافق وقاله ييجي
كان متوتر ضحكت علي شكله وهو مش عارفه إني موافقة من المره اللي فاتت أصلا !
-السلام عليكم
-وعليكم السلام ،فكرتي ؟
-ايوا ، عشان كدا انت هنا
قال بهدوء
-وايه ردك؟
-قبل م أقولك ردي
أنا مبشيلش صواني ،هتشيلها بدالي ان شاء الله؟
ابتسم
-يا سلام ! ان شاء الله هشيلها وأنا راضي ومبسوط
-اذا كان كدا ماشي
-ماشي ايه؟!
حاولت أقلل التوتر
-أنا قولت ممكن متلاقيش حد يسمعك غيري فقررت أوافق
بصلي بفرحة
-ايه؟! موافقة ؟!
-ايوا
-الحمدلله ،ربنا يكملها على خير يا رب
ابتسمت له
-يا رب
مشي وهو راضي وأنا راضية بيه
الأمور مشيت ببساطة الحمدلله ربنا كان ميسر كل حاجه
كل يوم بتأكد إن أيوب محدش ينفع يسمعه غيري وأنا مينفعش أحب غيره 🤎
شكرا لزيارتكم عالم روايات سكيرهوم
