رواية قلب مغتصب الفصل التاسع 9 بقلم ورود الخالدي

رائد:::::

هي خاتلة بغرفة سماح دكيت الباب اريد احجي وياها ولو حتى ما اعرف شنو اكولها..شلون ابرر الي صار..كل تبرير مراح يقنعها ..خطية خايفة مني وقافله الباب بحرف متقبل ترد عليه بودي اكسر الباب وافوت اخذها الغرفتي واحضنها للصبح حتى كلبي يطمن عليها بس هذا حلم وميتحقق ..حاليا. حاجيتها اكثر من مرة ردتها ترد ..مردت فكرت كلت خليها تهدا وترتاح والصبح احجي وياها هسه بعدها الخوفه بگلبها مني واكيد مراح تفتحلي رحت لغرفتي حتى..ممتعشي نزعت حذائي ولان جاي اليوم من البصرة وميت من التعب نمت بملابسي مثل الجنازة محسيت ع نفسي شكد نمت ..كعدت الساعة بالتسعه كبل وعدل رحت للمطبخ لان من طلعت من الصاله شفت غرفة سماح مفتوحة فكرت الكاها بالمطبخ لان عدها عطله هالايام قبل امتحانها الي يصادف باجر..

بس ملكيتها بالمطبخ..واصلا البيت فارغ واضح بس اني بالبيت ابويه ومرته طالعين ..وهي ماكو..اليوم سبت هي ماعدها دوام يصير لان امتحانات نص السنه ..مخليهم يداومون السبت يجوز اني متوهم واليوم اول يوم امتحانها خلي انتظر..اووف خطية راحت تمتحن..وهي ماكلتلها هبطة ..مني

كلت خلي انتظر اكيد تمتحن وترجع من وكت قبل ميجون..ويصيرلي مجال احجي وياها بس شحجي ..شأكول اكلها مشتاقلج..جنت مشتاقلج من رحت للبصرة لحد هالحظة افكر بيج..خلصت ليالي سهران وعيونج ..مسهراتني ..كتلني البعد وجيت وكلي لهفة اشوفج..مردت اخوفج ...ردت اخذلي بوسه وحدة زغيره تهدي كلبي بس شسوي ضعفت..اي والله ضعفت كدامج ..ومكدرت اهدج ..اووف حجي مخربط ما اكدر ارتبه واوصله الها بقيت افتر بالبيت مثل المتيه روحه منتظرها ترجع وعيني ع الساعة كلما يمر الوقت اكول راح تفوت من الباب واشوفها واحجي وياها..بس تأخرت حيل تاخرت عليه ..ابويه وحنان جوي حنان حمت الاكل وكعدو يتغدون ..وهي ماكو صاحوني تعال تغده مرحت ..يمهم عيني ع الباب ما اكدر اسأل حنان عنها ولا ابويه ..اكيد يسالوني شتريد منها شكلهم بقيت متزوهر ومنتظر ..صعدو اثنينهم فوك ..صارت ساعة ٢,وهي ماكو....ممعقوله اكو امتحان هالكد يكول ومن جزت ال2 ونص عرفت الموضوع مو خالي..احتمال عافت البيت وراحت لاي مكان ..واحتمال الصبح مطلعتلها عذر وحاجية ويه اهلي ..ورايحة ..بس وين تروح معدها مكان غير هنا...من ايست من جيتها حسيت بوحشه وبغربه بالبيت يعني شنو هاي هيه راحت بعد ما اشوفها..

ما اشوفها شنو غير اتخبل ...بقيت افكر وين راحت..ووين ممكن تكون هسه وتذكرت رقمها عندي..اتصلت بيها ..دك دكتين وانطتني رفض...خرررب ليش تنطيني رفض..دكيت مرتين 3 مردت رابع مره ردت ...

تفضل منو حضرتك!!

انعل ابو حضرتي لج وين انتي؟؟؟

رائد؟؟

اي صخام!

بسرعة سدته بوجهي...خرررب اليوم اموتها..على حرگة كلبي هاي..اتصلت ..رفضتني مرتين ٣ رفضتني ..دزيت رساله كتبت بيها:

سماء ردي عليه ..لا اكلب الدنيا اليوم

بعدها الرساله مواصله رمشتلي.

اتصلت...عليها:

لج ليش تنطيني رفض!

مو انت تصيح واني طلعت برة حتى اكدر احاجيك!!

ليش وين انتي وطلعتي برة

يم صديقاتي ..دا ادرس!

صديقاتج شنو!!

اي مو هنه من المحافظات وماجرات بيت قريب عن الكليه مثل القسم..واني كل سنه ادرس يمهن بالامتحانات كلت الخاله الصبح وللحجي وكالو روحي..

شويه ارتاحيت من عرفت هي رايحة تدرس بس بعده كلبي مشتعل نار

انطيني العنوان فورا

شتسوي بيه!!

اريد اشتري البيت😁😁..يعني شسوي بيه غير اريد اجي عليج هسه؟؟

ليش!!

سماء..لتطلعيني من طوري..اريد احجي وياج!

بس اني ما اريد احجي وياك!

زمخت بيها بكل صوتي:

سماااااااء😡😡

شتريد مني رائد 

كتلج احجي وياج حجايتين وروحي !

ماشي ..بس انت زين ..يعني طبيعي..هسه اشو حيل عصبي!

شبيه مو طبيعي شنو شفتيني انطح بالحيطان!!!🐏🐏🐏😁😁

جنت احجي وصاير نار انطتني العنوان رحت الها طاير بالسيارة وصلت للبيت كلت ما ادك الباب خلي اتصل ..

.اني بالباب..

طلعتلي وصلت يم السيارة:

صعدي

فتحت الباب صعدت يمي..طبعا ما اعرف شلون ابدي الكلام وياها اصلا ممجمع ابالي اي عبارات ..الها..

سماء اسمعيني..

قبل ما احجي كالت بعصبيه:

اوكف ..لتاخذني بصوتك وبعصبيتك رائد اني الي اريد احجي واريدك تسمعني بالاول:

سماء..اني..

قاطعتني

ليش..ليش رائد ..شاب مثلك ابن عائلة مؤدب وحباب وخلوق وتربيتك حلوة ..والله رازقك..وعين الله عليك ليش ادمر نفسك!!

استغربت من حجيها...بس فكرت خلي اسمعها شتكول:

ادمر نفسي!!؟؟

اي ....ادمر نفسك ..عبالك اني غبيه وما افهم سبب تصرفك البارحة عبالك ما افهم انه انت مو بوعيك...ليش تسلك. طريق الشرب لو الحبوب لو المخدرات..انت متقرا متابع متشوف الدنيا شصاير بيها بسبب هالسموم الي دمرت الشباب ..الاخ يقتل اخته لو يغتصبها..والابن يقتل امه واخواته ..واخوانه والاب يقتل اولادة لو زوجته متشوف بعينك حالات القتل والاغتصاب والجرايم ..ليش هيج ..ليش تسوي هيج بنفسك شنو تريد تبررلي هسه تكولي مشارب لو مماخذ شي البارحة مراح اصدكك ..لان متاكدة مثل مدا اشوفك هسه انه انت مجنت طبيعي ..اصلا من فتت للبيت وردت تصعد للكهرباء عرفتك بيك شي....وعندي يقين انه هيح تصرف ميطلع منك وانت بوعيك اعرفك مثل ما اعرف نفسي حباب ومثقف ..ومؤدب .

باوعت بعيونها كلامها حرجني تكلي انت مؤدب وحباب ومثقف وميطلع منك هيج تصرف معتقدة انه اني جنت شارب لو بالع شي لهذا تحرشت بيها هسه شكلها اكلها موشارب وجنت بوعيي واعرف شدا اسوي خطيه..واثقه مني وتكول اعرفك اكثر مما اعرف نفسي واذا كتلها جنت واعي . راح تنكسر صورتي الحلوة بداخلها....ماكو غيرها خليها معتقدة انه اني جنت مو بوعيي احسن الف مرة الي ع الاقل عندي فرصه اعتذر واكلها ..اعذريني وهذا الشي ميتكرر وينسد الموضوع هالشكل ..

شبيك سكتت ملاكي كلام..متكدر ترد عليه لان كشفتك!!

ما اعرف شكلج اصلا ماعندي حته كلمة اعتذار قويه توصلج وتخليج تسامحيني!!

تريدني اسامحك..احلفلي ..كولي مراح تتقرب على هيح سموم قذرة واني اصدكك واسامحك:

سماء انتي.. شنو عبالج اني من ذوله المدمنين العايشين بغير دنيا والله اول مرة تصير عندي هالحاله وصارت صدفه وحتى بدون ما اعرف؟؟

بدون متعرف شنو رائد اكو واحد يدخل لجسمه سم بدون ميعرف؛

هسه احجيلج الي صار..وانتي حكمي:

ماشي احجيلي:

جنت جاي من البصره تعبان ..هلكان من التعب.. وراسي يوجعني من قله النوم والاجهاد..والدنيا تمطر بالطريق شفت واحد ..واكف يأشر للسيارات ..بس نكع من المطر كسر خاطري كلت اصعدة ..اوصله صعدته..شافني كل شويه الزم راسي..كلي شبيك كتله صداع عندي مو طبيعي..طلعلي شيت حبوب..كلي اخذلك وحدة وانت ..تصير زين والصداع يروح ..كتله شنو هذا كال مسكن صداع توب ..وهالكد مجنت دايخ حتى مقريت الشيت اخذت حبايه الطريق كله محسيت بيه بسرعة وصلت..ومن وصلت للبيت صار الي صار..البارحة ...من فتت سبحت صحيت شويه ومن طلعت باوعت ع الشيت شفته حبوب...كبسله ....ردت احاجيج البارحة واعتذر واشرحلج الموضوع انتي منطيتني مجال...

عززززااا وهسه وين وديتها الحبوب 

شمرتهن من الجامه وداعتج..وهالموضوع ميتكرر بعد وروح امي..سامحيني واعذريني ميت من الخجل بسبب الي بدر مني البارحة..والله ..اطلع من البيت كله وبعد ما ارجعله ولا...اخليج تشوفين خلقتي اذا متسامحيني هسه

لا..لا تطلع من بيت اهلك شنو...وين تروح!!

لعد سامحيني وانسي؛؛

مسامحتك رائد ..بس اخاف منك بعد ما اكدر أأمن ..بيك !!

خرررب شفتي..شفتي ..يعني ممصدكة الموضوع صار صدفه عبالج دا اجذب واني من ذوله اليكبسلون يوميه!!

دنكت ودمعت ..

لا ....لا حشاك..بس اني..يعني والله مستحيه منك انت..انت البارحة!! ..يعني ..كلما اتذكر الي صار اخاف وكلبي يرجف واكول شلون تصير عيوني بعيونك!!

استغفر..الله لج انتي شمسويه..حتى تستحين هو منو الي لازم يستحي اني لو انتي!!

سكتت..خطيه مستحيه مني لان بوستها..ذيج البوسات وحضنتها...كلت بنفسي حقها..خطيه اول مره ..تحس بهيج لمسه  

سماء.. حقج والله واعرف خايفة مني ..اني ..راح اطلع هسه للبصرة متشوفيني اسبوع او ١٠ ايام..مدة كافيه حتى كلبج يرتاح وتنسين الي صار..تمام!!

ماشي:

هسه نرجع للبيت مو،!

لا رجعني للبنات هسه شيكولن ليش راحت اصلا ..من اتصلت موبايلي صامت خليته وكتلهن راح اشتري فد شغله وارجع..

ارجعج لصديقاتج ؟؟لعد شوكت ترجعين للبيت .

بالسته ارجع هيج اتفقت ويه خاله

ماشي ترجعين ومتلكيني بالبيت..

رادت تنزل...فتحت الباب ..قبل متزل التفتت عليه:

اني مسامحتك رائد لتفكر هويه وتأذي نفسك بالملامة..ماشي..

نزلت من يمي ...مشه الفلم عليها ...يا إلاهي هاي شنو من بنيه ..يعني اكو بهالدنيا بعد ناس هالشكل نيتهم صافيه ..لا واثقه بيه..تكلي متطلع منك هيج تصرفات ..اويلي..صح جذبت عليها..ومستخطيها لان صدكتني بس احس جبل .. وانشال عن كلبي ..من كالت مسامحتك هههه شنو كالت بالاخير كالت مسامحتك لتفكر هواية وتأذي نفسك بالملامة ..لا وخايفة عليه خاف اضل الوم واكل بنفسي...هاي شنو من كلب عدها..خرررب يومها...احبها..اي والله..اموت عليها ..وين الكه مثلها..احبها ياناس...وروح امي اله اتزوجها

اي اتزوجها ..شمنتظر ..اخذت كلبي مني وميت عليها ليش ما اتزوجها بعدين عمري فوك الثلاثين شمنتظر.. ولو فطيرة وراح اتعبني بفطاريتها بس احبها..اويلي هيج مرة ترفة وتملخ ..شلون..حياة حلوة راح اعيشها وياها وشراح تخلفلي من خلفه ..تخبل.. هسه ما اكدر افتح موضوع خطبة وزواج خطية عدها امتحانات..واذا افتح الموضوع ويه ابويه وهاي الصاقطة مرته تعرف تتخبل ..ومن اروح للشغل تسود عيشتها وتأذيها..خليها تخلص هاي السنه يله ..اتقدم خطوة بموضوع الزواج وين تروح يمي وكبال عيني حبيبتي♥️♥️♥️

سماء:::

خلصت امتحانات نص السنه....وبدت العطله وباول يوم العطلة رجع رائد من البصرة طبعا ..بعد اخر لقاء بيناتنا ..هوايه امور تغيرت واكيد صارت فجوة بيناتنا ..اني استحي منه ..وهو هم حاسه بيه حيل متأذي يلوم بنفسه بحيث من اجه كلامنا قليل بس سلم عليه ..ووكت الاكل اصبله وياكل..نظراته دافيه كلها اهتمام ...بس منفتح اي موضوع نحجي بيه الايام تمر والعطله خلصت هو يروح ويرجع عادي يبقى ايام بالبصرة ..ويرجع البغداد وسماح جتي من اربيل بقت يمنا شهر ونص ورجعت لاربيل هم تجهز ..وعرفت من خلال كلامهم انه ..زوجها ..مراح يسكنها ويه اهله غيروا فكرتهم عن الغرفة والسكن يم اهله لان حالتهم زينه فمشتري بيت وديأثثون بيه لهذا ..تروح وترجع ..وهي موزغيره عمرها ٣٠ سنه بس الي سمعته ابن عمها جان متزوج ومرته ميته وعنده ٢ جهال وعمره ٤٦.. فمن جتي هو جابها وراح ومن رادت تروح اجه هو واخته اخذوها مرة ثانيه ..اما رواء فتكسر خاطري احسها متحب تبقى عدنا تجينا قليل مرات تبات ومرات بنفس اليوم تروح ومن تجينا خالتها كل شويه تخابرها تسميها يمه ..ها اكلتي ها شربتي ..تسأل عليها ومبينه تعاملها مثل بتها ومعوضتها عن امها لهذا متجينا لان خاله تخاجيها باسلوب جاف ومبينه هم تكرهها مثل مثل سماح...بس من خلال حجيها عرفت انه رائد كلما يجي من البصره يمر على اخته الزغيره وياخذها للمولات يشتريلها اشكال الوان ..وينطيها مصرف ويوصي عليها خالته وبنات خالته...

ايام السنه الاخيرة الي بالكلية تمر سريعة وبعد شهر على امتحانات نهاية السنه....والبنات من هسه ضايجات لان راح نتفارك وكمنا ناخذ صور تذكاريه بموبايلاتنا واخذت صور كومة ويه البنات بحسن نيه بس ما ادري هالصور راح تطلع عليه بكارثة تنتظرني....

رائد ::::

جنت بالبصرة دا اجيك الحمولات دك تليفوني برقم غريب شلته واستغربت من كلي المتصل المكالمة من ادارة الجامعة ..وسألني 

انت زوج الطالبة سماء عزيز 

من سمعت اسم سماء لعب كلبي مترردت بسرعة كتله 

اي ..اني زوجها....خو ماكو شي!

مطلوب من حضرتك الحضور للجامعه ووياك ..وثيقة تثبت انه انت زوجها!!

بس اني هسه بالبصرة!

ممكن تحضر باجر..

تمام

سديته مباشرة اتصلت بيها

الو ...سماء..

ردت عليه بس مبينه تبجي:

رائد..

وبجت:

لتبجين..سماء اخذي نفس اهدي

خلي اطلع من الجامعه واتصل بيك..

ماشي بس اهدي لتبجين

عشر دقايق ورمشتلي خابرتها..بعدها تبجي!

هسه اني شفتهم وانتي تفرفحين 

رائد؛

خره على رائد احجي انتي زينه ....بس لاحادث بسيارة الخط واحد مات وشفتيه ودتبجين ..اهدي اهم شي انتي ممتأذيه

لا..لا مو حادث ..بس اكوشي صار..صار بالجامعه والله اني ممسويه شي هو الطالب تبله عليه..

تبله عليج شنو لج احجي شمسويلج وشلون تبله عليج 

ممسويلي شي..

عقلي طار..مني فكرت خاف معتدي عليها ..لو اي فكرة سوده من هالافكار:

لج احجي مسويلج شي ..يعني متحرش بيج ..معتدي عليج احجي لا اموتج

ما اكدر اشرحلك والله ..هو فعلا تحرش بيه بعد ماهددني!!

خررب تحرش بيج شلون بالجامعه لو وين اخذج وشسوالج ولاي درجة تحرش بيج لج راح اتخبل احجي بسرعة:

بالجامعه ..بس مسوالي شي هو هددني بصور وكام يحجي وياي حجي موزين اني ضربته راشدي..هو جرني وشك بلوزتي رحت لادارة الجامعه اشتكيت عليه ..كلهم هيه ضربتني ..وتعدت عليه ..واكو كاميرات موجوده طلعوهن وشوفوها هي الي ضربتني بالاول . طلعو الكاميرات وفعلا اني الي ضربته باالاول ويمكن راح يفصلوني ..

ومنين جاب صورج اذا مدازتهن انتي اله وشنو من صور ..احجي صور عاديه لو غير شي!!

والله مدازتهن اله اخذنه هوايه صور اني والبنات صور تذكاريه وهو مدري منين جايبهن ..ومسوي عليهن فوتو شوب ع اساس اني وهو ..بيهن صور مسويهن يخزن خفت منه لان كلي راح انشرهن اذا متجين للدرب وتسوين ويايه علاقة موزينه ..من سمعت كلامه ضربته راشدي ..متحملت احد هيج يكولي فضربته ..هو جرني ..رحت اشتكيت اتبله عليه ..وكال هي تجذب ..كولشي ممسويلها..رادت تصادقني وتقطني..بمبلغ فلوس واني رفضت انطيها تهجمت عليه داخل الحرم الجامعي وضربتي واني كدامكم مبين بالكاميرات بس جريتها.. رائد يمكن راح يفصلوني من الكليه..من رحت اشتكيت كالو لازم يجي..ولي امرج وولي امر الطالب وكدامهم نحقق بالموضوع ..كتلهم اني يتيمه بابا وماما متوفين ..ومعندي اخوه كالو اي احد من اهلج الي ساكنه عدهم خفت انطيهم رقم خاله لو الحجي خاله اذا عرفت تموتني ..معندي غيرك اضطريت اكولهم انت زوجي..

زين سويتي..اني....فورا طالع لبغداد!!

شتكول ..راح يفصلوني مو!!

منو يفصلج!! ..وروح امي اليوم اكلبها ..للدنيا...وهذا الطالب التاهمج خلي يحسب الله مخالقة . لو يضم روحة بشيشه احسله!!

رائد همه مصدكوني محد صدكني من حجيت.. والله اني ممسويه ..شي ..انت مصدكني مو!!

مصدكتج..لتبجين اني..جاي..واعلمه شلون يهددج ..هذا العار..

مادام انت مصدكني..هاي هيه حتى لو فصلوني ميهم!!

وج محد يفصلج والله اف..ص..ل راسه عن ج..ث..ت.ه اذا انفصلتي بسببه...اهدي وارتاحي روحي للبيت ..وانتظريني ..على كد وقت الطريق واني يمج ..

ماشي ..الله يخليك الي..

حركت من البصرة بسرعة ..بگلبي نار بس اريد اوصل لبغداد ..وهناك اعلمة هذا العار الامهات شتجيب ..خطيه ..مرعوبه وتفرفح حبيبتي ..صح ضايج ع الصار واعصابي نار بس..عبارتين كالتهن مهونات عليه الموضوع ..مادام انت مصدكني هاي هيه حتى اذا فصلوني ..والثانيه الله يخليك الي ..

سؤال بارت٩ تبدو الامور سيئة ومتشابكة واحداث البارت القادم متشابكة ايضا..ما الذي سيحدث لبطلتنا المسكينه وكيف سيستعيد حقها....وسيرفع الظلم عنها بطلنا العاشق المغوار!!

الفصل العاشر من هنا 

شكرا لزيارتكم عالم روايات سكيرهوم