رواية شيخ البصره الفصل التاسع بقلم مجهول
مشت الايام واني على نفس وضعي وهند تتفنن شلون تغثني وتضوجني ..
انعزمنا على الغدة بالبستان مال بيت خال ضرغام
لبسنا وجهزنا نفسنا ودنصعد بالسيارات
وهند راحت ركض وصعدت بالصدر يم ضرغام
جان ضرغام يعيط عليها
ضرغام:- انتي ماتستحين ماتكولين امي الجبيره وهي تكعد ليكدام
انزلي يلا كدامي وصعدي ليورة
الحجية:- يلا يمه خلي البنية كاعده.
ضرغام:- رجع باوع على هند
انه شدااحجي يلا انزلي.
نزلت هند وهي تأفأف وصعدت ليورة
نزل ضرغام وصعد الحجية ليكدام.و مروة ورقية و هند ليورة
واني دااصعد بسيارة فلاح جان يلزمني ضرغام.
ضرغام:- وين رايحة تعالي صعدي بسيارتي.
بلسم:- لا اريد اروح وية بثينة و سيارتك ماتكفي .
ضرغام:- لا تكفي تعالي.
جرني و كال لرقية ومروة يصعدون وية فلاح واني صعدني بسيارته. وهند تخزر بينا.
وصلنا للبستان وجان كلش حلو ومسوين كعده حلوه ونار بالنص وعليه قواري الچاي و ريحة الاكل نشتمها من بعيد..
بيت خال ضرغام الي همه اهل بثينة جان عدهم ولد ٢
واحد اسمه رافد عمره ٢٦ سنه ويشتغل وية ابوه عدهم بساتين
و واحد اسمه جمال عمره٢٣ سنه و عنده محل مال اجهزة الكترونية لأن كلش يحب الالكترونيات .
جانت هاي اول مره اشوفهم و اتعرف عليهم خاص بالبيج قصص عراقيه واقعيه واول ماسلمت على رافد هذا صفن بوجهي وراها عكد حاجبه ونزل راسه.
اني مادرت بال ..
رحنا يم النسوان جانو مسوين تنور من الطين و مسوين مثل المطبخ خارجي كلش حلو من يسوون عزايم للكرايب يطبخون بي .رحنا دنساعدهم و اباوع على ضرغام شلون كاعد وعيون الكل عليه من يسولف وشلون ماخذ الكعده بشخصيته وسوالفه .. شكد هيبه وشخصية بس شنو الفايده و هو راح اتزوج حتى ماعذرني وما حاول يكسبني. نزلت راسي وعيوني كل شوية لا ارادياً تروح لضرغام.
باوعت على رقية ومروة واشوف مروة مستحية وتباوع على جمال و جمال كلساع يبتسم الها.. ضحكت بكلبي واني اشوفهم هيج.
صبينا الاكل و كعدنا كلنا وهاي اول مره ننعزم ونكعد عائلتين سوه كل مره النسوان وحد و الزلم وحد بس هالمره كعدنا سوه.
واني اكل وكل مااشيل راسي الكه رافد يباوع ومن يشوفني انتبهت ينزل راسه.
كملنا الغدا وغسلنا و صبينا الجاي
وشفت بثينة ومروة و جمال كاعدين .. صاحتني بثينة ورحت يمهم وعيني على مروة صايره حمره من الخجل..
بثينة:- تعاي خيه اكعدي يمنا
جمال:- انه اليوم اول مره تنفتح نفسي عالاكل منين مااندار الكه حلويات كبالي
منا مرت ضرغام بس مو هذيج الي چنها عبسي
ومنا مروة ومنا رقية حتى الحجية طالعه حلوه اليوم
ضحكت على حجيه واباوع مروه منزله راسها .
بلسم:- نصي صوتك لا يسمعك الشيخ ضرغام مايبقيك عايش.
جمال:- چا حقه يغار انه عندي هيج حوريات واطلعهن؟
بهالاثناء جان يجي رافد:- شعندك واكف هنا يم النسوان امشي نكعد يم الزلم.
جمال:- يابه شصخم انه يم الزلم كل واحد شواربة تارسه وجهه والصوت يزرف طبلة الاذن
يعني انت تقبلها واحد يعوف الجنه و يروح للنار.
رافد باوع عليه:- اي والله جنة.. حس على نفسه و رجع عكد حاجبه :- يلا كوم كدامي شويه اثكل.
راحو رافد وجمال جان تجي عيني على ضرغام اشوفه يخزرني و يفرك بأيده.
كملت الكعده واضلمت الدنيا شوية كام ضرغام :- يلا خالي احنا نترخص وعاشت ايدكم عالكعده الحلوة بيت العامر ان شاء الله.
خالهم:- شرفتونا ونورتونا وليدي.
سلمنا و صعدنا بالسيارات ورجعنا للبيت دخلت للبيت جان يصيحني ضرغام:- بلسم.. تعاي جاي.
بلسم:- نعم؟
ضرغام :- صبيلي استكان چاي وجيبيلياه للصالة.
هند:- انه اصبلك جاي حبيبي.
ضرغام:- انتي اسمج بلسم؟؟
هند :- لا.
ضرغام:- وانه كلت بلسم تصبلي الجاي .
بلسم:- اوكي اني حصبلك و رحت وهند تريد تاكلني.
صبيت الجاي ودخلت للصالة.
ضرغام:- سدي الباب وراج.
بلسم:- رجعت سديت الباب و دخلت انطيته الجاي .
ضرغام اخذ الچاي و كال:- بعد ماكو روحه لبيت خالي؟
بلسم بأستغراب:- عود ليش؟
ضرغام كام على حيله واني خفت كلت حيضربني.
سحبني من ايدي و جرني طخيت بصدره
واتقرب عليه وهمس بأذني.
ضرغام:- انتي مالتي ومااسمح لأحد يتقربلج . وشفته لرافد شلون يعاينلج لا عبالج تعبر عليه هالشغلات وحسابي وياه بعدين.وحتى سالفة مروة وجمال هم معبرت.
بلسم:- اباوع بعينه وغركانه بيهن حسيت على نفسي وابتعدت عنه وكتله بس خطية مروة مالها دخل.
ضرغام :- اعرف مالها دخل هاي بنيتي انه مربيها واعرف اخلاقها.
بس للأسف ولد خالي مو زلم . روحه هناك بعد ما تروحون .
بلسم:- اوكي.
جان يرجع ضرغام يتقرب علية واني ارجع ليوره وانطخيت بالباب وحصرني .
ضرغام:- هسه انه شسويلج؟ البسج بوشيه واخلص لو احبسج بكلبي ومااخلي احد يشوفج؟
بلسم :- واكفه مثل الصنم مصدومه من كلامه الحلو و كلشي ماحجيت بس صافنه 😶.
وطبع بوسه على كصتي و راح كعد بمكانه و اخذ استكان الچاي يخوط ويباوع عليه.
اني من الخجل اريد افتح الباب دااطلع ما ينفتح .
وهو يباوع ويضحك .
اخر شي جريته حيل انفتح و انهزمت.
اول مافتحت الباب واشوف هند كبالي صايره نار تريد تكطعني
عفتها وصعدت لغرفتي سديت الباب ولزمت كلبي اول مره يحجي ويايه بهدوء بدون عياط وضرب اووووف ريحته بعدها بهدومي . وبديت احس بشعور الحب القوي اتجاه ضرغام واشتاقله واريده. وبنفس الوكت مدااتقبل فكرة وجودي اني و هند بحياته.
مرت الايام والشهور وضرغام يوم عن يوم احسه بده يفهمني ويعاملني بلطف .. وهند يوم عن يوم يزيد حقدها عليه خصوصاً ورة ماعرفت بثينة حامل وهي لحد هسه ماكو اي عوارض حمل.
وفلاح وبثينة حياتهم مثل العسل وفعلاً فلاح من عاشر بثينة حبها اكثر واتعلق بيها.
بيوم من الايام واكفه داغسل الحوش واجوي البنات من المدرسة فاتت مروة للبيت وجان هند تطلع لزمت رقية من هدومها وتكلها كم مرة كتلج ماتفوتين لغرفتي؟
رقية:- ماداخله لغرفتج.
هند:- جذابة شفت هاذ بغرفتج. تأشر وشايله بيدها سوار.
رحت عليها وجريت رقية من يمها وكلتلها روحي حبيبتي بدلي هدومج وارتاحي هسه اجي.
راحت رقية وانداريت على هند.
بلسم:- انتي على اي اساس تمدين ايدج عليها؟
هند :- هي انتي يالفصلية محد معينج محامي لا تحشرين نفسج بسوالف ماتعنيج اشتغلي وانتي ساكتة.
بلسم:-لا مااسكت ومااقبل تمدين ايدج لا على رقية ولا علي.
هند:- ياااا خوفتيني امشي يلا كملي شغلج وبعدها اصعدي نظفيلي غرفتي.
اني ضحكت بأستهزاء وكلتلها:-وانتي شبيج معوقة؟؟
جان تكلي هيييي شغلج هنا تخدمينا وانتي ساكته.
اني هنا بديت اخبث كافي فقر و فهاوة:-
لا عمري انتي غلطانه اني شغلتي هنا اداري زوجي و اطفاله و امه وبسسسس.
اشو هاي تخبلت وماحسيتها غير دفعتني و اتزحلكت رجلي و وكعت وبأثناء الوكعه انطخ راسي بالحافة مال محجر الحديقه و ماحسيت على شي وراها..
هند :- بلسم استفزتني و ماحسيت على روحي غير دافشتها شو هاي زلكت وانضربت براسها واغمى عليها . انه شفتها هيج انهزمت وعفتها.
ضرغام :- جنت كاعد بالديوان و فلاح وعمران و كم زلمه موجودين ويانه
دخل علينا وليدي علاوي
علي:- يابه يابه الحك خالة هند دفعت خالة بلسم وانضربت براسها.
ضرغام:- رحت اركض واحسن كلبي مفرفح وصلت للحوش واشوف بلسم مغمى عليها وطالع دم من راسها شلتها و كتله لفلاح روح اركض جيبلي عباتها
اجه هو وبثينة لبستها العباية و اخذتها ورحت للمستشفى .
بلسم :- فتحت عيني واشوف نفسي بغرفة و ضرغام لازم ايدي وكاعد يمي .
اني وين؟
ضرغام:- كمت على حيلي من سمعت صوتها .. شلون صرتي ؟ بيج شي ؟ راسج مأذيج؟
بلسم :- كعدت على حيلي لا مابيه شي بس وجع خفيف .
بهالاثناء دخل علينا الطبيب
الحمدلله على سلامتج.
بلسم:- الله يسلمك دكتور.
فتح لايت الفحص وفحص عيوني وكال لضرغام لاتخاف مابيها شي جرح بسيط وخيطناه بس الله سترها لو الضربة جانت شوية اقوى جان ممكن يصير عدها فطر بالجمجمة او اشياء ثانية لا سامح الله .
ضرغام :- الف الحمدلله والشكر.
الدكتور:- تكدر بس يخلص المغذي تسويلها خروج من المستشفى وترجع للبيت الحمدلله على السلامة مره ثانية.
بلسم :- الله يسلمك .
بثينة اجتي عليه:- الحمدلله على سلامتج خيه شلون وكعتي؟
بلسم :- باوعت على ضرغام ما عبالي يعرف هند الي وكعتني.
كلتلها :- اتزحلكت بالمي و وكعت.
فلاح:- هااا يعني مو هند الي دفعتج؟
بلسم:- هااا لا مو هند .
فلاح:- اي لعد يجوز علاوي ديچذب علينا ويغمز لضرغام بس ضرغام صاير اعصاب.
بلسم:- اني هنا عرفت علاوي شاف كلشي .
طلعنا من المستشفى و رجعت للبيت وخطية سهاد والبنات والحجية استقبلوني و صعدوني لغرفتي حتى ارتاح. ورة شوية اسمع عياط وصياح هند و ضرغام .
رقية وعلاوي رايحين مسولفين كلشي لأبوهم.
ضرغام:- ولج اليوم انعل والديج..شلون تمدين ايدج على رقية وشلون تدفعين بلسم
تريدين تموتين البنية؟
هند:- عساها بالموت هالحية الحقيره ام الزلم حتى انت تمشي وراها على عمى عينك.وهاي بنتك حرامية بايكة سواري.
ضرغام:- ضربتها راشدي وسحلتها من شعرها
هسه تلمين هدومج واشمرج ابيت اهلج ماريد اشوف خلقتج.
هند:- اييييي تريد ترجعني لأهلي حتى يخلالك الجو ويه هالفصلية الساقطة الي تتمضحك وية الرايح والجاي.
ضرغام:- لزمت هند وكتلتها كتله معدله :- ولج اليوم اسمط عشيرتج.
لمت هدومها وشمرتها بالسياره و رحت بيها للناصرية
ذبيتها ابيتهم وكلت لأبوها هاي بنتك يمك ربيها لا والعباس ابو فاضل ادفنها بمكانها هسه.
الشيخ مزهر:- وليدي ضرغام استهدي بالرحمن شصاير؟
ضرغام:- هاي بنتك يمك واسألها على الي صار. وعفتهم وصعدت بسيارتي ورجعت للبصرة .
بلسم:- عرفت من مروة ورقية انو ضرغام ضارب هند و وداها لأهلها.
و رقية طلعت داخله للغرفة وشايفه سوار عجبها واخذته ما عبالها ذهب.
ضرغام:- وصلت للبيت وصعدت لبلسم وشفت مروة و رقية كاعدين يمها.
ضرغام:- بوية مروة صبيلي استكان جاي من ايدج الحلوه.
مروة:- تأمر خالي.
ضرغام:- رقية انتي اكعدي عندي حجي وياج.
رقية:- منزلة راسها وخايفه.
ضرغام:- بوية انتي شلون تدخلين غرفة خالتج هند؟ وكل هذا ومشيناه بس شلون تاخذين غرض مو مالتج وتمدين ايدج خاص بصفحتنا قصص عراقيه واقعيه بلسم:- حبيبتي رقية لاتبجين ابوج ماراح يأذيج بس يريدج تعرفين انو هالتصرف غلط مايصير تاخذين شي من دون استأذان.
رقية:- انه اسفه والله مو قصدي اخذ شي وحتى مااعرف هذا السوار ذهب عبالي مطلي.
ضرغام:-بنيتي ان جان ذهب او مطلي او حتى نايلون مايصير تمدين ايدج وتاخذين اشياء مو مالتج.
رقية:- اسفه والله بعد مااعيدها.
ضرغام:- بست رقية من راسها .عفية ببنيتي الحبابه ..بوية انه من احجي هيج تره رايد مصلحتج واريدج تتعلمين من اخطائج.
كامت رقية وباست راس ابوها واجتي باستني ونزلت على مروة.
ضرغام :- انداريت على بلسم
وانتي شلون صار راسج؟
بلسم اتقرب عليه ضرغام يريد يشوف راسي :-زين مابيه شي بس شوية وجع.
ضرغام:-غير لو صاير بيج شي ؟؟؟
بلسم:-ابتسمت وباوعت بعينه اول مره اتجرأ هيج..
شتسوي اذا صار بيه شي؟
ضرغام وهو يتقرب اكثر :- احرك الدنيا .
بلسم:- صارت وجوهنا كلش قريبه و واحد يباوع بعين الثاني جان تندك الباب واحنا رجعنا كعدنا عدل
دخلت مروة وجايبه الجاي لضرغام:- اي والله عاشت ايدج بنيتي .
شرب الجاي وكام :- رايح اجيبلج معلاك ومن اجيبه اريدج كله تاكليه .
بلسم:- مااحب المعلاك 😁.
ضرغام:- مو مهم تحبيه المهم تاكليه وتصيرين زينه.
باسني من راسي وراح واني اباوع عليه يا الله شكد صاير حباب.
جاب المعلاك وانطاه لسهاد تسويه وهو راح للديوان .
