رواية وعد زين كامله جميع الفصول بقلم اسماء سعد
-ميث وعد..
-نعم ي أنس..
-ممكن تقولى لبابا يخليكى الميث بتاعتنا..
-منا الميس بتاعتكم فعلا ي أنس..
-لا يعنى تدينا ف البيت..
-طب ليه ماتقولوش انت ي أنس
وبعدين م انا بديكوا ف المدرسة اهو..
-ماهو بابا مث بيقعد معانا ومث فاضى..
لا ي ميث مث بحب اخد ف المدرثه اصحابى بيتريقوا عليا..
-بيتريقوا عليك ليه ي حبيبى، وفين مامتك
-عثان بقعد لوحدى ومث بتكلم مع حد انا مث بحبهم، بابا قال انها طلعت فوق عند ربنا..
-حاضر ي حبيبى هقوله..
انا وعد، عندى 20 سنه، مُدرسه ف مدرسه ابتدائى، عايشه مع ماما وبابا، وماليش اخوات..
نرجع لقصتنا
خلصت كلام مع أنس وابتديت اشرح الدرس، وكنت بفكر ف أنس وازاى هقول لباباه،
أنس عنده اخت توأم اسمها حور بس الحقيقه هى مش زى أنس يمكن انضج شويه عن سنها الذى لا يتخطى ال 6 اعوام..
خلصت وروَّحت، طلعت شقتى وقعد اخبط ع الباب جامد،
-ي نااس ي اللى هنااا افتحوولى، ي خللق، ي هووو..
-ايه ي وعد انتِ كل يوم كده زهقتينا ي شيخه..
-ايه ي ام ابراهيم مش عاجبك العجب لييه، ده انا حتى عامله حس للعماره الميته دى جاتكوا خيبه..
-عامله دوشه ليه ي بت وبتتخانقى مع مين؟...
-ايه ي سُعاد كل ده لازم ارزع ع الباب عشان تسمعوا..
-بطلى لماضه ي بت وقولى كنتِ بتتخانقى مع مين..
-ولا بتخانق ولا حاجه ي سُعاد ده انا كنت بكلم ام ابراهيم جارتنا، مش عاجبها العجب وطالعه تتكلم، ورديت عليها وخليتها سكتت، ناس مابتجيش غير بالعين الحمرا..
-ي بت انتِ كل يوم تطلعيلنا بمصيبه..
-ايه ي حجوج مالك كده ده انا حتى بنتك قول عنى كلمه حلوه يجدع..
-لا يختى انا ماعرفكيش..
-هاااا بتتبرى منى ي سي على، والله عشنا وشوفنا الابهات بيتبروا من بنتهم..
فضلنا نهزر شويه لحد ما ماما راحت تجهز الاكل وانا دخلت غيرت وارتاحت شويه لحد ما الاكل يجهز..
بعديها بدقايق ماما ندهت عليا..
-يلا ي وعد الاكل جهز..
-حاضر ي ماما جايه اهوو..
طلعت وقعدت معاهم ع السفره وقعدنا نهزر شويه، قاطعتهم وقولتلهم..
-انا عايزه ادى درس خصوصي لبنت و ولد ف بيتهم..
بابا رد عليا..
-ليه ي بنتى ما انتِ بتديهم ف المدرسه؟!...
-ي بابا مش بيفهموا ف المدرسه وعادى دول اطفال يعنى..
-سيبها ي حج اهى تطلع شويه من الاوضه اللى كاتمه نفسها فيها دى، ومنها تجيب مصروفها وتخفف عليك حِمل المصاريف..
رد بابا وقال..
-طيب ي سُعاد هسيبها المره دى، بس تاخد بالها من نفسها..
-حاضر والله هاخد بالى من نفسي اووى، شكرا ي بابا ي عسل انتت..
وف سرى حمدت ربنا انهم وافقوا.. وف الحقيقه انا مش هاخد منهم فلوس بس سكت عشان يوافقوا
فوقت من افكارى ولاقيت ماما اتكلمت..
-اسكتى ي بت انتى بتعاكسي جوزى وانا قاعده، احترمينى حتى..
-الله الله انتى بتغيرى ي سُعاد اوعى بقى..
-ايوه طبعا مش جوزي لازم اغير عليه، اسكتى انتِ ماتدخليش..
-طيب ي سُعاد انا سيباكم خالص اهو عيشوا حياتكم..
-بس ي بكاشه
ضحكنا وانا سبتهم ودخلت عشان انام، بس ف الحقيقه ماعرفتش انام كنت بفكر ازاى هقول لبابا أنس وهكلموا ازاى وماوصلتش لحل،
تعبت من التفكير ونمت..
صحيت الصبح بدرى زى عادتى، اتوضيت وصليت، وماما ندهت عليا عشان افطر..
-يلا ي حبيبتى الفطار جهز..
-حاضر ي ماما جايه اهو..
طلعت قعدت فطرت معاهم وبعد ماخلصت، دخلت غيرت ونزلت،
استنيت تاكسي واول ما وصل ركبت، وبعد دقايق وصلت المدرسه،
اول ما دخلت شوفت انس وحور واقفين جمب شاب ف التلاتينات تقريبا ده باباهم..
روحت عندهم..
-ازيك ي انس عامل ايه..
-الحمدلله ي ميث، ده بابا اللى حكتلِك عليه..
-يارب دايما ي حبيبى، تمام ادخل انت فصلك وسيبنى مع بابا..
-حاضر
أنس وحور دخلوا فصلهم وانا فضلت مع باباهم..
-اهلا بحضرتَك، انا ميس وعد..
-اهلا.. انا زين
-اتشرفت بيك ي استاذ زين..
-أنس قالى انك عايزانى ف موضوع ايه هو؟!...
-اه كنت عايزه اكلم حضرتك وقولت لأنس يقولَك..
-اتفضلى سامعك..
-بص ي استاذ زين انا عايزه ادى انس وحور درس خصوصي ف البيت لأنى حاسه ان انس مش مُستجيب ف المدرسه وكمان ع طول قاعد لوحده ف انا هحاول اراجع معاه وهو لوحده حتى يقدر يستجيبلى وهو لوحده او هو واخته.
-امم.. تمام ماشي
هتاخدى كام ف الليله دى؟....
-لا ي استاذ زين انا مش بتكلم ف حكايه فلوس ولا عايزه فلوس
-تمام بس المواعيد هتكون ايه لأنى مش ببقى فاضي
-كل يوم الساعه 4
-امم كويس هكون ف الشغل
-تمام اتفقنا
عن اذنَك عندى حصه..
-اتفضَلى..
مشيت من قدامه وانا كنت عايزه امسكه من رقبته اخنقه ايه الراجل ده؟!...
ده مش راجل ده لوح تلج!...
اعععع نرفزنى ابن اللزينه..
دخلت الفصل وقعدت اشرح الدرس،
وكنت بحاول اخلى انس يطلع من المود اللى هو فيه بصراحه انا مش عارفه ليه منعزل وليه قاعد لوحده طول الوقت ليه مش بيضحك؟.
ليه مش بيهزر ويلعب؟.. وازاى باباه ساكت عليه كده؟...
-أنس ي حبيبى مالك ليه بتقعد لوحدك ومش بتلعب مع زمايلك؟...
-انا بحب اقعد لوحدى مث بحب العب مع حد..
-امم طب تيجى تلعب معايا؟..
-ماثى
-يلاا بسررعهه
خليته قام يلعب معايا وقعدت اهزر معاه وازغزغه واجرى وراه واستخبى وكان مبسوط جدااا وانا فرحت انه ضحك وبقى مبسوط..
-ميث وعد.
-ايه ي أنس فى حاجه؟..
-ممكن احضنك؟..
-اه ي حبيبى ممكن اووى تعالى..
حضنته جامد بصراحه انا اللى كنت عايزه الحضن ده مش هو وكنت فرحانه اووى انه بيستجيب معايا..
-ميث وعد انا بحبك اووى، ماتسبنيش زى ماما..
-وانا كمان بحببككك اوووى، متخافش ي حبيبى مش هسيبك..
حضنته تانى وعينى دمعت مش عارفه ايه اللى حصل خلى طفل يوصل للحاله دى،
بس انا لازم اعرف ايه اللى حصل..
-حوور تعالى ي حبيبتى عايزاكى..
-نعم ي ميس وعد..
-هسألك سؤال صغنون قد كده وتردى عليا ماشي؟..
-ماثي ايه هو السؤال ي ميس؟..
-هو انس ماله وليه بيقعد لوحده؟..
-ااه اصل لما عرف من بابا ان ماما راحت عند ربنا هو زعل ان معندوث ماما زى باقيت العيال وبقى عنده اتكئاب...
-قصدك اكتئاب؟....
-اه هو ده وبقى يقعد لوحده ف الاوضه..
-طب باباكى فين ليه مش بيقعد معاكم.؟..
-بابا مثغول ف الثغل وكل ما انس يطلب منه يقعد معانا يزعق ويقول انه هو مث فاضلينا ف انس يزعل ويفضل يعيط لحد مايجيلوا تثنجات (تشنجات) والداده هى اللى بتفضل معانا
-تمام ي حبيبتى روحي كملى لعب
(ملحوظه أنس وحور عندهم لدغه ف ال س وال ش ف عادى يعنى)
فضلت متنحه ازاى طفل يوصل للحاله دى و ازاى الاب يعاملهم كده ازاى جالوا قلب يسيب عياله ف الحاله دى..
فضلت شويه ع الحال ده لحد ما سهى صاحبتى جات وفوقتنى من صدمتى..
-ايه ي بنتى فينكك عماله اكلمك وانتِ ولا هنا سرحانه ف ايه؟..
-هاا.. لا ولا حاجه معاكى اهو..
-طيب احنا خلاص خلصنا المفروض نروح دلوقتي.. هتروحى ولا هتعملى ايه؟...
-اه هروح ارتاح شويه عشان الساعه 4 هروح ادى درس..
-تمام ي حبيبتى اشوفك بكرا سلام..
-سلام
مشيت سهى وانا لميت حاجتى ومشيت استنيت تاكسي واول ما وصل ركبت وكنت لسه ع نفس صدمتى مش عارفه اتخطى مش عارفه اصدق اصلا،
فوقت ع صوت السواق وهو بيقولى انى وصلت، نزلت وطلعت شقتى وخبطت،
ماما فتحتلى..
-تتحسدى مش عامله ازعاج زى كل يوم
ايه ده مالك ي بت فى ايه..؟..
-هاا لا مافيش تعبانه شويه هدخل ارتاح
-تمام ادخلى وهحضرلك الاكل
-لا ي ماما مش جايلى نفس انا هرتاح شويه وصحينى 3:30 عشان معاد الدرس
-تمام ي حبيبتى روحي
دخلت اوضتى ونمت ماحستش بحاجه..
