رواية غرفة العمليات كامله جميع الفصول بقلم جمانه السعيدي
اني اسيل اكبر بنيه بعائلتي
عائلتي تتكون من بابا مصور فوتغراف طبعا من أمهر المصورين خبرة ٢٧ سنه بمجال التصوير
طبعا ٢٧ سنه خبره اقصد الحد السنه الي صار بيها الحدث الي غير كل حياتنا
سنة ٢٠١٨
وماما ربت بيت وطباخه درجى اولى
انسانه مسالمه وطيبه وحنينه كل النهار مخلصته بلمطبخ
عليه نفس بلطبخ عجيبه
لو طكت بيضه الطعم خرافي
لو ابسط طبخه تحس الطعم يضرب بلدماغ
وعندي خوات ازغر مني ثنيين نها ولمار
هاي هي عائلتي المتواضعه
اني ملامحي حلوه بيضه وجهي دائري طولي ١٦٥
جسمي حلو
شعري كيرلي الحد نص ضهري
متدينه اصلي واني بعمر ٦ سنوات
محجبه واني زغيره اني وخواتي لبسنا الحجاب
من صف اول ابتدائي
ماعدنا مشاكل من اي نوع الجوارين كلهم يحبونه
سمعتنا طيبه بلمنطقه
اتخرجت سنة ٢٠١٧ من المعهد
جمانه السعيدي
كعدت بلبيت اساعد امي بلشغل
كلش احب التصوير ودائما اخترع افكار حديثه للتصوير
واعرف افتح الكامرا واركبها مره ثانيه
الصور داخل البيت اختصاصي
اي مناسبه عائليه اني المصوره المحترفه الهاي الحفله
اصيد زاويه التصوير لو اطير
بس بابا رافض فكرت التصوير مايقبل اشتغل وياا
او اساعده
عندا مبدء البنيه مكانها بيت زوجها
وزوجها هو الوحيد الي اله الحق يحدد تشتغل لو لا
اوتتوضف او يكون الها عمل خارج البيت
محد اله دخل غير زوجها
وعندا مبدء ثاني يكول البنات مخلوقات للبيت للراحه
ليش تطلع وتشتغل وتتعب
وتتعرض طول النهار للحجي والتحرش
ليش تتحمل المسوليه
المسوليه رب العالمين خالقها للرجال
والبيت والحمل والولاده ذني مسولية الزوجه
والي مستحيل الزوج يكدر يشتغلهن بمكانها
جمانه السعيدي
بعد مااتخرجت بست اشهر
اجت علينا وحده
اندكت الباب واني فتحته
جنت لابسه تراك ماروني وبي أقلام ابيض ورافعه شعري
اسيل...تفضلي
...زاد فضلج ماما موجوده
اسيل...اي موحوده منوحضرتج
....خطار
اسيل...هله بلخطار تفضلي
...انتي اسيل
اسيل...تعرفيني
...اي اني جايه علمودج
دخلته جوا ورحت الامي
اسيل...ماما وحده برا تكول اريد امج
امي...منو تعرفيها
اسيل...اول مره اشوفها
امي...ماتعرفين شتريد
اسيل...لا مااعرف
امي...اوكف هنا اروح اشوفها
اسيل..امي غيري ملابسج ريحة الكبه تارسه البيت
امي... اي هسه اغير ملابسي بسرعه روحي انتي اكعدي
يمها علما اغسل وابدل
جمانه السعيدي
اسيل ...طفيت الطباخ طلعت عصير وبطل مي خليتها بصينيه وخليت كلاص ورحت
بس دخلت عليه
...اني ام ماهر
اسيل...اهلا وسهلا
ام ماهر...الناس الطيبه دلتني عليكم
اسيل...علينا خير انشاء الله
ام ماهر...اني ابني موضف بلتربيه مو عبالج شاب طايش لا ابني عمرا ٣٠ سنه
اسيل....كلت بكلبي واني شنو علاقتي بلموضوع ليش تحجيلي عن ابنها
ام ماهر....صار اكثر من خمس سنوات ادور الابني على عروسه
بس الله يسلمه اي وحده يروح عليه ماتعجبه
يريد وحده حلوه متدينه من عائله معروفه
اهل الرحم دزونا عليكم بلكت تصير القسمه
راسا دخلت امي علينا اني انسحبت من الكعده
تقريبا ٤٠ دقيقه وطلعت ام ماهر من بيتنا
اسيل...هاا ماما شكووو
امي..جايه عليج تريد تخطبج
اسيل... بس اني اريد اتوظف بلاول اريد اكون مستقله
امي...ايجوز هو يجيبلج وضيفه
اسيل.. بس تكول عمرا ٣٠ واني توني دخلت ٢١
امي...اذا ابن اوادم العمر ما يااثر بلعكس الرجال الجبير يصير فاهم اكثر
وعندا تجارب بلحياة اكثر
احسن من شباب هلوكت
من يجي ابوج اخلي يسئل عليهم لان الولد يريد يشوفج
اسيل...اني اذا مايعجبني ماااوافق شنو بس هو اذا ماعجبته مايوافق
امي...كلشي قسمة رب العالمين
المغرب رجع بابا وامي حجتله كلشي
بابا فرح حيل لان يريد يزوجنا ويستر علينا قبل لا يموت
هاي كانت الكلمه الي ماتفارك السانه دائما
بابا سئل عنه وعرف هو خوش انسان عصامي معتمد على نفسه
ماعندا مشاكل
هو أكبر واحد بلعائله عندا بعد خوان ثنيبن واخت ازغر شي
بعد يومين من البحث والسؤال عن ماهر
اقتنع بي بابا لان كل الناس تحمد بااخلاقه
بابا رجع خبر خلي يجي الولد اكعد ويااا
اتصلت ام ماهر علينا ثالث يوم
ام ماهر...شنو الاخبار
امي...خلي ماهر يجي بليل حتى يشوف البنيه ابوها يريد يحجي وياااا
فرحت ام ماهر لان تعبانه وهي ادور على بنيه بيها كل المواصفات الي يريدها ماهر
كان الموعد بلتسعه بليل
اجا ماهر هو وأمه
على فكره ابو ماهر ميت صار اكثر من ثمن سنوات
بابا طلع استقبلهم
اني كنت ارتب شكلي بغرفتنا اني وخواتي
لبست نفتوف بسيط بنفسجي ساده طويل والردن منفوخه وحجاب كريمي مكياج كلش خفيف
شي بسيط
دخلنا اني وامي سلمنا وكعدنا اني كعدت بصف بابا
كبال ماهر
شاب مرتب لابس بنطرون جينز حبري وقميص ابيض
مرتب شعرا
عندا لحيه وشوارب
كان يحجي وياا بابا وعينه عليه
مبين من كلامه رزن يختار مواضيع يحجي بيها بعنايه
بعدين ام ماهر سئلتني انت شمخلصه
طبعا هذا السوال حتى ماهر يسمعني احجي
اسيل.. معهد محاسبه السنه تخرجت
ام ماهر...تعرفين تطبخين
اسيل...اي اعرف
عشر دقايق وطلعت من المكان كنت احس نفسي محرجه
احس الاضواء كله مسلطه عليه
تقريبا نص ساعه طلعووو
الي فهمت اني عجبت ماهر
بحيث يريد يحدد موعد المهر وياا بابا قبل لا يطلع من بيتنا
بابا....اريد وقت نسئل ونتأكد واسئل البنيه وارجعلك خبر
طلعو من بيتنا واني رحت غيرت ملابسي
جمانه السعيدي
امي اجت الغرفتنا
امي...تعاي اسيل ابوج يريدج
دخلت لكيته كاعد
اسيل...هااا بابا
بابا......شنو رائيج
اسيل...انت اعرف مني بهيج شغلات الي تكول علي يصير
بابا...زين اني باجر اروح اسئل عنا اكثر
واتأكد من اخلاقه
اني الولد عاجبني
اسيل...اني من ايدك هاي الايدك هاي شتكول اني تحت امرك
بابا...الله يبارك بيج ويحفظج
يومين بابا ماخله احد ماسئله عنه بمكان عمله
بشارعهم ووين يروح ووين يجي
الكل يحمد بااخلاقه
رجع بابا للبيت.... هاهي نتوكل على الله الولد الكل يحمدون بااخلاقه
بذني اليومين ام ماهر تتصل الصبح والعصر
تكول مامصدكه ماهر اقتنع وقبل اخطبله
هلكد ماسامع عنا كلام حلو بلمنطقه متخبل يريد يعقد اليوم قبل باجر
بعد يومين امي ردت على ام ماهر وحددنا يوم المهر
دزلي فلوس حتى اشتري ذهب على ذوقي
واشتري فستان واحجز الصالون
رحنا اني وامي اشتريت طقم ذهب كلش حلو
وفستان اوف وايت كلش مرتب وحجزنا بلصالون
٣ ايام واني كل يوم اروح وارجع اجهز اني وماما للمهر
اليوم الرابع رحت حفيت وعدلت شعري
اليوم الخامس على اساس استراحه
خلصنا واحنا نعزم علمود الحفله
وصلنا اليوم المهر
جاب وياا شكد ناس
بيتنا انترس نسوان وزلم
بلاول عقدلي الشيخ وبعدين عقد الماهر
الزلم طلعت بقو بس اخوانه وامه وخالاته واخته
دخل عليه لابس قاط رصاصي وقميص ابيض
بس شافني ابتسم
حسيته فرحان بيه رغم ماكو اي تعارف بينا
بس شفت الفرحه بعيونه
باسني براسي لبسني الذهب
طلبو منه يركص ويركصني وياا بس ماقبل
ماقبل اي احد ياخذلنا صور بس بتليفونه
كان منبهه على امه واخته ممنوع احد يصورني
كملت الحفله
بابا عزمهن يتعشون عدنا بس ماقبلو
اني حسيت نفسي حيل تعبت من الساعه عشره طلعت من البيت رحت للصالون الحد اذان المغرب يله طلعو من بيتنا
كنت حاسه بتعب دخلت غرفتي نزعت الفستان ولبست تراك
طلعت للحمام غسلت وجهي ورفعت شعري
بعدين دخلت غرفتي تمددت
ماعندي اي احساس اتجاه ماهر
لان مااعرف شنو طبعه تصرفاته شلون
اكيد راح اتعرف علي
بلايام الجايه
بس مبين خوش ولد
وبعد الله اعلم بلنوياا والقلوب
محد يكدر يقيم بشر اله يعاشره
العشره هي الي تكشف الناس على حقيقتهم
