 |
اسكريبت ساجد ورحمة الفصل الاول بقلم حبيبة المصري
- رحومة أعمليلي بانيه و مكرونة بالله عشان جعان
جملة خرجت من ساجد أخويا الساعة تلاتة الفجر وأنا واقفة قُدام المراية بحط الماسك على وشي، فا قولتله :
- لا مش فاضية كُل خيار
لقيته بيبصلي بنظراته البريئة اللي بتخليه يصعب عليا واعمله اللي هو عايزُه زي الهبلة وقال :
- عشان خاطري يا رورو، دا أنا أخوكِ الكبير حتى
بصراحة صِعب عليا و لقيتني خارجة من الأوضة وأنا بقولُه بغيظ :
- لولا النظرة دي بس
لقيته ضحك و راح الصالة و هو بيقول بنبرة مرحة :
- حبيبتي يا رحومتي
ضحكت عليه الكبير بقا نعمله أيه ... دخلت المطبخ و جيت أجيب المكرونة لقيتها خلصانة، بس مش مشكلة، مفيش مكرونة يبقى في فشار ... و بشطارتي اللي سيجو حبيب قلب أخته متعود عليها الفشار نُصه أتحرق ...
لقيته جاي من الصالة وهو بيقول بشَك :
- رحمة، متقوليش أن البانيه شاط زي المرة اللي فاتت
أبتسمتِله أبتسامة هبلة بيجي بعدها كُل خير وقولتله ببراءة :
- لا يا روحي متقلقش، مفيش بانيه أصلاً عشان يشيط
بصّلي بريبة وقال بقلق من مصايبي المعهودة :
- تبقى المكرونة هي اللي شاطت
جاوبته بنفس البسمة :
- لا يا حبيبي مفيش مكرونة أصلاً عشان تشيط
لقيته صوّت في وشي مرة واحدة وبيقول :
- يبقى أيـــــه الـلــي شـــــاط يا مصيبة؟!
جاوبته و بكُل ثقة :
- الفشار، الفشار نصه شاط
لقيت وشه أتشنج و رفع أيده وحطها فوق قلبه أكنه بيطلع في الروح وقالي :
- كشفت راسي و دعيت عليكِ يا رحمة يا بنت أمي و أبويا
بصيتلُه بعدم رضا وقالت وأنا بحاول أقنعه بوجهة نظري اللي هتلبسني في
الحيطة في يوم من الأيام :
- يا سيجو بُص لنُص الكُباية المليان، يعني لسة فاضل نص الفشار السليم متقلقش
هو حبيبي ماتكلمش، هو جِه جابني من قفايا ولا كأنه قافش حرامي غسيل بيسرق غسيلنا و رماني برا المطبخ وقالت بعصبية :
- بــــرا بــدل مــا ألـبـسـك بـالـحـلة فــي وشِـــك
خرجت جري وأنا راسي مرفوعة بشموخ ولا كأني مطرودة طردة محترمة بس مش مشكلة سيجو يعمل اللي هو عايزُه
سيبته في المطبخ و روحت حطيت الماسك بتاعي و قعدت في الصالة و شغلت مسرحية على الشاشة و شوية و لقيت سيجو خارج من المطبخ و شايل صينية عليها ساندويتشات برجر و طبق فشار جديد بدل اللي أتفحم منّي وقعد جنبي ومدلي الصينية و قالي بقرف :
- خُدي ياختي عارف أنك بتحبيه بطماطم، يارب يطمر فيكِ بس
حبيبي والله رغم أنُه مش طايقني بس عملي اللي بحبُه حبيب قلب أخته ده
قربت منه و بوست خده لقيته بيبعدي عنُه و هو عايز يلطم وبيقول بغيظ :
- يا بنتي أرحميني بقا، بهدلتي وشي
- أيه يا سيجو ده ماسك طبيعي بيرطب البشرة تيجي احطِلَك؟
أقترحت عليه ببراءة شديدة لقيته بيصرح برفض، لازم أتقبل رفضُه كأخت متفهمة ... بعد نص ساعة كان قاعد جنبي و حاطط نفس الماسك و مش بس كِدا لا يا أنا حطيتله كليبسات فراولة في شعره علي شكل حرف الراء جوا قلب، شكله كوتي أوي، هو آه عايز يقتلني دلوقتي و يخلص مني بس مش مشكلة سيجو حبيبي يعمل اللي هو عايزُه، سألته وأنا بكتم ضحكتي :
- حلوة الكلبسات يا سيجو ؟
بصّلي بقرف و قال :
- أسكتي عشان أنا على تكة و هجيبك من شعرك
حبيبي يا سيجو، كم أنت حنونٌ يا رجُل
